1. Ncisyomezyo nzi Jehova ncapa basizibi beempwa?

 NOKUBA kuti Jehova Mulengi wesu, Sikutupa Mulawo, Mubetesi, pele alimwi ngu Taateesu wakujulu siluyando. (Int. 100:3; Is. 33:22) Ciindi nitwabisya alimwi akweempwa ncobeni, ulilibambilide alimwi ulayandisisya kutulekelela. (Int. 86:5) Kwiinda mumusinsimi Isaya, Jehova caluyando usyomezya kuti: “Nokuba kuti zibi zyanu zilasalala pyu, zilatubisyigwa buu mbuli caanda.”—Is. 1:18.

2. Ikuti katuyanda kuba acilongwe ciyumu abamwi, ncinzi ncotweelede kucita?

² Mbwaanga tatulondokede, toonse tulaamba akucita zintu zinyemya bamwi. (Jak. 3:2) Nokuba boobo, eeci tacaambi kuti tatukonzyi kuba acilongwe ciyumu ambabo. Tulakonzya kuba acilongwe ambabo kuti twaiya kulekelela. (Tus. 17:9; 19:11; Mt. 18:21, 22) Ciindi nitwalubizyilana mutuntu tusyoonto-syoonto, Jehova uyanda kuti katulekelelana. (Kol. 3:13) Tulijsi twaambo tubotu itweelede kutupa kucita boobo. Alimwi buya, Jehova ‘ulatulekelela cakumaninina.’—Is. 55:7.

3. Ncinzi ncotutiilange-lange mucibalo eeci?

³ Mucibalo eeci, tulalanga-langa bantu batalondokede mbobakonzya kwiiya kulekelela kwa Jehova. Nzibi zili buti nzyotweelede kwaambila baalu? Nkaambo nzi Jehova ncatukulwaizya kulekelela bamwi? Alimwi ncinzi ncotukonzya  kwiiya kuzwa kubakwesu abacizyi ibakapenga kapati akaambo kazibi zyabamwi?

4. (a) Ciindi mubelesi wa Jehova naacita cibi cipati, ncinzi ncayelede kucita? (b) Mukuli nzi ngobajisi baalu ciindi nobabeteka muntu wabisya?

⁴ Tweelede kwaambila baalu kuti muntu umwi wacita cibi cipati. Mulongo wazibi zimwi zipati ulajanika ku 1 Bakorinto 6:9, 10. Zibi zipati nkutyola mulawo wa Leza. Ikuti Munakristo wacita cibi cipati, weelede kupaila kuli Jehova Leza alimwi akwaambila baalu bamumbungano. (Int. 32:5; Jak. 5:14) Ino baalu bajisi mukuli nzi? Kayi Jehova alikke nguujisi mukuli wakulekelela zibi cakumaninina, calo icikonzyeka kwiinda mucipaizyo cacinunuzyo. Nokuba boobo, kweelana a Magwalo Jehova wakapa baalu mukuli wakubona naa sizibi ulakonzya kuzumanana kuba mumbungano. (1Kor. 5:12) Kutegwa bacite oobo, baalu beelede kujana bwiinguzi kumibuzyo eeyi iitobela: Sena muntu ooyo wakacita cibi acaali? Sena wakakanza buya kucita cibi eeco? Sena wali kucita cibi eeco kwaciindi cili mbocibede? Kwiinda zyoonse, sena kuli zitondezyo zyakuti muntu ooyo wakeempwa ncobeni? Sena kuli zitondezyo zyakuti Jehova wakamulekelela muntu ooyo?—Mil. 3:19.

5. Ino mulimo ngobacita baalu ugwasya buti?

⁵ Ciindi baalu nobabeteka muntu wakabisya, makanze aabo ngakukosola makani aano anyika mbubwenya mbwaakakosolwa kale kujulu. (Mt. 18:18) Ino mbungano zigwasyigwa buti abubambe oobu? Imbungano zilakwabililwa kwiinda mukuba masimpe kuti, basizibi ibateempwi bagusyigwa mumbungano kutegwa mbelele zya Jehova ziyandwa zikwabililwe. (1Kor. 5:6, 7, 11-13; Tit. 3:10, 11) Kunze lyaboobo, cilakonzya kugwasya sikubisya kuti ayempwe alimwi akugwasyigwa akulekelela kwa Jehova. (Lk. 5:32) Baalu balapaila amuntu iweempwa alimwi akulomba Jehova kuti amuponye kumuuya.—Jak. 5:15.

6. Ikuti muntu wagusyigwa mumbungano, sena ulakonzya kulekelelwa? Amupandulule.

⁶ Mbuti kuti muntu iwakabisya kunyina nayeempwa ciindi naabonana abaalu? Kuti caba boobo, ulagusyigwa mumbungano. Kuti naa wakatyola mulawo wamfwulumende, baalu tabakonzyi kumukwabilila, nkaambo Jehova ulabazumizya beendelezi bamfwulumende kubeteka akusubula muntu uuli woonse iwatyola mulawo wamfwulumende, tacikwe makani naa weempwa naa pe. (Rom. 13:4) Nokuba boobo, kuti muntu mukuya kwaciindi waliyeeya, weempwa ncobeni alimwi akuleka bukkale bwakwe bubyaabi, Jehova ulilibambilide kumulekelela. (Lk. 15:17-24) Eeci cilakonzya kucitika nokuba kuti muntu ooyu wakacita zibi zipati.—2Mak. 33:9, 12, 13; 1Tim. 1:15.

7. Muunzila nzi motukonzya kulekelela muntu wakatucitila cibi?

⁷ Eelo kaka cilakulwaizya kuzyiba kuti tauli mukuli wesu ikusala naa Jehova ulamulekelela sikubisya! Nokuba boobo, kuli cintu cimwi ncotweelede kusala. Ino ncintu nzi eeco? Zimwi ziindi, muntu ulakonzya kutucitila cibi, nociba cipati buya, pele ambweni ulakonzya kuzumina kuti wakalubizya alimwi akulomba kulekelelwa. Mpoonya zimwi ziindi, ambweni muntu ooyo takonzyi kucita oobo. Nokuba kuti takonzyi kucita oobo, swebo tulakonzya kusala kumulekelela muntu ooyo kwiinda mukutamubikkilila naa kutamunyemena. Mubwini, cilakonzya kutola ciindi naa ciyandika kubeleka canguzu, kwaambisya kuti naa cibi ncaakatucitila cakatucisa kapati. Ngazi Yamulindizi yamu September  15, 1994, yaamba kuti: “Ciindi notulekelela sikubisya, tacaambi kuti tuubya-ubya cibi ncaakacita. Munakristo uulekelela, usyoma Jehova kuti uyoobeteka cabululami. Nkaambo ngo Mubetesi mululami wabubumbo boonse alimwi uyoocita oobo cabululami aciindi ceelede.” Nkaambo nzi Jehova ncatukulwaizya kulekelela alimwi akusyoma kuti uyoobeteka cabululami?

8. Ino mbuti kulekelela mbokutondezya kuti tulalumba kuluse lwa Jehova?

⁸ Notulekelela tutondezya kulumba. Mucikozyanyo cimwi, Jesu wakakozyanisya Jehova kuli simalelo iwakalekelela umwi wabazike bakwe cikwelete cipati ncaakaalilwa kubbadela. Nokuba boobo, muzike ooyo wakaalilwa kutondezya luse kumuzikenyina iwakajisi cikwelete camali masyoonto buyo kulinguwe. (Mt. 18:23-35) Ino Jesu utuyiisya nzi? Kuti katulumba ncobeni kuluse lupati Jehova ndwatondezya kulindiswe, ciyootuubila kulekelela bamwi. (Int. 103:9) Myaka minji yainda, Ngazi Yamulindizi yakaamba kuti: “Nozivwula buti ziindi nzyotulekelela bantuma, tazikonzyi kweelana aziindi Jehova nzyatulekelela alimwi akutondezya luse kwiinda muli Kristo.”

9. Mbaani Jehova mbatondezya luse? (Matayo 6:14, 15)

⁹ Kuti katulekelela bamwi andiswe tuyoolekelelwa. Jehova ulatondezya luse kuli baabo bali aluse. (Mt. 5:7; Jak. 2:13) Jesu wakakasalazya kaambo aaka ciindi naakayiisya basikwiiya bakwe kupaila. (Amubale Matayo 6:14, 15.) Eeci ncotwiiya kumajwi Jehova ngaakaambila Jobu. Mwaalumi ooyu uusyomeka, wakalityompedwe kapati akaambo kamajwi aacisizya moyo ngaakaambilwa abaalumi botatwe, Elifazi, Bilidadi alimwi a Zofari. Jehova wakalailila Jobu kuti abapailile. Naakamana kubapailila, Jehova wakamuleleka.—Job. 42:8-10.

10. Nkaambo nzi kubikkilila ncokuletela mapenzi? (Baefeso 4:31, 32)

¹⁰ Kubikkilila kuletela mapenzi. Jehova uyanda kuti katukkomana abubotu buboola akaambo kakutabikkilila bamwi. (Amubale Baefeso 4:31, 32.) Utukulwaizya kuti, “koleka kunyema abukali.” (Int. 37:8) Tulagwasyigwa ciindi notutobela lulayo oolu lwabusongo. Kubikkilila kuleta mapenzi aakumubili alimwi amumizeezo. (Tus. 14:30) Kuti twazumanana kumubikkilila muntu umwi, walo tacimujatikizyi pe, mbubwenya buyo, kuti twanywa musamu uukola, ndiswe tutifwe ikutali nguwe. Pele ciindi notulekelela bamwi, ndiswe tugwasyigwa. (Tus. 11:17) Tulaba aluumuno lwamumizeezo amumoyo, alimwi akuzumanana kubelekela Jehova.

11. Ncinzi Bbaibbele ncolyaamba kujatikizya kupilusya cibi? (Baroma 12:19-21)

¹¹ Jehova nguusubula. Jehova tatupede nguzu zyakupilusya cibi kumuntu wakatulubizyila. (Amubale Baroma 12:19-21.) Akaambo kakutalondoka, tatukonzyi kubeteka kabotu mbuli Leza mbwakonzya kucita. (Heb. 4:13) Zimwi ziindi, tulakonzya kweendelezyegwa ambotulimvwa akwaalilwa kubeteka kabotu. Aboobo Jehova wakasololela Jakobo kulemba kuti: “Bukali bwamuntu tabuleti bululami bwa Leza.” (Jak. 1:20) Tulakonzya kuba masimpe kuti Jehova uyoocita cintu ciluzi alimwi akubeteka cabululami.

12. Mbuti mbotukonzya kutondezya kuti tulabusyoma bululami bwa Jehova?

¹² Notulekelela tutondezya kuti tulabusyoma bululami bwa Jehova. Ciindi notusyoma kuti Jehova ulakonzya kubeteka cabululami, tutondezya kuti uyookugwisya kucisa  koonse kuletwa akaambo kacibi. Munyika yakwe mpya, zintu zibyaabi izyakatucitikila “tazikaibalukwi limbi pe, nokuba kuyeeyegwa mumoyo” naaceya. (Is. 65:17) Pele sena cilakonzyeka kuleka kunyema alimwi akutamubikkilila muntu watulubizyila? Atulange-lange bamwi mbobakacikonzya kucita oobo.

13-14. Ncinzi ncomwiiya kujatikizya kulekelela kucakuluula caba Tony aba José?

¹³ Bunji bwabakwesu abacizyi bakasala kubalekelela bamwi nokuba kuti micito yabo yakabacisa kapati. Nzilongezyo nzi nzyobakajana akaambo kakucita boobo?

¹⁴ Myaka minji kabatanaba umwi wa Bakamboni ba Jehova, ba Tony, * ibakkala ku Philippines, bakazyiba kuti mupati wabo musankwa wakajaigwa aba José. Aciindi eeco, ba Tony bakali bantu bakali kapati alimwi bakakanzide kujola cibi. Kumane ba José bakaangwa akubikkwa muntolongo akaambo kamulandu ngobakacita. Kumbele, ba José bakaangununwa, mpoonya ba Tony bakakanza kuti bayoobayandaula akubajaya. Kumane bakaula ntobolo. Tiilyakalampa ba Tony bakatalika kwiiya Bbaibbele a Bakamboni ba Jehova. Baamba kuti, “Ciindi nindakali kwiiya Bbaibbele, ndakazyiba kuti ndakeelede kucinca bukkale bwangu calo cakali kubikkilizya akuleka bukali.” Mukuya kwaciindi, ba Tony bakabbapatizyigwa alimwi lino mbaalu mumbungano. Amweezyeezye buyo ba Tony mbobakagambwa kuzyiba kuti ba José abalo lino mbabelesi ba Jehova babbapatizyidwe! Nobakaswaangana, bakakumbatana calukkomano, kumane ba Tony bakaambila ba José kuti bakabalekelela. Ba Tony baamba kuti, kulekelela ba José nkobakacita kwabapa kukkomana kapati cakuti cakabaalila kupandulula mbobakalimvwide. Masimpe, Jehova wakabalongezya ba Tony akaambo kamuuya wakulekelala ngobakatondezya.

15-16. Ncinzi ncomwaiya kujatikizya kulekelela kucikozyanyo caba Peter aba Sue?

¹⁵ Mu 1985, ba Peter aba Sue bakali kuswaangana mu Ŋanda ya Bwami, mpoonya  cakutayeeyela, kwakabboloka bbomba. Mwaalumi umwi nguwakateya bbomba eeli mu Ŋanda ya Bwami. Akaambo kaceeci, ba Sue bakalicisa kapati cakuti meso aabo alimwi matwi akanyongana. Kunze lyaboobo, bakacileka kununkizya. * Kanji-kanji, ba Peter aba Sue bakali kulibuzya kuti, ‘Ino nguni wakacita cintu cibyaabi boobu?’ Nikwakainda myaka minji, mwaalumi iwakateya bbomba eeli, walo iwatakali mubelesi wa Jehova, wakajatwa akupegwa mulandu wakupika ntolongo buumi bwakwe boonse. Ciindi ba Peter aba Sue nobakabuzyigwa naa bakamulekelela mwaalumi ooyu, bakaingula kuti: “Jehova utuyiisya kuti kuzumanana kunyema alimwi akubikkilila kulakonzya kutuletela mapenzi kumubili alimwi amumizeezo. Aboobo mboyakamanina buyo kucitika ntenda eeyi, twakalomba Jehova kuti atugwasye kucileka kunyema akubikkilila kutegwa tuzumanane kuba aluumuno.”

¹⁶ Sena cakali cuuba-uba kumulekelela mwaalumi ooyu? Peepe. Ba Peter aba Sue bakaamba kuti: “Zimwi ziindi, ba Sue nobapenga akaambo kakulicisa, inga tulanyema alimwi. Pele tatuzumanani kuyeeya makani aaya, aboobo mizeezo yesu ilafwambaana kukkalikila. Kwaamba masimpe, kuti mwaalumi iwakateya bbomba waakuba mukwesu bumwi buzuba, tuyoomutambula camaanza obilo. Cakuluula eeci cituyiisya kuti, njiisyo zyamu Bbaibbele masimpe zilatwaangununa munzila nzyotutakonzyi kuyeeyela. Alimwi tulakonzya kuumbulizyigwa kuzyiba kuti Jehova lino-lino uyookugusya kucisa koonse.”

17. Ncinzi ncomwaiya kujatikizya kulekelela kucakuluula caba Myra?

¹⁷ Ba Myra bakaiya kasimpe kabakwetwe kale, alimwi kabajisi bana bobilo. Balumi babo tiibakakazumina kasimpe. Mukuya kwaciindi, bakacita bumambe akuusiya mukwasyi. Ba Myra baamba kuti: “Ciindi balumi bangu nobakatusiya abana, ndakalimvwa mbubwenya mbobalimvwa bantu balekelezyegwa amuyandwa wabo, kunyongana, kuusa, kulipa mulandu,  alimwi akunyema.” Nokuba kuti cikwati cakamana, kucisa kwakazumanana. Ba Myra bakaamba kuti: “Kulimvwa boobu kwakazumanana kwamyezi iili mbwiibede, alimwi ndakabona kuti eeci cakali kunyonganya cilongwe ncondijisi kuli Jehova akuli bamwi.” Ba Myra lino baamba kuti, bakacileka kunyema alimwi tabacibabikkilili aabo ibakabakwete. Balombozya kuti, kubota bumwi buzuba, baalumi aabo bakabe acilongwe a Jehova. Aboobo lino ba Myra babikkila buyo maano kuzintu zyakumbele. Mbuli muzyali uuli alikke, bakacikonzya kugwasya bana babo kuba babelesi ba Jehova. Mazuba aano, ba Myra balikkomene kubelekela Jehova antoomwe abana babo alimwi amikwasyi yabo.

18. Ncinzi Jehova ncayakucita mbwali Mubetesi Mupati?

¹⁸ Eelo kaka cilakulwaizya kuzyiba kuti tauli mukuli wesu kusala mbwayelede kubetekwa muntu! Mbwali Mubetesi Mupati, Jehova uyakuulanganya mulimo ooyu uuyandika kapati. (Rom. 14:10-12) Tulijisi lusyomo lwakuti Jehova lyoonse uyakubeteka kweelana azyeelelo zyakwe ziluleme kujatikizya ciluzi acitaluzi. (Matl. 18:25; 1Bam. 8:32) Kunyina nayakucita cintu cili coonse citaluleme.

19. Ncinzi bululami bwa Jehova ncobuyoozuzikizya?

¹⁹ Eelo kaka tulacilangila ciindi Jehova nayakugusya zintu zyoonse zibyaabi zyakaletwa akaambo kakutalondoka alimwi acibi! Kuciindi eeco, mapenzi aakumubili alimwi aamumizeezo oonse ayoomaninina. (Int. 72:12-14; Ciy. 21:3, 4) Kunyina naayakuyeeyegwa limbi pe. Tulamulumba kapati Jehova nkaambo wakatupa bube bwakucikonzya kumwiiya kwiinda mukulekelela.