1-3. (a) Ino tweelede kulimvwa buti kujatikizya kasimpe kamu Bbaibbele? Amupe cikozyanyo. (Amubone zifwanikiso izili kumatalikilo aacibalo.) (b) Ino mibuzyo nzi njotutiilange-lange mucibalo eeci?

KUMASENA manji, cilidumide kujola cintu cakaulwa kale. Kweelana abuvwuntauzi bwakacitwa mumasi aamwi, basikuula balajola zintu zitandila ku 9 pesenti nzyobakaula muzintoolo. Kujatikizya zintu zyuulwa aa intaneti, kulibonya kuti zintu ziinda ku 30 pesenti zilajolwa. Ambweni basikuula tiibakacikkomanina, naa cakalinyongene cintu eeco. Aboobo bakayanda kucicinca naa kubajolela mali.

² Nokuba kuti inga twalomba kujolelwa mali eesu notuula zintu, tatukonzyi kujola, naa ‘kusambala,’ “luzyibo lwini-lwini lwakasimpe” kamu Bbaibbele ‘nkotwakaula.’ (Amubale Tusimpi 23:23; 1Tim. 2:4) Mbubwenya mbotwakabona mucibalo cainda, twakaula kasimpe kwiinda mukubelesya ciindi cesu kukaiya. Kuyungizya waawo, kutegwa tuule kasimpe, andiza twakaleka mulimo waatala, naa twakatalika kucinca mbotuyeeya ambotulilemeka mukwiimpana abalongwe besu alimwi abanamukwasyi. Nokuba boobo, muulo ngotwakabbadela musyoonto kuweezyanisya azilongezyo nzyotwakajana.

 ³ Caboola kumakani aajatikizya kasimpe kamu Bbaibbele, tulimvwa mbwaakalimvwa mwaalumi ngwaakaamba Jesu mucikozyanyo cimwi cifwaafwi. Kutondezya mbokayandika kasimpe ka Bwami bwa Leza kulibaabo ibakajana, Jesu wakaamba zyamusambazi weendeenda iwakali kuyandaula ngale zibotu kusikila mane wajana ngale yomwe. Ngale eeyo yakali kuyandika kapati cakuti ‘wakasambala cakufwambaana’ zyoonse nzyaakajisi akuyuula. (Mt. 13:45, 46) Mbubwenya buyo, kasimpe nkotwakajana, nkokuti kasimpe kajatikizya Bwami bwa Leza, alimwi akasimpe kayandisi nkotwakaiya mu Jwi lya Leza, kalayandika kapati kulindiswe cakuti twakalisungula cakufwambaana kucita nzyotwakacita kutegwa tube ankako. Kufwumbwa buyo kuti katukayandisya kasimpe, ‘tatukakasambali pe.’ Pele cilausisya kuti bantu ba Leza bamwi, baleka kukayanda kasimpe nkobakajana, mane buya bakasambala. Akaka eeco citakacitiki kulindiswe! Kutondezya kuti tulakayandisya kasimpe akuti tatukonzyi kukasambala, tweelede kulutobela lulayo lwamu Bbaibbele ‘lwakuzumanana kweenda mukasimpe.’ (Amubale 3 Johane 2-4.) Kweenda mukasimpe kubikkilizya kupona kweelana akasimpe, nkokuti kusaanguna kuyandisya kasimpe alimwi akulilemeka kweelana ankako. Atulange-lange mibuzyo eeyi: Nkaambo nzi alimwi mbuti bamwi ‘mbobakasambala’ kasimpe? Ncinzi ncotweelede kucita kutegwa tutakasambali kasimpe? Mbuti mbotukonzya kuyumya makanze eesu ‘aakuzumanana kweenda mukasimpe’?

4. Mumwaanda wamyaka wakusaanguna, nkaambo nzi bamwi ‘ncobakakasambala’ kasimpe?

⁴ Mumwaanda wamyaka wakusaanguna, bamwi ibakazizumina njiisyo zya Jesu bakaalilwa kuzumanana kweenda mukasimpe. Mucikozyanyo, Jesu naakamana kusanina nkamu mpati yabantu munzila yamaleele, nkamu eeyi yakamutobela kulubazu lumwi lwa Lwizi lwa Galilaya. Okuya, Jesu wakaamba cintu cakabagambya kapati, wakati: “Ccita kuti mwalya mubili wa Mwanaamuntu akunywa bulowa bwakwe, munyina buumi mulindinywe.” Muciindi cakumulomba Jesu kuti apandulule ncaakali kwaamba, bakatyompwa amajwi aakwe akwaamba kuti: “Makani aaya ayumya mate; nguni uunga waaswiilila?” Akaambo kaceeci, “basikwiiya bakwe banji bakapilukila kuzintu zyamunyika nzyobakasiide alimwi tiibakacili kweenda limbi anguwe.”—Joh. 6:53-66.

5, 6. (a) Mazuba aano, nkaambo nzi bamwi ncobaalilwa kukakatila kukasimpe? (b) Ino mbuti umwi mbwakonzya kuzwa mukasimpe asyoonto-syoonto?

⁵ Cuusisya ncakuti, ibamwi mazuba aano baalilwa kukakatila kukasimpe. Bamwi bakatyompwa akaambo kakucinca kwakabako kujatikizya mbotumvwisya cibalo cimwi camu Bbaibbele naa akaambo kamajwi naa ncaakacita mukwesu umwi uulaampuwo. Bambi bakafwumpuzyigwa akaambo kalulayo lwamu Magwalo ndobakapegwa, naa bakacileka kukakatila kukasimpe akaambo kakuti bakaimpana a Munakristonyina. Ibamwi bakamvwida basiluleyo abasikukazya bamwi ibakaamba zyakubeja kujatikizya nzyotusyoma. Akaambo kaceeci, bamwi bakatalika “kulizandula” acaali kuli Jehova akumbungano. (Heb. 3:12-14) Eelo kaka nicakabota nibakazumanana kumusyoma Jesu mbubwenya mbwaakacita mwaapostolo Petro! Jesu naakababuzya baapostolo bakwe naa abalo bakali kuyanda kuunka, cakufwambaana Petro wakaingula kuti: “Mwami, ino inga twaunka kuli ni? Yebo ujisi majwi aapa buumi butamani.”—Joh. 6:67-69.

⁶ Ibamwi bakatalika kuzwa mukasimpe asyoonto-syoonto, andiza kabatabwene  acakali kucitika. Muntu uuzwa mukasimpe asyoonto-syoonto uli mbuli bwato buyaabusweeka. Bbaibbele lyaamba muntu uuli boobu kuti ‘uyaabuunkilila akusweeka.’ (Heb. 2:1) Mukwiimpana amuntu uulizandula mukasimpe acaali, ooyo uuyaabuunkilila akusweeka walo tacitili caali. Nokuba boobo, muntu uuli boobu unyonganya cilongwe cakwe a Jehova alimwi uli muntenda yakusweekelwa cilongwe eeci. Ino inga twayeeleba buti ntenda eeyi?

7. Nintaamu nzi yakusaanguna iikonzya kutugwasya kutasambala kasimpe?

⁷ Kutegwa tweende mukasimpe, tweelede kuzumina akumvwida majwi aa Jehova oonse. Kasimpe keelede kuba mubusena bwakusaanguna mubuumi bwesu alimwi akupona kweelana anjiisyo zyamu Bbaibbele. Mumupailo kuli Jehova, Mwami Davida wakaamba kuti: “Mebo ndinakweenda mukasimpe kako.” (Int. 86:11) Davida wakajisi makanze. Andiswe tweelede kuba amakanze aakuzumanana kweenda mukasimpe ka Leza. Ikuti katutajisi makanze, tulakonzya kutalika kuyeeya zintu nzyotwakabbadela kutegwa tube akasimpe alimwi akusunkwa kujokela kuzintu eezyo. Muciindi caboobo, tulakakatila kukasimpe koonse. Tulizyi kuti tatukonzyi kusala twaambo twakasimpe tumwi akusiya tumwi. Kayi, tweelede kweenda ‘mukasimpe koonse.’ (Joh. 16:13) Atulange-lange zintu zyosanwe andiza nzyotwakabbadela kutegwa tujane kasimpe. Kucita boobo kuyootugwasya kuba amakanze aakutajokela kuzintu nzyotwakabbadela.—Mt. 6:19.

8. Ino kutacibelesya kabotu ciindi inga capa buti kuti umwi aunkilile akusweeka kukasimpe? Amupe cikozyanyo.

⁸ Ciindi. Kutegwa tutaunkilili akusweeka kukasimpe, tweelede kucibelesya kabotu ciindi cesu. Ikuti katutabikkili maano, tulakonzya kubelesya ciindi cinji kuzyakulikondelezya, kucita zintu nzyotuyandisya, kubelesya intaneti, naa kweebelela TV. Nokuba kuti zintu eezyi tazilubide, ciindi ncotubelesya kulinzizyo cilakonzya kuba nceciindi ncotwakali kubelesya kucita ciiyo cesu tobeni alimwi akucita zintu zimwi zyakumuuya. Amubone cakacitikila mucizyi umwi wazina lyakuti Emma. * Kuzwa kubwana, mucizyi ooyu wakali kwaayanda mabbiza. Lyoonse ajana ciindi, wakali kuunka kuyootanta mabbiza. Kalitanalampa, wakatalika kulimvwa bubi akaambo kaciindi ncaakali kubelesya kusobana amabbiza. Wakabambulula zintu, eelyo wakacikonzya kulikondelezya aciindi ceelede. Alimwi wakakulwaizyigwa kapati acakuluula camucizyi Cory Wells, iwakali sikweenzya mabbiza uucibwene. * Lino ubelesya ciindi cinji muzintu zyakumuuya akuyanzana a Banakristonyina banamukwasyi alimwi abalongwe. Ulimvwa kuba acilongwe ciyumu a Jehova alimwi uliliibide mumizeezo kazyi kuti ucibelesya kabotu ciindi.

9. Ino mbuti kuyandisya zintu zyakumubili mbokukonzya kupa bamwi kucileka kubikkila maano kuzintu zyakumuuya?

⁹ Zintu zyakumubili. Ikuti naa tuyanda kuzumanana kweenda mukasimpe, zintu zyakumubili tweelede kuzibikka mubusena bweelede. Notwakaiya kasimpe, zintu zyakumuuya zyakaba mubusena bwakusaanguna, eelyo zyakumubili twakazibikka mubusena bwabili. Twakaaba zintu zyakumubili kutegwa tweende mukasimpe. Pele mukuya kwaciindi, ambweni tubona bamwi kabaula tuncini tupya naa kabakkomene akaambo kazintu zimwi zyakumubili. Tulakonzya kutalika kulimvwa kuti kuli nzyotwiindwa. Akaambo kakutakkutila azintu nzyotujisi, tulakonzya kubikka zintu zyakumuuya  mubusena bwabili kutegwa tuyandaule zintu zyakumubili. Bukkale buli boobu butuyeezya Dema. Kuyandisya “bweende bwazintu obuno” kwakapa kuti acileke kubeleka antoomwe amwaapostolo Paulo. (2Tim. 4:10) Nkaambo nzi Dema ncaakamusiila Paulo? Ccita naa wakali kuyandisya zintu zyakumubili kwiinda zyakumuuya naa tanaakacili kuyanda kuleka kucita zintu zimwi kutegwa abeleke a Paulo, Bbaibbele kunyina ncolyaamba. Cakutadooneka, tatuyandi kujokela kukuyanda zintu zyakumubili cakuti zintu eezyo zyatupa kucileka kuyandisya kasimpe.

10. Kutegwa tuzumanane kweenda mukasimpe, muuya nzi ngotweelede kutantamuka?

¹⁰ Bantu mbotwakali kumvwana limwi. Kutegwa tuzumanane kweenda mukasimpe, tatweelede kuzumina kuyungwa abamwi. Notwakatalika kweenda mukasimpe, twakacileka kumvwana abalongwe alimwi abanamukwasyi batali Bakamboni. Bamwi bakazumina, pele bamwi bakatalika kutukazya. (1Pet. 4:4) Nokuba kuti tulasolekesya kumvwana abanamukwasyi alimwi akubayanda, tweelede kubikkila maano kutegwa tutasotoki zyeelelo zya Leza mukuyanda kubakkomanisya. Tuyoozumanana kubayanda banamukwasyi. Pele kweelana akucenjezya kuli mulugwalo lwa 1 Bakorinto 15:33, balongwe besu beni-beni mbaabo ibamuyanda Jehova.

11. Ino inga twazitantamuka buti zilengwa izitali zyamu Magwalo?

¹¹ Micito amizeezo iitali kabotu. Boonse ibeenda mukasimpe beelede kusalala. (Is. 35:8; amubale 1 Petro 1:14-16.) Notwakaiya kasimpe, toonse twakabambulula buumi bwesu kutegwa bweendelane azyeelelo ziluleme zyamu Bbaibbele. Bamwi kucinca nkobakacita kwakali kupati. Kufwumbwa mbocakabede, tatweelede kusambala bukkale bwesu busalala akaambo kabusofwaazi buli munyika eeyi. Ino inga twabutantamuka buti bukkale bwakutalilemeka? Amuyeeye muulo mupati Jehova ngwaakabbadela kutegwa tusalale, nkokuti bulowa bwa Mwanaakwe, Jesu Kristo. (1Pet. 1:18, 19) Kutegwa tuzumanane kusalala kumbele lya Jehova, lyoonse tweelede kubikkila maano kumuulo wacituuzyo cacinunuzyo ca Jesu mumizeezo amumoyo wesu.

12, 13. (a) Nkaambo nzi ncotuteelede kuluba mbwayeeya Jehova kujatikizya mapobwe? (b) Ino ncinzi ncotutiilange-lange lino?

¹² Zilengwa alimwi amicito iitali yamu Magwalo. Banamukwasyi, babelesima alimwi abasicikoloma inga batulomba kuti tubasangane mukusekelela mapobwe. Ino inga twalizunda buti sunko lyakusekelela mapobwe aatamulemeki Jehova? Tulakonzya kucita oobo kwiinda mukuzyiba mbwayeeya Jehova kujatikizya micito iili boobu. Kwiinduluka kubala makani aatondezya mbwaakatalika mapobwe aadumide aalembedwe mumabbuku eesu cilakonzya kutugwasya. Ikuti twaliyeezya twaambo twamu Magwalo ncotutasekeleli mapobwe aali boobu, tulajana twaambo itutupa kusinizya kuti tweenda munzila ‘iitambulika ku Mwami.’ (Ef. 5:10) Kusyoma Jehova alimwi a Jwi lyakwe lyakasimpe kuyootukwabilila ‘kukuyoowa bantu.’—Tus. 29:25.

¹³ Kweenda mukasimpe takugoli, tunakweenda munzila eeyi mane kukabe kutamani. Ino inga twaayumya buti makanze eesu aakuzumanana kweenda mukasimpe? Atulange-lange nzila zyotatwe.

14. (a) Mbuti kuzumanana kuula kasimpe mbokuyootugwasya kuyumya makanze eesu aakutakasambala? (b) Nkaambo nzi busongo, lulayo alimwi amaano ncoziyandika kapati?

¹⁴ Yakusaanguna, amuzumanane kwiiya kasimpe kali mu Jwi lya Leza akuzinzibala kuyeeya.  Inzya, amuule kasimpe kwiinda mukubikka ciindi cakubala twaambo twamasimpe tuyandika ituli mu Jwi lya Leza. Kucita oobo kuyoomugwasya kukakkomanina kasimpe akuyumya makanze aanu aakutakasambala. Kunze aakuula kasimpe, lugwalo lwa Tusimpi 23:23 lwaamba kuti tweelede kuula “busongo, lulayo alimwi amaano.” Kuba buyo aluzyibo takuzulide pe. Tweelede kucita zintu kweelana akasimpe. Maano ayootugwasya kubona mbwaayendelana majwi aa Jehova oonse. Busongo bupa kuti tuzibelesye nzyotuzyi. Zimwi ziindi kasimpe kalatulaya kwiinda mukututondezya mpotweelede kubambulula mubuumi bwesu. Lyoonse atubutobele busolozi oobu. Muulo wakucita boobo mupati kapati kwiinda nsiliva.—Tus. 8:10.

15. Ino lutambo lwakasimpe lutukwabilila buti?

¹⁵ Yabili, amube amakanze aakupona kweelana akasimpe buzuba abuzuba. Amulyaangilile kasimpe mucibuno mbuli lutambo. (Ef. 6:14) Kaindi, lutambo ndwaakali kusama sikalumamba lwakali kumugwasya akukwabilila cibuno cakwe azizo zimwi zyamukati. Pele kutegwa lutambo lumukwabilile, wakeelede kulwaangisya. Lutambo lwatakaangidwe kabotu tiilwakali kukwabilila. Ino lutambo lwesu lwakumuuya lwakasimpe lutukwabilila buti? Ikuti twakaangilila mbuli lutambo, kasimpe kayootukwabilila kukuyeeya kutaluzi alimwi kayootugwasya kusala camaano. Ciindi notwasunkwa, kasimpe kamu Bbaibbele kayootugwasya kuyumya makanze eesu aakucita ciluzi. Mbubwenya sikalumamba mbwaatakali kukonzya kuunka kunkondo kanyina lutambo, tweelede kuba amakanze aakutakasamununa kasimpe. Muciindi caboobo, tulasolekesya kukasama lyoonse kwiinda mukupona kweelana ankako. Mulimo umwi ngolwakajisi lutambo kuli sikalumamba ngwakumugwasya kuzyiba mpaakeelede kujatila panga lyakwe. Kaambo aaka katuleta kunzila iitobela iikonzya kutugwasya kuyumya makanze eesu aakweenda mukasimpe.

16. Ino kuyiisya bamwi kasimpe kuyumya buti makanze eesu aakuzumanana kweenda mukasimpe?

¹⁶ Yatatu, amutole lubazu mukuyiisya kasimpe kamu Bbaibbele kusikila mpomugolela. Kwiinda mukucita boobu, muyoolijatisya panga lyakumuuya, nkokuti “jwi lya Leza.” (Ef. 6:17) Toonse tulakonzya kuba bamayi bacibwene, ‘ibapandulula jwi lyakasimpe bweelede.’ (2Tim. 2:15) Ciindi notubelesya Bbaibbele kugwasya bamwi kuti baule kasimpe akukaka bubeji, majwi aa Leza alakkalilila mumyoyo amumizeezo yesu. Kwiinda mukucita oobu, tuyumya makanze eesu aakuzumanana kweenda mukasimpe.

17. Nkaambo nzi kasimpe ncokayandika kulindinywe?

¹⁷ Kasimpe ncipego citaliboteli kuzwa kuli Jehova. Kwiinda mucipego eeci, tuba acilongwe cibotu kapati a Taateesu wakujulu. Nzyaakatuyiisya kusikila lino matalikilo buyo! Leza watusyomezya buumi butamani kutegwa tukazumanane kwiiya kasimpe nkotwakaula. Aboobo, amukayandisye kasimpe mbuli ngale mbotu. Amuzumanane ‘kuula kasimpe akutakasambala.’ Mpoonya, mbubwenya mbuli Davida muyoomusyomezya Jehova kuti: “Mebo ndinakweenda mukasimpe kako.”—Int. 86:11.