1. Amupandulule zintu zyakacitika ciindi munzi wa Jerusalemu nowakanyonyoonwa.

MU 607 B.C.E., basikalumamba banji bana Babuloni ibakali kusololelwa a Mwami Nebukadinezara Wabili bakausaala munzi wa Jerusalemu. Kujatikizya bulowa bwakatika, Bbaibbele lyaamba kuti: “[Nebukadinezara] wakajaya balombwana babo apanga mutempele lyabo; tanaakafwida muntu luzyalo, abe mulombwana naba nakalindu, uucembeede naa uutabukili bulo. . . . Wakaumpa ŋanda ya Leza mwini-mwini, wakamwaya bulambo bwa Jerusalemu, wakaumpa ngazi zyanguwo zikwabilidwe zyoonse akunyonyoona zintu zyoonse ziyandisi.”—2Mak. 36:17, 19.

2. Ino nkucenjezya kuli buti Jehova nkwaakapa kujatikizya kunyonyoonwa kwa Jerusalemu ikwakali kuyoocitika, alimwi ncinzi cakali kuyoocitikila ba Juda?

² Kunyonyoonwa kwa Jerusalemu tiikwakeelede kubagambya bantu ibakali kukkala mumo. Kwamyaka minji, basinsimi ba Leza bakabacenjezya ba Juda kuti, ikuti bazumanana kutatobela Mulawo wa Leza, bakali kuyakwaabwa mumaanza abana Babuloni. Ba Juda banji bakali kuyoojaigwa apanga; pele aabo ibakali kuyoofwutuka bakali kulangilwa kuyoopona ku Babuloni mubuzike buumi bwabo boonse. (Jer. 15:2) Ino buumi mubuzike bwakali buti ookuya? Sena kuli kukozyanya kuliko akati kabuzike bwamu Babuloni abwamuciindi ca Banakristo? Ikuti kacili boobo, ino bwakacitika lili?

3. Ino buzike bwaku Babuloni bwakaindene buti abuzike mobakabede bana Israyeli ku Egepita?

³ Zintu nzyobakasinsima basinsimi zyakacitika. Kwiinda muli Jeremiya, Jehova wakaambila bantu ibakali kuyoounka mubuzike kuti babuzumine bukkale bwabo bupya alimwi akububelesya kabotu. Wakaamba kuti “Amuyake maanda [mu Babuloni] akukkala mulingawo. Amulime myuunda akulya micelo yanjiyo. Amuyandaule luumuno lwamunzi wacisi ooko nkondamutola mubuzike, alimwi amuupailile kuli Jehova, nkaambo kwiinda muluumuno lwanguwo anywebo muyooba aluumuno.” (Jer. 29:5, 7) Aabo ibakalibombya kukuyanda kwa Leza bakapona buumi bubotu mu Babuloni. Ibakabajatide buzike bakabapa lwaanguluko luli mbolubede lwakulyeendelezyela makani aabo. Bazike mane buya bakajisi lwaanguluko lwakweendeenda mucisi. Babuloni wakali munzi wakali kucitilwa makwebo kaindi, alimwi zintu izyakavwukkulwa zitondezya kuti ba Juda banji bakaiya milimo yakuula akusambala kabali kokuya, kumane bamwi bakaba basyaazibwene muzyakupanga-panga. Ba Juda bamwi mane bakavwuba. Buzike bwaku Babuloni tiibwakali mbuli buzike bwaku Egepita bana Israyeli mobakabede myaanda yamyaka musyule.—Amubale Kulonga 2:23-25.

4. Kunze lyabana Israyeli bazangi, mbaani bamwi bakajatikizyigwa mubuzike bwaku Babuloni, alimwi milawo nzi njobakapegwa kujatikizya kukomba Leza munzila njayanda?

⁴ Nokuba kuti bazike ba Juda bakali kujana nzyobakali kuyandika kumubili, ino mbuti kujatikizya nzyobakali kuyandika kumuuya? Tempele lya Jehova alimwi acipaililo zyakanyonyoonwa, alimwi bubambe bwabupaizi tiibwakacili kubeleka kabotu. Akati kabazike, kwakali babelesi ba Leza basyomeka ibatakali kweelela kusubulwa, pele bakapengela antoomwe abana Israyeli bambi boonse. Nokuba boobo, bakacita kufwumbwa ncobakali kukonzya kutegwa batobele Mulawo wa Leza. Mucikozyanyo, ku Babuloni, Daniele alimwi abeenzinyina botatwe, nkokuti Sadirake, Mesaki a Abedinego bakakaka kulya zyakulya izyakali kukasyigwa kuba Juda. Alimwi tulizyi kuti Daniele wakali kubandika a Leza lyoonse kwiinda mumupailo. (Dan. 1:8; 6:10) Nokuba boobo, mubulelo bwabantu batakombi Leza, tiicakali kukonzyeka kuti muntu uuyoowa Leza acikonzye kucita zyoonse kweelana a Mulawo.

5. Ino mbulangizi nzi Jehova mbwaakapa bantu bakwe, alimwi nkaambo nzi cisyomezyo eeci ncocakalilibedelede?

⁵ Sena bana Israyeli bakali kuyoocikonzya alimwi kumukomba Leza munzila iimukkomanisya? Aciindi eeco, kwakali kulibonya mbuli kuti tiicakali kukonzyeka pe. Bana Babuloni tiibakali kwaangununa bazike babo. Nokuba boobo, mulawo ooyo tiiwakali kukonzya kukasya Jehova Leza kucita ncayanda. Wakasyomezyede kuti bantu bakwe bayakwaangununwa, alimwi eeco ncecakacitika. Zintu nzyasyomezya Leza zilacitika.—Is. 55:11.

6, 7. Ino nkaambo nzi ncociyandika kuti tusalazye mbotukamvwisya kaambo kajatikizya kuba bazike mu Babuloni mazuba aano?

⁶ Sena Banakristo kuli nobakalijana kale mubukkale bukozyenye abuzike bwamu Babuloni? Kwamyaka minji, magazini eeyi yali kwaamba kuti babelesi ba Leza bamazuba aano bakaba bazike mu Babuloni mu 1918 alimwi akuti bakaangununwa kuzwa mu Babuloni mu 1919. Nokuba boobo, akaambo katwaambo ntotutiibandike mucibalo eeci alimwi acitobela, kwakajanika kuti makani aaya ayandika kwaalanga-langa alimwi.

⁷ Amuyeeye kuti: Babuloni Mupati mbukombi bwakubeja bwanyika yoonse. Aboobo, ikutegwa babe bazike mu Babuloni mu 1918, nkokuti bantu ba Leza bakeelede kuba bazike bacikombelo cakubeja munzila iimwi aciindi eeco. Nokuba boobo, twaambo twamasimpe tutondezya kuti mumyaka yakasololela ku Nkondo Yakusaanguna  Yanyika Yoonse, babelesi ba Leza bananike mubwini bakali kuzwa buya mu Babuloni Mupati, ikutali kuba mubuzike pe. Nokuba kuti masimpe ikuti bananike bakali kupenzyegwa ciindi cankondo yakusaanguna yanyika yoonse, mapenzi ngobakali kuyaanya ikapati akali kuletwa abeendelezi bamfwulumende, ikutali Babuloni Mupati. Aboobo takulibonyi kuti bantu ba Jehova bakanjila mubuzike mu Babuloni Mupati mu 1918.

8. Amupandulule mbobwakanyongana Bunakristo bwakasimpe. (Amubone cifwanikiso icili kumatalikilo aacibalo.)

⁸ Lya Pentekoste mu 33 C.E., ba Juda alimwi abasandule banji bakananikwa amuuya uusalala. Banakristo bapya aaba bakaba “musyobo uusalidwe, ibapaizi bami, cisi cisalala, iciinga ca Leza cilibedelede.” (Amubale 1 Petro 2:9, 10.) Nobakacili baumi, baapostolo bakali kuzilanganya mbungano zyabantu ba Leza. Nokuba boobo, kwaambisya kuzwa nobakafwa baapostolo, kwakabuka bantu ibakali kuyiisya “zintu zipilingene” kutegwa “balikwelele basikwiiya.” (Mil. 20:30; 2Tes. 2:6-8) Bunji bwabamaalumi aaba ibakajisi mikuli mumbungano, bakali kubeleka kabali balangizi, mpoonya mukuya kwaciindi kabali “bamabishopo.” Kwakali kuyaabuba kakamu kabasololi bacikombelo, nokuba kuti Jesu wakalibaambilide basikumutobela kuti: “Nywebo nyoonse muli babunyina.” (Mt. 23:8) Bamaalumi ibakajisi mpuwo aabo ibakali kuzikkomanina njiisyo zyakubeja zya Aristotle a Plato bakatalika kuyiisya njiisyo zyabukombi bwakubeja, zyalo asyoonto-syoonto izyakali kuyaabunjila mubusena bwanjiisyo zyamasimpe zya Jwi lya Leza.

9. Amupandulule Bunakristo bwaluleyo mbobwakakamantana a Bweendelezi bwabana Roma alimwi ino ncinzi cakacitika?

⁹ Mu 313 C.E., Bunakristo bwaluleyo bwakazumizyigwa mumulawo a Constantine, Mweendelezi wa Roma iwatakali kukomba Leza. Kuzwa ciindi eeco, Cikombelo a Mfwulumende zyakatalika kubelekela antoomwe. Mucikozyanyo, nowakamana Muswaangano waku Nicaea, Constantine walo iwakaliko kumuswaangano ooyo, wakalailila kuti Arius imusololi wacikombelo iwakakazya muzeezo wabo azwe mucisi nkaambo wakakaka kuzumina kuti Jesu ngu Leza. Mukuya kwaciindi, mubulelo bwa Mweendelezi Theodosius Wakusaanguna (379-395 C.E.), Cikombelo ca Katolika, icakazyoozyibwa kuti Bunakristo busofweede, bwakaba bukombi buzumizyidwe mu Bulelo bwabana Roma. Basikwiiya zyakaindi baamba bana Roma ibatakali kukomba Leza kuti “bakasandulwa kuba Banakristo” mumwaanda wamyaka wane. Bwini mbwakuti aciindi eeco Bunakristo bwaluleyo bwakasangana tubunga twazikombelo zyakubeja izyakali mu Bweendelezi bwabana Roma akuba cibeela ca Babuloni Mupati. Nokuba boobo, mweelwe musyoonto wa Banakristo bananike ibali mbuli wiiti bakali kubeleka canguzu kutegwa bakombe Leza, pele nzyobakali kwaamba tiizyakali kubikkilwa maano pe. (Amubale Matayo 13:24, 25, 37-39.) Masimpe bakali mubuzike mu Babuloni!

10. Ino ntwaambo nzi twakapa kuti bantu bayandisya Leza batalike kuzidooneka njiisyo zyazikombelo mumyaanda yamyaka misyoonto yakatobela kuzwa ciindi ca Jesu?

¹⁰ Nokuba boobo, myaanda yamyaka misyoonto yakatobela kuzwa ciindi ca Jesu, bantu banji bakali kukonzya kubala Bbaibbele mu Chigiriki naa mu Chilatini. Aboobo bakali kukonzya kukozyanisya njiisyo zyamu Jwi lya Leza anjiisyo zizwa mutunsiyansiya twacikombelo. Kweelana anzyobakali kubala mu Bbaibbele, bamwi akati kabo bakali kuzikazya njiisyo zyacikombelo zitali zyamumagwalo, pele ikwaamba caantangala mizeezo iili boobo kwakali kulibikka muntenda mpati kapati.

11. Mbuti basololi bazikombelo mbobakatalika kweendelezya kumwaigwa kwa Bbaibbele?

¹¹ Mukuya kwaciindi, myaambo molyakasaanguna kulembwa Bbaibbele yakaleka kubelesyegwa abantu banji, alimwi bacikombelo bakatalika kuukazya mulimo wakusandulula Jwi lya  Leza mumyaambo iyakali kuvwula kwaambwa. Akaambo kaceeci, balikke basololi bazikombelo alimwi abantu bamwi bayiide mbabakali kukonzya kubala Bbaibbele, nokuba boobo tabali boonse basololi bazikombelo ibakali kukonzya kubala akulemba kabotu. Kufwumbwa muntu iwakali kukazya izyakali kuyiisyigwa mucikombelo wakali kusubulwa citaambiki. Babelesi ba Leza bananike ibasyomeka bakali kuswaangana mutubunga cakusisikizya ikuti cakonzyeka kucita oobo. Mbubwenya mbocakabede mubuzike mu Babuloni yansiku, bananike “ibapaizi bami” tiibakali kukonzya kubeleka munzila iili kabotu. Babuloni Mupati wakabajata buzike bantu mbubwenya mbuli nkala mboipanela.

12, 13. Ino ntwaambo nzi tobilo twakapa Banakristo bakasimpe kuti babe abulangizi bwalwaanguluko? Amupandulule.

¹² Sena Banakristo bakasimpe kuli nobakali kuyakwaanguluka kukomba Leza cakulikwaya alimwi munzila iimukkomanisya? Inzya! Mumuni wakumuuya wakatalika kumweka asyoonto-syoonto akaambo katwaambo tobilo tuyandika kapati. Ikaambo kakusaanguna kakali kujatikizya kubambwa kwamuncini uusimba mabbuku mumwaanda wamyaka wa 15. Kabatanatalika kusimba mabbuku kuzisi zyakubukuwa, Bbaibbele lyakakkopololwa cakubikkila maano amaanza. Ma Bbaibbele tanaakali kuboneka-boneka pe alimwi akali kudula. Kwaambwa kuti cakali kukonzya kutola myezi iili kkumi kuti sikukkopolola uucibwene amanizye kukkopolola Bbaibbele lyomwe buyo amaanza. Kuyungizya waawo, mapepa alimwi azipaya mpobakali kulembela basikukkopolola zyakali kudula kapati. Mukwiimpana akukkopolola amaanza, ikubelesya muncini uusimba alimwi amapepa yalo iyakali nzila iigwasya kapati, sikusimba mabbuku uucibwene wakali kukonzya kusimba mapepa aali 1,300 mubuzuba bomwe buyo!

¹³ Kaambo kabili kajatikizya baalumi bali mbobabede basicamba ibakayeeya kusandulula Jwi  lya Leza mumyaambo yakali kwaambaulwa abantu-bantu buyo kumatalikilo aamwaanda wamyaka wa 16. Basanduluzi banji bakabikka buumi bwabo muntenda kwiinda mukubeleka mulimo ooyu. Basololi bacikombelo bakalibilika kapati. Nkaambo nzi? Nkaambo bakali kuyoowa kuti naa bantu ibayoowa Leza balibala Bbaibbele mumwaambo wabo, inga batalika kubuzya mibuzyo mbuli yakuti, ‘Ino mpaali mu Jwi lya Leza aalembedwe kuti kuli busena bwamyuuya yabafwide? Mpaali mu Bbaibbele aalembedwe kuti basololi bazikombelo beelede kubbadelwa kutegwa bapailile bafwide kuti batakapenzyegwi kubusena bwamyuuya yabafwide? Mpaali Bbaibbele mpolyaamba kujatikizya bapaapa alimwi abasololi bacikombelo ibatobela paapa?’ Bunji bwanjiisyo zyacikombelo zyakayeeme anjiisyo zyakubeja zya Aristotle a Plato, baalumi ibakapona myaanda yamyaka iilimbwiibede Jesu katanazyalwa. Basololi bacikombelo bakali kukalala ciindi bantu nobakali kubabuzya mibuzyo. Bamaalumi abamakaintu ibakali kukazya nzyobakali kuyiisya bakali kujaigwa. Basololi bacikombelo bakali kuyanda kuti bantu baleke kubala Bbaibbele akubuzya mibuzyo, alimwi kanji-kanji eeco ncecakali kucitika. Pele bantu basyoonto basicamba bakakaka kweendelezyegwa a Babuloni Mupati. Bakakajana kasimpe mu Jwi lya Leza, alimwi bakali kuyanda kuzyiba zinji! Lwaanguluko kuzwa kubukombi bwakubeja lwakali afwaafwi.

14. (a) Mbukkale nzi ibwakapa kuti kube kukamvwisya kabotu kasimpe kamu Bbaibbele kumamanino aamyaka yakuma 1800? (b) Amupandulule Mukwesu Russell mbwaakatondezya kuti wakajisi nyota yakasimpe.

¹⁴ Bantu banji ibakajisi nyota yakwiiya kasimpe kamu Bbaibbele bakatijila kumasi ooko cikombelo nkocatakajisi nguzu zyakweendelezya zintu. Bakali kuyanda kuti kabalibalila, kwiiya alimwi akubandika twaambo abamwi kakunyina kwaambilwa buya nzyobeelede kusyoma. Mucisi cimwi icili boobo, kwakali ku United States, ooko ba Charles Taze Russell abeenzinyina nkobakatalika kwiiya Bbaibbele cakusitikila kumamanino aamyaka yakuma 1800. Kumatalikilo, makanze aa Mukwesu Russell akali aakuzyiba cikombelo icakali kuyiisya kasimpe akati kazikombelo izyakaliko. Wakeezyanisya cakubikkila maano ncolyaamba Bbaibbele alimwi anjiisyo zyabukombi bwiindene-indene, kubikkilizya aboobo ibutali bwa Bunakristo. Kalitanalampa, wakajana kuti kunyina cikombelo nociba comwe akati kazikombelo eezyo icakali kutobela cakumaninina ncoliyiisya Jwi lya Leza. Aciindi cimwi, wakaswaangana abasololi bazikombelo banji bakubusena nkwaakali kukkala kajisi makanze aakuti baalumi aaba balakazumina kasimpe aako walo alimwi abeenzinyina nkobakajana mu Bbaibbele akukayiisya kubantu bamuzikombelo zyabo. Pele basololi bazikombelo aabo bakakaka. Basikwiiya Bbaibbele aabo bakeelede kuzyiba kaambo kakuti: Tiibakeelede kuyanzana abaabo ibakakanzide kukakatila kubukombi bwakubeja.—Amubale 2 Bakorinto 6:14.

15. (a) Ino ndilili Banakristo nobakaba bazike ba Babuloni Mupati? (b) Ino mibuzyo nzi iiyandika kwiingula mucibalo citobela?

¹⁵ Aboobo twabona kuti Banakristo bakasimpe bakaba bazike mu Babuloni mbobakamanina buyo kufwa baapostolo bamamanino. Nokuba boobo, kuli mibuzyo iiyandika kwiingula: Ino mbumboni nzi abumbi buliko ibutondezya kuti myaka kautanasika mwaka wa 1914, bananike bakali kwaangununwa buya kuzwa mu Babuloni Mupati, akuti tiibakacili bazike banguwo? Sena masimpe kuti Jehova tanaakali kubakkomanina babelesi bakwe akaambo kakuti bakayaansi mumulimo wabo wakukambauka ciindi ca Nkondo Yakusaanguna Yanyika Yoonse? Alimwi sena bakwesu bamwi kuciindi eeco bakaleka kusyomeka kabali Banakristo akutola lubazu mutwaambo twacisi cakuti Jehova wakaleka kubakkomanina? Mubuzyo wamamanino ngwakuti, ikuti Banakristo bakaba bazike babukombi bwakubeja mumwaanda wamyaka wabili C.E. kuya kumbele, ino bakaangununwa lili? Mibuzyo eeyi mibotu kapati. Cibalo citobela ciyakuyiingula mibuzyo eeyi.