1. Kweelana alugwalo lwa 1 Petro 5:2, mulimo nzi uuyandika kapati ngobacita baalu?

 BAALU Banakristo bakapegwa mulimo wakulanganya mbelele zya Jehova ziyandika kapati. Bamaalumi aaba balyaabide balaubikkila maano kapati mulimo ooyu wakubelekela bakwesu abacizyi, alimwi balabeleka canguzu kuba ‘beembezi beembela kabotu.’ (Jer. 23:4; Amubale 1 Petro 5:2.) Eelo kaka tulalumba kapati kuba abamaalumi bali boobu mumbungano zyesu!

2. Masunko nzi baalu bamwi ngobajana?

² Baalu balajana buyumuyumu bunji ciindi nobalanganya mikuli yabo. Bwini mbwakuti, beelede kubeleka canguzu kutegwa balanganye mbungano. Mucikozyanyo, ba Tony mwaalu waku United States, bakeelede kwiiya kulicesya caboola kukuvwula kwamilimo njobakeelede kuzumina kubeleka. Bakaamba kuti: “Nobwakatalika bulwazi bwa COVID-19, ndakaba amilimo minji yakupanga bubambe bwamiswaangano alimwi amulimo wamumuunda. Pele nokuba kuti ndakali kusolekesya kubeleka canguzu, kwakali milimo iimbi minji yakeelede kucitwa. Aboobo, ndakatalika kujata bubi kapati cakuti cakatalika kundaalila kujana ciindi cakubala Bbaibbele, kuba aciiyo cangu ndemwini alimwi akupaila.” Ba Ilir mwaalu waku Kosovo bakajana buyumuyumu bwiindene. Ciindi nobakali mubusena mwakali nkondo, cakabayumina kutobela busolozi bwambunga. Bakaamba kuti: “Busicamba bwangu bwakasunkwa ciindi baofesi yamutabi nobakandipa mukuli wakugwasya bakwesu abacizyi ibakali mubusena ibwakali kuyoosya. Ndakayoowa kapati alimwi busolozi oobu bwakali kulibonya mbuli kuti tabugwasyi.” Ba Tim, ba misyinali ku Asia, cakali kubayumina kucita zintu zyoonse nzyobakeelede kucita buzuba abuzuba. Bakaamba kuti: “Zimwi ziindi, ndakali kukatala kapati mumizeezo kulanganya bakwesu abacizyi.” Ncinzi cikonzya  kugwasya baalu ibali mubukkale bukozyenye aboobu?

3. Mbuti toonse mbotukonzya kugwasyigwa kwiinda mukulanga-langa cikozyanyo ca Mubetesi Gideoni?

³ Baalu balakonzya kwiiya cikozyanyo ca Mubetesi Gideoni. (Heb. 6:12; 11:32) Wakali mukwabilizi alimwi mweembezi wabantu ba Leza. (Bab. 2:16; 1Mak. 17:6) Mbubwenya mbuli Gideoni, baalu bakasalwa kuti kabalanganya bantu ba Leza kwaambisya muziindi zikatazya kapati. (Mil. 20:28; 2Tim. 3:1) Tulakonzya kwiiya kulicesya kwakwe alimwi akumvwida. Kuliyumya kwakwe kwakasunkwa ciindi naakali kucita mulimo wakwe. Kufwumbwa naa tuli baalu naa pe, tweelede kwiiya kubalumba kapati baalu. Tweelede kubelekela antoomwe abakwesu aaba basimide kumuuya alimwi ibabeleka canguzu.—Heb. 13:17.

4. Mbuti Gideoni mbwaakatondezya kulicesya?

⁴ Gideoni wakali mwaalumi wakali kulicesya. b Ciindi mungelo wa Jehova naakamwaambila kuti wasalwa kuyoovwuna bana Israyeli kubana Midiyani ibakali anguzu kapati, mwaalumi ooyu iwakali kulicesya wakaingula kuti: “Ciinga cangu nceciniini kapati akati kaziinga zya Manase alimwi mebo ndendime musyoonto kapati muŋanda yabataata.” (Bab. 6:15) Gideoni wakalimvwa kuti tanaakali kweelela kupegwa mulimo ooyu, pele Jehova wakalizyi kuti wakali kukonzya kuuzuzikizya. Aboobo, kwiinda mukugwasyigwa a Jehova, Gideoni wakauzuzikizya mulimo wakwe cakumaninina.

5. Ndilili nocikonzya kukatazya kumwaalu kulicesya?

⁵ Baalu balasolekesya kusikila mpobagolela kutondezya bube bwakulicesya muzintu zyoonse nzyobacita. (Mik. 6:8; Mil. 20:18, 19) Kunyina nobalisumpula kujatikizya zintu nzyobakonzya kucita naa nzyobakacita. Alimwi kunyina nobalimvwa kuti banyina mpindu akaambo kakulubizya kwabo. Pele zimwi ziindi, mwaalu cilakonzya kumukatazya kulicesya. Mucikozyanyo, ulakonzya kuzumina milimo minji mpoonya akwaalilwa kwiizuzikizya. Naa cilakonzya kumukatazya kulicesya ciindi bantu nobamulumbaizya naa nobamutongooka akaambo kambwacita zintu. Ncinzi baalu ncobakonzya kwiiya kucikozyanyo ca Gideoni icikonzya kubagwasya mubukkale oobu?

6. Ncinzi baalu ncobakonzya kwiiya kukulicesya kwa Gideoni? (Amubone acifwanikiso.)

⁶ Amulombe lugwasyo. Muntu uulicesya ulizyi  kuti kuli zintu zimwi nzyatakonzyi kucita. Gideoni wakatondezya kuti wakali kulicesya kwiinda mukulomba bamwi kuti bamugwasye. (Bab. 6:27, 35; 7:24) Abalo baalu basongo mbobacita oobo. Ba Tony, ibaambidwe kale bakaamba kuti: “Akaambo kambondakakomezyegwa, ndakali aacilengwa cakuzumina milimo minji yalo njondatakali kukonzya kuzuzikizya. Aboobo ndakasala kubikkilizya makani aakulicesya mukukomba kwamukwasyi akulomba bakaintu bangu kuti bandaambile mbondakali kucita mumbazu eeyi. Kuyungizya waawo, ndakeebelela kavidiyo kali a jw.org ikajisi mutwe wakuti Amubayiisye, Amubasyome, Alimwi Akubapa Nguzu Bamwi, Mbubwenya Mbwacita Jesu.” Aboobo ba Tony bakatalika kulomba bamwi kuti babagwasye kucita milimo imwi. Ncinzi cakazwa mpawo? Ba Tony bakaamba kuti: “Milimo yamumbungano ilalanganizyigwa kabotu alimwi andime ndilijisi ciindi cinji cakuyumya cilongwe cangu a Jehova.”

7. Mbuti baalu mbobakonzya kwiiya cikozyanyo ca Gideoni ikuti bamwi babatongooka? (Jakobo 3:13)

⁷ Mutanyemi ikuti naa umwi wamutongooka. Baalu balakonzya kusunkwa ciindi nobatongookwa. Pele cikozyanyo ca Gideoni cilakonzya kubagwasya. Mbwaanga wakalizyi kuti tanaakalondokede, wakazumanana kukkazika moyo ciindi bana Efraimu nobakamutongooka. (Bab. 8:1-3) Gideoni kunyina naakabaingula cabukali. Pele wakatondezya kuti wakali muntu uulicesya kwiinda mukubaswiilila alimwi akubaingula caluzyalo. Eeci cakapa kuti baleke kunyema. Aboobo, baalu basongo balamwiiya Gideoni kwiinda mukuswiilila cakubikkila maano alimwi akwiingula cabubombe ciindi bamwi nobabatongooka. (Amubale Jakobo 3:13.) Kwiinda mukucita boobo, bapa kuti kube luumuno mumbungano.

8. Ino baalu beelede kucita buti ciindi nobalumbaizyigwa? Amupe cikozyanyo.

⁸ Amupe bulemu boonse kuli Jehova. Ciindi bantu nobakatalika kumulumbaizya Gideoni akaambo kakuzunda bana Midiyani, wakapa bulemu kuli Jehova. (Bab. 8:22, 23) Mbuti baalu mbobakonzya kwiiya cikozyanyo ca Gideoni? Balakonzya kucita oobo kwiinda mukupa Jehova bulemu akaambo kakuzwidilila kuli koonse nkobaba ankuko. (1Kor. 4:6, 7) Mucikozyanyo, ikuti naa mwaalu walumbaizyigwa kapati akaambo kakuyiisya kabotu, ulakonzya kwaamba kuti malailile aayo azwa mu Jwi lya Leza alimwi akuti toonse tuyiisyigwa buyo ambunga ya Jehova. Zimwi ziindi, baalu beelede kulilingula kutegwa babone naa kuyiisya kwabo kupa kuti Jehova alemekwe naa kupa kuti bantu babikkile mbabo maano. Amumvwe cakuluula camwaalu uutegwa Timothy. Ciindi naakaba mwaalu, mukwesu Timothy wakali kukukkomanina kapati kupa makani aabuleya. Wakaamba kuti: “Ndakali kulibambila majwi aantalisyo manji alimwi azikozyanyo zikatazya kumvwa. Akaambo kaceeci, bantu kanji-kanji bakali kundilumbaizya kapati. Aboobo bakatalika kubikkila ndime maano muciindi cancolyaamba Bbaibbele naa ncaamba Jehova.” Pele mukuya kwaciindi, ba Timothy bakabona kuti bakali kuyandika kucinca kujatikizya mbobakali kuyiisya kutegwa bantu kabatabikkili mbabo maano. (Tus. 27:21) Ncinzi cakazwa mpawo? Bakaamba kuti: “Lino bakwesu abacizyi balandaambila makani aangu mbwaabagwasya kuzunda sunko limwi, kuliyumya kupenzi limwi naa kuyumya cilongwe cabo a Jehova. Ndilakkomana kapati kumvwa twaambo tuli boobu kwiinda mbocakabede kaindi nobakali kundilumbaizya buyo.”

9. Ncinzi cakali kukonzya kupa kuti Gideoni cimukatazye kumvwida Jehova akutondezya busicamba? (Amubone cifwanikiso icili aacivwumbyo.)

⁹ Ciindi Gideoni naakasalwa kuba mubetesi, wakali kuyandika kumvwida alimwi akutondezya busicamba. Wakapegwa mulimo iwakali kubikka  buumi bakwe muntenda wakunyonyoona cipaililo cabausyi ca Baala. (Bab. 6:25, 26) Nokwakainda ciindi, naakamana kubunganya basikalumamba, Gideoni ziindi zyobilo wakapegwa malailile aakuti acesye mweelwe wabasikalumamba. (Bab. 7:2-7) Mpoonya wakalaililwa kulwana nkambi yabasinkondonyina akati kamasiku.—Bab. 7:9-11.

10. Ino kumvwida kwamwaalu inga kwasunkwa buti?

¹⁰ Baalu beelede kuti ‘kabalibambilide kumvwida.’ (Jak. 3:17) Mwaalu uumvwida ulilibambilide kutobela ncaamba Magwalo abusolozi mboipa mbunga ya Leza. Aboobo uba cikozyanyo cibotu kuli bamwi. Nokuba boobo, zimwi ziindi cilakonzya kumukatazya kumvwida. Mucikozyanyo, cilakonzya kumukatazya kutobela malailile oonse ngatambula. Zimwi ziindi, ulakonzya kudooneka naa busolozi bumwi bulagwasya ncobeni naa kuti mbwabusongo. Ambweni ulakonzya kulombwa kucita mulimo uukonzya kupa kuti aangwe. Mbuti baalu mbobakonzya kwiiya cikozyanyo ca Gideoni cakumvwida mubukkale buli boobu?

11. Ncinzi cikonzya kugwasya baalu kumvwida?

¹¹ Amwaaswiilisisye malailile akwaatobela. Leza wakaambila Gideoni mbwaakali kukonzya kunyonyoona cipaililo cabausyi, nkwaakeelede kumuyakila cipaililo cipya Jehova, alimwi abanyama mbaakeelede kutuula. Gideoni kunyina naakatongooka kujatikizya malailile ngaakapegwa. Wakacita kweelana ambwaakamwaambila Jehova. Mazuba aano, baalu balatambula malailile kuzwa kumbunga ya Jehova kwiinda mumagwalo, zyakwaambilizya, alimwi amalailile aambi aatugwasya kukwabilila buumi bwesu alimwi akuba acilongwe cibotu a Jehova. Tulabayanda kapati baalu akaambo kakubutobela cakusyomeka busolozi mboipa mbunga. Aboobo mbungano yoonse ilagwasyigwa.—Int. 119:112.

12. Ino baalu inga balubelesya buti lugwalo lwa Bahebrayo 13:17, ikuti mbunga ya Jehova yabaambila kucinca mbobacita zintu?

¹² Amulibambile kucinca. Amuyeeye kuti Jehova wakaambila Gideoni kucesya mweelwe wabasikalumamba bakwe. (Bab. 7:8) Ambweni wakalibuzya kuti: ‘Mwati kucinca ooku kulayandika ncobeni? Sena kulagwasya?’ Nokuba boobo Gideoni wakamvwida. Mazuba aano, baalu balamwiiya Gideoni kwiinda mukumvwida ciindi mbunga noyabaambila kucita cintu cimwi munzila yiindene. (Amubale Bahebrayo 13:17.) Mucikozyanyo, mu 2014 Kabunga Keendelezya kakacinca kujatikizya mbwaayelede kubbadelelwa mayake aa Maanda aa Bwami a Maanda Aakucitila Miswaangano Mipati. (2Kor. 8:12-14) Musyule, mbunga yakali kupa looni kumbungano kutegwa bayake, mpoonya mbungano zyakali kwaapilusya mali aayo. Pele lino, mbunga ibelesya zyakusanga kuzwa kumbungano zyoonse munyika kuyaka Maanda aa Bwami alimwi a Maanda Aakucitila Miswaangano Mipati kufwumbwa kubusena nkwaayandika, nokuba kuti mbungano  yakubusena ooko isanga buyo mali masyoonto. Ciindi ba José nobakamvwa zyakucinca ooku, bakadooneka akutalika kuyeeya kuti, ‘Kunyina Ŋanda ya Bwami noiba yomwe iyooyakwa. Oobu tabusyi mbotucita zintu kuno.’ Pele ncinzi cakagwasya ba José kutobela busolozi? Bakaamba kuti: “Majwi aali ku Tusimpi 3:5, 6 akandiyeezya kusyoma Jehova. Eelo kaka cilakkomanisya kubona zyazwa mpawo! Lino tulayaka Maanda aa Bwami manji. Alimwi nzila eeyi mpya iijatikizya mbozibelesyegwa zyakusanga zyesu, yagwasya kapati nkaambo yapa kuti kube kweelana.”

13. (a) Ncinzi Gideoni ncaakasinizyide? (b) Mbuti baalu mbobakonzya kwiiya cikozyanyo ca Gideoni? (Amubone acifwanikiso.)

¹³ Amucite kuyanda kwa Jehova cabusicamba. Gideoni wakamvwida Jehova nokuba kuti wakaliyoowede alimwi wakapegwa mulimo wakali kubikka buumi bwakwe muntenda. (Bab. 9:17) Naakamana kuyumizyigwa a Jehova, Gideoni wakalisinizyide kuti Leza wakali kuyoomugwasya ciindi naakali kukwabilila bantu ba Leza. Baalu ibakkala mumasena mulimo wesu moulesyedwe balamwiiya Gideoni. Cabusicamba balasololela miswaangano alimwi amulimo wamumuunda nokuba kuti bakongwa kwaangwa, kubuzyigwa-buzyigwa, kusweekelwa mulimo naa kulwanwa. c Lyamapenzi mapati, baalu bayooyandika busicamba kutegwa batobele malailile ngobayoopegwa, tacikwe makani antenda zinoojatikizyidwe. Mucikozyanyo, ambweni tuyootambula malailile aajatikizya mbotweelede kwaambilizya mulumbe wacivwulamabwe wacikozyanyo alimwi ancotweelede kucita kutegwa tukafwutuke kukulwanwa a Gogo waku Magogo.—Ezk. 38:18; Ciy. 16:21.

14. Nkaambo nzi ncocakali kukatazya kuli Gideoni kuliyumya?

¹⁴ Gideoni wakeelede kubeleka canguzu kali mubetesi. Ciindi bana Midiyani nobakali kutija nkondo masiku, Gideoni wakabatandaanya kuzwa ku Kkuti lya Jezreeli kusika ku Mulonga wa Jordano, walo uuyeeyelwa kuti wakazingulukidwe azisaka. (Bab. 7:22) Sena Gideoni  wakagolela buyo ku Jordano? Peepe! Nokuba kuti wakalikatede, walo abamaalumi bakwe bali 300 bakazabuka akuzumanana kubatandaanya bana Midiyani. Mpoonya bakabajata akubazunda.—Bab. 8:4-12.

15. Nkaambo nzi zimwi ziindi ncocikonzya kumukatazya kuliyumya mwaalu?

¹⁵ Zimwi ziindi, mwaalu ulakonzya kukatala kapati akaambo kakulanganya mbungano alimwi amukwasyi wakwe. Mubukkale buli boobu, mbuti baalu mbobakonzya kwiiya cikozyanyo ca Gideoni?

16-17. (a) Ncinzi cakagwasya Gideoni kuliyumya? (b) Ncinzi baalu ncobeelede kusyoma? (Isaya 40:28-31) (Amubone acifwanikiso.)

¹⁶ Amusyome kuti Jehova uyoomugwasya. Gideoni wakasyoma kuti Jehova wakali kuyoomugwasya alimwi Jehova wakamugwasya ncobeni. (Bab. 6:14, 34) Aciindi cimwi, Gideoni abaalumi bakwe bakali kutandaanya bami bobilo bana Midiyani amaulu, balo ambweni ibakatantide nkamela. (Bab. 8:12, 21) Pele kwiinda mukugwasyigwa a Leza, bana Israyeli bakazunda. Mbubwenya buyo, abalo baalu balakonzya kusyoma Jehova, walo ‘uutakatali nokuba kuwizuka.’ Uyoobapa lugwasyo ndobayandika aciindi ceelede.—Amubale Isaya 40:28-31.

¹⁷ Amumvwe cakuluula camukwesu Matthew uubelekela mu Hospital Liaison Committee. Ncinzi cimugwasya kuliyumya? Wakaamba kuti: “Ndakabona mbwaali aamasimpe majwi aali kulugwalo lwa Bafilipi 4:13. Ciindi nondakali kukatala akulimvwa kuti inga tiindazumanana, ndakali kupaila mpoonya aawo, kulomba Leza kuti andipe nguzu zyakucikonzya kugwasya bakwesu. Muziindi eezyo, muuya wa Jehova wakandipa nguzu akundigwasya kuliyumya.” Mbubwenya mbuli Gideoni, baalu balabeleka canguzu kulanganya bantu ba Jehova, nokuba kuti talili lyoonse nocili cuuba-uba kucita boobo. Pele beelede kulicesya akuyeeya kuti talili lyoonse nobakonzya kucita zintu zyoonse nzyobayanda. Beelede kusyoma kuti Jehova uyoobamvwa ciindi nobamulomba lugwasyo kutegwa baliyumye.—Int. 116:1; Flp. 2:13.

18. Mukwiinduluka, mbuti baalu mbobakonzya kwiiya cikozyanyo ca Gideoni?

¹⁸ Kuli ziiyo zinji baalu nzyobakonzya kwiiya kuzwa kucikozyanyo ca Gideoni. Baalu beelede kutondezya muuya wakulicesya kujatikizya bunji bwamilimo njobazumina kucita alimwi ambobacita ciindi umwi naabatongooka naa kubalumbaizya. Beelede kumvwida akuba basicamba, kwaambisya mamanino aabweende obuno bwazintu mbwaayaabuswena afwaafwi. Alimwi beelede kusyoma kuti Leza ulakonzya kubagwasya, tacikwe makani abuyumuyumu mbobakonzya kujana. Kwaamba masimpe, tulabalumba kapati beembezi aaba ibabeleka canguzu alimwi ‘tulabalemeka lyoonse bantu bali boobo.’—Flp. 2:29.