1. Ino kwiimba kutupa kucita nzi?

MULEMBI wanyimbo umwi uujisi mpuwo wakaamba kuti: “Ciindi nomumvwa majwi, cimupa kuyeeya. Ciindi nomumvwa kulila kwanyimbo, cimupa kulimvwa munzila imwi. Pele ciindi nomwiimba, majwi alamunjila mumoyo.” Sena kuli mizeezo mibotu iitupa kulimvwa kabotu kwiinda mbotulimvwa ciindi notutembaula akutondezya luyando kuli Taateesu wakujulu, Jehova? Nkekaambo kaako tacigambyi kuti kwiimba ncibeela ciyandika kapati mubukombi busalala, kufwumbwa naa tuli tolikke ciindi notwiimba naa twiimbila antoomwe ambungano yabantu ba Leza.

2, 3. (a) Mbuti bamwi mbobakonzya kulimvwa kujatikizya kwiimba cakupozya ambungano? (b) Ino mibuzyo nzi njotutiilange-lange?

² Aboobo, ino mulimvwa buti kujatikizya kwiimbila antoomwe ambungano cakupozya? Sena mulamvwa nsoni? Mumasena amwi, baalumi tabalimvwi kwaanguluka kwiimba mubuleya. Kuzilanga boobu zintu kulakonzya kwiijatikizya mbungano yoonse, ikapati kuti aabo basololela bapa twaambo twakulitamizya itubapa kuti batatoli lubazu naa kucita milimo imwi ciindi mbungano yoonse noyiimba.—Int. 30:12.

 ³ Ikuti masimpe kwiimba katukubona kuti kulayandika akaambo kakuti ncibeela cabukombi bwesu, nkokuti tatukazwi anze naa kutajanika kucibeela eeci capulogilamu yamuswaangano. Aboobo, umwi aumwi wesu weelede kulibuzya kuti: ‘Ino ndikubona buti kwiimba kumiswaangano yesu yakukomba? Ino inga ndakuzunda buti kuyoowa kuli koonse ikukonzya kundilesya kwiimba cakukondwa? Alimwi ncinzi ncondikonzya kucita kutegwa ndiimbe camoyo woonse kweelana amulumbe uuli munyimbo nzyotwiimba?’

4, 5. Ino bubambe bwakwiimba mubukombi bwakali bupati buti mu Israyeli yansiku?

⁴ Kuzwa kaindi bakombi ba Jehova basyomeka bali kubelesya nyimbo kutegwa bamutembaule Jehova. Kaambo nkotweelede kubikkila maano nkakuti, ciindi bana Israyeli bansiku nobakali kubelekela Jehova cakusyomeka, kwiimba cakali cibeela ciyandika kapati mubukombi bwabo. Mucikozyanyo, nobakali kulibambila kukomba atempele, Mwami Davida wakabunganya bana Levi bali 4,000 kutegwa baimbe nyimbo zyakutembaula. Akati kabo, ibali 288 ‘bakaliyiisyidwe kwiimbila Jehova, boonse bakalicibwene.’—1Mak. 23:5; 25:7.

⁵ Ciindi noyakali kwaabwa tempele, ikwiimba kwakajisi mulimo mupati. Cibalo citwaambila kuti: “Aciindi eeco basikulizya myeembo abasikwiimba nobakaimbila caantoomwe mukutembaula akulumba Jehova, alimwi nokwakamvwugwa kulila kwamyeembo, miyuwa, azibelesyo zimbi zyakwiimbya nobakali kutembaula Jehova, . . . bulemu bwa Jehova bwakazuzya ŋanda ya Leza mwini-mwini.” Eelo kaka eeco icakacitika cakali kuyumya lusyomo!—2Mak. 5:13, 14; 7:6.

6. Amupandulule cibeela caalubazu cakwiimba ikwakacitika mubulelo bwa Nehemiya kali mweendelezi mu Jerusalemu.

⁶ Ciindi Nehemiya naakasololela bana Israyeli basyomeka mukuyakulula bulambo bwa Jerusalemu, wakabunganya aba Levi baimbi azibelesyo zyakwiimbya. Ciindi bwaanda ibwakayakululwa nobwakali kwaabwa, cibeela caalubazu cakwiimba cakagwasya kapati kuti kube kukondwa amuswaangano ooyu. Aciindi eeci, kwakali “nkamu zyobilo zipati zyabasikwiimba nyimbo zyakulumba.” Nkamu imwi aimwi yakali kweendela kulubazu lumbi, mpoonya zyakali kuswaanganina abwaanda buli afwaafwi abusena bwatempele kutegwa kwiimba akulila kwazibelesyo zyakwiimbya kukonzye kumvwugwa abantu bali kulamfwu. (Neh. 12:27, 28, 31, 38, 40, 43) Tacidoonekwi kuti Jehova wakakkomana kumvwa bakombi bakwe kabamutembaula munyimbo cabusungu.

7. Ino mbuti Jesu mbwaakakankaizya mbociyandika kwiimba mubukombi bwa Bunakristo?

⁷ Kuzwa noyakatalisyigwa mbungano ya Bunakristo, nyimbo zyazumanana kuba cibeela cabukombi bwakasimpe. Mubusiku buyandika kapati mubuumi bwabantu, Jesu wakabikkilizya akwiimba nyimbo nowakamana Mulalilo wa Mwami.—Amubale Matayo 26:30.

8. Mbuti Banakristo bamumwaanda wamyaka wakusaanguna mbobakapa cikozyanyo cibotu cakwiimba mubukombi?

⁸ Banakristo bamumwaanda wamyaka wakusaanguna balapa cikozyanyo cibotu cakutembaula Leza antoomwe munyimbo. Nokuba kuti kanji-kanji bakali kuswaanganina mumaanda aabantu, maanda mabotu aakukombela tanaakacesya busungu bwabo bwakwiimbila Jehova. Kwiinda mukusololelwa amuuya, mwaapostolo Paulo wakalailila Banakristonyina kuti: “Amuzumanane kuyiisyanya akukulwaizyanya antembauzyo, nyimbo zyakulumba Leza, nyimbo zyakumuuya ziimbwa cakulumba, ikwiimbila Jehova mumyoyo yanu.” (Kol. 3:16) Nyimbo izili mubbuku lyesu lyanyimbo mubwini ‘ninyimbo zyakumuuya izyeelede kwiimbwa cakulumba.’ Ncibeela cacakulya cakumuuya icipegwa ‘amuzike uusyomeka alimwi uucenjede.’—Mt. 24:45.

9. (a) Ino ncinzi cikonzya kupa kuti bamwi bataimbi cakukondwa lyamiswaangano yesu yambungano alimwi ayabbazu? (b) Ino mbuti mbotweelede kwiimbila Jehova ntembauzyo, alimwi ino mbaani beelede kuba ambele? (Amubone cifwanikiso icili kumatalikilo aacibalo.)

⁹ Ino mbuti kuti kwiimba kacitali cilengwa mumukwasyi wanu, naa mucilawo momukkala? Akaambo kakuyaambele mumakani aasayaansi mazuba aano, mulakonzya kukkomana kuswiilila kubaimbi bacibwene. Pele mulakonzya kufwa nsoni naa kutyompwa ciindi nomweezyanisya ijwi lyanu kumajwi aabaimbi bamunyika bacibwene. Nokuba boobo, eeco taceelede kunyonganya mukuli ngomujisi wakwiimbila Jehova ntembauzyo. Muciindi caboobo, amulijatile mujulu-julu bbuku lyanu lyanyimbo, amuunyamune mutwe, mpoonya amwiimbe camoyo woonse! (Ezr. 3:11; amubale Intembauzyo 147:1.) Mazuba aano, mu Maanda aa Bwami manji, majwi aanyimbo alatondezyegwa acipekupeku kumbele, calo cigwasya kwiimba cakupozya. Alimwi amubone kuti kwiimba nyimbo zya Bwami caba cibeela ca Cikolo Camulimo wa Bwami cabaalu. Eeci cikankaizya mbociyandika kubaalu kuba ambele mukwiimba mumbungano.

10. Ino ncinzi ncotweelede kuyeeya ikuti kuyoowa kakutupa kutaimba cakwaanguluka?

¹⁰ Kaambo kamwi ikapa kuti banji kabataimbi cakwaanguluka nkuyoowa. Ambweni bayoowa kuti jwi lyabo lilamvwika kwiinda majwi oonse naa andiza kwiimba cileya. Nokuba boobo, ncotweelede kuzyiba ncakuti ciindi notwaambaula, “toonse tulalubizya ziindi zinji.” (Jak. 3:2) Pele eeci tacitulesyi kwaambaula pe. Aboobo sena tweelede kucileka kutembaula Jehova munyimbo akaambo buyo kakuti ijwi lyesu talimvwiki kabotu?

11, 12. Ino ninzila nzi zimwi zikonzya kutugwasya kuyaambele mukwiimba kwesu?

¹¹ Ambweni tulayoowa kwiimba akaambo kakuti tatuzyi mbokwiimbwa. Pele tulakonzya kuyaambele mukwiimba kwesu kwiinda mukutobela nzila zimwi zitakatazyi. *

 ¹² Mulakonzya kwiiya kwiimba canguzu alimwi cakulimvwisya kwiinda mukuyoya kabotu. Mbubwenya mbuli magesi mbwaapa kuti gulobbu liyake, kuyoya kupa nguzu kujwi lyanu ciindi nomwaambaula naa nomwiimba. Mweelede kwiimba cakupozya mbubwenya mbuli mbomwaambaula naa kwiinda aawo. (Amubone nzila zimwi zijanika mubbuku lya Amugwasyigwe Alwiiyo Lujanwa mu Cikolo Camulimo Weendelezyegwa a Leza, mapeeji 181 kusika ku 184, ansi aakatwe kakuti “Amuyoye Kabotu.”) Mubwini, mumakani aakwiimba ntembauzyo, zimwi ziindi Magwalo aambila bakombi ba Jehova ‘koongolola cakukondwa.’—Int. 33:1-3.

13. Amupandulule mbotukonzya kuyaambele mukwiimba cakwaanguluka.

¹³ Ciindi cakukomba mumukwasyi naa noliba leelyo nomuli molikke, amusole kucita zintu izitobela: Amusale lwiimbo lumwi ndomuyandisya kapati mubbuku lyesu lyanyimbo. Amubale majwi aalwiimbo oolo cakupozya ajwi lyanguzu. Mpoonya, kakunyina kucinca-cinca jwi, amwaambe majwi oonse aali mumuzila omwe mulwiimbo kubelesya buyo muya ngomwakwela ciindi comwe. Kumane amwiimbe muzila woonse, kubelesya jwi libotu ndemunya eelyo. (Is. 24:14) Jwi lyanu nomwiimba lilazwa kabotu, lino eeco cilabota. Mutalekeli jwi lyanu kumuyoosya naa kumupa kufwa nsoni!

14. (a) Ino mbuti kujalula mulomo mbokukonzya kutugwasya kwiimba kabotu? (Amubone kabbokesi kakuti “ Mbomukonzya Kuyaambele Mukwiimba Kwanu.”) (b) Ino ninzila nzi nzyomwajana kuti zilagwasya kuzunda mapenzi aajwi litalimvwisyi kabotu?

¹⁴ Ijwi lyanu nomwiimba talikalimvwisyi kabotu ikuti kamutajaluli mulomo. Aboobo nzila aimwi iigwasya nkujalula mulomo wanu kwiinda mbomuujalula nomwaambaula. Ino ncinzi ncomweelede kucita kuti mulimvwa kuti ijwi lyanu talijisi nguzu naa ambweni lili mujulu kapati? Mulakonzya kujana nzila zigwasya kujatikizya mapenzi aaya mubbuku lya Amugwasyigwe Alwiiyo Lujanwa mu Cikolo Camulimo Weendelezyegwa a Leza, apeeji 184, mukabbokesi kakuti “Ikuzunda Mapenzi Aagaminide.”

15. (a) Ino ncakwaambilizya nzi icakapegwa kumuswaangano waamwaka wamu 2016? (b) Ino makanze nzi amwi aaliko kujatikizya bbuku lyanyimbo lipya?

¹⁵ Kwakali kusekelela kumuswaangano waamwaka  wamu 2016 wa Watch Tower Bible and Tract Society of Pennsylvania ciindi Mukwesu Stephen Lett wamu Kabunga Keendelezya naakaambilizya kuti ino-ino bbuku lyanyimbo lipya lijisi mutwe wakuti Amumwiimbile Jehova Cakukondwa linoobelesyegwa mumiswaangano. Mukwesu Lett wakapandulula kuti makanze amwi aakulembulula bbuku lyanyimbo ngakuswaanganya nyimbo a Bbaibbele lya Busanduluzi Bwanyika Mpya ilyakalembululwa. Kucita boobo cakali kwaamba kugusya naa kulembulula majwi aakajisi mabala aatacijaniki mu Bbaibbele lya Busanduluzi Bwanyika Mpya ilyakalembululwa mu 2013. Kuyungizya waawo, kwakabikkilizyigwa anyimbo zipya izyaamba mulimo wesu wakukambauka alimwi anyimbo izitondezya kulumba kwesu akaambo kacinunuzyo. Alimwi, akaambo kakuti kwiimba ncibeela cabukombi bwesu, bamu Kabunga Keendelezya bakali kuyanda kupanga bbuku libotu lyalo ilyeendelana civwumbyo a Bbaibbele lya Busanduluzi Bwanyika Mpya ilyakalembululwa.

16, 17. Ino nkucinca kuli buti kwakacitwa mubbuku lyanyimbo lipya?

¹⁶ Kutegwa kacitakatazyi kulibelesya bbuku lyanyimbo lya Amumwiimbile Jehova Cakukondwa, nyimbo zilitobelene kweelana ancozyaamba. Mucikozyanyo, nyimbo zyakusaanguna izili 12 zyaamba kujatikizya Jehova, mpoonya zitobela izili 8 zyaamba kujatikizya Jesu acinunuzyo, mpoonya mulongo kuyaabuya. Kuli mulongo wamitwe yazibalo walo uunoogwasya, mucikozyanyo ciindi nomusala lwiimbo lwakubelesya mumakani aabuleya.

¹⁷ Kutegwa boonse baimbe kuzwa ansi aamoyo, majwi amwi akalembululwa kutegwa twaambo katulimvwisya alimwi imajwi aatabelesyegwi-belesyegwi akagusyigwa. Kucincwa kwamutwe wamakani walwiimbo lwakuti “Bamba Moyo Wako” kuti ube “Atukwabilile Myoyo Yesu” kwakali kweelela kapati. Ino nkaambo nzi? Akaambo kakuti kaindi ikuti muntu kaimba majwi aakali mulwiimbo oolu, wakali kwaambila bamwi cakucita. Lino eeci cilakonzya kupa kuti batalimvwi kabotu ibapya, ibatondezya luyandisisyo, bakubusi, alimwi abacizyi balo ibajanika kumiswaangano yesu yambungano, yabbazu, ayacooko. Aboobo mutwe wamakani alimwi amajwi zyakacincwa.

18. Ino nkaambo nzi ncotweelede kuzizyiba kabotu nyimbo mubbuku lyesu lyanyimbo lipya? (Amubone bupanduluzi buyungizyidwe.)

¹⁸ Bunji bwanyimbo izili mubbuku lya Amwiimbile Jehova Cakukondwa zili mbuli mupailo. Kwiinda munyimbo eezyi, mulakonzya kutondezya bwini mbomulimvwa kuli Jehova. Nyimbo zimwi ziyootugwasya ‘kukulwaizyanya kutondezya luyando akucita milimo mibotu.’ (Heb. 10:24) Tacidoonekwi kuti tuyanda kuzizyiba kabotu nyimbo zyesu, matyuni, mbozilila alimwi amajwi. Mulakonzya kucita oobo kwiinda mukuswiilila nyimbo zyamajwi iziliko a jw.org. Kwiinda mukwiimba nyimbo eezyi kuŋanda, mulakonzya kuzizyiba akuziimba cakwaanguluka alimwi camoyo woonse. *

19. Ino mbuti boonse ibali mumbungano mbobakonzya kutola lubazu mukukomba Jehova?

¹⁹ Amuyeeye kuti kwiimba ncibeela ciyandika kapati cabukombi bwesu. Ninzila yiinda kubota yakutondezya luyando lwesu akulumba kwesu kuli Jehova. (Amubale Isaya 12:5.) Ciindi nomwiimba cakukondwa, mulabakulwaizya abamwi kwiimba cakwaanguluka. Mubwini boonse mumbungano—bana, bapati, alimwi abapya—balakonzya kusangana mucibeela eeci cakukomba Jehova. Aboobo mutayoowi kwiimba cakwaanguluka. Muciindi caboobo, amutobele busolozi buli ku intembauzyo yakasololelwa amuuya yakuti: “Amumwiimbile Jehova!” Inzya, amwiimbe cakukondwa!—Int. 96:1.