1, 2. (a) Ino Bakamboni ba Jehova balimvwa buti kujatikizya Bbaibbele? (b) Ino ncibeela nzi camu Bbaibbele ncomuyandisya kapati?

MBOTULI Bakamboni ba Jehova, tulaliyanda Bbaibbele. Lilatuumbulizya, lilatupa bulangizi alimwi amalailile ngotukonzya kusyoma. (Baroma 15:4) Talili bbuku lijisi mizeezo yabantu pe, pele “majwi aa Leza.”—1 Batesalonika 2:13.

² Cakutadooneka, toonse tulijisi zibeela zyamu Bbaibbele nzyotuyandisya. Bantu bamwi bayandisya mabbuku aa Makani Mabotu nkaambo atondezya bube bubotu bwa Jehova ibwakalibonya kwiinda muli Jesu. (Johane 14:9) Bamwi bayandisya mabbuku aabusinsimi mbuli bbuku lya Ciyubunuzyo, ilitondezya “izintu zyeelede kucitika lino-lino.” (Ciyubunuzyo 1:1) Bamwi balaumbulizyigwa nobabala bbuku lya Intembauzyo, pele bamwi balakkomana kubala lulayo lugwasya ilujanika mubbuku lya Tusimpi. Masimpe ngakuti, Ibbaibbele ndibbuku lyabantu boonse.

3, 4. (a) Ino tulimvwa buti kujatikizya mabbuku eesu? (b) Ino mabbuku amavidiyo aali buti ngotutambula aabambilidwe bantu baindene-indene?

³ Akaambo kakuti tulaliyanda kapati Bbaibbele, tulaayanda  kapati amabbuku eesu aayeeme aa Jwi lya Leza. Mabbuku oonse, mabroshuwa, alimwi amabbuku aambi ngotutambula nzipego zizwa kuli Jehova. Zipego eezyi zilatugwasya kuba acilongwe anguwe akuyumya lusyomo lwesu.—Tito 2:2.

⁴ Bunji bwamabbuku eesu alembelwa Bakamboni ba Jehova. Nokuba boobo, kuli mabbuku aambi aalembelwa bana naa bazyali. Zibalo zinji alimwi amavidyo aali aawebbusaiti yesu abambilwa kapati bantu ibatali Bakamboni ba Jehova. Zintu eezyi ziindene-indene zitondezya kuti Jehova wazumanana kuzuzikizya cisyomezyo cakwe cakupa malailile kubantu boonse.—Isaya 25:6.

5. Ino ncinzi ncotukonzya kuba masimpe kuti Jehova ulacikkomanina?

⁵ Bunji bwesu tulalombozya kuba aciindi cinji cakubala Bbaibbele amabbuku eesu. Aboobo talili lyoonse notukonzya kuba aciindi ceelene cakubala mabbuku aayindene-indene ngotutambula. Tuli masimpe kuti Jehova ulatukkomanina notucibelesya kabotu ciindi cesu kubala akwiiya Bbaibbele alimwi amabbuku eesu. (Baefeso 5:15, 16) Nokuba boobo, kuli ntenda njotweelede kweeleba. Ino nintenda nzi eeyo?

6. Ino ncinzi cikonzya kutupa kuti tutagwasyigwi azipego nzyatupa Jehova?

⁶ Ikuti tiitwacenjela, tulakonzya kuyeeya kuti zibeela zimwi zyamu Bbaibbele naa mabbuku aamwi tazikonzyi kutugwasya. Mucikozyanyo, mbuti kuti cibeela cimwi camu Bbaibbele cilibonya kuti tacikonzyi kutugwasya mubukkale motubede? Naa mbuti kuti makani aali mubbuku eelyo taatujatikizyi? Sena makani aayo twaabala cakubindaana naa buya kutaabalila limwi? Ikuti kacili boobo, inga twaindwa twaambo itukonzya kutugwasya. Ino ntenda eeyi inga twayeeleba buti? Tatweelede kuluba kuti makani oonse aaya azwa kuli Jehova. Mu Bbaibbele tubala kuti: “Mebo, nde Jehova ndime Leza wako, ndime ndikuyiisya kuti ugwasyigwe.” (Isaya 48:17) Mucibalo eeci, tulalanga-langa nzila zyotatwe izitiitugwasye kutegwa tugwasyigwe azipego zyoonse nzyatupa Jehova.

7. Nkaambo nzi ncotweelede kubala Bbaibbele amizeezo iili kabotu?

⁷ Amubale kamujisi mizeezo iili kabotu. Masimpe kuti zibeela zimwi zyamu Bbaibbele zyakalembelwa bantu bamwi naa nkamu yabantu bamwi. Nokuba boobo, Ibbaibbele lilasalazya nolyaamba kuti “Magwalo oonse akasololelwa a Leza alimwi alagwasya.” (2 Timoteyo 3:16) Aaka nkakaambo ikeelede kutupa kuba amizeezo iili kabotu ciindi notubala Bbaibbele. Mukwesu umwi ulayeeya lyoonse kuti ulakonzya kwiiya ziiyo zinji kwiinda mukubala buyo cibalo comwe. Eeci cilamugwasya kubona ziiyo muntu nzyatakonzyi kubona ikuti naa waile kubala buyo cakubinda. Aboobo katutanabala Bbaibbele, tweelede kulomba Jehova kuti atupe mizeezo iili kabotu alimwi abusongo kutegwa tuzimvwisye ziiyo nzyayanda kuti twiiye.—Ezara 7:10; amubale Jakobo 1:5.

8, 9. (a) Ciindi notubala Bbaibbele, ino mibuzyo nzi njotweelede kulibuzya? (b) Ino zyeelelo zyabaalu Banakristo zituyiisya nzi kujatikizya Jehova?

⁸ Amubuzye mibuzyo. Ciindi notubala Bbaibbele, tweelede kwiima akulibuzya mibuzyo iitobela: ‘Ino eeci cindiyiisya  nzi kujatikizya Jehova? Ino makani aaya inga ndaabelesya buti mubuumi bwangu? Ino inga ndaabelesya buti kugwasya bamwi?’ Ikuti twazinzibala kuyeeya mibuzyo eeyi, tuyoogwasyigwa kapati notubala Bbaibbele. Atulange-lange cikozyanyo comwe. Ibbaibbele lilapandulula zyeelelo zimwi baalu Banakristo nzyobeelede kuzuzikizya. (Amubale 1 Timoteyo 3:2-7.) Pele bunji bwesu tatuli baalu, aboobo tulakonzya kuyeeya kuti twaambo ootu tatukonzyi kutugwasya munzila iili yoonse. Nokuba boobo, atwiibelesye mibuzyo eeyi yotatwe yaambwa kale ikubona mboukonzya kutugwasya mulongo ooyu wazyeelelo.

⁹ “Ino eeci cindiyiisya nzi kujatikizya Jehova?” Jehova wakatupa mulongo wazyeelelo baalu nzyobeelede kuzuzikizya. Ulijisi zyeelelo zisumpukide nzyobeelede kuzuzikizya ibaalumi balanganya mbungano. Eeci citondezya kuti Jehova ulaiyanda kapati mbungano. Ibbaibbele lyaamba kuti ‘wakayuula abulowa bwa Mwanaakwe mwini.’ (Milimo 20:28) Aboobo Jehova uyanda kuti baalu kabali zikozyanyo zibotu, alimwi bayoolyaambilila kulinguwe kweelana ambobabeendelezya bantu mumbungano. Uyanda kuti katukwabilidwe ciindi nobatusololela. (Isaya 32:1, 2) Ciindi notuzibala zyeelelo eezyi, tulaiya mbwatulanganya kapati Jehova.

10, 11. (a) Ciindi notubala zyeelelo zyabaalu, mbuti mbotukonzya kwaabelesya makani aaya mubukkale bwesu? (b) Mbuti mbotukonzya kwaabelesya makani aaya kutegwa tugwasye bamwi?

 ¹⁰ “Ino makani aaya inga ndaabelesya buti mubuumi bwangu?” Ikuti naa kamuli kale mwaalu, ciindi aciindi mweelede kuulanga-langa mulongo wazyeelelo ooyu akubona momuyandika kuyaambele. Ikuti naa ‘muyanda kuba mulangizi,’ mweelede kusolekesya kusikila mpomugolela kusika azyeelelo eezyi. (1 Timoteyo 3:1) Pele Banakristo boonse balakonzya kuziiya zyeelelo eezyi. Mucikozyanyo, Jehova uyanda kuti umwi aumwi wesu kanyoneka alimwi akubelesya bupampu. (Bafilipi 4:5; 1 Petro 4:7) Ciindi baalu nobali “zikozyanyo kubutanga,” tulakonzya kwiiya kulimbabo alimwi ‘akwiiya lusyomo lwabo.’—1 Petro 5:3; Bahebrayo 13:7.

¹¹ “Ino makani aaya inga ndaabelesya buti kugwasya bamwi?” Tulakonzya kubelesya mulongo wazyeelelo zyabaalu Banakristo kugwasya basikwiiya Bbaibbele abantu bambi ibajisi luyandisisyo kutegwa bamvwisye baalu mbobaindene abasololi bazikombelo. Kuyungizya waawo, mulongo ooyu ulakonzya kutugwasya kuuzyiba kabotu mulimo mupati baalu ngobacita mumbungano yesu. Aboobo eeci ciyootugwasya kubalemeka bakwesu aaba. (1 Batesalonika 5:12) Ikuti naa twazumanana kubalemeka, bayookkomana kapati mumulimo wabo.—Bahebrayo 13:17.

12, 13. (a) Kwiinda mukubelesya zibelesyo nzyotujisi, nkuvwuntauzya kuli buti nkotukonzya kucita? (b) Amupe cikozyanyo icitondezya makani aazingulukide mbwaakonzya kuyubununa ziiyo muntu nzyatakonzyi kubona ikuti naa waile kubala buyo cakubinda.

¹² Amuvwuntauzye. Ciindi notwiiya Bbaibbele, tulakonzya kulangaula bwiinguzi kumibuzyo eeyi iitobela:

• Ino nguni wakalemba cibeela eeci ca Bbaibbele?

• Ino nkuukuli alimwi ndilili nocakalembwa?

• Nzintu nzi zipati izyakali kucitika ciindi bbuku eeli nolyakali kulembwa?

Makani aali boobu alakonzya kutugwasya kubona ziiyo muntu nzyatakonzyi kubona ikuti naa waile kubala buyo cakubinda.

¹³ Mucikozyanyo, lugwalo lwa Ezekieli 14:13, 14 lwaamba kuti: “Ikuti cisi candibisyila kwiinda mukutasyomeka, ndiyootandabika janza lyangu kulincico akunyonyoona zyakulya zyancico, ndiyoocitumina nzala akunyonyoona bantu alimwi abanyama bali mumo. ‘Nokuba kuti baalumi aaba botatwe baliko mulincico, nkokuti Nowa, Daniele a Jobu, nobalifwutula buyo lwabo beni akaambo kabululami bwabo,’ mbwaamba Mwami Singuzuzyoonse Jehova.” Ikuti naa twavwuntauzya, tulakonzya kujana kuti Ezekieli wakalemba majwi aayo kakucili myaka iisika ku 612 katanaboola Kristo. Kwakaindide kale myaka minji kuzwa nobakafwa ba Nowa a Jobu, pele Jehova wakacili kukuyeeya kusyomeka kwabo. Nokuba boobo, Daniele wakacili kupona. Kweelede kuti, wakajisi myaka iisika  ku 20 ciindi Jehova naakaamba kuti wakali mululami mbubwenya mbuli Nowa a Jobu. Ino ncinzi ncotwiiya? Jehova ulababona alimwi akubabikkila maano babelesi bakwe boonse ibasyomeka, kubikkilizya abana.—Intembauzyo 148:12-14.

14. Ino mbuti makani aalembelwa bakubusi mbwaabagwasya, alimwi mbuti mbwaakonzya kubagwasya abamwi? (Amubone cifwanikiso icili kumatalikilo aacibalo.)

¹⁴ Mabbuku aabakubusi. Twaiya kuti tulakonzya kugwasyigwa azibeela zyoonse zyamu Bbaibbele. Mbubwenya buyo, tulakonzya kugwasyigwa amabbuku eesu oonse. Atulange-lange zikozyanyo zisyoonto. Myaka misyoonto yainda, Jehova wapa makani manji kubakubusi. ^[1] (Amubone bupanduluzi buyungizyidwe.) Makani aaya alabagwasya kuzunda buyumuyumu kucikolo alimwi azintu zibakatazya mbobayaabukomena. Pele ino mbuti toonse mbotukonzya kugwasyigwa kwiinda mukubala zibalo eezyi alimwi amabbuku? Ciindi notubala makani aaya, tulazyiba mapenzi ngobajana bakubusi aboobo tulakonzya kuba muciimo cibotu cakubagwasya alimwi akubakulwaizya.

15. Nkaambo nzi Banakristo bapati ncobeelede kwaabikkila maano makani aalembelwa bakubusi?

¹⁵ Banakristo bapati tabeelede kulisumpula akubona mbuli kuti tabakonzyi kubala makani aabakubusi. Bunji bwamapenzi aabandikwa muzibalo eezyi izibambilwa bakubusi alabajatikizya Banakristo boonse. Mucikozyanyo, toonse tuyandika kwiiminina nzyotusyoma, kulijata kujatikizya mbotulimvwa, kukaka kuyungwa abeenzuma, akutantamuka balongwe ibatali kabotu alimwi azyakulikondelezya zitali kabotu. Aboobo nokuba kuti mabbuku aaya akalembelwa bakubusi, makani aali mumo azwa mu Bbaibbele, alimwi alakonzya kubagwasya Banakristo boonse.

16. Ncinzi acimbi mabbuku eesu ncaabagwasya kucita bakubusi?

¹⁶ Kunze lyaboobo, mabbuku aalembelwa bakubusi alabagwasya kuyumya cilongwe cabo a Jehova. (Amubale Mukambausi 12:1, 13.) Abalo bapati balakonzya kugwasyigwa. Mucikozyanyo, Sinsimuka! yamu July 2009 yakajisi cibalo cakuti “Bakubusi Balabuzya . . . Ino Mbuti Mbondikonzya Kukukkomanina Kubala Bbaibbele?” Cibalo eeci cakajisi nzila zinji zigwasya alimwi akabbokesi ikakonzya kutendwa, kuyobolwa alimwi akubelesyegwa ciindi cakwiiya. Sena bapati bakagwasyigwa acibalo eeci? Mukaintu umwi uujisi bana wakaamba kuti kubala Bbaibbele lyoonse cali kumuyumina. Pele wakabelesya nzila zili mucibalo eeci aboobo lino inga ulangila kuti ciindi cakubala Bbaibbele cisike. Waamba kuti ulakkomana kapati kubona mabbuku aamu Bbaibbele mbwaayendelana alimwi ambwaagwasya kulimvwisya Bbaibbele lyoonse mbolizulwa. Alimwi wakayungizya wakuti: “Kunyina nondakakkomene kapati mbuli mbondikkomene lino kujatikizya kubala Bbaibbele.”

17, 18. Ino mbuti mbotukonzya kugwasyigwa kwiinda mukubala zibalo zilembelwa buleya? Amupe cikozyanyo.

 ¹⁷ Mabbuku aakubuleya. Kuzwa mu 2008 twali kukkomana a Ngazi Yamulindizi eeyi yakwiiya. Magazini eeyi ilembelwa kapati Bakamboni ba Jehova, pele alimwi tulijisi mamagazini aalembelwa kapati buleya. Ino mbuti mbotukonzya kugwasyigwa amamagazini aaya? Atubelesye cikozyanyo. Ciindi nomutamba muntu ku Ŋanda ya Bwami mpoonya waboola, cakutadooneka mulakkomana kapati. Ciindi mwaambi nabandika makani, mulamuyeeya mweenzu wanu. Muleezyeezya mbwalimvwa muntu ooyu kuzintu nzyali mukumvwa alimwi amakani mbwaakonzya kucinca buumi bwakwe. Aboobo mulabotelwa mumoyo alimwi mulalumba kapati kumakani aayo.

¹⁸ Cintu cikozyenye cilakonzya kucitika kulindiswe ciindi notubala mabbuku aalembelwa buleya. Mucikozyanyo, Ngazi Yamulindizi yakubuleya alimwi azibalo zijanika aa jw.org zipandulula Bbaibbele kubelesya mabala mauba-uba alimwi atwaambo tutakatazyi kumvwa. Ciindi notubala makani aaya, mbotukamvwisya kasimpe kamu Bbaibbele nkotuzyi kale alimwi aluyando ndotujisi kujatikizya nkako zilayungizyika. Kuyungizya waawo, tulakonzya kwiiya nzila zipya mbotukonzya kupandulula nzyotusyoma mumulimo wamumuunda. Ncimwi buyo amagazini ya Sinsimuka! yalo iiyumya lusyomo ndotujisi lwakuti kuli Mulengi. Alimwi citugwasya kwiiya mbotukonzya kwiiminina nzyotusyoma.—Amubale 1 Petro 3:15.

19. Ino mbuti mbotukonzya kumulumba Jehova akaambo kazipego nzyatupa?

¹⁹ Cilisalede kuti, Jehova wapa lugwasyo lutalivwulili alimwi amalailile kutegwa tugwasyigwe. (Matayo 5:3) Atuzumanane kubala alimwi akwaatobela makani oonse ngatupa. Ikuti naa twacita oobo, tuyoogwasyigwa alimwi tuyootondezya Jehova kuti tulalumba kuzipego zyoonse nzyatupa.—Isaya 48:17.