Bazyali bangu bakazwa mu Estonia lya Nkondo Yanyika Yoonse Yabili akuunka ku Germany, kwalo nkondakazyalilwa. Nondakazyalwa, bakatalika kulibambila kulongela ku Canada. Twakasikila muŋanda syoonto iyakali munsi-munsi adolopo lya Ottawa, mu Canada, alimwi muŋanda eeyi mwakali koona ankuku. Twakali bacete kapati, pesi mbubo twakalijisi maji aakulya kuseeni.

Bumwi buzuba, Bakamboni ba Jehova bakabalila bamaama lugwalo lwa Ciyubunuzyo 21:3, 4. Majwi ngobakamvwa akabasika amoyo kapati cakuti bakatalika kulila. Bamaama abataata bakazumanana kwiiya Bbaibbele, mpoonya kumbele bakeelela kubbapatizyigwa.

Nokuba kuti bazyali bangu tiibakauzyi kabotu mwaambo wa Cikuwa, bakali basungu mukubelekela Jehova. Lyoonse mu Mujibelo, noliba leelyo bataata nobakali kubeleka masiku kusungulula lubulo lwa nickel ku Sudbury, Ontario, bakotoka bakali kunditolelezya mebo amusyoonto wangu Sylvia, mumulimo wamumuunda. Alimwi nsondo ansondo twakali kucita ciiyo ca Ngazi Yamulindizi antoomwe mbuli mukwasyi. Bamaama abataata bakandikulwaizya kutalika kumuyanda Leza. Eeci cakapa kuti ndilyaabe kuli Jehova mu 1956 kandijisi myaka iili 10. Kufwumbwa ndayeeya bazyali bangu mbobakali kumuyanda kapati Jehova, cakali kundipa kuzumanana kumubelekela.

Pele nondakamanizya cikolo, ndakaleka kubikkila maano kubelekela Jehova. Ndakatalika kuyeeya kuti ikutalika bupainiya, kwakali kukonzya kupa kuti nditajani mali aakubelesya kuzuzikizya makanze aangu aakukkwela ndeke akuunka kuyoobona masi aambi. Ndakajana mulimo wakulizya nyimbo a radio station imwi, alimwi ndakali kuukkomanina kapati mulimo ooyu. Pele mbwaanga ndakali kubeleka kumangolezya, cakali kupa kuti kanditajaniki-janiki kumiswaangano alimwi ndakali kuyanzana abantu ibatakali kumuyanda Leza. Mpoonya, manjezeezya aangu aayiisyidwe Bbaibbele akandigwasya kupanga kucinca.

Ndakalongela kudolopo lya Oshawa, mu Ontario. Okuya ndakazyibana aba Ray Norman amucizyi wabo Lesli alimwi abapainiya bamwi. Boonse bakandibikkila maano cakuti ndakalimvwa kuyandwa. Kubona mbobakakkomene, kwakandigwasya kuzilanga-langa alimwi mbaakani zyangu. Mpoonya bakandikulwaizya kutalika bupainiya, aboobo ndakatalika mu September 1966. Ndakalikkomene kapati, alimwi ndakali kuukkomanina mulimo wangu ooyu. Nokuba boobo, kuli zintu zyakali kulangilwa kucitika cakutayeeyela izyakali kuyoocinca buumi bwangu.

Nondakacili kucikolo, ndakalembela mulimo waku Beteli ku Toronto, mu Canada. Mpoonya nokwakainda  ciindi kandicita bupainiya, ndakatambwa kuyoobelekela ku Beteli kwamyaka yone. Pele ndakali kubayanda kapati ba Lesli, aboobo ndakayoowa kuti, ikuti naa ndizumine kuunka ku Beteli, tandikababoni limbi. Nondakamana kupaila cakuzwa ansi amoyo, ndakazumina kuyoobelekela ku Beteli pele cakandicisa kapati kubasiya ba Lesli.

Ndakali kubelekela muwasyilwa zisani a Beteli, mpoonya kumbele ndakaba mulembi. Pele ba Lesli, bakaba painiya waalubazu mu Gatineau, ku Quebec. Ndakali kulibuzya ncobakali kucita akuti naa ndakasala kabotu. Pele cakutayeeyela kwakacitika cintu cimwi cikkomanisya kapati. Ba Ray, mwanookwabo aba Lesli, bakatambwa kubelekela a Beteli. Twakatalika kukkala limwi muluumu. Eeci cakapa kuti nditalike alimwi kubandika aba Lesli. Twakakwatana aba Lesli mu February 27, 1971, noyakamana myaka yone njondakatambidwe kubelekela a Beteli.

Mebo aba Lesli twakatumwa kuyoobelekela kumbungano yaci French ku Quebec. Nokwakainda myaka misyoonto ndakagambwa kusalwa kuba mulangizi wabbazu kandijisi myaka iili 28. Ndakali kuyeeya kuti ndicili mwana alimwi ndinyina luzyibo lwakuba mulangizi wabbazu, pele majwi aali kulugwalo lwa Jeremiya 1:7, 8 akandikulwaizya kapati. Kunze lyaboobo, ba Lesli musyule bakali muntenda zyamumugwagwa ziindene-indene alimwi cakali kubakatazya koona. Aboobo twakalimvwa kuti inga tiitwacikonzya kubeleka mulimo wamubbazu. Pele ba Lesli bakaamba kuti: “Kuti Jehova watwaambila kucita cintu cimwi, tweelede kucicita.” Twakazumina kuunka mubbazu alimwi twakabeleka calukkomano mumulimo ooyu kwamyaka iili 17.

Ndakali kujata bubi kapati mumulimo wamubbazu cakuti ndakali kujana buyo ciindi cisyoonto cakuba abakaintu bangu. Ndakaiya ciiyo acimwi. Bumwi buzuba mu Muhulo kuseeni, ndakamvwa uukonkomona. Pele nondakasondela kunyina wakaliko, kwakali buyo mutaanga iwakajisi kasani, mafuluti, cciizi, cinkwa, bbodela lyawaini, nkapu zyagilazi alimwi akapepa kakalembedwe kuti, “Amuunke kuyoolikondelezya abakaintu banu.” Bwakali buzuba bubotu, zuba kalibala. Nokuba boobo, ndakaambila bakaintu bangu kuti ndeelede kulibambila makani aboobo tacikookonzyeka kuunka. Bakamvwisya, pesi bakausa. Nondakakkede akatebulu kakubalila, manjezeezya akatalika kundikatazya. Ndakayeeya lugwalo lwa Baefeso 5:25, 28. Ndakabona kuti lugwalo lwamu Bbaibbele oolu yakali nzila Jehova mwakali kundiyeezya kubikkila maano mbobalimvwa bakaintu bangu. Nondakamana kupaila, ndakabaambila kuti, “Atweende,” aboobo bakakkomana kapati. Twakaunka kubusena bubotu kapati kumbali aamulonga, twakayala kasani ansi akukkala. Oobu mbumwi bwamazuba aakkomanisya kapati ngondakali kuba antoomwe abakaintu bangu. Alimwi buya, ndakacikonzya akulibambila makani aangu.

Twakaukkomanina kapati mulimo wabbazu alimwi twakaswaya masena manji, kutalikila ku British Columbia kusikila ku Newfoundland. Makanze aangu aakuunka mumasena aambi akazuzikizyigwa. Ndakatalika kuyeeya kulembela ku Cikolo ca Gileadi, pele tiindakali kuyanda kuunka kucisi cimbi kandili misyinali. Cakali kulibonya mbuli kuti bamisyinali mbantu baalubazu, aboobo ndakali kulimvwa kuti tandeeleli. Alimwi  buya, ndakali kuyoowa kuti ambweni inga twatumwa kuyoobelekela kucisi cimbi mu Africa imwakali bulwazi bumwi ankondo. Ndakalikkomene kuzumanana kukkala mu Canada.

Mu 1992, Bakamboni ba Jehova bakali kukonzya kukambauka kubuleya alimwi amuzisi zimwi izyakali cibeela ca Soviet Union. Aboobo bakwesu bakatulomba naa inga twayanda kuyoobelekela ku Estonia katuli bamisyinali. Twakagambwa kapati, pele twakaapailila makani aaya. Aciindi aawa alimwi twakati, ‘Kuti Jehova watwaambila kucita cintu cimwi, tweelede kucicita.’ Twakazumina, alimwi ndakakkomana kumvwa kuti tatuunki ku Africa.

Mpoonya-mpoonya twakatalika kwiiya mwaambo waku Estonia. Notwakakkala kwamyezi iili mbwiibede, twakatumwa mumulimo wabbazu. Twakeelede kuswaya mbungano zili 46 alimwi atubunga muzisi zyotatwe zyamu Baltic kubikkilizya adolopo lya Kaliningrad, mu Russia. Eeci cakali kwaamba kwiiya mwaambo waku Latvia, Lithuania, alimwi awaku Russia. Cakali ciyumu. Nokuba boobo, bakwesu abacizyi bakakkomana kuti twakali kusola kwiiya mwaambo wabo alimwi bakatugwasya. Mu 1999, kwakajalulwa ofesi yamutabi mu Estonia, mpoonya ndakasalwa kuba wamu Kkomiti Yamutabi antoomwe aba Toomas Edur, Lembit Reile, alimwi aba Tommi Kauko.

Twakazyibana a Bakamboni banji ibakatandilwa ku Siberia musyule. Nokuba kuti tiibali kulanganizyigwa kabotu muntolongo alimwi tiibakali kukonzya kuba antoomwe amikwasyi yabo, kunyina nobakanyema pe. Bakazumanana kukkomana akuba basungu mumulimo wamumuunda. Cikozyanyo cabo cakatugwasya kubona kuti andiswe tulakonzya kuliyumya akukkomana mubukkale bukatazya.

Twakabeleka canguzu kwamyaka minji kakunyina kujana ciindi cinji cakulyookezya. Aboobo bakaintu bangu bakatalika kulimvwa kukatala kapati. Pele twakamuka kuzyiba kuti bakajisi bulwazi butegwa fibromyalgia bwalo ibwakali kubapa kulimvwa kukatala boobu. Aboobo twakayeeya kuti tujokele ku Canada. Ciindi notwakatambwa ku Cikolo ca Bamukkomiti ya Mutabi Abamakaintu Babo ku Patterson, New York, U.S.A., ndakalimvwa kuti tatukoocikonzya kuyoojanika. Pele notwakamanizya kupaila cakuzwa ansi amoyo, twakazumina kuunka. Jehova wakakulongezya kusala kwesu. Katucili kucikolo eeci, ndendilyo bakaintu bangu nobakasilikwa penzi lyabo. Mukuya kwaciindi twakatalika kubeleka mbotwakali kubeleka musyule.

Mangolezya aamwi mu 2008, katuli ku Estonia, ndakatambula fooni kuzwa kumaofesi mapati kundibuzya naa inga ndazumina kuyoobelekela ku Congo. Ndakagambwa kapati, kayi ndakeelede kubaingula buzuba bwakali kutobela. Pele tiindakabaambila mpoonya-mpoonya bakaintu bangu nkaambo ndakalizyi kuti cakali kukonzya kubapa kutoona busiku oobo. Muciindi caboobo, ndime ndatakoona nkaambo ndakaluujisi kupaila kuli Jehova kujatikizya kulibilika kwangu kwakuyoobelekela ku Africa.

Buzuba bwakatobela ndakabaambila bakaintu bangu, mpoonya twakalyaambauzya kuti: “Jehova watulomba kuyoobelekela ku Africa. Pele ino tuzyi buti kuti inga tiitwacikonzya alimwi akukukkomanina kakuli  tatunasola?” Aboobo twakabeleka mu Estonia kwamyaka iili 16, mpoonya twakaunka ku Kinshasa, ku Congo. Ofesi yamutabi eeyi yakajisi busena buboneka kabotu alimwi kwakanyina coongo. Cintu cakusaanguna bakaintu bangu ncobakabikka muluumu yesu, nikkaadi njotwakaletelezya kuzwa ku Canada. Yakalembedwe kuti: “Amukkomane tacikwe makani abusena nkomubede.” Notwakamana kuzyibana abakwesu, kusololela ziiyo zya Bbaibbele akubona bubotu bwamulimo wabumisyinali, lukkomano lwesu mumulimo wa Jehova lwakayungizyika. Mukuya kwaciindi, twakaba acoolwe cakuswaya mitabi iili 13 muzisi zimbi zyamu Africa. Eeci cakapa kuti tuzyibane abantu banji baindene-indene alimwi ibakajisi bube bukkomanisya. Kuyoowa koonse nkotwakajisi kwakamana alimwi twakamulumba Jehova akaambo kakututuma kuyoobelekela mu Africa.

Ku Congo, twakali kupegwa zyakulya ziindene-indene, zimwi twakali kuyeeya kuti tatukoozikkomanina. Pele notwakali kubona bakwesu kabazilya, andiswe twakayeeya kuzisola alimwi twakazikkomanina.

Twakaunka kucisi nkocili kujwe kuyookulwaizya bakwesu abacizyi akubatolela zintu nzyobakali kuyandika. Mumasena aaya, basikalumamba bakali kupenzya bantu bamuminzi akuuma bamakaintu abana. Bunji bwabakwesu bakajisi buyo zintu zyakumubili zisyoonto. Nokuba boobo, twakakulwaizyigwa kapati kubona lusyomo luyumu ndobakajisi mubulangizi bwabubuke, mbobakali kumuyanda kapati Jehova alimwi ambobakali kusyomeka kumbunga yakwe. Cikozyanyo cabo cakatupa kuyeeya kaambo ncotubelekela Jehova akuyumya lusyomo lwesu mulinguwe. Bakwesu bamwi bakanyonyookelwa maanda aabo alimwi azisyango. Eeci cakandiyeezya kuti tulakonzya kusweekelwa zintu zyakumubili cakufwambaana akuti cilongwe cesu a Jehova ncecintu ciyandika kapati. Nokuba kuti bakali mubukkale bukatazya kapati, bakwesu kunyina nobakali kuvwula kutongooka. Bube bwabo bwakatugwasya kuba basicamba ciindi notwakali mumapenzi alimwi anotwakali kuciswa-ciswa.

Kwakacitika cintu acimbi ncotwatakali kuyeeyela. Twakalombwa kuyoobelekela kumutabi waku Hong Kong. Tiitwakali kuyeeyela kuti inga twaakukkala ku Asia. Pele notwakabona Jehova mbwaakatugwasya mumilimo yesu yoonse njotwakabeleka, twakazumina kuunka. Mu 2013, kayeenda misozi twakalayana abalongwe besu babotu alimwi twakasiya  masena aayebeka mu Africa, katutazyi mbozyakali kuyooba zintu kumbele.

Kwakali kucinca kupati kulindiswe kukkala mu Hong Kong nkaambo mwakali bantu banji kapati bazwa kumasi aayindene-indene aamunyika. Alimwi cakali ciyumu kwiiya mwaambo waci Chinese. Nokuba boobo, bakwesu bakatutambula amaanza obilo alimwi twakazikkomanina zyakulya zyakubusena oobu. Milimo iyakali kucitwa aofesi yamutabi yakali kuyaabuvwula, aboobo kwakali kuyandika busena bumbi. Pele kuula busena kwakali kudula kapati. Aboobo ba Kabunga Keendelezya bakasala kuti milimo imwi italike kucitilwa kumbi akucesya mutabi waku Hong Kong. Mpoonya busena bumbi bakabusambala. Tiilyakalampa, mu 2015, mebo abakaintu bangu twakalongela ku South Korea kwalo nkotucibelekela. Akwalo twakeelede kwiiya mwaambo uumbi uukatazya kapati, pele nokuba kuti tatunauzyiba kabotu kuwaambaula, bakwesu abacizyi balatukulwaizya kwiinda mukutwaambila kuti tuyaabucizyiba kwaambaula mwaambo waci Korean.

Talili lyoonse nocili cuubauba kupanga balongwe bapya, pele twakajana kuti kwiinda mukubatamba bamwi kuti baboole kutuswaya, kwakatugwasya kuzyibana abantu cakufwambaana. Twakabona kuti bakwesu abacizyi boonse bajisi bube bukonzyene kapati, lwiindano ndusyoonto. Alimwi akuti Jehova wakatulenga munzila mbotu kapati kutegwa katucikonzya kujalula myoyo yesu akubayanda kapati balongwe nobavwula buti.—2Kor. 6:11.

Twabona mbociyandika kubona bantu mbuli mbwababona Jehova abumboni bwakuti Jehova ulatuyanda alimwi akuti nguutusololela. Kufwumbwa ciindi notwakali kulimvwa kutyompwa naa kuyeeya kuti bakwesu abacizyi tabatubikkili maano, twakali kwiinduluka kwaabala makkaadi amagwalo aakulwaizya ngobakali kututumina balongwe besu. Twalibonena Jehova mbwaali kuyiingula mipailo yesu, ikutondezya kuti ulatuyanda kapati akutupa nguzu zyakuzumanana kuliyumya.

Kwamyaka minji, mebo abakaintu bangu twabona mbociyandika kapati kujana ciindi cakuba antoomwe, tacikwe makani naa tujisi bubi buti. Alimwi twabona mbociyandika kusekana notwalubizya, kwaambisya ciindi notwiiya mwaambo mupya. Abuzuba masiku, inga tulasola kuyeeya cintu cimwi catukkomanisya ncotweelede kumulumba Jehova.

Kwaamba masimpe, ndakali kulimvwa kuti kunyina nondakali kuyooba misyinali naa kukkala kucisi cimbi. Pele ndaba alukkomano luboola akaambo kakuzyiba kuti zintu zyoonse zilakonzyeka kwiinda mulugwasyo lwa Jehova. Inga ndilaayeeya majwi aamusinsimi Jeremiya aakuti: “Wandicenga, O Jehova.” (Jer. 20:7) Masimpe, watucitila zintu zinji zikkomanisya akutupa zilongezyo nzyotwatali kuyeeyela, alimwi buya akuzuzikizya makanze aangu aakukkwela ndeke. Twakaunka mumasena manji ngondatakali kuyeeyela kandicili mwana, kuswaya maofesi aamitabi muzisi zinji. Mumilimo yesu yoonse, ndilabalumba kapati bakaintu bangu akaambo kalugwasyo lwabo amuuya wakulyaaba.

Lyoonse tulayeeya kuti tulazicita zintu zyoonse eezyi akaambo kakuti tulamuyanda kapati Jehova. Zilongezyo nzyotujisi lino nkadyonko buyo kabuumi butamani mbotuyakuba ambubo ciindi Jehova ‘aakuvwungulula janza lyakwe akukkutya cilenge coonse cipona kwiinda mukucipa ncociyanda.’—Int. 145:16.