JESU wakaamba kuti: “Kupa kulakkomanisya kapati kwiinda kupegwa.” (Mil. 20:35) Kaambo kamasimpe aaka kalabeleka akucilongwe cesu a Jehova. Mubuti? Jehova wakatupa zipego zinji izitukkomanisya, pele tulakonzya kukkomana kapati kwiinda mukumupa cipego Jehova. Ino ncipego nzi ncotukonzya kumupa Jehova? Lugwalo lwa Tusimpi 3:9 lwaamba kuti: “Kolemeka Jehova azintu zyako ziyandisi.” ‘Zintu zyesu ziyandisi’ zibikkilizya ciindi, busongo, nguzu, alimwi alubono lwesu. Ciindi notubelesya zintu eezyi kusumpula bukombi bwakasimpe, tupa Jehova cipego, alimwi kucita boobo kutuletela lukkomano lunji.

Kujatikizya lubono lwesu, ncinzi cikonzya kutugwasya kutegwa tutanoolubi kupa Jehova cipego? Mwaapostolo Paulo wakaambila bana Korinto ‘kubikka cimwi cintu ambali’ kacili cakusanga. (1Kor. 16:2) Ncinzi ncomukonzya kucita ikuti kamuyanda kuzyiba zinji kujatikizya nzila zyakusanga iziliko kubusena nkomuzwa? Amubone kabbokesi ikali aansi aawa.

Bubambe bwakusanga kubelesya intaneti tabuko mumasi aamwi. Nokuba boobo, makani aajatikizya nzila zimwi zikonzya kubelesyegwa alakonzya kujanwa aacibeela caamba zyakusanga awebbusaiti ya jw.org. Mumasi aamwi, kwakabikkwa makani aawebbusaiti eeyi aapa bwiinguzi kumibuzyo iivwula kubuzyigwa kujatikizya zyakusanga.