1-2. (a) Muubukkale nzi mwaakabede Paulo ciindi naakalemba lugwalo kubana Efeso? Nkaambo nzi ncaakabalembela? (b) Mibuzyo nzi njotutiilange-lange?

 CIINDI mwaapostolo Paulo naakaangidwe muŋanda ku Roma, wakali kuyanda kubakulwaizya basyominyina. Aboobo mbwaanga tanaakali kukonzya kubaswaya cacigaminina, wakali kubalembela magwalo. Lumwi akati kamagwalo aaya ngaakalembela bana Efeso, wakalulemba cakuma 60 naa 61 C.E.—Ef. 1:1; 4:1.

² Kwamyaka iibalilwa ku 10 katanaangwa, Paulo wakakkala kwaciindi cili mbocibede mu Efeso, kakambauka akuyiisya makani mabotu. (Mil. 19:​1, 8-10; 20:​20, 21) Wakali kubayanda kapati basyominyina alimwi wakali kuyanda kubagwasya kuzumanana kusyomeka kuli Jehova. Pele nkaambo nzi ncaakalembela Banakristo bananike makani aajatikizya mudima amumuni? Alimwi ncinzi Banakristo boonse ncobakonzya kwiiya kumakani aaya ngaakalemba? Amuleke tulange-lange bwiinguzi bwamibuzyo eeyi.

KUZWA MUMUDIMA KUYA MUMUMUNI

3. Mabala nzi ngaakabelesya Paulo mulugwalo ndwaakalembela bana Efeso?

³ Paulo wakalembela Banakristo baku Efeso kuti: “Cimwi ciindi mwakali mudima, pele lino muli mumuni.” (Ef. 5:8) Aawa Paulo wakabelesya mabala aakuti mudima amumuni kutondezya mbobakacinca kapati bana Efeso. Lino atulange-lange kaambo Paulo ncaakaambila kuti bana Efeso ‘cimwi ciindi bakali mudima.’

4. Muunzila nzi bana Efeso mobakali mumudima wabukombi?

 ⁴ Mudima wabukombi. Kabatanaiya kasimpe akuba Banakristo, bana Efeso Paulo mbaakalembela lugwalo bakali mubuzike bwanjiisyo zyabukombi bwakubeja alimwi akusyoma mizimo. Mumunzi wa Efeso mwakali tempele lya Atemi, lyalo ilili akati kazintu zili 7 bantu bakuciindi eeco nzyobakali kubona kuti zilagambya kapati. Bantu ibakali kubelesya tempele eeli bakalibbide buya mukukomba mituni. Basyaabupampu mukupanga zintu bakali kujana mali manji kwiinda mukupanga akusambala tukombelo twaleza mukaintu Atemi. (Mil. 19:​23-27) Kunze lyaboobo, bantu banji bamu Efeso bakali basimasalamuzi.—Mil. 19:19.

5. Muunzila nzi bana Efeso mobakali mumudima mumakani aakulilemeka?

⁵ Mudima mumakani aakulilemeka. Bantu bamu Efeso tiibakali kulilemeka alimwi tiibakali kufwa nsoni akaambo kabukkale bwabo ibwakali kusesemya. Cakalidumide kumvwa majwi aacisapi mumabuwa aabo aakusobanina alimwi alyamapobwe aabo aabukombi. (Ef. 5:3) Bunji bwabana Efeso ‘tiibakacijisi nsoni naaba aniini mubukkale bwabo,’ ikutondezya kuti tiibakacili kumvwa kucisa. (Ef. 4:​17-19) Kabatanaiya kujatikizya zyeelelo zya Jehova zijatikizya ciluzi acitaluzi, manjeezyeezya aabo tanaakali kubapenzya nobakali kucita zibi. Kuyungizya waawo, tiibakali kukombelela kujatikizya Jehova mbwaakali kulimvwa akaambo kamicito yabo. Akaambo kaceeci, Paulo wakabaamba kuti bakali ‘mumudima mumizeezo yabo alimwi bakalizandukide kubuumi buzwa kuli Leza.’

6. Nkaambo nzi Paulo ncaakaambila bana Efeso kuti “lino muli mumuni”?

⁶ Bana Efeso bamwi bakazwa mumudima. Mane Paulo wakalemba kuti “lino muli mumuni akaambo kakuyanzana a Mwami.” (Ef. 5:8) Kayi aciindi eeci bakali kupona kweelana ancolyaamba Jwi lya Jehova, lyalo lyakali mbuli mumuni iwakali kubamunikila. (Int. 119:105) Bana Efeso aaba bakazileka zilengwa zyabukombi bwakubeja alimwi abukkale bwakutalilemeka. Bakaba ‘basikwiiya Leza’ alimwi bakali kusolekesya kukomba Jehova kusikila mpobagolela akumukkomanisya.—Ef. 5:1.

7. Muunzila nzi bukkale bwesu mobukozyenye abwa Banakristo bana Efeso?

 ⁷ Mbubwenya buyo, andiswe katutanaiya kasimpe, twakali mumudima wabukombi alimwi amumakani aakulilemeka. Tobamwi twakali kusekelela mapobwe aabukombi bwakubeja, mpoonya bamwi bakali kupona buumi bwakutalilemeka. Pele notwakaiya zyeelelo zya Jehova zijatikizya ciluzi acitaluzi, twakacinca. Twakatalika kupona buumi bweendelana akuyanda kwakwe. Akaambo kaceeci, twajana zilongezyo zitaambiki. (Is. 48:17) Nokuba boobo, tulajana mapenzi. Pele tweelede kuzumanana kulitantamuna kumudima ngotwakasiya alimwi ‘akuzumanana kweenda katuli bana bamumuni.’ Mbuti mbotukonzya kucita oobu?

AMUUTANTAMUKE MUDIMA

8. Kweelana alugwalo lwa Baefeso 5:​3-5, nzintu nzi bana Efeso nzyobakeelede kutantamuka?

⁸ Amubale Baefeso 5:​3-5. Kutegwa bautantamukile limwi mudima wakutalilemeka, Banakristo baku Efeso bakeelede kuzumanana kukaka zintu nzyaatakali kukkomanina Jehova. Eeci cakali kubikkilizya bwaamu alimwi amajwi aacisapi. Aboobo Paulo wakabayeezya bana Efeso kuti bakeelede kuzitantamuka zintu eezyi ikuti naa bakali kuyanda kuyoojana “lukono luli loonse mu Bwami bwa Kristo abwa Leza.”

9. Nkaambo nzi ncotweelede kuzitantamuka zintu zili zyoonse zikonzya kutupa kucita bwaamu?

⁹ Andiswe, tweelede kuzumanana kwiikaka ‘milimo yabuyo yamudima.’ (Ef. 5:11) Masimpe kuti, ikuti naa muntu wazumanana kulangilila zintu zisofweede naa zitali kabotu, kuziswiilila naa kuzibandika buya, nkokuti inga camuubila kuzicita zintu eezyo. (Matl. 3:6; Jak. 1:​14, 15) Mucikozyanyo, kucisi cimwi Bakamboni bamwi bakatalika kubandika aa Intaneti kwiinda mukulembelana tugwalo. Kumatalikilo, Bakamboni aaba bakali kubandika buyo makani aajatikizya zintu zyakumuuya. Pele mukuya kwaciindi, bakatalika kubandika zintu zitamukkomanisyi Jehova. Kanji-kanji mibandi yabo yakali kujatikizya makani aakoonana. Akaambo kaceeci, bunji bwa Bakamboni aaba bakaamba kuti eeci cakabapa kucita bwaamu.

10. Mbuti Saatani mbwasola kutweena? (Baefeso 5:6)

¹⁰ Saatani ulasola kutweena kwiinda mukutupa kuyeeya kuti zintu Jehova nzyaamba kuti tazili kabotu alimwi zilisofweede, mubwini zili buyo kabotu. (2Pet. 2:19) Pele eeci taceelede kutugambya pe. Kayi Diabolosi lyoonse wali kusola kubanyonganya bantu kutegwa baalilwe kuzyiba ciluzi acitaluzi. (Is. 5:20; 2Kor. 4:4) Nkakaambo kaako bunji bwamafilimu, izintu zitondezyegwa a TV alimwi amawebbusaiti aa Intaneti zikulwaizya zintu iziteendelani azyeelelo zya Jehova ziluleme. Saatani uyanda kutupa kuyeeya kuti micito iisofweede abukkale bwakutalilemeka zyalo izidumide kapati mazuba aano, zili buyo kabotu alimwi zilakkomanisya.—Amubale Baefeso 5:6.

11. Ino cakuluula camucizyi Angela citondezya buti mbocili cabusongo kutobela lulayo lujanika ku Baefeso 5:7? (Amubone acifwanikiso.)

¹¹ Saatani uyanda kuti katuyanzana abantu ibakonzya kupa kuti cituyumine kutobela zyeelelo zya Jehova. Nkakaambo kaako Paulo wakakulwaizya bana Efeso kuti: “Mutanikuyanzani ambabo pe,” nkokuti aabo bacita zintu zitali kabotu mumeso aa Leza. (Ef. 5:7) Pele ncotweelede kuyeeya ncakuti, bantu mbotuyanzana limwi tabali buyo baabo mbotubandika limwi cacigaminina. Pele balabikkilizya abaabo mbotubandika limwi a Intaneti, cintu icatakaliko mumazuba aabana Efeso bansiku. Mucizyi Angela a uukkala ku Asia, wakabona Intaneti mboikonzya kutubikka muntenda.  Wakaamba kuti: “Ilakonzya kukunyonganya asyoonto-syoonto akucinca mboyeeya. Tiilyakalampa, ndakatalika kubona kuti cakali buyo kabotu kuba ‘abalongwe’ batatobeli njiisyo zyamu Bbaibbele. Mane buya, ndakatalika kuyeeya kuti cili buyo kabotu nokuba kupona buumi mbwatakkomanini Jehova.” Caluyando, baalu bakamugwasya mucizyi Angela kucinca. Wakaamba kuti: “Lino ndibikkila maano kuyeeya zintu zyakumuuya ikutali makani aa Intaneti.”

12. Ncinzi cikonzya kutugwasya kutobela zyeelelo zya Jehova zijatikizya ciluzi acitaluzi?

¹² Tweelede kwiikaka mizeezo yabantu bamunyika iikulwaizya kuti bukkale bwakutalilemeka buli buyo kabotu. Kayi swebo tulizyi kuti tabuluzi. (Ef. 4:​19, 20) Pele inga cabota kulibuzya mibuzyo mbuli yakuti: ‘Sena ndilasolekesya kukaka kuyanzana ababelesima, basicikoloma naa bantu bamwi buyo batazilemeki zyeelelo zya Jehova? Sena ndilasolekesya kutobela ceeco Jehova ncaamba kuti cililuzi nokuba kuti bamwi balakonzya kundaamba kuti ndilazilaika?’ Kweelana alugwalo lwa 2 Timoteyo 2:​20-22, tweelede kucenjela kujatikizya balongwe mbotusala nomuba mumbungano ya Bunakristo. Nkaambo bamwi, inga tiibatugwasya kuzumanana kumubelekela Jehova.

AMWEENDE “KAMULI BANA BAMUMUNI”

13. Ino caamba nzi kuzumanana ‘kweenda katuli bana bamumuni’? (Baefeso 5:​7-9)

¹³ Paulo wakakulwaizya Banakristo baku Efeso kuzumanana kuukaka mudima alimwi ‘akweenda kabali bana bamumuni.’ (Amubale Baefeso 5:​7-9.) Ino eeci caamba nzi? Mubufwaafwi, caamba kulilemeka kabotu ciindi coonse mbotuli Banakristo bakasimpe. Nzila imwi mbotukonzya kucita oobo, nkwiinda mukuba basungu kubala akwiiya Bbaibbele alimwi amabbuku aamba zyamu Bbaibbele. Kunze lyaboobo, cilayandika kapati kubikkila maano kucikozyanyo ca Jesu Kristo alimwi anjiisyo zyakwe, mbwali “mumuni wanyika.”—Joh. 8:12; Tus. 6:23.

14. Mbuti muuya uusalala mboukonzya kutugwasya?

¹⁴ Tweelede kulomba lugwasyo lwamuuya uusalala wa Leza kutegwa tucikonzye kuzumanana kweenda katuli “bana bamumuni.” Nkaambo nzi? Nkaambo tacili cuuba-uba  kuzumanana kusalala munyika eeyi iisofweede. (1Tes. 4:​3-5, 7, 8) Aboobo muuya uusalala ulakonzya kutugwasya kulwana mizeezo yabantu bamunyika eeyi balo bataboni zintu mbuli mbwazibona Jehova. Kuyungizya waawo, muuya uusalala ulakonzya kutugwasya kuba ‘amisyobo yoonse yabubotu abululami.’—Ef. 5:9.

15. Muunzila nzi motukonzya kutambula muuya uusalala? (Baefeso 5:​19, 20)

¹⁵ Nzila imwi mbotukonzya kutambula muuya uusalala nkwiinda mukuulomba mumupailo. Jesu wakaamba kuti Jehova ‘uyoobapa muuya uusalala aabo ibamulomba.’ (Lk. 11:13) Alimwi tulakonzya kutambula muuya uusalala ciindi notumutembaula Jehova antoomwe kumiswaangano ya Bunakristo. (Amubale Baefeso 5:​19, 20.) Aboobo muuya uusalala wa Leza ulakonzya kutugwasya kupona munzila njakkomanina.

16. Ncinzi cikonzya kutugwasya kusala kabotu? (Baefeso 5:​10, 17)

¹⁶ Ciindi notuyanda kupanga zyakusala ziyandika kapati, tweelede kusaanguna kuzyiba “ncayanda Jehova” mpoonya akucicita. (Amubale Baefeso 5:​10, 17.) Kwiinda mukuzyiba njiisyo zyamu Bbaibbele nzyotukonzya kubelesya mubukkale bwesu, nkokuti tuyanda kuzyiba mbwayeeya Leza kujatikizya bukkale oobo. Kumane twazibelesya njiisyo eezyo, tuyoocikonzya kusala kabotu.

17. Mbuti mbotukonzya kucibelesya kabotu ciindi? (Baefeso 5:​15, 16) (Amubone acifwanikiso.)

¹⁷ Paulo alimwi wakaambila Banakristo baku Efeso kucibelesya kabotu ciindi. (Amubale Baefeso 5:​15, 16.) Sinkondoma Saatani, iwaambwa kuti ‘mubi,’ uyanda kuti tujate bubi kapati kuyandaula zintu zyamunyika eeyi kutegwa twaalilwe kujana ciindi cakubelekela Leza. (1Joh. 5:19) Mucikozyanyo, Munakristo ulakonzya kutalika kubikkila kapati maano kumali, lwiiyo naa mulimo muciindi cakubikkila maano kuzyoolwe ziindene-indene zyakubelekela Jehova. Aboobo eeci cilakonzya kutondezya kuti Munakristo ooyo watalika kuyeeya mbuli bantu bamunyika. Nokuba kuti  zintu eezyi kuzigama tazilubide, pele tazyeelede kuba mubusena bwakusaanguna mubuumi bwesu. Ikutegwa tuzumanane kweenda katuli “bana bamumuni,” tweelede ‘kucibelesya kabotu ciindi coonse ncotujisi,’ nkokuti kubikkila maano kuzintu ziyandika kapati.

18. Ncinzi ncaakacita mukwesu Donald kutegwa acibelesye kabotu ciindi cakwe?

¹⁸ Amusole kuyandaula nzila zyakubelekela Jehova cakumaninina. Eeci ncaakacita mukwesu Donald uukkala ku South Africa. Wakaamba kuti: “Ndakabulanga-langa bukkale bwangu mpoonya akupaila kuli Jehova kutegwa andigwasye kuyungizya mulimo wangu. Ndakapaila kuti andigwasye kujana mulimo iwakali kunoondipa ciindi cinji cakukambauka. Aboobo kwiinda mukugwasyigwa a Jehova, ndakacikonzya kuujana mulimo ooyu. Kumane ndakatalika mulimo waciindi coonse antoomwe abakaintu bangu.”

19. Mbuti mbotukonzya kuzumanana kweenda ‘katuli bana bamumuni’?

¹⁹ Kweelede kuti lugwalo Paulo ndwaakalembela bana Efeso lwakabagwasya kuzumanana kumubelekela Jehova cakusyomeka. Alimwi lulakonzya kutugwasya andiswe. Kweelana ambotwabona, lulakonzya kutugwasya kusala zyakulikondelezya zili kabotu alimwi abalongwe. Kunze lyaboobo, lulakonzya kutukulwaizya kuba abubambe busitikide bwakwiiya Bbaibbele kutegwa mumuni wakasimpe uzumanane kutumunikila muzintu zyoonse nzyotucita. Kuyungizya waawo, lulatondezya mbouyandika kapati muuya uusalala, walo uukonzya kutugwasya kuba abube buli kabotu. Aboobo, kutobela malailile ngaakalemba Paulo kulakonzya kutugwasya kusala zintu cabusongo, zyalo izyeendelana akuyanda kwa Jehova. Kwiinda mukucita boobu, tuyoocikonzya kuutantamuka mudima wamunyika iino akuzumanana kuba mumumuni.