1-2. Mbuyumuyumu nzi mbobajana Bakamboni banji?

MWAAPOSTOLO Paulo wakakulwaizya Timoteyo alimwi a Banakristo boonse kuti bauzuzikizye cakumaninina mulimo wabo. (2Tim. 4:5) Toonse tulasolekesya kulutobela lulayo lwa Paulo. Nokuba boobo, kuli buyumuyumu. Bunji bwabakwesu abacizyi balayoowa kutola lubazu mumulimo wakukambauka. (2Tim. 4:2) Mucikozyanyo, amuyeeye kujatikizya bakwesu ibakkala muzisi mulimo wesu moulesyedwe. Balabikka buumi bwabo muntenda kwiinda mukukambauka.

² Bantu ba Jehova balajana mapenzi manji aakonzya kubatyompya. Mucikozyanyo, banji balabeleka mawoola manji kutegwa bajane nzyouyandika mukwasyi wabo. Balayanda kucita zinji mumulimo, pele balakatala kapati kumamanino aansondo. Bamwi balaalilwa kubeleka kusikila mpobagolela akaambo kakuciswa-ciswa naa kucembaala; ambweni bamwi tabacikonzyi nokuba kuzwa aŋanda. Mane buya bamwi balimvwa kuti tabayandiki kuli Jehova. Mucizyi Mary * uukkala ku Middle East, wakaamba kuti: “Ciyandika kubeleka canguzu kulwana mizeezo iitaluzi cakuti inga cindipa kukatala mumizeezo. Mpoonya manjezeezya alandikatazya nkaambo eeci cindimanina ciindi alimwi anguzu nzyondeelede kubelesya mubukambausi.”

3. Ncinzi ncotutiilange-lange mucibalo eeci?

³ Kufwumbwa bukkale motubede, Jehova ulakonzya kutupa nguzu kutegwa tuliyumye, akuzumanana kumubelekela kusikila mpotugolela. Katutanalanga-langa mbwakonzya kutugwasya Jehova, atubone mbwaakayumya Paulo alimwi a Timoteyo kutegwa bauzuzikizye mulimo wabo nokuba kuti bakajisi buyumuyumu.

4. Mbuyumuyumu nzi mbwaakajisi Paulo?

⁴ Paulo wakajana buyumuyumu bunji. Wakali kuyandika lugwasyo kwaambisya ciindi naakali kuumwa, kupwaigwa mabwe alimwi akubikkwa muntolongo. (2Kor. 11:23-25) Caantangalala, Paulo wakaamba kuti zimwi ziindi wakali kulwana amizeezo iitali kabotu. (Rom. 7:18, 19, 24) Alimwi wakajisi bulwazi ibwakali mbuli “mumvwa mumubili,” bwalo mbwaakali kuyanda kuti Leza abugwisye.—2Kor. 12:7, 8.

5. Nzintu nzi nzyaakacita Paulo nokuba kuti wakajisi buyumuyumu?

⁵ Jehova wakamuyumya Paulo kutegwa aucite mulimo wakwe nokuba kuti wakajisi buyumuyumu. Amubone nzyaakacita Paulo. Mucikozyanyo, ciindi naakaangidwe muŋanda ku Roma, wakabakambaukila cabusungu banji, kubikkilizya abasololi baba Juda alimwi abalupati-pati bamfwulumende. (Mil. 28:17; Flp. 4:21, 22) Alimwi wakakambaukila bantu banji ibakali Balindizi ba Mwami Muna Roma, akuli baabo boonse ibakali kumuswaya. (Mil. 28:30, 31; Flp. 1:13) Aciindi eeco, Leza wakamubelesya Paulo kulemba magwalo aakagwasya Banakristo bakasimpe kaindi alimwi amazuba aano. Kuyungizya waawo, cikozyanyo ca Paulo cakayumya mbungano yaku Roma, calo cakapa kuti bakwesu ‘baindile kuba basicamba ikwaamba jwi lya Leza cakutayoowa.’ (Flp. 1:14) Nokuba kuti Paulo tanaakali kukonzya kubeleka kusikila mpagolela, wakacita nzyaakali kukonzya, calo ‘cakapa kuti makani mabotu aunke kumbele.’—Flp. 1:12.

6. Kweelana alugwalo lwa 2 Bakorinto 12:9, 10, ncinzi cakamugwasya Paulo kuuzuzikizya mulimo wakwe?

⁶ Paulo wakalizyi kuti zintu zyoonse nzyaakacita mumulimo wa Jehova, wakazicita kwiinda munguzu zya Leza, ikutali zyakwe. Wakaamba kuti nguzu zya Leza ‘zilalondolwa mukubula nguzu kwakwe.’ (Amubale 2 Bakorinto 12:9, 10.) Kwiinda mumuuya wakwe uusalala, Jehova wakapa Paulo nguzu kutegwa auzuzikizye cakumaninina mulimo wakwe, nokuba kuti wakali kupenzyegwa, kubikkwa muntolongo alimwi abuyumuyumu bumbi mbwaakajisi.

7. Mbuyumuyumu nzi mbwaakeelede kuzunda Timoteyo kutegwa azuzikizye mulimo wakwe?

⁷ Timoteyo, mulongwe wa Paulo mukubusi, awalo wakasyoma nguzu zya Leza kucita mulimo wakwe. Timoteyo wakali kumusangana  Paulo munyendo zyakwe zyabumisyinali. Alimwi Paulo wakamutuma munyendo zimbi kuswaya alimwi akuyumya-yumya mbungano. (1Kor. 4:17) Kweelede kuti Timoteyo wakalitenga. Ambweni nkakaambo kaako Paulo wakamwambila kuti: “Kutabi muntu naba omwe uubaula bukubusi bwako.” (1Tim. 4:12) Kuyungizya waawo, aciindi eeci, Timoteyo wakajisi bumvwa mumubili, nkokuti wakali “kuciswa-ciswa.” (1Tim. 5:23) Pele Timoteyo wakalizyi kuti muuya uusalala wa Jehova uulaanguzu, wakali kukonzya kumupa nguzu nzyaakali kuyandika kutegwa akambauke makani mabotu alimwi akubelekela bakwesu.—2Tim. 1:7.

8. Mbuti Jehova mbwabayumya bantu bakwe mazuba aano?

⁸ Mazuba aano, Jehova ulabapa bantu bakwe “nguzu zigambya iziinda zyabantu” kutegwa bazumanane kumubelekela cakusyomeka. (2Kor. 4:7) Atulange-lange zintu zyone nzyatupa Jehova kutegwa atuyumye akutugwasya kuzumanana kusyomeka kulinguwe: mupailo, Bbaibbele, bunyina bwa Bunakristo alimwi amulimo wakukambauka.

9. Mbuti mupailo mboukonzya kutugwasya?

⁹ Kuyumizyigwa amupailo. Kulugwalo lwa Baefeso 6:18, Paulo utukulwaizya kupaila kuli Leza “ciindi coonse.” Mukwiingula, Leza uyootuyumya. Ba Jonnie ibakkala ku Bolivia, bakalubona lugwasyo oolu ciindi nobakajana masunko aatobelene. Bakaintu babo alimwi abazyali babo boonse bakaciswa kapati aciindi comwe. Ba Jonnie bakapenga kubalanganya balwazi boonse botatwe. Banyina bakafwa, alimwi cakatola ciindi kuti bakaintu babo abausyi bapone. Balanga musyule, ba Jonnie baamba kuti, “Ciindi nondakali kulibilika kapati, icakali kundigwasya lyoonse nkwaamba mipailo yacigaminina.” Jehova wakabapa nguzu nzyobakali kuyandika ba Jonnie kutegwa baliyumye. Ba Ronald ibaalu ku Bolivia, bakamvwa kuti banyina balaakkansa. Mpoonya bakafwa nokwakainda mwezi omwe. Ino ncinzi cakabagwasya kuliyumya? Bakaamba kuti: “Ciindi nondipaila kuli Jehova, ndilamwaambila bwini mbondilimvwa. Ndilizyi kuti ulandimvwisya kwiinda muntu uuli woonse, nokuba ndime buya kundigama.” Zimwi ziindi, tulakonzya kutyompwa kapati naa kutazyiba ncotweelede kwaamba mumupailo. Pele Jehova ututamba kupaila kulinguwe nokuba kuti cilatukatazya kwaamba mbotulimvwa.—Rom. 8:26, 27.

10. Kweelana alugwalo Bahebrayo 4:12, nkaambo nzi kubala Bbaibbele akuzinzibala kuyeeya nzyotubala ncokuyandika kapati?

¹⁰ Kuyumizyigwa a Bbaibbele. Paulo wakali kubala Magwalo kutegwa amuyumye akumuumbulizya, andiswe tweelede kucita mbubwenya oobo. (Rom. 15:4) Ciindi notubala Jwi lya Leza akuzinzibala kuyeeya nzyotubala, Jehova ulakonzya kubelesya muuya wakwe kutugwasya kumvwisya mbwaabeleka Magwalo kweelana abukkale motubede. (Amubale Bahebrayo 4:12.) Ba Ronald ibaambwa kumatalikilo, bakaamba kuti: “Ndilikkomene kuti ndakaba acilengwa cakubala Bbaibbele abuzuba. Ndilazinzibala kuyeeya bube bwa Jehova alimwi ambwabeendelezya bantu bakwe caluyando. Eeci cilandiyumya.”

11. Mbuti Bbaibbele mbolyakamuyumya mucizyi iwakali mubuumba?

¹¹ Tulakonzya kuzilanga munzila yeelede zintu kujatikizya bukkale bwesu, kwiinda mukuzinzibala kuyeeya nzyotubala mu Jwi lya Leza. Amubone Bbaibbele mbolyakamugwasya mukamufwu iwakauside. Mwaalu wakamukulwaizya kuti ulakonzya kujana ziiyo  zigwasya kwiinda mukubala bbuku lyamu Bbaibbele lya Jobu. Ciindi naakacita boobo, kumatalikilo wakamudooneka Jobu akaambo kakuyeeya kwakwe kutaluzi. Mukuyeeya kwakwe wakacenjezya Jobu kuti: “Utanikuyeeyi buyo mapenzi aako!” Pele wakabona kuti bube bwakwe bwakalikozyenye abwa Jobu. Eeci cakamugwasya kucinca mbwaakali kuzibona zintu alimwi akuliyumya kukucisa nkwaakamvwide akaambo kakufwidwa mulumi.

12. Mbuti Jehova mbwatuyumya kwiinda mubasyomima?

¹² Kuyumizyigwa abunyina bwa Bunakristo. Nzila iimbi Jehova mbwabayumya Banakristo nkwiinda mubasyominyina. Paulo wakalemba kuti wakali kuyandisisya “kuyumizyanya kwiinda mulusyomo” lwabakwesu abacizyi. (Rom. 1:11, 12) Ba Mary ibaambwa kale kumatalikilo, balakkomana kuyanzana abakwesu abacizyi. Bakaamba kuti: “Jehova wakabelesya bakwesu abacizyi ibatakaazyi mapenzi aangu. Bakali kwaamba zintu zikulwaizya naa kutuma kkaadi, alimwi eeco ncondakali kuyandika. Alimwi cilagwasya kwaanguluka kubandika abacizyi ibakajisi mapenzi aakozyenye aangu akwiiya kulimbabo. Kuyungizya waawo, baalu lyoonse bandipa kulimvwa kuti ndili cibeela cambungano iciyandika kapati.”

13. Mbuti mbotukonzya kuyumizyanya umwi amweenzinyina kumiswaangano yambungano?

¹³ Busena bwiinda kubota kapati nkotukonzya kukulwaizyanya, nkuumiswaangano yambungano. Ciindi nomwajanika kumiswaangano, mulakonzya kubayumya bamwi kwiinda mukubaambila kuti mulabayanda akubalumba kuzintu nzyobacita. Mucikozyanyo, kautanatalika muswaangano, mwaalu wazina lya Peter wakaambila mucizyi umwi uukwetwe kumuntu uutali Kamboni kuti: “Eelo kaka cilakulwaizya kumubona kumiswaangano! Lyoonse mulabagwasya bana banu ibali cisambomwe kuboola kumiswaangano akupa bwiinguzi.” Yakamweenda misozi mucizyi ooyu ciindi naakaingula kuti: “Eelo kaka ndalumba kapati kumvwa majwi aali boobu sunu.”

14. Ino mulimo wakukambauka utugwasya buti?

¹⁴ Kuyumizyigwa amulimo wakukambauka. Ciindi notwaambila bamwi kasimpe kamu Bbaibbele, tulakatalukwa akuba anguzu, tacikwe makani naa baswiilila naa pe. (Tus. 11:25) Mucizyi Stacy wakabona kukambauka mbokukulwaizya. Ciindi munamukwasyi naakagusyigwa mumbungano, wakausa kapati akulibuzya kuti, ‘Ambweni kuli nzindakeelede kucita kutegwa ndimugwasye.’ Wakazumanana kuliyeeya penzi eeli. Ino ncinzi cakamugwasya mubukkale oobu butyompya? Mulimo wakukambauka! Ciindi naakali kuunka mumulimo wakukambauka, wakatalika kubikkila maano kubantu bamucilawo cakwe ibakali kuyandika lugwasyo. Wakaamba kuti: “Aciindi eeci, Jehova wakandipa ciiyo ca Bbaibbele icakali kuyaambele cakufwambaana. Eeci cakandikulwaizya kapati. Cintu cakandigwasya kapati mubuumi mulimo wakukambauka.”

15. Ino mwiiya nzi kumajwi ngaakaamba mucizyi Mary?

¹⁵ Akaambo kabukkale bwabo, bamwi inga balimvwa kuti tabakonzyi kucita zinji mumulimo wakukambauka. Ikuti naa mbomulimvwa oobo, amuyeeye kuti Jehova ulakkomana kuti mwabeleka kusikila mpomugolela. Atubone cikozyanyo camucizyi Mary iwaambwa kale. Ciindi naakalongela kubusena nkobaambaula mwaambo uumbi, wakalimvwa kubula mpindu. Wakaamba kuti, “Kwaciindi cili mbocibede, cilikke buyo ncondakali kukonzya kucita, nkupa bwiinguzi bufwaafwi, kubala kapango kamu Bbaibbele, naa kwaabila katulakiti mumuunda.” Eeci cakamupa kulimvwa  kubula mulimo alyeezyanisya abaabo ibakauzyi mwaambo. Nokuba boobo, wakacinca mbwaakali kuyeeya. Wakatalika kuyeeya kuti Jehova ulakonzya kumubelesya nokuba kuti tanaakauzyi kabotu mwaambo. Wakaamba kuti, “Ncolyaamba Bbaibbele tacikatazyi alimwi cilakonzya kucinca buumi bwabantu.”

16. Ncinzi cikonzya kubagwasya aabo ibatabukili bulo kuba anguzu?

¹⁶ Jehova ulabona akulumba kumakanze ngotujisi aakukambauka, nokuba kuti tatubukili bulo. Ulakonzya kutujalwida zyoolwe zyakupa bumboni kuli baabo batulanganya naa kubasilisi. Ikuti katweezyanisya nzyotucita lino kulizyeezyo nzyotwakali kucita kaindi, tulakonzya kutyompwa. Pele kuti twabona mbwatugwasya Jehova lino, tuyooba anguzu nzyotuyandika kutegwa tuliyumye mumasunko cakukondwa.

17. Kweelana alugwalo lwa Mukambausi 11:6, nkaambo nzi ncotweelede kuzumanana kukambauka nokuba kuti kunyina watondezya luyandisisyo mpoonya-mpoonya?

¹⁷ Tatuzyi naa njiili mbuto yakasimpe njotusyanga iikonzya kusimpa miyanda akukomena. (Amubale Mukambausi 11:6.) Mucikozyanyo, mucizyi Barbara uujisi myaka yakuma 80, lyoonse ulakambauka kubelesya fooni alimwi akulemba magwalo. Mulugwalo lwakwe lumwi, wakabikkilizya a Ngazi Yamulindizi yamu March 1, 2014, iijisi cibalo cakuti, “Eeco Leza Ncaakamucitila.” Tanaakazyi kuti wakatumina banabukwetene ibatakacili Bakamboni ba Jehova. Bakaibala magazini eeyo cakwiinduluka-induluka. Mulumi wakalimvwa mbuli kuti Jehova wakali kwaambaula anguwe cacigaminina. Nokuba kuti kwakainda myaka iinda ku 27 kuzwa nobakagusyidwe mumbungano, banabukwetene aaba bakatalika kujanika kumiswaangano alimwi akuba Bakamboni basungu. Amweezeezye buyo mbobakakulwaizyigwa ba Barbara kubona bubotu bwakajanika akaambo kalugwalo lomwe buyo ndobakalemba!

18. Ncinzi ncotweelede kucita kutegwa tuyumizyigwe a Leza?

¹⁸ Jehova ulatupa coolwe cilibedelede cakutambula nguzu zyakwe. Ciindi notubelesya zintu nzyatupa, mbuli mupailo, Bbaibbele, bunyina bwa Bunakristo alimwi amulimo wakukambauka, tutondezya kuti tulijisi lusyomo lwakuti ulakonzya kutugwasya akuti ulayanda kucita oobo. Aboobo atuzumanane kumusyoma Taateesu wakujulu, uukkomanina ‘kutondezye nguzu zyakwe ikugwasya baabo bamusyoma camoyo woonse.’—2Mak. 16:9.