1. Ncinzi ncobayanda bazyali kujatikizya bana babo?

 NOBAZYALI, tulizyi kuti mulayanda kugwasya bana banu kumuzyiba Jehova alimwi akumuyanda. Pele Leza talibonyi. Aboobo, mbuti mbomukonzya kugwasya bana banu kubona Leza kuba muntu mwini-mwini alimwi akuba acilongwe ciyumu anguwe?—Jak. 4:8.

2. Mbuti bazyali mbobakonzya kuyiisya bana babo kujatikizya bube bwa Jehova?

² Nzila iiyandika kapati yakugwasya bana kuba acilongwe ciyumu a Jehova nkwiinda mukubayiisya Bbaibbele. (2Tim. 3:14-17) Nokuba boobo, Bbaibbele lilaamba nzila aimbi iikonzya kugwasya bana kwiiya bube bwa Jehova. Kubbuku lya Tusimpi, kweelede kuti muzyali wakali kuyeezya mwanaakwe kuzumanana kuyeeya bube bwa Jehova bwalo bulibonya muzilenge. (Tus. 3:19-21) Tulabandika nzila zimwi bazyali mbobakonzya kubelesya zilenge kuyiisya bana babo kujatikizya bube bwa Jehova.

3. Ncinzi bazyali ncobeelede kugwasya bana babo?

³ Bbaibbele lyaamba kuti “bube bwakwe butalibonyi bulalibonya caantangalala kuzwa ciindi naakalenga nyika kuyakumbele, nkaambo bulabonwa muzintu nzyalengede.” (Rom. 1:20) Nobazyali, kweelede kuti mulakukkomanina kujana ciindi cakweendeenda abana banu. Aboobo amucibelesye ciindi eeco, kugwasya bana banu kubona bube bwa Jehova bukkomanisya  kapati mbobweendelana ‘azintu nzyalengede.’ Lino atubone bazyali ncobakonzya kwiiya kuzwa kucikozyanyo ca Jesu.

4. Ino Jesu wakazibelesya buti zilenge kuyiisya basikwiiya bakwe? (Luka 12:24, 27-30)

⁴ Amubone Jesu mbwaakabelesya zilenge mukuyiisya. Aciindi cimwi, wakalomba basikwiiya bakwe kulanga bacikwangala amaluba-luba. (Amubale Luka 12:24, 27-30.) Jesu wakali kukonzya kubelesya cilenge naa cisyango cimbi cili coonse, pele wakasala kubelesya bayuni amaluba-luba, izintu nzyobakazyi kabotu basikwiiya bakwe. Kweelede kuti bakali kubabona bacikwangala kabauluka alimwi amaluba-luba kaatalika kulibonya. Amweezeezye kuti mulimubwene Jesu katondeka zintu eezyi ciindi naambaula. Ncinzi ncaakacita naakamana kwaamba zikozyanyo eezyi? Wakayiisya basikwiiya bakwe ciiyo ciyandika kapati kujatikizya bwaabi alimwi aluzyalo ndwajisi Usyi wabo wakujulu: Jehova uyoobasanina akubasamika babelesi bakwe basyomeka mbubwenya mbwacita kuli bacikwangala alimwi amaluba-luba aamusyokwe.

5. Mbuti bazyali mbobakonzya kubelesya zilenge kuyiisya bana babo kujatikizya Jehova?

⁵ Nobazyali, mbuti mbomukonzya kumwiiya Jesu ciindi nomuyiisya bana banu? Mweelede kubaambila zilenge zimukkomanisya nywebo, mbuli munyama ngomuyandisya naa cisyango. Nomucita oobo, amubaambile cilenge eeco ncocituyiisya kujatikizya Jehova. Mpoonya mulakonzya kubalomba kuti abalo bamwaambile munyama ngobakkomanina naa cisyango. Kweelede kuti bayoogwasyigwa kapati ciindi nomubayiisya bube bwa Jehova kwiinda mukubelesya cilenge ncobakkomanina kapati.

6. Ncinzi ncotukonzya kwiiya kucikozyanyo camuzyali waba Christopher?

⁶ Sena bazyali beelede kutola ciindi cinji kuvwuntauzya kujatikizya munyama umwi naa cisyango, kabatanabandika abana babo ncotwiiya kucilenge eeco kujatikizya bube bwa Jehova? Kutali lyoonse. Jesu tanaakapa bupanduluzi bulamfwu kujatikizya bacikwangala mbobalya naa mbwaakomena maluba-luba. Nokuba kuti bana banu inga kabayanda kuzyiba zinji kujatikizya zilenge zya Jehova, zimwi ziindi kubaambila buyo makani masyoonto inga kwabagwasya kukamvwisya kaambo. Amumvwe ncaakaamba mukwesu wazina lya Christopher: “Bamaama bakali kwaamba twaambo tutakatazyi kumvwa kujatikizya zilenge zyakatuzungulukide. Mucikozyanyo, kuti twasika afwaafwi amalundu bakali kwaamba kuti: ‘Amubone mbwaali mapati ambwaali mabotu malundu aalya! Jehova ulaanguzu zigambya, tee kayi?’ Naa ciindi notwasika munsi alwaanje, bakali kwaamba kuti: ‘Amubone nguzu nzyaajisi mayuwe aalya! Zyoonse eezyi ninguzu zya Leza, tee kayi?’” Ba Christopher bakayungizya kuti: “Ikwaamba twaambo munzila eeyi, kwakatugwasya kapati.”

7. Mbuti mbomukonzya kuyiisya bana banu kuzibikkila maano zilenge?

⁷ Ciindi bana banu nobayaabukomena, mulakonzya kubayiisya kutalika kuziyeeyesya kapati zilenge akubona ncozikonzya kubayiisya kujatikizya bube bwa Jehova. Mulakonzya kubandika kujatikizya cilenge cimwi akubabuzya kuti, “Ino eeci cimuyiisya nzi kujatikizya Jehova?” Mulakonzya kugambwa kumvwa mbobayeeya.—Mt. 21:16.

8. Ncoolwe nzi ncobakajisi bazyali bana Israyeli ciindi nobakali kweenda “munzila”?

⁸ Bazyali bana Israyeli bakalaililwa kuyiisya bana babo milawo ya Jehova ciindi nobakali kweenda “munzila.” (Dt. 11:19) Mu Israyeli nzila zyakali kwiinda musyokwe. Aboobo cakali cuuba-uba kubona banyama baindene-indene, bayuni alimwi amaluba. Ciindi mikwasyi  yabana Israyeli noyakali kweenda munzila, kweelede kuti bazyali bakali kubaambila bana babo kujatikizya zilenge zya Jehova. Andinywe nobazyali mulijisi coolwe cakuyiisya bana banu kubelesya zilenge. Amubone bazyali bamwi mbobacita oobo.

9. Ncinzi ncotukonzya kwiiya kumucizyi Punitha alimwi amucizyi Katya?

⁹ Muzyali wazina lyakuti Punitha, uukkala mudolopo pati ku India wakaamba kuti: “Ciindi notuswaya banamukwasyi bakkala kumunzi, tucibona kuba coolwe cakuyiisya bana besu kujatikizya zilenge zya Jehova zikkomanisya kapati. Ndilimvwa kuti bana bangu balazimvwisya kapati zilenge ciindi nobaunka kumunzi kwiinda ciindi nobali mudolopo.” Nobazyali, bana banu kunyina nobakonzya kwaaluba masena aali boobu. Mucizyi Katya waku Moldova wakaamba kuti: “Zintu nzyondiyeeya kapati zyakubwana, mazuba aalya notwakali kuswaya kumunzi abazyali bangu. Ndilabalumba kapati akaambo kakundiyiisya kuzwa kubwana ikulangilila zilenge zya Jehova alimwi akubona bube bwakwe kwiinda muzintu nzyaakalenga.”

10. Ncinzi ncobakonzya kucita bazyali kuti kabatakonzyi kuyooswaya kumunzi? (Amubone kabbokesi kakuti “ Lugwasyo Kubazyali.”)

¹⁰ Mbuti kuti kacitakonzyeki kulindinywe kuyooswaya kumunzi? Mukwesu wazina lya Amol uukkala ku India, wakaamba kuti: “Kubusena nkondikkala bazyali beelede kubeleka mawoola manji, alimwi ciladula kuunka kumunzi. Nokuba boobo, mulakonzya kweebelelela zilenge zya Jehova alimwi akubandika kujatikizya bube bwakwe ciindi nomuli mukapaakki naa nomuli aŋanda.” Kuti mwalanga cakubikkila maano, mulakonzya kujana zilenge zinji nzyomukonzya kuyiisya bana banu naaba afwaafwi aŋanda yanu. (Int. 104:24) Mulakonzya kubona zilenge mbuli bayuni, zyuuka, zisyango alimwi azimwi buyo. Ba Karina ibakkala ku Germany bakaamba kuti: “Bamaama balaayanda kapati maluba,  aboobo ciindi nondakacili mwana bakali kunditondezya maluba manji notwakali kweendeenda.” Nobazyali, cibelesyo acimbi ncomukonzya kubelesya kuyiisya bana banu, mavidiyo aamba zilenge alimwi amabbuku amwaigwa ambunga yesu. Kufwumbwa kubusena nkomukkala, mulakonzya kugwasya bana banu kulangilila zilenge zya Leza. Lino amuleke tubandike bube bumwi mbwajisi Jehova mbomukonzya kuyiisya bana banu.

11. Mbuti bazyali mbobakonzya kugwasya bana babo kubona luyando ndwajisi Jehova?

¹¹ Kutegwa mugwasye bana banu kubona luyando ndwajisi Jehova, mulakonzya kwaamba kujatikizya zilenge zimwi mbozibalanganya caluyando bana banzizyo. (Mt. 23:37) Alimwi mulakonzya kubaambila zilenge ziindene-indene zikkomanisya. Ba Karina ibaambidwe kale bakaamba kuti: “Ciindi notwakali kukweendeenda, bamaama bakali kundikulwaizya kwiima akulanga duba limwi alimwi mbolilibedelede akweebeka ikutondezya luyando ndwajisi Jehova. Kwainda myaka minji, pele naaba mazuba aano ndicaabikkila maano kapati maluba alimwi ndilabona mbwayindene-indene, amibala iisiyene-siyene njaajisi. Lyoonse inga andiyeezya Jehova mbwatuyanda kapati.”

12. Mbuti bazyali mbobakonzya kugwasya bana babo kubona busongo mbwajisi Jehova? (Intembauzyo 139:14) (Amubone acifwanikiso.)

¹² Amubagwasye bana banu kubona busongo mbwajisi Leza. Jehova musongo kapati kwiinda ndiswe. (Rom. 11:33) Mucikozyanyo, mulakonzya kwaambila bana banu maanzi mbwaanyamuka kuunka mujulu kupanga makumbi alimwi amakumbi aayo mbwaawisya maanzi mumasena aayindene-indene kakunyina buyumuyumu. (Job. 38:36, 37) Alimwi mulakonzya kubaambila mubili wesu mboupangidwe munzila mbotu kapati. (Amubale Intembauzyo 139:14.) Amubone muzyali wazina lyakuti Vladimir mbwaakacita oobo. Wakaamba kuti: “Bumwi buzuba mwaneesu wakawa ancinga yakwe akulicisa. Nokwakainda buyo mazuba masyoonto, cilonda cakapona. Mpoonya mebo abakaintu bangu twakamupandulwida kuti Jehova wakalenga mibili yesu munzila yakuti kaikonzya kulibambulula. Alimwi twakamwaambila kuti zintu nzyobapanga bantu tazikonzyi kucita boobu. Mucikozyanyo, moota kunyina noilibambulula kuti naa yacita ntenda. Eeci cakamugwasya  mwaneesu kumvwisya busongo mbwajisi Jehova.”

13. Mbuti bazyali mbobakonzya kugwasya bana babo kubona nguzu nzyajisi Leza? (Isaya 40:26)

¹³ Jehova ututamba kuti tulungumane kujulu akubona nguzu zyakwe zigambya mbozipa kuti nyenyeezi zyoonse kazili abusena bwanzizyo. (Amubale Isaya 40:26.) Mulakonzya kubakulwaizya bana banu kulanga kujulu akuzinzibala kuyeeya zintu nzyobabona. Amubone mucizyi umwi waku Taiwan ncayeeya kujatikizya ciindi naakacili mwana. Wakaamba kuti: “Bumwi buzuba twakaunka kubusena bumwi abamaama, kwalo nkotwakali kukonzya kubona nyenyeezi masiku kakunyina kunyonganizyigwa amalaiti. Aciindi aawa, ndakalilibilikide kuti naa inga ndacikonzya kuzumanana kusyomeka kuli Jehova nkaambo basicikoloma bakali kundikulwaizya kucita zintu izyakali kukonzya kupa kuti ndileke kumvwida Jehova. Bamaama bakandikulwaizya kuzinzibala kuyeeya nguzu nzyaakabelesya Jehova kulenga nyenyeezi zyoonse akuti ulakonzya kubelesya nguzu nzyoonya eezyi, kundigwasya kuzunda masunko aali woonse ngondikonzya kujana. Nondakamana kulangilila zilenge kubusena oobu, ndakayandisisya kumuzyiba kabotu Jehova alimwi akuyanda kumubelekela.”

14. Mbuti bazyali mbobakonzya kubelesya zilenge kugwasya bana babo kubona kuti Jehova ngu Leza uukkomene?

¹⁴ Zilenge zya Jehova zitondezya kuti ulikkomene alimwi uyanda kuti andiswe katukkomene. Basayaansi bakabona kuti bunji bwabanyama balasobana, kubikkilizya abayuni alimwi answi. (Job. 40:20) Sena kuli ciindi bana banu nobakaseka kubona munyama uusobana? Ambweni bakabona kale kana kakkiti kakasobanya cintu cimwi naa twana twamubwa katusobana. Ciindi mwaakubona bana banu kabaseka akaambo kakubona ncacita munyama umwi, mulakonzya kubaambila kuti tubelekela Leza uukkomene.—1Tim. 1:11.

15. Ncinzi cikonzya kubagwasya bazyali kuzyiba nzyobayeeya bana babo? (Tusimpi 20:5) (Amubone acifwanikiso.)

¹⁵ Zimwi ziindi, bazyali cilabayumina kupa kuti bana babo baanguluke kwaamba mapenzi  ngobajana. Ikuti oobu mbocibede kulindinywe, inga mwayandika kujana nzila yakuzyiba izili mumizeezo yabana banu. (Amubale Tusimpi 20:5.) Bazyali bamwi babona kuti cilagwasya kucita boobo ciindi nobalangilila zilenge abana babo. Nkaambo nzi? Kaambo kamwi nkakuti bazyali alimwi abana inga banyina zintu zinji zibanyonganya. Muzyali umwi uukkala ku Taiwan wazina lya Masahiko wakaamba akambi kaambo. Wakaamba kuti: “Ciindi notujana ciindi cakweendeenda abana besu, mbuli kutanta malundu naa kweendeenda kunkomwe, kanji-kanji inga cibapa kulikwaya. Aboobo, eeci cilatugwasya kubapa kwaanguluka kutegwa batwaambile nzyobayeeya.” Mucizyi Katya, iwaambidwe kale wakaamba kuti: “Ndazwa kucikolo, kanji-kanji bamaama bakali kunditola kukweendeenda mupaakki mbotu kapati. Okuya, ndakali kwaanguluka kubaambila zyacitika kucikolo alimwi azintu zyakali kundipa kulibilika.”

16. Mbuti banamukwasyi mbobakonzya kugwasyigwa kwiinda mukweebelela zilenge zya Jehova?

¹⁶ Ciindi banamukwasyi nobalangilila zilenge zya Jehova antoomwe balakonzya kukatalukwa akukkomana. Alimwi eeci cilakonzya kubapa kuyandana kapati. Bbaibbele lyaamba kuti kuli “ciindi cakuseka” alimwi “aciindi cakujintauka.” (Muk. 3:1, 4, bupanduluzi buyungizyidwe) Jehova wakalenga masena mabotu kapati aano anyika kwalo nkotukonzya kucitila zintu nzyotukkomanina. Bunji bwamikwasyi ilakkomana kuunka antoomwe kuyakweendeenda mupaakki, kumunzi naa mumasena aamwi aayebeka. Bana bamwi balakukkomanina kusobana mupaakki, kweebela banyama, kudwaya mumulonga, mulwizi naa mulwaanje. Eelo kaka kuli zyoolwe zinji zyakweebelela zintu nzyaakalenga Jehova!

17. Nkaambo nzi bazyali ncobeelede kuyiisya bana babo kuzikkomanina zilenge zya Leza?

¹⁷ Munyika mpya ya Leza, bazyali abana bayoozikkomanina kapati zilenge zya Jehova kwiinda mbobazikkomanina mazuba aano. Aciindi eeco, tatunoobayoowi banyama alimwi abalo tabanootuyoowi pe. (Is. 11:6-9) Tuyoozumanana kuzikkomanina zilenge zya Jehova mane kukabe kutamani. (Int. 22:26) Pele nobazyali, tamweelede kulindila ciindi eeco kuti ndendilyo nomuyootalika kuyiisya bana banu kujatikizya zilenge. Ciindi nomubelesya zilenge kuyiisya bana banu kujatikizya Jehova, balalangilwa kwaazumina majwi ngaakaamba Mwami Davida aakuti: “O Jehova, taakwe milimo iili mbuli yako.”—Int. 86:8.