1. Masunko nzi ngobakonzya kujana bantu ba Jehova?

SENA kuli sunko limwi lipati ndyomujisi? Ambweni muntu umwi mumbungano wakamulubizyila. (Jak. 3:2) Ambweni babelesinyoko naa basicikolonyoko balamufwubaazya akaambo kakubelekela Jehova. (1Pet. 4:3, 4) Naa ambweni banamukwasyi balasoleka kumukasya kujanika kumiswaangano naa ikwaambila bamwi kujatikizya lusyomo lwanu. (Mt. 10:35, 36) Ikuti sunko kalili lipati, mulakonzya kulimvwa kuti inga cabota kucileka buyo kubelekela Jehova. Pele amusyome kuti kufwumbwa sunko ndyomukonzya kujana, Jehova uyoomupa busongo alimwi anguzu kutegwa muliyumye.

2. Kweelana alugwalo lwa Baroma 15:4, ino kubala Jwi lya Leza inga kwatugwasya buti?

² Mu Jwi lyakwe, Jehova wakabikkilizya azikozyanyo zyabantu batalondokede izitondezya mbobakaliyumya mumapenzi aakatazya. Nkaambo nzi? Kutegwa twiiye kuzikozyanyo zyabo. Eeci cileendelana ancaakalemba mwaapostolo Paulo kulugwalo lwa Baroma 15:4. (Amubale.) Kubala zibalo eezyi kulakonzya kutuumbulizya akutupa bulangizi. Pele kutegwa tugwasyigwe, nzinji nzyotweelede kucita muciindi cakulibala buyo Bbaibbele. Tweelede kuzumizya Magwalo kuti atugwasye kucinca mbotuyeeya ambotulimvwa. Ncinzi ncotukonzya kucita kuti katuyanda kujana lulayo lukonzya kutugwasya kulwana penzi ndyotujisi? Tweelede kubelesya nzila eezyi zyone: (1) Kupaila, (2) Kweezeezya, (3) Kuzinzibala kuyeeya, alimwi (4) Kubelesya nzyotubala. Lino atubandike mbotukonzya kuzibelesya nzila eezyi zyone. * Mpoonya tulabelesya nzila eezyi kubona nzyotukonzya kwiiya kuzintu zyakacitikila  Mwami Davida alimwi amwaapostolo Paulo.

3. Kamutanatalika kubala Bbaibbele, ncinzi ncomweelede kucita alimwi nkaambo nzi?

³ (1) Kupaila. Kamutanatalika kubala Bbaibbele, amumulombe Jehova kuti amugwasye kubona mbozikonzya kumugwasya zintu nzyomubala. Mucikozyanyo, ikuti naa muyandaula lulayo lukonzya kumugwasya kulwana penzi limwi, amumulombe Jehova kutegwa amugwasye kujana njiisyo mu Jwi lyakwe zikonzya kumugwasya.—Flp. 4:6, 7; Jak. 1:5.

4. Ncinzi cikonzya kumugwasya kucimvwisya kabotu-kabotu cibalo camu Bbaibbele?

⁴ (2) Kweezeezya. Jehova wakatupa nguzu zyakuti katucikonzya kweezeezya zintu. Kutegwa mucimvwisye kabotu-kabotu cibalo camu Bbaibbele, amusole kweezeezya zintu izyakali kucitika alimwi akulibikka mubukkale bwamuntu ooyo ngomubala. Amusole kubona zintu nzyaakali kubona alimwi akulimvwa mbuli mbwaakali kulimvwa muntu ooyo.

5. Ino kuzinzibala kuyeeya caamba nzi, alimwi kucitwa buti?

⁵ (3) Kuzinzibala kuyeeya. Kuzinzibala kuyeeya caamba kuyeeyesya makani ngomubala alimwi akubona mbwaamugwasya. Kucita boobo kumugwasya kuswaanganya twaambo alimwi akumvwisya makani ngomubala. Kubala Bbaibbele kakunyina kuzinzibala kuyeeya kuli mbuli kulangilila citina comwe-comwe kakunyina kuzibikka antoomwe kutegwa zipange ŋanda. Aboobo kuzinzibala kuyeeya kuli mbuli kubikka zitina antoomwe kutegwa zipange ŋanda. Kutegwa mugwasyigwe nomuzinzibala kuyeeya, mulakonzya kulibuzya kuti: ‘Ino muntu ngondibala wakacita buti kutegwa alizunde penzi ndyaakajisi? Ino Jehova wakamugwasya buti? Ino nzyondaiya inga ndazibelesya buti kutegwa ndiliyumye mumasunko?’

6. Nkaambo nzi ncotweelede kuzibelesya zintu nzyotwiiya?

⁶ (4) Kubelesya nzyotubala. Jesu wakaamba kuti, ikuti katutazibelesyi nzyotwiiya, tuli mbuli mwaalumi uuyaka ŋanda amusenga. Ulabeleka canguzu, pele usowa buyo ciindi. Nkaambo nzi? Nkaambo mvwula mpati yaakuwa amaanzi aakupaya, ŋanda yakwe iyoowa. (Mt. 7:24-27) Mbubwenya buyo, nokuba kuti tulapaila, kweezeezya alimwi akuzinzibala kuyeeya, pele kuti katutazibelesyi zintu nzyotwiiya, tusowa buyo ciindi. Aboobo ciindi twaakusunkwa naa kupenzyegwa lusyomo lwesu talunooli luyumu. Pele ciindi notubala akuzibelesya nzyotwiiya, tulacikonzya kusala camaano, kuba aluumuno alimwi lusyomo lwesu lulayuma. (Is. 48:17, 18) Kubelesya nzila zyone nzyotwabandika, atulange-lange ncotukonzya kwiiya kuzintu zyakacitika mubuumi bwa Mwami Davida.

7. Ncibalo nzi camu Bbaibbele ncotutiilange-lange lino?

⁷ Sena kuli mulongwe naa munamukwasyi iwakamunyemya? Ikuti kacili boobo, mulakonzya kugwasyigwa kwiinda mukubala ncaakacita Mwami Davida iciindi mwanaakwe Abisalomu naakamunyemya, alimwi akusola kumunyanga bwami.—2Sam. 15:5-14, 31; 18:6-14.   

8. Ncinzi ncomukonzya kucita kutegwa mugwasyigwe a Jehova?

⁸ (1) Kupaila. Kamutanatalika kubala cibalo, amumwaambile Jehova mbomulimvwide kujatikizya mbomwakeendelezyegwa munzila iitali kabotu. (Int. 6:6-9) Amumwaambile bwini mbomulimvwide. Mpoonya amumulombe Jehova kutegwa amugwasye kujana njiisyo izikonzya kumusololela ciindi nomuliyumya mubukkale oobo.

9. Ncinzi cakacitika kuli Davida alimwi a Abisalomu?

⁹ (2) Kweezeezya. Mucibalo eeci amuyeeye zintu mbozyakali kucitika, alimwi akweezeezya mbwaakalimvwide Mwami Davida. Amweezeezye kuti mulimubwene mwana wa Davida Abisalomu kabeleka canguzu kwamyaka minji  kutegwa bantu bamuyande. (2Sam. 15:7) Ciindi Abisalomu naabona kuti casika ciindi ceelede, watuma basikutwela mu Israyeli yoonse kutegwa balibambile kumuzumina kali mwami wabo. Mane buya woongelezya Ahitofeli mulongwe wa Davida alimwi asikumupa lulayo kuti amusangane mukumuzangila Davida. Abisalomu walibikka kuba mwami alimwi wasola kujata Davida kuti amujaye, walo Davida uulangilwa kuti ulicisidwe kapati aciindi eeco. (Int. 41:1-9) Davida waazyiba makanze aa Abisalomu mpoonya watija kuzwa mu Jerusalemu. Mukuya kwaciindi, impi yabasikalumamba ba Abisalomu yalwana ampi yabasikalumamba ba Davida. Mpoonya impi yabasikalumamba ba Abisalomu yazundwa, walo mwana wa Davida Abisalomu wajaigwa.

10. Ncinzi ncaakali kukonzya kucita Mwami Davida?

¹⁰ Amweezeezye buyo mbwaakalimvwide Davida ciindi zintu zyoonse eezyi nozyakali kumucitikila. Wakali kumuyanda Abisalomu alimwi wakali kumusyoma Ahitofeli. Pele boonse bakamuzangila, bakamunyemya kapati alimwi buya akusola kumujaya. Davida naakaleka kubasyoma balongwe bakwe bamwi, kayeeya kuti abalo bakamusangana Abisalomu mukumuzangila. Davida naakayeeya buyo kulibikkila maano lwakwe mwini alimwi akuyanda kutija kuzwa mucisi alikke, naa naakatyompwa cakuzwa munzila. Pele Davida kunyina naakacita boobo. Muciindi caboobo, wakalizunda sunko eeli likatazya. Ncinzi cakamugwasya kulizunda sunko eeli?

11. Ino Davida wakacita buti mubukkale oobu bukatazya?

¹¹ (3) Kuzinzibala kuyeeya. Ninjiisyo nzi nzyomukonzya kwiiya kucibalo eeci? Amwiingule mubuzyo ooyu, “Ncinzi Davida ncaakacita kutegwa agwasyigwe?” Davida kunyina naakalibilika akusala cabufwubafwuba. Alimwi kunyina naakayoowa kapati cakuti mane wabula acakuti. Muciindi caboobo, wakapaila kuli Jehova kutegwa amugwasye. Kuyungizya waawo, wakalomba lugwasyo kubalongwe bakwe. Alimwi kunyina naakawayawaya kucita ncaakasala. Nokuba kuti wakanyema kapati, Davida kunyina naakaleka kubasyoma bamwi alimwi kunyina naakazumanana kunyema. Pele wakazumanana kusyoma Jehova alimwi abalongwe bakwe.

12. Ncinzi Jehova ncaakacita kutegwa amugwasye Davida?

¹² Mbuti Jehova mbwaakamugwasya Davida? Kwiinda mukuvwuntauzya, muyoobona kuti Jehova wakapa Davida nguzu nzyaakali kuyandika kutegwa aliyumye musunko eeli. (Int. 3:1-8; katwe kamakani) Jehova wakakulongezya kusala nkwaakacita Davida. Alimwi Jehova wakabagwasya balongwe ba Davida basyomeka ciindi nobakali kulwana kutegwa bakonzye kukwabilila mwami wabo Davida.

13. Mbuti mbomukonzya kumwiiya Davida ikuti muntu umwi wamunyemya kapati? (Matayo 18:15-17)

¹³ (4) Kubelesya nzyotubala. Amulibuzye kuti, ‘Mbuti mbondikonzya kumwiiya Davida?’ Mweelede kufwambaana kubweza ntaamu kutegwa mulwane penzi. Kweelana abukkale, mulakonzya kubelesya lulayo lwa Jesu iluli kulugwalo lwa Matayo caandaano 18, ambweni cacigaminina naa kubelesya njiisyo buyo. (Amubale Matayo 18:15-17.) Pele tamweelede kufwambaana kusala cakucita ciindi nomunyemede. Mweelede kupaila kuli Jehova kutegwa amupe kukkalwa moyo alimwi abusongo mbomuyandika kutegwa mulwane penzi. Mutaleki kubasyoma bakwesu. Muciindi caboobo, amulutambule lugwasyo ndobamupa. (Tus. 17:17) Kwiinda zyoonse, amutobele lulayo lwa Jehova iluli mu Jwi lyakwe.—Tus. 3:5, 6.

14. Ndilili lugwalo lwa 2 Timoteyo 1:12-16; 4:6-11, 17-22 nolukonzya kumukulwaizya?

¹⁴ Sena banamukwasyi balamukazya akaambo kakuti mubelekela Jehova? Naa sena mubelekela mucisi mulimo wa Bakamboni ba Jehova moulesyedwe? Kuti kacili boobo, mulakonzya  kukulwaizyigwa kwiinda mukubala lugwalo lwa 2 Timoteyo 1:12-16 alimwi a 4:6-11, 17-22. * Paulo wakalemba Magwalo aaya ciindi naakali muntolongo.

15. Ncinzi ncomukonzya kumulomba Jehova?

¹⁵ (1) Kupaila. Kamutanatalika kubala Magwalo aaya, amumwaambile Jehova penzi ndyomujisi, alimwi ambomulimvwa kujatikizya penzi eelyo. Amwaambe bwini mbomulimvwide. Mpoonya amumulombe Jehova kumugwasya kujana njiisyo mutupango itwaamba zyakacitikila Paulo, akubona mbotukonzya kumugwasya kuzyiba cakucita.

16. Ncinzi cakamucitikila Paulo?

¹⁶ (2) Kweezeezya. Amweezeezye kuti muli mubukkale bwa Paulo. Ulaangidwe anketani muntolongo yaku Roma. Takali kakusaanguna kuba muntolongo, pele lino ulisinizyide kuti ulajaigwa. Balongwe bakwe bamwi bamulekelezya, alimwi ulikatede kapati.—2Tim. 1:15.

17. Ncinzi ncaakali kukonzya kucita Paulo?

¹⁷ Paulo naakayeeya zintu zyakamucitikila musyule, kayeeya kuti, ikuti naatakaba Munakristo musungu, naatakaangwa. Naakazumanana kubabikkilila baalumi bamu cooko ca Asiya ibakamumwaika, alimwi naakaleka kubasyoma balongwe bakwe bamwi. Pele Paulo tanaakacita oobo. Nkaambo nzi ncaakazumanana kuba alusyomo alimwi abulangizi?

18. Ino Paulo wakacita buti kusunko ndyaakajana?

¹⁸ (3) Kuzinzibala kuyeeya. Amwiingule mubuzyo ooyu, “Ino Paulo wakagwasyigwa buti?” Nokuba kuti Paulo wakalizyi kuti ulaafwaafwi kufwa, kunyina naakaluba kuti cilayandika kapati kuleta bulemu kuli Jehova. Alimwi wakazumanana kuyeeya mbwakonzya kukulwaizya bamwi. Wakasyoma Jehova kwiinda mukupaila cakutaleka. (2Tim. 1:3) Paulo kunyina naakazumanana kuyeeya kujatikizya bakwesu ibakamumwaika, muciindi caboobo, wakaamba kuti wakalumba kapati akaambo kalugwasyo ndobakamupa balongwe bakwe. Kuyungizya waawo, Paulo wakazumanana kubala Jwi lya Leza. (2Tim. 3:16, 17; 4:13) Kwiinda zyoonse, wakajisi lusyomo luyumu lwakuti Jehova alimwi a Jesu balamuyanda. Kunyina nobakamulekelezya alimwi bayoomupa bulumbu akaambo kakubeleka cakusyomeka.

19. Ino Jehova wakamugwasya buti Paulo?

¹⁹ Jehova wakamucenjezya Paulo kuti wakali kuyoopenzyegwa akaambo kakuba Munakristo. (Mil. 21:11-13) Ino Jehova wakamugwasya buti Paulo? Wakayiingula mipailo ya Paulo, mpoonya kumbele wakamuyumya-yumya. (2Tim. 4:17) Jehova wakasyomezya Paulo kuti uyootambula bulumbu akaambo kakubeleka canguzu. Alimwi Jehova wakabelesya balongwe ba Paulo basyomeka kumupa lugwasyo ndwaakali kuyandika.

20. Kweelana alugwalo lwa Baroma 8:38, 39, mbuti mbotukonzya kumwiiya Paulo?

²⁰ (4) Kubelesya nzyotubala. Amulibuzye kuti, ‘Ino inga ndamwiiya buti Paulo?’ Mbubwenya mbuli Paulo, tweelede kulangila kuti tuyoopenzyegwa akaambo kakubelekela Jehova. (Mk. 10:29, 30) Kutegwa tuzumanane kusyomeka ciindi notusunkwa, tweelede kusyoma Jehova kwiinda mukupaila alimwi akuzumanana kubala Jwi lyakwe abuzuba. Alimwi lyoonse tweelede kuyeeya kuti, cintu ciyandika kapati ncotweelede kucita, nkuleta bulemu kuzina lya Jehova. Tulakonzya kuba alusyomo lwakuti Jehova kunyina nayootulekelezya, alimwi kunyina cili coonse ncakonzya kucita muntu cikonzya kumulesya kutuyanda.—Amubale Baroma 8:38, 39; Heb. 13:5, 6.

21. Ncinzi cakagwasya mucizyi Aya alimwi amukwesu Hector kuzunda buyumuyumu mbobakajisi?

²¹ Zikozyanyo zyamu Bbaibbele zilakonzya kutugwasya kuba anguzu nzyotuyandika kutegwa tukonzye kuliyumya mubukkale buli boonse.  Mucikozyanyo, mucizyi Aya mupainiya ku Japan wakaamba kuti, kubala makani aa Jona kwakamugwasya kuzunda buyoofwu bwakukambaukila kubuleya. Mukwesu Hector, mukubusi uukkala ku Indonesia, uujisi bazyali batali Bakamboni ba Jehova wakaamba kuti, cikozyanyo ca Rute cilamukulwaizya kwiiya zinji kujatikizya Jehova alimwi akumubelekela.

22. Mbuti mbomukonzya kugwasyigwa kapati kwiinda muzisobano zyamu Bbaibbele naa mulongo wazibalo zyakuti, “Amwiiye Lusyomo Lwabo”?

²² Nkuli nkomukonzya kujana zikozyanyo zyamu Bbaibbele zikonzya kumuyumya? Mavidiyo eesu, zisobano zyakuswiilila buyo alimwi amulongo wazibalo zyakuti, “Amwiiye Lusyomo Lwabo” zilakonzya kutugwasya kulimvwisya kabotu Bbaibbele. * Kamutaneebelela, kuswiilila naa kubala zibalo eezyi izyakavwuntauzyigwa kabotu-kabotu, amumulombe Jehova kutegwa amugwasye kujana twaambo tugaminide ntomukonzya kubelesya. Amulibikke muciimo camuntu ngomubala. Amuzinzibale kuyeeya nzyobakacita babelesi ba Jehova aaba basyomeka, alimwi ambwaakabagwasya Jehova kuzunda buyumuyumu. Mpoonya amuzibelesye ziiyo nzyomwaiya. Amumulumbe Jehova kulugwasyo ndwamupa. Alimwi amutondezye kuti mulalumba kwiinda mukubona ncomukonzya kucita kutegwa mukulwaizye bamwi alimwi akubagwasya.

23. Kweelana alugwalo lwa Isaya 41:10, 13, ncinzi Jehova ncatusyomezya?

²³ Buumi munyika iino yeendelezyegwa a Saatani bulakonzya kuyuma, mane buya zimwi ziindi tulakonzya kubula cakucita. (2Tim. 3:1) Pele tatweelede kulibilika naa kuyoowa. Jehova ulaazyi mapenzi ngotujisi. Ciindi notuyandika lugwasyo, utusyomezya kuti unootujatilide ajanza lyakwe lyalulyo lyanguzu. (Amubale Isaya 41:10, 13.) Tulijisi lusyomo lwakuti Jehova unootugwasya, alimwi Bbaibbele lilatupa nguzu nzyotuyandika kutegwa tuliyumye mumasunko aali woonse.