JESU wakasinsima kuti basikumutobela bakali kuyootola lubazu mubutebuzi bupati muciindi eeci camamanino. (Mt. 9:37; 24:14) Amubone majwi aakwe mbwaazuzikizyigwa munzila iilibedelede mubusena bwiitwa kuti Transcarpathia, ku Ukraine. Akati kamadolopo buyo otatwe aali mubusena oobo, kuli mbungano zili 50 alimwi abasikumwaya bainda ku 5,400. * Cikkomanisya ncakuti, akati kamweelwe woonse wabantu ibajanika mumadolopo aaya otatwe, omwe akati kabantu bone ngu Kamboni wa Jehova.

Ino bantu bali buti mucilawo eeci? Mukwesu umwi wakubusena oobu wazina lya Vasile wakati: “Bantu balalilemeka Bbaibbele, balabubikkila maano bululami, balayandana kapati mumikwasyi alimwi balasolekesya kugwasyanya.” Mukwesu ooyu wakazumanana ulaamba: “Talili lyoonse nobazizumina nzyotusyoma. Pele ikuti naa kuli ncomwabatondezya mu Bbaibbele, balaswiilila cakubikkila maano.”

Nokuba boobo, bakwesu abacizyi balajana buyumuyumu bulibedelede ciindi nobakambaukila mubusena ibujisi basikumwaya banji. Mucikozyanyo, mbungano imwi ijisi basikumwaya bali 134, pele mucilawo eeci kuli buyo maanda aali 50 aabantu batali Bakamboni. Ino basikumwaya bacikonzya buti kukambauka mubukkale buli boobu?

Bakwesu abacizyi banji balalyaaba kuyookambaukila mumasena aayandika basikumwaya banji. Mukwesu uucembeede wazina lya Ionash, walo uujisi myaka yakuzyalwa iili 90 wakaamba kuti, “Kweelana amweelwe wabasikumwaya mucilawo cambungano yesu, sikumwaya omwe weelede kukambukila bantu bobilo. Kanditanatalika kuciswa, ndakali kukambauka mucilawo mondikkala, alimwi akweenda makkilomita aali 160 kuya kucilawo icatakapedwe sikumwaya uuli woonse, kwalo nkondakali kukambauka mumwaambo waci Hungary.” Basikumwaya beelede kulyaaba kugwasyilizya muzilawo zimbi. Mukwesu Ionash wakayungizya kuti, “Kutegwa citandisiyi citima, ndakali kubuka aciindi ca 04:00 hrs alimwi ndakali kukambauka kusikila ciindi ca 18:00 hrs eelyo citima nocakali kunyamuka kuya kuŋanda. Ndakali kucita oobo mazuba obilo naa otatwe ansondo.” Sena wakalimvwa kuti kusolekesya kwakwe nkwabuyo? Wakaamba kuti, “Ndakajana lukkomano lunji mubukambausi buli boobu. Ndakakkomana kapati kugwasyilizya mikwasyi iili kulamfwu kwiiya kasimpe.”

Mubwini, tabali boonse mumbungano zyakubusena ooku ibacikonzya kweenda misinzo milamfwu. Pele boonse buyo, kubikkilizya abasikumwaya bacembeede, balasoleka kucibeleka cilawo cabo coonse cambungano. Akaambo kaceeci, mu 2017, mweelwe wabantu ibakajanika ku Ciibalusyo wakali mupati ziindi zyobilo kwiinda amweelwe wabasikumwaya boonse ibali mumadolopo aaya otatwe, naa cisela camweelwe wabantu boonse ibali mumadolopo aaya. Kakunyina akudooneka, kufwumbwa nkotukonzya kubelekela, kuli “zintu zinji zyakucita mumulimo wa Mwami.”—1Kor. 15:58.