1. Nzilongezyo nzi nzyotujana akaambo kakuba cibeela cambunga ya Jehova?

 EELO kaka tulilelekedwe kuba mumbunga ya Jehova mumazuba aano aakatazya kapati aamamanino! Nokuba kuti buumi buyaabwiindila buya kukatazya munyika eeyi, Jehova watupa bakwesu abacizyi kutegwa batugwasye. (Int. 133:1) Ulatugwasya kuti katukkomene mumukwasyi. (Ef. 5:33–6:1) Kunze lyaboobo, ulatupa busongo mbotuyandika kutegwa tuliyumye notulibilika alimwi akuba alukkomano lwini-lwini.

2. Ncinzi ncotweelede kucita? Nkaambo nzi?

² Tweelede kubeleka canguzu kutegwa tuzumanane kubelekela Jehova cakusyomeka. Nkaambo nzi? Akaambo kakuti zimwi ziindi bamwi balakonzya kutunyemya akaambo kazintu nzyobaamba akucita. Kunze lyaboobo, tulakonzya kutyompwa akaambo kakulezya kwesu, kwaambisya kuti katwiile kulubizya cakwiinduluka-induluka. Aboobo tweelede kuliyumya notubelekela Jehova ciindi (1) mukwesu naa mucizyi naatunyemya, (2) ngotukwetene limwi naatutyompya, alimwi (3) ciindi notwatyompwa akaambo kakulezya kwesu. Mucibalo eeci, tulabubandika bukkale oobu bumwi abumwi. Mpoonya tulabona ncotukonzya kwiiya kuzwa kuzikozyanyo zyabantu botatwe bamu Bbaibbele aabo ibakazumanana kusyomeka nobakali mubukkale buli boobu.

AMUZUMANANE KUMUBELEKELA JEHOVA CIINDI MUSYOMINYOKO NAAMUNYEMYA

3. Mbuyumuyumu nzi mbobajana bantu ba Jehova?

³ Buyumuyumu. Basyomima bamwi balakonzya kuba abube bwalo mbotutakkomanini. Ibamwi balakonzya kututyompya naa kutatweendelezya kabotu. Nobaba baalu balakonzya kulubizya. Zintu zili boobu, zilakonzya kupa bamwi kutalika kudooneka kuti naa mbunga eeyi njiya Leza. Mpoonya muciindi cakuzumanana  kumubelekela Leza antoomwe abasyominyina “calukamantano,” balakonzya kuleka kumwaambauzya ooyo wakabanyemya naa kuleka buya akujanika kumiswaangano. (Zef. 3:9) Sena kucita boobu inga caba cabusongo? Amubone ncotukonzya kwiiya kucikozyanyo camuntu umwi wamu Bbaibbele iwakali mubukkale buli boobu.

4. Mbuyumuyumu nzi mbwaakajana mwaapostolo Paulo?

⁴ Cikozyanyo camu Bbaibbele. Mwaapostolo Paulo wakalizyi kuti Banakristonyina bakali bantu batalondokede. Mucikozyanyo, ciindi naakatalika kuyanzana ambungano, bamwi bakali kumuyoowa nkaambo tiibakasyoma kuti wakali sikwiiya awalo. (Mil. 9:26) Kumane bamwi, bakatalika kumwaamba zintu zitali kabotu kutegwa babisye mpuwo yakwe. (2Kor. 10:10) Kunze lyaboobo, Paulo wakabona mwaalu umwi kacita cintu citali kabotu icakali kukonzya kutyompya bamwi. (Gal. 2:​11, 12) Mpoonya Marko, mweenzinyina ngobakali kumvwana limwi wakamutyompya kapati. (Mil. 15:​37, 38) Paulo wakali kukonzya kuleka kuyanzana abantu ibakacita zintu izyatakamukkomanisya. Nokuba boobo, walo wakazumanana kubayanda bakwesu abacizyi aaba akuzumanana kumubelekela Jehova cakusyomeka. Ncinzi cakamugwasya Paulo kuzumanana?

5. Ncinzi cakagwasya Paulo kuzumanana kumvwana abasyominyina? (Bakolose 3:​13, 14) (Amubone acifwanikiso.)

⁵ Paulo wakali kubayanda kapati basyominyina. Luyando ndwaakajisi kulimbabo lwakamugwasya kubikkila maano kubube bubotu mbobakajisi, ikutali kukulubizya kwabo. Alimwi luyando lwakamugwasya kucita ceeco ncaakalemba mulugwalo lwa Bakolose 3:​13, 14. (Amubale.) Amubone eeci mbwaakacitondezya kuli Marko. Nokuba kuti Marko wakamusiya Paulo mulweendo lwakwe lwakusaanguna lwabumisyinali, Paulo kunyina naakazumanana kunyema. Kumbele, ciindi naakalemba lugwalo kumbungano yaku Kolose, wakamulumbaizya Marko kuti ngumwi wabasimilimonyina ‘ibakamuumbulizya kapati.’ (Kol. 4:​10, 11) Alimwi ciindi naakaangidwe ku Roma, Paulo wakalomba kuti Marko aunke kuyoomugwasya. (2Tim. 4:11) Aboobo, cilisalede kuti Paulo wakabalekelela basyominyina alimwi wakazumanana kumvwana ambabo. Ncinzi ncotukonzya kwiiya kuli Paulo?

6-7. Mbuti mbotukonzya kuzumanana kubayanda bakwesu abacizyi nokuba kuti tabalondokede? (1 Johane 4:7)

⁶ Ciiyo. Jehova uyanda kuti tuzumanane kutondezya luyando kubakwesu abacizyi. (Amubale 1 Johane 4:7.) Ciindi mukwesu naa mucizyi naatatweendelezya kabotu, tatweelede kuyeeya kuti wacitila caali, pele nkuti buyo talondokede  alimwi buya ulayanda kutobela njiisyo zyamu Bbaibbele. (Tus. 12:18) Leza ulabayanda babelesi bakwe basyomeka nokuba kuti balalubizya. Amana buya ulazumanana kuba mulongwe wesu alimwi kunyina natubikkilila. (Int. 103:9) Eelo kaka cilayandika kapati kwiiya bube bwa Taateesu bwakulekelela!—Ef. 4:32–5:1.

⁷ Kamuyeeyede kuti, mamanino mbwaayaabuswena afwaafwi, tuyandika kuzumanana kumvwana abakwesu abacizyi. Nkaambo tulalangilwa kupenzyegwa citaambiki. Mane buya tulakonzya kwaangwa akaambo kalusyomo lwesu. Ikuti naa eeci cacitika, tuyooyandika lugwasyo lwabakwesu abacizyi. (Tus. 17:17) Amumvwe cakacitikila ba Josep, a imwaalu waku Spain. Walo abakwesu bamwi bakaangwa akaambo kakukaka kunjila mumulimo wabusikalumamba. Mukwesu Josep wakaamba kuti: “Muntolongo, toonse twakali kukkala antoomwe aboobo zimwi ziindi twakali kunyemezyanya. Pele twakeelede kweengelelana alimwi akulekelelana camoyo woonse. Eeci cakatugwasya kuzumanana kukamantana alimwi akukwabililana. Kayi bantu bamwi mbotwakali limwi muntolongo tiibakali babelesi ba Jehova. Mucikozyanyo, bumwi buzuba ndakalicisa kukwaanza, aboobo ndakatalika kwaalilwa kulicitila zintu zimwi. Pele mukwesu umwi wakali kundiwasyila zisani akundigwasya buya munzila zisiyene-siyene. Ndakalibonena luyando lwini-lwini mubukkale oobu.” Eelo kaka tulijisi twaambo tubotu itweelede kutupa kumana mazwanga lino!

AMUZUMANANE KUMUBELEKELA JEHOVA CIINDI NGOMUKWETENE LIMWI NAAMUTYOMPYA

8. Mbuyumuyumu nzi mbobajana banabukwetene?

⁸ Buyumuyumu. Muzikwati zyoonse muli mapenzi. Cakutainda mumbali, Bbaibbele lyaamba kuti banabukwetene “banoojisi mapenzi mumibili yabo.” (1Kor. 7:28) Nkaambo nzi? Nkaambo mulumi amukaintu boonse tabalondokede, bajisi bube bwiindene alimwi inga kabakkomanina zintu ziindene. Kayi banabukwetene balakonzya kuti kabazwa mubukkale bwiindene-indene naa muzilengwa ziindene-indene. Alimwi zimwi ziindi balakonzya kutalika kutondezya bube ibwatakali kulibonya kabatanakwatana. Zintu zili boobu zilakonzya kuleta mapenzi mucikwati. Mucikozyanyo, muciindi cakubona kuti boonse kuli mpobalubizya akusola kubelekela antoomwe kulwana penzi limwi, banabukwetene balakonzya kutalika kutamikizyanya. Mane buya, balakonzya kutalika kuyeeya kuti inga cagwasya kwaandaana naa kulekana buya. Pele sena kucita boobu inga kwagwasya? b Amuleke tubone ncotukonzya kwiiya kucikozyanyo camuntu umwi wamu Bbaibbele iwakajisi mapenzi aataambiki mucikwati cakwe.

9. Mbuyumuyumu nzi mbwaakajisi Abigayeli?

⁹ Cikozyanyo camu Bbaibbele. Abigayeli wakakwetwe kuli Nabala, walo Bbaibbele ngolyaamba kuti wakali mukali amilimo yakwe yakali mibi. (1Sam. 25:3) Kweelede kuti cakali ciyumu kuli Abigayeli kukkala amuntu uuli boobu. Sena Abigayeli wakalijisi coolwe cakuzwa mucikwati eeci? Inzya. Naakacita oobo ciindi Davida, iwakali kuyooba mwami wa Israyeli kumbele naakali kuyanda kumujaya mulumaakwe akaambo kakusampaula baalumi bakwe. (1Sam. 25:​9-13) Naakali kuyanda, Abigayeli naakatija akulekela Davida kuti amujaye Nabala. Pele kunyina naakacita boobo. Muciindi caboobo, wakakombelezya Davida kuti atamujayi. (1Sam. 25:​23-27) Nkaambo nzi ncaakacitila boobu?

10. Nkaambo nzi Abigayeli ncaakazumanana kukkala mucikwati icakajisi mapenzi?

¹⁰ Abigayeli wakali kumuyanda Jehova alimwi  wakali kuzilemeka zyeelelo zyakwe zijatikizya cikwati. Tacidoonekwi buya kuti wakalizyi Leza ncaakaambila Adamu a Eva ciindi naakatalisya cikwati. (Matl. 2:24) Aboobo Abigayeli wakalizyi kuti cikwati cilisetekene kuli Jehova. Mbwaanga wakali kuyanda kumukkomanisya Leza, kweelede kuti eeci cakamupa kucita kufwumbwa ncaakali kukonzya kutegwa afwutule bamuŋanda yakwe kubikkilizya amulumaakwe. Cakufwambaana, wakabweza ntaamu yakulesya Davida kutegwa atamujayi Nabala. Alimwi wakalilibambilide kulilekelela nokuba kuti talinguwe wakalubizya. Bwini mbwakuti, Jehova wakali kumuyanda kapati mukaintu ooyu sicamba alimwi iwatakali kuliyanda. Ncinzi bamalumi abamakaintu ncobakonzya kwiiya kucikozyanyo ca Abigayeli?

11. (a) Ncinzi Jehova ncayanda kuti banabukwetene kabacita? (Baefeso 5:33) (b) Ncinzi ncomwaiya kumucizyi Carmen kujatikizya mbwaakacikwabilila cikwati cakwe? (Amubone acifwanikiso.)

¹¹ Ciiyo. Jehova uyanda kuti mulumi amukaintu kabazumanana kukkala antoomwe nokuba kuti umwi ulakatazya kukkala limwi. Eelo kaka Leza ulakkomana ciindi nabona banabukwetene kababeleka canguzu kulwana mapenzi antoomwe, kutondezyanya luyando alimwi akulemekana! (Amubale Baefeso 5:33.) Amumvwe cakuluula camucizyi Carmen. Nokwakainda myaka iibalilwa ku 6 kuzwa naakakwatwa, mucizyi Carmen wakatalika kwiiya Bbaibbele a Bakamboni ba Jehova mpoonya kumbele wakabbapatizyigwa. Mucizyi Carmen wakaamba kuti: “Balumi bangu tiibakakukkomanina kusala kwangu. Bakalimvwa bubi kapati akaambo kakuti ndakali kuunka kumiswaangano alimwi ndakalikanzide kumubelekela Jehova. Bakali kunditukila akundaambila kuti balandisiya.” Nokuba boobo, mucizyi Carmen wakazumanana kukkala mucikwati. Kwamyaka iili 50, wakabeleka canguzu kutondezya luyando alimwi abulemu kubalumi bakwe. Wakaamba kuti: “Mukuya kwamyaka, ndakatalika kubamvwisya balumi bangu alimwi akubandika ambabo munzila iili kabotu. Mbwaanga ndakalizyi kuti cikwati cilisetekene mumeso aa Jehova, ndakacita kufwumbwa ncondakali kukonzya kutegwa ndicikwabilile. Akaambo kakuti ndilamuyanda Jehova, kunyina nondakasola kubasiya balumi bangu.” c Aboobo, ikuti naa kwaba mapenzi mucikwati canu, amube alusyomo lwakuti Jehova uyoomugwasya kuzumanana kuliyumya.

AMUZUMANANE KUMUBELEKELA JEHOVA CIINDI NOMWATYOMPWA AKAAMBO KAKULEZYA KWANU

12. Mbuyumuyumu nzi mbotukonzya kujana kuti twacita cibi cipati?

¹² Buyumuyumu. Ikuti twacita cibi cipati, tulakonzya kutyompwa kapati. Bbaibbele lyaamba kuti zibi zyesu zilakonzya kutupa ‘kuusa  alimwi akutyompwa.’ (Int. 51:17) Mucikozyanyo, mukwesu Robert wakabeleka canguzu kwamyaka iili mbwiibede kutegwa ayelele kuba mukutausi. Nokuba boobo, wakacita cibi cipati calo icakamupa kulimvwa kuti wakamulubizyila kapati Jehova. Mukwesu Robert wakaamba kuti: “Manjezyeezya aangu akandipenzya kapati cakuti ndakalimvwa kubula mulimo. Ndakali kulila citaambiki alimwi akupaila kuli Jehova. Mane ndakali kuyeeya kuti Leza kunyina nayakundiswiilila kabili. Mwati inga wasola, kayi ndakamulubizyila.” Ikuti twacita cibi cipati, tulakonzya kuusa kapati akutalika kuyeeya kuti Jehova tacituyandi alimwi buya tatuceeleli akumubelekela. (Int. 38:4) Aboobo, ikuti naa kuli nomulimvwa boobu, amubone cikozyanyo camuntu umwi wamu Bbaibbele iwakazumanana kubelekela Jehova nokuba kuti wakacita zibi zipati.

13. Ncibi nzi cipati ncaakacita Petro? Nkulubizya nzi kumbi nkwaakacita katanacita cibi eeci?

¹³ Cikozyanyo camu Bbaibbele. Busiku katanajaigwa Jesu, Petro wakalubizya ziindi zili mbozibede calo icakapa kuti kumamanino acite cibi cipati. Cakusaanguna, Petro wakatondezya muuya wakulisyoma kwiinda mukwaamba kuti walo wakali kuyoozumanana kusyomeka nokuba kuti baapostolo bambi bamusiya Jesu. (Mk. 14:​27-29) Kumane, nobakali mumuunda wa Getesemane, cakwiinduluka-induluka Petro wakaalilwa kuzumanana kulinda. (Mk. 14:​32, 37-41) Mpoonya, ciindi nkamu yabantu bakajisi mapanga nobakaboola kumujata Jesu, Petro wakamusiya akutija. (Mk. 14:50) Kumamanino, Petro wakamukaka Jesu ziindi zyotatwe, mane buya akukonka kuti tamuzyi. (Mk. 14:​66-71) Ino Petro wakacita buti naakazyiba kuti wacita cibi cipati? Wakalila citaambiki, ambweni akaambo kakulimvwa kuba amulandu. (Mk. 14:72) Amuyeeye buyo mbwaakalimvwa Petro ciindi Jesu mulongwe wakwe naakajaigwa nokwakainda mawoola masyoonto buyo. Kweelede kuti wakalimvwa kubula mpindu.

14. Ncinzi cakagwasya Petro kuzumanana kumubelekela Jehova? (Amubone cifwanikiso cili )

¹⁴ Kuli twaambo tuli mbotubede itwakagwasya Petro kuzumanana kumubelekela Jehova. Cakusaanguna, kunyina naakalizandula pe; kumane wakaunka kuli basikwiiya bambi kutegwa bamuumbulizye. (Lk. 24:33) Kuyungizya waawo, naakabusyigwa Jesu, wakalibonya kuli Petro ambweni kutegwa amukulwaizye. (Lk. 24:34; 1Kor. 15:5) Mpoonya muciindi cakumukalalila akaambo kakulubizya kwakwe, Jesu wakasyomezya mulongwe wakwe ooyu kuti wakali kuyoopegwa mikuli iiyungizyidwe. (Joh. 21:​15-17) Petro wakalizyi kuti wakacita cibi cipati, pele wakazumanana kusola kucita ciluzi. Nkaambo nzi? Nkaambo wakalisinizyide kuti Jesu Simalelaakwe, wakacili kumuyanda. Alimwi abalo basikwiiyanyina  bakazumanana kumugwasya. Ncinzi ncotukonzya kwiiya kucikozyanyo ca Petro?

15. Ncinzi Jehova ncayanda kuti katusinizyide? (Intembauzyo 86:5; Baroma 8:​38, 39) (Amubone acifwanikiso.)

¹⁵ Ciiyo. Jehova uyanda kuti katusinizyide kuti ulatuyanda alimwi ulilibambilide kutulekelela. (Amubale Intembauzyo 86:5; Baroma 8:​38, 39.) Ikuti twabisya, inga tutalika kulipa mulandu. Eeci cili buyo kabotu alimwi cileelela. Nokuba boobo, tatweelede kulimvwa kuti Jehova tacituyandi naa kuti takonzyi kutulekelela. Muciindi caboobo, tweelede kulomba lugwasyo cakufwambaana. Mukwesu Robert iwaambwa kale, wakaamba kuti: “Ndakacita cibi akaambo kakuti ndakasyoma nguzu zyangu kulwana masunko.” Aboobo mukwesu ooyu wakazyiba kuti wakeelede kwaambila baalu. Wakaamba kuti: “Ciindi nondakabandika abaalu, bakandigwasya kulimvwa kuti Jehova ulandiyanda. Alimwi ndakalimvwa kuti abalo baalu balandiyanda. Bakandigwasya kubona kuti Jehova kunyina naakacileka kundiyanda.” Mbubwenya buyo andiswe, tulakonzya kuba masimpe kuti Jehova ulatuyanda kapati akuti ulatulekelela ikuti naa tweempwa kuzibi zyesu, twalomba lugwasyo alimwi akusolekesya kutakwiinduluka kulubizya kwesu. (1Joh. 1:​8, 9) Ikuti twacita oobo, tatukaleki kumubelekela nokuba kuti twalubizya.

16. Nkaambo nzi ncomukanzide kuzumanana kumubelekela Jehova?

¹⁶ Jehova ulalumba kapati akaambo kakusolekesya nkotucita kutegwa tumubelekele muziindi eezyi zikatazya. Kwiinda mukugwasyigwa anguwe, tulakonzya kuzumanana kumubelekela nokuba kuti tulityompedwe. Tulakonzya kuzumanana kubayanda basyomima akubalekelela nokuba kuti batunyemya. Kuyungizya waawo, tulakonzya kutondezya mbotumuyanda kapati Leza alimwi ambotucilemeka cikwati kwiinda mukucita kufwumbwa ncotukonzya kutegwa tumane mapenzi aakonzya kuba mucikwati cesu. Mpoonya kuti twacita cibi, tulakonzya kulomba lugwasyo lwa Jehova, kuzumina luyando lwakwe akulekelela alimwi akuzumanana kumubelekela. Aboobo, tulakonzya kuba masimpe kuti Jehova uyootulongezya kapati ‘ikuti tiitwaleka pe kucita zibotu.’—Gal. 6:9.