Sena Muyeeya Mbuli Mbwayeeya Jehova?
“Amusandulwe kwiinda mukucinca mizeezo yanu.”—ROM. 12:2.
1, 2. Mbotuyaabukomena kumuuya, ncinzi ncotwiiya? Amupe cikozyanyo.
AMWEEZYEEZYE kuti mwana muniini watambula cipego. Mpoonya bazyali bakwe bamwaambila kuti, “Kwaamba kuti ndalumba.” Mwana wacita ncobamwaambila, pele wacita oobo cakusinikizyigwa. Mbwayaabukomena, watalika kubona kaambo bazyali bakwe ncobakamwaambila kuti cilayandika kapati kubalumba bamwi akaambo kaluzyalo ndobatondezya. Lino ulalumba kapati kuzwa ansi aamoyo. Nkaambo nzi? Akaambo kakuti ulamvwisya ncocaamba kulumba.
2 Mbubwenya buyo, notukazyiba kasimpe ciindi cakusaanguna, tulazyiba mbociyandika kumvwida zyeelelo zya Jehova. Pele mbotuyaabukomena kumuuya, tulaiya zinji kujatikizya mizeezo ya Jehova, nkokuti nzyayanda, nzyatayandi alimwi ambwazibona zintu mumakani aaindene-indene. Kwiinda mukwiiya kubona zintu mbuli mbwazibona alimwi akuzumizya kuyeeya kuli boobu kweendelezya nzyotucita alimwi anzyotusala, tutondezya kuti tuyeeya mbuli mbwayeeya Jehova.
3. Nkaambo nzi ncocitali cuuba-uba kutalika kuyeeya mbuli mbwayeeya Jehova?
3 Nokuba kuti kwiiya kubona zintu mbuli mbwazibona Jehova cilakkomanisya, pele tacili cuuba-uba. Zimwi ziindi, kutalondoka kwesu kulakonzya kupa kuti citukatazye kucita boobo. Mucikozyanyo, ambweni inga catukatazya kumvwisya mbwakubona Jehova kusalala mukulilemeka, kuyandisya zintu zyakumubili, mulimo wakukambauka, kutabubelesya kabotu bulowa naa zintu zimwi buyo. Ino ncinzi ncotukonzya kucita? Mbuti mbotukonzya kuzumanana kuyaambele kuyeeya mbuli mbwayeeya Leza? Alimwi ino mbuti kucita boobo mbokweelede kuzijatikizya zintu nzyotucita lino alimwi akumbele?
MBOTUKONZYA KUTALIKA KUYEEYA MBULI MBWAYEEYA JEHOVA
4. Ino nzintu nzi zibikkilizyidwe mumajwi aa Paulo aakuti: ‘Kucinca mizeezo yesu’?
4 Amubale Baroma 12:2. Mwaapostolo Paulo aawa waamba zintu zibikkilizyidwe mukwiiya kuyeeya mbuli mbwayeeya Jehova. Cibalo cainda cakatugwasya kuzyiba kuti, kutegwa ‘tuleke kutobela ziyanza zyabweende bwazintu obuno,’ tweelede kukaka kusanina mizeezo yesu azintu zyamunyika. Pele alimwi Paulo wakaamba mbociyandika kulindiswe ‘kucinca mizeezo yesu.’ Eeci cibikkilizya kubala Jwi lya Leza katujisi makanze aakumvwisya mizeezo yakwe, kuzinzibala kuyeeya alinjiyo alimwi akuyeeya mbuli mbwayeeya.
5. Amupandulule lwiindano luliko akati kakubala buyo cakwiinzya mulawo alimwi akwiiya.
5 Kwiiya takuli kubala cakwiinzya buyo mulawo alimwi tacaambi kwiile buyo kweenga bwiinguzi bwamibuzyo iibuzyigwa. Ciindi notubala, tulalanga-langa makani aayo ncaatwaambila kujatikizya Jehova, nzila zyakwe, alimwi ambwayeeya. Tulasoleka kumvwisya kaambo Leza ncatuzumizya kucita cintu cimwi alimwi ancatatuzumizyi kucita cintu cimwi. Alimwi tulabikkila maano kujatikizya kucinca nkotweelede kucita mubuumi bwesu alimwi amumizeezo yesu. Nokuba boobo, talili lyoonse notukonzya kuzinzibala kuyeeya twaambo toonse ootu ciindi cili coonse notubala. Pele cilayandika kapati kujana ciindi, ambweni cisela caciindi ncotubala, kuzinzibala kuyeeya nzyotwabala.—Int. 119:97; 1Tim. 4:15.
6. Ncinzi cicitika notuzinzibala kuyeeya mbwayeeya Jehova?
6 Notuzinzibala kuyeeya Jwi lya Leza, lyoonse kulacitika cintu cimwi cikkomanisya kapati. ‘Tulazyiba,’ inzya, tulamvwisya kuti kuyeeya kwa Jehova kulilondokede. Tulatalika kubona zintu mbuli mbwazibona walo, alimwi tulazizumina. Mizeezo yesu ‘ilacinca,’ aboobo tulacinca mbotuyeeya. Asyoonto-syoonto, tulatalika kuyeeya mbuli mbwayeeya Jehova.
MIZEEZO YESU ILAZYIJATIKIZYA ZINTU NZYOTUCITA
7, 8. (a) Ino Jehova uzibona buti zintu zyakumubili? (Amubone zifwanikiso izili kumatalikilo aacibalo.) (b) Ikuti katuyeeya mbuli mbwayeeya Jehova, ncinzi lyoonse ncotunoobikka mubusena bwakusaanguna?
7 Mizeezo yesu taijatikizyi buyo mbotulimvwa pele ilajatikizya azintu nzyotucita. (Mk. 7:21-23; Jak. 2:17) Atulange-lange zikozyanyo zisyoonto kutegwa tukamvwisye kaambo aaka. Mucikozyanyo, Makani Mabotu alatondezya kabotu-kabotu mbwayeeya Jehova kujatikizya zintu zyakumubili. Leza wakasala bazyali bantunsi ibakali kuyookomezya Mwanaakwe, nkokuti banabukwetene ibatakajisi zintu zinji zyakumubili. (Lev. 12:8; Lk. 2:24) Naakatumbukwa Jesu, Mariya “wakamuvwungaila muzisani akumulazika mucilido cabanyama nkaambo tiibakajana busena muŋanda yabeenzu.” (Lk. 2:7) Kuti Jehova naakayanda, naakabelesya nzila zili zyoonse kutegwa Mwanaakwe azyalilwe mubusena buli kabotu. Nokuba boobo, ncaakabikkila maano kapati, mbukkale bwakumuuya mwalo Jesu mwakali kuyookomenena alimwi akulanganizyigwa kabotu.
8 Mucibalo eeci camu Bbaibbele icijatikizya kuzyalwa kwa Jesu, tulakonzya kuzyiba mbwazibona zintu zyakumubili Jehova. Bazyali bamwi bayanda kuti bana babo kabajisi zintu zyakumubili zibotu kapati, nokuba kuti eeco cipa kuti cilongwe cabana babo a Jehova cinyongane. Nokuba boobo, cilasalala kuti, Jehova ubona kuti cilongwe cesu anguwe nceciyandika kapati. Sena andinywe muyeeya mbuli mbwayeeya Jehova? Ino zintu nzyomucita zitondezya nzi?—Amubale Bahebrayo 13:5.
9, 10. Mbuti mbotukonzya kutondezya kuti tuyeeya mbuli mbwayeeya Jehova mumakani aakulebya bamwi?
9 Cikozyanyo cimbi cijatikizya Leza mbwakubona kulebya bamwi. Jesu wakaamba kuti: “Kufwumbwa uulebya umwi wabasyoonto aaba ibasyoma, inga cainda kubota ikuti munsingo waangililwa ziyo lizingulusyigwa ambongolo akuwaalwa mulwizi.” (Mk. 9:42) Majwi aaya atondezya kuti makani aaya mapati! Mbwaanga Jesu cakulondoka wakatondezya bube bwa Bausyi, tulakonzya kuzyiba kuti awalo Jehova mbwalimvwa mbubwenya oobu kujatikizya muntu uuli woonse uucita micito iilebya umwi wabasikutobela Jesu.—Joh. 14:9.
10 Sena andiswe kaambo aaka tukabona mbubwenya mbwakabona Jehova alimwi Jesu? Sena tuyeeya mbuli mbobayeeya? Ino zintu nzyotucita zitondezya nzi? Mucikozyanyo, amweezyeezye kuti kuli nsamino imwi naa kulibamba nkotukkomanina kwalo kukonzya kunyemya bamwi mumbungano naa ikukonzya kuleta mizeezo mibyaabi kuli bamwi. Sena luyando ndotujisi kubasyomima luyootugwasya kutatobela nzyotuyanda tobeni?—1Tim. 2:9, 10.
11, 12. Ino kubona zintu zibi mbuli mbwazibona Jehova alimwi akulijata kutukwabilila buti kukucita zintu zibyaabi?
11 Cikozyanyo catatu: Jehova ulakusulaika kutalulama. (Is. 61:8) Nokuba kuti ulizyi kuti tulijisi tumpenda tubyaabi akaambo kakuti twakakona kutalondoka, utukulwaizya kukusulaika kutalulama. (Amubale Intembauzyo 97:10.) Kuzinzibala kuyeeya kaambo Jehova ncabusulaika bubi kuyootugwasya kubona zintu mbuli mbwazibona, calo iciyootukulwaizya kukaka kucita zintu zibyaabi.
12 Kuti kutalulama katukubona mbuli mbwakubona Jehova, ciyootugwasya kubona micito imwi kuti tailuzi, nokuba kuti tayaambidwe cacigaminina mu Jwi lya Leza. Mucikozyanyo, kuzyana kutali kabotu kwaduma kapati munyika mazuba aano. Bamwi bapa twaambo twakulitamizya, kabayeeya kuti kucita boobu takuli koonana buya cacigaminina. * Pele sena micito iili boobu itondezya kuyeeya kwa Leza? Atwiitantamuke micito mibyaabi kwiinda mukulijata alimwi akusesemwa zintu nzyasulide Jehova.—Rom. 12:9.
AMUYEEYELE LIMWI LINO KUJATIKIZYA NCOMUYANDA KUYOOCITA KUMBELE
13. Nkaambo nzi ncotweelede kuyeeyela limwi kujatikizya mbwazibona zintu Jehova lino kutegwa tukasale cabusongo kumbele?
13 Ciindi notwiiya, inga cabota kulanga-langa mbwayeeya Jehova mubukkale motukonzya kuyoolijana kumbele. Kuti twacita oobo, twaakulijana mubukkale buyandika kusala cakufwambaana, tunoocizyi cakucita. (Tus. 22:3) Atulange-lange zikozyanyo zyamu Bbaibbele zimwi.
14. Ncinzi ncotwiiya kujatikizya Josefa mbwaakamwiingula mukaintu wa Potifara?
14 Kwiinda mukukaka cakufwambaana koongelezya kwamukaintu wa Potifara, Josefa watondezya kuti wakayeeyela limwi kujatikizya Jehova mbwaabona makani aakusyomeka mulukwatano. (Amubale Matalikilo 39:8, 9.) Kuyungizya waawo, bwiinguzi bwakwe kumukaintu wa Potifara bwakuti: “Ino inga ndacitila nzi cibi cipati cili boobu akubisizya Leza?” butondezya kuti wakalisalide kale kuyeeya mbuli mbwayeeya Leza. Mbuti kujatikizya ndiswe? Mbuti kuti mubelesima watalika kusobana nkwela andiswe? Mbuti kuti muntu umwi watutumina meseji naa cifwoto ciletela muzeezo wakoonana? * Inga cauba-uba kusala kusyomeka kuli Jehova ikuti naa twakasala kale kubona zintu mbuli mbwazibona walo mumakani aali boobu alimwi akuti naa twakasalila limwi ncotukonzya kucita.
15. Mbuti mbotukonzya kuzumanana kusyomeka kuli Jehova, mbubwenya mbobakacita bana Hebrayo botatwe?
15 Lino atulange-lange cikozyanyo cabana Hebrayo botatwe ba Sadirake, Mesaki a Abedinego. Kukaka kukomba cikozyanyo cangolida ncaakapanga Mwami Nebukadinezara alimwi abwiinguzi mbobakapa cakutainda mumbali kumwami zyakatondezya kuti bakayeeyela limwi kujatikizya ncobakeelede kucita kutegwa bazumanane kusyomeka kuli Jehova. (Kul. 20:4, 5; Dan. 3:4-6, 12, 16-18) Mbuti kuti mupati wamulimo wamwaambila kuti musange mali kujatikizya pobwe limwi iliswaangene abukombi bwakubeja? Ino ncinzi ncomukonzya kucita? Muciindi cakulindila kuti mane mukalijane mubukkale buli boobu, mbuti kuti mwayeeyela limwi lino kujatikizya mbwayeeya Jehova mumakani aali boobu? Kuti mwacita oobo, mwaakulijana mubukkale buli boobu, ciyoomuubaubila kucita alimwi akwaamba cintu ciluzi, mbubwenya mbobakacita bana Hebrayo botatwe.
Sena mwakavwuntauzya, kulemba pepa lyanu lijatikizya busilisi mbomuyanda, alimwi akubandika abasilisi? (Amubone muncali 16)
16. Mbuti kumvwisya kujatikizya mbwayeeya Jehova mbokutugwasya kulibambilila limwi katutanaciswa?
16 Kuyeeyela limwi kujatikizya mbociyandika kuzumanana kusyomeka kulakonzya kutugwasya ciindi notwaciswa kapati. Nokuba kuti tulikanzide kukaka kubikkwa bulowa naa zibeela zyone zipati-pati zyabulowa, kuli nzila zimwi izijatikizya bulowa muntu nzyeelede kulisalila kweelana anjiisyo zyamu Bbaibbele izitondezya mbwayeeya Jehova mumakani aaya. (Mil. 15:28, 29) Ndilili notweelede kusala cakucita? Sena tweelede kucita boobo ciindi notuli mucibbaddela, ambweni notumvwide kucisa alimwi notwaambilwa kusala cakufwambaana? Lino nceciindi cakuvwuntauzya, kulemba pepa lijatikizya kusala kwanu, alimwi akubandika abasilisi. *
17-19. Nkaambo nzi ncociyandika kapati kuzyiba mbwazibona Jehova zintu lino? Amupe cikozyanyo cabukkale motweelede kulibambilila limwi.
17 Camamanino, atulange-lange mbwaakaingula cakufwambaana Jesu kululayo lutali kabotu lwa Petro lwakuti: “Kolyeengelela Mwami.” Kweelede kuti Jesu wakayeeyela limwi kujatikizya ncaakali kuyanda Leza kulinguwe alimwi a Magwalo aakali kwaamba kujatikizya buumi alufwu lwakwe anyika. Luzyibo oolu lwakayumya makanze aakwe aakuzumanana kulyaaba cakusyomeka alimwi acakutazungaana.—Amubale Matayo 16:21-23.
18 Mazuba aano, Leza uyanda kuti bantu bakwe bayumye cilongwe anguwe alimwi akutola lubazu mumulimo wakwe kusikila mpobagolela. (Mt. 6:33; 28:19, 20; Jak. 4:8) Kweelana ambocakabede kuli Jesu, bantu ibalibonya mbuli kuti bajisi mizeezo iili kabotu balakonzya kusola kunyonganya makanze eesu aakucita boobo. Mucikozyanyo, mbuti kuti basikumulemba mulimo baamba kuti balamusumpula amulimo akumuyungizyila mali ngomuvwola pele kakuli kucita boobo kulakonzya kunyonganya milimo yanu yakumuuya? Ikuti kamuli basicikolo, mbuti kuti mwapegwa coolwe cakuti muzwe aŋanda akuunka kubusena bumbi kutegwa mukatambule lwiiyo luyungizyidwe. Mubukkale buli boobu, sena inga tiimwayandika kupaila akuvwuntauzya, kubuzya banamukwasyi alimwi ambweni abaalu, mpoonya akusala cakucita? Mbuti kuti mwazyibila limwi lino kujatikizya mbwayeeya Jehova mumakani aali boobu alimwi akuba amakanze aakutobela mizeezo yakwe? Kuti mwacita oobo, mwaakulijana mubukkale buli boobu, talikamubedi sunko pati kusala cakucita. Mwakalibikkila kale mbaakani zyanu zyakumuuya, mulikanzide mumoyo wanu kuzizuzikizya, cilikke cisyeede, nkucita buyo cintu ncomwakasala kale.
19 Ambweni mulakonzya kuyeeya bukkale bumbi bukonzya kuboola cakutayeeyela. Masimpe, tatukonzyi kulibambilila limwi zintu zyoonse zikonzya kutucitikila. Pele kuti katuzinzibala kuyeeya mbwayeeya Jehova lyaciiyo cesu tobeni, tuyooziyeeya nzyotwakaiya alimwi akuzibelesya mubukkale bumwi bukonzya kutusikila. Aboobo lino atube amakanze aakuzyiba mbwayeeya Jehova mumakani aamwi, kutalika kuyeeya mbuli mbwayeeya, alimwi akulanga-langa mbwazibona Leza zintu nzyotucita lino alimwi akumbele.
MIZEEZO YA JEHOVA ALIMWI ABUUMI BWANU BWAKUMBELE
20, 21. (a) Nkaambo nzi ncotuyookkomana alwaanguluko ilunooli ampolugolela munyika mpya? (b) Mbuti mbotukonzya kujana lukkomano lino?
20 Caluyandisisyo tulangila nyika mpya. Bunji bwesu tujisi bulangizi bwakuyoopona buumi butamani muparadaiso anyika. Mubweendelezi bwa Bwami, bantu bayakwaanguluka kumapenzi aaletwa abweende bwazintu oobu. Nokuba boobo, nokuba kuciindi eeco, bantu bayoozumanana kulisalila. Muntu uuli woonse uyoosala nzyayanda alimwi anzyalombozya.
21 Nokuba boobo, lwaanguluko luli boobu lunooli ampolugolela. Mumakani aajatikizya kusala cibi acibotu, babombe myoyo banoosololelwa amilawo ya Jehova alimwi akuyeeya kwakwe. Eeci ciyooleta lukkomano lunji alimwi aluumuno. (Int. 37:11) Calino, tulakonzya kuba alukkomano lino ciindi notuyeeya mbuli mbwayeeya Jehova.
^ munc. 12 Kuzyana kutali kabotu ikwaambwa aawa nkookuya sikuzyana nkwazyana kumwi katasamide kabotu, kakkede amaulu aamuntu umwi kumwi kalicumba-cumba munzila iiletela muzeezo wakoonana. Kweelana atwaambo tuliko itutondezya mbocakacitika, eeci cilakonzya kubusya muzeezo wakoonana calo cinga cayandika kuti kupangwe kkomiti yalubeta. Munakristo iwajatikizyigwa mubukkale oobu weelede kulomba lugwasyo kubaalu.—Jak. 5:14, 15.
^ munc. 14 Kutuminana mameseji, zifwoto, naa mavidiyo aaletela muzeezo wakoonana taciluzi pe. Kweelana atwaambo tuliko itutondezya mbocakacitika, cilakonzya kupa kuti kupangwe kkomiti yalubeta. Mubukkale bumwi, bakubusi ibakajatikizyigwa mumicito iili boobu bakapegwa mulandu amfwulumende iwakoonana munzila iiteelede. Kutegwa muzyibe zinji, amuunke aawebbusaiti ya jw.org akubala cibalo cakuti “Bakubusi Balabuzya—Ncinzi Ncondeelede Kuzyiba Kujatikizya Kutuminana Zifwanikiso Ziletela Muzeezo Wakoonana?” (Amubone zibeela zya NCOLIYIISYA BBAIBBELE > BAKUBUSI.) Naa mubone cibalo cakuti “Mbomukonzya Kubandika Amwanaanu Kujatikizya Kutuminana Zifwanikiso Ziletela Muzeezo Wakoonana” mu Sinsimuka! ya November 2013, peeji 4-5.
^ munc. 16 Njiisyo zyamu Bbaibbele iziyandika kapati nkozyili mumabbuku eesu. Mucikozyanyo, amubone bbuku lyakuti, Mbomukonzya Kukkala Muluyando lwa Leza, peeji 246-249.
