1. Nkusala kuli buti ikuyandika kapati bantu boonse nkobeelede kucita?

 KULI kusala kuyandika kapati nkobeelede kucita bantu mazuba aano. Sena balasala kuba kulubazu lwa Jehova Leza Mweendelezi weelela wabubumbo boonse, naa Saatani Diabolosi sinkondonyina mubyaabi? Umwi aumwi weelede kusala lubazu lomwe. Kufwumbwa lubazu ndobasala, ciyoojatikizya buumi bwabo bwakumbele. (Mt. 25:31-33, 46) ‘Lyamapenzi mapati,’ bayoobikkwa citondezyo calufwutuko naa lunyonyooko.—Ciy. 7:14; 14:9-11; Ezk. 9:4, 6.

2. (a) Ino lugwalo lwa Bahebrayo 10:35-39 lutukulwaizya kucita nzi? (b) Mbuti bbuku lya Ciyubunuzyo mbolitugwasya?

² Amubale Bahebrayo 10:35-39. Ikuti naa mwakasala kugwasyilizya bweendelezi bwa Jehova, nkokuti mwakasala cabusongo. Lino muliyandide kubagwasyilizya bamwi kusala kabotu. Kutegwa mucite oobo, makani aali mubbuku lya Ciyubunuzyo ayoomugwasya. Bbuku eeli ilikkomanisya kapati lilaamba ciyoobacitikila aabo ibakazya Jehova, alimwi azilongezyo nzyobayoojana aabo ibagwasyilizya bweendelezi bwakwe cakusyomeka. Inga twacita kabotu kukalanga-langa kasimpe aaka ikayandika kapati. Kucita boobu kuyooyumya makanze eesu aakuzumanana kumubelekela Jehova. Kuyungizya waawo, tulakonzya kubelesya nzyotwaiya kugwasya bamwi kusala kubelekela Jehova alimwi akuzumanana kucita boobo.

3. Ncinzi ncotutiilange-lange mucibalo eeci?

³ Mucibalo eeci, tulalanga-langa mibuzyo yobilo: Nzintu nzi nzyobalangila aabo ibagwasyilizya bweendelezi bwa Leza? Kulubazu lumbi, ncinzi ciyoobacitikila aabo ibagwasyilizya  munyama uusalala pyu, iiwaambidwe mubbuku lya Ciyubunuzyo?

4. Ninkamu nzi mwaapostolo Johane njaakabona antoomwe a Jesu kujulu?

⁴ Mucilengaano, mwaapostolo Johane wakabona nkamu zyobilo izigwasyilizya bweendelezi bwa Jehova alimwi akutambula zilongezyo zyabuumi butamani. Inkamu yakusaanguna njaba 144,000. (Ciy. 7:4) Bakazwa anyika kuyoobamba mfwulumende naa Bwami, antoomwe a Jesu kujulu. Boonse bayoolela nyika. (Ciy. 5:9, 10; 14:3, 4) Mucilengaano, Johane wakababona kabaimvwi aa Cilundu ca Ziyoni antoomwe a Jesu kujulu.—Ciy. 14:1.

5. Ncinzi ciyoocitika ino-ino kubasyeede iba 144,000 ibacipona anyika?

⁵ Kuzwa kuciindi cabaapostolo kusikila lino, bantu banji basalwa kuba cibeela caba 144,000. (Lk. 12:32; Rom. 8:17) Nokuba boobo, Johane wakaambilwa kuti balikke basyeede naa mweelwe musyoonto, mbebanoopona anyika kuciindi camazuba aamamanino. Aaba “basyeede,” bayoobikkwa “ciganto” camamanino kutondezya kuti balazuminwa a Jehova, kaatanatalika mapenzi mapati. (Ciy. 7:2, 3; 12:17) Mpoonya aciindi cimwi lyamapenzi mapati, basyeede aaba bayootolwa kujulu kuyoosangana beenzinyina bananike iba 144,000, aabo ibakafwa kabasyomeka. Ookuya bayoolela antoomwe a Jesu mu Bwami bwa Leza.—Mt. 24:31; Ciy. 5:9, 10.

6-7. (a) Ninkamu nzi njaakabona Johane, alimwi ncinzi ncotwiiya kujatikizya njiyo? (b) Nkaambo nzi basyeede alimwi ‘abankamu mpati’ ncobeelede kulangila kuzuzikizyigwa kwabusinsimi ibuli ku Ciyubunuzyo caandaano 7?

⁶ Naakamana kubona nkamu yakujulu, Johane wakabona “nkamu mpati.” Mukwiimpana aba 144,000, nkamu eeyi taikonzyi kubalwa. (Ciy. 7:9, 10) Ncinzi ncotwiiya kujatikizya njiyo? Johane wakaambilwa kuti: “Aaba mbambabo bazwa mumapenzi mapati, alimwi bawasya zisani zyabo zilamfwu akuzitubya mubulowa bwa Mwanaambelele.” (Ciy. 7:14) Yaakufwutuka lyamapenzi mapati, “nkamu mpati” eeyi iyookkala aano anyika akukkomana azilongezyo zibotu kapati.—Int. 37:9-11, 27-29; Tus. 2:21, 22; Ciy. 7:16, 17.

⁷ Kufwumbwa naa twakasalwa kuunka kujulu naa tuyoosyaala aano anyika, sena tulasyoma kuti tulijatikizyidwe mukuzuzikizyigwa kwabusinsimi ibuli ku Ciyubunuzyo caandaano 7? Tuleelede. Eelo kaka cinooli ciindi cikkomanisya kunkamu zyoonse zyobilo zyababelesi ba Leza! Tuyookkomana kapati akaambo kakusala kugwasyilizya bweendelezi bwa Jehova. Ncinzi cimbi ncolitwaambila bbuku lya Ciyubunuzyo kujatikizya mapenzi mapati?—Mt. 24:21.

8. Ncinzi ciyootalisya mapenzi mapati, alimwi ino bantu banji bayoojatikizyigwa buti?

⁸ Kweelana ambotwakaiya mucibalo cainda, mfwulumende zyamunyika lino-lino ziyoomubukila Babuloni Mupati, ibulelo bwanyika yoonse bwabukombi bwakubeja. (Ciy. 17:16, 17) Aaya anooli matalikilo aamapenzi mapati. Sena eeci ciyoopa kuti bantu banji basale kumukomba Jehova? Peepe. Muciindi caboobo, Ciyubunuzyo caandaano 6 citondezya kuti aciindi eeco cikatazya, aabo ibatamubelekeli Jehova bayooyandaula lukwabililo kumfwulumende alimwi akuli basimakwebo bamunyika, balo ibakozyanisyigwa kumalundu. Mbwaanga bantu aabo tabanoogwasyilizyi Bwami bwa Leza, Jehova uyoobabona kuti mbaasinkondonyina.—Lk. 11:23; Ciy. 6:15-17.

9. Mbuti bantu ba Jehova mbobanakwiindene abantu boonse lyamapenzi mapati, alimwi ncinzi ciyakubacitikila?

 ⁹ Masimpe, babelesi ba Jehova basyomeka banakwiindene abantu boonse kuciindi eeco cikatazya. Nkaambo mbembabo balikke anyika ibanoobelekela Jehova Leza alimwi akukaka kugwasyilizya “munyama.” (Ciy. 13:14-17) Eeci ciyakubanyemya kapati aabo ibakazya Jehova. Aboobo nkamu yazisi iyoobalwana bantu ba Leza munyika yoonse. Bbaibbele lipandulula kulwana ooku kuti nkulwanwa a Gogo waku Magogo.—Ezk. 38:14-16.

10. Kweelana a Ciyubunuzyo 19:19-21, ino Jehova uyoocita buti ciindi bantu bakwe baakulwanwa?

¹⁰ Ino Jehova uyoocita buti kukulwanwa ooku kwalunya? Utwaambila kuti: “Bukali bwangu bupati buyoovwutuka.” (Ezk. 38:18, 21-23) Ciyubunuzyo caandaano 19 citwaambila ciyootobela. Jehova uyootuma Mwanaakwe kukwabilila bantu bakwe alimwi akulwana basinkondonyina. “Impi zyabasikalumamba bakujulu” ibakali, nkokuti bangelo basyomeka antoomwe aba 144,000 bayoomusangana Jesu kulwana Gogo waku Magogo. (Ciy. 17:14; 19:11-15) Ncinzi ciyootobela akaambo kankondo eeyi? Kuyooba kunyonyoonwa kwabantu boonse alimwi ambunga zyoonse izikazya Jehova!—Amubale Ciyubunuzyo 19:19-21.

11. Ncintu nzi ciyandika kapati icaambidwe mubbuku lya Ciyubunuzyo?

¹¹ Amweezyeezye buyo aabo basyomeka anyika mbobayoolimvwa, baakufwutuka kulunyonyooko lwabasinkondonyina Leza! Eelo kaka eeco cinooli ciindi cikkomanisya! Nokuba kuti kunooli koompolola kapati calukkomano kujulu ciindi Babuloni Mupati aakunyonyoonwa, kuli cintu cimbi ciyakuleta lukkomano lunji kapati. (Ciy. 19:1-3) Ciindi eeco cikkomanisya cilaambidwe kubbuku lya Ciyubunuzyo, nkokuti “bwiinga bwa Mwanaambelele.”—Ciy. 19:6-9.

12. Kweelana a Ciyubunuzyo 21:1, 2, ndilili bwiinga bwa Mwanaambelele nobuyoocitika?

¹² Ndilili bwiinga nobuyoocitika? Boonse iba 144,000 banooli kujulu kakusyeede buyo ciindi cisyoonto kutegwa nkondo ya Amagedoni italike. Nokuba boobo, eeco tacinooli ciindi cabwiinga bwa Mwanaambelele. (Amubale Ciyubunuzyo 21:1, 2.) Bwiinga bwa Mwanaambelele buyoocitika yaakwiinda nkondo ya Amagedoni alimwi basinkondonyina Leza boonse baakunyonyoonwa.—Int. 45:3, 4, 13-17.

13. Ino bwiinga bwa Mwanaambelele bwaamba nzi kuli baabo ibajatikizyidwe?

¹³ Ino bwiinga bwa Mwanaambelele bwaamba nzi kuli baabo ibajatikizyidwe? Mbubwenya lukwatano mboluswaanganya mwaalumi amukaintu, oobu bwiinga bwacikozyanyo buswaanganya Mwami, Jesu Kristo ‘anabwiinga’ wakwe, nkokuti ba 144,000. Bwiinga oobu bukkomanisya buyootalisya mfwulumende mpya iyoolela nyika kwamyaka iili 1,000.—Ciy. 20:6.

14-15. Ino Ciyubunuzyo caandaano 21 cikozyanisya ba 144,000 kunzi? (Amubone cifwanikiso icili aacivwumbyo.)

¹⁴ Ciyubunuzyo caandaano 21 cikozyanisya ba 144,000 kumunzi weebeka kapati, iwiitwa kuti “Jerusalemu Mupya.” (Ciy. 21:2, 9) Munzi ooyu wakajisi mabwe aantalisyo aali 12 aakalembedwe “mazina aali 12 aabaapostolo bali 12 ba Mwanaambelele.” Nkaambo nzi eeci ncocakamupa kubikkila maano Johane? Nkaambo kakuti zina lyakwe lyakalilembedwe  abbwe limwi akati kamabwe aaya. Eelo kaka eeci cakali coolwe cilibedelede!—Ciy. 21:10-14; Ef. 2:20.

¹⁵ Munzi ooyu wacikozyanyo uliindene kapati aminzi iimbi. Ujisi mugwagwa mupati wamunzi wangolida yini-yini, milyango yangale iili 12, bwaanda antalisyo zyakabotezyedwe amabwe mayandisi, alimwi ambazu zyamunzi zipimidwe kabotu-kabotu. (Ciy. 21:15-21) Pele Johane wakabona kuti kuli cintu cimwi icatakaliko! Amubone ncatwaambila: “Lino tiindakabona tempele mulinguwo, nkaambo Jehova Leza Singuzuzyoonse alimwi a Mwanaambelele ngotempele lyanguwo. Alimwi munzi ooyu tauyandiki kumunikilwa azuba naa mwezi pe, nkaambo bulemu bwa Leza bwakali kuumunikila, alimwi lambe lyanguwo lyakali Mwanaambelele.” (Ciy. 21:22, 23) Aabo ibali cibeela ca Jerusalemu Mupya bayooba antoomwe a Jehova. (Heb. 7:27; Ciy. 22:3, 4) Aboobo Jehova a Jesu ngotempele lyamunzi ooyo.

16. Ino nzilongezyo nzi nzyobayoojana bantu lya Bulelo bwa Myaka Iili 1,000 ya Bwami bwa Leza?

¹⁶ Cilabakkomanisya bananike kuyeeya kujatikizya munzi ooyu. Pele aabo ibajisi bulangizi bwaanyika abalo balijisi twaambo itweelede kubapa kuubikkila maano. Lya Bulelo bwa Myaka Iili 1,000 ya Bwami bwa Leza, Jerusalemu Mupya uyooleta zilongezyo zinji kapati. Johane wakabona zilongezyo eezyi kazikunka mbuli “mulonga wamaanzi aabuumi.” Alimwi mumabali oonse obilo aamulonga kwakali “zisamu zyabuumi” izyakajisi matuvwu “aakuponya masi.” (Ciy. 22:1, 2) Mpoonya bantu boonse ibayoopona kuciindi eeco bayoogwasyigwa azilongezyo eezyo. Mukuya kwaciindi, bantu boonse ibamvwida bayoolondoka. Kunoonyina kuciswa, kucisa naa misozi yabuumba.—Ciy. 21:3-5.

17. Kweelana a Ciyubunuzyo 20:11-13, ino mbaani ibayoogwasyigwa lya Bulelo bwa Myaka Iili 1,000?

¹⁷ Ino mbaani ibayoogwasyigwa azilongezyo eezyo zibotu? Bakusaanguna, mbankamu mpati ibayoofwutuka lya Amagedoni antoomwe abana aabo ibayoozyalwa munyika mpya. Pele Ciyubunuzyo caandaano 20 alimwi cisyomezya kuti bafwide bayoobusyigwa. (Amubale Ciyubunuzyo 20:11-13.) “Baluleme” basyomeka ibakafwa kaindi antoomwe “abataluleme,” ibatakajisi coolwe cakwiiya kujatikizya Jehova bayoobusyigwa  aano anyika. (Mil. 24:15; Joh. 5:28, 29) Sena eeci caamba kuti muntu uuli woonse uyoobusyigwa anyika lya Bulelo bwa Myaka Iili 1,000? Peepe. Aabo ibakacikaka acaali coolwe cakubelekela Jehova kabatanafwa, tabakabusyigwi. Nkaambo bakalijisi coolwe cakucita oobo, pele tiibakatondezya kuti baleelela kupona mu Paradaiso anyika.—Mt. 25:46; 2Tes. 1:9; Ciy. 17:8; 20:15.

18. Ino ncinzi ciyoocitika aano anyika kumamanino aamyaka iili 1,000?

¹⁸ Kumamanino aamyaka iili 1,000, boonse aabo ibanoopona anyika banoolondokede. Kunyina uyoopenga akaambo kacibi ncotwakakona kuli Adamu. (Rom. 5:12) Kusinganizyigwa akaambo kacibi ca Adamu kuyoogusyigwa cakumaninina. Munzila eeyi, boonse ibanoopona anyika bayooba “baumi” kabali bantu balondokede kumamanino aamyaka iili 1,000.—Ciy. 20:5.

19. Nkaambo nzi ncokuyandika musunko wamamanino?

¹⁹ Tulizyi kuti Jesu wakazumanana kusyomeka kuli Leza nociba ciindi naakasunkwa a Saatani. Pele sena bantu boonse balondokede banoolisungwide kucita boobo ciindi Saatani aakupegwa coolwe cakubasunka? Umwi aumwi uyooliingwida mubuzyo ooyu ciindi Saatani aakwaangunwa mumulindi uutagoli kumamanino aamyaka iili 1,000. (Ciy. 20:7) Aabo ibayoozumanana kusyomeka lyamusunko wamamanino bayoopegwa buumi butamani alimwi akuba lwaanguluko lwini-lwini. (Rom. 8:21) Aabo ibayoozanga bayoonyonyoonwa kukabe kutamani, antoomwe a Diabolosi amadaimona aakwe.—Ciy. 20:8-10.

20. Ino mulimvwa buti kujatikizya businsimi bukkomanisya ibujanika mubbuku lya Ciyubunuzyo?

²⁰ Ino kulanga-langa bbuku lya Ciyubunuzyo kwamupa kulimvwa buti? Sena tacimukkomanisyi kubona kuti mulijatikizyidwe mubusinsimi oobu bukkomanisya? Sena eeci tacimukulwaizyi kuyanda kutamba bamwi kuti batusangane mubukombi busalala bwa Leza wesu? (Ciy. 22:17) Lino mbwaanga twazibandika zintu eezyi ziyoocitika kumbele, tulikkomene alimwi tuliyandide kwaamba mbubonya mbwaakaamba mwaapostolo Johane, kuti: “Ameni! Koboola, O Mwami Jesu.”—Ciy. 22:20.