KATANAPILUKA kujulu, Jesu wakaambila basikwiiya bakwe kuti: ‘Muyooba bakamboni bangu kusikila kumasena aakulamfwu kapati aanyika.’ (Milimo 1:8) Ino bakali kuyoocikonzya buti kukambauka munyika yoonse?

Ba Martin Goodman, basyaazibwene ku University of Oxford bakati, “mbobakali kuubikkila maano mulimo Banakristo kwakabaandaanya ankamu zimbi zyabukombi, kubikkilizya aba Juda, kumatalikilo aabulelo bwabana Roma.” Jesu wakali kuunka kuzwa kubusena bumwi kuya kubusena bumbi kuyookambauka. Banakristo bakasimpe bakeelede kwiiya cikozyanyo cakwe akukambauka “makani mabotu aa Bwami bwa Leza” kuli koonse. Bakeelede kuyandaula bantu ibakali kuyanda kuzyiba kasimpe. (Luka 4:43) Nkakaambo kaako mumwaanda wamyaka wakusaanguna, kwakali “baapostolo,” ibbala ilyaamba baabo ibatumwa kuti bacite cintu cimwi. (Marko 3:14) Jesu wakalailila basikumutobela kuti: “Aboobo kamuya mukayiisye bantu bazisi zyoonse kuti babe basikwiiya.”—Matayo 28:18-20.

Baapostolo ba Jesu ibali 12 tabaciko aano anyika pe, pele babelesi ba Jehova banji batobela cikozyanyo cabo mumulimo wakukambauka. Ciindi nobalombwa kuyoobelekela kubusena kubulide, baamba kuti: “Ndime aano! Kondituma!” (Isaya 6:8) Ibamwi, mbuli bunji bwabaabo ibakanjila Cikolo ca Gilead, bakaunka kuzisi izili kulamfwu. Ibambi bakalongela kumasena aambi mucisi cabo mumwenya. Banji bakaiya mwaambo mupya kutegwa bagwasye mbungano naa kabunga. Tiicali cuuba-uba pe, pele bakwesu abacizyi aaba boonse bakalilisungwide  kulyaaba kutegwa batondezye luyando ndobajisi kuli Jehova akubantu. Aboobo bakalibambila kabotu akubelesya ciindi cabo, nguzu zyabo alimwi amali aabo kutegwa bagwasye mumulimo wakukambauka kumasena kubulide. (Luka 14:28-30) Nzyobali mukucita bakwesu abacizyi aaba nzintu ziyandika kapati.

Tatuli toonse notukonzya kuunka kubusena kubulide naa kwiiya mwaambo mupya. Pele toonse tulakonzya kuba mbuli bamisyinali mumbungano yesu.

Mumwaanda wamyaka wakusaanguna, Banakristo bakali basungu mumulimo wakukambauka nokuba kuti bunji bwabo bakali kukkala muminzi yabo alimwi tiibakali bamisyinali. Paulo wakaambila Timoteyo kuti: “Kocita mulimo wamukambausi, uuzuzikizye cakumaninina mulimo wako.” (2 Timoteyo 4:5) Majwi aaya akabeleka ku Banakristo bakusaanguna, alimwi acibeleka akulindiswe mazuba aano. Banakristo boonse beelede kuutobela mulawo wakukambauka mulumbe wa Bwami alimwi akugwasya bantu kuba basikwiiya. Alimwi nomuba mumbungano yesu, kuli nzila zinji mbotukonzya kuba mbuli bamisyinali.

Mucikozyanyo, ciindi bamisyinali nobaunka kucisi cimbi, zintu zinji ziliindene, alimwi beelede kujana nzila mbobakonzya kucinca kutegwa babuzyibile bukkale bupya. Nokuba kuti tatukonzyi kulongela kubusena kubulide, sena tulakonzya kujana nzila zipya mbotukonzya kubakambaukila bantu? Mucikozyanyo, mu 1940, bakwesu abacizyi ciindi cakusaanguna bakakulwaizyigwa kucita bukambausi bwamumugwagwa buzuba bomwe mvwiki amvwiki. Sena mwakasoleka kale kucita bukambausi bwamumugwagwa? Sena mwakatubelesya kale tukkocci twakukuba twakubikkila mabbuku? Kaambo kali waawa nkakuti, Sena mulilibambilide kusoleka nzila zipya zyakukambauka makani mabotu?

Ikuti naa kamuzilanga kabotu zintu, muyooba basungu alimwi muyakuukkomanina mulimo. Aabo ibaunka kubusena kubulide naa ibaiya mwaambo mupya kanji-kanji mbaasikumwaya basimide alimwi balakonzya kugwasya kapati mumbungano. Mucikozyanyo, balasololela mumulimo wakukambauka. Alimwi bamisyinali kanji-kanji balasololela mumbungano mane kusikila bakwesu banyenzi beelela kucita boobo. Ikuti kamuli mukwesu uubbapatizyidwe, sena ‘mulayanda,’ nkokuti, sena mulilisungwide kubelekela  bakwesu abacizyi mumbungano yanu kamuli mukutausi naa mwaalu?—1 Timoteyo 3:1.

Alimwi tulakonzya kugwasya mbungano yesu amunzila zimbi. Toonse buyo, bana abapati, bakwesu abacizyi, tulakonzya kuba bantu ‘ibayumya-yumya’ kubasyomima ibayandika lugwasyo.—Bakolose 4:11, bupanduluzi buyungizyidwe.

Ikuti katuyanda kubagwasya bakwesu abacizyi, tweelede kubazyiba kabotu. Ibbaibbele litukulwaizya kuti “katubikkilana maano,” naa kubikkila maano kuzintu nzyobayandika bakwesu abacizyi ciindi notuswaangana antoomwe. (Bahebrayo 10:24) Eeci tacaambi kuti tweelede kusola kuzyiba zyoonse zicitika mubuumi bwabamwi. Eeci caamba kuti tweelede kusolekesya kubamvwisya bakwesu abacizyi alimwi akuzyiba nzyobayandika. Balakonzya kuyandika lugwasyo lumwi, kubagwasya mumizeezo naa kubakulwaizya kuzwa mu Bbaibbele. Masimpe kuti zimwi ziindi balikke baalu alimwi abakutausi mbabakonzya kubagwasya. (Bagalatiya 6:1) Pele toonse tulakonzya kubagwasya bakwesu abacizyi bacembeede, naa mikwasyi yoonse, aabo ibajisi mapenzi.

Ba Salvatore bakapegwa lugwasyo luli boobo. Akaambo kapenzi pati lyakujana mali ndyobakajisi, bakaasambala makwebo aabo, ŋanda yabo, alimwi azintu zinji nzyowakajisi mukwasyi wabo. Bakalibilika kapati kujatikizya mukwasyi wabo. Mukwasyi uumbi mumbungano wakabona kuti bakali kuyandika lugwasyo. Bakapa ba Salvatore mali alimwi bakabagwasya abakaintu babo kujana mulimo. Alimwi ziindi zinji kumangolezya bakali kuba antoomwe amukwasyi waba Salvatore kutegwa babaswiilile alimwi akubakulwaizya. Bakaba balongwe bamvwana kapati. Lino mikwasyi eeyi yobilo ilayeeya ziindi zikkomanisya nzyobakali kuba antoomwe kuciindi eeco zintu nozyakakatazyide kapati.

Banakristo bakasimpe kunyina nobawayawaya kwaambila bamwi nzyobasyoma. Tweelede kumwiiya Jesu alimwi akubazyibya bantu boonse zisyomezyo zya Leza zikondelezya. Tacikwe makani naa tulakonzya kulongela kubusena kubulide naa pe, toonse tulakonzya kugwasya bambi mumbungano yesu mweenya kusikila mpotugolela. (Bagalatiya 6:10) Ciindi notupa bamwi, tuyookkomana alimwi ‘tuyoozumanana kuzyala micelo mumilimo mibotu iili yoonse.’—Bakolose 1:10; Milimo 20:35.