CIBALO CAKWIIYA 10
Mulakonzya ‘Kubusamununa Buntu Bwanu Bwakaindi’
“Amubusamunune buntu bwanu bwakaindi amicito yambubo.”—KOL. 3:9.
LWIIMBO 29 Kupona Kweelana Ancolyaamba Zina Lyesu
IZILI MUCIBALO *
1. Ino buumi bwanu bwakali buti kamutanatalika kwiiya Bbaibbele?
INO BUUMI bwanu bwakali buti kamutanatalika kwiiya Bbaibbele a Bakamboni ba Jehova? Tobanabunji tatuyandi akuyeeya mbotwakabede. Bukkale bwesu alimwi abube bwesu zyakali kweendelezyegwa azintu nyika nzyoibona kuti zililuzi naa taziluzi. Ikuti naa mbocibede oobo, ‘twakanyina bulangizi alimwi twakanyina Leza munyika.’ (Ef. 2:12) Pele nitwakatalika kwiiya Bbaibbele twakacinca!
2. Ncinzi ncomwakazyiba ciindi nomwakatalika kwiiya Bbaibbele?
2 Nimwakali kwiiya Bbaibbele, mwakazyiba kuti kuli Uso wakujulu uumuyanda kapati. Mpoonya mwakabona kuti, kutegwa mumukkomanisye alimwi akuba cibeela camukwasyi wakwe, mwakeelede kucinca bukkale bwanu alimwi ambomuzibona zintu. Alimwi akuti mwakeelede kusala kupona kweelana azyeelelo zyakwe zisumpukide.—Ef. 5:3-5.
3. Kweelana alugwalo lwa Bakolose 3:9, 10, ncinzi Jehova ncayanda kuti tucite, alimwi ino tulabandika nzi mucibalo eeci?
3 Mulengi wesu alimwi Taateesu wakujulu Jehova, ulijisi nguzu zyakutusalila mbotweelede kupona. Alimwi uyanda kuti katutanabbapatizyigwa, tubeleke canguzu ‘kusamununa buntu bwesu bwakaindi amicito yambubo.’ * (Amubale Bakolose 3:9, 10.) Cibalo eeci cilabagwasya aabo ibayanda kubbapatizyigwa kwiingula mibuzyo eeyi yotatwe: (1) Ino ‘buntu bwakaindi’ ninzi? (2) Nkaambo nzi Jehova ncayanda kuti tubusamunune? (3) Mbuti mbotukonzya kucita oobo? Swebo notwakabbapatizyigwa kale, cibalo eeci cilatugwasya kutacita zintu naa kuyeeya mbuli mbotwakali kuyeeya katutanabusamununa buntu bwesu bwakaindi.
INO ‘BUNTU BWAKAINDI’ NINZI?
4. Nzintu nzi nzyacita muntu weendelezyegwa ‘abuntu bwakaindi’?
4 Muntu weendelezyegwa ‘abuntu bwakaindi’ kanji-kanji ulayeeya alimwi akucita zintu zibyaabi. Inga kajisi bube bwakuliyanda, kanyemanyema, katalumbi akulisumpula. Ulakonzya keebelela zintu ziletela muzeezo wakoonana, mafilimu aankondo alimwi amicito yakutalilemeka. Inga kajisi bube bubotu alimwi kalimvwa kuusa akaambo kazintu zibyaabi nzyacita naa nzyaamba. Pele kunyina cimukulwaizya kucinca mbwayeeya abukkale bwakwe.—Gal. 5:19-21; 2Tim. 3:2-5.
Ikuti twabusamununa ‘buntu bwakaindi,’ mizeezo alimwi amicito mibyaabi tazicinootweendelezyi (Amubone muncali 5) *
5. Sena cilakonzyeka kubusamununa buntu bwakaindi cakumaninina? Amupandulule. (Mil. 3:19)
5 Mbwaanga toonse tatulondokede, tatukonzyi kucilekela limwi kuyeeya alimwi akulombozya zintu zibyaabi. Zimwi ziindi, tulakonzya kwaamba naa kucita cintu cikonzya kutupa kuusa. (Jer. 17:9; Jak. 3:2) Pele kuti twabusamununa buntu bwesu bwakaindi, nkokuti micito mibyaabi taicinootweendelezyi. Mpoonya inga twacinca.—Is. 55:7; amubale Milimo 3:19.
6. Nkaambo nzi Jehova ncatukulwaizya kuleka kuyeeya zintu zibyaabi amicito yabuntu bwakaindi?
6 Mbwaanga Jehova ulatuyanda alimwi uyanda kuti katupona buumi buli kabotu, utukulwaizya kuleka kuyeeya zintu zibyaabi akutazicita. (Is. 48:17, 18) Ulizyi kuti aabo ibatayandi kuleka kucita zintu zibyaabi balapenga alimwi akupenzya bamwi. Cilamucisa natubona katupenga akupenzya bamwi.
7. Kweelana alugwalo lwa Baroma 12:1, 2, nkusala kuli buti nkotweelede kucita?
7 Balongwe alimwi abanamukwasyi bamwi nobabona katusolekesya kucinca bukkale bwesu balakonzya kutufwubaazya. (1Pet. 4:3, 4) Balakonzya kwaamba kuti tujisi lwaanguluko lwakulisalila kufwumbwa ncotuyanda kucita alimwi kunyina muntu iweelede kutwaambila cakucita. Pele aabo ibasala kutatobela zyeelelo zya Jehova inga tabaangulukide. Mubwini, inga bazumizya kweendelezyegwa a Saatani alimwi anyika yakwe. (Amubale Baroma 12:1, 2.) Toonse tweelede kusala: Naa nkuzumanana abuntu bwesu bwakaindi ibweendelezyegwa anyika ya Saatani, naa nkuzumizya Jehova kuti atucince kutegwa tube bantu bali kabotu.—Is. 64:8.
MBUTI MBOMUKONZYA KUBUSAMUNUNA “BUNTU BWANU BWAKAINDI”?
8. Ncinzi cikonzya kutugwasya kutegwa tuleke kuyeeya zintu zibyaabi akutazicita?
8 Jehova ulizyi kuti cilatola ciindi alimwi tuyandika kubeleka canguzu kutegwa tuleke kuyeeya akucita zintu zibyaabi. (Int. 103:13, 14) Nokuba boobo, kwiinda mu Jwi lyakwe, muuya wakwe, ambunga yakwe, Jehova ulatupa busongo, nguzu, alimwi alugwasyo kutegwa tucince. Cakutadooneka Jehova wakamugwasya kale. Lino atulange-lange nzila zimwi zikonzya kumugwasya kuzumanana kusamununa buntu bwanu bwakaindi kutegwa mweelele kubbapatizyigwa.
9. Ino Jwi lya Leza inga lyamugwasya buti?
9 Amubelesye Bbaibbele kulilingula cakulomya. Ijwi lya Leza lili mbuli gilazi; lilakonzya kumugwasya kuzyiba mbomuyeeya, mbomwaambaula ambomucita zintu. (Jak. 1:22-25) Bayi banu ba Bbaibbele alimwi a Banakristo bamwi basimide balakonzya kumupa lulayo lugwasya. Mucikozyanyo, balakonzya kubelesya Magwalo ikumugwasya kuzyiba mbazu momucita kabotu amoomo momulezya. Balakonzya kumuyiisya kujana makani aamu Bbaibbele aakonzya kumugwasya kuleka zilengwa zibyaabi. Alimwi Jehova lyoonse ulilibambilide kumugwasya. Nguweelela kumugwasya; nkaambo ulizyi zyoonse izili mumoyo wanu. (Tus. 14:10; 15:11) Aboobo lyoonse kamupaila akubala Jwi lyakwe.
10. Ino twiiya nzi kucakuluula ca Elie?
10 Amusyome kuti zyeelelo zya Jehova nzyeziinda kubota. Tulagwasyigwa ikuti katucita zyoonse Jehova nzyatwaambila. Aabo bapona kweelana azyeelelo zyakwe balaba abulemu, balapona buumi buli kabotu, alimwi akuba alukkomano lwini-lwini. (Int. 19:7-11) Mukwiimpana, aabo batatobeli zyeelelo zya Jehova balapenga akaambo kakucita zintu zibyaabi. Amubone ncaakaamba mwaalumi wazina lya Elie kujatikizya kukaka kutobela zyeelelo zya Leza. Wakakomezyegwa abazyali bamuyanda Jehova. Pele naakali mukubusi, wakasala balongwe babyaabi. Wakatalika kupona buumi bubyaabi, kubelesya misamu iikola, ikutalilemeka alimwi akubba. Elie wakaamba kuti wakatalika kuba mukali kapati alimwi akuba sinkondo. Mubufwaafwi, wakaamba kuti wakali kucita zintu zyoonse nzyaakayiisyigwa kuti Munakristo tayelede kuzicita. Nokuba boobo, kunyina naakaziluba zintu nzyaakaiya kubwana. Kumbele, wakatalika alimwi kwiiya Bbaibbele. Wakabeleka canguzu kuleka bukkale bwakwe bubyaabi, mpoonya wakabbapatizyigwa mu 2000. Ino kupona kweelana azyeelelo zya Jehova kwakamugwasya buti? Elie waamba kuti: “Lino ndilijisi luumuno lwamumizeezo amanjezeezya aasalala.” * Cakuluula eeci citondezya kuti aabo batatobeli zyeelelo zya Jehova balajana mapenzi. Nokuba boobo, Jehova ulilibambilide kubagwasya kuti bacince.
11. Nzintu nzi Jehova nzyasulide?
11 Amwiiye kusulaika zeezyo Jehova nzyasulide. (Int. 97:10) Bbaibbele lyaamba kuti Jehova ulaasulide “meso aalisumpula, mulaka waamba zyakubeja, maanza aatila bulowa bwabantu banyina mulandu.” (Tus. 6:16, 17) Alimwi “ulabasesemwa basinkondo abasilweeno.” (Int. 5:6) Jehova ulizisulide zintu eezyi cakuti wakabanyonyoona bantu boonse babyaabi mumazuba aa Nowa nkaambo nyika yoonse yakazula nkondo. (Matl. 6:13) Amubone cikozyanyo cimbi. Kwiinda mumusinsimi Malaki, Jehova waamba kuti ulibasulide aabo cabumpelenge baleka ngobakwetene limwi. Leza ulabukaka bukombi bwabo alimwi uyoobabeteka akaambo kamicito yabo.—Malk. 2:13-16; Heb. 13:4.
Kucita cintu ncatayandi Jehova kweelede kutusesemya mbuli kulya cakulya cibolede (Amubone muncali 11-12)
12. Ino ‘kusesemwa acintu cibi’ caamba nzi?
12 Jehova uyanda kuti ‘tusesemwe acintu cibi.’ (Rom. 12:9) Ibbala ‘lyakusesemwa’ lipandulula kusulaika cintu cimwi cakumaninina. Amweezyeezye buyo mbomukonzya kulimvwa ikuti mwaambilwa kulya cakulya cibolede. Ikumvwa buyo boobo ambweni inga kwamupa kuciswa buya. Mbubonya buyo, ikuyeeya buyo kucita cintu ncatayandi Jehova kweelede kutusesemya.
13. Nkaambo nzi ncotweelede kukwabilila mizeezo yesu?
13 Amwiikwabilile mizeezo yanu. Nzyotuyeeya nzezyeendelezya zintu nzyotucita. Nkakaambo kaako Jesu ulatuyiisya kukaka mizeezo iili yoonse iikonzya kutusololela kukucita cibi cipati. (Mt. 5:21, 22, 28, 29) Tuyanda kumukkomanisya Taateesu wakujulu, tee kayi? Eelo kaka cilayandika kapati, kwiikaka mpoonya-mpoonya mizeezo mibyaabi!
14. Ino ŋambawido yesu iyubununa nzi, alimwi mibuzyo nzi njotweelede kulibuzya?
14 Amulijate mbomwaambaula. Jesu wakaamba kuti: “Kufwumbwa zintu zizwa mukanwa zizwa mumoyo.” (Mt. 15:18) Mubwini, ŋambawido yesu iyubununa izili mumoyo wesu. Aboobo amulibuzye kuti: ‘Sena tandibeji, nokuba kuti kucita boobo inga kwandijizya muntenda? Ikuti naa ndilikwete naa kukwatwa, sena ndilasobana nkwela abaabo mbotwiindene limwi zizo? Sena ndilaitantamuka cakumaninina ŋambawido yakutalilemeka? Ikuti umwi wandinyemya, sena ndilaingula cakukkazika moyo?’ Kulanga-langa mibuzyo eeyi kulakonzya kumugwasya. Ŋambawido yanu ili mbuli kkotoni iiswaanganya cisani. Ikuti mwabeleka canguzu kuleka ŋambawido mbyaabi, mibandi yakutalilemeka alimwi akubeja, ciyoomuubila kusamununa buntu bwanu bwakaindi.
15. Ino kugagaila buntu bwesu bwakaindi “acisamu” caamba nzi?
15 Amulyaabe kubweza ntaamu iiyandika. Mwaapostolo Paulo wakabelesya cikozyanyo cibotu cituyiisya mbociyandika kapati kucinca bukkale bwesu. Wakalemba kuti tweelede kugagaila buntu bwesu bwakaindi “acisamu.” (Rom. 6:6) Jesu wakalilyaabide kugagailwa acisamu kutegwa akkomanisye Jehova. Mbubonya buyo, andiswe tweelede kuleka bukkale bumwi alimwi azilengwa zitamukkomanisyi Jehova. Lilikke buyo kuti twacita oobo, ndendilyo notukonzya kuba amanjezyeezya aasalala alimwi abulangizi bwakuyoopona mane kukabe kutamani. (Joh. 17:3; 1Pet. 3:21) Katuyeeya kuti Jehova takonzyi kucinca zyeelelo zyakwe kutegwa akkomanisye ndiswe. Muciindi caboobo, tweelede kucinca akutobela zyeelelo zyakwe.—Is. 1:16-18; 55:9.
16. Nkaambo nzi ncotweelede kuzumanana kulwana kulombozya kubyaabi?
16 Amuzumanane kulwana kulombozya kubyaabi. Nociba ciindi nomwamana kubbapatizyigwa, mweelede kuzumanana kulwana kulombozya kubyaabi. Amubone cakacitikila ba Maurício. Nobakacili bana, bakatalika koonana abantu mbobakozyenye limwi zizo. Mpoonya, bakatalika kwiiya Bbaibbele abantu ba Jehova. Bakacinca bukkale bwabo, alimwi akubbapatizyigwa mu 2002. Nokuba kuti bamubelekela Jehova kwamyaka minji, ba Maurício bakati: “Kwaamba masimpe, zimwi ziindi ndicilwana akulombozya kubyaabi.” Pele eeci tacibatyompyi pe. Muciindi caboobo, baamba kuti: “Cilanduumbulizya kuzyiba kuti ikuti ndasala kutakutobela kulombozya ooko, ndikkomanisya Jehova.” *
17. Ncinzi camukulwaizya kujatikizya cakuluula caba Nabiha?
17 Amulombe lugwasyo lwa Jehova akusyoma muuya wakwe ikutali nguzu zyanu. (Gal. 5:22; Flp. 4:6) Tweelede kubeleka canguzu kutegwa tusamunune buntu bwesu bwakaindi akubulekela limwi. Amubone cakacitikila ba Nabiha. Bausyi bakabasiya nobakajisi myaka yakuzyalwa iili cisambomwe buyo. Bakaamba kuti, “Eeci cakandicisa kapati.” Nobakakomena, ba Nabiha bakaba bakali alimwi akunyema-nyema. Bakatalika kusambala misamu iikola, aboobo bakaangwa akukkala muntolongo kwamyaka iili mbwiibede. Mpoonya Bakamboni ibakali kuswaya ntolongo bakatalika kwiiya Bbaibbele ambabo. Ba Nabiha bakatalika kucinca bukkale bwabo. Bakaamba kuti: “Ikuleka micito imwi cakali cuubauba. Pele cakali ciyumu kuleka kufweba.” Ba Nabiha bakapenga kapati kwaciindi ciinda kumwaka omwe, pele kumbele bakazyoocileka kufweba. Ino bakacikonzya buti? Bakaamba kuti: “Kwiinda zyoonse, kupaila cakutaleka kuli Jehova kwakandigwasya kapati.” Lino baamba kuti: “Ikuti naa mebo ndakacikonzya kucinca bukkale bwangu kutegwa ndikkomanisye Jehova, nkokuti abamwi inga bacikonzya!” *
MULAKONZYA KWEELELA KUBBAPATIZYIGWA!
18. Kweelana alugwalo lwa 1 Bakorinto 6:9-11, ncinzi babelesi ba Leza banji ncobakacita?
18 Mumwaanda wamyaka wakusaanguna, baalumi abamakaintu bamwi Jehova mbaakasala kuti bakalele antoomwe a Kristo, bakali kupona buumi bubyaabi kapati. Mucikozyanyo bakali basimamambe, bantu boonana abaabo mbobakozyenye limwi zizo alimwi ababbi. Nokuba boobo, kwiinda mukugwasyigwa amuuya uusalala wa Leza, bakacikonzya kucinca bukkale bwabo. (Amubale 1 Bakorinto 6:9-11.) Mbubonya buyo amazuba aano, kwiinda mukugwasyigwa a Bbaibbele, bantu banji bacinca bukkale bwabo. * Bakaileka micito iikatazya kapati. Cikozyanyo cabo citondezya kuti andinywe mulakonzya kucinca bukkale bwanu akwiileka micito mibyaabi kutegwa mweelele kubbapatizyigwa.
19. Ino tuyoobandika nzi mucibalo citobela?
19 Kunze buyo lyakubeleka canguzu kusamununa buntu bwakaindi, aabo ibayanda kubbapatizyigwa beelede kubeleka canguzu kutegwa basame buntu bupya. Mucibalo citobela tuyoobandika mbobakonzya kucita oobo alimwi abamwi mbobakonzya kubagwasya.
LWIIMBO 41 Komvwa Mupailo Wangu
^ munc. 5 Kutegwa tweelele kubbapatizyigwa, tweelede kucinca bukkale bwesu. Mucibalo eeci tulabona ncobwaamba buntu bwesu bwakaindi, ncotweelede kubusamununa alimwi ambotukonzya kucita oobo. Mucibalo citobela tuyoolanga-langa mbotukonzya kuzumanana kusama buntu bupya, noliba leelyo notwamana kubbapatizyigwa.
^ munc. 3 BUPANDULUZI BWAMABALA: ‘Kusamununa buntu bwesu bwakaindi’ caamba kuleka bube naa tulengwa tutamukkomanisyi Jehova. Eeci ceelede kucitwa katutanabbapatizyigwa.—Ef. 4:22.
^ munc. 10 Kutegwa muzyibe zinji, amubone cibalo cakuti “Ibbaibbele Lilakonzya Kubacinca Bantu,” akatwe kamakani kakuti: “Ndakeelede Kupiluka Kuli Jehova,” icakamwaigwa mu Ngazi Yamulindizi yamu April 1, 2012.
^ munc. 16 Kutegwa muzyibe zinji, amubone cibalo cakuti “Ibbaibbele Lilakonzya Kubacinca Bantu—‘Bakanditonzya luzyalo kapati,’” icakamwaigwa mu Ngazi Yamulindizi yamu May 1, 2012.
^ munc. 17 Kutegwa muzyibe zinji, amubone cibalo cakuti, “Ibbaibbele Lilakonzya Kubacinca Bantu—‘I Became an Angry, Aggressive Young Woman,’” icakamwaigwa mu Ngazi Yamulindizi yamu Chikuwa yamu October 1, 2012.
^ munc. 18 Amubone kabbokesi kakuti “ Ibbaibbele Lilakonzya Kubacinca Bantu.”
^ munc. 64 BUPANDULUZI BWACIFWANIKISO: Kuleka zintu zibyaabi alimwi azilengwa kuli mbuli kusamununa cisani cakaindi.
