1. Nkuyoowa kuli buti kudumide?

 ATULANGE-LANGE bukkale mobakalijana Bakamboni ba Jehova bamwi. Ba Nestor alimwi abakaintu babo ba María, bakali kuyanda kuyoobelekela kubusena kubulide. * Kutegwa bacite oobo, bakeelede kuubya-ubya bukkale bwabo. Pele bakali kuyoowa kuti, ikuti bacita oobo tiibakali kuyookkomana ncobeni. Ciindi ba Biniam nibakaba umwi wa Bakamboni ba Jehova mucisi mulimo wesu moukazyigwa, bakayeeya kuti mbwaanga lino baba mubelesi wa Leza, bakali kuyakupenzyegwa. Eeco cakabapa kuyoowa. Pele icakabaindizya kuyoowa, nkulibilika ncobakali kuyakucita banamukwasyi kujatikizya cikombelo cabo cipya. Ba Valérie bakajanwa abulwazi bwakkansa bujaya, alimwi bakapenga kujana sikubaandula iwakali kukonzya kulemeka njiisyo zyamu Bbaibbele nzyobasyoma kujatikizya kubelesya bulowa. Cilalimvwisya kuti bakali kuyoowa kuti ambweni inga bafwa.

2. Nkaambo nzi ncotweelede kusolekesya kuzunda penzi lyakuyoowa?

² Sena kuli nomwakayoowede boobu? Bunji bwesu twakayoowa kale. Ikuti kacitwaalila kulwana penzi lyakuyoowa, tulalangilwa kutasala kabotu calo cikonzya kunyonganya cilongwe cesu a Jehova. Oobo Saatani mbwayanda. Ulasola kubelesya buyoofwu kutegwa tutyole milawo ya Jehova, yalo iibikkilizya amulawo wakukambauka makani mabotu. (Ciy. 12:17) Saatani mubi, tajisi luse alimwi ulaanguzu. Pele mulakonzya kulikwabilila kuzwa kulinguwe. Munzila nzi?

3. Ncinzi ciyootugwasya kuzunda kuyoowa?

 ³ Ciindi notusyoma kuti Jehova ulatuyanda akuti lyoonse uli kulubazu lwesu, tatukamuyoowi Saatani. (Int. 118:6) Mucikozyanyo, mulembi wa Intembauzyo 118 wakajana mapenzi aakatazya kapati. Wakajisi basinkondonyina banji, kubikkilizya abantu balemekwa (kapango 9, 10). Zimwi ziindi, wakali kufwaankanyizyigwa amapenzi (kapango 13). Alimwi Jehova wakamupa lulayo lwanguzu (kapango 18). Nokuba boobo, sintembauzyo ooyu wakakulwaizyigwa kwiimba kuti: “Tandikooyoowa pe.” Ncinzi cakamupa kutayoowa? Nkaambo wakalizyi kuti nokuba kuti Jehova wakamupa lulayo, wakali kumuyanda kapati. Sintembauzyo wakalisinizyide kuti kufwumbwa mubukkale mwaakali kuyoolijana, Leza wakwe siluyando wakalilibambilide kumugwasya.—Int. 118:29.

4. Mbuyoofwu nzi mbotukonzya kuzunda kuti katusyoma kuti Leza ulatuyanda?

⁴ Tweelede kusyoma kuti Jehova ulatuyanda swebo kutugama. Lusyomo oolo luyootugwasya kuzunda misyobo yabuyoofwu yotatwe iidumide, nkokuti, (1) kuyoowa kwaalilwa kulanganya mukwasyi wesu, (2) kuyoowa muntu, alimwi (3) akuyoowa lufwu. Bakwesu abacizyi ibaambwa mumuncali wakusaanguna bakacikonzya kuzunda buyoofwu nkaambo bakali kusyoma kuti Leza ulabayanda.

5. Mbukkale nzi bukonzya kumupa kulibilika kapati silutwe wamukwasyi? (Amubone cifwanikiso icili aacivwumbyo.)

⁵ Silutwe wamukwasyi Munakristo ulaubikkila maano kapati mukuli wakulanganya mukwasyi wakwe kumubili. (1Tim. 5:8) Ikuti kamuli silutwe wamukwasyi, ambweni mwakali kulibilika lyabulwazi bwa Covid-19 kuti mulakonzya kumaninwa mulimo. Ambweni mwakali kulibilika kujatikizya kusanina mukwasyi wanu naa kubbadelela ŋanda. Kunze lyaboobo, ambweni mwakali kuyoowa kuti naa mwamaninwa mulimo, tamukacikonzyi kujana uumbi. Naa mbubwenya mbuli ba Nestor aba María, ibaambwa kumatalikilo, mwakali kuyeeya kuti inga tiimwacikonzya kupona kuti mwaubya-ubya bukkale bwanu. Saatani wazwidilila kapati mukubelesya buyoofwu buli boobu.

6. Ncinzi Saatani ncayanda kuti tusyome?

⁶ Saatani ulasola kutupa kusyoma kuti Jehova tatulanganyi swebo lwesu kutugama alimwi akuti takonzyi kutugwasyilizya kulanganya mukwasyi wesu. Akaambo kaceeci, tulakonzya kuyeeya kuti tweelede kucita kufwumbwa ncotukonzya kutegwa tukwabilile mulimo wesu wakumubili, nokuba kuti kucita boobo inga kwanyonganya cilongwe cesu a Leza.

7. Ino Jesu utusyomezya nzi?

⁷ Jesu, walo uubazyi kabotu Bausyi kwiinda muntu uuli woonse, utusyomezya kuti Leza ‘ulizyi zintu nzyotuyandika katutaninga akumulomba.’ (Mt. 6:8) Alimwi Jesu ulizyi kuti Jehova ulilibambilide kutupa nzyotuyandika. Mbotuli Banakristo, tuli mukwasyi wa Leza. Aboobo tulakonzya kuba masimpe kuti mbwali Silutwe wamukwasyi, Jehova uyakwaazuzikizya majwi ngaakaambila basilutwe bamikwasyi boonse ku 1 Timoteyo 5:8.

8. (a) Ncinzi cikonzya kutugwasya kuzunda buyoofwu bwakwaalilwa kulanganya mukwasyi wesu? (Matayo 6:31-33) (b) Ncinzi ncotukonzya kwiiya kuli banabukwetene ibali mucifwanikiso ibaletela mucizyi cakulya?

⁸ Ciindi notusyoma kuti Jehova ulatuyanda swebo alimwi amukwasyi wesu, ciyootuubila kusyoma kuti unootupa nzyotuyandika. (Amubale Matayo 6:31-33.) Eelo kaka Jehova ulayanda kutupa nzyotuyandika,  ngusiluyando, alimwi ngo Mwaabi wiinda! Kunze lyakutupa buyo nzyotuyandika kutegwa katucikonzya kupona, ciindi naakalenga nyika, wakatupa zintu zinji kapati. Caluyando, wakazuzya nyika azintu zikonzya kutupa kukkomana kapati. (Matl. 2:9) Nokuba kuti zimwi ziindi inga katujisi buyo zintu zilikke nzyotuyandika, tweelede kuyeeya kuti Jehova nguwatupa zintu eezyo. Jehova kunyina naalilwa kutupa nzyotuyandika. (Mt. 6:11) Kunze lyaboobo, tweelede kuyeeya kuti zintu nzyatupa Jehova lino alimwi anzyayootupa kumbele zilayandika kapati kwiinda zintu zyakumubili nzyotukonzya kwaaba lino. Aaka kaambo bakakabona kuti nkamasimpe ba Nestor aba María.—Is. 65:21, 22.

9. Ncinzi ncomukonzya kwiiya kucikozyanyo caba Nestor aba María?

⁹ Ba Nestor aba María bakalibukkede ku Colombia. Bakaamba kuti, “twakayeeya kuubya-ubya buumi bwesu akuyungizya mulimo wakukambauka, pele twakali kuyoowa kuti inga tiitwakkomana ncobeni kuti twacita oobo.” Ncinzi cakabagwasya kuzunda buyoofwu bwabo? Bakayeeya zintu zinji nzyaakabacitila Jehova kutondezya kuti ulabayanda. Kabasinizyide kuti unoobalanganya lyoonse, bakaileka milimo yabo iivwolwa mali manji. Bakasambala ŋanda yabo akulongela kulubazu lumwi lwacisi ikwakali kuyandika bakambausi ba Bwami. Mbuti mbobalimvwa akaambo kakusala kwabo? Ba Nestor bakaamba kuti: “Twakabona mbwaali aamasimpe majwi aali ku Matayo 6:33. Kunyina nitwakabulide cintu cili coonse cakumubili. Alimwi lino tulikkomene kwiinda kaindi.”

10. Nkaambo nzi bantu ncobayoowa bantunyina?

¹⁰ Kuzwa kaindi bantu balikucitilana zintu zibyaabi. (Muk. 8:9) Mucikozyanyo, bantu babelesya nguzu munzila iitali kabotu, zigwebenga zilatalisya nkondo, basicikolo ibapenzya basicikolonyina balabatukila alimwi akubakonga beenzinyina. Kuyungizya waawo, bantu bamwi babeendelezya calunya bamumukwasyi wabo. Nkakaambo kaako bantu ncobayoowa bantunyina. Mbuti Saatani mbwasola kubelesya kuyoowa muntu kuba kakole?

11-12. Mbuti Saatani mbwatulwana kwiinda mukuyoowa bantu?

¹¹ Saatani ulasola kutupa kuyoowa bantu kutegwa tucileke kukambauka alimwi akucita zintu zimwi Jehova nzyaatwaambila kucita.  Kwiinda mukuyungwa a Saatani, mfwulumende zilaulesya mulimo wesu alimwi akutupenzya. (Lk. 21:12; Ciy. 2:10) Munyika ya Saatani bantu banji balamwaya makani aakubeja kujatikizya Bakamboni ba Jehova. Ibantu baasyoma makani aaya aakubeja balatufwubaazya naa kutulwana buya. (Mt. 10:36) Sena tulagambwa anzila zyabucenjezu nzyabelesya Saatani? Peepe. Nkaambo wali kuzibelesya nzila eezyi nomuba mumwaanda wamyaka wakusaanguna.—Mil. 5:27, 28, 40.

¹² Kuyoowa kukazyigwa amfwulumende tacili ncecilwanyo cilikke Saatani ncabelesya. Bamwi balayoowa kujatikizya nzyobakonzya kubayeeyela banamukwasyi ciindi nobaba Bakamboni, zimwi ziindi balaayoowa kapati makani aaya kwiinda kuumwa buya. Balabayanda kapati banamukwasyi alimwi balayanda kuti bamuzyibe akumuyanda Jehova. Cilabacisa kumvwa banamukwasyi kabaamba zintu zibyaabi kujatikizya Leza wakasimpe alimwi abakombi bakwe. Nokuba boobo, zimwi ziindi, banamukwasyi ibakali kubakazya kumbele bakaboola mukasimpe. Pele ino mbuti kuti banamukwasyi balekela limwi kuyanzana andiswe akaambo kanzyotusyoma? Tuyakucita buti?

13. Mbuti kuzyiba kuti Leza ulatuyanda mbokutugwasya ciindi banamukwasyi nobatulekelezya? (Intembauzyo 27:10)

¹³ Cilaumbulizya kuzyiba njiisyo iijanika ku Intembauzyo 27:10. (Amubale.) Ciindi notuyeeya Jehova mbwatuyanda kapati tulimvwa kukwabililwa nociba ciindi notukazyigwa. Alimwi tulaalusyomo lwakuti Jehova uyootulumbula akaambo kakuliyumya kwesu. Jehova uyootupa zyoonse nzyotuyandika kutegwa tuzumanane kupona, uyootugwasya kubatama, kuba aluumuno lwamumizeezo alimwi akutugwasya kuba acilongwe ciyumu anguwe. Eeci ncencico ba Biniam ibaambwa kumatalikilo ncobakazyiba.

14. Ncinzi ncotukonzya kwiiya kucikozyanyo caba Biniam?

¹⁴ Ba Biniam bakaba Bakamboni ba Jehova nokuba kuti bakalizyi kuti bakali kuyoopenzyegwa kapati. Amubone kuzyiba kuti Jehova ulabayanda mbokwakabagwasya ba Biniam kutayoowa muntu. Bakaamba kuti, “Kupenzyegwa ooku kwakali kubyaabi kapati kwiinda mbondakali kukuyeeyela. Pele kukazyigwa abanamukwasyi nkokwakali kundiyoosya kapati kwiinda kukazyigwa amfwulumende. Ndakali kuyoowa kuti kusala kwangu kuba umwi wa Bakamboni ba Jehova  kwakali kukonzya kubatyompya bataata ibatakali bakamboni alimwi akuti banamukwasyi bakali kukonzya kuyeeya kuti ndaalilwa mubuumi.” Nokuba boobo, ba Biniam bakalisinizyide kuti Jehova ulabalanganya aabo mbayanda. Bakaamba kuti: “Ndakazinzibala kuyeeya kujatikizya Jehova mbwaakabagwasya bamwi kuliyumya kubuyumuyumu bwakujana mali aayandika aakuligwasya mubuumi, kusalululwa alimwi akulwanwa atubunga twabasinkondo. Ndakalizyi kuti, naa ndazumanana kusyomeka kuli Jehova wakali kuyoondilongezya. Ciindi nondakaangidwe ziindi zinji alimwi akupenzyegwa, ndakalibonena Jehova mbwatugwasya kuti twazumanana kusyomeka.” Jehova wakaba Usyi waba Biniam mwini-mwini, alimwi bantu bakwe bakaba mukwasyi wabo wini-wini.

15. Nkaambo nzi ncotuluyoowa lufwu?

¹⁵ Bbaibbele lyaamba kuti lufwu ngusinkondo. (1Kor. 15:25, 26) Zimwi ziindi tulakonzya kuyoowa kufwa, kwaambisya kuti swebo naa bayandwa besu kabaciswa kapati. Nkaambo nzi ncotuluyoowa lufwu? Nkaambo kakuti Jehova wakatulenga aluyandisisyo lwakupona kukabe kutamani. (Muk. 3:11) Pele kuyoowa lufwu kulakonzya kutugwasya ikukwabilila buumi bwesu. Mucikozyanyo, kulakonzya kutupa kuti katulya zyakulya zijisi busani buli kabotu, kunyanyasya mubili, kulomba lugwasyo kuli bamadokota nokuyandika alimwi akweeleba kucita zintu izikonzya kubikka buumi bwesu muntenda.

16. Mbuti Saatani mbwasola kubelesya kuyoowa lufwu nkotwakazyalwa ankuko?

¹⁶ Saatani ulizyi kuti tulabuyanda kapati buumi bwesu. Aboobo waamba kuti tulakonzya kupa zintu zyoonse nzyotujisi kutegwa tukwabilile buumi bwesu. (Job. 2:4, 5) Eelo kaka Saatani mubeji! Pele, mbwaanga ‘ulijisi nguzu zyakuleta lufwu,’ Saatani ubelesya kuyoowa lufwu nkotwakazyalwa ankuko kutupa kuti tumuzangile Jehova. (Heb. 2:14, 15) Zimwi ziindi, bantu ba Saatani inga batukonga kutujaya ciindi notuzumanana kusyomeka. Mpoonya ziindi zimwi, Saatani ulakonzya kutulya caangwa ciindi notuyandaula busilisi. Bamadokota naa banamukwasyi batali Bakamboni balakonzya kutusinikizya kubikkwa bulowa calo cikonzya kutyola mulawo wa Leza. Naa muntu ulakonzya kutoongelezya kubelesya busilisi buteendelani anjiisyo zyamu Magwalo.

17. Kweelana a Baroma 8:37-39, nkaambo nzi ncotuteelede kuluyoowa lufwu?

¹⁷ Nokuba kuti tatuyandi kufwa, tulizyi kuti Jehova takaleki kutuyanda ikuti twafwa. (Amubale Baroma 8:37-39.) Ciindi balongwe ba Jehova nobafwa, ulazumanana kubayeeya mbuli kuti mbaumi. (Lk. 20:37, 38) Ulayandisisya kuyoobabusya. (Job. 14:15) Jehova wakabbadela muulo waatala kapati ‘kutegwa tube abuumi butamani.’ (Joh. 3:16) Tulizyi Jehova mbwatuyanda alimwi akutulanganya. Aboobo, muciindi cakumuzangila ciindi nitwaciswa naa notuyanda kufwa, tweelede kusyoma kuti ulatuumbulizya, kutupa busongo alimwi anguzu. Eeci ncencico ncobakacita ba Valérie alimwi abalumi babo.—Int. 41:3.

18. Ncinzi ncomukonzya kwiiya kucikozyanyo caba Valérie?

¹⁸ Ciindi nobakali aamyaka iili 35, ba Valérie bakazyiba kuti bakajisi bulwazi bwakkansa alimwi bwakalisakene. Amubone luyando mbolwakabagwasya kuzunda kuyoowa lufwu. Bakaamba kuti: “Bulwazi oobu bwakacinca buumi bwesu. Nkaambo ndakeelede kwaandulwa kutegwa ndizumanane kupona. Ndakabuzya bamadokota banji, pele boonse  bakakaka kundaandula kakunyina kubelesya bulowa. Ndakaliyoowede, nkaambo kweelana amulawo wa Leza, kunyina mbondakali kukonzya kuzumina kubikkwa bulowa. Mubuumi bwangu boonse, Jehova wali kutondezya kuti ulandiyanda. Lino andime ndakaba acoolwe cakutondezya kuti ndilamuyanda. Ciindi coonse nondimvwa makani aatali kabotu kuzwa kuli bamadokota, inga ndilikanzide kupa Jehova kukkomana alimwi akupa Saatani kuti atazwidilili. Mpoonya ndakaandulwa kakunyina kubikkwa bulowa. Nokuba kuti ndiciciswa, Jehova lyoonse wali kutupa lugwasyo ndotuyandika. Mucikozyanyo, lyamuswaangano umwi wamukati kansondo, twakalanga-langa cibalo cakajisi mutwe wakuti ‘Kulwana Mapenzi Aamazuba Aano Cabusicamba.’ * Cibalo eeci cakatuumbulizya kapati. Twakali kucibala cakwiinduluka-induluka. Cakatupa luumuno lwamumizeezo, cakatugwasya kuzibona munzila yeelede zintu alimwi akusala cabusongo.”

19. Ncinzi ciyoocitika ino-ino?

¹⁹ Kwiinda mukugwasyigwa a Jehova, Banakristo nyika yoonse bacikonzya kuzunda buyumuyumu alimwi bazwidilila kumukazya Diabolosi. (1Pet. 5:8, 9) Andinywe mulakonzya kumuzunda. Lino-lino, Jehova uyoosololela Jesu alimwi abaabo mbayoolela limwi ‘kunyonyoona milimo ya Diabolosi.’ (1Joh. 3:8) Kuzwa waawo, bantu ba Leza bali anyika ‘tabakayoowi cintu cili coonse alimwi takukabi cintu ciyoobapa kuyoowa.’ (Is. 54:14; Mik. 4:4) Nokuba boobo, kusikila ciindi eeco, tweelede kubeleka canguzu kuzunda penzi lyakuyoowa.

20. Ncinzi cikonzya kutugwasya kuzunda buyoofwu?

²⁰ Tweelede kuzumanana kusyoma kuti Jehova ulatuyanda alimwi akusyoma kuti ulabakwabilila babelesi bakwe. Tuyoogwasyigwa kwiinda mukucita boobu kuti twazumanana kuzinzibala kuyeeya alimwi akubona Jehova mbwaakabagwasya babelesi bakwe bakaindi. Alimwi tweelede kuyeeya Jehova mbwaakatugwasya lwesu kutugama ciindi nitwakajisi buyumuyumu. Kwiinda mukugwasyigwa a Jehova tulakonzya kuzunda buyoofwu.—Int. 34:4.