1-2. (a) Mbuti Jehova mbwaambaula abantu? (b) Ncinzi ncotutiilange-lange mucibalo eeci?

JEHOVA ulakkomana kwaambaula andiswe. Kaindi wakali kubelesya basinsimi, bangelo, alimwi a Mwanaakwe, Kristo Jesu, kutwaambila mbwayeeya. (Am. 3:7; Gal. 3:19; Ciy. 1:1) Mazuba aano, ulaambaula andiswe kwiinda mu Jwi lyakwe, Bbaibbele. Wakatupa Bbaibbele kutegwa twiiye mbwayeeya alimwi akumvwisya nzila zyakwe.

² Ciindi Jesu naakali anyika, Jehova wakaambaula kuzwa kujulu ziindi zyotatwe. Atulange-lange nzyaakaamba Jehova, ncotukonzya kwiiya kujwi lyakwe alimwi ambotugwasyigwa kuzwa kuli nzyaakaamba.

3. Kweelana ambotubala kulugwalo lwa Marko 1:9-11, ncinzi Jehova ncaakaamba ciindi Jesu naakabbapatizyigwa, alimwi ino majwi aayo akasinizya twaambo nzi ituyandika kapati?

³ Lugwalo lwa Marko 1:9-11 lwaamba ciindi cakusaanguna Jehova naakaambaula kuzwa kujulu. (Amubale.) Wakaamba kuti: “Yebo uli Mwanaangu ngweyandisya, ngwekkomanina.” Kweelede kuti Jesu wakakulwaizyigwa kapati ciindi naakamvwa jwi lya Bausyi kalitondezya luyando alimwi alusyomo mulinguwe! Majwi aa Jehova akatondezya twaambo tuyandika kapati totatwe kujatikizya Jesu. Kakusaanguna, Jesu Mwanaakwe. Kabili, Jehova ulamuyanda Mwanaakwe. Katatu, Jehova ulamukkomanina Mwanaakwe. Atulange-lange cakubikkila maano kukaambo kamwi akamwi.

4. Mbuti Jesu mbwaakaba Mwana wa Leza munzila mpya ciindi naakabbapatizyigwa?

⁴ “Yebo uli Mwanaangu.” Kwiinda mumajwi aaya, Jehova  wakatondezya kuti Mwanaakwe ngwayandisya, Jesu, wakanjila mucilongwe cipya anguwe. Ciindi Jesu naakali kujulu, wakali kale Mwana wa Leza. Nokuba boobo, naakabbapatizyigwa wakaba Mwana wa Leza munzila mpya. Wakananikwa amuuya uusalala akuba abulangizi bwakujokela kujulu kuyakuba Mwami alimwi a Mupaizi Mupati uusalidwe a Leza. (Lk. 1:31-33; Heb. 1:8, 9; 2:17) Aboobo naakabbapatizyigwa Jesu, Bausyi bakalijisi kaambo kabotu ikakabapa kwaamba kuti: “Yebo uli Mwanaangu.”—Lk. 3:22.

5. Mbuti mbotukonzya kwiiya cikozyanyo ca Jehova mukutondezya luyando alimwi akukulwaizya?

⁵ “Ngweyandisya.” Cikozyanyo ca Jehova mukutondezya luyando alimwi akumukkomanina Mwanaakwe cituyeezya mbociyandika kujana ciindi cakubakulwaizya bamwi. (Joh. 5:20) Tulazwidilila ciindi muntu umwi ngotubikkila maano natondezya luyando kulindiswe alimwi akutulumbaizya akaambo kazintu zibotu nzyotucita. Mbubwenya buyo, bakwesu abacizyi mumbungano alimwi abanamukwasyi bayandika kubatondezya luyando alimwi akubakulwaizya. Ciindi notubalumbaizya bamwi, tuyumya lusyomo lwabo alimwi akubagwasya kubelekela Jehova cakusyomeka. Ikapati bazyali bayandika kubakulwaizya bana babo. Ciindi bazyali nobabalumbaizya bana babo kuzwa ansi aamoyo alimwi akubatondezya luyando, balabagwasya bana babo kuzwidilila

6. Nkaambo nzi ncotukonzya kuba alusyomo muli Jesu Kristo?

⁶ “Ngwekkomanina.” Majwi aaya atondezya kuti Jehova wakalijisi lusyomo lwakuti Jesu wakali kuyoocita kuyanda kwa Bausyi cakusyomeka. Akaambo kakuti Jehova ulijisi lusyomo luli boobo ku Mwanaakwe, andiswe tulakonzya kusinizya cakumaninina kuti cakusyomeka Jesu uyoozizuzikizya zisyomezyo zya Jehova zyoonse.  (2Kor. 1:20) Ciindi notulanga-langa cikozyanyo ca Jesu, tulaayumya makanze eesu aakwiiya nguwe alimwi akutobela ntaamu zyakwe. Jehova alimwi ulijisi lusyomo lwakuti, mbuli mbunga, babelesi bakwe bayoozumanana kumwiiya Mwanaakwe.—1Pet. 2:21.

7. Kweelana alugwalo lwa Matayo 17:1-5, ndiilili Jehova naakaambaula kuzwa kujulu, alimwi majwi nzi ngaakaamba?

⁷ Amubale Matayo 17:1-5. Ciindi cabili Jehova naakaambaula kuzwa kujulu, cakali ciindi Jesu ‘naakasanduka.’ Jesu wakatamba Petro, Jakobo alimwi a Johane kuti bamusangane kuunka atala aacilundu cilamfwu. Nobakali kooko, bakabona cilengaano cilibedelede. Busyu bwa Jesu bwakabala alimwi zisani zyakwe zyakamweka. Mpoonya bantu bobilo, ibaimininwa a Musa alimwi a Elija, bakatalika kubandika a Jesu kujatikizya lufwu lwakwe ilwakali kumbele alimwi abubuke. Nokuba kuti baapostolo botatwe aaba “bakafwide ŋonzi,” bakacibona cilengaano eeci cigambya ciindi nobakasinsimuka. (Lk. 9:29-32) Mpoonya kkumbi limweka lyakabavwumbilila alimwi bakamvwa jwi kuzwa mukkumbi, nkokuti ijwi lya Leza! Mbubwenya mbwaakacita ciindi Jesu naakabbapatizyigwa, Jehova wakatondezya mbwaakamukkomanina Mwanaakwe alimwi aluyando ndwaakajisi kulinguwe, kwiinda mukwaamba kuti: “Ooyu Mwanaangu ngweyandisya, ooyo ngwekkomanina.” Pele aciindi eeci Jehova wakayungizya majwi aakuti: “Amumuswiilile.”

8. Ino cilengaano cakamujatikizya buti Jesu alimwi abasikwiiya bakwe?

⁸ Cilengaano cakatondezya bulemu alimwi anguzu Jesu nzyaakali kuyooba anzizyo kumbele kali Mwami wa Bwami bwa Leza. Cakutadooneka, Kristo wakakulwaizyigwa alimwi akuyumizyigwa kumapenzi alimwi alufwu lucisa kapati ilwakali kuyoomucitikila. Cilengaano alimwi cakayumya lusyomo lwabasikwiiya. Eeci cakabagwasya kulibambila masunko ngobakali kuyooyaanya alimwi amulimo mupati ngobakeelede kuyoocita kumbele. Myaka iitandila ku 30 yakatobela, mwaapostolo Petro wakacaamba cilengaano cakusanduka, kutondezya kuti wakacili kuciyeeya.—2Pet. 1:16-18.

9. Ino ndulayo nzi ilugwasya kapati Jesu ndwaakapa basikwiiya bakwe?

⁹ “Amumuswiilile.” Jehova wakacisalazya kuti uyanda kuti swebo katuswiilila kumajwi aa Mwanaakwe alimwi akumumvwida. Ncinzi Jesu ncaakaamba naakali anyika? Wakaamba zintu zinji izyakali kuyandika kapati kuziswiilila! Mucikozyanyo, caluyando wakayiisya basikumutobela kujatikizya mbwaakeelede kukambaukwa makani mabotu, alimwi cakwiinduluka-induluka wakabayeezya kuti bazumanane kulangila. (Mt. 24:42; 28:19, 20) Kuyungizya waawo, wakabakulwaizya kubeleka canguzu, alimwi wakabayumya-yumya kuti batatyompwi. (Lk. 13:24) Jesu wakakankaizya mbocakali kuyandika kuli basikumutobela kuti kabayandana alimwi akutobela milawo yakwe. (Joh. 15:10, 12, 13) Eelo kaka lulayo Jesu ndwaakapa basikwiiya bakwe lwakali kugwasya kapati! Lulayo oolu lulayandika kapati mazuba aano mbubonya mbolwakali kuyandika ciindi Jesu naakalupa.

10-11. Mbuti mbotukonzya kutondezya kuti tulamuswiilila Jesu?

¹⁰ Jesu wakaamba kuti: “Muntu woonse uuli kulubazu lwakasimpe ulaliswiilila jwi lyangu.” (Joh. 18:37) Tulatondezya kuti tulaliswiilila jwi lyakwe ciindi ‘notuzumanana kweengelelana akulekelelana camoyo woonse.’ (Kol. 3:13; Lk. 17:3, 4) Alimwi tulatondezya kuti tulaliswiilila jwi lyakwe kwiinda mukukambauka makani mabotu cabusungu “muziindi zili kabotu amuziindi zyamapenzi.”—2Tim. 4:2.

¹¹ Jesu wakaamba kuti: “Imbelele zyangu zilaliswiilila ijwi lyangu.” (Joh. 10:27) Basikutobela ba Kristo balatondezya kuti balamuswiilila Jesu kwiinda mukutaswiilila buyo kujwi lyakwe,  pele alimwi akucita ncolyaamba. Tabanyonganizyigwi ‘azyakulibilika zyamubuumi.’ (Lk. 21:34) Muciindi caboobo, kumvwida malailile a Jesu bakubikka mubusena bwakusaanguna mubuumi, nociba ciindi nobali mubukkale bukatazya. Bunji bwabakwesu bali mukuliyumya mumasunko aakatazya, kubikkilizya akulwanwa abasikukazya, bucete, alimwi antenda zilicitikila. Nokuba boobo, bazumanana kusyomeka kuli Jehova, tacikwe makani ambobakonzya kupenga. Kulimbabo, Jesu upa cisyomezyo eeci: “Kufwumbwa ooyo uutambula milawo yangu akwiitobela nguundiyanda. Alimwi kufwumbwa ooyo uundiyanda uyooyandwa a Taata.”—Joh. 14:21.

12. Ninzila nzi aimbi mbotukonzya kutondezya kuti tulamuswiilila Jesu?

¹² Njeeyi aimbi nzila mbotukonzya kutondezya kuti tulamuswiilila Jesu: kwiinda mukubamvwida aabo mbasalide kuti kabasololela akati kesu. (Heb. 13:7, 17) Mumyaka yaino-ino, kwaba kucinca kunji mumbunga ya Leza ikubikkilizya akubelesyegwa kwazibelesyo zipya alimwi anzila zipya zyakukambauka, mboicitwa miswaangano yesu yamukati kamvwiki, mbotuyaka, kubambulula alimwi akubamba Maanda aa Bwami. Eelo kaka tulalumba kapati kubusolozi bwaluyando alimwi ibutondezya kubikkila maano! Tulakonzya kuba masimpe kuti Jehova uyookulongezya kusolekesya kwesu kutegwa tutobele malailile aaciindi ceelede ngotupegwa ambunga yakwe.

13. Ino tugwasyigwa buti ciindi notumuswiilila Jesu?

¹³ Tulagwasyigwa ciindi notuziswiilila zintu zyoonse Jesu nzyaakayiisya. Jesu wakasyomezya basikwiiya bakwe kuti njiisyo zyakwe ziyoobakatalusya. Wakaamba kuti, “Mulakatalusyigwa. Nkaambo joko lyangu talikatazyi kunyamuna, alimwi mukuli wangu muuba.” (Mt. 11:28-30) Ijwi lya Leza, ilibikkilizya azibalo zya Makani Mabotu one aabuumi bwa Jesu amulimo wakwe, zilatukatalusya, zilatupa kuba anguzu zyakumuuya, alimwi akutupa kuba basongo. (Int. 19:7; 23:3) Jesu wakati: “Ibakkomene mbaabo baswiilila jwi lya Leza akucita ncolyaamba!”—Lk. 11:28.

14-15. (a) Kweelana alugwalo lwa Johane 12:27, 28, ncinzi cakacitika ciindi catatu Jehova naakaambaula kuzwa kujulu? (b) Nkaambo nzi majwi a Jehova ncaakamuumbulizya alimwi akumuyumya Jesu?

¹⁴ Amubale Johane 12:27, 28. Bbuku lya Makani Mabotu lya Johane lyaamba ciindi catatu Jehova naakaambaula kuzwa kujulu. Kakuceede mazuba masyoonto kuti afwe, Jesu wakali ku Jerusalemu kuyoosekelela Pobwe Lyakwiindilila lyamamanino. Wakaamba kuti: “Moyo wangu  wapenga kapati.” Mpoonya wakapaila kuti: “Taata, kopa kuti zina lyako lilemekwe.” Kumane, Bausyi bakaambaula kuzwa kujulu kuti: “Ndakalipa kale kuti lilemekwe alimwi ndiyoopa kuti lilemekwe alimwi.”

¹⁵ Jesu wakapenga mumoyo akaambo kamukuli mupati ngwaakajisi wakuzumanana kusyomeka kuli Jehova. Jesu wakalizyi kuti wakali kuyoopenga kwiinda mukukwibbaulwa alimwi akujaigwa calunya. (Mt. 26:38) Kwiinda zyoonse eezyi, Jesu wakali kuyanda kuti zina lya Bausyi lilemekwe. Jesu wakatamikizyigwa kuti wakasampaula Leza, alimwi wakalizyi kuti lufwu lwakwe lwakali kuyoopa kuti Leza asampaulwe. Eelo kaka majwi aa Jehova akamukulwaizya Jesu! Wakali masimpe kuti zina lya Jehova lyakali kuyoolemekwa. Kweelede kuti majwi aa Bausyi akamuumbulizya alimwi akumuyumya kuzintu izyakali kuyoomucitikila. Nokuba kuti Jesu alikke ngowakamvwisya ncobakaamba Bausyi aciindi eeco, Jehova wakabona masimpe kuti majwi aakwe alembwa kutegwa toonse twaabale.—Joh. 12:29, 30.

16. Nkaambo nzi zimwi ziindi ncotukonzya kulibilika kujatikizya kusampaulwa kwazina lya Leza?

¹⁶ Mbubwenya mbuli Jesu, andiswe tulakonzya kulibilika akaambo kakusampaulwa kwazina lya Jehova. Ambweni mbubwenya mbuli Jesu, andiswe tatweendelezyegwi cabululami. Andiza tulakatazyigwa amakani aakubeja ngobaamba basikutukazya kujatikizya ndiswe. Tulakonzya kuyeeya makani aakubeja mbwaasampaula zina lya Jehova alimwi ambunga yakwe. Muziindi zili boobu, majwi aa Jehova alakonzya  kutuumbulizya kapati. Tatweelede kulibilika kapati. Tulakonzya kuba masimpe kuti “luumuno lwa Leza oolo lwiinda maano oonse luyookwabilila myoyo [yesu] amizeezo [yesu] kwiinda muli Kristo Jesu.” (Flp. 4:6, 7) Jehova kunyina nayakwaalilwa kupa kuti zina lyakwe lilemekwe. Kwiinda mu Bwami bwakwe, uyoozibambulula zintu zyoonse Saatani alimwi anyika eeyi nzyobaletela babelesi bakwe ibasyomeka.—Int. 94:22, 23; Is. 65:17.

17. Kweelana alugwalo lwa Isaya 30:21, mbuti Jehova mbwaambaula andiswe mazuba aano?

¹⁷ Jehova ucaambaula andiswe mazuba aano. (Amubale Isaya 30:21.) Bwini mbwakuti, tatumumvwi Leza kaambaula andiswe kuzwa kujulu. Nokuba boobo, watupa Jwi lyakwe lilembedwe, Bbaibbele, mwalo mwatupa malailile. Kuyungizya waawo, muuya wa Jehova upa kuti “mubanzi uusyomeka” azumanane kupa babelesi bakwe cakulya ncobayandika. (Lk. 12:42) Eelo kaka tacilivwulili cakulya cakumuuya ncotutambula kwiinda mumabbuku aasimbidwe alimwi aali aa intaneti, mavidiyo, alimwi azyakuswiilila zyakalekkoodwa!

18. Mbuti majwi aa Jehova mbwaayumya lusyomo lwanu alimwi akumupa busicamba?

¹⁸ Atuzumanane kwaayeeya majwi Jehova ngaakaamba ciindi Mwanaakwe naakali anyika! Majwi aa Leza kumugama, kweelana ambwaalembedwe mu Bbaibbele, aazumanane kutupa lusyomo lwakuti Jehova ulizibwene zintu zyoonse akuti uyoozibambulula zintu zyoonse izyakanyonyoonwa a Saatani alimwi anyika yakwe eeyi mbyaabi. Alimwi atube bantu bakanzide kuswiilila cakubikkila maano kujwi lya Jehova. Ikuti twacita boobu, tuyoozwidilila kuliyumya mumapenzi aali woonse aakonzya kutucitikila alimwi abuyumuyumu buli boonse mbotukonzya kujana kumbele. Ibbaibbele lituyeezya kuti: “Muyandika kuliyumya, ikutegwa mwamanizya kucita kuyanda kwa Leza, mukatambule zintu eezyo izyakasyomezyegwa.”—Heb. 10:36.