1. Ncinzi Jehova ncaakacita kuli umwi aumwi wesu?

JEHOVA wakakwela umwi aumwi wesu kulinguwe. (Joh. 6:44) Amuciyeeyele buyo eeci ncocaamba. Ciindi Jehova naakalanga-langa mabbiliyoni aabantu bali munyika, wakabona cintu cimwi ciyandika kapati mulindinywe, imoyo mubombe uukonzya kumuyanda. (1Mak. 28:9) Jehova ulimuzyi, ulamumvwisya, alimwi ulamuyanda. Eelo kaka cilakulwaizya eeci!

2. Mbuti Jesu mbwaakapa cikozyanyo citondezya Jehova mbwaibikkila maano mbelele yakwe imwi aimwi?

² Jehova ulamulanganya nywebo, alimwi ulabalanganya abalo bakwesu abacizyi Banakristo boonse. Mucikozyanyo, Jesu wakakozyanisya Jehova kumweembezi. Kuti akati kambelele zili 100 yomwe yasweeka, ncinzi mweembezi ncakonzya kucita? ‘Ulazisiya mumalundu eezyo zili 99 akuunka kuyooyandaula yeeyo yasweeka.’ Ciindi mweembezi naayijana eeyo yomwe yasweekede, takooinyemena pe. Pele ulakkomana kapati. Ino twiiya nzi? Mbelele iili yoonse ilayandika kuli Jehova. Jesu wakaamba kuti: “Taata uuli kujulu tayandi kuti umwi wabasyoonto aaba alobe.”—Mt. 18:12-14.

3. Ncinzi ncotutiilange-lange mucibalo eeci?

³ Tatuyandi kutyompya mukwesu naa mucizyi uuli woonse. Mbuti mbotukonzya kweeleba kulebya bamwi? Alimwi ino inga twacita buti kuti umwi watunyemya? Tulayiingula mibuzyo eeyi mucibalo eeci. Pele cakusaanguna, atwiiye zinji kujatikizya ‘basyoonto aaba’ ibaambidwe mulugwalo lwa Matayo caandaano 18.

4. Ino “basyoonto aaba” mbaani?

⁴ “Basyoonto aaba,” mbaasikwiiya ba Jesu boonse baziimo ziindene-indene. Tacikwe makani aciimo cabo, boonse bali “mbuli bana basyoonto” nkaambo balazumina kuyiisyigwa a Jesu. (Mt. 18:3) Nokuba kuti bazwa mubukkale bwiindene-indene, bajisi zilengwa, bube alimwi akubona zintu munzila iindene-indene, boonse balatondezya lusyomo muli Jesu. Awalo, ulabayanda kapati.—Mt. 18:6; Joh. 1:12.

5. Ino Jehova ulimvwa buti ciindi umwi naalebya naa kunyemya umwi wabantu bakwe?

⁵ Boonse “basyoonto aaba” balayandika kuli Jehova. Kutegwa tuzyibe mbwalimvwa, atuyeeye mbotulimvwa kujatikizya bana. Tulabayanda. Tulayanda kubakwabilila nkaambo tabajisi nguzu, luzyibo, alimwi abusongo mbuli bapati. Mubwini, tatuyandi kubona muntu uli woonse kapenga, pele tulaindila kunyema ciindi muntu umwi napenzya mwana. Mbubwenya buyo, Jehova uyanda kutukwabilila. Alimwi ulanyema kapati ciindi umwi naalebya naa kunyemya umwi wabantu bakwe.—Is. 63:9; Mk. 9:42.

6. Kweelana alugwalo lwa 1 Bakorinto 1:26-29, ino nyika ibabona buti basikwiiya ba Jesu?

⁶ Muunzila nzi zimwi basikwiiya ba Jesu mobali mbuli “basyoonto aaba”? Mubwini, ino mbaani nyika mboibona kuti balayandika? Mbantu bavwubide, ibali aampuwo, alimwi abaabo balaanguzu. Mukwiimpana, basikwiiya ba Jesu babonwa kuti mbantu batayandiki, ibatakwe mulimo alimwi “basyoonto.” (Amubale 1 Bakorinto 1:26-29.) Pele Jehova tabusyi mbwababona oobo.

7. Ino Jehova uyanda kuti katulimvwa buti kujatikizya bakwesu abacizyi?

⁷ Jehova ulabayanda babelesi bakwe, tacikwe makani naa bali kumubelekela kwamyaka minji naa mbapya mukasimpe. Bakwesu abacizyi boonse balayandika kuli Jehova, eeci caamba kuti akulindiswe balayandika. Tweelede kuba “aluyando kuciinga coonse cabakwesu” ikutali buyo bamwi. (1Pet. 2:17) Tweelede kulyaaba kucita kufwumbwa ncotukonzya kutegwa tubakwabilile akubalanganya. Kuti twazyiba kuti twanyemya naa kulubizyila umwi, tatweelede kucita mbuli kuti kunyina cakacitika naa kulilubya-lubya buyo. Nkaambo nzi bamwi ncobakonzya kunyema? Ambweni akaambo kambobakakomena, bakwesu abacizyi bamwi balimvwa kuba baansi. Bamwi inga mbapya mukasimpe, aboobo tabanaiya kuti beelede kulekelela bamwi ciindi nobabalubizyila. Kufwumbwa naa cili buti, tweelede kusolekesya kululamika zintu. Kuyungizya waawo, muntu uufwambaana kunyema akaambo kamicito yabamwi, weelede kuzyiba kuti ujisi bube butayandiki mbwayelede kucinca. Weelede kucita oobu kutegwa awalo abe aluumuno lwamumizeezo akuzumanana kumvwana abakwesu.

8. Mbube nzi bwakadumide mumazuba aa Jesu ibwakabajatikizya basikwiiya bakwe?

⁸ Ncinzi cakapa Jesu kubandika kujatikizya “basyoonto aaba”? Basikwiiya bakwe bakamubuzya kuti: “Ino nguni mupati kwiinda boonse mu Bwami bwakujulu?” (Mt. 18:1) Ba Juda banji kuciindi eeco bakali kubona zyuuno alimwi ampuwo kuti zyakali kuyandika kapati. Syaazibwene umwi wakaamba kuti: “Kuyandisya kupegwa bulemu alimwi ampuwo nzyezintu izyakali kuyandika kapati mubuumi bwabo.”

9. Ncinzi basikwiiya ba Jesu ncobakeelede kucita?

⁹ Jesu wakalizyi kuti basikwiiya bakwe bakeelede kubeleka canguzu kutegwa bagusya muuya wakuzundana mumoyo wabo  iwakadumide mucilengwa caba Juda. Wakabaambila kuti: “Ooyo mupati kwiinda boonse akati kanu abe mbuli musyoonto kwiinda boonse, awalo ooyo uusololela abe mbuli mubelesi wanu.” (Lk. 22:26) Tucita zintu mbuli “musyoonto kwiinda” ciindi ‘notubona bamwi kuti balatwiinda.’ (Flp. 2:3) Ciindi notuba abube oobu, ciyootupa kutalebya bamwi.

10. Ino ndulayo nzi lwa Paulo ndotweelede kubikkila maano?

¹⁰ Bakwesu abacizyi boonse balatwiinda munzila imwi. Tacikatazyi kubona oobo kuti katubikkila maano kubube bubotu mbobajisi. Tweelede kulubikkila maano lulayo mwaapostolo Paulo ndwaakapa Banakorinto lwakuti: “Ino nguni uukupa kwiindana amuntu umbi? Mubwini, ino ncinzi ncojisi ncowatakapegwa buya? Ikuti naa mubwini wakapegwa buya, ino nkaambo nzi ncolidunda mbuli kuti tiiwakapegwa buya?” (1Kor. 4:7) Tweelede kuucenjelela muuya wakuyanda kubikkilwa maano akuyeeya mbuli kuti tulabainda bamwi. Mucikozyanyo, kuti mukwesu kajisi cipego cakupa makani naa mucizyi kajisi cipego cakutalisya ziiyo zya Bbaibbele zinji, mukwesu naa mucizyi ooyo weelede kupa Jehova bulemu.

11. Ncinzi Jesu ncaakali kuyiisya mucikozyanyo cijatikizya mwami amuzike wakwe?

¹¹ Naakamana kucenjezya basikumutobela kujatikizya kutalebya bamwi, Jesu wakapa cikozyanyo camwami alimwi amuzike. Mwami wakamulekelela muzike wakwe cikwelete cipati ncaakalilwa kubbadela. Kumbele, muzike ngweenya wakakaka kulekelela muzikenyina cikwelete cisyoonto kapati ncaakajisi. Kumamanino, mwami wakabikka muzike ooyo uunyina luse muntolongo. Ino twiiya nzi? Jesu wakaamba kuti: “Mbubonya buyo Taata uuli kujulu awalo mbwayoomucitila ikuti umwi aumwi wanu katalekeleli munyina camoyo woonse.”—Mt. 18:21-35.

12. Mbuti mbotucisa bamwi ciindi notukaka kulekelela muntu umwi?

¹² Ncaakacita muzike ooyu tiicakacisa buyo nguwe alikke pele abamwi. Cakusaanguna, kunyina naakatondezya luse kumuzikenyina kwiinda ‘mukumubikka muntolongo kusikila akajole mali ngaakakweletede.’ Cabili, abalo bazike ibakali kulangilila cakacitika cakabacisa. Ciindi “bazikenyina nobakabona cakacitika, bakausa kapati.” Mbubwenya buyo, nzyotucita zilakonzya kubacisa abamwi. Kuti muntu watulubizyila mpoonya twakaka kumulekelela, ncinzi cikonzya kucitika? Cakusaanguna, tulamucisa muntu ooyo kwiinda mukutamulekelela, kutamubikkila maano, akutamutondezya luyando. Cabili, basimbungano tabanookkomani ciindi nobabona mbotweendelezyanya amuntu ooyo.

13. Ncinzi ncotwiiya kucakuluula camupainiya umwi?

¹³ Ciindi notulekelela bakwesu abacizyi, tulagwasyigwa swebo alimwi abamwi. Eeci ncecakacitikila mucizyi mupainiya umwi wazyina lya Crystal. Wakafwumpuzyigwa amucizyi umwi mumbungano. Mucizyi Crystal wakaamba kuti: “Majwi aamucizyi ooyu akali kucisa kapati cakuti zimwi ziindi ndakali kulimvwa mbuli kuti wanditenda acipeni. Alimwi tiindakali kuyanda buya kuunka mubukambausi anguwe. Kumane busungu bwangu alimwi alukkomano zyakatalika kuyaabuceya.” Mucizyi Crystal wakali kulimvwa kuti wakajisi twaambo tumvwika itwakali kumupa kunyema. Pele kunyina naakamubikkilila mucizyi ooyo naa kubikkila buyo maano kujatikizya mbwaakali kulimvwa. Wakalicesya akubelesya lulayo lwamu Magwalo lujanika mu Ngazi Yamulindizi ya November 1, 1999, mucibalo  cakuti “Amujatile Camoyo Woonse”. Wakamulekelela mucizyi. Aboobo mucizyi Crystal wakaamba kuti: “Lino ndilizyi kuti toonse tulasolekesya kusama buntu bupya alimwi akuti Jehova ulilibambilide kutulekelela abuzuba. Lino ndilimvwa mbuli kuti ndakatula cibbudu cilema kapati ncindakanyamwide. Eelo kaka ndilikkomene.”

14. Kweelana alugwalo lwa Matayo 18:21, 22, ino mwaapostolo Petro wakajisi penzi nzi alimwi ncinzi ncotwiiya kubwiinguzi bwa Jesu?

¹⁴ Tulizyi kuti tweelede kulekelela bamwi, alimwi ncecintu ciluzi. Pele cilakonzya kutuyumina kucita boobu. Mwaapostolo Petro awalo mbwaakali kulimvwa mbweena oobu zimwi ziindi. (Amubale Matayo 18:21, 22.) Ncinzi cikonzya kugwasya? Cakusaanguna, amuzinzibale kuyeeya kujatikizya Jehova mbwaakamulekelela nywebo. (Mt. 18:32, 33) Tatweeleli buya kulekelelwa anguwe, pele walo ulacita oobo cakuliyandila. (Int. 103:8-10) Aciindi ncimunya, “andiswe tweelede kuyandana.” Aboobo kulekelela bamwi tacili cintu cakulisalila buya. Tuleelede kubalekelela bakwesu abacizyi. (1Joh. 4:11) Cabili, amuzinzibale kuyeeya cicitika ciindi notulekelela bamwi. Tulakonzya kumugwasya muntu wakatulubizyila, kupa lukamantano mumbungano, kukwabilila cilongwe cesu a Jehova, akupa kuti tulimvwe kwaanguluka. (2Kor. 2:7; Kol. 3:14) Camamanino, amupaile kuli Yooyo uutwaambila kulekelela bamwi. Mutamuzumizyi Saatani kunyonganya cilongwe ncomujisi abakwesu abacizyi. (Ef. 4:26, 27) Tweelede kugwasyigwa a Jehova kutegwa tube aluumuno mumbungano.

15. Kweelana alugwalo lwa Bakolose 3:13, ncinzi ncomweelede kucita kuti mukwesu naa mucizyi wamunyemya?

¹⁵ Ino kuti musyomima wacita cintu catunyemya kapati? Mweelede kucita nzi? Amusolekesye kubamba luumuno amunyoko.  Amumwaambile Jehova kujatikizya mbomulimvwa. Amumulombe kutegwa amulongezye muntu ooyo iwamulubizyila, alimwi akumugwasya nywebo kubona bube bubotu mbwajisi, bwalo Jehova mbwayanda kujatikizya muntu ooyo. (Lk. 6:28) Kuti naa camwaalila kuciluba buyo cibi ncaakamucitila mukwesu, amujane nzila mbotu yakubandika anguwe. Cilayandika kapati lyoonse kuyeeya kuti mukwesu takonzyi kumulubizyila acaali. (Mt. 5:23, 24; 1Kor. 13:7) Ciindi nomubandika anguwe, amumubone kuti ujisi makanze mabotu. Ino kuti katayandi kubamba luumuno? ‘Amuzumanane kumweengelela.’ Amuzumanane kumukkazikila moyo mukwesu ooyo. (Amubale Bakolose 3:13.) Pele ciyandika kapati, mutasoli kumubikkilila mukwesu ooyo, nkaambo kucita boobu kulakonzya kucinyonganya cilongwe canu a Jehova. Mutalekeli cintu cili coonse kumulebya. Kwiinda mucita boobo, mutondezya kuti mulamuyanda kapati Jehova kwiinda cintu cili coonse.—Int. 119:165.

16. Ino mukuli nzi ngwajisi umwi aumwi wesu?

¹⁶ Tulacikkomanina coolwe cakubelekela antoomwe mulukamantano mbuli “tanga lyomwe” “amweembezi omwe”! (Joh. 10:16) Bbuku lya Bakamantene Mukucita Kuyanda kwa Jehova, apeeji 165, lyaamba kuti: “Akaambo kakuti mulagwasyigwa alukamantano oolu, mujisi mukuli wakugwasyilizya kulusumpula.” Aboobo, tweelede ‘kuliyiisya kubona bakwesu abacizyi mbuli mbwababona Jehova.’ Kuli Jehova toonse buyo tuli bana “basyoonto” bayandwa. Sena oobu mbomubabona bakwesu abacizyi? Jehova ulabona alimwi ulalumba kuzintu nzyomucita kugwasya bamwi akubalanganya.—Mt. 10:42.

17. Ino tukanzide kucita nzi?

¹⁷ Tulabayanda bakombima. Aboobo ‘tukanzide kutabikkila mukwesu cilebyo naa cisinkilizyo.’ (Rom. 14:13) Tuyanda kubona bakwesu abacizyi kuti balatwiinda, alimwi akubalekelela kuzwa ansi amoyo wesu. Tutalekeli bamwi kutulebya. Muciindi caboobo, “atusungwaalile kucita zintu ziletela luumuno azintu iziyaka umwi aumwi.”—Rom. 14:19.