1. Ncinzi ncobakonzya kulibuzya babelesi ba Jehova basyomeka bamwi?

 EELO kaka cilakkomanisya kuzyiba kuti Jehova ulabakkomanina bantu bakwe! Kayi Bbaibbele lyaamba kuti: “Jehova ulabakkomanina bantu bakwe.” (Int. 149:4) Nokuba boobo, zimwi ziindi bamwi balatyompwa kapati cakuti balakonzya kutalika kulibuzya kuti, ‘Mwati Jehova ulandikkomanina buya mebo?’ Bunji bwabantu baambidwe mu Bbaibbele ibakali kumubelekela Jehova cakusyomeka, zimwi ziindi abalo bakali kulimvwa boobo.—1Sam. 1:​6-10; Job. 29:​2, 4; Int. 51:11.

2. Mbaani bakkomaninwa a Jehova?

² Cakutainda mumbali, Bbaibbele litondezya kuti bantu batalondokede balakonzya kukkomaninwa a Jehova. Mubuti? Tulakonzya kucita oobo kwiinda mukuba alusyomo muli Jesu Kristo akubbapatizyigwa. (Joh. 3:16) Kwiinda mukucita boobo, tutondezya bamwi kuti twakeempwa kuzibi zyesu akusyomezya Leza kuti tuyanda kucita kuyanda kwakwe. (Mil. 2:38; 3:19) Alimwi Jehova ulakkomana kapati ciindi notubweza ntaamu eezyi kutegwa tube aacilongwe anguwe. Aboobo kufwumbwa buyo kuti twazumanana kupona kweelana acikonke cesu cakulyaaba, Jehova unootukkomanina akutubona kuti tuli balongwe bakwe.—Int. 25:14.

3. Mibuzyo nzi yotatwe njotutiilange-lange?

³ Nkaambo nzi bamwi zimwi ziindi ncobakonzya kulimvwa kuti Leza tabakkomanini? Ino Jehova utondezya buti kuti ulatukkomanina? Alimwi mbuti Munakristo mbwakonzya kuba alusyomo lwakuti ulakkomaninwa a Leza?

IKAAMBO BAMWI NCOBAKONZYA KULIMVWA KUTI JEHOVA TABAKKOMANINI

4-5. Nokuba kuti tulimvwa kubula mpindu, ncinzi ncotweelede kuyeeya?

⁴ Kuzwa ciindi notwakacili bana, tobamwi twali kulwana penzi lyakulimvwa kubula mpindu. (Int. 88:15) Mucikozyanyo, mukwesu Adrián wakaamba kuti: “Lyoonse ndali kulimvwa kubula  mpindu. Ndilayeeya kandicili mwana, ndakali kupailila kuti mukwasyi wangu ukacikonzye kuyoonjila mu Paradaiso, nokuba kuti mebo lwangu ndakali kulimvwa kuti tandeeleli.” Mukwesu Tony iwakakomenena mumukwasyi uutali wa Bakamboni wakaamba kuti: “Bazyali bangu kunyina buzuba nobakandaambilide kuti balandiyanda naa kundikkomanina. Aboobo eeci cakali kundipa kulimvwa kuti zyoonse nzyondakali kucita tiizyakali kubakkomanisya.”

⁵ Ikuti zimwi ziindi katulimvwa kubula mpindu, tweelede kuyeeya kuti Jehova lwakwe nguwakatukwela kulinguwe. (Joh. 6:44) Kuli bube bubotu mbwabona mulindiswe bwalo mbotutakonzyi kubona swebo, alimwi ulizizyi zili mumoyo wesu. (1Sam. 16:7; 2Mak. 6:30) Aboobo tulakonzya kumusyoma ciindi naamba kuti tulayandika kapati.—1Joh. 3:​19, 20.

6. Ino mwaapostolo Paulo wakalimvwa buti kujatikizya kulubizya kwakwe?

⁶ Katutanaiya kasimpe, ambweni tobamwi twakacita zintu zicitupa kulimvwa kuba amulandu. (1Pet. 4:3) Nobaba Banakristo basyomeka balakonzya kuti kabacilwana kulombozya zintu zitali kabotu. Ino mbuti kujatikizya ndinywe? Sena zimwi ziindi mulimvwa kuti Jehova takonzyi kumulekelela? Ikuti kacili boobo, mulakonzya kuumbulizyigwa kuzyiba kuti babelesi ba Jehova basyomeka bamwi abalo mbobakali kulimvwa oobo. Mucikozyanyo, mwaapostolo Paulo wakali kulimvwa bubi kapati naakali kuyeeya kulubizya kwakwe. (Rom. 7:24) Masimpe kuti Paulo wakeempwa zibi zyakwe mane buya akubbapatizyigwa. Pele wakalyaamba kuti nguwakali “muniini akati kabaapostolo boonse” alimwi akuti ‘nguwakaindide’ kuba sizibi.—1Kor. 15:9; 1Tim. 1:15.

7. Ncinzi ncotweelede kuyeeya kujatikizya zibi nzyotwakacita kaindi?

⁷ Taateesu wakujulu usyomezya kuti uyootulekelela ikuti naa tweempwa. (Int. 86:5) Aboobo, ikuti naa twakeempwa ncobeni kuzibi nzyotwakacita, tulakonzya kuba alusyomo lwakuti Jehova wakatulekelela.—Kol. 2:13.

8-9. Mbuti mbotukonzya kuleka kulimvwa kuti kunyina ncotukonzya kucita kutegwa tumukkomanisye Jehova?

⁸ Toonse tulayanda kumubelekela Jehova kusikila mpotugolela. Nokuba boobo, bamwi balakonzya kutalika kulimvwa kuti kunyina ncobakonzya kucita cikonzya kupa kuti Jehova abakkomanine. Mucikozyanyo, mucizyi Amanda wakaamba kuti: “Kanji-kanji inga ndilaakuyeeya kuti kubelekela Jehova kusikila mpondigolela, lyoonse caamba kumucitila zintu zinji. Aboobo lyoonse inga ndiyanda kucita zinji kwiinda zeezyo nzyondikonzya. Mpoonya kuti ndaalilwa, inga ndiyeeya kuti Jehova watyompwa kapati mbubwenya mbondilimvwa andime.”

⁹ Mbuti mbotukonzya kuleka kulimvwa kuti kunyina ncotukonzya kucita kutegwa tumukkomanisye Jehova? Ncotweelede kuyeeya ncakuti, Jehova ngu Leza uumvwisya. Kunyina nalangila kuti tucite zintu nzyotutakonzyi kucita. Pele ulalumba kapati akaambo kazintu zyoonse nzyotumucitila kufwumbwa buyo kuti twasolekesya kusikila mpotugolela. Kunze lyaboobo, tweelede kuzinzibala kuyeeya zikozyanyo zyamu Bbaibbele zyabantu ibakamubelekela Jehova camoyo woonse. Mucikozyanyo, amuyeeye kujatikizya Paulo. Wakalitakata kubeleka kwamyaka minji, keenda misinzo milamfwu akutalisya mbungano zinji. Pele ciindi zintu nozyakacinca mubuumi bwakwe akutalika kwaalilwa kukambauka mbuli mbwaakali kucita kaindi, sena eeci cakali kwaamba kuti Jehova tanaakacili kumukkomanina? Peepe. Paulo wakazumanana kucita nzyaakali kukonzya, alimwi Jehova wakamulongezya kapati. (Mil. 28:​30, 31) Mbubwenya buyo, nzyotukonzya kupa Jehova zilakonzya kucinca kweelana abukkale. Pele ciyandika kapati kulinguwe, makanze ngotujisi ciindi notumubelekela. Lino amuleke tubandike nzila zimwi Jehova mwatondezya kuti ulatukkomanina.

 INO JEHOVA UTONDEZYA BUTI KUTI ULATUKKOMANINA?

10. Mbuti “mbotumumvwa” Jehova katwaambila kuti ulatukkomanina? (Johane 16:27)

¹⁰ Kwiinda mukutupa Bbaibbele. Jehova ulajana nzila yakutondezya babelesi bakwe kuti ulabayanda alimwi akubakkomanina. Mucikozyanyo, Magwalo alaamba ziindi zyobilo naakaambila Jesu kuti Mwanaakwe ngwaakali kuyandisya akukkomanina. (Mt. 3:17; 17:5) Sena andinywe inga mwayanda kumvwa Jehova kamwaambila kuti ulamukkomanina? Mazuba aano, Jehova tabandiki andiswe kuzwa kujulu, pele ulacita oobo kwiinda mu Jwi lyakwe, Bbaibbele. Tulakonzya “kulimvwa” jwi lya Jehova ilyaamba kuti ulatukkomanina ciindi notubala majwi aa Jesu aali mu Mabbuku aa Makani Mabotu. (Amubale Johane 16:27.) Kayi Jesu wakabwiiya bube bwa Bausyi cakumaninina. Aboobo, ciindi notubala kuti Jesu wakatondezya kuti ulabakkomanina basikumutobela basyomeka nokuba kuti tiibakalondokede, tulakonzya kweezeezya kuti ngu Jehova uutwaambila majwi aayo.—Joh. 15:​9, 15.

11. Nkaambo nzi kujana mapenzi ncocitali citondezyo cakuti Jehova wacileka kutukkomanina? (Jakobo 1:12)

¹¹ Kwiinda muzintu nzyacita. Jehova uliyandide kapati kutugwasya akutupa zintu nzyotuyandika kumubili. Zimwi ziindi, ulakonzya kuzumizya mapenzi kutucitikila mbuli mbwaakacita kuli Jobu. (Job. 1:​8-11) Pele eeci tacaambi kuti Leza waleka kutukkomanina. Muciindi caboobo, mapenzi atupa coolwe cakutondezya mbotumuyanda kapati Jehova alimwi akumusyoma. (Amubale Jakobo 1:12.) Alimwi ciindi notuli mumapenzi, tuyoobona mbwatuyanda ambwatugwasya kuliyumya.

12. Ncinzi ncotukonzya kwiiya kuli cakamucitikila mukwesu Dmitrii?

¹² Amumvwe cakamucitikila mukwesu Dmitrii waku Asia. Wakamaninwa mulimo alimwi wakakkala kwamyezi minji katajani uumbi. Aboobo wakasala kuyungizya mulimo wakwe wakukambauka, ikutondezya kuti wakali kumusyoma Jehova. Wakazumanana kukkala kwamyezi minji katajani mulimo. Kumane wakatalika kuciswa bulwazi bumwi bukatazya kapati cakuti wakali kwiile kulala buyo. Mpoonya wakatalika kuyeeya kuti tanaakacili mulumi naa muzyali mubotu alimwi akudooneka naa Jehova wakacili kumukkomanina. Pele bumwi buzuba kana kabo kasimbi kakapulinta majwi aali kulugwalo lwa Isaya 30:15 aamba kuti: “Mulaba anguzu kufwumbwa buyo kuti mubatame akuba alusyomo.” Kumane kakaleta pepa eelyo ndyokakapulinta kuli bausyi akwaamba kuti, “Bataata,  kufwumbwa mwalimvwa bubi, kamuyeeya buyo lugwalo oolu.” Mukwesu Dmitrii wakakabona kaambo, akumulumba Jehova akaambo kakuti mukwasyi wakwe wakacili kujisi cakulya, zyakusama alimwi abusena bwakukkala. Wakaamba kuti: “Mebo ncondakeelede buyo kucita, nkubatama akuzumanana kumusyoma Leza.” Ikuti naa andinywe muli mubukkale bukozyenye aboobu, amusyome kuti Jehova ulamubikkila maano alimwi uyoomugwasya kutegwa mucikonzye kuliyumya.

13. Mbaani Jehova mbakonzya kubelesya kutondezya kuti ulatukkomanina? Muunzila nzi mobacita oobo?

¹³ Kwiinda mubakombima. Jehova ulakonzya kubelesya bakwesu abacizyi kutondezya kuti ulatukkomanina. Mucikozyanyo, ulakonzya kupa bamwi kutwaambila majwi aakulwaizya aciindi ceelede. Eeci ncecakamucitikila mucizyi umwi waku Asia ciindi naakatyompedwe kapati. Wakamaninwa mulimo alimwi wakatalika kuciswa. Kumane balumi bakwe bakacita cibi cipati aboobo tiibakacili baalu. Mucizyi ooyu wakaamba kuti: “Cakandaalila kumvwisya kaambo zintu zili boobu ncozyakali kundicitikila. Ndakatalika kuyeeya kuti ambweni kuli cibi ncondakacita calo icakapa kuti Jehova aleke kundikkomanina.” Mucizyi ooyu wakapaila kuli Jehova kulomba kuti amutondezye kuti ulamukkomanina. Ino Jehova wakacita buti? Mucizyi wakaamba kuti: “Baalu bakabandika andime akundigwasya kubona kuti Jehova wakacili kundiyanda akundikkomanina.” Pele nokwakainda ciindi cili mbocibede, mucizyi ooyu alimwi wakalomba Jehova kuti amugwasye. Wakaamba kuti: “Buzuba mbubwenya oobu ndakatambula lugwalo kuzwa kubakwesu abacizyi mumbungano. Nondakali kubala majwi aabo aawumbulizya, ndakalimvwa kuti Jehova wakaumvwa mupailo wangu.” Masimpe, Jehova ulatondezya kuti ulatukkomanina kwiinda mumajwi aakulwaizya ngobaamba bamwi.—Int. 10:17.

14. Ninzila nzi ayimbi Jehova mwatondezya kuti ulatukkomanina?

 ¹⁴ Jehova alimwi ulatondezya kuti ulatukkomanina kwiinda mukubelesya bakombima kutupa lulayo ciindi nokwayandika. Mucikozyanyo, mumwaanda wamyaka wakusaanguna, Jehova wakabelesya mwaapostolo Paulo kulembela bakombinyina magwalo aali 14. Mumagwalo aaya, Paulo wakapa bakombinyina lulayo lugaminide pele munzila yaluyando. Nkaambo nzi Jehova ncaakasololela Paulo kupa lulayo oolu? Nkaambo Jehova ngu Taata mubotu alimwi ulabalaya bana bakwe aabo ‘mbakkomanina.’ (Tus. 3:​11, 12) Aboobo, ikuti umwi watupa lulayo luzwa mu Bbaibbele, ncitondezyo cakuti Jehova ucituyanda alimwi akutukkomanina, ikutali kuti waleka kutuyanda. (Heb. 12:6) Nzintu nzi azimbi izitondezya kuti Jehova ulatukkomanina?

ZINTU AZIMBI IZITONDEZYA KUTI JEHOVA ULATUKKOMANINA

15. Mbaani Jehova mbapa muuya uusalala? Nkaambo nzi eeci ncocikulwaizya?

¹⁵ Jehova ulabapa muuya uusalala aabo mbakkomanina. (Mt. 12:18) Aboobo tulakonzya kulibuzya kuti, ‘Sena ndilatondezya bube bumwi bwamucelo wamuuya mubuumi bwangu?’ Mucikozyanyo, sena mulabakkazikila moyo bamwi mazuba aano kwiinda leelyo nomwatakalina kumuzyiba Jehova? Mbomunooyaabuba abube oobu bubotu buboola akaambo kamuuya uusalala, muyooba masimpe kuti Jehova ulamukkomanina.—Amubone kabbokesi kakuti “ Mucelo Wamuuya . . . ”

16. Mbaani Jehova mbabelesya kukambauka makani mabotu? Ino eeci cimupa kulimvwa buti? (1 Batesalonika 2:4)

¹⁶ Jehova ulabapa mulimo wakukambauka makani mabotu aabo mbakkomanina. (Amubale 1 Batesalonika 2:4.) Amumvwe mbwaakagwasyigwa mucizyi Jocelyn akaambo kakwaambila bamwi makani mabotu. Bumwi buzuba, mucizyi Jocelyn wakabuka katyompedwe kapati. Wakaamba kuti: “Tiindakajisi nguzu alimwi ndakalimvwa kubula mulimo. Pele ndakali kucita bupainiya alimwi oobu mbobuzuba mbondakali kuunka mubukambausi. Aboobo ndakapaila akuunka.” Buzuba oobu mucizyi Jocelyn wakazyibana aba Mary, mukaintu mubombe walo iwakazumina kwiiya Bbaibbele. Nokwakainda myezi iili mbwiibede, ba Mary bakaamba kuti bakali kupaila kuli Leza kulomba lugwasyo ciindi ba Jocelyn nobakabaswaya. Ncinzi ncobakaiya ba Jocelyn kuli ceeci cakacitika? Bakaamba kuti: “Ndakalimvwa mbuli kuti Jehova wakali kundaambila kuti, ‘Ndilakukkomanina.’ ” Masimpe kuti, tabali boonse ibayakuuswiilila mulumbe ngotukambauka. Pele tulakonzya kuba masimpe kuti Jehova ulakkomana ciindi notusolekesya kwaambila bamwi makani mabotu.

17. Ncinzi ncomukonzya kwiiya kumucizyi Vicky kujatikizya cinunuzyo? (Intembauzyo 5:12)

¹⁷ Jehova ulacibelesya cinunuzyo kuli baabo mbakkomanina. (1Tim. 2:​5, 6) Pele ino mbuti kuti katucilimvwa kuti Jehova tatukkomanini, nokuba kuti tulijisi lusyomo mucinunuzyo alimwi twakabbapatizyigwa kale? Tweelede kuyeeya kuti, talili lyoonse notukonzya kusyoma mbotuyeeya, pele tulakonzya kumusyoma Jehova. Kayi aabo bajisi lusyomo mucinunuzyo ubabona kuti mbalulami alimwi usyomezya kuti uyoobalongezya. (Amubale Intembauzyo 5:12; Rom. 3:26) Kuzinzibala kuyeeya kujatikizya cinunuzyo kwakamugwasya kapati mucizyi Vicky. Bumwi buzuba, naakamana kuzinzibala kuyeeya kujatikizya cinunuzyo wakaamba kuti: “Kwaamba masimpe, Jehova wakandikkazikila moyo kwaciindi cilamfwu. . . . Pele cakali mbuli kuti ndakali kumwaambila kuti: ‘Luyando lwako ndusyoonto cakuti talukonzyi kusika kulindime. Cipaizyo ca Mwanaako tacikonzyi kuvwumba zibi zyangu.’” Aboobo kwiinda mukuzinzibala kuyeeya cipego cacinunuzyo, wakatalika kulimvwa kuyandwa a Jehova. Mbubwenya buyo, andiswe tuyoolimvwa kuyandwa a Jehova akuti ulatukkomanina kwiinda mukuzinzibala kuyeeya kujatikizya cinunuzyo.

18. Ncinzi ncotweelede kunooyeeya ikuti twazumanana kumuyanda Taateesu wakujulu?

¹⁸ Nokuba kuti twasolekesya kutobela nzyotwaiya mucibalo eeci, zimwi ziindi tulakonzya kutyompwa akutalika kudooneka naa ncobeni Jehova ulatukkomanina. Ikuti naa eeci cacitika, tweelede kuyeeya kuti ulabakkomanina ‘aabo ibazumanana kumuyanda.’ (Jak. 1:12) Aboobo amuzumanane kuyumya cilongwe canu a Jehova alimwi akubona nzila zyoonse nzyabelesya ikutondezya kuti ulamukkomanina. Lyoonse kamuyeeya kuti Jehova “tali kulamfwu kuli umwi aumwi wesu.”—Mil. 17:27.