1-2. Ncinzi cicitika kanji-kanji ciindi bantu nobabbapatizyigwa, alimwi ncinzi ncotutiibandike lino?

 SENA kuli ciindi nomwakabona kale nkamu yabantu baya kukubbapatizyigwa? Kweelede kuti mwakabamvwa kabaingula cakusinizya kumibuzyo yobilo iibuzyigwa kabatanabbapatizyigwa. Mwakabona banamukwasyi alimwi abalongwe babo mbobakakkomene. Ciindi basikubbapatizyigwa nobakazwa mumeenda, mwakamvwa bantu kabakambilila alimwi akubabona kabaile kumweta-mweta. Nsondo ansondo, bantu banji kapati balalyaaba akuba Bakamboni ba Jehova Leza kwiinda mukubbapatizyigwa.

² Ino mbuti kujatikizya ndinywe? Sena mwakabbapatizyigwa kale naa mujisi makanze aakubbapatizyigwa? Kuti kacili boobo, muli bantu baalubazu munyika eeyi mbyaabi nkaambo ‘muyandaula Jehova.’ (Int. 14:1, 2) Cibalo eeci cakalembelwa ndinywe, tacikwe makani muli bana naa muli bapati. Pele andiswe notwakabbapatizyigwa kale, tuyandika kuyumya makanze eesu aakubelekela Jehova lyoonse mane kukabe kutamani. Lino atubandike twaambo totatwe tuyandika kapati ncotweelede kubelekela Jehova.

3. Nkaambo nzi bantu ba Jehova ncobakayandisya kasimpe abululami? (Intembauzyo 119:128, 163)

³ Jehova wakalailila bantu bakwe ‘kukayandisya kasimpe.’ (Zek. 8:19) Mpoonya Jesu wakalailila basikumutobela kuyandisya bululami. (Mt. 5:6) Eeci caamba kuti muntu weelede kuyandisya kucita cintu ciluleme, cibotu alimwi cisalala mumeso a Leza. Sena mulakayanda kasimpe alimwi abululami? Tuli masimpe kuti mulacita oobo. Mulabusulaika bubeji alimwi azintu zyoonse zibyaabi. (Amubale Intembauzyo 119:128, 163.) Muntu uubeja wiiya bube bwa Saatani, imweendelezi wanyika eeyi. (Joh. 8:44;  12:31) Makanze amwi ngajisi Saatani ngakubisya zina lya Jehova Leza lisalala. Kuzwa ciindi cabuzangi mu Edeni, Saatani wali kumwaya makani aakubeja kujatikizya Leza wesu. Wali kusola kupa bantu kuyeeya kuti Jehova Mweendelezi uuliyanda alimwi uutasyomeki, walo uubaima zintu zibotu bantu. (Matl. 3:1, 4, 5) Bubeji bwa Saatani bwazumanana kupa bantu kubona Jehova kuti mubi. Ciindi bantu nobasala ‘kutakayanda kasimpe,’ Saatani ulabayunga kutalika kucita zintu zibyaabi ziindene-indene.—Rom. 1:25-31.

4. Ino Jehova watondezya buti kuti ngu “Leza wakasimpe”? (Amubone acifwanikiso.)

⁴ Jehova ngu “Leza wakasimpe,” alimwi ulabayiisya kasimpe aabo bamuyanda. (Int. 31:5) Kwiinda mukucita boobo, ulabagwasya kukaka kuyungwa abubeji bwa Saatani. Alimwi ulabayiisya babelesi bakwe kuba bantu basyomeka akucita zintu ziluleme. Eeci capa kuti kabalemekwa akuba aluumuno lwamumizeezo. (Tus. 13:5, 6) Sena nywebo wamugwasya kuba bantu bali boobu ciindi nomwali kwiiya Bbaibbele? Mwakazyiba kuti nzila zya Jehova zilabagwasya bantu boonse alimwi buya andinywe kumugama. (Int. 77:13) Aboobo muyanda kucita ceeco Leza ncaamba kuti cililuleme. (Mt. 6:33) Muyanda kukazyibya kasimpe kubantu, akutondezya kuti nzyaakaamba Saatani kujatikizya Jehova Leza nzyakubeja. Pele mbuti mbomukonzya kucita boobo?

5. Mbuti mbomukonzya kukaiminina kasimpe abululami?

⁵ Mulakonzya kupona munzila iikonzya kupa bamwi kubona kuti mulabukaka bubeji bwa Saatani akuti mwiiminina kasimpe. Alimwi mulakonzya kutondezya kuti muyanda Jehova kuba Mweendelezi wanu akuti muyanda kucita ceeco ncaamba kuti cililuzi. Mbuti mbomukonzya kucita oobo? Amupaile kuli Jehova, kulyaaba kulinguwe alimwi akutondezya kulyaaba kwanu kubuleya kwiinda mukubbapatizyigwa. Kuyandisya kasimpe alimwi abululami nzintu ziyandika kapati izyeelede kumukulwaizya kubbapatizyigwa.

6. Ntwaambo nzi itujanika ku Intembauzyo 45:4 itumupa kumuyanda Jesu Kristo?

⁶ Nkaambo nzi ncomumuyanda Jesu Kristo? Amubone twaambo tumwi tubotu itujanika kulugwalo lwa Intembauzyo 45:4. (Amubale.) Jesu ulabuyanda bululami, kulicesya alimwi akasimpe. Ikuti naa mulakayanda kasimpe alimwi abululami, inga ceelela kwaamba kuti mulamuyanda awalo Jesu Kristo. Amuyeeye buyo Jesu mbwaakakaiminina  kasimpe abululami cabusicamba. (Joh. 18:37) Pele ino Jesu utuyiisya buti kuba bantu balicesya?

7. Ncinzi cimukkomanisya kujatikizya kulicesya kwa Jesu?

⁷ Jesu ulatuyiisya kuba bantu balicesya kwiinda mucikozyanyo cakwe. Mucikozyanyo, bulemu boonse ubupa kuli Bausyi, kutali kulinguwe. (Mk. 10:17, 18; Joh. 5:19) Ino kulicesya kwa Jesu ooku kumupa kulimvwa buti nywebo? Cakutadooneka kumupa kumuyanda Mwana wa Leza alimwi akumutobela. Nkaambo nzi Jesu ncalicesya? Nkaambo kakuti ulabayanda Bausyi alimwi wiiya kulicesya kwabo. (Int. 18:35; Heb. 1:3) Sena inga tiimwayanda kumwiiya Jesu, walo uubutondezya munzila iilondokede bube bwa Jehova?

8. Nkaambo nzi ncotukkomene kuti Jesu Mwami wesu?

⁸ Tulikkomene kuti Jesu Mwami wesu, nkaambo ngo Mweendelezi wiinda kubota. Jehova lwakwe kumugama ngowakamuyiisya Mwanaakwe akumusala kuba mweendelezi. (Is. 50:4, 5) Alimwi amuyeeye buyo kujatikizya luyando lwakulyaaba ndwaakatondezya Jesu. (Joh. 13:1) Mbwaanga Mwami wanu, mweelede kumuyanda. Wakaamba kuti aabo ibamuyanda ncobeni, nkokuti aabo mbaita kuti balongwe bakwe, beelede kutondezya kuti balamuyanda kwiinda mukutobela milawo yakwe. (Joh. 14:15; 15:14, 15) Eelo kaka ncoolwe cilibedelede kuba mulongwe wa Mwana wa Jehova!

9. Ino lubbapatizyo lwa Banakristo lukozyenye buti alwa Kristo?

⁹ Mulawo wa Jesu umwi ngwakuti basikumutobela beelede kubbapatizyigwa. (Mt. 28:19, 20) Walo wakatusiila cikozyanyo. Pele lubbapatizyo lwakwe, luliindene alwabasikumutobela mumbazu zimwi. (Amubone kabbokesi kakuti “ Mbolwiindene Lubbapatizyo lwa Jesu Alimwi Alwabasikumutobela.”) Nokuba boobo, mumbazu zimwi lulikozyenye. Naakabbapatizyigwa, Jesu wakalyaaba kucita kuyanda kwa Bausyi. (Heb. 10:7) Mbubwenya buyo, ciindi basikutobela Kristo nobabbapatizyigwa, balalitondezya kubuleya kuti bakalyaaba kubelekela Jehova Leza. Lino cintu ciyandika kapati mubuumi bwabo, nkucita kuyanda kwa Leza ikutali kwabo. Aboobo batobela cikozyanyo ca Simalelaabo.

10. Ntwaambo nzi itumupa kumuyanda Jesu, alimwi eeci ceelede kumukulwaizya kucita nzi?

¹⁰ Mulasyoma kuti Jesu Mwana wa Jehova simuzyalwaalikke alimwi akuti ngo Mwami ngwaakasala kuti katweendelezya. Mulizyi kuti Jesu ulalicesya alimwi ulabwiiya bube bwa Bausyi cakulondoka. Mwakayiya kuti wakasanina bantu bakafwide nzala, wakaumbulizya bantu bakatyompedwe alimwi buya wakabaponya bakali kuciswa. (Mt. 14:14-21) Mazuba aano, mulalibonena mbwayeendelezya mbungano yakwe. (Mt. 23:10) Alimwi mulizyi kuti uyootucitila zintu zinji zibotu kumbele kali Mwami wa Bwami bwa Leza. Mbuti mbomukonzya kutondezya kuti mulamuyanda? Nkwiinda mukutobela cikozyanyo cakwe. (Joh. 14:21) Cintu cakusaanguna ncomweelede kucita kutegwa mutobele cikozyanyo cakwe, nkwiinda mukwaaba buumi bwanu kuli Jehova akubbapatizyigwa.

11. Nkaambo nzi kayandika kapati ikeelede kupa muntu kubbapatizyigwa?

¹¹ Nkaambo nzi kayandika kapati ikeelede kupa muntu kubbapatizyigwa? Jesu wakawaamba mulawo mupati akati kamilawo ya Leza naakati: “Weelede kuyanda Jehova Leza wako amoyo wako woonse, abuumi bwako boonse, amizeezo yako yoonse alimwi anguzu zyako zyoonse.” (Mk. 12:30) Sena oobu mbombubo mbomumuyanda Leza?

12. Ncinzi cimupa kumuyanda Jehova? (Amubone acifwanikiso.)

¹² Kuli twaambo tunji tweelede kutupa kumuyanda Jehova. Mucikozyanyo, mwakazyiba kuti ‘ngokasensa kabuumi’ akuti nguupa “cipego  cibotu cili coonse alimwi acipego cilondokede cili coonse.” (Int. 36:9; Jak. 1:17) Kufwumbwa cintu cili coonse cibotu ncomujisi, cizwa kuli Leza wesu mwaabi alimwi siluyando.

13. Nkaambo nzi cinunuzyo ncocili cipego cilibedelede?

¹³ Cinunuzyo ncipego cibotu kapati Jehova ncaakatupa. Nkaambo nzi ncotwaambila boobo? Amuyeeye buyo mbocakali ciyumu cilongwe cakali akati ka Jehova a Mwanaakwe. Jesu wakaamba kuti: ‘Ulandiyanda Taata’ akuti “Ndilamuyanda Taata.” (Joh. 10:17; 14:31) Cilongwe cabo cakayuma kapati ciindi nobakali kukkala antoomwe kwamyaka minji kapati. (Tus. 8:22, 23, 30) Lino amweezeezye buyo mbocakamucisa Leza kuzumizya Mwanaakwe kuti apenge alimwi akufwa. Jehova ulabayanda kapati bantu kubikkilizya andinywe buya kumugama, cakuti wakapa Mwanaakwe ngwayandisya kacili cipaizyo, kutegwa nywebo alimwi abamwi mukapone mane kukabe kutamani. (Joh. 3:16; Gal. 2:20) Aaka nkakaambo kapati ikeelede kutupa kumuyanda Leza.

14. Nimbaakani nzi yiinda kubota njomukonzya kulibikkila?

¹⁴ Luyando ndomujisi kuli Jehova lwakomena akaambo kakwiiya zinji kujatikizya nguwe. Kweelede kuti muliyandide kuyumya cilongwe canu anguwe lino mane kukabe kutamani. Alimwi buya inga mwacikonzya kucita oobo. Umukulwaizya kuti mupe moyo wakwe kukondwa. (Tus. 23:15, 16) Mulakonzya kucita oobo ikutali buyo mumajwi, pele amuzintu nzyomucita.  Bukkale bwanu buyootondezya naa mulamuyanda ncobeni Jehova. (1Joh. 5:3) Eeyi nembaakani yiinda kubota njomukonzya kulibikkila.

15. Mbuti mbomukonzya kutondezya kuti mulamuyanda Jehova?

¹⁵ Mbuti mbomukonzya kutondezya kuti mulamuyanda Jehova? Cakusaanguna, mweelede kupaila mupailo wakulyaaba kuli Leza wakasimpe. (Int. 40:8) Mpoonya, ikulyaaba nkomwakacita kamuli nyolikke mulakutondezya kubuleya kwiinda mukubbapatizyigwa. Kweelana ambotwabandika kumatalikilo aacibalo, kubbapatizyigwa ncintu cikkomanisya alimwi ciyandika kapati mubuumi bwanu. Nkaambo mutalika buumi bupya, ikutali kuliponena nobeni, pele kuponena Jehova. (Rom. 14:8; 1Pet. 4:1, 2) Eeyi ilakonzya kulibonya kuba ntaamu mpati kapati, alimwi buya mbocibede oobo. Nkaambo ipa kuti mutalike kupona buumi bwiinda kubota. Mubuti?

16. Kweelana alugwalo lwa Intembauzyo 41:12, ino Jehova uyoobalongezya buti aabo ibalyaaba kumubelekela?

¹⁶ Jehova ngowiinda bwaabi. Kufwumbwa cintu ncomwamupa, walo uyoomupilusyila zinji kwiinda aliceeco ncomwakamupa. (Mk. 10:29, 30) Uyoomupa kupona buumi bukkomanisya, bulaampindu, nomuba munyika eeyi mbyaabi. Aaya matalikilo buyo. Lweendo ndomutalika kwiinda mukubbapatizyigwa lweelede kuzumanana, talweelede kugola pe. Mweelede kuzumanana kumubelekela Uso siluyando mane kukabe kutamani. Iluyando luli akati kandinywe a Bauso lweelede kuzumanana kukomena, alimwi muyoozumanana kupona mbubonya mbuli nguwe, mane kukabe kutamani.—Amubale Intembauzyo 41:12.

17. Ncinzi ncomukonzya kupa Jehova calo ncatajisi?

¹⁷ Ciindi nomwalyaaba akubbapatizyigwa, mupa Uso wanu cintu cimwi ciyandika kapati. Walo nguumupa zintu zibotu zyoonse nzyomujisi, izintu nzyomukkomanina kapati. Aboobo, andinywe mulakonzya kupa Mukamwini julu anyika cintu cimwi ncatajisi, nkokuti kumubelekela cakulyaaba. (Job. 1:8; 41:11; Tus. 27:11) Eelo kaka eeyi ninzila yiinda kubota yakupona! Cakutadooneka, luyando ndomujisi kuli Jehova, nkaambo kabotu kapati ikeelede kumupa kubbapatizyigwa.

18. Ino mibuzyo nzi njomukonzya kulibuzya?

¹⁸ Aboobo, ino inga mwawiingula buti mubuzyo wakuti, Sena muyoobbapatizyigwa? Nywebo kumugama ndinywe mweelede kwiingula. Pele inga camugwasya kulibuzya kuti, ‘Ino ncinzi ncondilindila?’ (Mil. 8:36) Amuyeeye twaambo totatwe ntotwabandika. Kakusaanguna, mulakayanda kasimpe alimwi abululami. Amulibuzye kuti, ‘Sena ndilayanda kuyoojanika ciindi bantu boonse nobanakwaamba kasimpe alimwi akucita zintu ziluleme?’ Kabili, mulamuyanda Jesu Kristo. Amulibuzye kuti, ‘Sena ndilayanda kuti Mwana wa Leza abe Mwami wangu alimwi akutobela cikozyanyo cakwe?’ Katatu alimwi kayandika kapati, mulamuyanda Jehova. Amulibuzye kuti, ‘Sena ndilayanda kukkomanisya moyo wa Jehova kwiinda mukumubelekela?’ Ikuti bwiinguzi bwanu kumibuzyo eeyi mbwakuti inzya, ino ncinzi cimulesya kubbapatizyigwa? Ncinzi ncomulindila?—Mil. 16:33.

19. Nkaambo nzi ncomuteelede kuwayawaya kubbapatizyigwa? Amupe cikozyanyo. (Johane 4:34)

¹⁹ Ikuti naa mulawayawaya kubweza ntaamu yakubbapatizyigwa, amubone cikozyanyo ncaakabelesya Jesu. (Amubale Johane 4:34.) Jesu wakeezyanisya kucita kuyanda kwa Bausyi kucakulya. Nkaambo nzi? Akaambo kakuti cakulya cilayandika kapati mumibili yesu. Jesu wakalizyi kuti zintu zyoonse Jehova nzyatwaambila kuti tucite zigwasya ndiswe. Jehova tayandi kuti tucite cintu cili coonse cikonzya kutucisa. Aboobo, sena ulayanda kuti mubbapatizyigwe? Inzya. (Mil. 2:38) Mulakonzya kuba masimpe kuti kutobela mulawo ooyu wakubbapatizyigwa kuyoomugwasya kapati. Ikuti naa tamukonzyi kuwayawaya kulya cakulya cibotu kapati, nkokuti tamweelede kuwayawaya kubbapatizyigwa.

20. Ncinzi ncotuyoolanga-langa mucibalo citobela?

²⁰ Ncinzi cipa bamwi kuwayawaya kubbapatizyigwa? Banji balakonzya kwiingula kuti, “Tandinalibambila.” Bwini mbwakuti, ikusala kulyaaba kuli Jehova akubbapatizyigwa, makani mapati ngomweelede kubikkila maano. Aboobo mweelede kuzinzibala kuyeeya kujatikizya kusala ooku, alimwi buya muyooyandika ciindi akubeleka canguzu kutegwa mweelele. Pele kuti naa muliyandide kapati kubweza ntaamu eeyi, ncinzi ncomweelede kucita lino kutegwa mulibambile? Tuyakuwiingula mubuzyo ooyu mucibalo citobela.