1, 2. (a) Ncinzi cibapa kukkomana bantu ba Leza mazuba aano? (b) Mbuti bazyali Banakristo alimwi abaalu mbobakonzya kugwasya bana kumvwisya ncocaamba kubbapatizyigwa?

MWAALU umwi wakaambila Christopher uujisi myaka yakuzyalwa iili 12 kuti, “Ndilikuzyi kuzwa nookazyalwa, aboobo ndakkomana kumvwa kuti uyanda kubbapatizyigwa. Ndiyanda kukubuzya kuti, ‘Ino nkaambo nzi ncoyanda kubbapatizyigwa?’” Mwaalu ooyu wakalijisi kaambo kabotu ncaakabuzyila mubuzyo ooyu. Tulakkomana kapati kubona zyuulu-zyuulu zyabana kababbapatizyigwa mwaka amwaka. (Mukambausi 12:1) Pele bazyali Banakristo abaalu mumbungano bayanda kusinizya kuti bana balisalila balikke alimwi akuti balizyi ncocaamba kubbapatizyigwa.

² Mu Bbaibbele, twiiya kuti kulyaaba alimwi akubbapatizyigwa ngamatalikilo aabuumi bupya bwa Munakristo.  Buumi oobu bupya buyooleta zilongezyo kuzwa kuli Jehova pele alimwi buyoopa kuti tukazyigwe a Saatani. (Tusimpi 10:22; 1 Petro 5:8) Aboobo nkakaambo kaako bazyali Banakristo ncobeelede kuba aciindi cakuyiisya bana babo ncocaamba ncobeni kuba sikwiiya wa Kristo. Ikuti bana kabatajisi bazyali Banakristo, baalu mumbungano bayoobagwasya munzila yaluyando kumvwisya ncocaamba kulyaaba akubbapatizyigwa. (Amubale Luka 14:27-30.) Mbubonya mbokuyandika kulibambila kutegwa mumanizye mayake aanu, bana beelede kulibambila kabatanabbapatizyigwa kutegwa babelekele Jehova cakusyomeka “kusikila kumamanino.” (Matayo 24:13) Ino ncinzi ciyoobagwasya bana kuzumanana kubelekela Jehova kukabe kutamani? Atubone.

3. (a) Ino majwi aa Jesu a Petro atuyiisya nzi kujatikizya mbociyandika kubbapatizyigwa? (Matayo 28:19, 20; 1 Petro 3:21) (b) Ino tulalanga-langa mibuzyo nzi, alimwi nkaambo nzi?

³ Sena muli mwana uuyanda kubbapatizyigwa? Ikuti kacili boobo, eeyo nimbakani mbotu! Ncoolwe cipati kubbapatizyigwa kuba umwi wa Bakamboni ba Jehova. Alimwi ncintu cimwi Munakristo ncayelede kucita, alimwi nintaamu iiyandika kuli baabo ibayoofwutuka lyamapenzi mapati. (Matayo 28:19, 20; 1 Petro 3:21) Mwabbapatizyigwa, mutondezya kuti mwasyomezya kubelekela Jehova kukabe kutamani. Masimpe muyanda kucibamba cisyomezyo eeci, aboobo mibuzyo iitobela ilamugwasya kubona naa mulibambilide kubbapatizyigwa: (1) Sena ndilisikide aciimo cakuti ndilakonzya kulisalila kubbapatizyigwa? (2) Sena ndilayandisisya kucita boobo? (3) Sena ndilamvwisya ncocaamba kulyaaba kuli Jehova? Atubandike mibuzyo eeyi yotatwe.

4, 5. (a) Ino nkaambo nzi kubbapatizyigwa ncokutali kwabapati buyo balikke? (b) Ino ku Munakristo kusima caamba nzi?

⁴ Bbaibbele talyaambi kuti balikke bapati naa ibasisya myaka imwi yakuzyalwa mbabakonzya kubbapatizyigwa. Mulugwalo lwa Tusimpi 20:11 tubala kuti: “Naba mwana musyoonto ulazyibwa kumicito yakwe, kuti naa ulasalala alimwi uliluleme mukulilemeka kwakwe.” Aboobo, naba mwana ulakonzya kuzyiba ncocaamba kucita ciluzi akulyaaba ku Mulengi wakwe. Aboobo, kubbapatizyigwa ncintu ciyandika alimwi nintaamu yeelede kumwana iwatondezya kuti wasima alimwi wakalyaaba kuli Jehova.—Tusimpi 20:7.

⁵ Ino kusima caamba nzi? Kusima lyoonse tacaambi buyo myaka yakuzyalwa yamuntu naa kukomena kwakumubili. Ibbaibbele  lyaamba kuti bantu basimide ‘bayiisya maano’ aabo kuzyiba ciluzi acitaluzi. (Bahebrayo 5:14) Muntu uusimide ulizyi ciluzi alimwi wasala mumoyo wakwe kucicita. Aboobo tacili cuuba-uba kumuyunga kuti acite cibi. Alimwi tayandiki muntu uumbi kumwaambila kucita ciluzi lyoonse. Ncaamano kulangila kuti imwana uubbapatizyigwa uyoocita ciluzi nokuba kuti bazyali bakwe naa bantu buyo bambi bapati tabako.—Amweezyanisye Bafilipi 2:12.

6, 7. (a) Amwaambe buyumuyumu mbwaakajisi Daniele naakali ku Babuloni. (b) Ino Daniele wakatondezya buti kuti wakalisimide?

⁶ Sena ncobeni mwana inga wakutondezya kusima kuli boobu? Amubone cikozyanyo ca Daniele. Ambweni wakali mukubusi ciindi nobakamubweza kuzwa kubazyali bakwe akutolwa ku Babuloni. Cakutayeeyela, Daniele wakali kukkala akati kabantu ibatakali kutobela milawo ya Leza. Pele atulange-lange bukkale bwa Daniele cakusitikila. Mu Babuloni, Daniele bakali kumubona kuba muntu uuyandika kapati. Wakali akati kabana ibakasalwa kunoobelekela mwami. (Daniele 1:3-5, 13) Kuboneka kuti Daniele wakajisi cuuno cipati kwiinda ncaakali kukonzya kuba acalo mu Israyeli.

⁷ Aboobo ino mukubusi Daniele wakacita buti? Sena wakazumizya bantu baku Babuloni kuti bamucince naa kumupa kuti lusyomo lwakwe luceye? Peepe! Ibbaibbele lyaamba kuti naakacili ku Babuloni, Daniele wakasala “mumoyo wakwe kuti takoolisofwaazya,” akuti wakali kuyootantamuka cintu cili coonse cijatikizya bukombi bwakubeja.  (Daniele 1:8) Eeci cakatondezya kusima ncobeni!

8. Ncinzi ncomukonzya kwiiya kucikozyanyo ca Daniele?

⁸ Ncinzi ncomukonzya kwiiya kucikozyanyo ca Daniele? Mwana uusimide uyookakatila kuzintu nzyasyoma, nomuba mubukkale bukatazya. Takabi mbuli naluntaambwe, uucinca-cinca mubala kweelana ampabede. Talipangi kuba mulongwe wa Leza ku Ŋanda ya Bwami pele kucikolo kali mulongwe wanyika. Muciindi caboobo, uyoozumanana kusyomeka nokuba ciindi nasunkwa.—Amubale Baefeso 4:14, 15.

9, 10. (a) Ino mukubusi inga wagwasyigwa buti kwiinda mukuyeeya mbwaali kucita kumasunko aalusyomo aakacitika lino-lino? (b) Ino lubbapatizyo caamba nzi?

⁹ Mubwini, kunyina muntu uulondokede. Bakubusi abapati boonse zimwi ziindi balalubizya. (Mukambausi 7:20) Pele ikuti kamuyanda kubbapatizyigwa, ncamaano kuzyiba mbomukanzide kutobela milawo ya Jehova. Amulibuzye kuti, ‘Sena ndalikumumvwida Jehova kwaciindi cili mbocibede? Amuyeeye mbomwakacita ciindi nolwakasunkwa lusyomo lwanu. Sena mwakacikonzya kusala cintu ciluzi ncomwakeelede kucita? Mbuli Daniele, sena kuli muntu wakamukulwaizya kubelesya luzyibo lwanu munyika ya Saatani? Ikuti mwasunkwa munzila eeyi, sena mulakonzya kuzyiba kuyanda kwa Jehova?—Baefeso 5:17.

¹⁰ Ino nkaambo nzi ncociyandika kapati kuzyiba bwiinguzi kumibuzyo eeyi iimugeme? Nkaambo bwiinguzi buyoomugwasya kubona lubbapatizyo mbocili cintu cipati. Lubbapatizyo lutondezya bamwi kuti mwakasyomezya cintu cipati kuli Jehova. Mwakasyomezya kuti munoomuyanda akumubelekela kukabe kutamani amoyo wanu woonse. (Marko 12:30) Boonse babbapatizyigwa beelede kuzumanana kubamba cisyomezyo cabo kuli Jehova.—Amubale Mukambausi 5:4, 5.

11, 12. (a) Muntu uuyanda kubbapatizyigwa weelede kusinizya nzi? (b) Ncinzi ciyoomugwasya kubona bubambe bwakubbapatizyigwa mbuli Jehova mbwabubona?

¹¹ Ibbaibbele lyaamba kuti bantu ba Jehova boonse, kubikkilizya abana, balakonzya kumubelekela “cakuliyandila.” (Intembauzyo 110:3) Aboobo muntu uuyanda kubbapatizyigwa weelede kuba masimpe kuti ooku nkuyanda kwakwe mukamwini. Eeci cibikkilizya kukulingula kabotu-kabotu kuyanda kwanu kwakuti mubbapatizyigwe, kwaambisya ikuti naa mwakakomenena mukasimpe.

¹² Nomwali kukomena, muleelede mwalikubona bantu banji kababbapatizyigwa, ambweni mbalongwe banu naa mbanabokwanu. Pele amubone kuti tiimwatalika kulimvwa kuti mweelede kubbapatizyigwa akaambo kakuti mwasika amyaka imwi naa  akaambo kakuti banji balabbapatizyigwa. Ino inga mwasinizya buti kuti lubbapatizyo mulubona mbwalubona Jehova? Amukkale ansi kuyeeya kujatikizya kaambo lubbapatizyo ncoluyandika kapati. Mulajana twaambo tubotu tunji mucibalo eeci acitobela.

13. Ino inga mwazyiba buti kuti kusala kwanu kwakubbapatizyigwa kuzwa ansi aamoyo?

¹³ Nzila imwi mbomukonzya kuzyiba naa kusala kwanu kwakubbapatizyigwa kuzwa ansi aamoyo nkwiinda mukulingula mipailo yanu. Sena mulapaila kuli Jehova lyoonse? Sena mwaamba zintu zigaminide mumipailo yanu? Bwiinguzi kumibuzyo eeyi bulakonzya kutondezya mbocili ciyumu cilongwe canu a Jehova. (Intembauzyo 25:4) Bunji bwaziindi Jehova ulaingula mipailo yesu kwiinda mu Bbaibbele. Aboobo nzila aimwi njomukonzya kuzyiba naa masimpe muyanda kuba acilongwe cini-cini a Jehova akumubelekela kuzwa ansi aamoyo nkwiinda mukulanga-langa bubambe bwanu bwakubala. (Joshua 1:8) Amulibuzye kuti: ‘Sena mulacita cakusitikila ciiyo canu nobeni ca Bbaibbele? Sena ndilatola lubazu cakuliyandila mukukomba kwamukwasyi? Bwiinguzi kumibuzyo eeyi buyoomugwasya kubona naa kusala kubbapatizyigwa nkomwakacita nkwakuliyandila.

14. Amwaambe kwiimpana kuliko akati kakulyaaba akubbapatizyigwa.

¹⁴ Bana bamwi ambweni tabazyi mubwini kwiimpana kuliko akati kakulyaaba akubbapatizyigwa. Bamwi baamba kuti bakalyaaba kale kuli Jehova pele tabalibambilide kubbapatizyigwa. Pele sena ncobeni eeci cilakonzyeka? Kulyaaba caamba kupaila kuli Jehova kumusyomezya kuti muyoomubelekela kukabe kutamani. Mwabbapatizyigwa, mutondezya bamwi kuti mwakalyaaba kale kuli Jehova. Aboobo kamutanabbapatizyigwa, mweelede kuzyiba ncocaamba kulyaaba kuli Leza.

15. Ino kulyaaba caamba nzi?

¹⁵ Ciindi mwalyaaba kuli Jehova, mumwaambila kuti mulibakwe. Mumusyomezya kuti kumubelekela nceciyooba cintu ciyandika kapati mubuumi bwanu. (Amubale Matayo 16:24.) Cisyomezyo cili boobu kuli Leza ncipati kapati! (Matayo 5:33) Aboobo ino mutondezya buti kuti mulizyi kuti tamuponi buumi bwakulikkomanisya lino pele kuti lino mupona buumi bwakukkomanisya Jehova?—Baroma 14:8.

16, 17. (a) Amupe cikozyanyo icitondezya ncocaamba kuliimya. (b) Ino muntu uulyaaba mubwini waamba nzi?

¹⁶ Atubone cikozyanyo. Amweezyeezye kuti mulongwe wanu wamupa moota kuti ncipego canu. Wamupa zipepa zyamoota akwaamba kuti: “Ooyu moota nguwanu.” Pele mulongwe wanu wamwaambila kuti: “Makkii ndilaayobola. Alimwi ndime ndinooyenzya moota, kutali ndinywe.” Ino inga mwalimvwa buti kujatikizya cipego eeci? Ino inga mwalimvwa buti kujatikizya mulongwe wanu iwakamupa moota?

¹⁷ Ciindi muntu nalyaaba kuli Jehova, waambila Leza kuti: “Ndikupa buumi bwangu. Ndili wako.” Jehova uleelela kulangila muntu ooyo kuti uyoobamba cisyomezyo ncaakasyomezya. Pele ino kuti muntu ooyo watalika kutamvwida Jehova kwiinda mukusyabana cakusisikizya amuntu uutabelekeli Leza? Naa mbuti kuti muntu ooyo wazumina mulimo uumupa kutaba aciindi  cakuunka mubukambausi naa uumupa kutajanika kumiswaangano lyoonse? Muntu ooyo nkokuti tanaabamba cisyomezyo cakwe kuli Jehova. Inga caba mbuli kuyobola makkii aamoota. Ciindi notwaaba buumi bwesu kuli Jehova, tumwaambila kuti, “Buumi mbondijisi mbubwako, tabuli bwangu.” Aboobo lyoonse tuyoocita Jehova ncayanda nokuba kuti tacili cintu ncotuyanda kucita. Atwiiye Jesu iwakaamba kuti: “Ndakaboola kuzwa kujulu kuti nditaciti kuyanda kwangu, pele ndicite kuyanda kwayooyo wakandituma.”—Johane 6:38.

18, 19. (a) Ino nzyobakaamba ba Rose a Christopher zitondezya buti kuti kubbapatizyigwa ncoolwe ciletela zilongezyo? (b) Ino mulimvwa buti kujatikizya coolwe cakubbapatizyigwa?

¹⁸ Masimpe, kubbapatizyigwa ncakusala cipati. Ncoolwe cipati kulyaaba kuli Jehova akubbapatizyigwa. Bana ibamuyanda Jehova alimwi ibamvwisya ncocaamba kulyaaba tabawayi-wayi kwaaba buumi bwabo kuli Leza akubbapatizyigwa. Tabalimvwi kuti bakalubizya mukusala nkobakacita. Mukubusi uubbapatizyidwe umwi wazyina lyakuti Rose wakaamba kuti: “Ndilamuyanda Jehova, alimwi kunyina calikukonzya kundikkomanisya kunze lyakumubelekela. Kunyina cintu ncondakasinizya kucita mubuumi bwangu kunze aakusala kubbapatizyigwa.”

¹⁹ Alimwi ino mbuti kujatikizya Christopher, iwaambwa kumatalikilo aacibalo eeci? Ino ulimvwa buti kujatikizya kusala nkwaakasala kuti abbapatizyigwe ciindi naakali amyaka yakuzyalwa iili 12? Wakaamba kuti ulikkomene kapati kuti wakasala kucita boobu. Wakatalika bupainiya bwaciindi coonse ciindi naakali amyaka yakuzyalwa iili 17 alimwi wakaba mukutausi naakali amyaka yakuzyalwa iili 18. Mazuba aano ubelekela ku Bbeteli. Wakaamba kuti: “Kubbapatizyigwa ncakusala ciluzi ncondakacita. Mubuumi bwangu ndibeleka milimo minji ya Jehova ambunga yakwe iipa kukkutila.” Ikuti kamuyanda kubbapatizyigwa, ino inga mwalibambila buti? Cibalo citobela cilaingula mubuzyo ooyu.