1. Ncintu nzi cikkkomanisya cakali kuyoocitikila ba Juda ibakali mubuzike?

 BA JUDA bakalikkomene kapati. Jehova Leza “wakapa kuti Mwami Koresi wa Persia” aangulule bana Israyeli balo ibakali mubuzike mu Babuloni kwamyaka minji. Mwami wakaambilizya kuti ba Juda bakali kuyoopiluka kumunzi ookwabo “kuyooyakulula ŋanda ya Jehova Leza wa Israyeli.” (Ezr. 1:1, 3) Eelo kaka aaya akali makani aakkomanisya! Eeci cakali kwaamba kuti, bukombi bwakasimpe bwakali kuyoobukulusyigwa munyika Leza njaakapede bantu bakwe.

2. Ncinzi ncobakasaanguna kucita ba Juda ibakapiluka kuzwa mubuzike?

² Mu 537 B.C.E., ba Juda bakusaanguna ibakapiluka kuzwa mubuzike bakasika mu Jerusalemu, munzi iwakali mupati mubwami bwa Juda bwakumusanza. Mpoonya-mpoonya bakatalika kuyakulula tempele, cakuti mu 536 B.C.E., bakalimanizyide kale kuyaka ntalisyo yatempele.

3. Nkukazyigwa kuli buti nkobakajana ba Juda?

³ Nokuba boobo, mbobakatalika buyo kuyaka tempele, ba Juda aaba bakatalika kukazyigwa kapati. Ibantu bakabazingulukide ‘bakazumanana kubatyompya ba Juda aaba akubakonga kuti baleke kuyaka.’ (Ezr. 4:4) Bukkale oobu bwakali kukatazya kapati kuba Juda alimwi zintu zyakaindila buya kubija. Mu 522 B.C.E., Aritasasita wakaba mwami mupya wabana Persia. * Akaambo kamwami ooyu mupya, basikukazya bakali kuyeeya kuti balakonzya kuulesyela limwi mulimo wakuyakulula tempele kwiinda mukuleta mapenzi ‘kubelesya mulawo.’ (Int. 94:20) Bakatuma lugwalo ku Mwami Aritasasita akumwaambila kuti, ba Juda aaba bakajisi makanze aakumuzangila. (Ezr. 4:11-16) Mwami wakabusyoma bubeji oobu akulailila  kuti ba Juda bacileke kuyaka tempele. (Ezr. 4:17-23) Akaambo kaceeco, bakauleka mulimo ngobakali kukkomanina.—Ezr. 4:24.

4. Ncinzi Jehova ncaaakacita ciindi basikukazya nobakakasya kuti tempele liyakululwe? (Isaya 55:11)

⁴ Bantu bamucisi ibatakali kukomba Jehova alimwi abamwi bamumfwulumende ya Persia bakalikanzide kulesya mulimo wakuyakulula tempele. Pele Jehova wakaliyandide kapati kuti mulimo ooyu uzumanane, alimwi lyoonse ulazuzikizya makanze aakwe. (Amubale Isaya 55:11.) Mpoonya wakabatumina musinsimi sicamba Zekariya akumupa mulongo wazilengaano zikkomanisya zyalo nzyaakaambila ba Juda kutegwa bakulwaizyigwe. Eezyi zilengaano zyakabagwasya ba Juda kubona kuti tiibakeelede kubayoowa basikubakazya naaceya alimwi akuti bakeelede kuzumanana amulimo wa Jehova. Mucilengaano casanu, Zekariya wakabona cibikkilo calambe azisamu zyobilo bamaolifa.

5. Ino tulalanga-langa nzi mucibalo eeci?

⁵ Zimwi ziindi toonse tulatyompwa. Aboobo tulakonzya kugwasyigwa ciindi notulanga-langa kukulwaizya Jehova nkwaakapa bana Israyeli kwiinda mucilengaano ca Zekariya casanu. Cilengaano eeci cilakonzya kutugwasya kubelekela Jehova cakusyomeka ciindi notukazyigwa, bukkale bwesu nobwacinca, alimwi aleelyo notwapegwa busolozi mbotutamvwisyi.

6. Mbuti cilengaano cijatikizya cibikkilo calambe alimwi azisamu zyobilo zyamaolifa izyaambidwe kuli Zekariya 4:1-3, mbozyakabakulwaizya ba Juda? (Amubone cifwanikiso icili aacivwumbyo.)

⁶ Amubale Zekariya 4:1-3. Cilengaano cacibikkilo calambe alimwi azisamu zyobilo zyamaolifa zyakapa ba Juda busicamba bwakuzumanana kubeleka nokuba kuti bakali kukazyigwa. Mubuti? Sena mwabona kuti cibikkilo calambe cakajisi mafwuta aatakali kumana? Mafwuta aakali kuzwa kuzisamu zyobilo zyamaolifa akali kunjila mumutiba, mpoonya mafwuta aayo akali kwiinda mucibikkilo calambe kuya kumalambe aali ciloba. Aaya mafwuta akali kupa kuti malambe kaayaka akutazima. Zekariya wakabuzya kuti: “Ino zintu eezyi zyaamba nzi?” Mpoonya mungelo wakamwiingula kwiinda mukumwaambila mulumbe ooyu uuzwa kuli Jehova wakuti: “‘Ciyoocitika ikutali akaambo kampi yabasikalumamba, naa akaambo kanguzu, pele kwiinda mumuuya wangu,’ mbwaamba Jehova wamakamu.” (Zek. 4:4, 6) Mafwuta aakali kuzwa kuzisamu, akali kwiiminina nguzu zya Jehova zyamuuya uusalala izitamani. Muuya uusalala wa Leza wakali anguzu kapati kwiinda mpi yabana Persia. Mbwaanga Jehova wakali kulubazu lwabo, basikuyaka tempele bakazumanana kuyaka akuumanizya mulimo wabo nokuba kuti bakali kukazyigwa. Eelo kaka mulumbe ooyu wakali kukulwaizya kapati! Ba Juda bakeelede buyo kusyoma Jehova akuzumanana kubeleka. Eeco ncencico ncobakacita, nokuba kuti mulimo wakalilesyedwe.

7. Nkucinca kuli buti ikwakapa kuti basikuyakulula tempele bakulwaizyigwe?

⁷ Kucinca ikwakacitika kwakabakulwaizya kapati basikuyaka tempele. Ino nkucinca nzi? Mu 520 B.C.E., mwami mupya Dariyo I, nguwakali mwami wa Persia. Mumwaka wabili wabulelo bwakwe, wakazyiba kuti kulesya mulimo wakuyaka tempele tiikwakazumizyidwe amulawo. Mpoonya Dariyo wakabikka mulawo wakuti tempele lizumanane kuyakwa. (Ezr. 6:1-3) Eeci ncaakacita mwami cakabagambya bantu boonse, pele mwami wakacita azintu zimwi ziyungizyidwe kunze buyo lyakuzumizya kuti mayake azumanane. Mwami wakalailila bantu bakabazingulukide ba Juda kuti tiibakeelede kuunyonganya  mulimo wakuyakulula tempele alimwi akuti bakeelede kubapa mali azintu zimwi nzyobakali kuyandika kutegwa baumanizye mulimo ooyu. (Ezr. 6:7-12) Akaambo kaceeci, ba Juda bakamanizya mulimo wabo wakuyakulula tempele mumyaka iindilila buyo asyoonto amyaka yone mu 515 B.C.E.—Ezr. 6:15.

8. Nkaambo nzi ncomuteelede kuyoowa ciindi nomukazyigwa?

⁸ Mbubwenya buyo amazuba aano, bakombi ba Jehova banji balakazyigwa. Mucikozyanyo, bamwi bakkala mumasena mulimo wesu moukasyidwe. Mumasi aali boobu, bakwesu balakonzya kwaangwa ‘akutolwa kubeendelezi abami’ kutegwa bakape bumboni. (Mt. 10:17, 18) Zimwi ziindi, kucinca kwamfwulumende kulakonzya kupa kuti bakwesu abacizyi batalika kukomba cakwaanguluka. Naa mubetesi mubotu moyo ulakonzya kukosola makani munzila iikonzya kupa kuti bakwesu abacizyi batalike alimwi kukomba cakwaanguluka. Bakamboni bamwi balakazyigwa munzila iindene. Bakkala mumasi mwalo mobazumizyidwe kukomba Jehova, pele balakazyigwa abanamukwasyi ibakanzide kubalesya kubelekela Leza. (Mt. 10:32-36) Kanji-kanji, ciindi basikubakazya nobabona kuti kusolekesya kwabo kwakubalesya kukomba Jehova takugwasyi, inga balacileka kubakazya. Amana buya, aabo ibakali kubakazya naa kubalwana balaba Bakamboni ibasungu. Ciindi nomukazyigwa, mutatyompwi pe. Amube basicamba. Jehova ulamugwasya amuuya wakwe uusalala uuli aanguzu kapati, aboobo tamweelede kuyoowa pe!

9. Nkaambo nzi ba Juda bamwi ncobakauside ciindi nobakabona ntalisyo yatempele lipya?

⁹ Noyakamana kuyakwa ntalisyo yatempele lipya, ba Juda bamwi ibakali bamadaala bakalila. (Ezr. 3:12) Bakalilibwene tempele lyeebeka ilyakayakidwe a Solomoni, aboobo bakalimvwa kuti tempele eeli liyakwa naa balyeezyanisya atempele lyakaindi eeli ‘linoolibonya mbuli cintu cabuyo.’ (Hag. 2:2, 3) Bakaluuside nkaambo bakeezyanisya tempele lyakaindi kutempele lipya. Cilengaano ca Zekariya cakabagwasya kapati ikuleka kuusa. Munzila nzi?

10. Mbuti majwi aakaamba mungelo aalembedwe ku Zekariya 4:8-10 mbwaakabagwasya ba Juda kuleka kuusa?

¹⁰ Amubale Zekariya 4:8-10. Ino mungelo wakali kupandulula nzi ciindi naakaamba kuti ba Juda “bayookondwa akubona cipimyo  cakupimya bwiime bwacintu mujanza lya Zerubabeli”? Eeci cipimyo cakali kubelesyegwa kupima bwiime bacintu cimwi akubona naa ciimvwi buti. Aboobo mungelo wakali kukulwaizya bantu ba Leza kuti, eeli tempele nokuba kuti lilibonya kuba lyaansi balyeezyanisya atempele lyakaindi, lyakali kuyoomana kuyakwa alimwi liyooba kweelana a Jehova mbwayanda. Jehova wakali kuyoolikkomanina tempele eeli, abalo ba Juda bakali kuyoolikkomanina. Icakali kuyandika kuli Jehova ncakuti bukombi bwakwe kabucitwa mutempele eeli lipya kweelana azyeelelo zyakwe. Ikuti ba Juda nobakabikkila maano kukomba Jehova munzila njayanda akukkomaninwa anguwe, bakali kuyookkomana alimwi.

11. Mbuyumuyumu nzi mbobajana bakombi ba Jehova bamwi mazuba aano?

¹¹ Tacili cuuba-uba kulindiswe toonse ciindi bukkale nobwacinca. Bukkale bwakacinca kuli bamwi ibakali kubeleka mulimo waciindi coonse waalubazu kwaciindi cilamfwu. Bamwi bakaileka mikuli njobakali kuyandisya akaambo kakucembaala. Tacilubide kuusa ciindi bukkale nobwacinca. Kumatalikilo, inga catukatazya kukumvwisya naa kukuzumina kucinca kwacitika. Tulakonzya kuziyeeya zintu nzyotwakazyibide kucita. Alimwi zimwi ziindi tulakonzya kutyompwa kapati, ambweni buya akulimvwa kuti tatumubelekeli kusikila mpotugolela Jehova. (Tus. 24:10) Mbuti cilengaano ca Zekariya mbocikonzya kutugwasya kuzumanana kubelekela Leza kweelana anguzu zyesu?

12. Mbuti cilengaano ca Zekariya mbocikonzya kutugwasya kuzumanana kuba alukkomano ciindi bukkale bwesu nobwacinca?

¹² Tulakonzya kuliyumya kukucinca kuti zintu twazibona mbuli mbwazibona Jehova. Jehova uli mukuzuzikizya zintu zipati-pati mazuba aano, alimwi tulijisi coolwe cilibedelede cakuba basimilimonyina. (1Kor. 3:9) Mikuli yesu ilakonzya kucinca, pele luyando Jehova ndwajisi kulindiswe talucinci pe. Aboobo, kuti kuli kucinca mumbunga kwatujatikizya, tatweelede kuyanda kuzyiba twaambo toonse tujatikizyidwe mukucinca ooko. Muciindi cakuyeeya “mazuba aakaindi,” atupaile kutegwa tubone bubotu mukucinca ooko. (Muk. 7:10) Muciindi cakuyeeya zintu nzyotutakonzyi kucita, tweelede kuyeeya zintu nzyotukonzya kucita. Cilengaano ca Zekariya cituyiisya mbociyandika kapati kuzilanga munzila yeelede zintu. Ikuti twacita oobo tuyoozumanana kuba alukkomano alimwi akusyomeka nociba ciindi bukkale bwesu nobwacinca.

13. Nkaambo nzi bana Israyeli bamwi ncobakalimvwa kuti muzeezo wakuyakulula tempele tiiwakali kabotu?

¹³ Mulimo wakuyakulula tempele wakalilesyedwe. Nokuba boobo, baalumi ibakasalidwe kusololela, Mupaizi Mupati Jeshua naa Joshua alimwi a Mweendelezi Zerubabeli “bakatalika kuyakulula ŋanda ya Leza.” (Ezr. 5:1, 2) Ba Juda bamwi muzeezo ooyu bakaubona kuti tiiwakali kabotu. Nkaambo mulimo wakuyakulula tempele wakali antangalala kuli basinkondonyina, cakuti bakali kukonzya kubelesya nzila iili yoonse kutegwa baunyonganye. Baalumi bobilo ibakali kusololela, Joshua alimwi a Zerubabeli, bakali kuyandika kukulwaizyigwa kuti Jehova wakali kuyoobagwasya. Bakagwasyigwa. Munzila nzi?

14. Kweelana a Zekariya 4:12, 14, mbuti Mupaizi Mupati Joshua alimwi a Mweendelezi Zerubabeli mbobakagwasyigwa?

¹⁴ Amubale Zekariya 4:12, 14. Mucibeela cacilengaano ca Zekariya, mungelo uyubunwida musinsimi wa Leza uusyomeka kuti zisamu zyobilo zyamaolifa ziiminina ‘bananike bobilo’, nkokuti Joshua a Zerubabeli. Mungelo wakaamba kuti baalumi aaba cakali mbuli kuti “baimvwi kumbali aa Mwami wanyika yoonse,” Jehova. Eelo kaka eeci cakali coolwe! Jehova wakali kubasyoma baalumi aaba. Mbubwenya buyo, abalo bana Israyelinyina bakalijisi twaambo tulimvwisya ncibakeelede kukusyoma kusala kwabaalumi aaba alimwi abusolozi buzwa kuli Leza kufwumbwa naa bwakali buti.

15. Mbuti mbotukonzya kutondezya kuti tulabulemeka busolozi bujanika mu Jwi lya Leza?

¹⁵ Jehova wazumanana kupa bantu bakwe busolozi kwiinda mu Jwi lyakwe, Bbaibbele. Bbuku eeli lisetekene litwaambila mbotweelede kumukomba munzila iitambulika. Mbuti mbotukonzya kutondezya kuti tulabulemeka busolozi mbotupegwa kuzwa mu Jwi lya Leza? Nkwiinda mukujana ciindi cakulibala akulimvwisya. Amulibuzye kuti: ‘Ciindi nondibala Bbaibbele alimwi amabbuku amwi, sena ndilaima kuzinzibala kuyeeya nzyondibala? Sena ndilasola kumvwisya kasimpe kamu Bbaibbele kajisi “zintu zimwi zikatazya kumvwa”? Naa sena ndibala buyo caatala-tala?’ (2Pet. 3:16) Ikuti katujana ciindi cakuzinzibala kuyeeya nzyatuyiisya Jehova, tuyoocikonzya kutobela busolozi bwakwe alimwi akuzuzikizya mulimo wesu wakukambauka.—1Tim. 4:15, 16.

16. Ciindi notutabumvwisyi busolozi mbotutambula kuzwa ‘kumuzike uusyomeka alimwi uucenjede,’ ncinzi cikonzya kutugwasya kubutobela?

 ¹⁶ Nzila aimwi Jehova mwatupa busolozi nkwiinda ‘mumuzike uusyomeka alimwi uucenjede.’ (Mt. 24:45) Zimwi ziindi, muzike ulakonzya kutupa malailile ngotutamvwisyi. Mucikozyanyo, tulakonzya kutambula malailile aabambilidwe kutukwabilila kuntenda zilicitikila swebo nzyotuyeeya kuti inga tiizyacitika mucilawo motukkala. Naa tulakonzya kulimvwa kuti muzike ulaciindizya kupa malailile kujakitizya bulwazi buyambukila kapati. Ino tweelede kucita buti kuti katulimvwa kuti malailile aapegwa taagwasyi? Tweelede kuyeeya bana Israyeli mbobakagwasyigwa kwiinda mutobela malailile ngobakapegwa a Joshua alimwi a Zerubabeli. Alimwi tulakonzya kuyeeya azibalo zimwi zyamu Bbaibbele nzyotwakabala. Zimwi ziindi bantu ba Leza bakali kutambula busolozi ibwakali kulibonya kuti tabugwasyi, pele bwakafwutula buumi bwabo.—Bab. 7:7; 8:10.

17. Ino cilengaano cacibikkilo calambe alimwi azisamu zyobilo zyamaolifa zyakabagwasya buti ba Juda?

¹⁷ Nokuba kuti cilengaano casanu ncaabona Zekariya cakali cifwaafwi, cakabagwasya ba Juda kuubona munzila yeelede mulimo alimwi abukombi bwabo. Alimwi ciindi nobakacita zintu kweelana anzyaakabona Zekariya, bakalubona lugwasyo lwa Jehova lwaluyando alimwi abusolozi. Kwiinda mumuuya wakwe uusalala uuli aanguzu, Jehova wakabagwasya kuzumanana amulimo wabo mpoonya bakaba alukkomano alimwi.—Ezr. 6:16.

18. Mbuti cilengaano ca Zekariya mbocikonzya kutugwasya?

¹⁸ Cilengaano ca Zekariya cacibikkilo calambe alimwi azisamu zyobilo zyamaolifa cilakonzya kutugwasya kapati mubuumi. Mbubwenya mbotwabandika, cilakonzya kutugwasya kuba anguzu zyakuliyumya ciindi notukazyigwa, ikutupa lukkomano ciindi bukkale bwesu nobwacinca, alimwi akutupa kusyoma busolozi mbotutambula nokuba kuti tatubumvwisyi. Ncinzi cikonzya kutugwasya ciindi notwajana buyumuyumu mubuumi? Cakusaanguna, atubone nzyaakabona Zekariya, bumboni bwakuti Jehova ulabalanganya bantu bakwe. Mpoonya, amucite zintu nzyomubona kwiinda mukuzumanana kusyoma Jehova alimwi akuzumanana kumukomba amoyo wanu woonse. (Mt. 22:37) Ikuti twacita oobo, Jehova uyootugwasya kumubelekela mane kukabe kutamani.—Kol. 1:10, 11.