1. Ino Jehova uyanda kuti bakombi bakwe kabacita nzi? (Amubone acifwanikiso.)

 NGUNI ngotweelede kulomba luumbulizyo alimwi abusolozi? Tacidoonekwi buya kuti tulibuzyi bwiinguzi bwamubuzyo ooyu. Tweelede kulomba Jehova Leza kwiinda mumupailo. Jehova uyanda kuti katucita oobo. Uyanda kuti ‘katupaila cakutaleka.’ (1Tes. 5:17) Tulakonzya kupaila kulinguwe cakwaanguluka akulomba busolozi mumbazu zyoonse zyabuumi bwesu. (Tus. 3:5, 6) Mbwaanga ngu Leza mwaabi, kunyina natwaambila bunji bwaziindi nzyotweelede kupaila kulinguwe.

2. Ncinzi ncotutiibandike mucibalo eeci?

² Tulalumba kapati akaambo kacoolwe ncotujisi cakupaila. Pele akaambo kakuvwula kwazintu zyakucita, zimwi ziindi tulakonzya kwaalilwa kujana ciindi cakupaila. Alimwi ambweni inga twabona kuti tuyandika kuyaambele kujatikizya mbotupaila. Cikkomanisya ncakuti, tulakonzya kujana lugwasyo akuyumizyigwa kwiinda mu Magwalo. Mucibalo eeci, tulabandika mbotukonzya kujana ciindi cakupaila kwiinda mukulanga-langa cikozyanyo ca Jesu. Alimwi tulabona mbotukonzya kuyaambele kujatikizya mipailo yesu kwiinda mukubikkilizya twaambo tosanwe tuyandika kapati.

3. Ino Jesu wakazyi nzi kujatikizya mupailo?

³ Jesu wakalizyi kuti mipailo yesu ilayandika kapati kuli Jehova. Myaka minji katanaboola anyika, wakali kubabona Bausyi kabaingula mipailo yabamaalumi abamakaintu basyomeka. Mucikozyanyo, Jesu wakali munsi a Bausyi ciindi nobakali kwiingula mipailo iyakapailwa kuzwa ansi aamoyo, mbuli mupailo wa Hana, Davida alimwi a Elija. (1Sam. 1:10,  11, 20; 1Bam. 19:4-6; Int. 32:5) Nkakaambo kaako Jesu wakayiisya basikwiiya bakwe kupaila lyoonse alimwi cakutawayawaya.—Mt. 7:7-11.

4. Ncinzi ncotwiiya kumipailo ya Jesu?

⁴ Kwiinda mumipailo njaakali kupaila kuli Jehova, Jesu wakasiya cikozyanyo cibotu ncobeelede kutobela basikwiiya bakwe. Naakali kucita mulimo wakwe woonse waanyika, Jesu wakali kupaila lyoonse. Wakali kujana ciindi cakupaila nokuba kuti kanji-kanji wakali kujata bubi akaambo kabantu banji ibakali kuboola kulinguwe. (Mk. 6:31, 45, 46) Mucikozyanyo, wakabuka mafwumofwumo kakucisiya ansi kutegwa abe aciindi cakupaila alikke. (Mk. 1:35) Aciindi cimwi, wakapaila busiku boonse katanapanga cakusala ciyandika kapati. (Lk. 6:12, 13) Alimwi busiku katanafwa, Jesu wakapaila cakwiinduluka-induluka nkaambo wakabikkilide maano kukumanizya mulimo wakwe waanyika, iwakali kukatazya kapati.—Mt. 26:39, 42, 44.

5. Mbuti mbotukonzya kwiiya Jesu caboola kukupaila?

⁵ Cikozyanyo ca Jesu cituyiisya kuti, nokuba kuti tujisi bubi buti, tweelede kujana ciindi cakupaila. Mbubwenya mbuli Jesu, ambweni inga twayandika kufwuma buya kubuka naa kumuka koona kutegwa tujane ciindi cakupaila. Twacita boobo, tutondezya Jehova kuti tulalumba kapati akaambo kacipego eeci caalubazu. Mucizyi Lynne ulayeeya mbwaakakkomana kapati ciindi cakusaanguna naakazyiba coolwe ncajisi cakupaila. Wakaamba kuti: “Ciindi nondakazyiba kuti ndilakonzya kubandika a Jehova ciindi cili coonse, cakandigwasya kumubona kuti Mulongwe wangu mwini-mwini alimwi akuyanda kuyaambele kujatikizya mbondakali kupaila.” Tacidoonekwi buya kuti tobanji mbotulimvwa oobo. Lino amuleke tulange-lange twaambo tosanwe tuyandika kapati ntotweelede kubikkilizya mumipailo yesu.

6. Kweelana a Ciyubunuzyo 4:10, 11, ncinzi nceelela kutambula Jehova?

⁶ Kutembaula Jehova. Mucilengaano ciyoosya kapati, mwaapostolo Johane wakabona baalu bali 24 kujulu kabakomba Jehova. Bakali kutembaula Leza akwaamba kuti uleelela kutambula “bulemu alulemeko alimwi anguzu.” (Amubale Ciyubunuzyo  4:10, 11.) Abalo bangelo basyomeka balijisi twaambo tunji tubapa kumutembaula Jehova. Mbwaanga bakkala awalo kujulu, balimuzyi kabotu-kabotu. Balabona bube mbwajisi kwiinda muzintu nzyacita. Aboobo ciindi nobabona Jehova mbwacita zintu, cibapa kuti bamutembaule.—Job. 38:4-7.

7. Nkaambo nzi ncotweelede kumutembaula Jehova?

⁷ Andiswe tweelede kumutembaula Jehova mumipailo yesu. Tulakonzya kucita oobo kwiinda mukumwaambila zintu nzyotukkomanina kujatikizya nguwe alimwi akaambo ncotumuyanda. Ciindi nomubala akwiiya Bbaibbele, amusole kubona bube bwa Jehova mbomukkomanina kapati. (Job. 37:23; Rom. 11:33) Mpoonya amumwaambile mbomulimvwa kujatikizya bube oobo. Alimwi tulakonzya kumutembaula Jehova akaambo kalugwasyo ndwatupa swebo akugwasya bakwesu abacizyi boonse. Lyoonse ulatubikkila maano alimwi akutukwabilila.—1Sam. 1:27; 2:1, 2.

8. Ntwaambo nzi tumwi itweelede kutupa kumulumba Jehova? (1 Batesalonika 5:18)

⁸ Amumulumbe Jehova. Kuli twaambo tunji tweelede kutupa kumulumba Jehova mumupailo. (Amubale 1 Batesalonika 5:18.) Tulakonzya kumulumba akaambo kacintu cibotu cili coonse ncotujisi, nkaambo cipego cibotu cili coonse cizwa kulinguwe. (Jak. 1:17) Mucikozyanyo, tulakonzya kumulumba akaambo kakweebeka kwanyika alimwi azintu zibotu nzyaakalenga. Tulakonzya kumulumba akaambo kabuumi bwesu, mukwasyi wesu, balongwe besu alimwi abulangizi mbotujisi. Kunze lyaboobo, tweelede kumulumba Jehova akaambo kakutupa coolwe cakuba acilongwe anguwe.

9. Nkaambo nzi ncotweelede kuzumanana kumulumba Jehova?

⁹ Zimwi ziindi, inga twayandika kusolekesya kuyeeya twaambo tweelede kutupa kumulumba Jehova swebo lwesu kutugama. Bantu banji mazuba aano tabalumbi. Kanji-kanji babikkila buyo maano kuzintu nzyobayanda ikutali mbobakonzya kutondezya kulumba akaambo kazintu nzyobajisi. Ikuti naa twaba abube buli boobu, mipailo yesu lyoonse inooli buyo yakulomba. Pele kutegwa eeci citacitiki, tweelede kuzumanana kutondezya kulumba akaambo kazintu zyoonse nzyatucitila Jehova.—Lk. 6:45.

10. Ino kuba abube bwakulumba kwakamugwasya buti mucizyi umwi kuliyumya? (Amubone acifwanikiso.)

¹⁰ Kuba abube bwakulumba kulakonzya kutugwasya kuliyumya kumapenzi. Amumvwe cakuluula caba Kyung-sook, icakazwa mu Ngazi Yamulindizi ya January 15, 2015. Bakajanwa abulwazi bwakkansa yakumapunga. Bakaamba kuti: “Kaambo aaka kajatikizya buponi bwangu kakandipenzya kapati. Ndakali kulimvwa mbuli kuti ndasweekelwa zintu zyoonse, alimwi ndakali kulibilika kapati.” Ncinzi cakabagwasya kuliyumya? Bakaamba kuti buzuba bumwi abumwi  masiku kabatanoona, bakali kukkwela atala aaciluli caŋanda yabo akupaila cakupozya, akaambo kazintu zyosanwe nzyobakali kulumba buzuba oobo. Eeci cakali kubayumya-yumya alimwi akubakulwaizya kutondezya luyando lwabo kuli Jehova. Bakalibonena Jehova mbwabagwasya babelesi bakwe basyomeka kuliyumya mubukkale bukatazya, alimwi akuti kuli zilongezyo zinji kapati nzyotujisi kwiinda masunko ngotukonzya kuyaanya. Mbubwenya mbuli ba Kyung-sook, andiswe tulijisi twaambo tunji tweelede kutupa kumulumba Jehova, noliba leelyo notuli mumapenzi. Aboobo, kumulumba kwiinda mumupailo kulakonzya kutugwasya kuliyumya alimwi akuzumanana kukkomana.

11. Ciindi Jesu naakapiluka kujulu, nkaambo nzi basikwiiya bakwe ncobakali kuyandika busicamba?

¹¹ Amumulombe Jehova kuti amupe busicamba ciindi nomuli mubukambausi. Katanapiluka kujulu, Jesu wakayeezya basikwiiya bakwe mulimo ngobakajisi wakupa bumboni kujatikizya nguwe “mu Jerusalemu, mu Judaya moonse amu Samariya, mane kusikila kumasena aakulamfwu kapati aanyika.” (Mil. 1:8; Lk. 24:46-48) Nokwakainda buyo ciindi cisyoonto, basololi baba Juda bakamwaanga mwaapostolo Petro a Johane akubaleta ku Nkuta Mpati Yaba Juda. Mpoonya bakalailila baalumi aaba basyomeka kuti baleke kukambauka mane buya akubakonga. (Mil. 4:18, 21) Ino Petro a Johane bakacita buti?

12. Kweelana alugwalo lwa Milimo 4:29, 31, ncinzi ncobakacita basikwiiya?

¹² Mukwiingula kukonga kwabasololi bacikombelo caba Juda, Petro a Johane bakaamba kuti: “Naa cililuleme mumeso aa Leza kumvwida ndinywe muciindi cakumvwida Leza, amulisalile nobeni. Pele swebo, tatukonzyi kuleka kwaamba zintu nzyotwakabona akumvwa.” (Mil. 4:19, 20) Ciindi Petro a Johane nobakaangununwa, basikwiiya bakapaila kuli Jehova kutegwa bacikonzye kuzumanana kucita kuyanda kwakwe. Bakaamba boobu mumupailo wabo: “Kopa bazike bako kuzumanana kukanana ijwi lyako cabusicamba.” Jehova wakawiingula mupailo ooyu iwakali kuzwa ansi aamoyo.—Amubale Milimo 4:29, 31.

13. Ncinzi ncotukonzya kwiiya kucikozyanyo camukwesu Jin-hyuk?

¹³ Ikuti naa mfwulumende yatwaambila kuti tuleke kukambauka, andiswe tulakonzya kubayiya basikwiiya aaba kwiinda mukuzumanana kukambauka. Mucikozyanyo, mukwesu Jin-hyuk wakaangwa akaambo kakukaka kunjila mulimo wabusikalumamba. Kali muntolongo, wakapegwa mulimo wakwaabila baangenyina zyakulya alimwi azintu zimwi. Pele wakazumizyidwe buyo kubandika ambabo zintu zijatikizya mulimo ooyu ngwaakapedwe ikutali makani aajatikizya Bbaibbele. Aboobo wakapaila kulomba busicamba abupampu kutegwa acikonzye kwaambila bamwi kasimpe. (Mil. 5:29) Wakaamba kuti: “Jehova wakawiingula mupailo wangu kwiinda mukundipa busicamba alimwi abusongo bwakucikonzya kutalisya ziiyo zya Bbaibbele zinji, izyakali kutola buyo maminiti osanwe katwiimvwi amulyango. Mpoonya kumangolezya, ndakali kulemba magwalo ngondakali kupa baangema buzuba butobela.” Andiswe tulakonzya kuba alusyomo lwakuti Jehova uyootugwasya kuzuzikizya mulimo wesu. Aboobo, mbubwenya mbuli ba Jin-hyuk, tulakonzya kupaila kulomba busicamba alimwi abusongo.

14. Ncinzi cikonzya kutugwasya ciindi notujisi mapenzi? (Intembauzyo 37:3, 5)

¹⁴ Amumulombe Jehova kuti amugwasye  kuliyumya kumapenzi. Bunji bwesu tulapenga akaambo kakuciswa, kukopana mumizeezo, kufwidwa muyandwa, bukkale bukatazya bwamumukwasyi, kupenzyegwa naa mapenzi aambi buyo. Alimwi zintu mbuli malwazi aayambukila ankondo zyapa kuti ciindile buya kukatazya kuliyumya kumapenzi aaya. Aboobo amumwaambile Jehova bwini mbomulimvwa. Amumwaambile bukkale bwanu mbubonya mbomukonzya kwaambila mulongwe ngomusyoma. Amusyome kuti Jehova ‘ulamugwasya.’—Amubale Intembauzyo 37:3, 5.

15. Ino mupailo inga watugwasya buti ‘kuliyumya mumapenzi’? Amupe cikozyanyo.

¹⁵ Kuzumanana kupaila kulakonzya kutugwasya ‘kuliyumya mumapenzi.’ (Rom. 12:12) Jehova ulizyi mapenzi ngobajisi bakombi bakwe, aboobo “ulamvwa nobakwiilila lugwasyo.” (Int. 145:18, 19) Ba Kristie, imupainiya uujisi myaka yakuzwalwa iili 29, bakalibonena mbwaali aamasimpe majwi aaya. Cakutayeeyela, bakatalika kuciswa kapati. Akaambo kaceeci, bakaba apenzi lyakutyompwa. Mukuya kwaciindi, bakamvwa kuti banyina bakajanwa abulwazi ibwakali kukonzya kubajaya. Ba Kristie bakaamba kuti: “Ndakapaila kuli Jehova kulomba kuti andipe nguzu zyakucikonzya kuliyumya buzuba abuzuba. Ndakasolekesya kutobela bubambe bwakucita zintu zyakumuuya mbuli kujanika kumiswaangano alimwi akucita ciiyo cangu ndemwini.” Bakayungizya kwaamba kuti: “Mupailo wakandigwasya kuliyumya mubukkale oobu bukatazya. Ndakalizyi kuti lyoonse Jehova wakalaandime alimwi kuzyiba kaambo aaka kwakali kundipa kukkalwa moyo. Nokuba kuti penzi lyangu lyakuciswa tiilyakamana mpoonya-mpoonya, Jehova wakayiingula mipailo yangu kwiinda mukundipa kuba aluumuno lwamumizeezo alimwi akukkalwa moyo.” Aboobo tatweelede kuluba kuti “Jehova ulizyi ikuvwuna bantu bamubelekela cakulyaaba kuzwa mumasunko.”—2Pet. 2:9.

16. Nkaambo nzi ncotuyandika kugwasyigwa a Jehova kulwana masunko?

 ¹⁶ Amumulombe Jehova kuti amugwasye kulwana masunko. Mbotuli bantu batalondokede, lyoonse tweelede kulwana sunko lyakucita cintu citaluzi. Saatani uluujisi kucita kufwumbwa ncakonzya kutegwa citukatazye kucita ciluzi. Nzila imwi njabelesya kutegwa atunyonganye nkwiinda muzintu zyakulikondelezya zitali kabotu. Zyakulikondezya zili boobu zilakonzya kutupa kuba amizeezo iitali kabotu iikonzya kutusofwaazya mumeso aa Jehova alimwi akutupa kucita cibi cipati.—Mk. 7:21-23; Jak. 1:14, 15.

17. Twamana kupaila kulomba lugwasyo, ncinzi ncotweelede kucita? (Amubone acifwanikiso.)

¹⁷ Kutegwa tucikonzye kuzunda sunko lyakulombozya kucita cintu citaluzi, tuyandika kugwasyigwa a Jehova. Jesu wakakubikkilizya kulomba ooku mumupailo wacikozyanyo naakati: “Utatunjizyi mumasunko, pele utuvwune kumubi.” (Mt. 6:13) Jehova ulayanda kutugwasya, pele tweelede kumulomba. Alimwi tweelede kucita zintu kweelana amipailo yesu. Tweelede kusolekesya kutantamuka kubala naa kuswiilila zintu zitali kabotu zidumide munyika eeyi ya Saatani. (Int. 97:10) Tweelede kubikka zintu zili kabotu mumizeezo yesu kwiinda mukubala alimwi akwiiya Bbaibbele. Kujanika kumiswaangano akutola lubazu mumulimo wakukambauka akwalo kulakonzya kwiikwabilila mizeezo yesu. Mpoonya Jehova usyomezya kuti takatulekeli kuti tusunkwe kwiinda nguzu zyesu.—1Kor. 10:12, 13.

18. Ncinzi ncotweelede kucita toonse kujatikizya mupailo?

¹⁸ Toonse tweelede kupaila kwiinda lyoonse kutegwa tucikonzye kuzumanana kusyomeka kuli Jehova mumazuba aano aamamanino aakatazya kapati. Aboobo, amujane ciindi cakupaila kuzwa ansi aamoyo buzuba abuzuba. Jehova uyanda kuti ‘katumwaambila zyoonse zili mumoyo wesu’ kwiinda mumupailo. (Int. 62:8) Amumutembaule Jehova akumulumba akaambo kazintu zyoonse nzyaamucitila. Amumulombe kuti amugwasye kuba basicamba mumulimo wakukambauka. Amumulombe kuti amupe nguzu zyakuliyumya kumapenzi aali woonse alimwi akulwana sunko lili lyoonse ndyomujisi. Mutalekeli cintu cili coonse naa muntu uuli woonse kumulesya kupaila lyoonse kuli Jehova. Pele ino Jehova uyiingula buti mipailo yesu? Mucibalo citobela, tuyakuwiingula mubuzyo ooyu uuyandika kapati.