1. Kweelana a Mukambausi 7:20, nkaambo nzi kamasimpe nkaakaamba Mwami Solomoni?

 MWAMI Solomoni wakalemba kuti: “Kunyina muntu mululami munyika uucita buyo zibotu lyoonse kakunyina kubisya.” (Muk. 7:20) Aaya masimpe! Nkaambo toonse tuli basizibi. (1Joh. 1:8) Aboobo toonse tuyandika kulekelelwa a Leza alimwi abantuma.

2. Mbuti mbocimvwika kulekelelwa amulongwe?

² Tacidoonekwi buya kuti mulaciyeeya ciindi nomwakanyemya mulongwe wanu. Akaambo kakuti mwakali kuyanda kuti cilongwe canu cizumanane, mwakalilekelela kuzwa ansi aamoyo. Ino mwakalimvwa buti ciindi mulongwe wanu naakamulekelela kuzwa ansi aamoyo? Sena mwakaanguluka? Inzya, alimwi buya mwakakkomana!

3. Ncinzi ncotutiibandike mucibalo eeci?

³ Tulayanda kuti Jehova kali Mulongwe wesu mwini-mwini, pele zimwi ziindi tulaamba naa kucita zintu zimunyemya. Nokuba boobo, nkaambo nzi ncotukonzya kuba masimpe kuti ulayanda kapati kutulekelela? Ino kulekelela kwa Jehova kwiindene buti akulekelela kwesu? Ino mbaani Leza mbalekelela?

4. Nkaambo nzi ncotukonzya kuba masimpe kuti Jehova ulilibambilide kulekelela?

⁴ Kwiinda mu Jwi lyakwe, Jehova usyomezya kuti ulilibambilide kutulekelela. Ciindi Jehova naakaliyubununa kuli  Musa a Cilundu ca Sinai, wakatuma mungelo kwaamba kuti: “Jehova, Jehova, Leza siluse alimwi silweetelelo, uutafwambaani kukalala alimwi uuzwide luyando lutamani akasimpe, uutondezya luyando lutamani kubantu bali zyuulu, uulekelela milandu, nsotoko alimwi azibi.” (Kul. 34:6, 7) Jehova ngusiluzyalo alimwi ngu Leza siluse, uulibambilide lyoonse kulekelela basizibi beempwa.—Neh. 9:17; Int. 86:15.

5. Kweelana a Intembauzyo 103:13, 14, ino luzyibo ndwajisi Jehova kujatikizya bantu lumupa kucita nzi?

⁵ Mbwaanga Mulengi wesu, Jehova ulizyi zintu zyoonse kujatikizya ndiswe. Amuyeeye buyo kaambo aaka! Ulizyi zintu zyoonse kujatikizya bantu boonse ibali anyika. (Int. 139:15-17) Aboobo ulakubona kutalondoka koonse nkotwakakona kubazyali besu. Alimwi buya, ulizyi zintu zyoonse zyakatucitikila mubuumi izyakapa kuti katujisi bube bumwi. Ino luzyibo oolu lumupa kucita nzi? Lumupa kutufwida luse.—Int. 78:39; amubale Intembauzyo 103:13, 14.

6. Mbuti Jehova mbwaakatondezya kuti ulayanda kulekelela?

⁶ Jehova wakatondezya kuti ulayanda kapati kulekelela. Ulizyi kuti, akaambo kamicito yamwaalumi wakusaanguna Adamu, toonse twakasinganizyigwa kucibi alimwi alufwu. (Rom. 5:12) Kunyina mbotwakali kukonzya kulyaangununa naa kwaangununa muntu uumbi kukusinganizyigwa ooko. (Int. 49:7-9) Nokuba boobo, Leza wesu siluyando wakatondezya lweetelelo alimwi akubikka bubambe bwakutwaangununa kukusinganizyigwa ooko. Ino wakacita nzi? Johane 3:16 yaamba kuti, Jehova wakatuma Mwanaakwe simuzyalwaalikke kuzootufwida. (Mt. 20:28; Rom. 5:19) Jesu wakapenga kusikila kulufwu kutegwa aangunune muntu uuli woonse uumusyoma. (Heb. 2:9) Eelo kaka cakamucisa kapati Jehova kubona Mwanaakwe ngwayandisya kafwa lufwu lucisa kapati alimwi lwamasampu! Mubwini, Jehova naatakazumina kuti Mwanaakwe afwe ikuti naatakali kuyanda kutulekelela.

7. Ino zikozyanyo nzi zyamu Bbaibbele zyabantu Jehova mbaakalekelela kuzwa ansi aamoyo?

⁷ Mu Bbaibbele muli zikozyanyo zinji zyabantu Jehova mbaakalekelela kuzwa ansi aamoyo. (Ef. 4:32) Ino nguni ngomuyeeya?  Ambweni mwayeeya Mwami Manase. Mwaalumi ooyu mubyaabi wakamubisizya kapati Jehova. Ngowakali kusololela mubukombi bwakubeja. Wakajaya bana bakwe akubatuula kuli baleza bakubeja. Mane buya wakaindizya kubisya kwiinda mukubikka cikozyanyo cibezedwe caleza wakubeja mutempele lya Jehova lisetekene. Kujatikizya nguwe, Bbaibbele lyaamba kuti: “Wakacita zibi zinji mumeso aa Jehova akumunyemya.” (2Mak. 33:2-7) Nokuba boobo, ciindi Manase naakeempwa ncobeni, Jehova wakamulekelela kuzwa ansi aamoyo. Mane wakamupilusya acuuno cakwe cabwami. (2Mak. 33:12, 13) Ambweni mwayeeya a Mwami Davida, iwakacita zibi zipati kuli Jehova, kubikkilizya abumambe alimwi akujaya bantu. Pele ciindi Davida naakeempwa ncobeni alimwi akukuzumina kulubizya kwakwe, Jehova wakamulekelela awalo. (2Sam. 12:9, 10, 13, 14) Mubwini, tulaalusyomo lwakuti Jehova ulayanda kapati kulekelela. Alimwi kweelana ambotutiibone, kulekelela kwakwe kulilibedelede twakweezyanisya akulekelela kwabantu.

8. Mbwaanga Jehova Mubetesi uulibedelede, ino eeci cikujatikizya buti kulekelela kwakwe?

⁸ Jehova “Mubetesi wanyika yoonse.” (Matl. 18:25) Mubetesi mubotu weelede kuti kaumvwisya kapati mulawo. Oobo mbwabede Jehova nkaambo Mubetesi wesu alimwi ngo Sikutupa Mulawo. (Is. 33:22) Kunze lya Jehova, kunyina muntu naba omwe uuzyi kabotu cintu ciluzi alimwi acitaluzi. Ncinzi cimbi ncayandika mubetesi mubotu? Weelede kuzyiba twaambo toonse tujatikizyidwe katanakosola makani. Aboobo Jehova Mubetesi uulibedelede.

9. Makani nzi ngazyi Jehova ciindi nasala kuti amulekelele muntu naa pe?

⁹ Mukwiimpana ababetesi bantunsi, Jehova lyoonse inga ulaazyi kale makani oonse aajatikizyidwe. (Matl. 18:20, 21; Int. 90:8) Kubeteka kwakwe takuyeeme buyo azintu bantu nzyobabona naa kumvwa. Ulamumvwisya cakumaninnina muntu kweelana abube, micito njaakakona kubazyali bakwe, lwiiyo ndwajisi, nkwakkala, mbwalimvwa alimwi abuumi bwakwe. Alimwi Jehova ulabona izili mumoyo wamuntu. Ulizyi kabotu-kabotu icipa muntu kucita cintu cimwi. Kunyina cisisidwe kulinguwe. (Heb. 4:13) Aboobo ciindi Jehova nalekelela muntu, ulacita oobo nkaambo ulaazyi makani oonse aajatikizya muntu ooyo.

10. Nkaambo nzi ncotukonzya kwaamba kuti kulekelela kwa Jehova lyoonse nkwabululami alimwi kuliluzi? (Deuteronomo 32:4)

¹⁰ Kulekelela kwa Jehova lyoonse nkwabululami alimwi kuliluzi. Tasalululi naaceya. Talekeleli muntu akaambo kambwalibonya, naa akaambo kakuti ulivwubide, ulaampuwo kapati naa kuti ulaazipego zinji. (1Sam. 16:7; Jak. 2:1-4) Kunyina uukonzya kusinikizya Jehova kucita cintu cimwi naa kumuula makulo. (2Mak. 19:7) Kusala kwakwe takweendelezyegwi aakunyema naa koongelezyegwa. (Kul. 34:7) Kakunyina akudooneka, Jehova Mubetesi iwiinda kubota nkaambo ulizyi zintu zyoonse kujatikizya ndiswe alimwi abukkale bwesu.—Amubale Deuteronomo 32:4.

11. Mbuti kulekelela kwa Jehova mbokwiindene akulekelela kwabantu?

¹¹ Balembi ba Magwalo aa Chihebrayo bakabona kuti kulekelela kwa Jehova kulilibedelede. Bbuku limwi lyaamba kuti, mubukkale bumwi, balembi aaba bakabelesya bbala lya Chihebrayo “ilibelesyegwa buyo kupandulula nzila Leza njabelesya kulekelela  basizibi. Bbala eelyo kunyina nolyaamba nzila iigaminide bantu mobalekelelana.” Alikke Jehova nguujisi nguzu zyakulekelela sizibi iweempwa ncobeni. Ncinzi cicitika ciindi Jehova naatulekelela?

12-13. (a) Mbuti muntu mbwalimvwa ciindi Jehova naamulekelela? (b) Ncinzi cicitika ciindi Jehova naatulekelela?

¹² Ciindi notuba alusyomo lwakuti Jehova wakatulekelela, tuluba ‘aziindi zyakukatalukwa’ kubikkilizya aluumuno lwamumizeezo alimwi amanjezyeezya aasalala. Kulekelelwa ooku takuzwi kubantu pe, pele kweelede kuzwa kuli “Jehova lwakwe.” (Mil. 3:19) Ciindi Jehova naatulekelela, ulacibukulusya cilongwe cesu anguwe cakuti inga caba mbuli kuti kunyina anotwakacitide cibi.

¹³ Ciindi Jehova naatulekelela, kunyina nayakutupa mulandu naa kutusubula akaambo kacibi eeco ncotwakacita. (Is. 43:25; Jer. 31:34) Jehova ubikka zibi zyesu kulamfwu “mbubonya kumapolelo aazuba mbokuli kulamfwu kapati kuzwa kumabbililo aazuba.” * (Int. 103:12) Ciindi notuyeeya mbokuli kupati kulekelela kwa Jehova, tulamulumba kapati alimwi akumulemeka. (Int. 130:4) Pele ino mbaani Jehova mbalekelela?

14. Kuzikusika waawa, ncinzi ncotwaiya kujatikizya kusala kwa Jehova kuti amulekelele muntu?

¹⁴ Mbubwenya mbotwabona kale, kulekelela kwa Jehova takuyeeme akukomena naa kuceya kwacibi cakacitwa. Alimwi twaiya kuti mbwaanga Jehova Mulengi wesu, ngo Sikutupa Mulawo alimwi Mubetesi, ubelesya luzyibo ciindi nasala kulekelela muntu naa pe. Pele ino ntwaambo nzi Jehova ntwalanga-langa ciindi nasala kuti amulekelele muntu naa pe?

15. Kweelana a Luka 12:47, 48, nkaambo nzi Jehova nkalanga-langa katanasala kutulekelela?

¹⁵ Kaambo kambi Jehova nkalanga-langa nkakuti naa sizibi wakalizyi kuti ncaakali kucita ncibi. Jesu wakacisalazya eeci kulugwalo lwa Luka 12:47, 48. (Amubale.) Ciindi muntu nakanza kucita cintu cimwi ncazyi kuti Leza taciyandi, mpoonya wacicita, nkokuti muntu ooyu wacita cibi cipati. Alimwi muntu ooyo uli muntenda yakutalekelelwa.  (Mk. 3:29; Joh. 9:41) Nokuba boobo, zimwi ziindi inga tulizyi kuti ncotwakacita taciluzi pe. Sena kuli bulangizi buli boonse bwakuti inga twalekelelwa? Inzya! Eeci cituleta kukaambo kambi Jehova nkalanga-langa katanasala kutulekelela.

16. Ino kweempwa caamba nzi, alimwi nkaambo nzi ncokuyandika kutegwa Jehova atulekelele?

¹⁶ Akambi kaambo Jehova nkalanga-langa, nkubona naa sizibi weempwa ncobeni. Ino kweempwa caamba nzi? Caamba “kucinca mizeezo, bukkale naa makanze.” Eeci cilabikkilizya muzeezo wakuti muntu ooyo weelede kulimvwa bubi akuusa kuzintu zibyaabi nzyaakacita naa akaambo kakutacita zintu ziluzi nzyaakeelede kucita. Muntu weempwa ulausa ikutali buyo akaambo kakulubizya nkwaakacita, pele alimwi akaambo kakuyaansi kumuuya calo cakapa kuti alubizye. Amuyeeye kuti Mwami Manase alimwi a Mwami Davida boonse bakacita zibi zipati; nokuba boobo, Jehova wakabalekelela nkaambo bakeempwa kuzwa ansi aamyoyo. (1Bam. 14:8) Inzya, Jehova ulatulekelela lilikke buyo kuti wabona kuti tweempwa ncobeni. Pele kwiile kuusa buyo akaambo kazibi nzyotwakacita takuzulide pe. Tweelede kubweza ntaamu. * Eeci cituleta kukaambo kambi Jehova nkalanga-langa katanasala kutulekelela.

17. Ino kusanduka caamba nzi, alimwi nkaambo nzi ncokuyandika kutegwa tutaziinduluki zibi nzyotwakacita? (Isaya 55:7)

¹⁷ Kaambo kambi kayandika kapati Jehova nkabikkila maano, nkusanduka. Kusanduka caamba “kucinca bukkale bwesu.” Munzila imwi, muntu weelede kuleka nzila mbyaabi alimwi akutalika kupona kweelana ambwayanda Jehova. (Amubale Isaya 55:7.) Muntu ooyo weelede kucinca mizeezo yakwe kutegwa kaisololelwa amizeezo ya Jehova. (Rom. 12:2; Ef. 4:23) Weelede kuleka mizeezo mibyaabi alimwi amicito iitaluzi. (Kol. 3:7-10) Pele lusyomo lwesu mucipaizyo ca Kristo ndolupa kuti Jehova atulekelele alimwi akutusalazya kucibi. Jehova uyootulekelela kwiinda mucipaizyo eeco, lilikke buyo aakubona kuti tulabeleka canguzu kutegwa tucince bukkale bwesu.—1Joh. 1:7.

18. Ntwaambo nzi ntotwalanga-langa kujatikizya kulekelela kwa Jehova?

¹⁸ Lino atutulange-lange mubufwaafwi twaambo tupati-pati ntotwabandika. Jehova ngowiinda kulekelela mububumbo boonse. Nkaambo nzi ncotwaambila boobo? Kaambo kakusaanguna nkakuti, lyoonse ulilibambilide kulekelela. Kabili, ulizyi zintu zyoonse kujatikizya ndiswe. Ulizyi kabotu-kabotu mbotupangidwe alimwi nguweelela kuzyiba naa tweempwa ncobeni. Katatu, Jehova ulatulekelela cakumaninina, alimwi kulinguwe cili mbuli kuti kunyina anotwakacicita cibi eeco. Eeci citupa kuba amanjezyeezya aasalala akukkomaninwa anguwe.

19. Nokuba kuti tatulondokede alimwi tuyoozumanana kubisya, ncinzi cikonzya kutupa kukondwa?

¹⁹ Mubwini, mbwaanga tatulondokede, tuyoozumanana kubisya. Nokuba boobo, tulaumbulizyigwa amajwi aali mubbuku lya Insight on the Scriptures, Volume 2, peeji 771, aakuti: “Mbwaanga Jehova ulaaluse alimwi ulikuzyi kulezya kwababelesi bakwe, tabeelede kuzumanana kuusa kukulubizya nkobacita akaambo kakutalondoka nkobakakona. (Int. 103:8-14; 130:3) Kuti babikkila maano kweenda munzila zya Leza, banookkomene. (Flp. 4:4-6; 1Joh. 3:19-22).” Eelo kaka kaambo aaka kalakulwaizya!

20. Ncinzi ncotuyoolanga-langa mucibalo citobela?

²⁰ Tulalumba kapati kuti Jehova ulilibambilide kutulekelela ciindi notweempwa ncobeni kuzibi nzyotwakacita. Pele ino mbuti mbotukonzya kwiiya kulekelela kwa Jehova? Mbuti kulekelela kwesu mbokukozyenye akulekelela kwa Jehova, alimwi ino kwiimpene buti? Nkaambo nzi kumvwisya kwiimpana ooku ncokuyandika? Mibuzyo eeyi iyakwiingulwa mucibalo citobela.