1-3. Ino mazwanga aakali akati kaba Yuwodiya alimwi aba Sintike kweelede kuti akatalika buti, alimwi mbuti mapenzi aali boobu mbwaakonzya kweelebwa? (Amubone cifwanikiso icili kumatalikilo aacibalo.)

BABELESI ba Jehova balalilemeka kapati bbuku lya Leza lisetekene, Bbaibbele. Mbwaanga tatulondokede, zimwi ziindi toonse inga tulapegwa lulayo lwamu Magwalo. Sena tulalutobela? Atulange-lange Banakristo bamumwaanda wamyaka wakusaanguna ba Yuwodiya aba Sintike. Kwakabuka mazwanga mapati akati kabamakaintu bananike aaba. Ino mazwanga nzi? Ibbaibbele talyaambi pe. Pele mucikozyanyo buyo, atweezyeezye cilangilwa kuti ncecakacitika.

² Atwaambe kuti ba Yuwodiya bakatamba bakwesu alimwi abacizyi bamwi kucakulya alimwi akuyanzana kubotu kuŋanda yabo. Ba Sintike tiibakatambidwe pe, pele bakamvwa kujatikizya kuyanzana kubotu boonse nkobakaba ankuko aabo ibakaliko. Ba Sintike ambweni bakaamba kuti: ‘Tandisyomede pe kuti ba Yuwodiya tiibakanditamba! Ndali kuti tuli balongwe ncobeni.’ Kabatyompedwe, ba Sintike bakatalika kutabalanga kabotu ba Yuwodiya alimwi mane buya akubayeeyela zintu zitaluzi. Aboobo ba Sintike abalo bakabamba  pobwe mpoonya akutamba bakwesu alimwi abacizyi mbomunya ibakatambidwe aba Yuwodiya pele ikutali ba Yuwodiya pe! Penzi ilyakali akati kaba Yuwodiya alimwi aba Sintike kweelede kuti lyakanyonganya luumuno lwambungano yoonse. Bbaibbele talyaambi cakacitika, pele kuboneka kuti bacizyi aba bakalutobela lulayo lwamwaapostolo Paulo.—Flp. 4:2, 3.

³ Mazuba aano, bukkale bukozyenye aboobu zimwi ziindi buleta buyumuyumu mumbungano zyabantu ba Jehova. Nokuba boobo, mapenzi aali boobo inga amanizyigwa naa kweelebwa ikuti twatobela lulayo lujanika mu Jwi lya Leza, Bbaibbele. Alimwi ikuti katulilemeka kapati bbuku lya Jehova, tunoopona kweelana amalailile aandilyo.—Int. 27:11.

4, 5. Ino ndulayo nzi Jwi lya Leza ndolutupa kujatikizya kulijata?

⁴ Tacili cuuba-uba kulijata ikuti twanyemezyegwa naa kucitilwa cakutalulama. Cilatyompya ikuti bamwi kabatatweendelezyi kabotu akaambo kamusyobo wesu, mubala, naa kwiimpana kumwi kujatikizya mbotulibonya. Eelo kaka cilacisa kapati ikuti iwatulubizyila Munakristoma! Sena Jwi lya Leza lilapa lulayo lukonzya kutugwasya ikuti twayaanya penzi lili boobu akaambo kakutalondoka kwabantu?

⁵ Jehova wali kubona bantu mbobapona abantunyina kuzwa kumatalikilo naakalenga bantu. Ulabikkila maano kujatikizya mbotulimvwa alimwi azintu nzyotucita. Mizeezo, kubikkilizya ayeeyo iiboola akaambo kakuti tulilutide, ilakonzya kupa kuti twaambe alimwi akucita zintu zikonzya kutupa kuusa kumamanino. Eelo kaka ncamaano kutobela lulayo lwamu Bbaibbele lwakujata moyo alimwi akutafwambaana kunyema pe! (Amubale Tusimpi 16:32; Mukambausi 7:9.) Cakutadooneka toonse tweelede kubeleka canguzu kuti tutanoonyemi-nyemi pele tweelede kuba bantu balekelela. Jehova alimwi a Jesu babona kulekelela kuba cintu ciyandika kapati. (Mt. 6:14, 15) Sena muyandika kuba bantu balekelela naa kwiiya kulijata?

6. Ino nkaambo nzi ncotuteelede kuba bantu bakali?

⁶ Bantu ibaalilwa kulijata kanji-kanji inga mbakali. Akaambo kaceeco, bamwi inga balabatantamuka bantu ibali boobo. Muntu mukali inga wayunga bantu mumbungano. Ulakonzya kusoleka kusisa bukali bwakwe naa lusulo lwakwe, pele mizeezo iitali kabotu iili mumoyo wakwe ‘iyooyubununwa mumbungano.’ (Tus. 26:24-26) Baalu balakonzya kugwasya bantu bali boobu kubona kuti bukali buli boobo, lusulo, alimwi akubikkilila, ntumpenda tutayandiki mumbunga ya Leza. Bbuku lya Jehova liyandika kapati lilakasalazya kaambo aaka. (Lev. 19:17, 18; Rom. 3:11-18) Sena mulazuminana andilyo?

7, 8. (a) Mbuti Jehova mbwasololela cibeela caanyika cambunga yakwe? (b) Ino malailile nzi aamwi aajanika mu Jwi lya Leza, alimwi nkaambo nzi ncotweelede kwaatobela?

⁷ Jehova ulabasololela alimwi akubasanina aabo ibali mucibeela caanyika cambunga yakwe kwiinda mukubelesya “muzike uusyomeka alimwi uucenjede” uusololelwa a Kristo, “mutwe wambungano.” (Mt. 24:45-47; Ef. 5:23) Mbubwenya mbuli kabunga keendelezya kamumwaanda wamyaka wakusaanguna, muzike ooyu ulalizumina Jwi lya Leza ilyakasololelwa, naa mulumbe, alimwi ulalilemeka kapati. (Amubale 1 Batesalonika 2:13.) Ino malailile nzi naa busolozi ibujanika mu Bbaibbele ibubambilidwe kuti butugwasye?

⁸ Bbaibbele litulailila kujanika kumiswaangano lyoonse. (Heb. 10:24, 25) Litukulwaizya kukamantana muzintu nzyotusyoma. (1Kor. 1:10) Jwi lya Leza litwaambila kubikka Bwami mubusena bwakusaanguna mubuumi bwesu. (Mt. 6:33) Magwalo alimwi akankaizya mulimo wesu  alimwi acoolwe ncotujisi cakukambauka kuŋanda aŋanda, mumasena aabuleya, alimwi abukambausi bwamukwiizya. (Mt. 28:19, 20; Mil. 5:42; 17:17; 20:20) Bbuku lya Leza lyaambila baalu Banakristo kubamba mbunga yakwe kutegwa kaisalala. (1Kor. 5:1-5, 13; 1Tim. 5:19-21) Alimwi Jehova wakabikka mulawo wakuti boonse aabo ibali mumbunga yakwe kabasalala kumubili alimwi akumuuya.—2Kor. 7:1.

9. Ninzila nzi ilikke iibelesyegwa kutugwasya kumvwisya Jwi lya Leza?

⁹ Bantu bamwi bayeeya kuti inga balimvwisya Bbaibbele lwabo beni. Nokuba boobo, Jesu wakasala “muzike uusyomeka” kuba nzila ilikke iibelesyegwa kwaabila cakulya cakumuuya. Kuzwa mu 1919, Jesu Kristo mubulemu bwakwe wali kubelesya muzike ooyu kugwasya basikumutobela kumvwisya Bbuku lya Leza, alimwi akutobela lulayo lwandilyo. Kwiinda mukumvwida malailile aajanika mu Bbaibbele, tusumpula busalali, luumuno, alimwi alukamantano mumbungano. Umwi aumwi wesu weelede kulibuzya kuti, ‘Sena ndilasyomeka kuli baabo Jesu mbabelesya mazuba aano?’

10. Ino cibeela cambunga ya Jehova cakujulu cipandulwidwe buti mubbuku lya Ezekieli?

¹⁰ Jwi lya Jehova lilatugwasya kuzyiba cibeela cambunga yakwe cakujulu. Mucikozyanyo, musinsimi Ezekieli wakatambula cilengaano mwalo cibeela cambunga ya Leza cakujulu mociimininwa ankalaki yakujulu. (Ezk. 1:4-28) Jehova ngonguwe weenzya nkalaki eeyi, alimwi ilaunka kufwumbwa muuya wakwe nkouyanda kuti yuunke. Mpoonya cibeela cambunga yakwe yakujulu ceendelezya cibeela cakwe caanyika. Masimpe, nkalaki eeyi yali kweenda kuzwa kaindi! Amuyeeye buyo kujatikizya kucinca kunji kwacitika mumbunga mumyaka iili kkumi yainda alimwi mutalubi kuti Jehova nguupa kuti kube kucinca kuli boobu. Mbwaanga Kristo alimwi abangelo basyomeka balaafwaafwi kunyonyoona nyika eeyi mbyaabi, nkalaki ya Jehova ikanzide kusumpula bulelo bwakwe alimwi akusalazyigwa kwazina lyakwe lisalala!

11, 12. Ino nzintu nzi zimwi izili mukuzuzikizyigwa ambunga ya Jehova?

¹¹ Amuyeeye kujatikizya milimo iyazuzikizyigwa acibeela cambunga ya Leza caanyika mumazuba aano aamamanino. Mayake. Babelesi banji kapati bakaluujisi kuyaka maofesi mapati aa Bakamboni ba Jehova mapya ku Warwick, New York, U.S.A. Kwiinda mukusololelwa adipatimenti iitegwa Worldwide Design/Construction, basikulisungula banji munyika yoonse bali mukubeleka canguzu kuyaka Maanda aa Bwami alimwi akukomezya mitabi. Eelo kaka tulalumba kapati akaambo kabakwesu ibalisungula kubeleka canguzu mumayake aaya! Mutalubi kuti Jehova ulabalongezya bakambausi ba Bwami munyika yoonse aabo cakulicesya alimwi cakusyomeka ibasanga kugwasyilizya mayake aali boobu.—Lk. 21:1-4.

¹² Lwiiyo. Atulange-lange zikolo ziindene-indene izisumpula lwiiyo luzwa kuli Leza. (Is. 2:2, 3) Tujisi Cikolo Camulimo Wabupainiya, Cikolo  Cabakambausi ba Bwami, Cikolo ca Gilead, Cikolo Cabaabo Ibatalika Mulimo waa Bbeteli, Cikolo ca Balangizi Babbazu alimwi Abamakaintu Babo, Cikolo Cabaalu Bambungano, Cikolo Camulimo wa Bwami, alimwi a Cikolo ca Bamukkomiti ya Mutabi alimwi Abamakaintu Babo. Eelo kaka Jehova ulayandisya kuyiisya bantu bakwe! Kwiiya makani amu Bbaibbele kulakulwaizyigwa awebbusaiti yesu ya jw.org, alo aajanika mabbuku mumyaambo minji kapati. Webbusaiti eeyi ilijisi zibeela zyaalubazu zyabana alimwi amikwasyi kubikkilizya acibeela cijisi makani aazintu zicitika mazuba aano. Sena mulaibelesya jw.org mubukambausi alimwi amukukomba kwanu kwamukwasyi?

13. Ino mukuli nzi ngotujisi swebo mbotuli bakombi ba Jehova basyomeka?

¹³ Eelo kaka ncoolwe cilibedelede kuba cibeela cambunga ya Jehova! Akaambo kakuti tujisi luzyibo lwazyeelelo zya Leza, eeci citupa mukuli wakucita ziluzi alimwi akusumpula bweendelezi bwakwe. Mbwaanga nyika eeyi iyaabwiindila kubija mukutalilemeka, tweelede ‘kusulaika bubi,’ mbubwenya mbwacita Jehova. (Int. 97:10) Tatweelede kuba mbuli bantu basampaula Leza ibaamba kuti: “Bubotu mbubi abubi kuti mbubotu.” (Is. 5:20) Akaambo kakuti tuyanda kukkomanisya Leza, tweelede kusolekesya kuzumanana kusalala kumubili, mukulilemeka, alimwi akumuuya. (1Kor. 6:9-11) Tulamuyanda Jehova alimwi tulamusyoma; tusala kutondezya kusyomeka kulinguwe kwiinda mukupona kweelana azyeelelo zilembedwe mu Bbuku lyakwe liyandika kapati. Alimwi tulasola kusikila mpotugolela kutobela zyeelelo eezyo kuŋanda, mumbungano, kumilimo, kucikolo naa kufwumbwa kubusena nkotubede. (Tus. 15:3) Atulange-lange nzila azimbi motukonzya kutondezya kusyomeka kuli Leza.

14. Mbuti bazyali Banakristo mbobakonzya kutondezya kuti balasyomeka kuli Leza?

¹⁴ Kukomezya bana. Bazyali Banakristo balatondezya kuti balasyomeka kuli Jehova kwiinda mukuyiisya bana babo kweelana a Jwi lyakwe. Bazyali Banakristo tabakomezyi bana babo kweelana azilengwa zyabantu bakubusena nkobakkala. Muuya wanyika taweelede kulekelwa kunjila muŋanda ya Munakristo. (Ef. 2:2) Usyi Munakristo ubbapatizyidwe takonzyi kuyeeya kuti, ‘Mucisi cesu bamakaintu mbobayiisya bana.’ Bbaibbele lilakasalazya kaambo aaka ciindi nolyaamba kuti: “Nomausyi, . . . amuzumanane kubalela [bana banu] mululayo alwiiyo [malailile; busolozi] lwa Jehova.” (Ef. 6:4; bupanduluzi buyungizyidwe) Bazyali ibayoowa Leza bayanda kuti bana babo babe mbuli Samuele, nkaambo Jehova wakali anguwe naakali kuyaabukomena.—1Sam. 3:19.

15. Mbuti mbotukonzya kutondezya kuti tulasyomeka kuli Jehova ciindi notuba azyakusala zipati?

¹⁵ Kusala. Ciindi notuba azyakusala zipati mubuumi, nzila yomwe mbotukonzya kutondezya kuti tulasyomeka kuli Leza nkwiinda mukulomba lugwasyo mu Jwi lyakwe alimwi akumbunga yakwe. Kutondezya mbociyandika kapati kucita boobo, atulange-lange makani mapati aabajatikizya bazyali banji. Bantu bamwi ibakkala muzisi zimbi bajisi cilengwa cakutumizya bana babo bavwanda kubabbululu babo kucisi nkobakazwa kuti bakabalanganye kutegwa balo bazumanane kubeleka akupanga mali mucisi cipya. Inzya, makani aaya ngakulisalila, pele tatweelede kuluba kuti Leza uyootubeteka kweelana azintu nzyotusala. (Amubale Baroma 14:12.) Sena inga caba camaano kupanga cakusala ciyandika kapati kujatikizya mukwasyi wesu alimwi abuumi bwesu kakunyina kusaanguna kuvwuntauzya ncolyaamba Bbaibbele? Peepe! Tuyandika lugwasyo kuzwa kuli Taateesu wakujulu nkaambo tatukonzyi kusololela ntaamu zyesu.—Jer. 10:23.

16. Ciindi naakazyalwa mwanaakwe, ino nkusala kuli buti nkwaakeelede kucita mukaintu umwi, alimwi ncinzi cakamugwasya kusala kabotu?

 ¹⁶ Mukaintu umwi iwakazyala mwana musankwa naakali kukkala kucisi cimbi wakali kuyanda kutola mwanaakwe kucisi nkwazwa kutegwa bakamulanganye banene bakwe. Ciindi naakatumbuka, umwi waba Kamboni ba Jehova wakatalika kwiiya Bbaibbele anguwe. Wakayaambele kumuuya alimwi wakaiya kuti wakali mukuli wakwe kuzwa kuli Leza iwakukomezya mwanaakwe kuti kakomba Jehova. (Int. 127:3; Tus. 22:6) Mukaintu ooyu wakapaila kuli Jehova camoyo woonse, mbubwenya Magwalo mbwaatwaambila kucita. (Int. 62:7, 8) Kuyungizya waawo, wakaambila ibakali kumuyiisya Bbaibbele alimwi abamwi mumbungano kujatikizya bukkale bwakwe. Nokuba kuti bacibbululu alimwi abalongwe bakwe bakali kumwaambila kuti amutole mwanaakwe kuli banene bakwe, wakabona kuti tiicakaluzi kucita boobo. Mulumaakwe wakakkomana kapati akaambo kakuti mbungano yakamugwasya mukaintu wakwe amwanaakwe cakuti awalo wakazumina kwiiya Bbaibbele alimwi wakatalika kujanika kumiswaangano antoomwe amukaintu wakwe amwanaakwe. Sena muyeeya kuti mukaintu ooyu wakalimvwa kuti Jehova wakawiingula mupailo wakwe? Cakutadooneka, mbwaakalimvwa oobo.

17. Ino malailile nzi ngotwakatambula kujatikizya basikwiiya Bbaibbele?

¹⁷ Kutobela malailile. Nzila iiyandika kapati mbotukonzya kutondezya kusyomeka kuli Leza nkwiinda mukutobela malailile ngotutambula mumbunga yakwe. Mucikozyanyo, atulange-lange nzila nzyotwakapegwa kujatikizya ziiyo zyesu zya Bbaibbele. Twakakulwaizyigwa kuti twatalika kwiiya amuntu mubbuku lyakuti Ino Ncinzi Cini Bbaibbele Ncoliyiisya? twamanizya ciiyo cimwi acimwi, kwamaminiti masyoonto buyo tweelede kumugwasya sikwiiya kwiizyiba kabotu mbunga yesu. Inga twacita oobo kwiinda mukubelesya vidiyo yakuti Ino Ncinzi Cicitika ku Ŋanda ya Bwami? alimwi abroshuwa yakuti Ino Mbaani Bacita Kuyanda kwa Jehova Mazuba Aano? Twamanizya kuliiya bbuku lya Bbaibbele Ncoliyiisya asikwiiya uuyaambele, kwakapegwa muzeezo wakuti tweelede kwiiya anguwe mubbuku lyakuti “Amuzumanane Kukkala Muluyando lwa Leza,” nokuba kuti wakabbapatizyigwa kale aciindi eeco. Mbunga yatupa malailile aaya kutegwa basikwiiya bapya ‘bakkalikile mulusyomo.’ (Kol. 2:7) Sena mulaatobela malailile aaya aazwa kumbunga ya Jehova?

18, 19. Ino ntwaambo nzi tumwi ncotweelede kumulumbila Jehova?

¹⁸ Kuli twaambo tunji ncotweelede kumulumbila Jehova! Tulapona akaambo kanguwe, nkaambo naatali nguwe notwatali kweenda naa kupona buya. (Mil. 17:27, 28) Watupa cipego cibotu kapati!—bbuku lyakwe, Bbaibbele. Tulalitambula kuti mulumbe wa Leza, mbubwenya Banakristo baku Tesalonika mbobakalitambula jwi lya Leza alimwi akulizumina.—1Tes. 2:13.

¹⁹ Mbwaanga tulilijisi Jwi lya Leza, lyatugwasya kuswena kuli Jehova eelyo awalo waswena kulindiswe. (Jak. 4:8) Taateesu wakujulu watupa coolwe citaliboteli cakuba cibeela cambunga yakwe. Eelo kaka tulalumba akaambo kazilongezyo zili boobu! Sintembauzyo wakaasalazya kabotu makani aaya naakaimba kuti: “Amumulumbe Jehova, nkaambo mubotu; luyando lwakwe lutamani nkoluli lyoonse mane kukabe kutamani.” (Int. 136:1) Ziindi zili 26 mu Intembauzyo 136, tujana kwiinduluka-induluka kwamajwi aakuti “luyando lwakwe lutamani nkoluli lyoonse.” Ikuti twasyomeka kuli Jehova alimwi akumbunga yakwe, tuyoobona kuzuzikizyigwa kwamajwi aayo aakkazyika moyo nkaambo tuyoopona kukabe kutamani!