CIBALO CAKWIIYA 14
“Eeci Nceciyoozyibya Bantu Boonse Kuti Muli Basikwiiya Bangu”
“Eeci nceciyoozyibya bantu boonse kuti muli basikwiiya bangu, ikuti kamujisi luyando akati kanu.”—JOH. 13:35.
LWIIMBO 106 Amube Aluyando
IZILI MUCIBALO a
Ino bantu banji batali Bakamboni balimvwa buti ciindi nobabona luyando luli akati kabantu ba Jehova? (Amubone muncali 1)
1. Ncinzi ncobabona bantu banji nobaboola kumiswaangano yesu ciindi cakusaanguna? (Amubone acifwanikiso.)
AMWEEZEEZYE kuti banabukwetene bamwi baboola kumuswaangano ciindi cakusaanguna ku Ŋanda ya Bwami ya Bakamboni ba Jehova. Banabukwetene aaba bakkomana kapati kubona mbobatambulwa camaanza obilo alimwi akubona bakwesu abacizyi mbobatondezyanya luyando. Ciindi nobayaabupiluka kuŋanda, mukaintu waambila mulumaakwe kuti, ‘Bantu aaba baliindene kapati abantu bamwi, ndakkomana kapati kuyanzana ambabo.’
2. Nkaambo nzi bamwi ncobaleka kubelekela Jehova?
2 Luyando luli akati kabantu ba Jehova lulilibedelede. Bwini mbwakuti, abalo Bakamboni ba Jehova mbantu batalondokede. (1Joh. 1:8) Aboobo, mbotuyaabubazyiba kabotu aabo bali mumbungano, tulakonzya kutalika kubona tumpenda tumwi ntobajisi. (Rom. 3:23) Pele cuusisya ncakuti, bamwi balekela kutalondoka kwabamwi kubapa kuleka kubelekela Jehova.
3. Ncinzi cibazyibya basikutobela Jesu bakasimpe? (Johane 13:34, 35)
3 Amululange alimwi lugwalo aayeeme mutwe wacibalo eeci. (Amubale Johane 13:34, 35.) Ino bantu inga babazyiba buti basikutobela Kristo bakasimpe? Nkwiinda mukubona luyando ndobajisi, ikutali kulondoka. Alimwi amubone kuti Jesu tanaakaamba kuti: ‘Eeci nceciyoomuzyibya nywebo kuti muli basikwiiya bangu.’ Pele wakaamba kuti: “Eeci nceciyoozyibya bantu boonse kuti muli basikwiiya bangu.” Aboobo Jesu wakatondezya kuti, tabali basikumutobela balikke ibakali kuyoobazyiba basikumutobela bakasimpe akaambo kaluyando lwini-lwini ndobatondezyanya, pele abaabo ibatali mumbungano ya Bunakristo bakali kuyoobazyiba.
4. Ncinzi bamwi ncobanga bayanda kuzyiba kujatikizya Banakristo bakasimpe?
4 Bantu bamwi batali Bakamboni ba Jehova balakonzya kulibuzya kuti: ‘Ino luyando inga lwatugwasya buti kubazyiba basikutobela Jesu bakasimpe? Mbuti Jesu mbwaakatondezya luyando kubaapostolo bakwe? Ino inga cakonzyeka buti kwiiya cikozyanyo ca Jesu mazuba aano?’ Aboobo Tobakamboni tuyandika kuzinzibala kuyeeya bwiinguzi bwamibuzyo eeyi. Kucita boobu kulakonzya kutugwasya kuyaambele mukutondezya luyando, kwaambisya ciindi bamwi nobatulubizyila akaambo kakutalondoka.—Ef. 5:2.
NDUYANDO LULI BUTI ILUZYIBYA BASIKUTOBELA JESU BAKASIMPE?
5. Amupandulule ncaamba majwi aa Jesu aali ku Johane 15:12, 13.
5 Cakusalazya, Jesu wakaamba kuti basikumutobela bakali kuyoozyibwa kwiinda mukutondezyanya luyando lwaalubazu. (Amubale Johane 15:12, 13.) Amubone kuti Jesu wakabalailila kuti: ‘Amuyandane mbubonya mbondali kumuyanda nywebo.’ Ino eeci caamba nzi? Kweelana ambwaakapandulula Jesu, eeci caamba kuyanda bamwi kwiinda mbotuliyanda tobeni, naa kuba aluyando lukonzya kupa Munakristo kufwida musyominyina ikuti kwayandika. b
6. Mbuti Jwi lya Leza mbolitondezya kuti luyando mbube buyandika kapati?
6 Jwi lya Leza lituyiisya kuti luyando mbube buyandika kapati. Mucikozyanyo, bunji bwabantu balaayandisya kapati magwalo aaya aatobela: “Leza nduyando.” (1Joh. 4:8) “Weelede kuyanda simukobonyoko mbubonya mbuli mboliyanda omwini.” (Mt. 22:39) “Luyando lulavwumba zibi zinji kapati.” (1Pet. 4:8) “Luyando talumani.” (1Kor. 13:8) Magwalo aaya alimwi aamwi alatondezya kuti cilayandika kapati kutondezya bube oobu butaliboteli.
7. Nkaambo nzi Saatani ncatakonzyi kupa kuti bantu bakamantane akuyandana?
7 Bantu banji balakonzya kulibuzya kuti: ‘Ino inga ndacizyiba buti cikombelo cakasimpe? Kayi zyoonse zyaamba kuti ziyiisya kasimpe, pele acimwi ciyiisya zintu ziindene kujatikizya Leza.’ Saatani wapa kuti kube zikombelo zinji zyakubeja calo capa kuti cibakatazye bantu kuzyiba cikombelo cakasimpe. Pele takonzyi kupa kuti bantu bazwa munyika yoonse bakamantane akutondezyanya luyando. Alikke Jehova nguukonzya kucita boobo. Tulizyi oobo akaambo kakuti luyando luzwa kuli Jehova. Alimwi balikke aabo bajisi muuya wakwe akulongezyegwa anguwe mbobakonzya kuba aluyando lwini-lwini akati kabo. (1Joh. 4:7) Nkakaambo kaako Jesu wakaamba kuti balikke basikumutobela bakasimpe mbobatondezya luyando lwini-lwini.
8-9. Ino bantu banji bajatikizyigwa buti nobabona luyando luli akati ka Bakamboni ba Jehova?
8 Kweelana ambwaakasinsima Jesu, bantu banji bacikonzya kubazyiba basikumutobela bakasimpe akaambo kaluyando ndobatondezyanya. Mucikozyanyo, mukwesu wazina lya Ian ulayeeya ciindi cakusaanguna naakajanika kumuswaangano wacooko, walo iwakacitilwa musitediyamu iyakali afwaafwi aŋanda yakwe. Kwakaindide buyo myezi misyoonto kuzwa ciindi ba Ian nobakaunkide kusitediyamu eeyi kuyakweebelela bbola. Bakaamba kuti: “Eelo kaka bantu mbondakabona kumuswaangano ooyu bakaliindene kapati abantu bakali kweebelela bbola. Bakamboni bakajisi bulemu, bakasamide kabotu alimwi abalo bana babo bakali kulilemeka kabotu.” Bakayungizya kwaamba kuti: “Kwiinda zyoonse, bantu aaba bakali kulibonya kukkutila akuba aluumuno, icintu ncondakali kuyanda kapati. Kunyina makani aali woonse ngondiyeeyede aakapegwa buzuba buya, pele bukkale bwa Bakamboni bwakandikkomanisya kapati.” c Bukkale oobu bulaboola akaambo kakuba aluyando lwini-lwini akati kesu. Akaambo kakuti tulabayanda bakwesu abacizyi, tulabeendelezya caluzyalo akubapa bulemu.
9 Mukwesu uumbi wazina lya John awalo mbwaakalimvwa oobo ciindi naakatalika kujanika kumiswaangano yambungano. Wakaamba kuti: “Ndakagambwa amuuya wabulongwe alimwi a zyeelelo zisumpukide nzyobatobela, bakali bantu bali kabotu, ibayoowa Leza. Luyando lwabo lwini-lwini lwakandipa kusinizya kuti ndacijana cikombelo cakasimpe.” d Zyakuluula zili boobu zitondezya kuti bantu ba Jehova mba Banakristo bakasimpe.
10. Ndilili notukonzya kutondezya luyando lwa Bunakristo? (Amubone abupanduluzi buyungizyidwe.)
10 Kweelana ambotwabona kale kumatalikilo, boonse basyomima tabalondokede. Zimwi ziindi, balakonzya kwaamba naa kucita zintu zikonzya kutunyemya. e (Jak. 3:2) Ciindi bamwi nobatulubizyila, tulakonzya kutondezya luyando lwa Bunakristo kwiinda muzintu nzyotwaamba akucita. Aboobo ncinzi ncotukonzya kwiiya kucikozyanyo ca Jesu?—Joh. 13:15.
INO JESU WAKALUTONDEZYA BUTI LUYANDO KUBAAPOSTOLO BAKWE?
Jesu wakabeendelezya caluyando baapostolo bakwe ciindi nobakatondezya bube butali kabotu (Amubone muncali 11-13)
11. Mbube nzi butali kabotu mbwaakatondezya Jakobo a Johane? (Amubone acifwanikiso.)
11 Jesu tanaakali kulangila kuti basikumutobela banoocita zintu cakulondoka. Muciindi caboobo, caluyando wakabagwasya kubambulula bube bwabo kutegwa Jehova abakkomanine. Aciindi cimwi, baapostolo bakwe bobilo, Jakobo a Johane bakaambila banyina kulomba Jesu kuti akabape zyuuno zyaatala mu Bwami. (Mt. 20:20, 21) Kwiinda mukucita boobu, Jakobo a Johane bakatondezya bube bwakulisumpula akulibona kuti bakali kuyandika kapati kwiinda bamwi.—Tus. 16:18.
12. Sena Jakobo a Johane mbombabo balikke ibakatondezya bube butali kabotu? Amupandulule.
12 Jakobo a Johane tabali mbabo balikke ibakatondezya bube butali kabotu aciindi aawa. Amubone mbobakacita baapostolo bambi: “Lino aaba bambi bali kkumi nobakaamvwa makani aaya, bakabanyemena ibabunyina bobilo aaba.” (Mt. 20:24) Inga tweezyeezya kuzwangana kutaambiki ikwakaliko akati ka Jakobo a Johane abaapostolonyina bambi. Ambweni bamwi bakali kwaamba majwi mbuli aakuti: ‘Nywebo muyeeya kuti mulayandika kapati kwiinda ndiswe ncomwalombela zyuuno zyaatala mu Bwami. Toonse twabeleka canguzu a Jesu, tamuli ndinywe nyolikke. Andiswe tuleelela kupegwa zyuuno zyaatala mbubwenya mbuli ndinywe!’ Kufwumbwa mbocakabede, aciindi aawa baapostolo bakalekela bukkale oobu kunyonganya luyando lwabunyina ndobakajisi.
13. Ino Jesu wakacita buti ciindi baapostolo bakwe nobakali kulubizya? (Matayo 20:25-28)
13 Ino Jesu wakabweendelezya buti bukkale oobu? Kunyina naakanyema pe. Alimwi tanaakaamba kuti ulayandaula buyo baapostolo bambi ibali kabotu, balicesya alimwi ibanooyandana lyoonse. Muciindi caboobo, Jesu wakabandika abaapostolo bakwe cakukkazika moyo nkaambo wakalizyi kuti bakali kuyanda kucita ciluzi. (Amubale Matayo 20:25-28.) Wakazumanana kubeendelezya caluyando nokuba kuti cakwiinduluka-induluka bakali kuzwangana kujatikizya wakali mupati akati kabo.—Mk. 9:34; Lk. 22:24.
14. Ino baapostolo ba Jesu bakakomenena mubukkale buli buti?
14 Cakutadooneka, Jesu wakaabikkila maano makani aajatikizya mbobakakomezyegwa baapostolo bakwe. (Joh. 2:24, 25) Bakakomenena mumasena basololi bazikombelo mobakali kukankaizya kapati kuba ampuwo alimwi azyuuno zyaatala. (Mt. 23:6; amweezyanisye acibalo cakuti “Kucikombelo—Nkwaakali Kukambaukila Jesu Abasikwiiya Bakwe,” mu Ngazi Yamulindizi yamu April 1, 2010 peeji 16-18.) Kuyungizya waawo, basololi aaba bakali kuyeeya kuti bakali kuyandika kapati kwiinda bamwi. f (Lk. 18:9-12) Jesu wakalizyi kuti kuyeeya kuli boobu nkokwakapa kuti baapostolo bakwe abalo kabalibona munzila eeyo. (Tus. 19:11) Tanakali kulangila kuti basikwiiya bakwe banoocita zintu munzila iilondokede alimwi wakali kubakkazikila moyo ciindi nobakali kulubizya. Wakalizyi kuti bakali kuyanda kucita zintu zili kabotu. Aboobo cakukkazika moyo wakabayiisya kuba bantu balicesya akutondezya luyando kuli bamwi muciindi cakuyanda kuba mupati.
MBUTI MBOTUKONZYA KWIIYA CIKOZYANYO CA JESU?
15. Ncinzi ncotukonzya kwiiya kumakani aajatikizya Jakobo a Johane?
15 Kuli ziiyo zinji nzyotukonzya kwiiya kumakani aajatikizya Jakobo a Johane. Masimpe kuti bakalubizya kulomba zyuuno zyaatala mu Bwami. Pele abalo baapostolo bamwi bakalubizya kulekela makani aaya kunyonganya lukamantano lwabo. Nokuba boobo, Jesu wakabeendelezya caluyando baapostolo bakwe boonse bali 12. Ncinzi ncotwiiya? Twiiya kuti mbotucita zintu ciindi bamwi nobalubizya aalo makani mapati, ikutali buyo kulubizya kwabo. Ncinzi cikonzya kutugwasya? Ciindi naatunyemya musyomima, tulakonzya kulibuzya kuti: ‘Nkaambo nzi ncondanyema kapati akaambo kacintu ncaacita? Sena catondezya bube bumwi butali kabotu mbondeelede kuleka? Sena kuli penzi limwi ndyalwana? Nokuba kuti kuli kaambo kamvwika keelede kundipa kunyema, sena inga ndatondezya luyando akumulekelela?’ Ciindi notutondezya luyando kuli bamwi, tutondezya kuti tuli basikutobela Jesu bakasimpe.
16. Nciiyo nzi cimbi ncotukonzya kwiiya kucikozyanyo ca Jesu?
16 Cikozyanyo ca Jesu alimwi cituyiisya kuti tweelede kusolekesya kubamvwisya basyomima. (Tus. 20:5) Masimpe kuti walo Jesu ulakonzya kuzyiba zili mumoyo, swebo tatukonzyi. Pele tulakonzya kusola kubakkazikila moyo bakwesu abacizyi ciindi nobatulubizyila. (Ef. 4:1, 2; 1Pet. 3:8) Ncuuba-uba kucita boobo ikuti naa twabazyiba kabotu. Amubone cikozyanyo citobela.
17. Ino mulangizi wabbazu umwi wakagwasyigwa buti akaambo kakumuzyiba kabotu musyominyina umwi?
17 Mulangizi wabbazu umwi uubelekela ku East Africa ulamuyeeya mukwesu umwi ngwaakali kubona kuti tali siluzyalo. Ino mulangizi wabbazu ooyu wakacita buti? Wakaamba kuti: “Muciindi cakutalika kumutantamuka mukwesu ooyu, ndakayanda kumuzyiba kabotu.” Ciindi mulangizi wabbazu naakatalika kuyanzana amukwesu ooyu, wakazyiba zintu zimwi zijatikizya mbwaakakomezyegwa, zyalo izyakacinca bube bwakwe. Mulangizi wabbazu wakazumanana kwaamba kuti: “Nondakazyiba mbocakali ciyumu kumukwesu ooyu kucinca kutegwa kamvwana abantu alimwi akusolekesya nkwaakali kucita, ndakakkomana kapati. Twakaba balongwe.” Masimpe, kuti twasolekesya kubamvwisya bakwesu abacizyi, kanji-kanji cilakonzya kutuubila kubatondezya luyando.
18. Ikuti naa musyomima umwi watunyemya, mibuzyo nzi njotweelede kulibuzya? (Tusimpi 26:20)
18 Zimwi ziindi tulakonzya kulimvwa kuti tuyandika kubandika amusyomima umwi watunyemya. Pele inga cabota kusaanguna kulibuzya mibuzyo mbuli yakuti: ‘Sena ndilicizyi cini cakacitika?’ (Tus. 18:13) ‘Sena mubwini wakacita caali kutegwa andinyemye?’ (Muk. 7:20) ‘Sena andime kuli nondakacitide kale cintu cili boobu?’ (Muk. 7:21, 22) ‘Sena kubandika amuntu ooyu inga kwapa kuti penzi liindile buya?’ (Amubale Tusimpi 26:20.) Kuzinzibala kuyeeya mibuzyo iili boobu, kulakonzya kutugwasya kusala kuciluba buyo cintu eeco cakacitika akaambo kaluyando ndotujisi kumusyomima.
19. Makanze nzi ngotweelede kuba angayo?
19 Bakamboni ba Jehova balatondezya kuti mbaasikwiiya ba Jesu bakasimpe kwiinda mukutondezyanya luyando. Umwi aumwi wesu ulatondezya kuti ngusikutobela Jesu wakasimpe ciindi natondezya luyando lwini-lwini kubakwesu abacizyi nokuba kuti balalubizya. Kwiinda mukucita boobo, tulakonzya kugwasya bamwi kucizyiba cikombelo cakasimpe akutusangana mukukomba Jehova, Leza siluyando. Aboobo aabe makanze eesu aakuzumanana kutondezya luyando lwalo ilutuzyibya kuti tuli Banakristo bakasimpe.
LWIIMBO 17 “Ndilayanda”
a Bantu banji balakwelelezyegwa kukasimpe akaambo kakubona luyando lwini-lwini ndotujisi akati kesu. Pele zimwi ziindi tacili cuuba-uba kutondezyanya luyando akaambo kakuti tatulondokede. Atubone kaambo luyando ncoluyandika kapati alimwi ambotukonzya kwiiya cikozyanyo ca Jesu ciindi bamwi nobalubizya.
b Amubone bbuku lyamu Cikuwa lyakuti “Come Be My Follower,” cibalo 17, munc. 10-11.
c Amuunke a jw.org akulemba kuti “Lino Ndijisi Buumi Bulaampindu,” mukabbokesi kakuyandawida kutegwa mucibale cibalo eeci.
d Amuunke a jw.org akulemba kuti “Buumi Bwangu Bwakali Kulibonya Kubota,” mukabbokesi kakuyandawida kutegwa mucibale cibalo eeci.
e Cibalo eeci tacaambi makani aajatikizya zibi zipati izyeelede kulanganizyigwa abaalu, mbuli zeezyo nzyaambidwe ku 1 Bakorinto 6:9, 10.
f Mukuya kwaciindi musololi wacikombelo umwi mu Juda wakaamba kuti: “Munyika, kuli bamaalumi babalilwa ku 30 baluleme mbubwenya mbuli Abrahamu. Ikuti naa bali buyo 30, nkokuti mebo amwanaangu tuli akati kabo; ikuti naa bali 10, mebo amwanaangu tuli akati kabo; naa bali 5, mebo amwanaangu tuli akati kabo; ikuti naa bali bobilo, nkokuti ndime amwanaangu; pele kuti naa kuli buyo omwe, nkokuti ndime.”
