Ndakazyalwa mu 1983. Kuzwa nindakazyalwa, buumi bwangu bwakali buyo kabotu, pele nindakakkwanya myaka yakuzyalwa iili 10, ndakatalika kumvwa kucisa mubili woonse. Nikwakainda myaka yobilo, nindakabuka mafwumofwumo buzuba bumwi, nkujana tandicicikonzyi kweenda. Ndakasoleka kuti ndeende, ndakaalilwa. Kuzwa buzuba oobo, kunyina nindakacikonzya kweenda alimwi. Oobu bulwazi bwakapa kuti ndicileke kukomena. Kusikila sunu, ndicili mbweena mbondakabede nindakali mwana.

Nikwakainda myezi misyoonto kuzwa nindakaciswa alimwi kanditacikonzyi kuzwa aŋanda, Bakamboni ba Jehova bobilo bakatuswaya. Kanji-kanji kwaboola beenzu, ndakali kuyuba, pele buzuba oobu ndakabandika abamakaintu aaba. Ciindi nibakali kubandika kujatikizya Paradaiso, bakandiyeezya makani ngondakamvwide nindakali amyaka yosanwe yakuzyalwa. Aciindi eeco, misyinali wazina lya Jethro, iwakali kukkala ku Suriname, wakali kutuswaya ciindi comwe amwezi alimwi wakali kubayiisya Bbaibbele bataata. Ba Jethro bakali kundeendelezya caluzyalo. Andime ndakali kubayanda. Zimwi ziindi bakaapa bakali kunditolelezya kumiswaangano ya Bakamboni ba Jehova iyakali kucitwa mumunzi. Aboobo ciindi ba Florence, umwi wabamakaintu aaba ibakandiswaya buzuba oobo nobakandibuzya naa ndilayanda kwiiya zinji, ndakazumina.

Ba Florence bakapiluka abalumi babo ba Justus, mpoonya bakatalika kundiyiisya Bbaibbele. Nibakabona kuti tandicizyi kubala, bakatalika kundiyiisya kubala. Nikwakainda ciindi, ndakatalika kulibalila. Buzuba bumwi, aaba banabukwetene bakandaambila kuti bakatumwa kuyoobelekela ku Suriname. Cuusisya ncakuti, mu Orealla kunyina wakali kukonzya kuzumanana kundiyiisya Bbaibbele. Pele cikkomanisya ncakuti, Jehova kunyina naakandiluba pe.

Tiilyakalampa, mupainiya wazina lya Floyd wakasika mu Orealla, kumane twakabonana ciindi naakali kukambauka kuŋanda aŋanda. Naakandaambila kujatikizya kwiiya Bbaibbele, ndakamweta-mweta. Wakandibuzya kuti, “Nkaambo nzi ncoomweta-mweta? Ndakamwaambila kuti ndakakaiya kale kabroshuwa kakuti Ncinzi Leza Ncayanda Kulindiswe? akuti ndakalitalikide kwiiya bbuku lyakuti Luzibo Lutola Kubuumi Butamani. * Ndakamwaambila kaambo ncindakalekela kwiiya. Ooyu mukwesu wakazumanana kundiyiisya cibeela cakacaala mubbuku lya Luzibo, mpoonya  awalo wakatumwa kuyoobelekela kumbi. Alimwi ndakacaala kakunyina uundiyiisya.

Nokuba boobo, mu 2004 ba Granville aba Joshua, ibapainiya baalubazu bakatumwa mu Orealla. Nibakali kukambauka kuŋanda aŋanda, bakandijana. Aboobo nibakandibuzya naa ndilayanda kwiiya, ndakamweta-mweta. Ndakabalomba kuti bandiyiisye bbuku lya Luzibo kuzwa kumatalikilo. Ndakali kuyanda kubona naa banoondiyiisya zintu zikozyenye anzyobakali kundiyiisya aabo ibakali kundiyiisya kaindi. Ba Granville bakandaambila kuti miswaangano ilacitwa mumunzi mweena. Nokuba kuti kunyina nondakazwide kale aŋanda kwamyaka iitandila ku 10, ndakali kuyanda kuyoojanika kumiswaangano. Aboobo ba Granville bakaboola kuŋanda kuzoondibweza akacinga kabalema akunditola ku Ŋanda ya Bwami.

Mukuya kwaciindi, ba Granville bakandikulwaizya kulilembya mu Cikolo Camulimo Weendelezyegwa a Leza. Bakaamba kuti: “Ulilemene, pesi ulakonzya kwaambaula. Bumwi buzuba, uyoopa makani aabuleya. Uyoocikonzya!” Aaya majwi akandikulwaizya kapati.

Ndakatalika kuunka mumulimo wamumuunda aba Granville. Nokuba boobo, bunji bwatuzila twamumunzi tiitwakali kabotu kweenda akacinga kabalema. Aboobo ndakaambila ba Granville kundikubila muwilibbala. Bubambe oobu bwakagwasya kapati. Mu April 2005, ndakabbapatizyigwa. Tiilyakalampa, bakwesu bakandiyiisya kulanganya mabbuku aamumbungano alimwi amamaikkulofooni mu Ŋanda ya Bwami.

Mukubula coolwe, mu 2007 bataata bakafwa muntenda yabwato. Eeci cakatutyompya kapati. Ba Granville bakapaila alimwi akutubalila zibalo zyamu Bbaibbele zyuumbulizya. Nokwakainda myaka yobilo, kwakacitika cintu cimwi cityompya, ba Granville abalo bakafwa muntenda yabwato.

Mbungano yesu nsyoonto alimwi iyakauside yakacaala kainyina mwaalu pele buyo mukutausi omwe. Lufwu lwaba Granville lwakandicisa kapati, kayi wakali mulongwe mwini-mwini. Bakandigwasya kumuuya alimwi akumubili. Kumuswaangano wakatobela nilwakainda lufwu lwamukwesu ooyu, ndakajisi cibeela cakubala mincali lya Ciiyo ca Ngazi Yamulindizi. Ndakabala buyo mincali yobilo, kumane ndakatalika kulila cakuti ndakaalilwa kulijata. Mpoonya ndakazwa acibumbili.

Ndakatalika kulimvwa kabotu ciindi bakwesu baku mbungano iimbi nobakatalika kutugwasyilizya ku Orealla. Kunze lyaboobo, bakumutabi bakatuma mukwesu Kojo, imupainiya waalubazu. Ndakakkomana ciindi bamaama amusyoonto wangu nobakatalika kwiiya Bbaibbele alimwi anobakabbapatizyigwa. Mpoonya mu March 2015, ndakasalwa kuba mukutausi. Nokwakainda ciindi, ndakapa makani aabuleya ciindi cakusaanguna. Buzuba oobo, ndakakkomana akulila nondakayeeya ncobakandaambilide ba Granville ciindi cimwi nobakati: “Bumwi buzuba, uyoopa makani aabuleya. Uyoocikonzya!”

Kwiinda mumapulogilamu aa JW Broadcasting^®, ndaiya kujatikizya bakwesu abacizyi ibali mubukkale mbuli bwangu. Nokuba kuti balilemene, balacikonzya kucita zintu zinji alimwi balikkomene. Andime inga ndacikonzya kucita mbubwenya oobo. Makanze aangu aakubelekela Jehova kusikila mpondigolela, akapa kuti nditalike bupainiya bwaciindi coonse. Mpoonya mu September 2019, ndakatambula mulumbe ngondatakali kuyeeyela. Wakali mulumbe wakuti ndasalwa kuba mwaalu mumbungano yesu imwakali basikumwaya ibabalilwa ku 40.

Ndilabalumba kapati bakwesu abacizyi ibakandigwasya kwiiya Bbaibbele alimwi akutalika kubelekela Jehova. Kwiinda zyoonse, ndilalumba kapati kuti Jehova kunyina naakandiluba pe.