1. Nkaambo nzi Jesu ncaakalomba Jehova kuti abakwabilile basikwiiya bakwe?

MUBUSIKU bwamamanino aabuumi bwakwe anyika, Jesu wakali kuyeeya kujatikizya mapenzi ngobakali kuyoojana basikwiiya bakwe. Akaambo kakuti wakali kubayanda basikwiiya bakwe, Jesu wakalomba Usyi kuti ‘abakwabilile akaambo kamubi.’ (Joh. 17:14, 15) Jesu wakalizyi kuti aakuunka kujulu, Saatani Diabolosi uyoozumanana kumulwana muntu uuli woonse uyanda kubelekela Jehova. Aboobo bantu ba Jehova bakali kuyandika kukwabililwa.

2. Ncinzi citupa kusinizya kuti Jehova uyakuyiingula mipailo yesu?

² Jehova wakawiingula mupailo wa Jesu, nkaambo ulamuyanda Mwanaakwe. Ikuti twabeleka canguzu kutegwa tumukkomanisye Jehova, andiswe uyakuyiingula mipailo yesu yakulomba lugwasyo alukwabililo. Jehova ngu Taata siluyando, aboobo uyoozumanana kubalanganya bana bwakwe. Ikuti naa taacita oobo, ciyoopa kuti zina lyakwe libule bulemu naa ciyoonyonganya mpuwo yakwe.

3. Nkaambo nzi ncotuyandika kukwabililwa a Jehova lino?

³ Lino tuyandika kukwabililwa a Jehova kwiinda kaindi. Nkaambo Saatani wakatandwa kujulu, “abukali bupati.” (Ciy. 12:12) Wapa bantu kuyeeya kuti ciindi nobatupenzya, “bacitila Leza mulimo uusetekene.” (Joh. 16:2) Aabo batasyomi muli Leza, balatupenzya nkaambo tuliindene abantu bamunyika. Kufwumbwa mbocibede, tatweelede kuyoowa. Nkaambo nzi? Nkaambo Jwi lya Leza lyaamba kuti: “Mwami ulasyomeka, eelyo uyoomuyumya akumukwabilila kumubi.” (2Tes. 3:3) Mbuti  Jehova mbwatukwabilila? Atubandike nzila zyobilo.

4. Kweelana alugwalo lwa Baefeso 6:13-17, ncinzi Jehova ncaatupa kutegwa tukwabililwe?

⁴ Jehova wakatupa zilwanyo izikonzya kutukwabilila kukulwanwa a Saatani. (Amubale Baefeso 6:13-17.) Zilwanyo zyakumuuya eezyi nziyumu alimwi zilabeleka kabotu. Pele kutegwa tukwabililwe, tweelede kuzisama zilwanyo zyoonse akutazisamununa. Ino cilwanyo cimwi acimwi ciiminina nzi? Lino atubandike cilwanyo cimwi acimwi.

5. Ino lutambo lwakasimpe ninzi, alimwi nkaambo nzi ncotweelede kulusama?

⁵ Lutambo lwakasimpe lwiiminina kasimpe kajanika mu Jwi lya Leza, Bbaibbele. Nkaambo nzi ncotweelede kulusama? Kutegwa tukwabililwe kuli Saatani “usyi wabubeji.” (Joh. 8:44) Walikubeja kwamyaka minji alimwi “weena nyika yoonse”! (Ciy. 12:9) Pele kasimpe kali mu Bbaibbele kalatukwabilila kukweenwa. Mbuti mbotusama lutambo oolu lwakasimpe? Tulacita oobo kwiinda mukwiiya kasimpe kajatikizya Jehova, kwiinda mukukomba “mumuuya amukasimpe,” alimwi akwiinda mukusyomeka muzintu zyoonse.—Joh. 4:24; Ef. 4:25; Heb. 13:18.

6. Ino cilikwabilizyo cakucamba cabululami ncinzi, alimwi nkaambo nzi ncotweelede kucisama?

⁶ Cilikwabilizyo cakucamba cabululami ciiminina zyeelelo zya Jehova ziluleme. Nkaambo nzi ncotweelede kusama cilikwabilizyo cakucamba? Mbubwenya cilikwabilizyo cakucamba mbocikwabilila moyo wasikalumamba, cilikwabilizyo cakucamba cabululami, cilaukwabilila moyo wesu wacikozyanyo naa buntu bwesu bwamukati kuzintu zyamunyika eeyi zibyaabi. (Tus. 4:23) Jehova uyanda kuti katumuyanda alimwi akumubelekela amoyo wesu woonse. (Mt. 22:36, 37) Pele Saatani usola kutulesya kubelekela Jehova amoyo wesu woonse, alimwi akutupa kuyanda zintu zyamunyika eeyi eezyo Jehova nzyatayandi. (Jak. 4:4; 1Joh. 2:15, 16) Ikuti nzila eeyi tiiyabeleka, ulasola kutupenzya kutegwa atupe kucita cintu cimwi citamukkomanisyi Jehova.

7. Mbuti mbotusama cilikwabilizyo cakucamba cabululami?

⁷ Tulasama cilikwabilizyo cakucamba cabululami kwiinda mukutobela zyeelelo zya Jehova zijatikizya cibi acibotu, alimwi akwiinda mukupona kweelana azyeelelo eezyo. (Int. 97:10) Bamwi balakonzya kulimvwa kuti zyeelelo zya Jehova tazitupi lwaanguluko. Pele kuti twacileka kutobela zyeelelo zyamu Bbaibbele mubuumi bwesu, tulakonzya kuba mbuli sikalumamba uusamununa cilikwabilizyo cakucamba munkondo akaambo kakulimvwa kuti camulemena kapati. Eelo kaka ooku inga kwaba kufwubaala! Pele kuti katumuyanda Jehova, milawo yakwe tiiminyi, pele igwasya ndiswe.—1Joh. 5:3.

8. Ino caamba nzi kusama kabotu kumaulu eesu ikulibambila kwaambilizya makani mabotu?

⁸ Paulo utukulwaizya kuti akwalo kumaulu eesu katusamide kabotu ikulibambila kwaambilizya makani mabotu aaluumuno. Eeci caamba kuti, tweelede kuti katulibambilide lyoonse kukambauka makani mabotu aa Bwami. Ciindi notwaambila bamwi mulumbe wamu Bbaibbele, lusyomo lwesu lulayuma. Cilakulwaizya kubona bantu ba Jehova munyika yoonse kabasolekesya kujana ciindi cakwaambilizya makani mabotu nobali kumulimo, kucikolo, kubusena bwakucitila makwebo, nobakambauka kuŋanda aŋanda, nobaula zintu, nobaswaya banamukwasyi batali bakamboni, nobayanzana abalongwe babo alimwi buya nociba ciindi nobatacikonzyi kweendeenda. Kuti naa twayoowa akuleka kukambauka,  tulakonzya kuba mbuli sikalumamba uusamununa mpato ciindi cankondo calo cikonzya kupa kuti alicise kumaulu. Akaambo kaceeci, ulakonzya kwaalilwa kulikwabilila alimwi akutobela malailile aamusololi wakwe.

9. Nkaambo nzi ncotweelede kubweza ntobo mpati yalusyomo?

⁹ Ntobo mpati yalusyomo iiminina lusyomo ndotujisi muli Jehova. Tuli alusyomo lwakuti uyoozizuzikizya zisyomezyo zyakwe zyoonse. Lusyomo oolo luyootugwasya “kuzima mivwi yoonse iiyaka mulilo iifwuswa amubi.” Nkaambo nzi ncotweelede kunyamuna ntobo eeyi mpati? Nkaambo ilatukwabilila kukweenwa anjiisyo zyabasilweeno alimwi akuti tutatyompwi ciindi bantu nobatufwubaazya akaambo kazintu nzyotusyoma. Kuti katutajisi lusyomo tuyoobula nguzu zyakukaka ciindi bamwi nobatuyunga kutabikkila maano kuzyeelelo zya Jehova. Aboobo, kufwumbwa ciindi notukaka kucita cintu Jehova ncatayandi kumulimo, kucikolo, nkokuti lusyomo lwesu lwatukwabilila. (1Pet. 3:15) Kufwumbwa ciindi notukaka mulimo uuvwola mali manji, pele uutatuzumizyi kubeleka kusikila mpotugolela mumulimo wa Jehova, nkokuti lusyomo lwesu lwatukwabilila. (Heb. 13:5, 6) Alimwi kufwumbwa ciindi notuzumanana kubelekela Jehova nokuba  kuti tulakazyigwa, nkokuti lusyomo lwesu lwatukwabilila.—1Tes. 2:2.

10. Ino cimpoompo calufwutuko ninzi, alimwi nkaambo nzi ncotweelede kucisama?

¹⁰ Cimpoompo calufwutuko mbulangizi mbwatupa Jehova, ibulangizi bwakuti uyoobapa bulumbu boonse aabo bacita kuyanda kwakwe, alimwi akuti naa twafwa uyootubusya. (1Tes. 5:8; 1Tim. 4:10; Tit. 1:1, 2) Mbubwenya cimpoompo mbocikwabilila mutwe wasikalumamba, abwalo bulangizi bukwabilila mizeezo yesu. Munzila nzi? Bulangizi oobo bulatugwasya kubikkila maano kuzisyomezyo zya Leza, alimwi akutugwasya kuti tutatyompwi akaambo kamapenzi ngotujisi. Mbuti mbotusama cimpoompo eeci? Tulacita oobo kwiinda mukuyeeya mbwayeeya Leza. Mucikozyanyo, tatusyomi lubono lutasyomeki, pele tusyoma Leza.—Int. 26:2; 104:34; 1Tim. 6:17.

11. Ino panga lyamuuya ninzi, alimwi nkaambo nzi ncotweelede kulibelesya?

¹¹ Panga lyamuuya ndi Jwi lya Leza, Bbaibbele. Ipanga eelyo lilijisi nguzu zyakuyubununa bubeji buli boonse, alimwi akwaangununa bantu kubuzike bwanjiisyo zyakubeja akumicito mibyaabi. (2Kor. 10:4, 5; 2Tim. 3:16, 17; Heb. 4:12) Tulaiya kulibelesya kabotu panga eelyo kwiinda muciiyo cesu tobeni alimwi akwiinda mulwiiyo ndotutambula kumbunga ya Leza. (2Tim. 2:15) Kunze lyazilwanyo, Jehova ulatupa lukwabililo lumbi. Ino ndukwabililo nzi oolo?

12. Ncinzi cimbi ncotuyandika alimwi nkaambo nzi?

¹² Sikalumamba uucibwene ulizyi kuti takonzyi kulwana nkamu yabasikalumamba banji alikke, ulizyi kuti uyandika lugwasyo lwabasikalumambanyina. Mbubwenya buyo, andiswe tatukonzyi kuzwidilila mukulwana Saatani abantu bakwe tolikke, tuyandika lugwasyo lwabakwesu abacizyi. Jehova wakatupa “ciinga cabakwesu” munyika yoonse ibakonzya kutugwasya.—1Pet. 2:17.

13. Kweelana alugwalo lwa Bahebrayo 10:24, 25, ino miswaangano yesu itugwasya buti?

¹³ Nzila imwi motutambula lugwasyo nkwiinda mukujanika kumiswaangano. (Amubale Bahebrayo 10:24, 25.) Toonse tulatyompwa zimwi ziindi, kuti caba boobo, miswaangano ilakonzya kutukulwaizya. Tulakulwaizyigwa kwiinda mubwiinguzi mbobapa bakwesu abacizyi. Makani aayeeme a Bbaibbele alimwi azitondezyo nzyobapa zilatukulwaizya kuzumanana kubelekela Jehova. Ayalo mibandi njotuba anjiyo kautanatalika alimwi anowamana muswaangano ilatukulwaizya kapati. (1Tes. 5:14) Kuyungizya waawo, miswaangano yesu ilatupa coolwe cakugwasya bamwi calo citupa lukkomano. (Mil. 20:35; Rom. 1:11, 12) Alimwi miswaangano ilatugwasya amunzila zimwi. Ilatugwasya kuba bakambausi alimwi abamayi bacibwene. Mucikozyanyo, tulakonzya kwiiya mbozibelesyegwa zibelesyo zijanika mucibeela ca Zibelesyo Nzyotubelesya Kapati Mukuyiisya. Aboobo amulibambile kabotu miswaangano yambungano. Lyamuswaangano kamuswiililisya. Wamana muswaangano amulubelesye lwiiyo ndomwatambula. Kwiinda mukucita zintu eezyi, muyooba “sikalumamba mubotu wa Kristo Jesu.”—2Tim. 2:3.

14. Ndugwasyo nzi lumbi ndotujisi?

¹⁴ Alimwi tulijisi lugwasyo lwazyuulu-zyuulu zyabangelo basinguzu. Amuyeeye buyo mungelo omwe ncakonzya kucita. (Is. 37:36) Lino amuyeeye buyo kujatikizya mpi yabangelo ncoikonzya kucita. Kunyina muntu naa daimona likonzya kuzunda mpi ya Jehova yanguzu. Jehova ngusinguzu zyoonse, aboobo kuti kali andiswe lyoonse tunooli anguzu kwiinda basikutukazya kufwumbwa naa mbanji buti. (Bab. 6:16) Aaya masimpe! Amuyeeye  kujatikizya boonse bakonzya kumugwasya ciindi nomwatyompwa akaambo kamajwi naa nzyakonzya kucita mubelesinyoko, sicikolonyoko, naa munamukwasyi uutali Kamboni. Kamuyeeya kuti, tamuli nyolikke munkondo eeyi. Mutobela busolozi bwa Jehova.

15. Kweelana alugwalo lwa Isaya 54:15, 17, nkaambo nzi muntu uuli woonse ncatakonzyi kulesya bantu ba Leza kukambauka?

¹⁵ Nyika yeendelezyegwa a Saatani ilituzondede kapati. Tatutoli lubazu mutwaambo twacisi alimwi amunkondo. Twaambilizya zina lya Leza, kukambauka kuti Bwami bwa Leza bulikke mbobuyakuleta luumuno alimwi akusumpula zyeelelo zyakwe ziluleme. Tutondezya bantu kuti mweendelezi wanyika eeyi mujayi. (Joh. 8:44) Alimwi twaambilizya kuti, nyika ya Saatani ilanyonyoonwa lino-lino. Pele Saatani alimwi abantu bakwe, kunyina nobayakuulesya mulimo wesu wakukambauka. Muciindi caboobo, tuyoozumanana kumutembaula Jehova munzila iili yoonse njotukonzya. Nokuba kuti Saatani ulaanguzu kapati, kunyina naacikonzya kulesya mulumbe wa Bwami kubasikila bantu boonse. Eeci cakonzyeka akaambo buyo kakuti Jehova ulatukwabilila.—Amubale Isaya 54:15, 17.

16. Mbuti Jehova mbwayoobafwutula bantu bakwe lyamapenzi mapati?

¹⁶ Ncinzi ciyoocitika kumbele? Lyamapenzi mapati, Jehova uyootufwutula munzila zyobilo zigambya. Yakusaanguna, uyoofwutula babelesi bakwe basyomeka ciindi aakupa bami bamunyika ikunyonyoona Babuloni Mupati, imbunga yabukombi bwakubeja. (Ciy. 17:16-18; 18:2, 4) Yabili, uyoofwutula bantu bakwe ciindi akunyonyoona nyika ya Saatani yoonse lya Amagedoni.—Ciy. 7:9, 10; 16:14, 16.

17. Mbuti mbotugwasyigwa kuti twazumanana kuba acilongwe a Jehova?

¹⁷ Kuti twazumanana kuba acilongwe a Jehova, Saatani kunyina nayootunyonyoona cakumaninina. Mubwini, walo nguuyoonyonyoonwa cakumaninina. (Rom. 16:20) Aboobo amusame zilwanyo zyankondo zyoonse, akutazisamununa! Mutasoli kulwana Saatani alimwi anyika yakwe nyolikke. Amubagwasye bakwesu abacizyi. Alimwi amutobele busolozi bwa Jehova. Kuti mwacita oobo, munoosinizyide kuti Taateesu wakujulu siluyando, uyoomuyumya alimwi akumukwabilila.—Is. 41:10.