1. Ino luyando lwini-lwini lupandulwidwe buti mu Bbaibbele?

 MABANGABANGA aaluyando “mabangabanga aamulilo uuvwilima, inzya mabangabanga aa Ja. Maanzi manji taakonzyi kuluzima luyando pe, noiba milonga taikonzyi kulutola.” b (Lwi. 8:6, 7) Eelo kaka oobu mbupanduluzi bubotu bwaluyando lwini-lwini! Majwi aaya alakulwaizya kapati kuli banabukwetene: Mulakonzya kuba aluyando lutamani kuli umwi amweenzinyina.

2. Ncinzi ncobeelede kucita banabukwetene kutegwa luyando lwabo luzumanane kuyuma?

² Kutegwa banabukwetene bazumanane kuyandana, beelede kubeleka canguzu. Mucikozyanyo, mulilo ulakonzya kuzumanana kuyaka lilikke buyo kuti kakuli muntu uuzumanana kusosela. Ikuti naa kunyina uusosela, mulilo ulakonzya kuzima mukuya kwaciindi. Mbubwenya buyo, mulumi amukaintu balakonzya kuzumanana kuyandana lilikke buyo kuti bazumanana kuluyumya luyando lwabo. Pele zimwi ziindi, banabukwetene balakonzya kulimvwa kuti luyando lwabo luyaabuceya kwaambisya kuti naa kabajisi penzi lyamali, penzi lyakuciswa naa buyumuyumu bwakukomezya bana. Aboobo kuti naa mulikwete naa kukwatwa, mbuti mbomukonzya kupa kuti “mabangabanga aa Ja” azumanane kuyaka mucikwati canu? Mucibalo eeci, tulabandika nzila zyotatwe mbomukonzya kuyumya luyando lwanu akuba alukkomano mucikwati canu. c

3. Ino kuba acilongwe ciyumu a Jehova inga kwabagwasya buti banabukwetene kuzumanana kuyandana? (Mukambausi 4:12) (Amubone acifwanikiso.)

³ Kutegwa “mabangabanga aa Ja” azumanane kuyaka, mulumi  amukaintu beelede kubeleka canguzu kuba acilongwe ciyumu a Jehova. Ino eeci inga cabagwasya buti mucikwati cabo? Ikuti banabukwetene kabacibikkila maano kapati cilongwe cabo a Usyi wakujulu, tabanoowayi-wayi kutobela lulayo lwakwe. Aboobo eeci cilakonzya kubagwasya kuzunda mapenzi alo aakonzya kupa kuti luyando lwabo luceye alimwi akwaayeleba. (Amubale Mukambausi 4:12.) Alimwi bantu bajisi cilongwe ciyumu a Jehova balasolekesya kumwiiya alimwi akutondezya bube bwakwe mbuli luzyalo, kukkazika moyo alimwi akulekelela. (Ef. 4:32–5:1) Ikuti banabukwetene kabajisi bube buli boobu, cilakonzya kupa kuti luyando lwabo luzumanane kuyuma. Mucizyi Lena, iwakkala mucikwati kwamyaka yiinda ku 25, wakaamba kuti: “Ncuubauba kumuyanda akumulemeka muntu uusimide kumuuya.”

4. Nkaambo nzi Jehova ncaakasala Josefa a Mariya kuba bazyali ba Mesiya?

⁴ Amubone cikozyanyo eeci camu Bbaibbele. Ciindi Jehova naakali kuyanda kusala banabukwetene ibakali kuyooba bazyali ba Mesiya, wakasala Josefa a Mariya akati kabantu banji balunyungu lwa Davida. Nkaambo nzi? Nkaambo boonse bobilo bakajisi cilongwe ciyumu a Jehova, alimwi Jehova wakalizyi kuti bakali kuyoomubikka mubusena bwakusaanguna mucikwati cabo. Nobanabukwetene, ncinzi ncomukonzya kwiiya kuli Josefa a Mariya?

5. Ncinzi bamalumi ncobakonzya kwiiya kuli Josefa?

⁵ Josefa wakali kwaatobela malailile aa Jehova, alimwi eeci cakapa kuti abe mulumi uuli kabotu. Ziindi zyotatwe, wakatambula malailile kuzwa kuli Leza aakali kujatikizya mukwasyi wakwe. Aciindi cimwi acimwi, wakaatobela kakunyina kuwayawaya noliba leelyo nocakali kukatazya kucita boobo. (Mt. 1:20, 24; 2:13-15, 19-21) Kwiinda mukutobela malailile aa Leza, Josefa wakamukwabilila Mariya, wakamugwasyilizya alimwi akumulanganya kabotu. Amuyeeye buyo Mariya mbwaakatalika kumuyanda kapati Josefa akumulemeka akaambo kambwaakali kucita zintu! Nobamalumi, mulakonzya kumwiiya Josefa kwiinda mukuyandaula lulayo lwamu Bbaibbele kujatikizya mbomweelede kulanganya mukwasyi wanu. d Ikuti naa mwalutobela lulayo oolu, nokuba kuti caamba kupanga kucinca kupati, mutondezya kuti mulamuyanda mukaintu wanu alimwi mupa kuti cikwati canu ciyume. Mucizyi umwi waku Vanuatu, iwakkala mucikwati kwamyaka yiinda ku 20 wakaamba kuti: “Ciindi balumi bangu nobayandaula malailile aazwa kuli Jehova mpoonya akwaatobela, cipa kuti ndibalemeke kapati. Ndilimvwa kukwabililwa akuba alusyomo muzintu nzyobasala.”

6. Ncinzi bamakaintu ncobakonzya kwiiya kuli Mariya?

⁶ Mariya awalo wakajisi cilongwe cimugeme a Jehova; lusyomo lwakwe tiilwakayeeme buyo azintu zyaakali kucita Josefa. Wakalaazyi kabotu Magwalo. e Alimwi wakali kujana ciindi  cakuzinzibala kuyeeya. (Lk. 2:19, 51) Tacidoonekwi buya kuti cilongwe Mariya ncaakajisi a Jehova cakapa kuti abe mukaintu uuli kabotu kapati. Mazuba aano, bamakaintu banji balasolekesya kucita mbuli mbwaakali kucita Mariya. Mucikozyanyo, mucizyi Emiko wakaamba kuti: “Kanditanakwatwa, ndakajisi bubambe bwangu bwakucita zintu zyamuuya. Pele nondakakwatwa, balumi bangu mbobakali kupaila alimwi akusololela mukukomba kwamukwasyi. Ndakatalika kusyoma buyo mbabo kundicitila zintu eezyi. Aboobo ndakabona kuti ndakali kuyandika kulinyamwida mukuli wangu, nkokuti kuyumya cilongwe cangu a Jehova. Lino ndilajana ciindi cakupaila kuli Leza endikke, kubala Magwalo alimwi akuzinzibala kuyeeya nzyondibala.” (Gal. 6:5) Nobamakaintu, ikuti mwazumanana kuyumya cilongwe canu a Jehova, balumi banu bayooba atwaambo tunji itunoobapa kuti kabamutembaula alimwi akumuyanda kapati.—Tus. 31:30.

7. Ncinzi banabukwetene ncobakonzya kwiiya kuli Josefa a Mariya kujatikizya kukombela antoomwe?

⁷ Josefa a Mariya alimwi bakabelekela antoomwe kuyumya cilongwe cabo a Jehova. Bakalizyi mbociyandika kapati kukomba Jehova antoomwe mbuli mukwasyi. (Lk. 2:22-24, 41; 4:16) Ambweni zimwi ziindi cakali kukatazya kucita boobo, kwaambisya ciindi mukwasyi nowakali kuyabukomena, pele bakacikonzya. Eelo kaka eeci ncikozyanyo cibotu kapati kuli banabukwetene mazuba aano! Ikuti naa mujisi bana mbuli Josefa a Mariya, cilakonzya kukatazya kujanika kumiswaangano naa kuba aciindi cakukomba mumukwasyi. Cilakonzya kukatazya nokuba kujana ciindi cakwiiya naa kupaila antoomwe mbuli banabukwetene. Pele kamuyeeya kuti ciindi nomukomba Jehova antoomwe, cilongwe canu anguwe cilayuma alimwi aceeco ncomujisi akati kanu. Aboobo kukomba acibe cintu ciyandika kapati mumukwasyi wanu.

8. Ino banabukwetene ibajisi mapenzi mucikwati inga bacita buti kutegwa bagwasyigwe akukomba kwamumukwasyi?

⁸ Ino mbuti kuti kamujisi mapenzi mucikwati canu? Kuyeeya buyo makani aakuba antoomwe akucita kukomba kwamumukwasyi inga kakutakkomanisyi. Ikuti kacili boobo, amutalike kwiinda mukulanga-langa buyo makani masyoonto alimwi aakkomanisya, alo ngomwazuminana kuti mubandike. Kucita boobu, kulakonzya kumugwasya kutalika kuyandana kapati alimwi akuyanda kukomba Jehova antoomwe mbuli banabukwetene.

9. Nkaambo nzi mulumi amukaintu ncobeelede kujana ciindi cakuba antoomwe?

⁹ Nobanabukwetene, mulakonzya kuzumanana kuyandana kwiinda mukujana ciindi cakuba antoomwe. Ikuti mwacita oobo, ciyoomugwasya kuzyiba nzyayeeya muntu ngomukwetene limwi alimwi ambwalimvwa. (Matl. 2:24) Amumvwe ncobakaamba ba Lilia aba Ruslan nokwakainda buyo ciindi cisyoonto kuzwa nobakakwatana myaka yiinda ku 15 yainda. Ba Lilia bakaamba kuti: “Twakabona kuti tiitwakali kukonzya kuba aciindi cinji cakuba antoomwe kweelana ambotwakali kuyeeyela. Twakajisi bubi amulimo wesu wakumubili, kubeleka milimo yaaŋanda alimwi akulanganya bana besu. Twakabona kuti, ikuti naa tiitwaba aciindi cakuba antoomwe mbuli banabukwetene, tulakonzya kuleka kuyandana kapati.”

10. Mbuti banabukwetene mbobakonzya kubelesya njiisyo iili ku Baefeso 5:15, 16?

¹⁰ Ncinzi ncobakonzya kucita banabukwetene kutegwa kabajana ciindi cakuba antoomwe? Balakonzya kubikkila limwi ambali ciindi cakuba antoomwe. (Amubale Baefeso 5:15, 16.) Mukwesu Uzondu waku Nigeria wakaamba kuti: “Ciindi nondilemba mulongo wangu wazintu zyakucita, inga ndilabikkilizya aciindi ncondeelede kuba antoomwe abakaintu bangu alimwi  ndilacibikkila maano kapati ciindi eeci.” (Flp. 1:10) Amubone mucizyi Anastasia, mukaintu wamulangizi wabbazu ku Moldova, mbwacibelesya kabotu ciindi cakwe. Wakaamba kuti: “Ndilasola kucita zintu nzyondiyanda kucita ciindi balumi bangu nobajisi bubi kulanganya mulimo wabo. Kwiinda mukucita boobu, tulaba aciindi cakuba antoomwe bamanizya.” Pele mbuti kuti mulongo wanu wazintu zyakucita upa kuti cimukatazye kujana ciindi cakuba antoomwe?

11. Milimo nzi Akula a Purisila njobakali kucitila antoomwe?

¹¹ Banabukwetene balakonzya kwiiya cikozyanyo ca Akula a Purisila, banabukwetene ibakali kuyandwa kapati a Banakristo bakusaanguna banji. (Rom. 16:3, 4) Nokuba kuti Bbaibbele talyaambi makani manji kujatikizya cikwati cabo, pele lilaamba kuti bakali kubeleka, kukambauka akugwasya bamwi antoomwe. (Mil. 18:2, 3, 24-26) Alimwi buya, kufwumbwa ciindi Bbaibbele nolyaamba zya Akula a Purisila, lyoonse inga libaamba antoomwe.

12. Ncinzi mulumi amukaintu ncobakonzya kucita kutegwa bajane ciindi cakuba antoomwe? (Amubone acifwanikiso.)

¹² Mbuti banabukwetene mbobakonzya kwiiya cikozyanyo ca Akula a Purisila? Amuyeeye kujatikizya zintu zinji nzyomuyandika kucita nywebo angomukwetene limwi. Mbuti kuti zimwi mwazicitila antoomwe muciindi cakuzicita aumwi alikke? Mucikozyanyo, Akula a Purisila bakali kukambaukila antoomwe. Sena andinywe lyoonse mulabikka bubambe bwakucita oobo? Akula a Purisila bakali kubeleka antoomwe. Ambweni nywebo angomukwetene limwi tamubeleki mulimo uukozyenye, pele mbuti kuti mwaibelekela antoomwe milimo yaaŋanda? (Muk. 4:9) Ciindi nomugwasyanya kubeleka mulimo umwi, mulakonzya kulimvwa kuba tiimu alimwi akuba acoolwe cakwiizya. Ba Robert aba Linda bakkala mucikwati kwamyaka yiinda ku 50. Ba Robert bakaamba kuti: “Kwaamba masimpe, tatujisi ciindi cinji cakucita zyakulikondelezya antoomwe. Pele ndilakkomana kapati ciindi nondisazya mitiba, bakaintu bangu nobandisangana akutalika kwiipukuta naa ciindi nondilimina mugaadeni nobaboola akundigwasya. Kubelekela antoomwe kulatugwasya kuba acilongwe ciyumu. Luyando lwesu lulazumanana kukomena.”

13. Kutegwa mulumi amukaintu bayandane kapati, ncinzi ncobeelede kucita?

¹³ Pele kamuyeeya kuti, kuba buyo antoomwe takukonzyi kupa kuti mulumi amukaintu bayandane kapati. Mukaintu umwi waku Brazil wakaamba kuti: “Mazuba aano, kuli zintu zinji kapati zikonzya kutunyonganya cakuti ncuubauba kuyeeya kuti tulaba aciindi cakuba antoomwe akaambo buyo kakuti tukkede antoomwe. Pele ndaiya kuti kuli azimbi nzyondeelede kucita kunze buyo lyakuba antoomwe. Ndeelede kumubikkila maano muntu ngotukwetene limwi.” Amumvwe ncobacita ba Bruno abakaintu babo ba Tays, kutegwa bacikonzye kubikkilana maano. Ba Bruno bakaamba  kuti: “Ciindi notwiizya tobilo, tulaabikka ambali mafooni akulikwaya kubandika.”

14. Ikuti banabukwetene kabatakkomani kuba antoomwe, ncinzi ncobakonzya kucita?

¹⁴ Mbuti kuti nywebo angomukwetene limwi tamukkomani kuba antoomwe? Ambweni zintu nzyomukkomanina ziliindene naa ambweni mulaakunyemezyanya. Ikuti kacili boobo, ncinzi ncomukonzya kucita? Amuyeeye cikozyanyo camulilo ncotwaambide kumatalikilo. Mulilo inga ulatalika kuyaka asyoonto-syoonto akukomena. Ciyandika buyo nkuzumanana kubikka tukuni tusyoonto-syoonto kusikila mwatalika kubikka zipati. Mbubwenya buyo, amutalike kujana kaindi kasyoonto buyo kakuba antoomwe buzuba abuzuba. Mpoonya akusola kucita cintu ncomukkomanina nyoonse nyobilo, ikutali cintu cikonzya kumupa kuzwangana. (Jak. 3:18) Kwiinda mukutalika asyoonto-syoonto, luyando lwanu lulakonzya kutalika kukomena alimwi.

15. Nkaambo nzi bulemu ncobuyandika kapati kutegwa banabukwetene bazumanane kuyandana?

¹⁵ Bulemu ncintu ciyandika kapati mucikwati. Buli mbuli muwo uupa kuti mulilo uyake kapati. Ikuti kakunyina muwo, mulilo ulakonzya kufwambaana kuzima. Ncimwi buyo, kuti kakunyina bulemu, banabukwetene balakonzya kufwambaana kuleka kuyandana. Pele kulubazu lumwi, banabukwetene ibasolekesya kulemekana balakonzya kupa kuti luyando ndobajisi kuli umwi amweenzinyina luzumanane kukomena. Nokuba boobo, kaambo nkomweelede kuyeeya nkakuti tamuli ndinywe nomweelede kulimvwa kuti mulamulemeka ngomukwetene limwi, pele walo nguweelede kulimvwa kuti ulalemekwa. Ba Penny aba Aret bakkala mucikwati kwamyaka yiinda ku 25. Ba Penny bakaamba kuti: “Akaambo kakuti tulalemekana, muŋanda yesu muli luyando kapati. Aumwi ulaangulukide kwaamba mbwalimvwa nkaambo tulizyi kuti aumwi mizeezo yakwe ilabikkilwa maano.” Aboobo, ncinzi ncomukonzya kucita kutegwa ngomukwetene limwi kalimvwa kuti mulamulemeka ncobeni? Atulange-lange cikozyanyo ca Abrahamu a Sara.

16. Ncinzi bamalumi ncobakonzya kwiiya kucikozyanyo ca Abrahamu? (1 Petro 3:7) (Amubone acifwanikiso.)

¹⁶ Abrahamu wakali kumweendelezya cabulemu Sara. Mucikozyanyo, Abrahamu wakali kumuswiilila Sara akuyeeya mbwaakali kukonzya kulimvwa. Aciindi cimwi, Sara wakalityompedwe kapati kujatikizya penzi limwi, alimwi wakamwaambila Abrahamu mbwaakanyemede akwaamba kuti nguwakapa kuti kube penzi eelyo. Sena Abrahamu wakanyema akwaamba zintu zitali kabotu? Peepe. Wakalizyi kuti Sara wakali mukaintu uulibombya alimwi iwakali kumugwasyilizya muzintu nzyaakali kusala. Aboobo wakamuswiilila mukaintu wakwe akusola kulimana penzi. (Matl. 16:5, 6) Ino twiiya nzi? Nobamalumi, mulijisi nguzu zyakusala zintu zyakucita mumukwasyi wanu. (1Kor. 11:3) Pele  inga caba caluyando kwiibikkila maano mizeezo yamukaintu wanu kamutanapanga cakusala, kwaambisya kuti naa cakusala eeco cilamujatikizya awalo. (1Kor. 13:4, 5) Zimwi ziindi, mukaintu wanu ulakonzya kulibilika akuyanda kwaamba mbwalimvwa. Sena mulatondezya kuti mulabikkila maano kujatikizya mbwalimvwa kwiinda mukumuswiilila cakubikkila maano? (Amubale 1 Petro 3:7.) Ba Angela aba Dmitry bakkala mucikwati kwamyaka iitandila ku 30. Bakaamba balumi babo mbobabapa kulimvwa kuti balalemekwa, bakaamba kuti: “Ciindi nondinyemede naa nondiyanda buyo kwaamba mbondilimvwa, ba Dmitry lyoonse inga balilibambilide kundiswiilila. Balandikkazikila moyo noliba leelyo nonditaambauli cabubombe.”

17. Ncinzi bamakaintu ncobakonzya kwiiya kucikozyanyo ca Sara? (1 Petro 3:5, 6)

¹⁷ Sara wakali kumulemeka Abrahamu kwiinda mukumugwasyilizya muzintu nzyaakali kusala. (Matl. 12:5) Aciindi cimwi, Abrahamu wakayanda kusamausya beenzu ibakasika cakutayeeyela. Mpoonya wakaambila Sara kuti aleke ncaakali kucita kutegwa apange zinkwa. (Matl. 18:6) Cakufwambaana, Sara wakaleka ncaakali kucita akucita ceeco ncaakamwaambila Abrahamu. Nobamakaintu, mulakonzya kumwiiya Sara kwiinda mukugwasyilizya balumi banu muzintu nzyobasala. Ikuti mwacita oobo, muyoopa kuti cikwati canu ciyume. (Amubale 1 Petro 3:5, 6.) Ba Dmitry, ibaambwa mumuncali wainda, abalo bakaamba bakaintu babo mbobabapa kulimvwa kuti balalemekwa. Bakaamba kuti: “Ndilalumba kapati akaambo kakusolekesya nkobacita bakaintu bangu kundigwasyilizya muzintu nzyondisala noliba leelyo notujisi mizeezo yiindene. Ikuti naa zintu tiizyeenda kabotu, kunyina nobandisampaula.” Eelo kaka ncuubauba kuyanda muntu uukulemeka!

18. Mbuti banabukwetene mbobakonzya kugwasyigwa kuti bazumanana kuyumya luyando lwabo?

¹⁸ Mazuba aano, Saatani uyanda kuti banabukwetene Banakristo baleke kuyandana. Kayi ulizyi kuti, ikuti naa banabukwetene baleka kuyandana, acalo cilongwe cabo a Jehova cilakonzya kutalika kunyongana. Pele luyando lwini-lwini talukonzyi kumana. Aboobo luyando ndomujisi mucikwati canu, alube loolo lwaambidwe ku Lwiimbo lwa Solomoni. Amube amakanze aakubikka Jehova mubusena bwakusaanguna mucikwati canu, kujana ciindi cakuba antoomwe, kubikkila maano kuli zyayandika umwi aumwi alimwi ambwalimvwa. Ikuti mwacita oobo, cikwati canu ciyooleta bulemu kuli Sikutalisya luyando lwini-lwini, Jehova. Alimwi mbubwenya mbuli mulilo uusoselwa, luyando lwanu luyoozumanana kuyaka.