1, 2. (a) Ino Jesu wakali kulimvwa buti kujatikizya Mulawo wa Leza? (b) Ino mbuti balembi aba Farisi mbobakali kucita ciimpene a Mulawo?

JESU wakali kuuyanda Mulawo wa Musa. Lino eeco tacitugambyi pe nkaambo Mulawo ooyo wakazwa kuli Jehova, Bausyi, Muntu uuyandika kapati mubuumi bwa Jesu. Luyando lupati ndwaakajisi Jesu kujatikizya mulawo wa Leza lwakasinsimwa mulugwalo lwa Intembauzyo 40:8 ilwaamba kuti: “Ndilakukkomanina kucita kuyanda kwako, O Leza wangu, alimwi mulawo wako uli mukati kamoyo wangu.” Kwiinda mumajwi alimwi amumilimo, Jesu wakasinizya kuti Mulawo wa Leza ulilondokede, ulagwasya alimwi akuti masimpe uyoozuzikizyigwa.—Mt. 5:17-19.

² Eelo kaka kweelede kuti cakamucisa Jesu naakabona balembi aba Farisi kabacita ciimpene a Mulawo wa Bausyi! Bakali kubikkila maano kapati kutubeela tumwi tusyoonto-syoonto kapati twamulawo, nkaambo Jesu wakaamba kuti: “Mulapa cakkumi cazisyu zyaluyuni abboonko.” Aboobo, ino ncinzi cakalubide? Wakayungizya kuti: “Pele tamubikkili maano kumakani mapati aa Mulawo, nkokuti bululami, luse, alusyomo.” (Mt. 23:23) Mukwiimpana abalembi alimwi aba Farisi balo ibakali kuciindizya, Jesu wakali kubona njiisyo iiliko mu Mulawo,  ibube bwa Leza ibwakali kutondezyegwa mumulawo umwi aumwi.

3. Ino ncinzi ncotutiilange-lange mucibalo eeci?

³ Mbotuli Banakristo, tatuli aansi aa Mulawo wacizuminano. (Rom. 7:6) Nokuba boobo, akaambo kandiswe, Jehova wakauyobola Mulawo ooyu mu Jwi lyakwe, Bbaibbele. Uyanda kuti katubikkila maano kapati kukumvwisya Mulawo alimwi akubelesya “makani mapati” aali mulinguwo, nkokuti njiisyo zisumpukide zili mumulawo ooyu. Mucikozyanyo, ino ninjiisyo nzi nzyotweelede kumvwisya kujatikizya bubambe bwaminzi yamayubilo? Cibalo cainda cakalanga-langa ziiyo nzyotwiiya kuntaamu nzyaakali kubweza sikujaya muntu. Pele alimwi kuzwa kuminzi yamayubilo, twiiya kujatikizya Jehova alimwi ambotukonzya kutondezya bube bwakwe. Aboobo, cibalo eeci cilaingula mibuzyo yotatwe eeyi: Ino mbuti minzi yamayubilo mboitondezya luse lwa Jehova? Ino ituyiisya nzi kujatikizya mbwabubona buumi? Ino mbuti mboitondezya bululami bwakwe bulondokede? Mumbazu imwi aimwi, amubone nzila mbomukonzya kumwiiya Uso wanu wakujulu.—Amubale Baefeso 5:1.

4, 5. (a) Ino mbuti alimwi nkaambo nzi minzi yamayubilo ncoyakabambwa munzila yakuti kacili cuuba-uba kutijila mulinjiyo? (b) Ino eeci cituyiisya nzi kujatikizya Jehova?

⁴ Cakali cuuba-uba kutijila kuminzi yamayubilo iili cisambomwe. Jehova wakaambila bana Israyeli kubikka minzi eeyi kumabazu oonse obilo aa Mulonga wa Jordano. Nkaambo nzi? Kutegwa sikujaya muntu kafwambaana kwiijana kakunyina buyumuyumu. (My. 35:11-14) Migwagwa iyakali kuya kuminzi yamayubilo yakali kubambwa kabotu. (Dt. 19:3) Kweelana amabbuku aagwasya kuvwuntauzya aaba Juda, zikwankwani zyakali kwiimikwa kutondezya nkwiibede minzi yamayubilo. Mbwaanga minzi yamayubilo yakaliko, muntu wajaya muntu cakutazyiba tanaakali kusungilizyigwa kutijila kucisi cabantu, kwalo nkwaakali kukonzya kutalika bukombi bwakubeja.

⁵ Amuciyeeyele buyo: Jehova—iwakapa mulawo wakuti muntu wajaya muntu acaali weelede kupegwa cisubulo calufwu—ngonguwe iwakapa muntu wajaya muntu cakutazyiba coolwe cakufwidwa lubomba alimwi akukwabililwa! Sikwiiya zyamu Bbaibbele umwi wakaamba kuti: “Zyoonse zyakabambwa cakusalala, munzila nguba-uba, alimwi iitakatazyi kutobela. Eeyi yakali nzila mbotu ya Leza.” Jehova tali mubetesi muyumu moyo uuyandisya kusubula babelesi bakwe. Muciindi caboobo, “ulaaluse kapati.”—Ef. 2:4.

6. Ino mbuti muuya ngobakajisi ba Farisi mbowiindene aluse lwa Leza?

⁶ Mukwiimpana, ba Farisi bakali kuwayawaya kufwida muntu luse. Mucikozyanyo, kweelana acilengwa, tiibakalisungwide kulekelela ikuti cibi nciconya cacitwa ziindi ziinda kuli zyotatwe. Jesu wakatondezya muuya ngobakajisi kujatikizya basizibi kwiinda mukupa cikozyanyo camu  Farisi iwakapaila kuti: “O Leza, ndilakulumba kuti tandili mbuli bantu bamwi—ibabbi, bataluleme, basimamambe—naa mbuli simutelo ooyu”—simutelo walo wakali kupaila cakulibombya kulomba kufwidwa luse kuli Leza. Ino nkaambo nzi ba Farisi ncobatakalisungwide kufwida bamwi luse? Bbaibbele lyaamba kuti bakali “kubona bamwi kuti mbabuyo.”—Lk. 18:9-14.

7, 8. (a) Ikuti umwi wamulubizyila, mbuti mbomukonzya kumwiiya Jehova? (b) Nkaambo nzi kulekelela ncouli musunko wakulicesya?

⁷ Amwiiye Jehova, kutali ba Farisi. Amutondezye lweetelelo. (Amubale Bakolose 3:13.) Nzila imwi mbotukonzya kucita boobo nkwiinda mukupa kuti bamwi cibaubile-ubile kulomba kulekelelwa kulindiswe. (Lk. 17:3, 4) Amulibuzye kuti: ‘Sena bantu ibandilubizyila balakonzya kusika kulindime kulomba kulekelelwa noliba leelyo nobandilubizyila cakwiinduluka-induluka? Sena ndilayandisisya kubamba luumuno amuntu iwandilubizyila naa iwandicisizya moyo?’

⁸ Mubwini kulekelela kusunka kulicesya. Ba Farisi bakaalilwa kuzwidilila mumusunko ooyo nkaambo bakali kubona bamwi kuti tabajisi mpindu. Nokuba boobo, mbotuli Banakristo, cakulibombya tweelede ‘kubona bamwi kuti balatwiinda,’ kubabona kuti tuleelede kubalekelela. (Flp. 2:3) Sena muyoomwiiya Jehova akuzwidilila mumusunko wakulicesya? Amupe kuti cuube-ube kuli bamwi kulomba kulekelelwa alimwi akupa kuti cuube-ube kulindiswe kubalekelela. Amufwambaane kutondezya luse alimwi akumuka kunyema.—Muk. 7:8, 9.

9. Mbuti Jehova mbwaakagwasya bana Israyeli kubona mbobwakasetekene buumi bwamuntu?

⁹ Makanze mapati aaminzi yamayubilo akali aakukwabilila bana Israyeli kuzwa kumulandu wabulowa. (Dt. 19:10) Jehova ulabuyanda buumi, aboobo, “maanza aatila bulowa bwabantu banyina mulandu” ulaasulide. (Tus. 6:16, 17) Mbwali Leza wabululami alimwi uusalala, takonzyi ikwiile kukulanga buyo nokuba kutila bulowa cakutazyiba. Masimpe, muntu iwajaya muntu cakutazyiba wakali kufwidwa luse. Nokuba boobo, wakeelede kutola mulandu wakwe kubapati, mpoonya ikuti kwajanwa kuti tanaakacita caali, wakeelede kuzumanana kukkala mumunzi wamayubilo kusikila mupaizi mupati wafwa. Eeci cakali kukonzya kupa kuti akkale mumunzi ooyo buumi bwakwe boonse. Kucita boobo kwakagwasya bana Israyeli boonse kubona mbobwakasetekene buumi bwamuntu. Kutegwa batondezye bulemu kuli Sikupa Buumi, bakeelede kutantamuka kucita cintu cili coonse icakali kukonzya kubikka buumi bwamuntunyina muntenda.

10. Kweelana a Jesu, mbuti balembi aba Farisi mbobakatondezya kuti tiibakali kubulemeka buumi?

¹⁰ Mukwiimpana a Jehova, balembi aba Farisi bakatondezya kuti tiibakali kubulemeka buumi. Munzila nzi? Jesu wakabaambila kuti: “Mwakanyanga bantu kkii yaluzyibo. Nywebo nobeni tiimwakanjila alimwi aabo bayanda kunjila mulabalesya!” (Lk. 11:52) Bakeelede kulipandulula Jwi lya Leza akugwasya bantu kweendela munzila iitola kubuumi butamani. Muciindi caboobo, bakali kutantamuna bantu kuzwa ku “Musololi Mupati wabuumi,” Jesu, akubasololela kunzila iyakali kukonzya kubatola kulunyonyooko lutamani. (Mil. 3:15) Akaambo kakulisumpula akuliyanda,  balembi aba Farisi tiibakali kububikkila maano buumi alimwi abukkale bwabantunyina. Eelo kaka bakali alunya alimwi bakanyina luse!

11. (a) Ino mbuti mwaapostolo Paulo mbwaakatondezya kuti buumi wakali kububona mbwabubona Leza? (b) Ino ncinzi cikonzya kutugwasya kuba amuuya mbuli wa Paulo kujatikizya mulimo wakukambauka?

¹¹ Ino mbuti mbotukonzya kutantamuka muuya ngobakajisi balembi aba Farisi akwiiya Jehova? Tweelede kubulemeka buumi akububona kuti ncipego ciyandika kapati. Mwaapostolo Paulo wakacita oobo kwiinda mukupa bumboni cakulomya. Aboobo, wakali kukonzya kwaamba kuti: “Ndinyina mulandu wabulowa bwabantu boonse.” (Amubale Milimo 20:26, 27.) Mbubwenya buyo, Paulo tanaakali kukambauka akaambo kakuyoowa kuba amulandu naa akaambo buyo kakuti wakeelede kuubeleka mulimo. Muciindi caboobo, wakali kubayanda bantu, alimwi buumi bwabo bwakali kuyandika kapati kulinguwe. (1Kor. 9:19-23) Mbubwenya buyo, andiswe tweelede kusolekesya kububona mbwabubona buumi Leza. Jehova “uyanda kuti boonse bakonzye kweempwa.” (2Pet. 3:9) Sena andinywe mbomulimvwa oobo? Mulakonzya kujana kuti kuba aluse mumoyo wanu kuyoomukulwaizya kuyungizya busungu bwanu mumulimo wamumuunda akumupa kujana lukkomano lunji ciindi nomucita boobo.

12. Ino nkaambo nzi kukwabilila ntenda ncokuyandika kapati kubantu ba Leza?

¹² Alimwi buumi tulabubona mbuli mbwabubona Jehova kwiinda mukubikkila maano kukukwabilila ntenda. Tweelede kubikkila maano notweenzya mootokala anotubeleka, anoliba leelyo notuyaka, notubambulula naa notuunka kumasena aakukombela. Tatweelede kubikka buumi muntenda akaambo buyo kakuyanda kucita mulimo mupati, kuyanda kujana mali manji, naa akaambo kakuti mulimo wamuka. Leza wesu wabululami lyoonse ucita zintu ziluzi alimwi izyeelela. Tuyanda kuba mbuli nguwe. Ikapati baalu beelede kupakamana kulikwabilila lwabo beni alimwi akukwabilila baabo mbobabeleka limwi. (Tus. 22:3) Aboobo, ikuti mwaalu wamuyeezya kujatikizya milawo azyeelelo zyakukwabilila ntenda, amulutambule lulayo lwakwe. (Gal. 6:1) Buumi amububone mbuli mbwabubona Jehova eelyo “tamukabi amulandu wabulowa.”

13, 14. Ino mbuti bapati bamu Israyeli mbobakali kukonzya kutondezya bululami bwa Jehova?

¹³ Jehova wakaambila bapati bamu Israyeli kuti kabaiya zyeelelo zyakwe zisumpukide zyabululami. Cakusaanguna, bapati bakeelede kujana twaambo twamasimpe. Kuyungizya waawo, ciindi nobakali kuyanda kusala naa weelede kufwidwa luse sikujaya muntu cakutazyiba, bakeelede kwaalanga-langa makanze aakwe cakulomya akuzyiba mbwaakali kupona kaindi. Kutegwa batondezye bululami bwa Leza, bakeelede kusinizya naa sikujaya muntu wakacita oobo “akaambo kakumusulaika” alimwi “cakumuyubilila.” (Amubale Myeelwe 35:20-24.) Ikuti naa kwayandika bakamboni kumulandu ooyo, kwakeelede kuba bakamboni bataleli aali bobilo balo ibakeelede kupa bumboni bwakuti ooyo muntu wakajaya muntu acaali.—My. 35:30.

¹⁴ Aboobo, bamana kujana twaambo twamasimpe kumulandu ooyo, bapati bakeelede kumulanga-langa muntu ooyo, kutali buyo ncaakacita. Bakali kuyandika busongo, ikucikonzya kubona twaambo ituli kunsi, ikutali buyo atala-tala mpoonya akujana masimpe. Kwiinda zyoonse, bakali kuyandika muuya uusalala wa Leza, walo iwakali kukonzya kubagwasya kutondezya busongo bwakwe, luse alimwi abululami bwakwe.—Kul. 34:6, 7.

15. Amupandulule kwiindana kwakaliko akati ka Jesu aba Farisi kujatikizya mbobakali kubabona basizibi.

¹⁵ Ba Farisi bakali kubikkila buyo maano ali ceeco sizibi ncaacita muciindi cakubikkila maano kumoyo wasizibi. Ciindi ba Farisi nobakabona Jesu kali kupobwe aŋanda ya Matayo, bakabuzya basikwiiya bakwe kuti: “Ino nkaambo nzi mwiiyi wanu ncalida antoomwe abasimutelo alimwi abasizibi?” Jesu wakaingula kuti: “Bantu bataciswi tabayandiki musilisi, pele aabo baciswa mbabayandika  musilisi. Aboobo kamuya mukaiye ncaamba majwi aaya aakuti: ‘Ndiyanda luse kutali cipaizyo.’ Nkaambo ndakaboolela kwiita basizibi ikutali bantu baluleme.” (Mt. 9:9-13) Sena Jesu wakali kuubya-ubya kucita cibi cipati? Peepe. Mubwini, mulumbe mupati wa Jesu wakali kubikkilizya akukulwaizya kweempwa kuzibi. (Mt. 4:17) Nokuba boobo, Jesu cabusongo wakazyiba kuti bamwi akati ‘kabasimutelo alimwi abasizibi’ bakali kuyanda kucinca. Tiibakali kuŋanda ya Matayo akaambo buyo kakuyanda kulya. Muciindi caboobo, “kwakali banji akati kabo ibakali kumutobela [Jesu].” (Mk. 2:15) Cuusisya ncakuti, bunji bwaba Farisi bakaalilwa kubona ncaakabona Jesu mubantu ibali boobo. Mukwiimpana a Leza wabululami alimwi siluse walo ngobakali kulitamizya kuti ngobakomba, ba Farisi bakali kwaamba bantunyina kuti mbaasizibi, akubaamba kuti tabakonzyi kubambululwa.

16. Ino ncinzi kkomiti yalubeta ncoyeelede kubikkila maano kapati?

¹⁶ Baalu mazuba aano beelede kubona masimpe kuti bamwiiya Jehova, walo “uyandisya bululami.” (Int. 37:28) Kusaanguna, beelede “kuvwuntauzya akubuzya-buzya kabotu-kabotu” kutegwa bazyibe naa cibi cakacitwa. Ikuti cakacitwa, nkokuti mulandu bayakuulanga-langa kweelana amalailile aamu Magwalo. (Dt. 13:12-14) Ciindi baalu nobasalwa kuba mukkomiti yalubeta, cakulomya beelede kubona naa Munakristo wakacita cibi cipati weempwa. Talili lyoonse nocili cuuba-uba kuzyiba kuti muntu weempwa naa pe. Kweempwa kulabikkilizya mbwacibona muntu ooyo cibi ncaakacita, alimwi anzyayeeya mumoyo wakwe. (Ciy. 3:3) Kutegwa sizibi afwidwe luse weelede kweempwa. *

17, 18. Ino mbuti baalu mbobakonzya kuzyiba kweempwa ikuzwa ansi aamoyo? (Amubone cifwanikiso icili kumatalikilo aacibalo.)

¹⁷ Mukwiimpana a Jehova alimwi a Jesu, baalu tabakonzyi kuzyiba cili mumoyo wamuntu. Aboobo, ikuti naa muli baalu, mbuti mbomukonzya kuzunda buyumuyumu bwakuzyiba kweempwa ikuzwa ansi aamoyo? Cakusaanguna, amupaile kulomba busongo akumvwisya. (1Bam. 3:9) Cabili, amuvwuntauzye mu Jwi lya Leza amumabbuku aazwa kumuzike uusyomeka kutegwa amugwasye kwaandaanya “kuusa kwanyika” ‘kukuusa kweendelana akuyanda kwa Leza,’ kweempwa kwini-kwini. (2Kor. 7:10, 11) Amubone Magwalo mbwaatondezya boonse bobilo, aabo ibeempwa alimwi abaabo ibateempwi. Ino Bbaibbele lipandulula buti kujatikizya mbobalimvwa, muuya ngobajisi alimwi akulilemeka kwabo?

¹⁸ Camamanino, amubikkile maano kumulanga-langa muntu ooyo kumugama. Amubikkile maano kubukkale bwasizibi bwakaindi, makanze aakwe alimwi akulezya kwakwe. Kujatikizya mutwe wambungano ya Bunakristo, Jesu, Bbaibbele lyakasinsima kuti: “Takabeteki kweelana azintu nzyaabona buyo ameso aakwe, nokuba kusinsa kweelana azintu nzyaamvwa buyo amatwi aakwe. Bantu bapengede uyoobabeteka cakutasalulula, alimwi uyoosinsa bantu cabululami kuti agwasye babombe myoyo bamunyika.” (Is. 11:3, 4) Nobaalu muli beembezi basalidwe a Jesu, alimwi uyoomugwasya kubeteka kamuli babetesi. (Mt. 18:18-20) Sena tatulumbi kuti tulijisi baalu ibatulanganya? Eelo kaka tulabalumba akaambo kakubeleka canguzu kapati mukutondezya luse abululami mumbungano zyesu!

19. Ino nciiyo nzi ncomwaiya kuzwa kuminzi yamayubilo ncomuyanda kubelesya?

¹⁹ Mulawo wa Musa wakatondezya “zintu ziyandika kujatikizya luzyibo akasimpe” kajatikizya Jehova anjiisyo zyakwe ziluleme. (Rom. 2:20) Mucikozyanyo, minzi yamayubilo iyiisya baalu ‘kubeteka cabululami bwini-bwini,’ alimwi iyiisya ndiswe toonse ‘kuba aluyando lutamani alimwi aluse kuli umwi amweenzinyina.’ (Zek. 7:9) Tatucili ansi aa Mulawo. Nokuba boobo, Jehova tacinci, alimwi ibube bwakwe bwabululami aluse buciyandika kapati kulinguwe. Eelo kaka ncoolwe cipati kukomba Leza iwakatulenga mucinkozya cakwe, uujisi bube mbotukonzya kwiiya, alimwi mulinguwe tulakonzya kujana mayubilo!