1. Ino ncikozyanyo nzi ncaakabasiila basikumutobela Jesu, alimwi bakacita buti? (Amubone cifwanikiso icili aacivwumbyo.)

JESU wakazumanana kuubikkila maano mulimo wakwe waanyika, alimwi uyanda kuti basikumutobela kabacita mbubwenya oobo. (Joh. 4:35, 36) Ciindi Jesu naakali abasikwiiya bakwe, bakali kukambauka cabusungu. (Lk. 10:1, 5-11, 17) Nokuba boobo, ciindi Jesu naakaangwa alimwi akujaigwa, basikwiiya bakwe kwaciindi cisyoonto bakacileka kukambauka. (Joh. 16:32) Pele Jesu naakabusyigwa, wakabakulwaizya kubikkilila maano kumulimo wakukambauka. Ciindi naakapiluka kujulu, bakali kukambauka cabusungu kapati cakuti basinkondonyina bakatongooka balaamba: “Amubone! Mwazuzya Jerusalemu yoonse anjiisyo zyanu.”—Mil. 5:28.

2. Mbuti Jehova mbwaaulongezya mulimo wakukambauka?

² Jesu wakali kuusololela mulimo ngobakali kucita Banakristo bamumwaanda wamyaka wakusaanguna, alimwi Jehova wakabalongezya, aboobo bakavwula. Mucikozyanyo, lya Pentekoste mu 33 C.E., bantu basika ku 3,000 bakabbapatizyigwa. (Mil. 2:41) Kuyungizya waawo, mweelwe wabasikwiiya wakazumanana kuyaabuvwula kapati. (Mil. 6:7) Nokuba boobo, Jesu wakasinsima kuti bantu banji bayakwaatambula makani mabotu kumazuba aamamanino.—Joh. 14:12; Mil. 1:8.

3-4. Nkaambo nzi bamwi ncoubakatazya mulimo wakukambauka, alimwi ncinzi ncotutiilange-lange mucibalo eeci?

³ Toonse tulasolekesya kuubona munzila yeelede mulimo wakukambauka. Mumasi amwi, ncuubauba kucita boobu. Nkaambo nzi? Akaambo kakuti kuli bantu banji kapati ibayandisya kwiiya Bbaibbele cakuti, ibamwi beelede kulindila kusikila akajanike Kamboni wakubayiisya. Pele mumasena amwi, basikumwaya bajana buyumuyumu kapati mumulimo wakukambauka;  bantu tabajaniki mumaanda, mpoonya aabo ibajanika balawaya-waya kutambula mulumbe wamu Bbaibbele.

⁴ Ikuti naa mukkala mubusena mocikatazya kukambauka, cakutadooneka mizeezo iipedwe mucibalo eeci ilamugwasya. Tulalanga-langa zintu nzyobacita bamwi kutegwa kabajana bantu banji mumulimo wabo. Kuyungizya waawo, tulabandika kaambo ncotukonzya kuubona munzila yeelede mulimo, tacikwe makani naa bantu balautambula mulumbe wesu naa pe.

5. Mbuyumuyumu nzi mbobajana Bakamboni banji?

⁵ Bakamboni banji bajana kuti ciyaabwiindila kukatazya kubandika abantu mumaanda aabo. Basikumwaya bamwi bakakkala mumasena aakwabilidwe kapati naa imuli maanda aagatelwa. Maanda aaya alakonzya kaajisi basikugatela ibatazumizyi muntu uuli woonse kunjila ikuti naa tanaatambwa amukamwiniŋanda kumugama. Basikumwaya bambi balakonzya kuunka kuŋanda aŋanda kakunyina buyumuyumu, pele mbasyoonto bantu mbobajana mumaanda. Alimwi basikumwaya bambi bakambaukila muminzi naa mumasena aakulamfwu ikukkala buyo bantu basyoonto. Basikumwaya aabo balakonzya kweenda misinzo milamfwu kapati kutegwa bajane buyo muntu omwe, ooyo ambweni uutajaniki aŋanda. Ikuti naa tukambaukila muzilawo imuli buyumuyumu oobu, tutatyompwi pe. Ncinzi ncotukonzya kucita kuzunda buyumuyumu oobu alimwi akukkomana amulimo wakukambuka?

6. Mbuti bakambausi mbobakozyenye abazubi banswi?

⁶ Jesu wakakozyanisya mulimo wakukambauka kumulimo wamuzubi wanswi. (Mk. 1:17) Bazubi banswi bamwi balakonzya kuzuba kwamazuba aali mbwaabede kakunyina kujaya nswi noiba yomwe. Pele tabatyompwi; balacinca-cinca nzila nzyobabelesya. Balacinca ciindi, busena, naa nzila zyakuzuba. Mbubwenya buyo, andiswe tulakonzya kucinca-cinca mumulimo wesu wakukambauka. Lino tulanga-langa nzila zimwi nzyotukonzya kusoleka kubelesya.

7. Ncinzi ncotukonzya kujana kuti katukambauka aziindi ziindene-indene?

⁷ Amusoleke kubasikila bantu aciindi cimbi. Tuyookambaukila bantu banji ikuti naa katukambauka ciindi nobalangilwa kujanika mumaanda. Kayi muntu amuntu kuli ciindi najokela kuŋanda. Bakwesu abacizyi banji bajana kuti cilagwasya kukambauka kumazuba naa kumangolezya nkaambo nceciindi bantu banji nobajanika. Kuyungizya waawo, bamukamwiniŋanda aciindi eeci inga baliliibide alimwi balayanda kubandika. Ambweni inga camugwasya kutobela muzeezo ooyu uuzwa kumwaalu wazina lya David. Wakaamba kuti bamana kukambauka kwaciindi cili mbocibede mucilawo, walo angobabeleka limwi balajokela mumaanda mobatajana bantu nobaindide mulweendo lwakusaanguna. Wakaamba kuti, “Ndilagambwa kubona bamukamwiniŋanda banji mbotujana mulweendo lwabili.” *

8. Mbuti mbotukonzya kulubelesya lugwalo lwa Mukambausi 11:6?

⁸ Tatweelede kutyompwa pe. Lugwalo aayeeme mutwe wacibalo lutuyeezya bube mbotweelede kuba ambubo. (Amubale Mukambausi 11:6.) Mukwesu David iwaambwa kumatalikilo, kunyina naakatyompwa pe. Mukuya kwaciindi, kuŋanda imwi naakamana kuliswaya ziindi zinji, wakacikonzya kumujana mukamwiniŋanda. Mwaalumi ooyu wakalilibambilide kubandika zyamu Bbaibbele, aboobo wakati, “Ndakkala aŋanda iino myaka iili lusele, pele kunyina umwi wa Bakamboni ba Jehova iwakandiswayide.” Mukwesu David wakayungizya kuti,  “Ikuti twacikonzya kubajana bantu mumaanda aabo, kanji-kanji balaswiilila kumulumbe ngotukambauka.”

9. Mbuti Bakamboni bamwi mbobasoleka kujana bantu batajaniki-janiki mumaanda?

⁹ Amusoleke busena bwiindene. Ikutegwa bacikonzye kubasikila bantu aabo ibatajaniki-janiki mumaanda, basikumwaya bamwi balacinca busena nkobakambaukila. Mucikozyanyo, bukambausi bwamumugwagwa alimwi akubelesya twakubikkila mabbuku twakukuba, ninzila zyagwasya kapati kusikila bantu ibakkala mumaanda mapati imutazumizyigwi kucita bukambausi bwakuŋanda aŋanda. Eeci cibapa coolwe cakubandika mulomompande abantu ibakkala mumaanda aayo. Kuyungizya waawo, basikumwaya banji bajana kuti bantu inga balayanda kubandika naa kutambula mabbuku mumasena aabuleya mbuli mumapaaki, mumamaaketi alimwi amumasena aamakwebo. Mukwesu Floiran, mulangizi wabbazu uukkala ku Bolivia wakati: “Twakali kuunka kumamaaketi alimwi akumasena aamakwebo kuma 1 koloko alimwi a 3 koloko ciindi basimakwebo nobatajisi bubi kapati. Kanji-kanji tulaba amibandi mibotu alimwi buya akutalisya ziiyo zya Bbaibbele.”

10. Ino ninzila nzi nzyomukonzya kubelesya kubasikila bantu?

¹⁰ Amusoleke nzila iimbi. Amweezeezye kuti mwasolekesya kapati kusikila muntu umwi. Mwamuswaya ziindi ziindene-indene pele kunyina najanika aŋanda. Sena kuli nzila zimbi mbwakonzya kusikilwa muntu uuli boobo? Mucizyi Katarína wakati, “Ndilabalembela magwalo aabo batajaniki aŋanda, ikubaambila nzyondali kuyanda kwaamba ikuti nondabajana.” Ncinzi ncotukonzya kwiiya kuli ceeci? Amusolekesye  kumusikila umwi aumwi mucilawo canu kubelesya nzila iili yoonse yabukambausi.

11. Nkaambo nzi bantu bamwi ncobatabikkili maano kumulumbe wesu?

¹¹ Bantu bamwi tababikkili maano kumulumbe wesu. Bayeeya kuti kunyina mbocigwasya kwiiya kujatikizya Leza naa Bbaibbele. Tabasyomi muli Leza akaambo kamapenzi manji kapati ngobabona munyika. Balalikaka Bbaibbele akaambo kakuti babona kuupaupa ameso kwabasololi babukombi ibalitaminina kutobela zili mumo. Ibamwi bajisi bubi kapati amilimo yabo, mikwasyi naa mapenzi aabageme, aboobo balaalilwa kubona mbolikonzya kubagwasya Bbaibbele. Mbuti mbotukonzya kuzumanana kuba alukkomano ciindi aabo mbotukambaukila nobataboni mpindu iili yoonse kujatikizya mulumbe wesu?

12. Mbuti kutobela majwi aali kulugwalo lwa Bafilipi 2:4 mbokukonzya kutugwasya mumulimo wesu?

¹² Amutondezye kuti mulababikkila maano. Banji ibatakali kubikkila maano kaindi, bakaatambula makani mabotu ciindi nobakabona kuti sikumwaya wakali kubabikkila maano kapati. (Amubale Bafilipi 2:4.) Mucikozyanyo, mukwesu David iwaambwa kale wakati, “Ikuti naa muntu waamba kuti tayandi, Bbaibbele lyesu amabbuku tulazibikka ambali akwaamba kuti: ‘Inga ndakkomana kapati kuzyiba cimupa kulimvwa boobu.’” Bantu balakonzya kubona ikuti naa umwi ulibabikkilide maano. Balakonzya kuziluba nzyotwali kwaamba, pele cakutadooneka banooyeeya mbotwapa kuti balimvwe. Nokuba kuti bamukamwiniŋanda tiibatupa coolwe cakubandika ambabo, tulakonzya kutondezya kwiinda muzintu nzyotucita alimwi ambotulibonya kuti tulababikkila maano.

13. Mbuti mbotukonzya kucinca mulumbe wesu kutegwa weendelana anzyayandika mukamwiniŋanda?

¹³ Tulatondezya kuti tulababikkila maano bantu ciindi notucinca mulumbe wesu kutegwa weendelane anzyayandika mukamwiniŋanda. Mucikozyanyo, sena kuli cintu cili coonse ncotwabona icitondezya kuti mukamwiniŋanda ulijisi bana? Bazyali balakonzya kulukkomanina lulayo lwamu Bbaibbele kujatikizya kukomezya bana naa nzila zigwasya zitondezya mbobakonzya kukkomana mumukwasyi. Sena kuli maloko manji kucijazyo caŋanda? Tulakonzya kusala kabandika kujatikizya bugwebenga akuyoowa ikuliko munyika mazuba aano, mpoonya mukamwiniŋanda ulakonzya kukkomana kwiiya cikonzya kwaamanina limwi mapenzi aaya. Kufwumbwa mbocikonzya kuba, amusoleke kubagwasya aabo ibajisi luyandisisyo lwakuswiilila, kubona lulayo lwamu Bbaibbele mbolukonzya kubagwasya. Mucizyi Katarína  iwaambwa kale, wakati, “Ndilaliyeezya kasimpe mbokapa kuti buumi bwangu bubote.” Aboobo ulabandika cakusinizya alimwi cakutadooneka bantu mbakambaukila balakonzya kubona oobo.

14. Kweelana a Tusimpi 27:17, mbuti mbotukonzya kugwasyanya mubukambausi?

¹⁴ Amulombe lugwasyo kuli bamwi. Mumwaanda wamyaka wakusaanguna, Paulo wakayiisya Timoteyo kukambauka akuyiisya, alimwi wakakulwaizya Timoteyo kuzibelesya nzila eezyo kugwasya bamwi. (1Kor. 4:17) Mbubwenya mbuli Timoteyo, tulakonzya kwiiya kubakwesu abacizyi basimide mumbungano. (Amubale Tusimpi 27:17.) Amubone cikozyanyo camukwesu Shawn. Kwaciindi cili mbocibede, wakabeleka kali mupainiya mubusena bumwi ibuli kulamfwu, ooko bantu nkobakali kulimvwa kukkutila abukombi bwabo. Mbuti mbwaakazumanana kukkomana? Mboobu mbwaakaamba: “Zimwi ziindi, ndakali kujana wakubeleka limwi. Ciindi ncotwakali kweenda kuzwa kuŋanda imwi kuya kuliimbi, twakali kucibelesya kubandika mbotukonzya kuyaambele mukuyiisya kwesu. Mucikozyanyo, twakali kubandika mbotwaweendelezya mubandi amukamwiniŋanda. Mpoonya twakali kubandika mbotukonzya kuweendelezya munzila iindene twaakulijana mubukkale oobo.”

15. Nkaambo nzi mupailo ncouyandika kapati mumulimo wesu wakukambauka?

¹⁵ Amupaile kuli Jehova kulomba lugwasyo. Amumulombe Jehova kuti amugwasye lyoonse nomutola lubazu mumulimo wakukambauka. Kakunyina muuya wakwe uusalala uujisi nguzu kapati, kunyina ncotukonzya kuzuzikizya. (Int. 127:1; Lk. 11:13) Ciindi nomulomba lugwasyo kuli Jehova mumupailo, amumwaambile cacigaminina. Mucikozyanyo, amumulombe kuti amusololele kumuntu uujisi luyandisisyo alimwi uulibambilide kuswiilila. Mpoonya amucite zintu kweelana amupailo wanu kwiinda mukukambaukila muntu uuli woonse ngomwayaanya.

16. Nkaambo nzi ciiyo cesu tobeni ncociyandika mumulimo wesu wakukambauka?

¹⁶ Amujane ciindi cakucita ciiyo canu nobeni. Ijwi lya Leza lyaamba kuti: ‘Amuzyibe kuyanda kwa Leza, ikubotu, kutambulika alimwi kulondokede.’ (Rom. 12:2) Ikuti katusinizyide ncobeni kuti tulikazyi kasimpe kajatikizya Leza, tuyoobandika cakusinizya ciindi notukambaukila bamwi. Mucizyi Katarína, iwaambwa kale wakati: “Ndakabona kuti ndakeelede kuyumya lusyomo lwangu kujatikizya njiisyo zimwi zyamu Bbaibbele zyantalisyo. Aboobo ndakatalika kwiiya cakulomya bumboni butondezya kuti kuli Mulengi, Bbaibbele masimpe ndi Jwi lya Leza, akuti Leza ulijisi mbunga iimwiiminina mazuba aano.” Mucizyi Katarína wakaamba kuti, ciiyo cakwe mwini cakayumya lusyomo lwakwe alimwi akuyungizya lukkomano ndwajisi mumulimo wakukambauka.

17. Nkaambo nzi Jesu ncaakazumanana kukambauka?

¹⁷ Jesu wakazumanana kukambauka nokuba kuti bamwi tiibakali kubikkila maano kumulumbe wakwe. Nkaambo nzi? Wakalizyi kaambo bantu ncobakali kuyandika kukazyiba kasimpe, alimwi wakali kuyanda kupa bantu banji coolwe cakutambula mulumbe wa Bwami. Kuyungizya waawo, wakalizyi kuti bamwi kumatalikilo tiibakali kuyoobikkila maano, pele kumbele bakali kuyookatambula kasimpe. Amubone cakacitika mumukwasyi wakwe. Mumulimo wakwe woonse iwakatola myaka yotatwe alimwi acisela, kunyina akati kabanabokwabo iwakaba sikwiiya wakwe. (Joh. 7:5) Pele naakabusyigwa, bakaba Banakristo.—Mil. 1:14.

18. Nkaambo nzi ncotuzumanana kukambauka?

¹⁸ Tatuzyi uuyookatambula kasimpe kamu Bbaibbele nkotukambauka. Bantu bamwi cilabatolela  ciindi kuutambula mulumbe wesu kwiinda bamwi. Nobaba baabo ibasala kutatuswiilila balabubona bukkale bwesu bubotu alimwi ambotuzilanga munzila yeelede zintu, aboobo mukuya kwaciindi balakonzya kutalika ‘kumulemeka Leza.’—1Pet. 2:12.

19. Kweelana alugwalo lwa 1 Bakorinto 3:6, 7, ncinzi ncotweelede kubikkila maano?

¹⁹ Mbotuyaabuzumanana kusyanga alimwi akutilila, tweelede kubikkila maano kulubazu ndwaajisi Leza. (Amubale 1 Bakorinto 3:6, 7.) Mukwesu Getahun, uubelekela ku Ethiopia, wakati: “Kwamyaka iinda ku 20, ndime buyo ndakali Kamboni mucilawo mutavwuli kukambaukilwa. Pele lino kuli basikumwaya bali 14. Ibali 13 akati kabo bakabbapatizyigwa, kubikkilizya abakaintu bangu alimwi abana botatwe. Ibantu basika ku 32 balajanika kumiswaangano.” Eelo kaka mukwesu ooyu ulikkomene, kuti wakazumanana kukambauka kumwi kalindila cakukkazika moyo kuti Jehova abakwele bantu bajisi luyandisisyo kumbunga yakwe!—Joh. 6:44.

20. Muunzila nzi motuli mbuli basikuvwuna bantu?

²⁰ Jehova ubona bantu boonse kuti balayandika. Ulatupa coolwe cakubeleka antoomwe a Mwanaakwe mukuyobolola bantu kuzwa kumasi woonse kaatanasika mamanino aabweende bwazintu oobu. (Hag. 2:7) Mulimo wesu wakukambauka ulakonzya kukozyanisyigwa amulimo wakufwutula bantu. Aboobo swebo tuli mbuli bantu ibatumwa kuyoofwutula babelesi ibakavwukkilwa mumugoti. Nokuba kuti mbasyoonto basikufwutulwa ibakonzya kujanwa kabali baumi, mulimo uucitwa abasikubavwuna boonse ulayandika kapati. Ncimwi buyo amulimo wesu wakukambauka ngotucita. Tatuzyi naa bali bongaye bantu ibayoovwunwa mubweende bwa Saatani. Pele Jehova ulakonzya kubelesya uuli woonse akati kesu kubagwasya bantu aaba. Mukwesu Andreas, uukkala ku Bolivia wakati, “Ndilizyi kuti ciindi muntu naaiya kasimpe alimwi akubbapatizyigwa, nkokuti mbanji ibakatola lubazu mukumugwasya.” Aboobo atuzumanane kuubona munzila yeelede mulimo wesu wakukambauka. Ikuti twacita oobo, Jehova uyootulongezya alimwi mulimo wesu uyootuletela lukkomano lwini-lwini.