1-2. Mbubotu nzi buboola mwamana kubbapatizyigwa?

 EELO kaka cilakkomanisya kubbapatizyigwa akuba cibeela camukwasyi wa Jehova! Ncoolwe cilibedelede kuba acilongwe cili boobu a Jehova. Tulaazuminizya majwi ngaakaamba sintembauzyo Davida aakuti: “Ulikkomene muntu ngosala akuswenya kulinduwe kuti akkale mumabuwa aako.”—Int. 65:4.

² Jehova tazumizyi buyo kufwumbwa muntu kunjila mumabuwa aakwe. Kweelana ambotwabona mucibalo cainda, usala buyo baabo ibatondezya kuti balayanda ncobeni kuba acilongwe anguwe. (Jak. 4:8) Ciindi nomwalyaaba kuli Jehova akubbapatizyigwa, muba acilongwe a Jehova munzila yaalubazu. Aboobo mulakonzya kuba masimpe kuti ‘uyoomupoomweda zileleko zinji kapati cakuti tamukabulizyi cintu cili coonse.’—Malk. 3:10; Jer. 17:​7, 8.

3. Mukuli nzi uuyandika kapati ngobajisi Banakristo balyaabide akubbapatizyigwa? (Mukambausi 5:​4, 5)

³ Kubbapatizyigwa, matalikilo buyo aakubelekela Jehova. Mwamana kubbapatizyigwa, mweelede kusolekesya kupona kweelana acikonke canu cakulyaaba akuzumanana kusyomeka kulinguwe, noliba leelyo nomwalijana mumapenzi naa nomwasunkwa kucita cibi. (Amubale Mukambausi 5:​4, 5.) Mbomuli sikwiiya wa Jesu, mweelede kutobela cikozyanyo cakwe amalailile aakwe cakulomya. (Mt. 28:​19, 20; 1Pet. 2:21) Aboobo cibalo eeci cilamugwasya kucita boobo.

 AMUZUMANANE KUTOBELA JESU NOKUBA KUTI MWAJANA MAPENZI NAA MASUNKO

4. Muunzila nzi basikwiiya ba Jesu mobanyamuna ‘cisamu cakupenzyezya’? (Luka 9:23)

⁴ Tamweelede kuyeeya kuti mwamana kubbapatizyigwa, munoopona buumi bunyina mapenzi. Kayi Jesu wakaambila limwi kuti basikwiiya bakwe bakali kuyoonyamuna ‘cisamu cakupenzyezya.’ Alimwi buya bakali kunoocita oobo “buzuba abuzuba.” (Amubale Luka 9:23.) Pele sena Jesu wakali kupandulula kuti basikumutobela bakali kunoopenga lyoonse? Peepe. Wakali kukankaizya buyo kuti, kunze aazilongezyo nzyobakali kuyoojana, bakali kuyoojana amapenzi. Alimwi akati kamapenzi aaya, amwi akali kunookatazya kapati.—2Tim. 3:12.

5. Nzilongezyo nzi Jesu nzyaakasyomezya baabo baliimya zintu zimwi?

⁵ Ambweni mwakakazyigwa kale abanamukwasyi, naa kuliimya zintu zimwi zyakumubili kutegwa mubikke ziyandika zya Bwami mubusena bwakusaanguna. (Mt. 6:33) Ikuti kacili boobo, amuzyibe kuti Jehova ulaibona milimo yanu yalusyomo. (Heb. 6:10) Kweelede kuti mwalibonena kale mbwaali aamasimpe majwi aa Jesu aakuti: “Ncobeni ndimwaambila kuti, kunyina wakasiya ŋanda naa banabokwabo naa bacizyi bakwe naa banyina naa bausyi naa bana bakwe naa myuunda akaambo kandime alimwi akaambo kamakani mabotu uutakajani zintu ziyungizyidwe ziindi zili 100 muciindi cino—nkokuti maanda, banabokwabo, bacizyi, bamamama, bana alimwi amyuunda antoomwe akupenzyegwa—eelyo mubweende bwazintu buboola, ibuumi butamani.” (Mk. 10:​29, 30) Tacidoonekwi buya kuti zilongezyo nzyomwajana nzinji kapati kwiinda zintu zili zyoonse nzyomwakaliimya.—Int. 37:4.

6. Nkaambo nzi ncomuyooyandika kuzumanana kulwana “zisusi zyanyama” mwamana kubbapatizyigwa?

⁶ Mwamana kubbapatizyigwa, muyooyandika kuzumanana kulwana “zisusi zyanyama.” (1Joh. 2:16) Cili boobo akaambo kakuti mucinooli bantu batalondokede, ibana ba Adamu. Zimwi ziindi mulakonzya kulimvwa mbuli mwaapostolo Paulo. wakalemba kuti: “Mumoyo wangu ndilaukkomanina kapati mulawo wa Leza, pele mumubili wangu ndibona mulawo uumbi uulwana mulawo uuli mumizeezo yangu, alimwi uundipa kuba mwaange wamulawo wacibi ooyo uuli mumubili wangu.” (Rom. 7:​22, 23) Alimwi mulakonzya kutyompwa akaambo kakulubizya kwanu. Nokuba boobo, kuyeeya ncomwakamusyomezya Jehova ciindi nomwakalyaaba kulinguwe kuyoomugwasya kulwana masunko. Bwini mbwakuti, cikonke canu cakulyaaba ciyoomugwasya kuliyumya mumasunko. Mubuti?

7. Mbuti kulyaaba kuli Jehova mbokuyoomugwasya kuzumanana kusyomeka kulinguwe?

⁷ Ciindi nomwalyaaba kuli Jehova, mulaliimya zintu zimwi. Eeci caamba kuti musala kukaka zintu zimwi nzyomulombozya alimwi ambaakani zyanu kutegwa mukkomanisye Jehova. (Mt. 16:24) Aboobo mwaakusunkwa, tamukayandiki kutalika kuyeeya buya ncomweelede kucita. Kayi munoozyi kale ncomweelede kucita, nkokuti kuzumanana kusyomeka kuli Jehova. Muyoozumanana kuyanda kukkomanisya Jehova. Kwiinda mukucita boobo, muyooba mbuli Jobu. Nokuba kuti wakajana mapenzi aakatazya kapati, cakusinizya wakaamba kuti: “Tandikaleki kusyomeka pe!”—Job. 27:5.

8. Ino kuzinzibala kuyeeya mupailo wanu wakulyaaba kuyoomugwasya buti kuzunda masunko?

⁸ Kwiinda mukuzinzibala kuyeeya mupailo wanu wakulyaaba kuli Jehova, muyoocikonzya kuzunda sunko lili lyoonse. Mucikozyanyo, sena inga mwatalika kulitondezya mbuli kuti mulamuyanda mulumi naa mukaintu wamweenzinyoko? Peepe. Kayi mwakamusyomezya kale Jehova kuti kunyina nomuyoocita cintu cili boobo. Ikuti naa mizeezo iitali kabotu  tiimwailekela kuti ikomene, nkokuti kumbele tamukabi apenzi lyakulwana mizeezo eeyo. Aboobo, ‘muyakwiileya nzila yababi.’—Tus. 4:​14, 15.

9. Ino kuzinzibala kuyeeya mupailo wanu wakulyaaba inga kwamugwasya buti kubikka zintu zyakumuuya mubusena bwakusaanguna?

⁹ Mbuti kuti mwajana mulimo walo uyoopa kuti kamutajaniki lyoonse kumiswaangano ya Bunakristo? Tacidoonekwi buya kuti munoocizyi kale cakucita. Kayi kamutanaujana, mwakasalila limwi kuti tamukazumini kunjila mulimo wamusyobo ooyu. Aboobo, tamukasunkwi kuuzumina mulimo ooyo mpoonya akusola kujana nzila yakuti kamubikka Jehova mubusena bwakusaanguna. Kuzinzibala kuyeeya cikozyanyo ca Jesu kulakonzya kumugwasya. Kayi walo wakalikanzide kukkomanisya Bausyi. Mbubwenya mbuli Jesu, andinywe amube amakanze aakukaka kucita cintu cili coonse citamukkomanisyi Leza.—Mt. 4:10; Joh. 8:29.

10. Mwamana kubbapatizyigwa, mbuti Jehova mbwayoomugwasya kutegwa muzumanane kutobela Jesu?

¹⁰ Mapenzi alimwi amasunko amupa coolwe cakutondezya kuti mulayanda kuzumanana kutobela Jesu. Alimwi mulakonzya kuba masimpe kuti Jehova uyoomugwasya. Kayi Bbaibbele lyaamba kuti: “Leza ulasyomeka, aboobo takamulekeli kuti musunkwe kwiinda nguzu zyanu pe, pele mwanoosunkwa uyoomupa anzila yamatijilo kutegwa mukonzye kuliyumya musunko eelyo.”—1Kor. 10:13.

MBOMUKONZYA KUZUMANANA KUTOBELA JESU

11. Ninzila nzi imwi iikonzya kumugwasya kuzumanana kutobela Jesu? (Amubone acifwanikiso.)

¹¹ Jesu wakali musungu, alimwi wakazumanana kuyumya cilongwe cakwe a Jehova kwiinda mukupaila. (Lk. 6:12) Mubwini, nzila imwi iikonzya kumugwasya kuzumanana kutobela Jesu mwamana kubbapatizyigwa, nkuba acilengwa cakucita zintu zikonzya kumugwasya kuyumya  cilongwe canu a Jehova. Bbaibbele lyaamba kuti: “Kweelana akuyaambele nkotwacita kale, atuzumanane kweenda kabotu acilengwa nciconya eeci.” (Flp. 3:16) Ciindi aciindi, munoomvwa zyakuluula zyabakwesu abacizyi ibayungizya mulimo wabo kuli Jehova. Ambweni bakanjila Cikolo Cabakambausi ba Bwami naa kuunka kuyoobelekela kubusena kubulide. Aboobo ikuti bukkale bwanu kabumuzumizya, eeyi nimbaakani mbotu njomukonzya kulibikkila. Nkaambo bantu ba Jehova balajana nzila yakuyungizya mulimo wabo. (Mil. 16:9) Pele, ino mbuti kuti bukkale bwanu lino kabutamuzumizyi kucita boobo? Mutatyompwi pe akulimvwa kuti tamuyandiki kapati kwiinda baabo ibacikonzya. Ciyandika kapati nkuzumanana buyo kuliyumya. (Mt. 10:22) Kunze lyaboobo, mutalubi kuti mulamukkomanisya kapati Jehova ciindi nomuzumanana kumubelekela kusikila mpomugolela kweelana abukkale bwanu. Alimwi eeyi, nenzila iiyandika kapati iikonzya kumugwasya kuzumanana kutobela Jesu mwamana kubbapatizyigwa.—Int. 26:1.

12-13. Ncinzi ncomukonzya kucita ikuti busungu bwanu bwatalika kuceya? (1 Bakorinto 9:​16, 17) (Amubone kabbokesi kakuti “ Amuzumanane Mumuzundano.”)

¹² Ncinzi ncomweelede kucita ikuti kamulimvwa kuti tamucipaili kuzwa ansi aamoyo, naa kuti mulimo wakukambauka tamucuukkomanini mbuli kaindi? Mbuti kuti akwalo kubala Bbaibbele tamucikukkomanini mbuli kaindi? Ikuti mwatalika kulimvwa boobu mwamana kubbapatizyigwa, tamweelede kuyeeya kuti tamucijisi muuya wa Jehova. Mbwaanga tatulondokede, tulakonzya kucinca-cinca mbotulimvwa. Kayi bakati mazuba ngunamasandu. Ikuti busungu bwanu bwatalika kuceya, amuzinzibale kuyeeya cikozyanyo camwaapostolo Paulo. Nokuba kuti wakali kusolekesya kumwiiya Jesu, wakalizyi kuti zimwi ziindi luyandisisyo lwakucita zintu nzyaakali kuyanda, lwakali kukonzya kuceya. (Amubale 1 Bakorinto 9:​16, 17.) Mane  buya wakaamba kuti: “Ikuti ndilisinikizya buya, alyalo eelyo ndilijisi bubanzi mbondakapegwa.” Munzila imwi, Paulo wakali kupandulula kuti wakalikanzide kuzuzikizya mulimo wakwe tacikwe makani ambwaakali kulimvwa aciindi eeco.

¹³ Mbubwenya buyo, tamweelede kwiile kucita zintu kweelana ambomulimvwa. Muciindi caboobo, amube amakanze aakucita ciluzi noliba leelyo nomutajisi luyandisisyo lwakucicita. Nkaambo kuti mwazumanana kucita boobo, mukuya kwaciindi muyooba aluyandisisyo lwakunoocita ciluzi. Aboobo, kuba abubambe busitikide bwakucita ciiyo canu nobeni, kupaila, kujanika kumiswaangano alimwi akukambauka, kuyoomugwasya kuzumanana kutobela Jesu mwamana kubbapatizyigwa. Kunze lyaboobo, bakwesu abacizyi baakubona mbomuliyumya mukubelekela Jehova, abalo bayookulwaizyigwa.—1Tes. 5:11.

“AMUZUMANANE KULISUNKA . . . AMUZUMANANE KULILINGULA”

14. Ncinzi ncomweelede kunoocita ciindi aciindi? Nkaambo nzi? (2 Bakorinto 13:5)

¹⁴ Mwamana kubbapatizyigwa, cilayandika kapati kuzumanana kulilingula. (Amubale 2 Bakorinto 13:5.) Ciindi aciindi, cilayandika kulilingula kutegwa mubone naa mulapaila buzuba abuzuba, kubala akwiiya Bbaibbele, kujanika kumiswaangano alimwi akutola lubazu mumulimo wakukambauka. Amusoleke kujana nzila mbomukonzya kugwasyigwa kapati azintu eezyi. Mucikozyanyo, amulibuzye mibuzyo mbuli yakuti: ‘Sena ndilakonzya kubapandulwida bamwi njiisyo zyantalisyo zyamu Bbaibbele? Sena kuli nzila zikonzya kupa kuti kandikukkomanina kapati kukambauka? Ino mipailo yangu ili buti, sena ilatondezya kuti ndilamusyoma Jehova cakumaninina? Sena ndilajanika lyoonse kumiswaangano ya Bunakristo? Ncinzi cikonzya kundigwasya kuti kandibikkila kapati maano kumiswaangano alimwi akutola lubazu?’

15-16. Ino mwaiya nzi kucakuluula camukwesu umwi kujatikizya kuzunda masunko?

¹⁵ Cilayandika kapati kuzyiba kulezya kwanu. Mucikozyanyo, mukwesu Robert wakaamba cakuluula citondezya mbokayandika kaambo aaka. Wakaamba kuti: “Nondakajisi myaka yakuma 20 yakuzyalwa, ndakali kubeleka. Mpoonya bumwi buzuba notwakakotoka, mubelesima umwi musimbi wakanditamba kuŋanda yakwe. Wakandaambila kuti tunooli buyo tolikke alimwi ‘tuyoolikkomanisya.’ Kumatalikilo, ndakasola kukaka-kaka pele tiindakasinizyide. Kumane, kumamanino ndendilyo nondakamwaambila cakusinizya kuti tandiyandi, mpoonya akumupandulwida kaambo ncondakakakila.” Cikkomanisya ncakuti, mukwesu Robert wakacikonzya kulizunda sunko eeli alimwi wakacita  kabotu. Pele kumbele naakayeeya kujatikizya ceeci cakacitika, wakabona kuti kubota naakacita zintu munzila yiindene. Wakaamba kuti: “Tiindakafwambaana kukaka cakusinizya mbuli mbwaakacita Josefa kuli muka Potifara. (Matl. 39:​7-9) Alimwi buya ndakagambwa kubona mbocakandikatazya kumwaambila kuti tandiyandi mubelesima. Eeci cakandigwasya kubona kuti ndakali kuyandika kuyumya cilongwe cangu a Jehova.”

¹⁶ Kulilingula mbuli mbwaakacita mukwesu Robert kulakonzya kumugwasya kapati. Noliba leelyo nomwacikonzya kulizunda sunko limwi, inga cabota kulibuzya kuti, ‘Ino canditolela ciindi cilamfwu buti kwaamba kuti tandiyandi?’ Ikuti mwabona kuti kuli mpomuyandika kubambulula, mutatyompwi pe. Muciindi caboobo, amukkomane kuti lino mwakuzyiba kulezya kwanu. Mpoonya amupaile kuli Jehova kujatikizya kulezya ooko akucita zintu zikonzya kumugwasya kupona kweelana azyeelelo zyakwe zyakulilemeka.—Int. 139:​23, 24.

17. Ino zina lya Jehova lyakajatikizyidwe buti mucakuluula camukwesu Robert?

¹⁷ Kuli acimbi ncotukonzya kwiiya kucakuluula camukwesu Robert. Wakazumanana kwaamba kuti: “Nondakamukakila mubelesima uulya musimbi, wakandaambila kuti, ‘Waupasa musunko!’ Mpoonya ndakamubuzya ncaakali kupandulula. Kumane wakandaambila kuti mweenzinyina umwi iwakali Kamboni kaindi, wakamwaambilide kuti Bakamboni boonse bakubusi balacita zibi cakusisikizya kufwumbwa buyo balijana mubukkale bukonzya kubapa kucita boobo. Aboobo wakayanda kuti andisunke kutegwa abone naa inga ndacita buti. Nondakazyiba oobo, ndakakkomana kapati nkaambo ndakapa kuti zina lya Jehova lilemekwe.”

18. Ncinzi ncomukanzide kucita mwamana kubbapatizyigwa? (Amubone kabbokesi kakuti “ Zibalo Nzyomukonzya Kukkomanina.”)

¹⁸ Ciindi nomulyaaba kuli Jehova akubbapatizyigwa, mutondezya kuti mulayanda kulisalazya zina lyakwe tacikwe makani acikonzya kumucitikila. Alimwi amuzyibe kuti Jehova ulaabwene mapenzi amasunko ngomuliyumya. Aboobo, uyoomulongezya akaambo kakusolekesya nkomucita kutegwa muzumanane kusyomeka. Kunze lyaboobo, amusyome kuti kwiinda mukubelesya muuya wakwe uusalala uyoomupa nguzu zyakucikonzya kucita boobo. (Lk. 11:​11-13) Kwiinda mukugwasyigwa a Jehova, muyoocikonzya kuzumanana kutobela Jesu mwamana kubbapatizyigwa.