1-2. Mbuti mbotukonzya kulutobela lulayo lujanika kulugwalo lwa Tusimpi 4:25? Amupe cikozyanyo.

AMWEEZEEZYE bukkale oobu. Mucizyi Munakristo uucembeede uyeeya ziindi zibotu zyakaindi. Nokuba kuti bukkale bwakwe mbuyumu kapati lino, wazumanana kumubelekela Jehova kusikila mpagolela. (1Kor. 15:58) Buzuba abuzuba uleezeezya kuti uli antoomwe abayandwa bakwe munyika mpya yakasyomezyegwa. Mucizyi uumbi wayeeya kuti musyominyina umwi wakamutyompya, pele wasala kutamubikkilila. (Kol. 3:13) Mukwesu umwi ulaziyeeya zibi nzyaakacita kaindi pele wasala kuzumanana kusyomeka.—Int. 51:10.

² Ino zikozyanyo zya Banakristo botatwe aaba zitondezya nzi? Boonse balaziyeeya zintu zyakabacitikila kaindi, pele tabaciti oobo ciindi coonse. Muciindi caboobo, ‘balanga buyo kumbele.’—Amubale Tusimpi 4:25.

3. Nkaambo nzi ncotweelede “kulanga buyo kumbele”?

³ Nkaambo nzi ncociyandika kapati “kulanga buyo kumbele?” Mbubwenya muntu mbwatakonzyi kweenda kabotu kuti ciindi aciindi kacebukila musyule, andiswe tatukonzyi kumubelekala kabotu Jehova kuti ciindi aciindi katuyeeya zintu izyakatucitikila kaindi.—Lk. 9:62.

4. Ino tulalanga-langa nzi mucibalo eeci?

⁴ Mucibalo eeci, tulalanga-langa tukole totatwe itukonzya kutupa kuyeeya zintu zyakatucitikila kaindi. Tukole ootu tubikkilizya: (1) kulombozya buumi bwesu bwakaindi, (2) kubikkilila, alimwi (3) kuciindizya kulipa mulandu. Kujatikizya kakole kamwi akamwi, tulabona njiisyo zyamu Bbaibbele mbozikonzya kutugwasya kutabikkila kapati maano ‘kuzintu zili musyule,’  pele kubikkila buyo maano ‘kuzintu zili kumbele.’—Flp. 3:13.

5. Kweelana alugwalo lwa Mukambausi 7:10, nkakole nzi nkotweelede kucenjelela?

⁵ Amubale Mukambausi 7:10. Kapango aaka takaambi kuti cililubide kubuzya kuti: “Ino nkaambo nzi mazuba aakaindi ncaakali mabotu?” Kuyeeya zintu zyakacitika kaindi ncipego kuzwa kuli Jehova. Muciindi caboobo kapango aaka kaamba kuti: “Utaambi kuti, ‘Ino nkaambo nzi mazuba aakaindi ncaakali mabotu kwiinda mazuba aano?’” Nkaambo kubuzya kuli boobu takuli kwabusongo pe. Aboobo tweelede kukacenjelela kakole aaka kutegwa tuteezyanisyi buumi bwesu bwakaindi kubuumi bwesu bwamazuba aano akuyeeya kuti zintu zyoonse zyaindila buya kubija lino.

6. Nkaambo nzi ncocitali cabusongo kuzumanana kuyeeya kuti buumi bwesu bwakaindi bwakali kabotu? Amupe cikozyanyo.

⁶ Nkaambo nzi ncocitali cabusongo kuzumanana kuyeeya kuti buumi bwesu bwakali kabotu kaindi? Nkaambo eeci cilakonzya kutupa kuyeeya buyo zintu zibotu zyakatucitikila kaindi akuluba zintu zibyaabi. Mucikozyanyo, amuyeeye cakacitika kubana Israyeli. Nobakazwa mu Egepita, cakufwambaana bakaluba buumi mbobwakali buyumu mucisi eeci. Muciindi caboobo, bakabikkila buyo maano kuzilyo zibotu nzyobakali kukkomanina. Bakaamba kuti: “Eelo kaka twaziyeeya nswi nzyotwakali kulya kakunyina kuula mu Egepita, alimwi amakowa, banamunywa, mahanyisi amagaliki!” (My. 11:5) Pele sena mubwini bakali kulya zyakulya “kakunyina kuula”? Peepe. Bana Israyeli bakali kubbadela muulo waatala; aciindi eeco, bakali kupenzyegwa kapati kabali bazike mu Egepita. (Kul. 1:13, 14; 3:6-9) Nokuba boobo, mukuya kwaciindi bakaaluba mapenzi aayo akulombozya buumi bwakaindi. Bakasala kubikkila maano “kumazuba mabotu aakaindi” muciindi cakubikkila maano kuzintu zibotu nzyaakabacitila Jehova. Aboobo Jehova wakakalala kapati kuli ceeco ncobakacita.—My. 11:10.

7. Ncinzi cakagwasya mucizyi umwi kweeleba kakole kakulombozya buumi bwakwe bwakaindi?

⁷ Mbuti mbotukonzya kweeleba kakole kakulombozya  buumi bwesu bwakaindi? Atulange-lange cikozyanyo camucizyi umwi iwakatalika kubelekela ku Beteli yaku Brooklyn mu 1945. Nokwakainda myaka minji, wakakwatwa kumukwesu awalo iwakali a Beteli, alimwi bakazumanana kubeleka antoomwe kwamyaka minji. Mu 1976, mulumaakwe wakaciswa. Mucizyi ooyu wakaamba kuti ciindi mulumaakwe naakabona kuti ulaafwaafwi kufwa, wakamupa malailile mabotu aakali kuyoomugwasya kuliyumya aakuba mukamufwu. Wakamwaambila kuti: “Twalikkomene mulukwatano lwesu. Mbasyoonto kapati ibajana lukkomano luli boobu.” Pele alimwi wakamukulwaizya kuti: “Utanikuyeeyi zintu zibotu zyakaindi ciindi coonse, nokuba kuti tokazilubi. Mukuya kwaciindi, uyoozyibila. Utanikutyompwi alimwi utanoolyeetezyi. Pele kokkomana nkaambo wakalijisi ziindi zibotu alimwi azilongezyo. . . . Kuyeeya zintu zibotu zyakaindi ncipego kuzwa kuli Leza.” Eelo kaka malailile aaya akali mabotu!

8. Mbuti mucizyi mbwaakagwasyigwa akaambo kakulanga buyo kumbele?

⁸ Mucizyi ooyu wakaatobela malailile aamulumaakwe. Wakamubelekela Jehova cakusyomeka kusikila naakafwa kajisi myaka iili 92. Myaka misyoonto katanafwa, wakaamba kuti: “Ndalanga musyule myaka iinda ku 63 njondabelekela Jehova mumulimo waciindi coonse, inga ndaamba kuti ndapona buumi bukkomanisya kapati.” Nkaambo nzi? Wakaamba kuti: “Icipa kuti buumi kabukkomanisya kapati mbunyina bwanyika yoonse alimwi abulangizi bwakuyoopona abakwesu abacizyi munyika yaparadaiso, kuti katubelekela Mulengi Mupati, Leza alikke wakasimpe Jehova, mane kukabe kutamani.” Eelo kaka mucizyi ooyu ncikozyanyo cibotu kapati camuntu iwakalangide buyo kumbele!

9. Kweelana alugwalo lwa Levitiko 19:18, ndilili nocikonzya kutuyumina kapati kulekelela?

⁹ Amubale Levitiko 19:18. Kanji-kanji cilatuyumina  kulekelela kwaambisya kuti muntu iwakatulubizyila mukombima, mulongwe naa ngwacibbululu. Mucikozyanyo, mucizyi umwi wakabejekezyegwa amucizyi uumbi kuti wakabba mali. Mukuya kwaciindi, mucizyi ooyu wakalilekelela, pele mucizyi ooyo iwakabejekezyegwa cakamwaalila kumulekelela. Sena kuli nomwakalimvwide boobu? Nokuba kuti tatunalijana mubukkale bukozyenye aboobu, bunji bwesu kuli notwakacimwa kale akulimvwa kuti tatukonzyi kumulekelela mukombima.

10. Ncinzi cikonzya kutugwasya ciindi notwanyema kapati?

¹⁰ Ncinzi cikonzya kutugwasya ciindi notwanyema kapati? Tweelede kuyeeya kuti Jehova ulabona zintu zyoonse. Ulizizyi zintu zyoonse zitucitikila, kubikkilizya akutalulama koonse nkotukonzya kucitikilwa. (Heb. 4:13) Ulatweetelela ciindi notupenga. (Is. 63:9) Alimwi utusyomezya kuti kumbele uyookugwisya kucisa koonse ikwakatucitikila akaambo kakweendelezyegwa cakutalulama.—Ciy. 21:3, 4.

11. Mbuti mbotugwasyigwa ciindi notulekelela bamwi?

¹¹ Kaambo kamwi nkotweelede kuyeeya nkakuti, ciindi notubalekelela bamwi tulagwasyigwa kapati. Eeci ncencico ncaakazyiba mucizyi iwakabejekezyegwa. Mukuya kwaciindi, wakamulekelela mucizyi ooyo iwakamubejekezya. Wakazyiba kuti ciindi notulekelela bamwi, Jehova ulatulekelela andiswe. (Mt. 6:14) Wakalizyi kuti ncaakacita mucizyi ooyo cakalilubide, pele wakamulekelela. Akaambo kaceeci, wakaba alukkomano lunji alimwi akubikkila buyo maano kukubelekela Jehova.

12. Ncinzi ncotwiiya kulugwalo lwa 1 Johane 3:19, 20?

¹² Amubale 1 Johane 3:19, 20. Toonse buyo zimwi ziindi tulalipa mulandu. Mucikozyanyo, bamwi balalipa mulandu akaambo kazintu nzyobakacita kabatanaiya kasimpe. Bamwi balalipa mulandu akaambo kakulubizya nkobakacita nobakamana kubbapatizyigwa. Kulimvwa boobu takulubide pe. (Rom. 3:23) Nokuba boobo, toonse tulayanda kucita ciluzi. Pele “toonse tulalubizya ziindi zinji.” (Jak. 3:2; Rom. 7:21-23) Nokuba kuti tacikkomanisyi kulipa mulandu, cilakonzya kutugwasya munzila imwi. Munzila nzi? Kulipa mulandu kulakonzya kutupa kucinca bukkale bwesu alimwi akuba amakanze aakutakwiinduluka kulubizya nkotwakacita.—Heb. 12:12, 13.

13. Nkaambo nzi ncotweelede kukucenjelela kuciindizya kulipa mulandu?

¹³ Pele alimwi tulakonzya kuciindizya kulipa mulandu, nkokuti kuzumanana kulimvwa bubi nokuba kuti twakeempwa akuti Jehova wakatulekelela. Kulimvwa boobu takuli kabotu. (Int. 31:10; 38:3, 4) Nkaambo nzi? Atulange-lange cikozyanyo camucizyi umwi iwakazumanana kulipa mulandu akaambo kazibi nzyaakacita kaindi. Wakaamba kuti: “Ndakali kulimvwa kuti tacindigwasyi kubeleka canguzu mumulimo wa Jehova kayi ambweni tandikafwutuki.” Bunji bwesu tulakonzya kulimvwa mbuli mbwaakalimvwa mucizyi ooyu. Aboobo cilayandika kapati kukacenjelela kakole kakuciindizya kulipa mulandu. Nkaambo nzi? Nkaambo Saatani inga wakkomana kapati kuti twacileka kubelekela Jehova, nokuba kuti walo Jehova wakatulekelela kale.—Amweezyanisye 2 Bakorinto 2:5-7, 11.

14. Mbuti mbotukonzya kusinizya kuti Jehova wakatulekelela ncobeni?

¹⁴ Nokuba boobo tulakonzya kulibuzya kuti, ‘Mbuti mbondikonzya kusinizya kuti Jehova wakandilekelela ncobeni?’ Kulibuzya mubuzyo ooyu, ncitondezyo cakuti Jehova ulakonzya kumulekelela. Myaka minji yainda, Ngazi Yamulindizi imwi yakaamba kuti: “Tulakonzya kunoocita cibi ncimunya cakwiinduluka-induluka. Cilakonzya kuba boobo ambweni akaambo kakuti tiitwakacileka cibi eeco katutanatalika kubelekela Leza. . . . Mutatyompwi pe. Mutanoolimvwi  kuti mwacita cibi citakonzyi kulekelelwa. Oobu mbombubo Saatani mbwaayanda kuti kamulimvwa. Kulimvwa bubi ooko naa kuusa ncitondezyo cakuti tamuli babi alimwi akuti Jehova ulakonzya kumulekelela. Kamuzumanana kulicesya akupaila kulomba kulekelelwa a Leza, kuti amugwasye kuba amanjezeezya aasalala alimwi akuti amugwasye kutaciinduluka alimwi cibi eeco. Amuunke kulinguwe mbubwenya mwana mbwacita kuli bausyi ciindi nali mumapenzi, tacikwe makani abunji bwaziindi nzyainduluka kucita cibi ncimunya, aboobo Jehova uyoomugwasya akaambo kaluzyalo lwakwe lupati.” *

15-16. Mbuti bamwi mbobakalimvwa ciindi nobakazyiba kuti Jehova ulilibambilide kubalekelela?

¹⁵ Bunji bwabantu ba Jehova baumbulizyigwa akaambo kakuzyiba kuti Jehova wakabalekelela. Mucikozyanyo, mukwesu umwi wakakulwaizyigwa acakuluula icakamwaigwa muzibalo zyakuti, “Ibbaibbele Lilakonzya Kubacinca Bantu.” Mucibalo cimwi, mucizyi umwi wakaamba kuti, akaambo kazintu zibyaabi nzyaakacita kaindi, cakali kumuyumina kusyoma kuti Jehova wakamulekelela. Wakazumanana kulimvwa boobo nociba ciindi nokwakainda myaka minji kuzwa naakabbapatizyigwa. Pele naakazinzibala kuyeeya kujatikizya cinunuzyo, cakamugwasya kusyoma kuti Jehova wakamulekelela ncobeni. *

¹⁶ Ino cakuluula camucizyi ooyo cakamugwasya buti mukwesu ooyu? Wakaamba kuti: “Nondakacili mwana, kanji-kanji ndakali kweebelela zintu ziletela muzeezo wakoonana, alimwi cakandikatazya kucileka. Caino-ino, ndakaciinduluka alimwi. Ndakalomba lugwasyo kubaalu, aboobo ndakacikonzya kulilwana penzi eeli. Baalu bakandigwasya kusyoma kuti Leza ulandiyanda alimwi akuti ulilibambilide kundilekelela. Nokuba boobo, zimwi ziindi ndilimvwa kubula mpindu alimwi akuti Jehova takonzyi kundilekelela. Cakuluula camucizyi ooyu cakandigwasya kapati. Lino ndazyiba kuti ikuti kandiyeeya kuti Leza takonzyi kundilekelela, nkokuti munzila imwi ndaamba kuti cipaizyo ca Mwanaakwe tacikonzyi kupa kuti ndilekelelwe  zibi zyangu. Ndakaciyobola cibalo eeci kutegwa kandicibala alimwi akuzinzibala kuyeeya kufwumbwa leelyo nondilimvwa kubula mpindu.”

17. Mbuti mwaapostolo Paulo mbwaakakeeleba kakole kakuciindizya kulipa mulandu?

¹⁷ Zyakuluula zili boobu zituyeezya mwaapostolo Paulo. Katanaba Munakristo, wakacita zibi zipati zinji. Paulo wakali kuziyeeya zintu nzyaakacita, pele tanaakazumanana kubikkila maano kulinzizyo. (1Tim. 1:12-15) Cinunuzyo wakacibona kuba cipego cimugeme. (Gal. 2:20) Aboobo Paulo wakakeeleba kakole kakuciindizya kulipa mulandu akubikkila buyo maano kukubelekela Jehova camoyo woonse kuzwa ciindi naakaba Munakristo kuya kumbele.

18. Ncinzi ncotwaiya mucibalo eeci?

¹⁸ Ncinzi ncotwaiya kutukole ntotwalanga-langa mucibalo eeci? (1) Kuyeeya zintu zibotu zyakatucitikila kaindi ncipego kuzwa kuli Jehova; pele nokuba kuti buumi bwesu bwakaindi bwakali bubotu, buumi bwesu munyika mpya bunooli bubotu kapati kwiinda. (2) Bamwi balakonzya kutunyemya, pele ciindi notwabalekelela, inga twabikkila buyo maano kukubelekela Jehova. (3) Kuciindizya kulipa mulandu kulakonzya kutupa kuleka kubelekela Jehova calukkomano. Aboobo mbubwenya mbuli Paulo, tweelede kusyoma kuti Jehova wakatulekelela.

19. Ino tuzyi buti kuti munyika mpya tatukalimvwi kuusa akaambo kazintu zyakatucitikila kaindi?

¹⁹ Tulijisi bulangizi bwakuyoopona kukabe kutamani. Munyika mpya ya Leza, tatukalimvwi kuusa akaambo kazintu zyakatucitikila kaindi. Kujatikizya ciindi eeco, Bbaibbele lyaamba kuti: “Zintu zyakaindi tazikaibalukwi limbi pe.” (Is. 65:17) Amuciyeeyele buyo: Tobamwi twacembaala katubeleka mulimo wa Jehova, pele munyika mpya, tuyooba bakubusi alimwi. (Job. 33:25) Aboobo atube amakanze aakutabikkila maano kapati kuzintu zyakatucitikila kaindi. Muciindi caboobo, atubikkile buyo maano kunyika mpya alimwi akucita zyoonse nzyotukonzya kutegwa tukajanike.