1, 2. (a) Kakusyeende buyo ciindi cisyoonto kuti afwe, ncinzi Jesu ncaakabaambila basikwiiya bakwe? (Amubone cifwanikiso icili kumatalikilo aacibalo.) (b) Nkaambo nzi ncotweelede kubikkila maano kutwaambo itutupa kukambauka? (c) Ncinzi ncotutiilange-lange?

BUSIKU bwamamanino katanafwa, Jesu wakajisi mubandi mulamfwu abaapostolo bakwe mwalo mwaakabaambila kuti wakali kubayanda kapati. Alimwi wakabaambila acikozyanyo cijatikizya musaansa, mbubwenya mbotwakabona mucibalo cainda. Kwiinda mucikozyanyo eeco, Jesu wakakulwaizya basikwiiya bakwe ‘kuzumanana kuzyala micelo minji,’ kuliyumya kukambauka mulumbe wa Bwami.—Joh. 15:8.

² Nokuba boobo, Jesu tanaakabaambila buyo ncobakeelede kucita basikwiiya bakwe, pele wakabaambila akaambo ncobakeelede kucitila boobo. Wakabaambila twaambo itwakeelede kubapa kucita mulimo wakukambauka. Nkaambo nzi ncotweelede kutulanga-langa twaambo ooto? Ikuti twabikkila maano kutwaambo itutupa kuzumanana kukambauka, tulakulwaizyigwa kuliyumya mukupa “bumboni kumasi oonse.” (Mt. 24:13, 14) Lino atulange-lange twaambo twamu Magwalo tone itutupa kukambauka. Kuyungizya waawo, tulalanga-langa zipego zyone izizwa kuli Jehova, izitugwasya kuliyumya mukuzyala micelo.

3. (a) Ino nkaambo nzi ikatupa kukambauka nkotujana mulugwalo lwa Johane 15:8? (b) Ino masaansa mucikozyanyo ca Jesu ayiminina nzi, alimwi nkaambo nzi ncoceelela cikozyanyo eeci?

³ Ikaambo kapati katupa kutola lubazu mumulimo wakukambauka nkakuti, tulamulemeka Jehova alimwi akusalazya zina lyakwe kubantu. (Amubale Johane 15:1, 8.) Amubone kuti Jesu wakakozyanisya Bausyi, nkokuti Jehova, kumulimi uulima masaansa. Jesu wakalikozyanisya kumusaansa naa cinyina, mpoonya basikumutobela wakabakozyanisya kumitabi. (Joh. 15:5) Aboobo cakweelela, masaansa ayiminina micelo ya Bwami iizyalwa abasikutobela Kristo. Jesu wakaambila baapostolo bakwe kuti: “Taata ulalemekwa muliceeci, ikuti muzumanane kuzyala micelo minji.” Mbubwenya mbuli zisamu zyamasaansa izizyala masaansa mabotu mbozileta bulemu kumulimi, andiswe tulamulemeka Jehova ciindi notwaambilizya mulumbe wa Bwami kusikila mpotugolela.—Mt. 25:20-23.

4. (a) Muunzila nzi motulisazya zina lya Leza? (b) Ino mulimvwa buti kujatikizya coolwe ncomujisi cakusalazya zina lya Leza?

⁴ Muunzila nzi mulimo wesu moupa kuti zina lya Leza lisalazyigwe? Tatukonzyi kupa kuti zina lya Leza lisetekane kwiinda mbolibede. Lilisetekene kale, naa kuti lilasalala cakumaninina. Pele amubone musinsimi Isaya ncaakaamba: “Jehova wamakamu, ngonguwe ngomweelede kubona kuti ulasalala.” (Is. 8:13) Nzila imwi motulisalazya zina lya Leza, nkwiinda mukulibona kuti liliindene amazina aambi oonse alimwi akugwasya bamwi kulibona kuti lilasalala. (Mt. 6:9.) Mucikozyanyo, ciindi notwaambilizya kasimpe kajatikizya bube bubotu mbwajisi Jehova, alimwi amakanze aakwe aatacinci kujatikizya bantu, tukwabilila zina lya Leza kuzwa kukubeja kwa Saatani. (Mtl. 3:1-5) Alimwi, ciindi notusolekesya kugwasya bantu ibali mucilawo cesu kubona kuti Jehova uleelela “ikutambula bulemu alulemeko alimwi anguzu,” tulalisalazya zina lya Leza. (Ciy. 4:11) Ba Rune, ibabeleka kabali bapainiya kwamyaka iili 16 bakaamba kuti: “Ikuzyiba kuti ndilijisi coolwe cakuba kamboni wa Mulengi wabubumbo boonse cindipa kulumba kapati. Cindipa kuba aluyandisisyo lwakuzumanana kukambauka.”

5. (a) Ntwaambo nzi itutupa kukambauka itwaambidwe mulugwalo lwa Johane 15:9, 10? (b) Ino mbuti Jesu mbwaakakankaizya mbociyandika kuliyumya?

⁵ Amubale Johane 15:9, 10. Luyando ndotujisi kuli Jehova alimwi akuli Jesu nkakaambo kapati ikatupa kukambauka mulumbe wa Bwami. (Mk. 12:30; Joh. 14:15) Jesu wakaambila basikwiiya bakwe ‘kuzumanana muluyando lwakwe.’ Ino nkaambo nzi? Nkaambo kuzumanana kuba sikwiiya wa Kristo mwini-mwini kuyandika kuliyumya. Jesu wakayungizya kwaamba mbociyandika kuliyumya kwiinda mukubelesya bbala ‘lyakuzumanana’ alimwi amabala aakozyenye abbala eeli ziindi zinji mucibalo cilembedwe mulugwalo lwa Johane 15:4-10.

6. Mbuti mbotutondezya kuti tuyanda kuzumanana muluyando lwa Kristo?

⁶ Mbuti mbotutondezya kuti tuyanda kuzumanana muluyando lwa Kristo alimwi akukkomaninwa anguwe? Nkwiinda mukutobela milawo ya Jesu. Mubufwaafwi, Jesu utwaambila kuti, ‘Amundimvwide.’ Nokuba boobo, Jesu wakatwaambila buyo kucita ceeco awalo ncaakacita, nkaambo wakayungizya kuti: “Mbubonya andime mbondaitobela milawo ya Taata akuzumanana muluyando lwakwe.” (Joh. 15:10) Jesu upa cikozyanyo cibotu kulindiswe.—Joh. 13:15.

7. Ino kumvwida alimwi aluyando ziswaangene buti?

⁷ Kujatikizya mbokuswaangene kumvwida alimwi aluyando, Jesu wakaambila baapostolo bakwe kuti: “Kufwumbwa ooyo uutambula milawo yangu akwiitobela nguundiyanda.” (Joh. 14:21) Aboobo, kwiinda mukutobela mulawo wa Jesu wakuunka kuyookambauka, andiswe tulatondezya luyando ndotujisi kuli Leza nkaambo milawo ya Jesu itondezya kuyeeya kwa Bausyi. (Mt. 17:5;  Joh. 8:28) Akaambo kakuti tulabayanda, Jehova alimwi a Jesu balazumanana kutuyanda.

8, 9. (a) Nkaambo nzi akambi ikatupa kukambauka? (b) Ino nkaambo nzi majwi aa Jehova aali kuli Ezekieli 3:18, 19 alimwi a 18:23 ncaatukulwaizya kuzumanana kukambauka?

⁸ Kuli akaambo kambi ikatupa kuzumanana amulimo wesu wakukambauka. Tulakambauka kutegwa tupe kucenjezya. Mu Bbaibbele, Nowa waambwa kuti “mukambausi.” (Amubale 2 Petro 2:5.) Mulimo wakukambauka ngwaakacita kalitanasika Zambangulwe, cakutadooneka wakali kubikkilizya akucenjezya kujatikizya lunyonyooko ilwakali kuboola. Ino nkaambo nzi ncotukonzya kwaamba boobo? Amubone ncaakaamba Jesu naakati: “Nkaambo mbubonya mbuli kumazuba aayo Zambangulwe kalitanaboola, bakali kulya akunywa, basankwa bakali kukwata abalo basimbi bakali kukwasyigwa kusikila buzuba Nowa mbwaakanjila mubwato, pele tiibakabikkila maano kusikila mane Zambangulwe lyakaboola akubatola boonse, mbubonya buyo akwalo kubako kwa Mwanaamuntu mbokuyooba.” (Mt. 24:38, 39) Nokuba kuti bantu tiibakali kubikkila maano, Nowa wakawaambilizya cakusyomeka mulumbe wakucenjezya ngwaakapegwa.

⁹ Mazuba aano, tulakambauka mulumbe wa Bwami kutegwa tupe bantu coolwe cakwiiya kujatikizya makanze ngajisi Leza kubantu. Mbubwenya mbuli Jehova, tulaalusyomo lwakuti bantu balakonzya kuutambula mulumbe alimwi “akuzumanana kupona.” (Ezk. 18:23) Alimwi, ciindi notukambuka kuŋanda aŋanda amumasena aakubuleya, tulabacenjezya bantu banji kuti Bwami bwa Leza buyooboola akunyonyoona nyika ya Saatani eeyi.—Ezk. 3:18; Dan. 2:44, 19; Ciy. 14:6, 7.

10. (a) Nkaambo nzi ikatupa kuzumanana kukambauka ikaambidwe kuli Matayo 22:39? (b) Amupandulule Paulo alimwi a Sila mbobakagwasya mulindizi wantolongo ku Filipi.

¹⁰ Nkaaka akambi kaambo ikayandika kapati ikatupa kuzumanana amulimo wesu wakukambauka: Tulakambauka akaambo kakuti tulabayanda basimukoboma. (Mt. 22:39) Luyando oolo lulatukulwaizya kuliyumya mumulimo ooyu, katuyeeya kuti bantu balakonzya kucinca ciindi bukkale bwabo nobwacinca. Amubone cakacitikila mwaapostolo Paulo alimwi amweenzinyina Sila. Kabali mudolop lya Filipi, basikukazya bakababikka muntolongo. Mpoonya akati kamasiku, cakutayeeyela, muzuzumo wanyika wakazungaanya ntolongo alimwi akujalula milyango. Mulindizi wantolongo wakayoowa kuti baange batija alimwi wakali kuyanda kulijaya. Pele Paulo wakoongolola kati: “Utalijayi pe!” Kayoowede, mulindizi wantolongo wakabuzya kuti: “Ino ncinzi ncondeelede kucita kutegwa ndifwutulwe?” Bakamwaambila kuti: “Kosyoma Mwami Jesu, eelyo ulafwutulwa.”—Mil. 16:25-34.

11, 12. (a) Ino mbuti cibalo cijatikizya mulindizi wantolongo mboceendelana amulimo wesu wakukambauka? (b) Lyoonse tuyanda kuti katulibambilide kucita nzi?

¹¹ Mbuti cibalo cijatikizya mulindizi wantolongo mboceendelana amulimo wesu wakukambauka? Amubone kaambo aaka: Mulindizi wantolongo wakacinca mbwaakali kuzilanga zintu alimwi akulomba lugwasyo lilikke buyo nowakacitika muzuzumo wanyika. Mbubwenya buyo, bantu bamwi mazuba aano ibakaka kutambula mulumbe wamu Bbaibbele balakonzya kucinca akutalika kuyandaula lugwasyo ciindi zintu nozyacinca  cakutayeeyelwa mbubwenya mbuli muzuzumo wanyika. Mucikozyanyo, bamwi mucilawo cesu, cakutayeeyela balakonzya kusweekelwa mulimo ngobali kubeleka kwaciindi cilamfwu calo icikonzya kubapa kulibilika. Bamwi ambweni balityompedwe akaambo kakuti cikwati cabo cakamana caino-ino. Alimwi bamwi buya balakonzya kutyompwa akaambo kakuti bakajanwa abulwazi bupati, naa ambweni baluuside akaambo kakufwidwa muyandwa wabo. Ikuti zintu zili boobo zyacitika, bantu aabo ibatyompedwe balakonzya kubuzya mibuzyo kujatikizya mpindu yabuumi eeyo njobatakali kubikkila maano. Ambweni buya balakonzya kweezyeezya kuti, ‘Ino ncinzi ncondeelede kucita kutegwa ndikafwutuke?’ Ciindi notujana bantu bali boobu, balakonzya kuswiilila kumulumbe wesu uupa bulangizi kwaciindi cakusaanguna mubuumi bwabo.

¹² Aboobo kwiinda mukuzumanana cakusyomeka mumulimo wesu wakukambauka, tulasinizya kuti tuyoojanika kutegwa tubaumbulizye bantu ciindi ncobanoolibambilide kutambula mulumbe. (Is. 61:1) Ba Charlotte, ibali kubeleka kabali bapainiya baciindi coonse kwamyaka iili 38 bakati: “Mazuba aano bantu balisweekede. Aboobo bayandika kupegwa coolwe cakuti bamvwe makani mabotu.” Ba Ejvor, bapainiya baciindi coonse kwamyaka iili 34 bakati: “Mazuba aano, kwiinda lyoonse, bantu banji balikatazyidwe mumizeezo. Ndiliyandide kapati kubagwasya. Eeci cilandikulwaizya kukambauka.” Eelo kaka kuyanda basimukoboma nkaambo kapati ikeelede kutupa kuzumanana mumulimo wesu!

13, 14. (a) Ncipego nzi icaambwa mulugwalo lwa Johane 15:11? (b) Mbuti mbotukonzya kukkomana mbubwenya mbuli Jesu? (c)  Ino lukkomano luujatikizya buti mulimo wesu?

¹³ Mubusiku bwamamanino katanafwa, Jesu alimwi wakaambila baapostolo bakwe kujatikizya zipego zinji izyakali kuyoobagwasya kuliyumya mukuzyala micelo. Ino nzipego nzi eezyo, alimwi mbuti mbotugwasyigwa anzizyo?

¹⁴ Cipego cakukondwa. Sena kutobela mulawo wa Jesu wakukambauka ncintu ciminya? Peepe. Naakamana kwaamba cikozyanyo cakwe camusaansa, Jesu wakaamba kuti mbwaanga tuli bakambausi ba Bwami, tunookondwa. (Amubale Johane 15:11.) Mubwini, wakatusyomezya kuti tunookondwa mbubwenya mbuli nguwe. Munzila nzi? Kweelana ambokwaambwa kale, Jesu wakalikozyanisya kumusaansa, mpoonya basikwiiya bakwe wakabakozyanisya kumitabi. Cinyina camusaansa cilaikwabilila mitabi. Kufwumbwa buyo kuti mitabi kaijatilide kulincico, ilatambula meenda alimwi abusani kuzwa kucinyina. Mbubwenya buyo, kufwumbwa kuti twazumanana kukamantana a Kristo kwiinda mukutobela mikondo yakwe, tulajana lukkomano mbubwenya mbuli ndwajisi walo mukucita kuyanda kwa Bausyi. (Joh. 4:34; 17:13; 1Pet. 2:21) Ba Hanne, ibali bapainiya kwamyaka iinda ku 40, bakaamba kuti, “Lukkomano ndondijana ndazwa mumulimo wakukambauka lulandikulwaizya kuzumanana mumulimo wa Jehova.” Masimpe, lukkomano lulatupa nguzu zyakuzumanana kukambauka nomuba muzilawo muli buyumuyumu.—Mt. 5:10-12.

15. (a) Ncipego nzi icaambidwe mulugwalo lwa Johane 14:27? (b) Mbuti luumuno mbolutugwasya kuzumanana kuzyala micelo?

¹⁵ Cipego caluumuno. (Amubale Johane 14:27.) Mubusiku mbubwenya katanafwa, Jesu wakaambila baapostolo bakwe kuti: “Ndamupa luumuno lwangu.” Mbuti cipego eeco, nkokuti luumuno lwakwe, mbolutugwasya kuzyala micelo? Notuliyumya, tulaba aluumuno lwamumoyo lutamani iluuboola akaambo kakuzyiba kuti tulazuminwa a Jehova alimwi a Jesu. (Int. 149:4; Rom. 5:3, 4; Kol. 3:15) Ba Ulf, ibali kubeleka mulimo waciindi coonse kwamyaka iili 45, bakaamba kuti, “Mulimo wakukambauka ulandipa kukatala, pele alimwi undipa kukkomana akuba abuumi bulaampindu.” Eelo kaka tulalumba kapati akaambo kakuba aluumuno lwamumizeezo lutamani!

16. (a) Ncipego nzi icaambidwe mulugwalo lwa Johane 15:15? (b) Mbuti baapostolo mbobakali kukonzya kuzumanana kuba balongwe ba Jesu?

 ¹⁶ Cipego cakuba abalongwe. Naakamana kwaamba mbwaakayandide kuti kukondwa nkobakajisi baapostolo “kuzulile,” Jesu wakabapandulwida mbociyandika kutondezya luyando lwakulyaaba. (Joh. 15:11-13) Mpoonya wakati: “Ndimwaamba kuti muli beenzuma.” Eelo kaka taciliboteli kapati cipego eeci, nkokuti cilongwe a Jesu! Ino ncinzi baapostolo ncobakeelede kucita kutegwa bazumanane kuba balongwe bakwe? Bakeelede ‘kuunka akuyoozumanana kuzyala micelo.’ (Amubale Johane 15:14-16.) Myaka yobilo musyule, Jesu wakalailide baapostolo bakwe kuti: “Nomuunka, kamuyaabukambauka kuti: ‘Bwami bwakujulu bwaswena afwaafwi.’” (Mt. 10:7) Aboobo busiku oobo bwamamanino, Jesu wakabakulwaizya kuliyumya mumulimo ngobakatalika. (Mt. 24:13; Mk. 3:14) Kwaatobela malailile aa Jesu cakali kukatazya, pele bakali kuyoozwidilila, akuzumanana kuba balongwe bakwe. Mubuti? Kwiinda mukugwasyigwa acipego cimbi.

17, 18. (a) Ncipego nzi icaambidwe mulugwalo lwa Johane 15:16? (b) Ino mbuti cipego eeco mbocakabagwasya basikwiiya ba Jesu? (c) Ino nzipego nzi zituyumya-yumya mazuba aano?

¹⁷ Cipego cakwiingulwa mipailo. Jesu wakaamba kuti: ‘Kufwumbwa ncomumulomba Taata kwiinda muzina lyangu, uyoomupa ncico.’ (Joh. 15:16) Eelo kaka kweelede kuti cakabayumya-yumya kapati cisyomezyo eeci baapostolo! * Nokuba kuti tiibakamvwisya kuti Musololi wabo wakali afwaafwi kufwa, pele tiibakali kuyoocaala kabanyina sikubagwasyilizya. Jehova wakalilibambilide kuyiingula mipailo yabo yakulomba lugwasyo kufwumbwa ndobakali kuyandika kutegwa batobele mulawo wakukambauka mulumbe wa Bwami. Aboobo kalitanalampa, bakalibonena Jehova mbwaakayiingula mipailo yabo.—Mil. 4:29, 31.

¹⁸ Oobo mbocibede amazuba aano. Ciindi notuliyumya mukuzyala micelo, tulakkomana acilongwe ncotujisi a Jesu. Kuyungizya waawo, tulakonzya kuba masimpe kuti Jehova ulilibambilide kwiingula mipailo yesu notumulomba kuti atugwasye kutegwa tuzunde buyumu-yumu mbotukonzya kujana ciindi notukambauka makani mabotu aa Bwami. (Flp. 4:13) Eelo kaka tulalumba kapati akaambo kacipego eeci cakwiingulwa mipailo alimwi acilongwe ncotujisi a Jesu! Zipego eezyi izizwa kuli Jehova zilatuyumya-yumya kuzumanana kuzyala micelo.—Jak. 1:17.

19. (a) Ino nkaambo nzi ncotuzumanana kucita mulimo wakukambauka? (b) Ncinzi citugwasya kuzuzikizya mulimo wa Leza?

¹⁹ Mbubwenya mbotwabona mucibalo eeci, tulazumanana kukambauka kutegwa tulemeke Jehova alimwi akusalazya zina lyakwe, kutegwa tutondezye luyando ndotujisi kuli Jehova alimwi a Jesu, kutegwa tucenjezye bantu, alimwi akutondezya luyando kuli basimukoboma. Kuyungizya waawo, zipego zyalukkomano, luumuno, cilongwe, alimwi akwiingulwa mipailo zilatuyumya kapati kutegwa tuzuzikizye mulimo wa Leza. Eelo kaka Jehova uyookkomana kubona kusolekesya kwesu ikuzwa aansi amoyo ‘notuzumanana kuzyala micelo minji’!