Nobana—Mbuti Mbomukonzya Kulibambila Kubbapatizyigwa?
“Ndilakukkomanina kucita kuyanda kwako, O Leza wangu.”—INTEMBAUZYO 40:8.
NYIMBO: 51, 58
1, 2. (a) Amupandulule ikaambo kubbapatizyigwa ncokuli cakusala cipati. (b) Ncinzi muntu ncayelede kusinizya katanabbapatizyigwa, alimwi nkaambo nzi?
SENA muli mwana uuyanda kubbapatizyigwa? Ikuti kacili boobo, eeci ncoolwe ciinda zyoonse ncomukonzya kuba ancico. Mbubwenya mbokwaambidwe mucibalo cainda, lubbapatizyo ncakusala cipati. Lutondezya bamwi kuti mwakalyaaba kuli Jehova, nkokuti, mwakamusyomezya kuti muyoomubelekela kukabe katamani akuti kucita kuyanda kwakwe ncecintu ciyandika kapati mubuumi bwanu. Akaambo kakuti eeci ncisyomezyo ciyandika kapati kuli Leza, mweelede kubbapatizyigwa lilikke buyo nomwasika aciimo cakuti mulakonzya kulisalila, muyanda kucita boobo kuzwa ansi aamoyo, alimwi mulamvwisya ncocaamba kulyaaba kuli Leza.
2 Nokuba boobo, ambweni mulimvwa kuti tamunalibambila kubbapatizyigwa. Naa ambweni mulimvwa kuti mulilibambilide pele bazyali banu bayeeya kuti mweelede kulindila kusikila mukakomene akuba aluzyibo lunji mubuumi. Ncinzi ncomweelede kucita? Mutatyompwi pe. Muciindi caboobo, amucibelesye ciindi eeci kuyaambele kutegwa lino-lino mukakonzye kweelela kubbapatizyigwa. Kamujisi makanze aayo mumizeezo, mulakonzya kulibikkila mbaakani mumbazu eezyi zyotatwe iziindene-indene: (1) zintu nzyomusyoma cakusinizya, (2) zintu nzyomucita, alimwi (3) akulumba kwanu.
ZINTU NZYOMUSYOMA CAKUSINIZYA
3, 4. Nciiyo nzi bana ncobakonzya kwiiya kucikozyanyo ca Timoteyo?
3 Amuyeeye mbomukonzya kwiingula mibuzyo eeyi: Ncinzi cindipa kusyoma kuti Leza nkwali? Nkaambo nzi ncondili masimpe kuti Bbaibbele lyakazwa kuli Leza? Nkaambo nzi nconditobela milawo ya Leza muciindi cakutobela zyeelelo zyakutalilemeka izili munyika? Mibuzyo eeyi ilakonzya kumugwasya kutobela lulayo lwamwaapostolo Paulo ilwakuti: “Muzyibe kuyanda kwa Leza, ikubotu, kutambulika alimwi kulondokede.” (Baroma 12:2) Nkaambo nzi ncomweelede kucita boobu?
Timoteyo wakakazumina kasimpe akaambo kakuti wakabelesya maano kuyeeya nzyaakaiya alimwi anzyaakagwasyigwa kusyoma
4 Cikozyanyo ca Timoteyo cilakonzya kumugwasya. Wakalaazyi kabotu Magwalo akaambo kakuti banyina abakaapanyina bakamuyiisya kasimpe kamu Magwalo. Nokuba boobo, Paulo wakaambila Timoteyo kuti: “Kozumanana kuzitobela zintu nzyookayiisyigwa alimwi nzyookagwasyigwa kusyoma.” (2 Timoteyo 3:14, 15) Aawa, ibbala lyakuti ‘kugwasyigwa’ lyaamba “kupa muntu umwi kuti asinizye alimwi akuba masimpe kujatikizya mbocili cancobeni cintu cimwi.” Aboobo Timoteyo wakeelede kusinizya kuti kasimpe kakali kukonzya kujanika mu Magwalo. Wakakazumina kasimpe, ikutali buyo akaambo kakuti banyina abakaapanyina bakamwaambila kucita boobo, pele akaambo kakuti wakabelesya maano kuyeeya nzyaakaiya alimwi anzyaakagwasyigwa kusyoma.—Amubale Baroma 12:1.
5, 6. Nkaambo nzi ncociyandika kapati kwiiya kubelesya “maano” ciindi muntu nacili mwana?
5 Ino mbuti kujatikizya ndinywe? Ambweni mwalikazyi kasimpe kwaciindi cilamfwu. Ikuti kacili boobo, amube ambaakani yakuyeeya twaambo tumupa kusyoma nzyomusyoma. Eeci ciyoomugwasya kuyumya lusyomo lwanu alimwi akukutantamuka kutasala camaano akaambo kakuyungwa abeenzinyoko, kuyeeya kwanyika, naa ambweni ambomulimvwa lwanu.
6 Ikuti naa mwaiya kubelesya “maano” nomucili mwana, muyoocikonzya kwiingula mibuzyo njobabuzya beenzinyoko mbuli yakuti: ‘Ino muzyi buti kuti Leza nkwali ncobeni? Ikuti naa Leza ulatuyanda, nkaambo nzi ncazumizya zintu zibyaabi kucitika? Ino cikonzyeka buti kuti Leza waliko lyoonse?’ Ikuti kamulibambilide, mibuzyo eeyo taikamupi kudooneka mumoyo wanu pele iyoomupa kuliiya Bbaibbele cakusitikila.
7-9. Amupandulule mbozikonzya kumugwasya kuyumya nzyomusyoma cakusinizya zibalo zitobelene zijanika aa Intaneti zyakuti, “Ino Ncinzi Ncoliyiisya Bbaibbele?”
7 Ciiyo canu nobeni icisitikide cilakonzya kumugwasya kwiingula mibuzyo, kumana kudooneka kuli koonse, alimwi akuzumanana kukakatila kuzintu nzyomusyoma cakusinizya. (Milimo 17:11) Tulijisi mabbuku manji aakonzya kumugwasya kucita boobo. Ibanji cabagwasya kapati kwiiya broshuwa yakuti The Origin of Life—Five Questions Worth Asking alimwi abbuku lyakuti Is There a Creator Who Cares About You? Kuyungizya waawo, bakubusi banji balazikkomanina alimwi bagwasyigwa azibalo zizwa lyoonse zyakuti “Ino Ncinzi Ncoliyiisya Bbaibbele?” izijanika a jw.org. Mulakonzya kuzijana ansi acibeela cakuti NJIISYO ZYAMU BBAIBBELE. Ciiyo cimwi acimwi muzibalo eezyi zitobelene cibambilidwe kumugwasya kuyumya nzyomusyoma cakusinizya kujatikizya kaambo kamwi kamu Bbaibbele.
8 Nywebo muli sikwiiya wa Bbaibbele, aboobo mweelede kuti mulizyi kale bwiinguzi kumibuzyo imwi iijanika muzibalo zigwasya kwiiya. Pele sena mulisinizyide kuti bwiinguzi bwanu buliluzi? Zibalo zigwasya kwiiya ziyoomugwasya kuyeeyesya kujatikizya magwalo aayindene-indene alimwi akumukulwaizya kulemba twaambo itumupa kusyoma nzyomusyoma. Eeci ciyoomugwasya kuzyiba mbomweelede kupandulula nzyomusyoma kuli bamwi. Ikuti naa mulabelesya intaneti, mulakonzya kulanga zibalo zizwa lyoonse zyakuti “Ino Ncinzi Ncoliyiisya Bbaibbele?” alimwi mulakonzya kuzibelesya muciiyo canu nobeni kutegwa muyumye luzyibo lwanu muzintu nzyomusyoma.
9 Mweelede kusinizya nobeni kuti aaka nkakasimpe. Eeci ciyoomugwasya kulibambila lubbapatizyo. Mucizyi umwi mukubusi wakati: “Kanditanasala kuti ndibbapatizyigwe, ndakaiya Bbaibbele alimwi ndakabona kuti oobu mbobukombi bwakasimpe. Alimwi mubuumi bwangu buzuba abuzuba, cisinizyo cakuti eeci ncikombelo cakasimpe cilazumanana kuyuma.”
ZINTU NZYOMUCITA
10. Nkaambo nzi ncociluzi kulangila kuti Munakristo uubbapatizyidwe unoocita zintu zyeendelana alusyomo lwakwe?
10 Ibbaibbele lyaamba kuti: “Ilusyomo lulikke buyo, kakunyina milimo, lulifwide.” (Jakobo 2:17) Ikuti kamusyoma cakusinizya, muyootondezya oobo kwiinda muzintu nzyomucita. Muyoocita zintu Bbaibbele nzyolyaamba kuti “bukkale busalala alimwi amilimo yakubelekela Leza cakulyaaba.”—Amubale 2 Petro 3:11.
11. Amupandulule ncaamba mabala aakuti “bukkale busalala.”
11 Ino “bukkale busalala” ninzi? Ikuti naa zintu nzyomucita kazisalala, nkokuti mulasalala mukulilemeka kwanu. Mucikozyanyo, amuyeeye kujatikizya myezi iili cisambomwe yainda. Ciindi nomwakasunkwa kucita cintu cimwi cibyaabi, sena mwakayeeyesya kujatikizya cintu ciluzi alimwi acitaluzi? (Bahebrayo 5:14) Sena mulayeeya ziindi zigaminide nomwatakazumina kuzundwa asunko limwi naa kuyungwa abalongwe? Nomuli kucikolo, sena muli cikozyanyo cibotu kuli bamwi? Sena mulazumanana kusyomeka kuli Jehova, naa sena mulasoleka kuba mbuli basicikolonyoko kutegwa batamuseki? (1 Petro 4:3, 4) Bwini mbwakuti, kunyina naba omwe uulondokede pe. Zimwi ziindi, nobaba baabo ibamubelekela Jehova myaka minji balakonzya kulisenda alimwi cilakonzya kubayumina kubakambaukila bamwi. Pele muntu uulyaabide kuli Leza uyookkomana kuba umwi wa Bakamboni ba Jehova, alimwi ulatondezya oobu kwiinda mubukkale bwakwe ibusalala.
12. Ino “milimo yakubelekela Leza cakulyaaba” ibikkilizya nzi, alimwi mbuti mbotweelede kwiibona?
12 Ino “milimo yakubelekela Leza cakulyaaba” ninzi? Ibikkilizya milimo yanu njomucita mumbungano, mbuli kuunka kumiswaangano alimwi akukambauka. Pele alimwi ilabikkilizya amilimo eeyo bamwi njobataboni, mbuli mipailo njomupaila kuli Jehova nyolikke alimwi aciiyo canu nobeni. Muntu iwakalyaaba kuli Jehova takayeeyi kuti milimo eeyi ilaminya. Uyoolimvwa mbubwenya mbwaakalimvwa Mwami Davida, iwakati: “Ndilakukkomanina kucita kuyanda kwako, O Leza wangu, alimwi mulawo wako uli mukati kamoyo wangu.”—Intembauzyo 40:8.
Sena mulaamba twaambo tugaminide mumipailo yanu, alimwi ncinzi ncoitondezya kujatikizya luyando lwanu kuli Jehova?
13, 14. Ino ncibelesyo nzi icikonzya kumugwasya kucita “milimo yakubelekela Leza cakulyaaba,” alimwi ino mbuti bakubusi bamwi mbobagwasyigwa acibelesyo eeci?
13 Kutegwa mugwasyigwe kulibikkila mbaakani, kuli mulongo apeeji 308 alimwi a 309 mubbuku lyakuti Questions Young People Ask—Answers That Work, Volume 2. Amulongo ooyu, mulakonzya kulemba bwiinguzi bwanu kumibuzyo mbuli yeeyi: “Sena mulaamba twaambo tugaminide mumipailo yanu, alimwi ncinzi ncoitondezya kujatikizya luyando lwanu kuli Jehova?” “Ncinzi ncomubikkilizya muciiyo canu nobeni?” “Sena mulaunka mumulimo wakukambauka nokuba kuti bazyali banu tiibaunka?” Alimwi mulongo ulijisi busena mpomukonzya kulemba kufwumbwa mbaakani nzyomuyanda kulibikkila kujatikizya mipailo yanu, ciiyo canu nobeni, alimwi amulimo wakukambauka.
14 Bunji bwabana ibayeeya makani aakubbapatizyigwa bakajana kuti mulongo ooyu ulagwasya kapati. Mucizyi umwi mukubusi wazina lya Tilda wakati: “Ndakaubelesya mulongo ooyu kulibikkila mbaakani. Ndakaizuzikizya mbaakani imwi aimwi, aboobo ndakalilibambilide kubbapatizyigwa nokwakainda buyo mwaka omwe.” Mukwesu umwi mukubusi wazina lya Patrick awalo wakazwidilila mbubonya. Wakati: “Ndakalizizyi kale mbaakani zyangu, pele kuzilemba kwakandipa kubeleka canguzu kutegwa ndizizuzikizye.”
Sena ulakonzya kuzumanana kumubelekela Jehova nokuba kuti bazyali bako baleka kumubelekela? (Amubone muncali 15)
15. Amupandulule kaambo muntu ncayelede kulisalila alikke kulyaaba.
15 Mubuzyo umwi uuli amulongo ooyu ngwakuti: “Sena ulakonzya kumubelekela Jehova nokuba kuti bazyali bako alimwi abalongwe bako bacileka kucita boobo?” Mwalyaaba kuli Jehova alimwi akubbapatizyigwa, munoojisi cilongwe cimugeme anguwe. Aboobo, nzyomucitila Jehova tazyeelede kuyaama aabazyali banu naa amuntu uuli woonse. Bukkale bwanu busalala alimwi amilimo yakubelekela Leza cakulyaaba itondezya kuti mulisinizyide kuti mulijisi kasimpe alimwi muyanda kutobela zyeelelo zya Leza. Lino-lino muyakweelela kubbapatizyigwa.
KULUMBA KWANU
16, 17. (a) Ncinzi ceelede kumukulwaizya muntu kuti abe Munakristo? (b) Ino kulumba cinunuzyo inga mwakupandulula buti?
16 Bumwi buzuba, muntu umwi iwakauzyi kabotu Mulawo wa Musa wakabuzya Jesu kuti: “Ino nguuli mulawo mupati?” Jesu wakaingula kuti: “Weelede kuyanda Jehova Leza wako amoyo wako woonse, abuumi bwako boonse alimwi amizeezo yako yoonse.” (Matayo 22:35-37) Jesu wakapandulula kuti kuyanda Jehova nkakaambo keelede kupa muntu kuti abbapatizyigwe alimwi akuba Munakristo. Inzila imwi mbotu kapati mbomukonzya kuyumya luyando ndomujisi kuli Jehova nkuyeeya kapati kujatikizya cinunuzyo, cipego ca Leza citalikomeneni kubantu. (Amubale 2 Bakorinto 5:14, 15; 1 Johane 4:9, 19.) Ikuti mwacita boobo, muyooyanda kutondezya kuti mulalumba kapati akaambo kacipego eeco citaliboteli.
17 Kulumba kwanu akaambo kacinunuzyo kulakonzya kupandululwa boobu: Amweezyeezye kuti muyanda kunyikila mpoonya muntu umwi wamununa. Sena inga mwaile buyo kuunka kuŋanda, kuyoocinca zisani, akuziluba nzyaamucitila muntu ooyo? Peepe! Muyakumulumba lyoonse muntu ooyo iwakamufwutula! Mbubwenya buyo, tweelede kumulumba kapati Jehova alimwi a Jesu akaambo kacinunuzyo. Tulijsi buumi akaambo kambabo! Bakatuvwuna kucibi alufwu. Akaambo kaluyando ndobajisi kulindiswe, lino tulijisi bulangizi bwakupona kukabe kutamani mu Paradaiso anyika!
18, 19. (a) Nkaambo nzi ncomuteelede kuyoowa kuzulilwa kuli Jehova? (b) Mbuti kubelekela Jehova mbokupa kuti buumi bwanu bubote?
18 Sena mulalumba kuzintu Jehova nzyaamucitila? Ikuti kacili boobo, nkokuti kulyaaba akubbapatizyigwa ncecintu ciluzi ncomweelede kucita. Kulyaaba kwanu ncisyomezyo kuli Leza cakuti muyoocita kuyanda kwakwe mane kukabe kutamani. Sena ceelede kumuyoosya kusyomezya cisyomezyo cili boobo? Peepe! Jehova uyanda kuti kamupona kabotu, aboobo uyoobalongezya aabo ibacita kuyanda kwakwe. (Bahebrayo 11:6) Ciindi nomwalyaaba kuli Leza akubbapatizyigwa, buumi bwanu tabukaindili kubija pe, pele muciindi caboobo, buyooba kabotu! Mukwesu uujisi myaka iili 24 iwakabbapatizyigwa katanakubuka wakaamba kuti, “Ambweni nindakazimvwisya kabotu zintu ikuti nindakali mupati, pele kusala kulyaaba kuli Jehova kwakandikwabilila kuti nditantamuke kuzintu zyanyika.”
Saatani ulaliyanda alimwi tamubikkili maano
19 Jehova ncayanda ncakuti kamupona kabotu. Pele Saatani ulaliyanda alimwi tamubikkili maano. Takonzyi kumupa cintu cibotu kuti mwamutobela. Mbuti mbwakonzya kumupa cintu ncatajisi? Tajisi makani mabotu alimwi tajisi bulangizi buli boonse. Cilikke ncakonzya kumupa mbulangizi bwazintu zibyaabi kumbele, nkaambo oobo mbobulangizi awalo mbwajisi!—Ciyubunuzyo 20:10.
20. Ncinzi mukubusi ncakonzya kucita kutegwa ayaambele akweelela kulyaaba akubbapatizyigwa? (Alimwi amubone kabbokesi kakuti “Zibalo Zikonzya Kumugwasya Kuyaambele.”)
20 Kulyaaba kwanu kuli Jehova nkokusala kubotu kapati kwiinda kusala kumbi kuli koonse nkomukonzya kucita. Sena mulilibambilide kucita oobo? Ikuti naa mulilibambilide, mutayoowi pe kupanga cisyomezyo eeco. Pele ikuti naa mulimvwa kuti tamulibambilide, amwiitobele mizeezo yapegwa mucibalo eeci kutegwa muyaambele. Paulo wakaambila bakwesu ku Filipi kuti bazumanane kuyaambele. (Bafilipi 3:16) Ikuti mwalutobela lulayo oolu, lino-lino buyo muyooyanda kwaaba buumi bwanu kuli Jehova alimwi akubbapatizyigwa.
