1-2. Kweelana alugwalo lwa Milimo 8:27-31, 35-38, ncinzi cakakulwaizya muna Etiopiya kubbapatizyigwa?

SENA mulayanda kubbapatizyigwa kamuli sikwiiya wa Kristo? Luyando alimwi akulumba zyabakulwaizya banji kusala kubbapatizyigwa. Amubone cikozyanyo camweendelezi iwakali kubelekela mwami mukaintu waku Etiopiya.

² Muna Etiopiya wakabweza ntaamu cakufwambaana kujatikizya zintu nzyaakaiya mu Magwalo. (Amubale Milimo 8:27-31, 35-38.) Ino ncinzi cakamukulwaizya kucita boobo? Kweelede kuti wakalumba kapati kujatikizya Jwi lya Leza nkaambo wakali kuyaabubala tupango tumwi kuzwa mubbuku lya Isaya ciindi naakali munkalaki. Alimwi ciindi Filipo naakabandika anguwe, wakalumba kujatikizya ncaakamucitila Jesu. Ncinzi cakapa kuti mweendelezi ooyu aunke ku Jerusalemu? Nkaambo wakalitalikide kale kumuyanda Jehova. Ino tuzyi buti oobo? Wakali kuyookomba Jehova ku Jerusalemu. Kweelede kuti mwaalumi ooyu wakalilekede kuunka kucikombelo cakwe akusangana cisi icakalyaabide kuli Leza wakasimpe. Akaambo kakuti wakali kumuyanda Jehova, wasala kucita cintu cimwi ciyandika kapati. Wakabbapatizyigwa akuba sikwiiya wa Kristo.—Mt. 28:19.

3. Ncinzi icikonzya kupa muntu kuti atabbapatizyigwi? (Amubone kabbokesi kakuti, “ Ino Ncinzi Icili Mumoyo Wanu?”)

³ Kuyanda Jehova kulakonzya kumukulwaizya kubbapatizyigwa. Pele alimwi luyando lulakonzya kumupa kuti mutabbapatizyigwi. Munzila nzi? Amubone zikozyanyo eezyi. Ambweni mulabayanda kapati banamukwasyi ibatasyomi alimwi abalongwe banu, aboobo mulakonzya kulibilika kuti ikuti naa mwabbapatizyigwa, bayoomusulaika. (Mt. 10:37) Ambweni kuli zilengwa  zimwi nzyomukkomanina pele nzyomuzyi buya kuti Leza ulazisulaika, alimwi cilakonzya kumukatazya kuzileka. (Int. 97:10) Ambweni kuzwa kubwana mulasekelela mapobwe aajatikizyidwe abukombi bwakubeja. Andiza mulakkomana ciindi nomuyeeya zintu izyakali kucitika kaindi izijatikizya mapobwe aayo. Aboobo cilakonzya kumuyumina kuzileka zintu eezyi nzyasulide Jehova. (1Kor. 10:20, 21) Pele mweelede kulibuzya kuti, “Ncinzi naa nguni ngondiyandisya kapati?”

4. Ncinzi ciyandika kapati icikonzya kumusololela kukubbapatizyigwa?

⁴ Kuli zintu zinji zibotu nzyomukonzya kuyanda alimwi akulumba akaambo kanzizyo. Mucikozyanyo, nociba ciindi kamutanatalika kwiiya Bbaibbele a Bakamboni ba Jehova, ambweni mwakali kulilemeka kapati Bbaibbele. Ambweni mwakalitalikide kale kumuyanda Jesu. Mbwaanga lino mwakabazyiba Bakamboni ba Jehova, ambweni mulakkomana kuyanzana ambabo. Pele kuyanda zintu eezyi takukonzyi kumupa kuti mulyaabe kuli Jehova alimwi akubbapatizyigwa. Kaambo kapati ikeelede kumukulwaizya kubbapatizyigwa, nduyando ndomujisi kuli Jehova Leza kumugama. Ikuti kamumuyanda kapati Jehova kwiinda zintu zyoonse, kunyina nomuyoolekela cintu cili coonse naa muntu uuli woonse kumulesya kumubelekela. Kuyanda Jehova kuyoomukulwaizya kubbapatizyigwa alimwi kuyoomugwasya kuzumanana kusyomeka kulinguwe nociba ciindi lwaakwiinda lubbapatizyo lwanu.

5. Ino mibuzyo nzi njotutiilange-lange?

⁵ Jesu wakaamba kuti tweelede kuyanda Jehova amoyo wesu woonse, abuumi bwesu boonse, amizeezo yesu yoonse alimwi anguzu zyesu zyoonse. (Mk. 12:30) Mbuti mbomukonzya kumuyanda alimwi akumulemeka kapati Jehova? Ikuti twayeeya kujatikizya mboluli lupati luyando ndwajisi Jehova kulindiswe, ciyootugwasya andiswe kumuyanda. (1Joh. 4:19) Mucibalo eeci, tulalanga-langa nzila izili mbozibede zikonzya kumugwasya kucita boobo. Alimwi tulabandika bube abumbi mbomuyooba ambubo ikuti mwamuyanda kapati Jehova. *

6. Kweelana alugwalo lwa Baroma 1:20, ninzila nzi imwi iikonzya kumugwasya kwiiya kujatikizya Jehova?

⁶ Amwiiye kujatikizya Jehova kuzwa kuzilenge zyakwe. (Amubale Baroma 1:20; Ciy. 4:11) Amuzinzibale kuyeeya kujatikizya busongo mbwajisi Jehova kuzwa kuzisamu alimwi akubanyama. Amwiiye kujatikizya mboupangidwe munzila mbotu kapati mubili wanu. (Int. 139:14) Amuyeeye kujatikizya nguzu nzyaakabikka Jehova kuzuba alimwi akuti kuli amabbiliyoni aambi aanyenyeezi. * (Is. 40:26) Nomuyeeya kujatikizya zintu nzyaakalenga Jehova, ciyoopa kuti mumulemeke kapati. Nokuba boobo, ikuzyiba kuti Jehova musongo alimwi akuti ulaanguzu kapati matalikilo buyo aakuba acilongwe anguwe. Pele kutegwa cilongwe canu a Jehova ciyume, mweelede kuzyiba zinji kujatikizya nguwe.

7. Ncinzi ncomweelede kusyoma kutegwa mumuyande kapati Jehova?

⁷ Mweelede kuba alusyomo lwakuti Jehova ulamubikkila maano nywebo kumugama. Sena cilamukatazya kusyoma kuti Mulengi wajulu alimwi anyika ulimuzyi alimwi akuti ulamubikkila maano? Ikuti kacili boobo, amuzyibe kuti Jehova “tali kulamfwu kuli umwi aumwi wesu.” (Mil. 17:26-28) “Ulalingaula myoyo yoonse,” alimwi umusyomezya kuti, ‘ikuti  mwamuyandaula, uyoomulekela kuti mumujane.’ (1Mak. 28:9) Alimwi buya, kaambo ikamupa kuti lino kamwiiya Bbaibbele nkakuti, Jehova umwaambila kuti, “ndakukwelela kulindime.” (Jer. 31:3) Mbomunooyabuzyiba zintu zyoonse Jehova nzyaakamucitila alwalo luyando lwanu kulinguwe luyookomena.

8. Mbuti mbotukonzya kutondezya kuti tulamuyanda Jehova?

⁸ Nzila imwi mbotukonzya kutondezya kuti tulamuyanda Jehova, nkwiinda mukubandika anguwe mumupailo. Luyando lwanu kuli Jehova luyookomena ciindi nomumwaambila zintu nzyomulibilika alimwi akumulumba akaambo kazintu zyoonse nzyamucitila. Kuyungizya waawo, cilongwe canu anguwe ciyooyuma ciindi nomubona mbwaingula mipailo yanu. (Int. 116:1) Kwiinda mukucita boobo, muyooba alusyomo lwakuti ulamubikkila maano. Pele kutegwa mube acilongwe ciyumu a Jehova, mweelede kuzyiba zintu nzyayanda, nzyatayandi alimwi ancacitila zintu zimwi. Kunze lyaboobo, mweelede kuzyiba ncayanda kulindinywe. Nzila ilikke iikonzya kumugwasya kutegwa mube aluzyibo oolo, nkwiinda mukwiiya Jwi lyakwe, Bbaibbele.

9. Mbuti mbomukonzya kutondezya kuti mulalumba kujatikizya Bbaibbele?

⁹ Amutondezye kuti mulalumba kujatikizya Jwi lya Leza, Bbaibbele. Ibbaibbele lilikke ndelijisi kasimpe kajatikizya Jehova alimwi amakanze ngajisi kulindinywe. Mulakonzya kutondezya kuti mulalumba kujatikizya Bbaibbele kwiinda mukulibala abuzuba, kwiinda mukulibambila ciiyo ca Bbaibbele ncomwiiya abaabo ibamuyiisya, alimwi akwiinda mukuzibelesya nzyomwiiya. (Int. 119:97, 99; Joh. 17:17) Sena mulijisi mulongo wakubala Bbaibbele? Sena mulautobela mulongo ooyo?

10. Ncintu nzi cimwi icipa kuti Bbaibbele kalilibedelede?

¹⁰ Cintu cimwi icipa kuti Bbaibbele kalilibedelede ncakuti lijisi makani aajatikizya Jesu, aakaambwa abantu ibakalibonena ameso zintu nzyaakacita. Ndebbuku lilikke liluzi ilipandulula zintu nzyaakamucitila Jesu. Mbomuyaabuzumanana kwiiya nzyaakaamba alimwi akucita, cakutadooneka muyookulwaizyigwa kuba acilongwe anguwe.

11. Ino ncinzi cikonzya kumugwasya kumuyanda Jehova?

 ¹¹ Amumuyande Jesu, eelyo luyando lwanu kuli Jehova luyookomena. Nkaambo nzi? Nkaambo kakuti Jesu ulabutondezya bube bwa Bausyi munzila iilondokede. (Joh. 14:9) Aboobo mbomunooyaabwiiya zinji kujatikizya Jesu, muyoomuzyiba kabotu Jehova alimwi akumulumba. Amuyeeye buyo kujatikizya luzyalo ndwaakatondezya Jesu kuli baabo ibatakali kubikkilwa maano abamwi akaambo kabucete, kuciswa naa kubula mugwasyi. Kunze lyaboobo, amuyeeye buyo kujatikizya lulayo lugwasya ndwamupa alimwi ambolumugwasya kusumpula buumi bwanu ciindi nomulutobela.—Mt. 5:1-11; 7:24-27.

12. Ncinzi ncomuyookulwaizyigwa kucita mbomunooyaabwiiya zinji kujatikizya Jesu?

¹² Luyando ndomujisi kuli Jesu lulakonzya kuyuma kapati ikuti mwazinzibala kuyeeya kujatikizya kulyaaba nkwaakacita kutegwa zibi zyesu zilekelelwe. (Mt. 20:28) Ciindi nomumvwisya kuti Jesu wakalyaaba kumufwida, muyookulwaizyigwa kweempwa alimwi akulomba kulekelelwa kuli Jehova. (Mil. 3:19, 20; 1Joh. 1:9) Kuyungizya waawo, mbolunooyaabukomena luyando ndomujisi kuli Jehova alimwi a Jesu, muyoobayanda aabo ibamuyanda Jehova alimwi a Jesu.

13. Ino ncinzi Jehova ncaayoomupa?

¹³ Amwiiye kuyanda mukwasyi wa Jehova. Bamukwasyi wanu alimwi abaabo ibakali balongwe banu ibatasyomi tabakonzyi kumvwisya kaambo ncomuyandila kulyaaba kuli Jehova. Mane buya balakonzya kumukazya. Jehova uyoomugwasya kwiinda mukumupa mukwasyi wakumuuya. Ikuti naa mwakakatila kumukwasyi ooyo, muyoolujana luyando alimwi alugwasyo ndomuyandika. (Mk. 10:29, 30; Heb. 10:24, 25) Mukuya kwaciindi, bamukwasyi wanu balakonzya kumusangana mukubelekela Jehova alimwi akutalika kupona kweelana azyeelelo zyakwe.—1Pet. 2:12.

14. Kweelana alugwalo lwa 1 Johane 5:3, ncinzi ncomwaiya kujatikizya zyeelelo zya Jehova?

¹⁴ Amwiiye kulumba alimwi akutobela zyeelelo zya Jehova ziluleme. Kamutanamuzyiba Jehova, ambweni kuli zyeelelo nzyomwakalibikkilide, pele lino mwalibonena kuti zyeelelo zya Jehova nzeziinda kubota. (Int. 1:1-3; amubale 1 Johane 5:3.) Amuyeeye kujatikizya lulayo lwamu Bbaibbele ndobapedwe bamaalumi, bamakaintu, bazyali alimwi abana. (Ef. 5:22–6:4) Sena mukwasyi wanu ulikkomene akaambo kakutobela lulayo oolo? Sena mupona buumi ibuli kabotu akaambo kakutobela lulayo lwa Jehova ilujatikizya kusala balongwe cabusongo? Sena mulikkomene? (Tus. 13:20; 1Kor. 15:33) Ambweni bwiinguzi bwanu kumibuzyo eeyi mbwakuti inzya.

15. Ncinzi ncomukonzya kucita ikuti kamuyanda lugwasyo lujatikizya mbomukonzya kubelesya njiisyo zyamu Bbaibbele?

¹⁵ Ambweni zimwi ziindi cilamukatazya kuzyiba mbomukonzya kubelesya njiisyo zyamu Bbaibbele nzyomwiiya. Nkakaambo kaako Jehova ubelesya mbunga yakwe kumupa mabbuku aamba zyamu Bbaibbele aakonzya kumugwasya kuzyiba cibi alimwi acibotu. (Heb. 5:13, 14) Ciindi nomwaabala mabbuku aaya, muyoobona mbwaagwasya ambwaamba twaambo munzila iigaminide, alimwi cakutadooneka muyooyanda kuba cibeela cambunga ya Jehova.

16. Mbuti Jehova mbwaababunganya bantu bakwe?

¹⁶ Amwiiye kuyanda mbunga ya Jehova alimwi akwiigwasyilizya. Jehova wababunganya bantu bakwe mumbungano; Mwanaakwe, Jesu ngomutwe wabo boonse. (Ef. 1:22; 5:23) Jesu wakasala kakamu kabaalumi bananikidwe amuuya kuti kabasololela mumulimo ooyo ngwayanda kuti ucitwe mazuba aano. Kakamu  kabaalumi aaba Jesu wakakaamba kuti, “muzike uusyomeka alimwi uucenjede,” alimwi balaubikkila maano kapati mulimo wabo wakumusanina akumukwabilila kumuuya. (Mt. 24:45-47) Nzila imwi muzike uusyomeka mbwamukwabilila nkwiinda mukubona kuti kwasalwa baalu ibeelela kutegwa kabamweembela. (Is. 32:1, 2; Heb. 13:17; 1Pet. 5:2, 3) Baalu aaba balilisungwide kucita zyoonse nzyobakonzya akaambo kandinywe, kutegwa bamuumbulizye alimwi akumugwasya kuzumanana kuba acilongwe a Jehova. Pele cintu cimwi iciyandika kapati ncobakonzya kumucitila, nkumugwasya kuyiisya bamwi kujatikizya Jehova.—Ef. 4:11-13.

17. Kweelana alugwalo lwa Baroma 10:10, 13, 14, nkaambo nzi ncotubandika abantu kujatikizya Jehova?

¹⁷ Amubagwasye bamwi kwiiya kuyanda Jehova. Jesu wakaambila basikumutobela kuyiisya bantu kujatikizya Jehova. (Mt. 28:19, 20) Tulakonzya kuutobela mulawo ooyu cakwiinzya buyo mulawo. Pele kuti luyando ndomujisi kuli Jehova lwakomena, muyoolimvwa mbubwenya mbuli mwaapostolo Petro alimwi a Johane ibakaamba kuti: “Tatukonzyi kuleka kwaamba zintu nzyotwakabona akumvwa.” (Mil. 4:20) Tuyookkomana kapati ikuti twacikonzya kugwasya muntu umwi kuyanda Jehova. Amweezeezye buyo mbwaakakkomana mukambausi Filipo ciindi naakagwasya muna Etiopiya kwiiya kasimpe kamu Bbaibbele alimwi akubbapatizyigwa! Ikuti mwamwiiya Filipo alimwi akutobela mulawo wa Jesu wakukambauka, mutondezya kuti muyanda kuba umwi wa Bakamboni ba Jehova. (Amubale Baroma 10:10, 13, 14.) Aciindi eeco, kweelede kuti muyoobuzya mubuzyo nguwenya ngwaakabuzya muna Etiopiya iwakuti: “Ino ncinzi cindilesya kubbapatizyigwa?”—Mil. 8:36.

18. Mibuzyo nzi njotuyoolanga-langa mucibalo citobela?

¹⁸ Ciindi mwaakusala kubbapatizyigwa, muyoobweza ntaamu iiyandika kapati mubuumi bwanu. Akaambo kakuti nintaamu iiyandika kapati, mweelede kubikkila maano kulanga-langa izijatikizyidwe mukusala ooko. Ino ncinzi ncomweelede kuzyiba kujatikizya kubbapatizyigwa? Ncinzi ncomweelede kucita kamutana alimwi anomwamana kubbapatizyigwa? Mibuzyo eeyi iyooingulwa mucibalo citobela.