1, 2. Nkutamvwana kuli buti kwabantu ikwaambwa mubbuku lya Matalikilo, alimwi nkaambo nzi makani aaya ncaayandika kulindiswe?

SENA kuli nomwakayeeyede kale kujatikizya kutamvwana ikwakali akati kabantu ibaambwa mu Bbaibbele? Muzyaandaano zisyoonto zyakusaanguna mubbuku lya Matalikilo, tujana kuti Kaini wakajaya Abelo (Matalikilo 4:3-8); Lameki wakajaya mulombe akaambo kakumuuma (Matalikilo 4:23); beembezi ba Abrahamu bakazwangana abeembezi ba Loti (Matalikilo 13:5-7); Hagare wakali kulisumpula kuli Sara, alimwi Sara wakanyemena Abrahamu (Matalikilo 16:3-6); Isimayeli wakali kulwana bantu boonse alimwi bantu boonse bakali kumulwana.—Matalikilo 16:12.

² Nkaambo nzi mazwanga aali boobu ncaakalembelwa mu Bbaibbele? Nkaambo tulakonzya kwiiya kuzikozyanyo eezyi zyabantu batalondokede ibakajisi mapenzi eeni. Andiswe tatulondokede, alimwi ciindi notujisi mapenzi aakozyenye ayaayo mubuumi bwesu, tulakonzya kwiiya zikozyanyo zibotu izijanika mu Bbaibbele akweeleba kwiiya zikozyanyo zibyaabi. (Baroma 15:4) Eeci inga catugwasya kuzyiba mbotukonzya kuzumanana kuba muluumuno abantu.

3. Ino mucibalo eeci tulabandika twaambo nzi?

³ Mucibalo eeci, tulaiya kaambo ncotuyandika kumanizya  mazwanga, naa kumana kutamvwana, alimwi ambotukonzya kucita oobo. Alimwi tulaiya njiisyo zyamu Bbaibbele izikonzya kutugwasya kumana mazwanga akuzumanana kuba acilongwe cibotu a Jehova alimwi abantu bambi.

4. Ino muuya uuli buti iwavwula munyika, alimwi ncinzi cacitika akaambo kakuba amuuya uuli boobu?

⁴ Saatani nguupa kuti bantu kabaandaana alimwi nguupa kuti kakuli mazwanga manji. Nkaambo nzi ncotwaambila boobu? Mu Edeni, Saatani wakaamba kuti muntu uuli woonse ulakonzya alimwi weelede kulisalila cibotu acibi kakunyina kweendelezyegwa a Leza. (Matalikilo 3:1-5) Pele ciindi notubona zicitika munyika mazuba aano, tulakonzya kubona kuti kuba amuuya uuli boobu kuletela buyo mapenzi. Bantu banji balimvwa kuti balijisi nguzu zyakulisalila cibotu acibi. Balalisumpula, balaliyanda, bajisi muuya wakuzundana alimwi taakwe ambobalimvwa naa nzyobasala kucita zipa bamwi kupenga. Bube buli boobu bupa kuti kube kuzwangana. Bbaibbele lituyeezya kuti ikuti naa katufwambaana kunyema, tunoozwangana kapati abantu alimwi tunoobisya ziindi zinji.—Tusimpi 29:22.

5. Ino mbuti Jesu mbwaakabayiisya bantu kujatikizya mbobeelede kumana mazwanga?

⁵ Ciindi Jesu naakapa Mulumbe wakwe waa Cilundu, wakayiisya basikwiiya bakwe kuba muluumuno akweeleba mazwanga, nokuba kuti kucita boobu cakali kulibonya kuti nciyumu kapati. Mucikozyanyo, wakabaambila kuti bakeelede kuba alubomba, kubamba luumuno abantu, kumana bukali, akumana mazwanga cakufwambaana, alimwi akuyanda basinkondonyina.—Matayo 5:5, 9, 22, 25, 44.

6, 7. (a) Nkaambo nzi ncociyandika kumanizya mazwanga cakufwambaana? (b) Mibuzyo nzi njobeelede kulibuzya babelesi ba Jehova boonse?

⁶ Mazuba aano, tulamukomba Jehova ciindi notupaila, notukambauka, alimwi anotuunka kumiswaangano. Kuti katutabambi luumuno abakwesu, Jehova takabutambuli bukombi bwesu. (Marko 11:25) Kutegwa tube balongwe ba Jehova, tweelede kubalekelela bamwi ciindi nobalubizya.—Amubale Luka 11:4; Baefeso 4:32.

⁷ Jehova uyanda kuti babelesi bakwe boonse kabajisi muuya wakulekelela bamwi alimwi akukkala muluumuno abantu. Tulakonzya kulibuzya kuti: ‘Sena ndilafwambaana kubalekelela Banakristoma? Sena ndilakkomana kuba antoomwe ambabo?’ Kuti naa mwabona kuti muyandika kuyaambele mukulekelela bamwi, amupaile kuli Jehova akumulomba kuti amugwasye kucita kabotu mulubazu oolu. Taateesu wakujulu uyakwiiswiilila akuyiingula mipailo iili boobu iipailwa cakulicesya.—1 Johane 5:14, 15.

8, 9. Ino tweelede kucita nzi ikuti naa umwi watulubizyila?

⁸ Toonse tatulondokede, aboobo tacigambyi kuti bantu balakonzya kwaamba naa kucita zintu zikonzya kutucisa. (Mukambausi 7:20; Matayo 18:7) Ino inga mwacita buti? Tulakonzya kwiiya ciiyo ciyandika kapati kuli ceeci icakacitika: Mucizyi umwi wakaanzya bakwesu bobilo kubusena bumwi nkobakabungene. Pele mukwesu umwi wakabijilwa  ambwaakaanzyigwa amucizyi ooyu. Ciindi bakwesu aaba bobilo nobakali balikke, mukwesu iwakabijilwa wakatalika kutongooka kujatikizya mucizyi mbwaakamwaanzya. Nokuba boobo, mukwesu ooyu uumbi wakamuyeezya kuti mucizyi uulya wamubelekela Jehova cakusyomeka kwamyaka iili 40 nokuba kuti wainda mumapenzi manji. Wakalisinizyide kuti mucizyi ooyu taakwe naakajisi makanze aakumulubizyila pe. Ino mukwesu ooyo wakanyemezyegwa wakacita buti? Wakaambila mukwesu ooyu ngobakali limwi kuti, “Uliluzi.” Mpoonya wakasala kuziluba buyo izyakacitika.

⁹ Ino eeci icakacitika cituyiisya nzi? Ciindi umwi naatulubizyila, tulakonzya kusala kucita ncotuyanda. Muntu siluyando ulalekelela. (Amubale Tusimpi 10:12; 1 Petro 4:8.) Ciindi ‘notujatila milandu,’ cilamubotela kapati Jehova. (Tusimpi 19:11; Mukambausi 7:9) Aboobo ciindi citobela muntu naayoocita naa kwaamba cintu cimwi iciyoomupa kunyema, amukalibuzye kuti: ‘Sena inga ndaile kuciluba buyo eeci ncaandilubizyila? Sena ncobeni ndeelede kuzumanana kuciyeeya ncaakacita?’

10. (a) Mbuti mucizyi umwi mbwaakacita kumatalikilo ciindi bamwi nobakali kumwaamba zintu zibyaabi? (b) Nkaambo nzi kamu Magwalo ikakamugwasya mucizyi ooyu kuzumanana kuba muluumuno?

¹⁰ Kuti bamwi baamba cintu citali kabotu kujatikizya ndiswe, nciyumu kwiile kuciluba buyo. Amubone cakacitika kumucizyi umwi mupainiya ngotulaite kuti Lucy. Bamwi mumbungano bakali kwaamba zintu zibyaabi kujatikizya mulimo wakwe wamumuunda alimwi ambwaakali kucibelesya ciindi. Eeci cakamucisa kapati, aboobo wakalomba bakwesu bamwi basimide kuti bamugwasye. Ino ncinzi cakacitika? Mucizyi ooyu wakaamba kuti bakwesu aaba bakabelesya Bbaibbele kutegwa bamugwasye kuleka kwiibikkila maano kapati mizeezo mibyaabi yabamwi akutalika kuyeeya kapati kujatikizya Jehova. Wakakulwaizyigwa kapati ciindi naakabala lugwalo lwa Matayo 6:1-4. (Amubale.) Tupango ootu twakamuyeezya kuti kukkomanisya Jehova ncecintu ciyandika kapati. Aboobo wakasala kutazibikkila maano zintu zibyaabi bantu nzyobakali kwaamba. Mazuba aano, nokuba kuti bamwi baamba zintu zibyaabi kujatikizya mulimo wakwe, inga ulikkomene nkaambo ulizyi kuti ulimukusolekesya kukkomanisya Jehova.

11, 12. (a) Ino Munakristo weelede kucita buti ciindi naabona kuti Munakristonyina “ulaakaambo” anguwe? (b) Ncinzi ncotukonzya kwiiya kuli Abrahamu kujatikizya mbwaakeendelezya mazwanga? (Amubone cifwanikiso icili kumatalikilo aacibalo.)

¹¹ “Toonse tulalubizya ziindi zinji.” (Jakobo 3:2) Atwaambe kuti mwamvwa kuti mukwesu umwi wakalimvwa bubi akaambo kacintu cimwi ncomwakaamba naa kucita. Ncinzi ncomweelede kucita? Jesu wakati, ikuti naa “uleta cipego cako kucipaililo kumane noli kooko wayeeya kuti munyoko ulaakaambo anduwe, siya cipego cako aawo kumbele lyacipaililo, uunke. Usaangune kumvwana amunyoko, mpoonya upiluke akutuula cipego cako.” (Matayo 5:23, 24) Aboobo amubandike amunyoko. Ciindi nomucita boobo, mweelede kuba amakanze aakukkala muluumuno anguwe. Mweelede kuzumina kuti ndendinywe muluzyibide alimwi mutasoli kumutongooka munyoko. Kuba muluumuno abakwesu ncecintu ciyandika kapati.

 ¹² Ibbaibbele lilatondezya babelesi ba Leza mbobakonzya kubamba luumuno ciindi nokuli kutamvwana. Mucikozyanyo, Abrahamu a Loti imwana wamunyina boonse bakavwubide banyama banji, aboobo beembezi babo bakatalika kuzwangana akaambo kakuti nyika yakaceya cakuti tiibakali kukonzya kukkala antoomwe. Akaambo kakuti Abrahamu wakali kuyanda luumuno, wakalekela Loti kusala nyika mbotu kapati. (Matalikilo 13:1, 2, 5-9) Eelo kaka taciliboteli cikozyanyo eeci! Sena Abrahamu wakapenga mane kusikila kulufwu akaambo kabwaabi oobu? Peepe. Tiilyakalampa, Jehova wakasyomezya Abrahamu kuti wakali kuyoomulongezya azintu zinji kwiinda aali zyeezyo nzyaakasweekelwa. (Matalikilo 13:14-17) Ncinzi ncotwiiya? Nokuba kuti twasweekelwa munzila imwi, Jehova uyootulongezya ikuti twaambo twatubamba munzila yaluyando. ^[1]—Amubone bupanduluzi buyungizyidwe.

13. Mbuti mulangizi umwi mbwaakacita naakaambilwa majwi aatali kabotu, alimwi ncinzi ncotukonzya kwiiya kucikozyanyo cakwe?

¹³ Amubone cikozyanyo camazuba aano. Mulangizi mupya mudipatimenti yaamuswaangano wacooko wakatumina mukwesu umwi fooni kutegwa amulombe naa inga wacikonzya kubelekela mudipatimenti eeyo. Mukwesu ooyu wakaamba zintu zinji zitali kabotu alimwi wakaikosola fooni akaambo kakuti wakalinyemede akaambo kamukwesu ooyo iwakali mulangizi wadipatimenti eeyi kakutanaboola mukwesu ooyu mupya. Mulangizi mupya kunyina naakanyema pe, pele tanaakaumuna buyo kujatikizya cakacitika. Nokwakainda woola lyomwe, wakamutumina alimwi mukwesu ooyo akupa muzeezo wakuti baswaangane. Mvwiki yakatobela, bakwesu aaba bakaswaangana aa Ŋanda ya Bwami, mpoonya nobakamana kupaila kuli Jehova, bakabandika kwawoola lyomwe. Mukwesu ooyu wakapandulula cakacitika kujatikizya mulangizi iwakaliko kaindi. Mulangizi mupya wakaswiililisya mpoonya wakabandika magwalo aamwi aagwasya. Icakatobela ncakuti, bakwesu aaba bakabamba luumuno akubelekela antoomwe lyamuswaangano wacooko. Mukwesu ooyu wakalumba kapati kuti mulangizi ooyu wakabandika anguwe munzila yaluzyalo alimwi yalubomba.

14, 15. (a) Ino ndilili notweelede kulubelesya lulayo luli mulugwalo lwa Matayo 18:15-17? (b) Ninzila nzi zyotatwe Jesu nzyaakaamba, alimwi tweelede kuba amakanze nzi ciindi notuzitobela?

¹⁴ Bunji bwamapenzi aacitika akati ka Banakristo bobilo alakonzya kubandikwa akumanizyigwa kumbali alimwi oobo mboceelede kuba. Nokuba boobo, zimwi ziindi eeci inga tacikonzyeki. Bukkale bumwi bulakonzya kuyandika lugwasyo kuzwa kuli bamwi kweelana alugwalo lwa Matayo 18:15-17. (Amubale.) ‘Kubisya’ Jesu nkwaakali kwaamba aawa tiikwakali kuzwangana mutuntu tusyoonto akati ka Banakristo. Ino tuzyi buti? Jesu wakaamba kuti ikuti naa muntu ooyo iwabisya tanaayempwa naamana kubandika amunyina, kuli bakamboni, alimwi abakwesu basalidwe, weelede kubonwa “mbubonya mbuli muntu wamasi alimwi ambuli simutelo.” Mazuba aano, eeci caamba kuti weelede kugusyigwa mumbungano. ‘Kubisya’ ooko kulakonzya kubikkilizya zintu mbuli kubbida bantu cabumpelenge naa kubejekezya bamwi, pele takubikkilizyi zibi mbuli bumambe, koonana kwabantu bakozyenye zizo, luleyo, naa kukomba mituni. Zibi zili boobu zyeelede kulanganizyigwa abaalu.

¹⁵ Makanze aa Jesu naakapa lulayo oolu akali aakututondezya mbotweelede kumugwasya musyomima akaambo kakuti tulamuyanda. (Matayo 18:12-14) Ino inga twalutobela  buti lulayo oolu? (1) Tweelede kusoleka kubamba luumuno amusyomima kakunyina kubikkilizya bamwi. Inga twayandika kubandika anguwe ziindi zinji. Pele ino tweelede kucita nzi ikuti naa kunyina luumuno nokuba kuti twacita oobo? (2) Tweelede kubandika amusyomima ooyo antoomwe amuntu uumbi uubuzyi kabotu bukkale naa uukonzya kubona naa kuli cintu cimwi cilubide cakacitika. Ikuti naa kaambo kabambwa, nkokuti ‘mwamupilusya munyoko.’ Pele lilikke buyo mwamana kubandika amusyominyoko ziindi zinji alimwi caala ikubamba luumuno anguwe ndendilyo nomukonzya (3) kutola kaambo aako kubaalu.

16. Ncinzi citondezya kuti kutobela lulayo Jesu ndwaakapa ninzila iigwasya alimwi yaluyando?

¹⁶ Bunji bwaziindi, takuyandiki kuti mane buya muzibelesye nzila zyoonse zyotatwe zijanika kuli Matayo 18:15-17. Eeci cilakulwaizya. Nkaambo nzi ncotwaambila boobu? Nkaambo bunji bwaziindi, sikubisya ulakubona kulubizya kwakwe alimwi akubambulula ncaakalubizya, cakuti inga taciyandiki kuti agusyigwe buya mumbungano. Mpoonya muntu ooyo wakalubizyilwa weelede kumulekelela musyominyina kutegwa kube luumuno. Aboobo cilisalede kululayo lwa Jesu kuti tatweelede kufwambaana kuunka kubaalu. Tweelede kubaambila baalu lilikke buyo twamana kutobela ntaamu zyakusaanguna zyobilo alimwi twasinizya ncobeni kuti kuli cintu cilubide cakacitwa.

17. Nzilongezyo nzi nzyotuyakujana ikuti naa ‘twayandaula luumuno’ abeenzuma?

¹⁷ Mbwaanga tatulondokede, tuyoozumanana kubalubizyila bamwi. Sikwiiya Jakobo wakalemba kuti: “Ikuti naa kuli uutalubizyi mukwaambaula, ooyo muntu ulilondokede, ulakonzya kweendelezya amubili wakwe woonse.” (Jakobo 3:2) Ikutegwa twaamane mazwanga, tweelede kusolekesya ‘kuyandaula luumuno akusungwaala kulutobela.’ (Intembauzyo 34:14) Ciindi notuzumanana kubamba luumuno abamwi, tuyooba azilongwe zibotu abakwesu abacizyi, alimwi eeci ciyoopa kuti tuzumanane kukamantana. (Intembauzyo 133:1-3) Ciyandika kapati kwiinda zyoonse ncakuti, tuyooba acilongwe cibotu a Jehova, “Leza uupa luumuno.” (Baroma 15:33) Tuyookkomana azilongezyo eezyi ikuti lyoonse katumana mazwanga munzila yaluyando.