1. Ncinzi ncotweelede kucita kutegwa tukafwutuke buzuba bwa Jehova?

 CIINDI Bbaibbele nolyaamba “buzuba bwa Jehova,” inga lyaamba ciindi Jehova nayoonyonyoona basinkondonyina mpoonya akufwutula bantu bakwe. Kaindi, Jehova wakazisubula zisi zimwi. (Is. 13:1, 6; Ezk. 13:5; Zef. 1:8) Mumazuba eesu, “buzuba bwa Jehova” buyootalika ciindi Babuloni Mupati aakulwanwa mane kusikila kumamanino aankondo ya Amagedoni. Kutegwa tukafwutuke “buzuba” oobu, tweelede kulibambila lino. Jesu wakaamba kuti tatweelede kulibambila buyo kujatikizya “mapenzi mapati,” pele alimwi tweelede kuti ‘katulibambilide’ abuzuba bwa Jehova.—Mt. 24:21; Lk. 12:40.

2. Nkaambo nzi ncotukonzya kugwasyigwa alugwalo lwa 1 Batesalonika?

² Mulugwalo lwakusaanguna mwaapostolo Paulo ndwaakalembela bana Tesalonika, wakabelesya zikozyanyo zili mbozibede kugwasya Banakristo kulibambila buzuba bupati bwalubeta lwa Jehova. Paulo wakalizyi kuti buzuba bwa Jehova tiibwakali kuyoosika aciindi eeco. (2Tes. 2:1-3) Nokuba boobo, wakakulwaizya basyominyina kulibambila kujatikizya buzuba oobo mbuli kuti bwakali kuboola juunza. Andiswe tweelede kulutobela lulayo oolu. Amuleke tulange-lange nzyaakaamba kujatikizya twaambo ootu tutobela: (1) mbobwakali kuyoosika buzuba bwa Jehova, (2) ibatakali kuyoofwutuka buzuba oobu, alimwi (3) ambotukonzya kulibambila kutegwa tukafwutuke.

3. Mbuti buzuba bwa Jehova mbobuyoosika mbubonya mbwasika mubbi masiku? (Amubone acifwanikiso.)

³ “Mbubonya mbwasika mubbi imasiku.” (1Tes. 5:2) Eeci ncikozyanyo cakusaanguna akati kazikozyanyo zyotatwe izibelesyedwe  kupandulula kusika kwabuzuba bwa Jehova. Babbi kanji-kanji basika masiku ciindi bantu ncobatayeeyeli. Buzuba bwa Jehova abwalo buyoosika ciindi bantu ncobatayeeyeli alimwi banji bayoogambwa. Nobaba Banakristo bakasimpe bayoogambwa kubona zintu mboziyoocitika cakutayeeyela. Pele mukwiimpana abantu babi, swebo tatukanyonyoonwi pe.

4. Muunzila nzi buzuba bwa Jehova mobuli mbuli kumyongwa kwamukaintu nayanda kutumbuka?

⁴ “Mbuli kumyongwa kwamukaintu uumitide nayanda kutumbuka.” (1Tes. 5:3) Mukaintu uumitide takonzyi kuzyiba ciindi cini nakonzya kutumbuka. Pele inga ulizyi kuti ciindi ciyoosika. Ciindi naatalika kumyongwa, ulatalika cakutayeeyela, inga kulacisa alimwi takukwe bulesye. Mbubwenya buyo, andiswe tatuzyi buzuba nociba ciindi buzuba bwa Jehova nobuyooboola. Nokuba boobo, tatudooneki kuti buyooboola akuti lubeta lwa Leza kubantu babi luyoosika cakutayeeyela alimwi tabakacikonzyi kubutija.

5. Muunzila nzi mapenzi mapati mwaali mbuli mafwumofwumo?

⁵ Mbuli mafwumofwumo. Cikozyanyo catatu ca Paulo alimwi caamba babbi ibabba masiku. Pele aciindi aawa Paulo wakacinca mbwaakali kuzilanga zintu akweezyanisya buzuba bwa Jehova kumafwumofwumo. (1Tes. 5:4) Babbi ibaboola masiku inga bajisi bubi kapati cakuti tababoni amboceenda ciindi. Mumuni wakubucedo ulakonzya kupa kuti babe antangalala akujatwa kabatalibambilide. Mbubwenya buyo, mapenzi mapati ayoobabikka antangalala aabo bali mbuli babbi, ibazumanana kuba mumudima kwiinda mukucita zintu zitamukkomanisyi Leza. Mukwiimpana ambabo, swebo tulakonzya kuba bantu balibambilide kwiinda mukutantamuka kucita zintu zitamukkomanisyi Jehova. Pele tweelede kucita “misyobo yoonse yabubotu, bululami alimwi akasimpe.” (Ef. 5:8-12)  Mpoonya Paulo wakabelesya zikozyanyo zyobilo kupandulula baabo ibatakafwutuki.

6. Muunzila nzi bantu banji moboona? (1 Batesalonika 5:6, 7)

⁶ “Aabo iboona.” (Amubale 1 Batesalonika 5:6, 7.) Paulo wakakozyanisya bantu batakafwutuki buzuba bwa Jehova kubantu boona. Tabazyi zintu zicitika naa kubona ciindi mpoceendela. Akaambo kaceeci, tabakonzyi kuzyiba ciindi nokwacitika cintu ciyandika kapati alimwi kunyina nobakonzya kubweza ntaamu. Mazuba aano, bantu banji baloona kumuuya. (Rom. 11:8) Tabazisyomi zitondezyo zyakuti tupona “kumazuba aamamanino” alimwi akuti mapenzi mapati alaafwaafwi. Ciindi nokwaba kucinca kupati munyika, bantu bamwi balatalika kuuswiilila mulumbe wesu wa Bwami. Nokuba boobo, banji balatalika alimwi koona muciindi cakuzumanana kupakamana. Nobaba baabo ibasyoma kuti buzuba bwalubeta buyoosika bayeeya kuti bucili kulamfwu kapati. (2Pet. 3:3, 4) Pele buzuba abuzuba, swebo tulayeeya mboluyandika kapati lulayo lwakasololelwa amuuya lujatikizya kuzumanana kupakamana.

7. Mbuti bantu ibayoosikilwa bukali bwa Leza mbobali mbuli baabo bakoledwe?

⁷ ‘Aabo bakolwa.’ Mwaapostolo wakakozyanisya bantu ibayoosikilwa bukali bwa Leza kubantu bakoledwe. Mucikozyanyo, bantu bakoledwe balamuka kubona zintu zibazungulukide zicitika alimwi kunyina nobapanga zyakusala zyabusongo. Mbubwenya buyo, bantu babi tabakubikkili maano kucenjezya kwa Leza. Basala kupona munzila iisololela kulunyonyooko. Pele Banakristo balaililwa kuzumanana kupakamana akucenjela. (1Tes. 5:6) Sikwiiya zyamu Bbaibbele umwi wakaamba kuti muntu uupakamene “ulazumanana kukkazika moyo alimwi talibiliki kapati. Uyeeya kabotu calo icimugwasya kupanga cakusala cili kabotu.” Nkaambo nzi ncotweelede kuzumanana kukkazika moyo alimwi akupakamana? Tweelede kucita oobo kutegwa tutajatikizyigwi mutwaambo twacisi naa mumakani aabukkale. Kuyungwa kutola lubazu muzintu eezyi kunooyabwiindila buya buzuba bwa Jehova mbobuyaabuswena afwaafwi. Nokuba boobo, tatweelede kulibilika kujatikizya ncotweelede kuyoocita. Muuya wa Leza uyootugwasya kukkazika moyo akutalibilika kutegwa tukacikonzye kusala cabusongo.—Lk. 12:11, 12.

8. Mbuti lugwalo lwa 1 Batesalonika 5:8 mbolutondezya bube bukonzya kutugwasya kubatama akuzumanana kupakamana? (Amubone acifwanikiso.)

⁸ ‘Amusame cilikwabilizyo cakucamba alimwi acimpoompo.’ Paulo wakatukozyanisya kuli basikalumamba bapakamene alimwi balibambilide kuunka kunkondo. (Amubale 1 Batesalonika 5:8.) Sikalumamba uubikkila maano weelede kuti ciindi coonse kalibambilide kulwana nkondo. Mbubwenya buyo andiswe, tweelede kuti katulibambilide ciindi coonse. Tulazumanana kulibambila buzuba bwa Jehova kwiinda mukusama cilikwabilizyo cakucamba calusyomo aluyando alimwi acimpoompo cabulangizi. Bube oobu bulakonzya kutugwasya kapati.

9. Ino lusyomo lwesu lutukwabilila buti?

⁹ Cilikwabilizyo cakucamba cakali kukwabilila moyo wasikalumamba. Mbubwenya buyo, lusyomo aluyando zikwabilila moyo wesu wacikozyanyo. Zilakonzya kutugwasya kuzumanana kubelekela Leza akutobela Jesu. Lusyomo lutupa kusinizya kuti Jehova uyootulumbula akaambo kakumuyandaula camoyo woonse. (Heb. 11:6) Luyootugwasya kuzumanana kusyomeka kumusololi wesu Jesu, nokuba kuti twajana buyumuyumu buli buti. Tulakonzya kuyumya lusyomo lwesu kwiinda mukulanga-langa zikozyanyo zyababelesi ba Jehova bamazuba aano, ibazumanana kusyomeka nokuba kuti balapenzyegwa  naa bajisi buyumuyumu bwakujana mali. Alimwi tulakonzya kweeleba kakole kakuyandisya lubono kwiinda mukwiiya baabo baubya-ubya buumi bwabo kutegwa babikke ziyandika zya Bwami mubusena bwakusaanguna. b

10. Mbuti luyando ndotujisi kuli Jehova akubantu mbolutugwasya kuliyumya?

¹⁰ Luyando lulayandika kutegwa tuzumanane kupakamana alimwi akubatama. (Mt. 22:37-39) Luyando ndotujisi kuli Leza lulatugwasya kuzumanana kukambauka nociba ciindi notwajana buyumuyumu. (2Tim. 1:7, 8) Akaambo kakuti tulabayanda nobaba bantu batabelekeli Jehova, tulazumanana kukambauka akubeleka mucilawo cesu, nokuba kubelesya fooni naa magwalo. Kunyina notutyompwa nkaambo tulizyi kuti bumwi buzuba, bantu bayoocinca akutalika kucita zintu ziluleme.—Ezk. 18:27, 28.

11. Ino luyando ndotujisi kubasyomima lutugwasya buti? (1 Batesalonika 5:11)

¹¹ Kuyanda basimukoboma kulabikkilizya abakwesu abacizyi. Tulalutondezya luyando luli boobo kwiinda ‘mukukulwaizyanya akuyakana umwi amweenzinyina.’ (Amubale 1 Batesalonika 5:11.) Mbubwenya mbuli basikalumamba babelekela antoomwe munkondo, tulakulwaizyanya umwi amweenzinyina. Mubwini, sikalumamba ambweni ulakonzya kumucisa sikalumambanyina ciindi nobali munkondo, pele takonzyi kucita boobo acaali. Mbubwenya buyo, tatuyandi kubacisa bakwesu abacizyi acaali naa kubapilusizya cibi. (1Tes. 5:13, 15) Alimwi tulatondezya luyando kwiinda mukubalemeka bakwesu basololela mumbungano. (1Tes. 5:12) Ciindi Paulo naakalemba lugwalo oolu, tiiwakalinakkwana mwaka kuzwa ciindi mbungano yaku Tesalonika noyakatalisyigwa. Kweelede kuti baalumi bakasalidwe mumbungano eeyi tiibakajisi luzyibo alimwi bakali kulubizya. Nokuba boobo, bakeelede kulemekwa. Mapenzi mapati mbwaayaabuswena afwaafwi, tuyooyandika kusyoma busolozi bwabaalu bamumbungano motuzulilwa kwiinda kaindi. Ambweni tatucinoocikonzyi kutambula busolozi kuzwa kumaofesi mapati alimwi akuofesi yamutabi; aboobo cilayandika kapati kwiiya kubayanda alimwi akubalemeka baalu lino.  Kufwumbwa bukkale mbobukonzya kuba, atuzumanane kupakamana, kutabikkila maano kukutalondoka kwabo, pele kubikkila maano kukaambo kakuti Jehova nguusololela bamaalumi aaba basyomeka kwiinda muli Kristo.

12. Mbuti bulangizi bwesu mbobukwabilila mizeezo yesu?

¹² Mbubwenya cimpoompo mbocakali kukwabilila mutwe wasikalumamba, bulangizi bwesu bwalufwutuko bulaikwabilila mizeezo yesu akutugwasya kuyeeya kabotu. Akaambo kabulangizi buyumu mbotujisi, tulizyi kuti zintu nzyoipa nyika eeyi zinyina mpindu. (Flp. 3:8) Bulangizi mbotujisi butupa kuba bantu bakkazika moyo alimwi bapakamene. Eeci ncecakacitikila mukwesu Wallace amucizyi Laurinda ibabelekela mu Africa. Munsondo zyotatwe buyo, mukwesu Wallace wakafwidwa bausyi, mpoonya mucizyi Laurinda awalo wakafwidwa banyina. Pele akaambo kabulwazi bwa COVID-19, tiibakacikonzya kuunka kwabo kuyooba antoomwe abanamukwasyi. Mukwesu Wallace wakalemba kuti: “Bulangizi bwabubuke bulandigwasya kuyeeya mbobanoobede mubuzuba bwakusaanguna munyika mpya, ikutali mbobakabede kumamanino aabuumi bwabo aano anyika. Bulangizi oobu bulandikkazika moyo ciindi nonduuside kapati naa kulimvwa bubi akaambo kakufwidwa.”

13. Ncinzi ncotweelede kucita kutegwa tutambule muuya uusalala?

¹³ “Mutazimi mulilo wamuuya.” (1Tes. 5:19) Paulo wakakozyanisya muuya uusalala kumulilo uuli mukati kesu. Kuti katujisi muuya wa Leza, inga tulapya moyo kapati akuba basungu mukucita ciluzi alimwi tulaba anguzu zyakubelekela Jehova. (Rom. 12:11) Ncinzi ncotweelede kucita kutegwa tutambule muuya uusalala? Tweelede kuupailila, kwiiya Jwi lya Leza lyakasololelwa amuuya alimwi akuyanzana ambunga yakwe. Kucita boobo kuyootugwasya kuba ‘amucelo wamuuya.’—Gal. 5:22, 23.

14. Ncinzi ncotuteelede kucita kutegwa tuzumanane kutambula muuya wa Leza? (Amubone acifwanikiso.)

¹⁴ Ciindi Leza naatupa muuya uusalala, tweelede kucenjela kutegwa ‘tutauzimi mulilo wamuuya.’ Balikke Leza mbapa muuya wakwe, mbaabo bazumanana kusalala mumizeezo alimwi akulilemeka kabotu. Takonzyi kuzumanana  kutupa muuya wakwe kuti ciindi coonse katuyeeya zintu zitali kabotu alimwi akuzicita. (1Tes. 4:7, 8) Alimwi kutegwa tuzumanane kutambula muuya uusalala, ‘tatweelede kusampaula majwi aabusinsimi.’ (1Tes. 5:20) “Businsimi” bwaambwa aawa milumbe njatwaambila Jehova kwiinda mumuuya wakwe, kubikkilizya ayeeyo iijatikizya buzuba bwa Jehova amamanino aaciindi ncotupona. Tatweelede kuluba kujatikizya buzuba oobu, akutalika kuyeeya kuti Amagedoni taikasiki katucipona. Muciindi caboobo, tweelede kutondezya kuti tulizyi kuti ilasika ino-ino kwiinda mukuzumanana kulilemeka kabotu akujata bubi ‘mumilimo yakubelekela Leza cakulyaaba’ buzuba abuzuba.—2Pet. 3:11, 12.

15. Mbuti mbotukonzya kweeleba kusyoma majwi aakubeja aasololelwa amadaimona? (1 Batesalonika 5:21)

¹⁵ Ino-ino, munzila imwi basikukazya Leza bayakwaambilizya: “Luumuno akuliiba!” (1Tes. 5:3) Majwi aaya aakubeja aasololelwa amadaimona ayoomwaika munyika yoonse alimwi bantu banji bayakwaasyoma. (Ciy. 16:13, 14) Ino mbuti kujatikizya ndiswe? Tatukeenwi kwaasyoma, ikuti naa katusaanguna ‘kusinizya [naa “kusola”] zintu zyoonse.’ (Amubale 1 Batesalonika 5:21.) Ibbala lya Chigiriki ilyakasandululwa kuti “amusinizye,” lyakabelesyegwa kupandulula bantu mbobakali kusola lubulo mbuli ngolida naa nsiliva kutegwa basinizye kuti njancobeni. Aboobo andiswe tweelede kusaanguna kwaasinizya majwi ngotumvwa naa ngotubala kutegwa tubone naa ngamasimpe. Eeci cakali kuyandika kapati kubana Tesalonika alimwi ciyooyandika kapati akulindiswe mapenzi mapati mbwaayaabuswena afwaafwi. Muciindi cakwiile kuzumina buyo zintu zyoonse nzyobaamba bantu, swebo tweelede kubelesya maano kweezyanisya nzyobaamba ancolyaamba Bbaibbele alimwi ambunga ya Jehova. Kuti twacita oobo, tatukeenwi amajwi aakubeja aamadaimona.—Tus. 14:15; 1Tim. 4:1.

16. Mbulangizi nzi mbotujisi alimwi makanze nzi ngotweelede kuba angawo?

¹⁶ Lyamapenzi mapati, babelesi ba Leza bayoofwutuka kabali nkamu. Pele umwi aumwi wesu ulizyi kuti kabuca uleta tunji, nkaambo tatuzyi mbobunoobede buumi bwesu bwajuunza. (Jak. 4:14) Nokuba boobo, kufwumbwa naa twaakufwutuka lyamapenzi mapati naa twafwa kaatanasika, tuyoopegwa buumi butamani kuti twazumanana kusyomeka. Bananike banooli aa Kristo kujulu. Mpoonya bambelele zimbi banooli muparadaiso anyika. Toonse buyo atube amakanze aakubikkila maano kubulangizi butaliboteli mbotujisi akuzumanana kulibambila kusika kwabuzuba bwa Jehova.