1-2. Nkaambo nzi Magwalo amwi ncaayandika kapati kulindiswe ciindi bukkale nobwacinca?

 MUBUZUBA bwamucado, sibwiinga anabwiinga ibalibonya kabotu kapati balaswiilila kapati kumakani aamu Bbaibbele aajatikizya cikwati. Magwalo aabandikwa mumakani aayo inga taali meenzu kulimbabo pe. Pele kuzwa buzuba oobo, magwalo aaya anooyandika kapati kulimbabo. Nkaambo nzi? Nkaambo banikwaabelesya kabali banabukwetene.

² Eeci cilikozyenye aciindi banabukwetene Banakristo nobaba bazyali. Kwamyaka minji bali kumvwa makani aamba kujatikizya kukomezya bana. Pele lino makani aayo alayandika kapati kulimbabo. Nkaambo nzi? Nkaambo kakuti lino beelede kukomezya mwanaabo uubageme. Eelo kaka mukuli ooyu mupati! Aboobo ciindi ibukkale nobwacinca, magwalo aamwi alatalika kuyandika kapati kulindiswe. Aaka nkakaambo kamwi bakombi ba Jehova ncobabala Magwalo mbubwenya bami bana Israyeli mbobakaambilidwe kuti kabacita, nkokuti kuzinzibala kuyeeya alingawo “mazuba oonse” abuumi bwabo.—Dt. 17:19.

3. Ino tulabandika nzi mucibalo eeci?

³ Nobazyali, mulijisi coolwe cilibedelede cakuyiisya bana banu kujatikizya Jehova. Pele muyandika kucita zinji kunze buyo lyakubayiisya makani aajatikizya Leza. Mweelede kubagwasya bana banu kumuyanda kapati Jehova. Ncinzi ncomukonzya kucita kutegwa muyiisye bana banu kumuyanda Jehova? Mucibalo eeci, tulabandika njiisyo zyamu Bbaibbele zyone zikonzya kumugwasya. (2Tim. 3:16) Kuyungizya waawo, tulabona  bazyali Banakristo bamwi mbobagwasyigwa kwiinda mukutobela lulayo lwamu Bbaibbele.

4. Ninjiisyo nzi iikonzya kugwasya bazyali kuyiisya bana babo kumuyanda kapati Jehova? (Jakobo 1:5)

⁴ Njiisyo Yakusaanguna: Amulombe busolozi bwa Jehova. Amumulombe Jehova kuti amupe busongo mbomuyandika kutegwa mugwasye bana banu ikumuyanda. (Amubale Jakobo 1:5.) Nguweelela kupa lulayo. Kuli twaambo tunji ncocili boobo. Atulange-lange tobilo. Kakusaanguna, Jehova ulaaluzyibo lunji lwakuba muzyali. (Int. 36:9) Kabili, lulayo lwabusongo ndwapa lyoonse lulagwasya.—Is. 48:17.

5. (a) Ino bazyali bagwasyigwa buti ambunga ya Jehova? (b) Kweelana avidiyo, ncinzi ncomukonzya kwiiya ku Mukwesu a Mucizyi Amorim kujatikizya mbobakakomezya bana babo?

⁵ Kwiinda mu Jwi lyakwe alimwi ambunga yakwe, Jehova wapa cakulya cakumuuya cinji cikonzya kugwasya bazyali kuyiisya bana babo kumuyanda Jehova. (Mt. 24:45) Mucikozyanyo, mulakonzya kujana lulayo lugwasya mumulongo wazibalo zyakuti “Lugwasyo Kumukwasyi,” izyakali kujanika mumagazini ya Sinsimuka! kwamyaka minji pele lino zilajanika awebbusaiti yesu. Kuyungizya waawo, kwamwaigwa mavidiyo manji a jw.org aakonzya kugwasya bazyali kubelesya lulayo lwa Jehova ciindi nobakomezya bana babo. *—Tus. 2:4-6.

6. Mbuti muzyali umwi mbwalimvwa kujatikizya busolozi walo amukaintu wakwe mbobapegwa kuzwa mumbunga ya Jehova?

⁶ Bazyali banji batondezya kulumba kulugwasyo Jehova ndwabapa kwiinda mumbunga yakwe. Ba Joe bakaamba kuti: “Kukomezya bana botatwe mukasimpe tacili cuuba-uba pe. Mebo abakaintu bangu lyoonse tulapaila kuli Jehova kutegwa atugwasye. Amana kanji-kanji inga tulimvwa kuti mavidiyo naa zibalo zilaboola aciindi ceelede kutegwa zitugwasye mubukkale buli boonse. Lyoonse tusyoma busolozi bwa Jehova.” Ba Joe alimwi abakaintu babo bajana kuti zibelesyo eezyi zilabagwasya bana babo kuyumya cilongwe cabo a Jehova.

7. Nkaambo nzi ncociyandika kapati kubazyali kuba cikozyanyo cibotu kubana babo? (Baroma 2:21)

 ⁷ Njiisyo Yabili: Amube cikozyanyo cibotu. Bana inga balalabangilila bazyali babo alimwi kanji-kanji balabaiya. Mubwini, kunyina muzyali uulondokede. (Rom. 3:23) Nokuba boobo, bazyali basongo beelede kusolekesya kuba cikozyanyo cibotu kubana babo. (Amubale Baroma 2:21.) Kaamba kujatikizya bana, muzyali umwi wakati: “Bana bali mbuli cisani cinywida maanzi, balamvwa zyoonse nzyotwaamba akubona nzyotucita.” Wakayungizya kuti: “Balakonzya kuzyiba kuti cikozyanyo cesu taceendelani azintu nzyotusola kubayiisya.” Aboobo kuti katuyanda kuyiisya bana besu kumuyanda Jehova, luyando ndotujisi kulinguwe lweelede kuti kaluli luyumu alimwi kalulibonya.

8-9. Ncinzi ncomwaiya kumajwi ngobakaamba ba Andrew alimwi aba Emma?

⁸ Kuli nzila zinji zikonzya kugwasya bazyali kuyiisya bana babo ikumuyanda Jehova. Amubone mukwesu Andrew uujisi myaka iili 17 ncaakaamba: “Bazyali bangu lyoonse bakali kundiyiisya kujatikizya mbociyandika kapati kupaila. Lyoonse masiku, Bataata bakali kupaila andime nokuba kuti ndapaila kale. Bazyali bangu lyoonse bakali kundiyeezya kuti: ‘Ulakonzya kubandika a Jehova ciindi cili coonse.’ Akaambo kaceeci, mupailo wakaba cintu ciyandika kapati kulindime, ndilaangulukide kubandika a Jehova mumupailo alimwi akumubona kuti ngu Taata siluyando.” Nobazyali, lyoonse kamuyeeya kuti luyando ndomujisi kuli Jehova lulakonzya kubagwasya bana banu kumuyanda Jehova.

⁹ Kuyungizya waawo, amubone cakacitikila ba Emma. Ciindi bausyi nobakabasiya, bakasiila banyina zikwelete zinji. Ba Emma bakaamba kuti: “Kuli ziindi zinji Bamaama nobakali kubula mali aayandika, pele lyoonse bakali kwaamba kujatikizya Jehova mbwabalanganya babelesi bakwe. Kweelana ambobakali kupona, ndakabona kuti balaasyoma makani aaya. Bamaama bakali kupona kweelana anzyobakali kundiyiisya.” Ncinzi ncotwiiya? Bazyali balakonzya kuyiisya bana kwiinda mucikozyanyo cabo nokuba kuti bali mubukkale bukatazya.—Gal. 6:9.

10. Nzyoolwe nzi bazyali bana Israyeli nzyobakajisi zyakubandika abana babo? (Deuteronomo 6:6, 7)

¹⁰ Njiisyo Yatatu: Kamubandika abana banu ciindi aciindi. Jehova wakalailide bana Israyeli kuyiisya bana babo ciindi aciindi. (Amubale Deuteronomo 6:6, 7.) Bazyali aabo bakalijisi zyoolwe zinji abuzuba zyakubandika abana babo alimwi akubayiisya kumuyanda Jehova amoyo wabo woonse. Mucikozyanyo, muna Israyeli musankwa wakali kutola ciindi cinji kugwasyilizya bausyi kusyanga zisyango naa kutebula. Mucizyi wakwe wakali kutola ciindi cinji kugwasyilizya banyina kusuma alimwi akubeleka milimo imwi buyo yaaŋanda. Ciindi bazyali alimwi abana nobakali kubeleka antoomwe, bakali kukonzya kubandika twaambo tunji tuyandika. Mucikozyanyo, bakali kukonzya kubandika kujatikizya mbwali mubotu Jehova alimwi ambwaakali kuugwasyilizya mukwasyi wabo.

11. Ndilili bazyali nobajana ciindi cakubandika abana babo?

¹¹ Mazuba aano zintu zyakacinca. Mumasi manji, bazyali abana tabakonzyi kujana ciindi cakuba antoomwe. Bazyali ambweni inga kabali kumulimo, mpoonya bana kucikolo. Aboobo, bazyali beelede kusoleka kujana ciindi cakubandika abana babo. (Ef. 5:15, 16; Flp. 1:10) Kukomba mumukwasyi kubapa coolwe cakucita boobo. Mukubusi wazina lya Alexander wakaamba kuti: “Bataata lyoonse balabikka bubambe bwakukomba  mumukwasyi, alimwi tabazumizyi cintu cili coonse kunyonganya bubambe oobu. Twamana kwiiya, inga tulabandika atwaambo tumbi buyo.”

12. Ncinzi silutwe wamukwasyi ncayelede kuyeeya lyakukomba mumukwasyi?

¹² Ikuti kamuli silutwe wamukwasyi, ncinzi ncomukonzya kucita kutegwa kukomba mumukwasyi kakubakkomanisya bana banu? Mulakonzya kuyiisya bana banu kubelesya bbuku libotu lipya lyakuti Amupone Kukabe Kutamani! Bbuku eeli lilakonzya kumugwasya kuba amibandi mibotu. Mbwaanga muyanda kuti bana banu kabaanguluka kwaamba mbobalimvwa alimwi anzyobalibilika, nkokuti lyakukomba mumukwasyi tamweelede kubanyemena bana banu naa kubapa lulayo. Amusoleke kulijata ciindi nobaamba zintu ziteendelani azintu zyamu Magwalo. Muciindi cakucita boobo, amulumbe kuti bana banu baamba masimpe kujatikizya mbobalimvwa alimwi amubakulwaizye kwaamba bwini mbobalimvwa. Kuti mwazyiba bwini mbobalimvwa bana banu ndendilyo nomukonzya kubagwasya kabotu.

13. Nzyoolwe nzi zimbi nzyobajisi bazyali izyakugwasya bana babo kuyumya cilongwe cabo a Jehova?

¹³ Nobazyali, amujane zyoolwe buzuba boonse zyakugwasya bana banu kuyumya cilongwe cabo a Jehova. Tamweelede kulindila kuti mane buya mube aciiyo ca Bbaibbele kutegwa mubayiisye kujatikizya Leza wesu siluyando. Amubone muzyali umwi wazina lya Lisa ncaakaamba: “Twakali kubelesya cintu cili coonse cakatuzingulukide kuyiisya bana besu kujatikizya Jehova. Mucikozyanyo, ciindi mubwa wesu naakali kucita cintu cimwi icakali kusesya bana besu, twakali kubaambila kuti eeci citondezya kuti Jehova ngu Leza uukkomene, alimwi wakapa kuti cikonzyeke kulindiswe toonse kukkomanina zintu zikkomanisya.”

14. Nkaambo nzi bazyali ncobeelede kubagwasya bana babo kusala balongwe bali kabotu? (Tusimpi 13:20)

¹⁴ Njiisyo yane: Amubagwasye bana banu kusala balongwe ibali kabotu. Ijwi lya Leza lilacisalazya kuti balongwe balakonzya kutupa kucita zintu zili kabotu naa zitali kabotu. (Amubale Tusimpi 13:20.) Nobazyali, sena mulibazyi balongwe babana banu? Sena kuli  nomwakajanide ciindi cakuba ambabo? Ncinzi ncomukonzya kucita kutegwa mugwasye bana banu kujana balongwe aabo ibamuyanda Jehova? (1Kor. 15:33) Mulakonzya kubagwasya bana banu kusala balongwe bali kabotu, kwiinda mukutamba bamwi ibacita kabotu kumuuya kumusangana ciindi nomucita zintu zimwi amukwasyi.—Int. 119:63.

15. Ncinzi bazyali ncobakonzya kucita kutegwa bagwasye bana babo kusala balongwe bali kabotu?

¹⁵ Muzyali wazina lya Tony ulapandulula walo abakaintu bakwe ncobakacita kutegwa bagwasye bana babo kujana balongwe bali kabotu. Wakaamba kuti: “Kwamyaka minji, mebo abakaintu bangu twakali kubatamba kuŋanda yesu bakwesu abacizyi ibajisi bukkale alimwi azilengwa ziindene-indene. Twakali kulya ambabo alimwi akukomba mumukwasyi antoomwe. Eeyi ninzila mbotu kapati yakuzyiba baabo ibamuyanda Jehova alimwi akumubelekela calukkomano. Twakali kutamba balangizi bamabazu, bamisyinali alimwi abamwi kuŋanda yesu. Zyakuluula zyabo, busungu alimwi amuuya wakulyaaba ngobakajisi zyakabagwasya kapati bana besu alimwi zyakayumya cilongwe cabo a Jehova.” Nobazyali, amube amakanze aakugwasya bana banu kuba abalongwe bali kabotu.

16. Mbuti kuti mwanaanu umwi waamba kuti tayandi kubelekela Jehova?

¹⁶ Mbuti kuti nokuba kuti mwasolekesya kusikila mpomugolela, nokuba boobo mwanaanu umwi waamba kuti tayandi kubelekela Jehova? Mutalimvwi kuti mwaalilwa mbuli muzyali. Jehova wakatupa lwaanguluko lwakulisalila toonse kulibikkilizya amwanaanu, nkokuti kusala kumubelekela naa pe. Aboobo kuti mwanaanu wasala kumusiya Jehova, amube abulangizi bwakuti bumwi buzuba uyoopiluka. Amuyeeye cikozyanyo camwana mutaka. (Lk. 15:11-19, 22-24) Mwaalumi ooyu wakacita zintu zibi zinji, pele kumamanino wakapiluka. Umwi inga waamba kuti “tee eeci ncikozyanyo buyo, mwati inga cacitika?” Inzya, inga cacitika! Alimwi buya, kuli cakuluula camukubusi wazina lya Elie.

17. Ncinzi ncomwaiya kucakuluula caba Elie?

¹⁷ Kujatikizya bazyali babo, ba Elie bakati:  “Bakandigwasya kusikila mpobagolela kutegwa ndimuyande Jehova alimwi akuyanda Jwi lyakwe, Ibbaibbele. Nokuba boobo, nindakali mukubusi ndakatalika kuzanga.” Ba Elie bakatalika kucita zintu zibyaabi cakusisikizya. Bazyali bakasola kubagwasya kuzumanana kuba acilongwe ciyumu a Jehova, pele tiibakabaswiilila. Nobakazwa aŋanda, bakatalika kutalilemeka. Nokuba boobo, zimwi ziindi bakali kubandika zyamu Bbaibbele amweenzinyina umwi. Ba Elie bakaamba kuti: “Kufwumbwa ciindi nindakali kubandika amweenzuma kujatikizya Jehova, ndakali kumuyeeya Jehova kapati. Bucebuce, mbuto zyakasimpe zyatakali kukomena mumoyo wangu, mbuto nzyobakasoleka canguzu kusyanga bazyali bangu, zyakatalika kukomena.” Mukuya kwaciindi, ba Elie bakajoka mukasimpe. * Amweezyeeye buyo bazyali mbobakakkomana akaambo kakuti bakasola kubayiisya kumuyanda Jehova kuzwa kubwana.—2Tim. 3:14, 15.

18. Ino mulimvwa buti kujatikizya bazyali ibabeleka canguzu kuyiisya bana babo kumuyanda Jehova?

¹⁸ Nobazyali, mujisi coolwe caalubazu cakukomezya zyalani lipya lyabakombi ba Jehova. (Int. 78:4-6) Mulimo ooyu tauli muuba-uba pe, alimwi tulamulumba kapati akaambo kakubeleka canguzu nkomucita kugwasya bana banu! Ikuti mwazumanana kugwasya bana banu kumuyanda Jehova alimwi akubalela mululayo lwakwe, mulakonzya kuba masimpe kuti Taateesu wakujulu uyookkomana.—Ef. 6:4.