1-2. Kweelana a Intembauzyo 25:14, ncinzi ncotweelede kucita kuti katuyanda kuba aacilongwe cini-cini a Jehova?

 INO muyeeya kuti mbube nzi buyandika kapati ikuti kamuyanda kuzumanana kuba acilongwe cini-cini amuntu umwi? Kweelede kuti inga mwaingula kuti balongwe beni-beni beelede kuyandana alimwi akugwasyanya. Tamukonzyi kwaamba kuti kuyoowa mbobube buyandika kapati kutegwa cilongwe ciyume. Nokuba boobo, kweelana ambolwaamba lugwalo alo aayeeme cibalo eeci, aabo ibayanda kuba acilongwe cini-cini a Jehova beelede ‘kumuyoowa.’—Amubale Intembauzyo 25:14.

² Tacikwe makani abulamfwu bwaciindi ncotwamubelekela Jehova, toonse tweelede kuzumanana kumuyoowa. Pele ino caamba nzi kuyoowa Leza? Mbuti mbotukonzya kwiiya kuyoowa Jehova? Alimwi ncinzi ncotukonzya kwiiya kumubanzi Obadiya, Mupaizi Mupati Jehoyada, alimwi a Mwami Jehoasi kujatikizya kuyoowa Leza?

3. Amupandulule kuyoowa mbokukonzya kutugwasya.

³ Kuyoowa Leza caamba kuyoowa kucita cintu cikonzya kumunyemya. Nokuba kuti kuyoowa takulimvwisyi kabotu, kulakonzya kutugwasya kusala cabusongo. Mucikozyanyo, kuyoowa kuwa kulatugwasya kuteendela mumbali aajeleele. Ikuti katuyoowa kulicisa tulatantamuka kujanika abusena bukonzya kucitika ntenda. Mpoonya kuyoowa kunyonganya cilongwe ncotujisi amuntu umwi ngotuyanda kulatugwasya kutaamba naa kucita cintu cimwi citali kabotu.

4. Ino Saatani uyanda kuti katulimvwa buti kujatikizya Jehova?

⁴ Saatani uyanda kuti bantu kabamuyoowa Jehova akaambo katwaambo tutaluzi. Uyanda kuti katusyoma kuti Jehova mukali lyoonse, uuyanda kutusubula alimwi akuti kunyina notukonzya  kumukkomanisya. (Job. 4:18, 19) Alimwi Saatani uyanda kuti katumuyoowa kapati Jehova mane buya akuleka kumubelekela. Pele tatweelede kumuyoowa munzila iili boobu. Muciindi caboobo, tweelede kwiiya kumulemeka alimwi akuyoowa kucita zintu zikonzya kumunyemya.

5. Ino kuyoowa Leza caamba nzi?

⁵ Muntu uumuyoowa kapati Leza ulamuyanda alimwi kunyina nacita cintu cili coonse cikonzya kunyonganya cilongwe cakwe anguwe. Oobo mbombubo mbwaakacita Jesu, ‘wakali kumuyoowa Leza.’ (Heb. 5:7) Wakatondezya kuti wakali kumulemeka kapati Jehova. (Is. 11:2, 3) Alimwi wakali kumuyanda kapati alimwi akuyanda kumumvwida. (Joh. 14:21, 31) Mbubwenya mbuli Jesu, tulamulemeka kapati Jehova nkaambo ngusiluyando, musongo, mululami alimwi ulaanguzu kapati. Tulizyi kuti Jehova ulatuyanda kapati alimwi ulabikkila maano kujatikizya mbotubutambula busolozi bwakwe. Zintu nzyotucita zilakonzya kumunyemya Jehova naa kumukkomanisya.—Int. 78:41; Tus. 27:11.

6. Ninzila nzi imwi mbotukonzya kwiiya kuyoowa Leza? (Intembauzyo 34:11)

⁶ Ciindi notwazyalwa inga tatuzyi mbotukonzya kuyoowa Jehova; tuyandika kwiiya buya. (Amubale Intembauzyo 34:11.) Nzila imwi mbotukonzya kucita oobo nkwiinda mukulanga-langa zilenge. Ciindi notubona busongo bwa Leza, nguzu alimwi ambwatuyanda kapati kwiinda “muzintu nzyalengede,” tulamulemeka kapati alimwi akumuyanda. (Rom. 1:20) Mucizyi Adrienne wakaamba kuti: “Ndilagambwa kapati ciindi nondibona zintu zyoonse nzyaakalenga Jehova alimwi abusongo bwakwe, cindipa kusyoma kuti ulizizyi zintu nzyondiyandika.” Akaambo kakuti lyoonse ulazinzibala kuyeeya kaambo aaka, wakaamba kuti: “Tandiyandi kucita cintu cili coonse cikonzya kunyonganya cilongwe cangu a Jehova, Sikundipa buumi.” Aboobo nsondo iino amujane ciindi cakuyeeya kujatikizya cintu cimwi Jehova ncaakalenga. Kucita boobo kuyoomugwasya kumulemeka kapati Jehova alimwi akumuyanda.—Int. 111:2, 3.

7. Ino mupailo utugwasya buti kumuyoowa Jehova?

⁷ Nzila imwi mbotukonzya kumuyoowa Leza nkwiinda mukupaila lyoonse. Tulamuzyiba kabotu Jehova kufwumbwa ciindi notupaila kulinguwe. Mucikozyanyo, ciindi cili coonse notumulomba nguzu zyakuliyumya kusunko limwi, tulayeeya mbwali singuzu kapati. Notumulumba akaambo kacipego ca Mwanaakwe, citupa kuyeeya mbwatuyanda kapati. Alimwi ciindi notupaila kuli Jehova kulomba kuti atugwasye kulwana penzi limwi, tulabona mbwali musongo kapati. Mipailo iili boobu itugwasya kumulemeka kapati Jehova. Alimwi itugwasya kuba amakanze aakutantamuka kucita cintu cili coonse cikonzya kunyonganya cilongwe cesu anguwe.

8. Ncinzi ncotweelede kucita kutegwa tuzumanane kumuyoowa Leza?

⁸ Tulakonzya kuzumanana kumuyoowa Leza kwiinda mukubala Bbaibbele katujisi mbaakani yakwiiya kuzikozyanyo zibotu alimwi azitali kabotu zili mulindilyo. Lino atubandike zikozyanyo zyababelesi ba Jehova basyomeka bobilo, nkokuti Obadiya walo iwakali mubanzi waŋanda ya Mwami Ahabu alimwi aca Mupaizi Mupati Jehoyada. Mpoonya tulabona ncotukonzya kwiiya ku Mwami Jehoasi wa Juda, walo iwakali kusyomeka kumatalikilo pele kumbele iwakaleka kubelekela Jehova.

9. Mbuti kuyoowa Jehova mbokwakamugwasya Obadiya? (1 Bami 18:3, 12)

⁹ Majwi aakusaanguna aapandulula Obadiya b aamu Bbaibbele aamba kuti: “Obadiya wakali  kumuyoowa kapati Jehova.” (Amubale 1 Bami 18:3, 12.) Ino kuyoowa kuli boobu kwakamugwasya buti Obadiya? Bwini mbwakuti, kwakamugwasya kuba muntu uusyomeka alimwi uusyomwa; aboobo mwami wakamusala kulanganya ŋanda yakwe. (Amweezyanisye a Nehemiya 7:2.) Alimwi kuyoowa Leza kwakamugwasya Obadiya kuba sicamba, ibube mbwaakali kuyandika kapati. Wakapona ciindi Mwami mubi Ahabu naakali kulela, walo ‘iwakabisya mumeso aa Jehova kwiinda bami boonse ibakamusaangunina.’ (1Bam. 16:30) Alimwi mukaintu wakwe, Jezebeli iwakali kukomba Baala, tanaakali kumuyanda Jehova cakuti wakasola kumanizya bukombi bwakasimpe mubwami bwakunyika. Alimwi buya wakajaya basinsimi ba Leza banji. (1Bam. 18:4) Cakutadooneka, Obadiya wakali kukomba Jehova muciindi cikatazya kapati.

10. Ncinzi citondezya kuti Obadiya wakali sicamba kapati?

¹⁰ Ncinzi citondezya kuti Obadiya wakali sicamba kapati? Ciindi Jezebeli naakatalika kuyandaula basinsimi ba Leza kutegwa abajaye, Obadiya wakabweza basinsimi bali 100 akubasisa ‘kabali 50 mumpangala imwi aimwi alimwi wakali kubatolela cakulya amaanzi.’ (1Bam. 18:13, 14) Kuti Jezebeli naakazyiba ncaakacita Obadiya, naakamujaya. Tacidoonekwi buya kuti, Obadiya wakaliyoowede alimwi tanaakali kuyanda kufwa. Pele wakali kumuyanda kapati Jehova abantu bakwe kwiinda mbwaakali kuyanda buumi bwakwe.

11. Mbuti babelesi ba Jehova bamazuba aano mbobali mbuli Obadiya? (Amubone acifwanikiso.)

¹¹ Mazuba aano, babelesi ba Jehova banji bakkala mumasena mulimo wesu moulesyedwe. Balabalemeka beendelezi bamfwulumende, pele mbuli Obadiya, bakwesu abacizyi aaba balakaka kuleka kukomba Jehova. (Mt. 22:21) Balatondezya kuti balamuyoowa Leza kwiinda mukumvwida nguwe ikutali bantu. (Mil. 5:29) Balacita oobo kwiinda mukuzumanana kwaambilizya makani mabotu alimwi akuswaangana cakusisikizya. (Mt. 10:16, 28) Balasolekesya kubona masimpe kuti bakombinyina balijisi cakulya cakumuuya ncobayandika. Atubone cikozyano caba Henri, ibakkala mucisi cimwi mu Africa mwalo mulimo wesu mowakalesyedwe kwaciindi cili mbocibede. Ciindi mulimo nowakalesyedwe, ba Henri bakalyaaba kutola mabbuku aamba zyamu Bbaibbele kuli Bakamboninyina.  Bakalemba kuti: “Ndili muntu ulaansoni, aboobo ndilisinizyide kuti ndakacikonzya kuba sicamba akaambo kakuti ndilamulemeka kapati Jehova.” Sena andinywe inga mwacikonzya kuba basicamba mbuli ba Henri? Inzya, inga mwacikonzya ikuti naa kamumulemeka kapati Jehova.

12. Ino Mupaizi Mupati Jehoyada amukaintu wakwe bakatondezya buti kuti bakali kusyomeka kuli Jehova?

¹² Mupaizi Mupati Jehoyada wakali kumuyoowa Jehova, alimwi kuyoowa ooku kwakamugwasya kusyomeka akusumpula bukombi bwakasimpe. Eeci cakalibonya ciindi mwana musimbi wa Jezebeli, Ataliya, naakatalika kulela mu Juda kakunyina kuzumizyigwa. Kweelede kuti bantu bakalijisi kaambo kabotu ncobakali kumuyoowela Ataliya. Mukaintu ooyu wakali silunya kapati alimwi wakali kubuyanda bweendelezi cakuti wakasola kujaya bazyukulu bakwe boonse kutegwa ayendelezye nguwe. (2Mak. 22:10, 11) Umwi wabazyukulu bakwe wakali Jehoasi, walo iwakafwutuka akaambo kakuti Jehosabati mukaintu wa Jehoyada wakamusisa. Walo amulumaakwe bakamusisa alimwi akumulanganya. Kwiinda mukucita boobu, Jehoyada alimwi a Jehosabati bakapa kuti umwi wamukwasyi wa Davida afwutuke akuba mwami. Nokuba kuti wakalicembeede, Jehoyada wakali kusyomeka kuli Jehova alimwi tanaakalekela kuyoowa Ataliya kumupa kuleka kucita ciluzi.—Tus. 29:25.

13. Ciindi Jehoasi naakali amyaka iili ciloba, mbuti Jehoyada alimwi mbwaakatondezya kusyomeka?

¹³ Ciindi Jehoasi naakali amyaka iili ciloba, Jehoyada alimwi wakatondezya kuti wakali kusyomeka kuli Jehova. Mucikozyanyo, wakayandaula nzila yakugwasya Jehoasi. Kuzwidilila kwanzila eeyi kwakali kuyoopa kuti Jehoasi abe mwami, simulyazina wa Davida weelela. Pele kuti naa nzila eeyi noyatakazwidilila, Jehoyada wakali kukonzya kujaigwa. Aboobo, kwiinda mukugwasyigwa a Jehova, nzila eeyi yakazwidilila. Jehoyada wakagwasyilizyigwa abasilutwe alimwi aba Levi kubikka Jehoasi kuba mwami mpoonya akujaya Ataliya. (2Mak. 23:1-5, 11, 12, 15; 24:1) Kumane Jehoyada “wakapanga cizuminano akati ka Jehova amwami alimwi abantu, ikuti bayoozumanana kuba bantu ba Jehova.” (2Bam. 11:17) Jehoyada “alimwi wakabikka balindizi mumilyango yaŋanda ya Jehova kutegwa kutanjili muntu naba omwe uusofweede munzila iili yoonse.”—2Mak. 23:19.

14. Muunzila nzi Jehoyada mwaakalemekwa akaambo kakulemeka Jehova?

¹⁴ Musyule Jehova wakaambide kuti: “Aabo bandilemeka ndiyoobalemeka.” Masimpe wakamulumbula Jehoyada. (1Sam. 2:30) Mucikozyanyo, wakapa kuti makani aamba zya Jehoyada abikkilizyigwe mu Bbaibbele kutegwa twiiye kulingawo. (Rom. 15:4) Alimwi ciindi Jehoyada naakafwa, wakalemekwa munzila yaalubazu kwiinda mukuzikkilwa “mu Munzi wa Davida antoomwe abami akaambo kazintu zibotu nzyaakacita mu Israyeli alimwi akujatikizya Leza mwini-mwini aŋanda ya Leza.”—2Mak. 24:15, 16.

15. Ncinzi ncotukonzya kwiiya kucibalo cijatikizya Jehoyada? (Amubone acifwanikiso.)

¹⁵ Cibalo cijatikizya Jehoyada cilakonzya kutugwasya toonse kuyoowa Leza. Baalu balakonzya kwiiya Jehoyada kwiinda mukujana nzila zyakukwabilila mbungano. (Mil. 20:28) Bacembeede balakonzya kwiiya Jehoyada kwiinda mukuzyiba kuti ciindi nobayoowa Jehova akuzumanana kusyomeka, ulakonzya kubabelesya kuzuzikizya makanze aakwe. Kunyina naleka kubabikkila maano pe. Bakubusi balakonzya kubona Jehova mbwaakamulanganya Jehoyada akumwiiya kwiinda mukubalemeka bacembeede basyomeka, kwaambisya aabo bamubelekela  Jehova kwamyaka minji. (Tus. 16:31) Mpoonya toonse tulakonzya kwiiya ziiyo zibotu kuli basilutwe alimwi aba Levi ibakagwasyilizya Jehoyada. Atubagwasyilizye cakusyomeka “aabo basololela” kwiinda mukubamvwida.—Heb. 13:17.

16. Ncinzi citondezya kuti Mwami Jehoasi tanaakasimide kumuuya?

¹⁶ Jehoyada wakamugwasya Mwami Jehoasi kuba muntu uuli kabotu. (2Bam. 12:2) Akaambo kaceeci, ciindi mwami naakacili mwana wakali kuyanda kukkomanisya Jehova. Pele naakafwa Jehoyada, Jehoasi wakatalika kuswiilila basilutwe basiluleyo. Ncinzi cakazwa mpawo? Walo abantu bakwe ‘bakatalika kukomba misemu yazisamu yakukomba alimwi amituni.’ (2Mak. 24:4, 17, 18) Nokuba kuti eeci cakamunyemya kapati Jehova, “wakazumanana kubatumina basinsimi kutegwa babapilusye . . . , pele bakakaka kuswiilila.” Alimwi kunyina nobakamuswiilila naba Zekariya c mwana wa Jehoyada, walo iwatakali buyo musinsimi wa Jehova pele alimwi wakali mweeninyina a Jehoasi. Mane buya, Mwami Jehoasi wakalailila kuti Zekariya ajaigwe nokuba kuti bamukwasyi wa Zekariya bakafwutula buumi bwakwe aciindi cimwi.—2Mak. 22:11; 24:19-22.

17. Ino zintu zyakamweendela buti Jehoasi?

¹⁷ Jehoasi tanaakazumanana kumuyoowa Jehova, aboobo zintu tiizyakamweendela kabotu. Jehova musyule wakaambide kuti: “Aabo bandisampaula ndiyoobasampaula.” (1Sam. 2: 30) Mukuya kwaciindi, impi yabasikalumamba nsyoonto yabana Siriya, yakazunda “mpi yabasikalumamba mpati” ya Jehoasi alimwi “bakamucisa kapati.” Nobakaunka bana Siriya, Jehoasi wakajaigwa ababelesi bakwe akaambo kakujaya Zekariya. Bantu bakabona kuti mwami ooyu wakali mubi kapati cakuti kunyina anobakamuzikkila “mumasena aazikkilwa bami.”—2Mak. 24:23-25.

18. Kweelana a Jeremiya 17:7, 8, mbuti mbotukonzya kweeleba kuba mbuli Jehoasi?

¹⁸ Ncinzi ncotwiiya kucikozyanyo ca Jehoasi? Wakali mbuli cisamu cijisi miyanda ilaatala-tala buyo, iciyandika kutabililwa lyoonse. Ciindi Jehoyada naakafwa, walo iwakali kumutabilila, Jehoasi wakatalika kuswiilila basiluleyo, wakaleka kusyomeka kuli Jehova. Cikozyanyo eeci citondezya kuti tatweelede kumvwida Leza akaambo buyo kakuti banamukwasyi alimwi abamwi mumbungano mbobacita oobo. Kutegwa tuzumanane kuyuma kumuuya, tweelede kuba acilongwe ciyumu a Jehova, kuzumanana kumuyanda kapati akumulemeka kwiinda mukwiiya lyoonse, kuzinzibala kuyeeya alimwi akupaila.—Amubale Jeremiya 17:7, 8; Kol. 2:6, 7.

19. Ncinzi Jehova ncayanda kuti tucite?

¹⁹ Jehova kunyina natulomba kuti tucite zintu zinji. Pele ncayanda kuti tucite, cilaambidwe kulugwalo lwa Mukambausi 12:13, ilwaamba kuti: “Koyoowa Leza mwini-mwini akutobela milawo yakwe, nkaambo ooyu ngomukuli woonse ngwapedwe muntu.” Kuti katumuyoowa Leza, tuyoocikonzya kuzumanana kusyomeka kulinguwe tacikwe makani azintu zikonzya kutucitikila mbubwenya mbwaakacita Obadiya a Jehoyada. Kunyina cintu cili coonse ciyoonyonganya cilongwe cesu a Jehova.