1-2. Ncinzi muntu ncayelede kucita katanabbapatizyigwa?

 MUMYAKA iili 5 yainda, bantu bainda ku 1 miliyoni bakabbapatizyigwa akuba Bakamboni ba Jehova. Mbubwenya mbuli Timoteyo sikwiiya wamumwaanda wamyaka wakusaanguna, bunji bwabantu aaba, bakayiisyigwa kasimpe “kuzwa kubuvwanda.” (2Tim. 3:​14, 15) Pele bamwi bakaiya kabali bapati kale naa kabacembeede. Mucikozyanyo, mukaintu umwi iwakali kwiiya Bbaibbele a Bakamboni ba Jehova wakabbapatizyigwa kajisi myaka iili 97 yakuzyalwa.

² Ikuti kamuli sikwiiya Bbaibbele naa bazyali banu kabali Bakamboni, sena kuli nomuyeeya zyakubbapatizyigwa? Ikuti kacili boobo, eeyo nimbaakani mbotu kapati. Pele kamutanabbapatizyigwa, mweelede kusaanguna kulyaaba kuli Jehova. Aboobo, cibalo eeci cilabandika ncocaamba kulyaaba kuli Leza. Kunze lyaboobo, cilamugwasya kubona kaambo ncomuteelede kuwayawaya kubweza ntaamu eeyi alimwi akubbapatizyigwa ciindi nomwalibambila kucita boobo.

INO KULYAABA CAAMBA NZI?

3. Amupe zikozyanyo zyamu Bbaibbele zyabantu ibakaabidwe kuli Jehova.

³ Mu Bbaibbele, muntu iwakaabidwe kuli Jehova wakalisalidwe kubeleka mulimo waalubazu. Mucikozyanyo, bana Israyeli cakali cisi cakaabidwe kuli Jehova. Pele bana Israyeli bamwi bakalaabidwe kuli Jehova munzila yaalubazu. Mucikozyanyo, Aroni wakali kusama “citondezyo cisetekene cakulyaaba,” nkokuti citambala icakajisi mpande yangolida iiŋaima nkocili kumbele. Mpande yangolida eeyi yakali kutondezya kuti wakalisalidwe kubelekela Jehova munzila yaalubazu, nkokuti kuba  mupaizi mupati wabana Israyeli. (Lev. 8:9) Ba Naziri abalo bakalaabidwe kuli Jehova munzila yaalubazu. Ibbala lyakuti “mu Naziri,” lizwa kubbala lya Chihebrayo lyakuti nazirʹ lyalo ilyaamba kuti “Waandaanizyidwe,” naa “Waabidwe.” Ba Naziri bakeelede kutobela malailile aalubazu aakalembedwe mu Mulawo wa Musa.—My. 6:​2-8.

4. (a) Ncinzi ncomusala kucita ciindi nomulyaaba kuli Jehova? (b) Ino “kuliimya” caamba nzi? (Amubone acifwanikiso.)

⁴ Ciindi nomulyaaba kuli Jehova, musala kuba sikwiiya wa Jesu Kristo akubikka kuyanda kwa Leza mubusena bwakusaanguna mubuumi bwanu. Ino eeci cibikkilizya nzi? Jesu wakaamba kuti: “Ikuti umwi kayanda kunditobela, aliimye.” (Mt. 16:24) Majwi aa Chigiriki aakasandululwa kuti “aliimye” alimwi alakonzya kwaamba kuti “weelede kulikasya kuzintu zimwi.” Mbuli mubelesi wa Jehova uulyaabide, mweelede kukaka kucita cintu cili coonse citeendelani akuyanda kwakwe. (2Kor. 5:​14, 15) Eeci caamba kuti tweelede kwiikaka “milimo yanyama,” mbuli bwaamu. (Gal. 5:​19-21; 1Kor. 6:18) Pele sena kutobela malailile aaya inga kwapa kuti buumi bumuyumine? Peepe. Ikuti naa mulamuyanda ncobeni Jehova alimwi mulisinizyide kuti kumvwida milawo yakwe kugwasya ndinywe, tacikamuyumini pe. (Int. 119:97; Is. 48:​17, 18) Mukwesu umwi uutegwa Nicholas wakaamba kuti, “Mulakonzya kubona zyeelelo zya Jehova kuba mbuli bwaanda bwantolongo bumukasya kucita zintu nzyomuyanda naa lubaya imuli basyuumbwa lwalo ilumukwabilila kuti batamulumi.”

5. (a) Mbuti mbomukonzya kulyaaba kuli Jehova? (b) Ino kulyaaba alimwi akubbapatizyigwa ziindene buti? (Amubone acifwanikiso.)

⁵ Mbuti mbomukonzya kulyaaba kuli Jehova? Mulakonzya kucita oobo kwiinda mukupaila kulinguwe kumusyomezya kuti munookomba buyo nguwe alikke alimwi akubikka  kuyanda kwakwe mubusena bwakusaanguna mubuumi bwanu. Mubwini, inga musyomezya Jehova kuti muyoozumanana kumuyanda ‘amoyo wanu woonse, abuumi bwanu boonse, amizeezo yanu yoonse alimwi anguzu zyanu zyoonse.’ (Mk. 12:30) Aboobo, mulalyaaba kuli Jehova kamuli buyo nyolikke. Pele lubbapatizyo lucitilwa kubuleya bantu kabalangilila ikutondezya kuti mwakalyaaba. Kulyaaba kwanu ncikonke ciyandika kapati. Aboobo mweelede kuba ambaakani yakucizuzikizya cikonke canu alimwi buya awalo Jehova eeco ncayanda kuti mucite.—Muk. 5:​4, 5.

NKAAMBO NZI NCOMWEELEDE KULYAABA KULI JEHOVA?

6. Nkaambo nzi kapati keelede kupa muntu kulyaaba kuli Jehova?

⁶ Kaambo kapati ncomweelede kulyaaba kuli Jehova nkakuti mulamuyanda. Pele luyando lwanu talweelede kuba akaambo buyo kambomulimvwa. Muciindi caboobo, lweelede kuti kaluyeeme ‘aluzyibo lwini-lwini’ alimwi “akumvwisya zintu zyakumuuya,” nkokuti zintu nzyomwakaiya kujatikizya Jehova zyalo izyakapa kuti luyando ndomujisi kulinguwe luyume. (Kol. 1:9) Kweelede kuti kwiiya Magwalo kwakamupa kuba alusyomo lwakuti (1) Jehova nkwali ncobeni, (2) Bbaibbele ndi Jwi lyakwe, alimwi akuti (3) ubelesya mbunga yakwe kuzuzikizya kuyanda kwakwe.

7. Ncinzi ncotweelede kucita katutanalyaaba kuli Leza?

⁷ Aabo balyaaba kuli Jehova beelede kuzizyiba njiisyo zyantalisyo izili mu Jwi lya Leza alimwi akupona kweelana azyeelelo zyandilyo. Kunze lyaboobo, balasolekesya kwaambila bamwi zintu nzyobakaiya. (Mt. 28:​19, 20) Aboobo luyando lwabo kuli Jehova lwayuma kapati, alimwi baliyandide kukomba buyo nguwe  alikke. Sena andinywe mbomulimvwa oobo? Ikuti kamumuyanda ncobeni Jehova amoyo wanu woonse, tamukalyaabi akubbapatizyigwa akaambo buyo kakuyanda kukkomanisya sikumuyiisya Bbaibbele naa bazyali banu, naa akaambo buyo kakuti eeco ncobacita beenzinyoko boonse.

8. Mbuti kulumba mbokumukulwaizya kusala kulyaaba kuli Jehova? (Intembauzyo 116:​12-14)

⁸ Kuzinzibala kuyeeya zintu zyoonse nzyaamucitila Jehova, kuyoomupa kuti muyande kulyaaba kulinguwe. (Amubale Intembauzyo 116:​12-14.) Cakweelela, Bbaibbele lyaamba Jehova kuti nguupa “cipego cibotu cili coonse alimwi acipego cilondokede cili coonse.” (Jak. 1:17) Alimwi cipego ciinda zyoonse, ncipaizyo ca Mwanaakwe, Jesu. Amuciyeeyele buyo! Cinunuzyo cakapa kuti mucikonzye kuba acilongwe a Jehova. Kunze lyaboobo, cakamupa kuba abulangizi bwakuyoopona kukabe kutamani. (1Joh. 4:​9, 10, 19) Aboobo kulyaaba kwanu kuli Jehova ninzila imwi yakutondezya kuti mulalumba kapati akaambo kaluyando lwakwe kwiinda mukumupa cinunuzyo eeci alimwi azilongezyo zimbi zyoonse. (Dt. 16:17; 2Kor. 5:15) Makani aaya alajanika mubbuku lyakuti Amupone Kukabe Kutamani! ciiyo 46, kaambo 4, ikajisi akavidiyo kamaminiti otatwe kakuti Kutuula Zipego Zyanu Kuli Leza.

SENA MULILIBAMBILIDE KULYAABA AKUBBAPATIZYIGWA?

9. Nkaambo nzi muntu ncateelede kulimvwa kusinikizyigwa buya kulyaaba?

⁹ Mulakonzya kulimvwa kuti tamulibambilide kulyaaba akubbapatizyigwa. Ambweni muciyandika kubambulula buumi bwanu kutegwa bweendelane azyeelelo zya Jehova, naa ambweni muciyandika ciindi cinji cakuyumya lusyomo lwanu. (Kol. 2:​6, 7) Bwini mbwakuti, basikwiiya baliindene mbobayaambele kumuuya alimwi tabali bana boonse ibanga bayanda kulyaaba akubbapatizyigwa amusela omwe. Aboobo, amusole kubona mbazu momuyandika kubambulula ikutali kulyeezyanisya abamwi.—Gal. 6:​4, 5.

10. Ncinzi ncomukonzya kucita ikuti mwabona kuti tamunalibambila kulyaaba akubbapatizyigwa? (Amubone akabbokesi kakuti “ Kubakubusi Ibakomenena Mukasimpe.”)

¹⁰ Nokuba kuti mwabona kuti tamunalibambila kulyaaba kuli Jehova, eeyi yeelede kuzumanana kuba mbaakani yanu. Amumulombe Jehova kuti amugwasye kubambulula oomo muyandika. (Flp. 2:13; 3:16) Alimwi amube masimpe kuti uyakuumvwa mupailo wanu akumugwasya.—1Joh. 5:14.

IKAAMBO BAMWI NCOBAWAYAWAYA

11. Ino Jehova uyootugwasya buti kuzumanana kusyomeka kulinguwe?

¹¹ Bamwi ibalibambilide buya kulyaaba akubbapatizyigwa, balawayawaya kubweza ntaamu eeyi. Ambweni akaambo kakuyoowa kuti bamana kubbapatizyigwa balakonzya kucita cibi cipati akugwisyigwa mumbungano. Ikuti naa eeci ncecimupa kuyoowa, amube alusyomo lwakuti Jehova uyoomupa zyoonse nzyomuyandika ‘kutegwa kamweenda mbwayanda akumukkomanisya cakumaninina.’ (Kol. 1:10) Alimwi uyoomupa nguzu zyakucikonzya kucita ciluzi. Tuli masimpe kuti uyoocita oobo, nkaambo mbanji mbaagwasya kale bamwi kucikonzya kucita ciluzi. (1Kor. 10:13) Nkakaambo kaako bantu ibagwisyigwa mumbungano ya Bunakristo ncobali basyoonto buyo. Kayi Jehova ulabagwasya babelesi bakwe kuzumanana kusyomeka.

12. Mbuti mbotukonzya kweeleba kucita cibi cipati?

¹² Bantu boonse batalondokede balasunkwa kucita zintu zitali kabotu. (Jak. 1:14) Nokuba boobo, mulakonzya kusala ncomweelede kucita ciindi nomwasunkwa. Bwini mbwakuti  ndinywe mujisi nguzu zyakusala mbomuyanda kupona. Nokuba kuti bamwi balakonzya kwaamba kuti inga tiimwacikonzya kucita boobo, pele mulakonzya kwiiya kukukaka kulombozya kutaluzi. Alimwi noliba leelyo nomwasunkwa kucita cibi, mulakonzya kusala kutacicita. Lino kutegwa mucikonzye kucita boobo, mweelede kupaila buzuba abuzuba. Amube abubambe busitikide bwakwiiya Jwi lya Leza. Kamujanika lyoonse kumiswaangano ya Bunakristo akwaambila bamwi nzyomusyoma. Kucita zintu eezyi lyoonse, kuyoomugwasya kuzumanana kupona kweelana acikonke canu cakulyaaba. Alimwi mutalubi kuti Jehova uyoomugwasya kucita boobo.—Gal. 5:16.

13. Ncikozyanyo cili buti ncaakatusiila Josefa?

¹³ Muyoocikonzya kupona kweelana acikonke canu kuti mwazyibila limwi ncomweelede kucita ciindi nomwasunkwa. Bbaibbele lilatwaambila bantu banji ibakacita boobo nokuba kuti abalo tiibakalondokede. Mucikozyanyo, mukaintu wa Potifara wakasola kumoongelezya Josefa cakwiinduluka-induluka. Pele Josefa wakalizyi kale ncaakeelede kucita. Bbaibbele litwaambila kuti “wakakaka,” mane buya wakaamba kuti: “Ino inga ndacitila nzi cibi cipati cili boobu akubisizya Leza?” (Matl. 39:​8-10) Cilisalede kuti, Josefa wakalizyi kale ncaakeelede kucita noliba leelyo naatakaningasunkwa. Eeci cakapa kuti acikonzye kucita ciluzi.

14. Ncinzi cikonzya kumugwasya kuzunda masunko?

¹⁴ Mbuti mbomukonzya kwiiya cikozyanyo ca Josefa? Mulakonzya kucita oobo kwiinda mukusalila limwi lino ncomweelede kucita ciindi nomwasunkwa. Amube acilengwa cakufwambaana kukaka zintu nzyasulide Jehova alimwi akutaziyeeya buya. (Int. 97:10; 119:165) Kwiinda mukucita boobo, kunyina nomuyoobisya ciindi mwaakusunkwa. Nkaambo munoozyi kale ncomweelede kucita.

15. Mbuti muntu mbwakonzya kutondezya kuti ‘ulamuyandaula Jehova cabusungu’? (Bahebrayo 11:6)

¹⁵ Ambweni nywebo mulizyi buya kuti mwakakajana kasimpe alimwi akuti mulayanda kumubelekela Jehova amoyo wanu woonse, pele mucilimvwa kuti tamunalibambila kulyaaba akubbapatizyigwa. Ikuti kamuli mubukkale buli boobu, mulakonzya kucita ceeco ncaakacita Mwami Davida. Mulakonzya kumulomba Jehova kuti: “O Leza, kondilanga-langa, uuzyibe moyo wangu. Kondilingula, wiizyibe mizeezo iindilibilisya. Kobona naa mukati kangu kuli nzila iili yoonse mbyaabi, alimwi  kondeenzya munzila iiliko lyoonse mane kukabe kutamani.” (Int. 139:​23, 24) Jehova ulabalongezya aabo “bamuyandaula cabusungu.” Aboobo, kubeleka canguzu nkomucita kutegwa musike ambaakani yakulyaaba akubbapatizyigwa, ncitondezyo cakuti mulacita oobo.—Amubale Bahebrayo 11:6.

AMUZUMANANE KUYUMYA CILONGWE CANU A JEHOVA

16-17. Mbuti Jehova mbwabakwela aabo ibakakomenena mukasimpe? (Johane 6:44)

¹⁶ Jesu wakaamba kuti basikwiiya bakwe bakwelwa a Jehova. (Amubale Johane 6:44.) Amuyeeye buyo kaambo aaka mbokakkomanisya alimwi ancokaamba kulindinywe. Jehova ulabona bube bumwi bubotu mbwajisi muntu umwi aumwi ngwakwela kulinguwe. Ubona muntu ooyo kuba “ilubono lwakwe luyandisi,” naa “icintu cakwe ciyandisi.” (Dt. 7:6; bupanduluzi buyungizyidwe.) Oobo mbwamubona andinywe.

¹⁷ Ambweni bazyali banu Mbaakamboni ba Jehova kale. Aboobo mulakonzya kulimvwa kuti mubelekela Jehova akaambo buyo kakuti bazyali banu mbobacita, ikutali kuti Jehova nguwakamukwela. Nokuba boobo, Bbaibbele lyaamba kuti: “Amuswene kuli Leza, eelyo awalo ulaswena kulindinywe.” (Jak. 4:8; 1Mak. 28:9) Ikuti nywebo mwabweza ntaamu yakuswena kuli Jehova, awalo uyooswena kulindinywe. Kayi Jehova tamuboni kuba buyo cibeela camukwasyi wanu. Pele nguukwela muntu umwi aumwi kubikkilizya abaabo ibakakomenena mukasimpe. Ikuti muntu ooyo wabweza ntaamu yakuswena kuli Jehova, awalo ulaswena kulinguwe kweelana ambotwabona kulugwalo lwa Jakobo 4:8.—Amweezyanisye a 2 Batesalonika 2:13.

18. Ncinzi ncotuyoobandika mucibalo citobela? (Intembauzyo 40:8)

¹⁸ Ciindi nomwalyaaba kuli Jehova akubbapatizyigwa, mutondezya bube bwa Jesu. Cakulisungula, wakalyaaba kuli Bausyi kucita kufwumbwa ncaakaambilwa. (Amubale Intembauzyo 40:8; Heb. 10:7) Mucibalo citobela, tuyoobandika cikonzya kumugwasya kuzumanana kumubelekela Jehova cakusyomeka mwamana kubbapatizyigwa.