BAKWESU abacizyi banji ibakaunkide kumasi aasumpukide bakapiluka kuzisi zyokwabo. Akaambo kaluyando ndobajisi kuli Jehova alimwi akubantu, bakwesu abacizyi aaba balongela kumasena aabulide basikumwaya ba Bwami. (Mt. 22:37-39) Ino nkulyaaba kuli buti nkobakacita alimwi Jehova wabalongezya buti? Kutegwa tuzyibe, atulange-lange bakwesu abacizyi bakucisi ca Cameroon, mu Africa nkoili kumbo.

Mu 1998, mukwesu wazina lya Onésime wakalonga kuzwa kucisi cokwabo ca Cameroon. Kwamyaka iili 14 wakali kukkala kunze aacisi. Bumwi buzuba kumuswaangano wa Bunakristo, wakamvwa cikozyanyo caamba zyamulimo wakukambauka. Mwaambi wakaamba kuti, “Kuti naa balongwe bobilo bazuba nswi mumasena aaindene kumane umwi ujaya nswi zinji kwiinda mweenzinyina, sena ooyo uutajayi nswi zinji takonzyi kulongela kubusena ooko kujaigwa nswi zinji?”

Cikozyano eeci cakapa mukwesu Onésime kuyeeya kujokela ku Cameroon, kwalo bantu banji nkobajisi luyandisisyo lwakwiiya Bbaibbele alimwi akugwasyilizya basikumwaya bakubusena ooko. Pele wakali kulibilika. Sena wakali kuyoocikonzya kubuzyibila bukkale bwakucisi cokwabo kakuli wakakkala myaka minji kunze aacisi? Kutegwa abone naa inga wacikonzya, wakaakuswaya myezi iili cisambomwe ku Cameroon. Mpoonya mu 2012, wakajokela ku Cameroon akuyookkala.

Mukwesu Onésime wakaamba kuti: “Ndakeelede kubuzyibila bukkale bwakubusena oobu.” Mu Ŋanda ya Bwami, ndakeelede kuzyibila kukkala amabbenci.” Pele calukkomano wakati, “ciindi nondakali kubikkila maano kupulogilamu, ndakali kuziluba zyuuno zibotu izili mu Maanda aa Bwami aamwi.”

Mu 2013, mukwesu Onésime wakakwata mucizyi Géraldine, iwakaunkide ku France akuyookkala myaka iili fwuka, pele wakajokela ku Cameroon. Ino nzilongezyo nzi nzyobakajana banabukwetene aaba akaambo kakubikkila maano kuzintu zyakumuuya? Mukwesu Onésime wakaamba kuti: “Twakanjila Cikolo Cabakambausi ba Bwami alimwi akuyoobelekela ku Beteli. Mwaka wainda, basikwiiya Bbaibbele bali 20 bakabbapatizyigwa mumbungano yesu. Lino ndilimvwa kuti ndili mubusena bweelede ‘kuzuba.’” (Mk. 1:17, 18) Mucizyi Géraldine wakayungizya kuti: “Ndajana zilongezyo zinji kwiinda nzyondakali kuyeeyela.”

Mucizyi Judith wakalongela ku United States, pele wakali kuyanda kucita zinji mumulimo wa Jehova. Wakaamba kuti: “Lyoonse nondakali kuswaya mukwasyi ku Cameroon, ciindi cakulayana ndakali kulila akaambo kakusiya bantu banji mbondakali kuyiisya Bbaibbele.” Nokuba boobo, mucizyi ooyu wakali kuwayawaya kujokela ku Cameroon.  Wakali kubeleka mulimo uuvwolwa mali manji calo cakali kumugwasya kuti kacikonzya kubbaddelela busilisi bwabausyi ibakali kuciswa ku Cameroon. Pele mucizyi ooyu wakasyoma Jehova, aboobo wakajokela ku Cameroon. Wakaamba kuti, kuli zintu zimwi zibotu nzyaakali kuyeeya izyakali kucitika naakali kukkala ku United States. Wakali kupaila kuli Jehova kuti amugwasye kuzyibila, alimwi wakakulwaizyigwa amulangizi wabbazu amukaintu wakwe.

Mucizyi Judith wakaamba kuti, “Ndalanga musyule, mumyaka yotatwe buyo ndakakkomana kugwasya bantu bone kuba basikwiiya.” Mucizyi ooyu naakakwatwa wakaba mupainiya waalubazu. Mazuba aano, ulabeleka amulumaakwe Sam-Castel, mumulimo wamubbazu. Ino ncinzi cakacitika kuli bausyi? Walo alimwi amukwasyi wakwe bakacikonzya kujana cibbadela kucisi cimbi icakalyaabide kubaandulwa bausyi kakunyina kubabbadelesya. Mucoolwe, busilisi boonse bwakeenda kabotu.

Mukwesu Victor wakalongela ku Canada. Naakamana kubala cibalo caamba makani aalwiiyo lwaatala mu Ngazi Yamulindizi, wakayeeya kujatikizya lwiiyo lwakwe. Wakaleka lwiiyo lwakwe lwakuyunivesiti lwamyaka minji alimwi akutalika lwiiyo ilutola buyo ciindi cisyoonto. Wakaamba kuti: “Eeci cakandigwasya kufwambaana kujana mulimo, alimwi akucita ncondakali kuyanda, nkokuti bupainiya.” Kumbele, mukwesu ooyu wakakwata mucizyi Caroline, mpoonya bakaunka kuyooswaya ku Cameroon. Kabali kooko, bakaswaya kuofesi yamutabi kwalo bakwesu abacizyi nkobakabakulwaizya kulongela mu Cameroon. Mukwesu Victor wakaamba kuti, “Cakatwaalila kukaka, alimwi mbwaanga twakali kupona buumi buubauba, twakazumina.” Nokuba kuti ba Caroline bakali kuciswa-ciswa, bakazumanana amuzeezo wabo wakulonga.

Mukwesu Victor abakaintu bakwe bakatalika bupainiya bwaciindi coonse kutegwa bagwasye bantu ibakajisi luyandisisyo lwakwiiya Bbaibbele. Bakaliyobwede mali aali mbwaabede kutegwa batataliki kubeleka mulimo wakumubili. Mpoonya bakabeleka kwamyezi misyoonto kabacili ku Canada, calo cakabagwasya kulongela ku Cameroon akuyoozumanana abupainiya. Ino nzilongezyo nzi nzyobakajana? Bakanjila Cikolo Cabakambausi ba Bwami, bakabeleka kabali bapainiya baalubazu, mpoonya lino mbabelesi basikuyaka. Mukwesu Victor wakaamba kuti, “Kusiya buumi bwaatala kwakapa kuti tulubone lugwasyo lwa Jehova.”

Mu 2002, mukwesu Alain, iwakali sicikolo kuyunivesiti yaku Germany, wakabala katulakiti kakuti Nobakubusi—Ino Ncinzi Ncomuyoocita Mubuumi Bwanu? Makani ngaakabala akamukulwaizya kulibikkila mbaakani zipya. Mu 2006, wakanjila Cikolo Cakwiiya Mulimo mpoonya wakatumwa ku Cameroon, kucisi cokwabo.

Ku Cameroon, mukwesu Alain wakajana mulimo uubelekwa mawoola masyoonto. Mukuya kwaciindi, wakajana mulimo uuvwolwa mali manji, pele wakali kulibilika kuti mulimo ooyo inga wapa kuti katabeleki ciindi cinji mumulimo wakukambauka. Aboobo ciindi naakatambwa kubeleka kali mupainiya waalubazu, wakazumina kakunyina kuwayawaya. Sikumulemba mulimo wakamusyomezya kuti unoovwola mali manji, pele mukwesu ooyu wakazumanana akusala kwakwe. Kumbele, mukwesu Alain wakakwata mucizyi Stéphanie, iwakakkala myaka minji ku France. Ino mbuyumuyumu nzi mbwaakajana mucizyi Stéphanie naakalongela ku Cameroon?

Mucizyi Stéphanie wakaamba kuti: “Ndakatalika kuciswa-ciswa akukakwa naa kukoolwa zyakulya,  pele ndakali kucikonzya kujana busilisi alimwi alugwasyo.” Banabukwetene aaba bakalongezyegwa akaambo kakuliyumya kwabo. Mukwesu Alain wakaamba kuti: “Notwakaunka kuyookambauka kumunzi umwi wiitwa kuti Katé, twakajana bantu banji ibakali kuyanda kwiiya Bbaibbele. Nikwakainda ciindi, twakacikonzya kwiiya Bbaibbele ambabo kubelesya fooni. Basikwiiya Bbaibbele aaba bobilo bakabbapatizyigwa, mpoonya kwakapangwa kabunga kabasikumwaya. Mucizyi Stéphanie wakaamba kuti: “Cilakkomanisya kapati kugwasya bantu kulyaaba kuli Jehova. Kubelekela kokuno, kwatupa kuti katujana lukkomano luli boobu.” Mazuba aano, mukwesu Alain amucizyi Stéphanie babeleka mulimo wamubbazu.

Mucizyi Gisèle wakabbapatizyigwa naakali kucikolo cabusilisi ku Italy. Mucizyi ooyu wakabukkomanina kapati buumi buubauba mbobakali kupona banabukwetene bapainiya ibakali kumuyiisya Bbaibbele, eeci cakamupa kuba aluyandisisyo lwakucita zinji mumulimo. Aboobo wakatalika bupainiya bwaciindi coonse kumamanino aalwiiyo lwakwe.

Mucizyi Gisèle wakali kuyanda kujokela ku Cameroon kutegwa akacite zinji mumulimo wa Jehova, pele wakali kulibilika. Wakaamba kuti, “Ndakeelede kuleka kuba sicisi waku Italy akusiya banamukwasyi alimwi abalongwe ibali kokuya.” Nokuba boobo, mu May 2016, mucizyi Gisèle wakajokela ku Cameroon. Nokwakainda ciindi, mucizyi ooyu wakakwatwa kumukwesu Léonce, mpoonya bakuofesi yamutabi ku Cameroon bakabaambila kuti balongele kudolopo lya Ayos, ikwakabulide bakambausi ba Bwami.

Bwakali buti buumi mu Ayos? Mucizyi Gisèle wakaamba kuti: “Kanji-kanji kwakanyina malaiti kwansondo zili mbozibede, aboobo tiitwakali kuccajiŋa mafooni. Bunji bwaziindi, tanaakali kubeleka. Ndakaiya kujikila ankuni alimwi masiku bantu baceya-ceya kumugoti, twakali kuunka kuyooteka meenda amawilibbala katumunika amatocci.” Ncinzi cakabagwasya banabukwetene aaba kuliyumya? Mucizyi Gisèle wakati: “Muuya wa Jehova, lugwasyo lwamulumi, kukulwaizyigwa alimwi alugwasyo lwamali kuzwa kubanamukwasyi abalongwe zyakapa kuti tuliyumye.”

Sena mucizyi ooyu ulikkomene kuti wakajokela kucisi cokwabo? Wakaamba kuti: “Inzya! Kumatalikilo kwakali buyumuyumu alimwi akutyompwa, pele nitwakabuzunda buyumuyumu oobu, mebo abalumi bangu twakalimvwa kuti twakacita ncotwakeelede kucita. Tulamusyoma Jehova alimwi tulijisi cilongwe anguwe.” Mukwesu Léonce amucizyi Gisèle bakanjila Cikolo Cabakambausi ba Bwami, mpoonya lino balabeleka kabali bapainiya baalubazu baciindi cisyoonto.

Mbubwenya mbuli bazubi banswi ibaliyumya kutegwa bajaye nswi zinji, abalo bakwesu abacizyi ibajokela kuzisi zyokwabo, inga balaliyumya kutegwa bagwasye babombe myoyo ibatambula mulumbe wa Bwami. Kakunyina kudooneka, Jehova uyakubayeeya basikumwaya aaba ibabeleka canguzu akaambo kaluyando ndobatondezya kuzina lyakwe. (Neh. 5:19; Heb. 6:10) Ikuti kamukkala kunze aacisi alimwi kucisi cokwanu kuyandika basikumwaya ba Bwami banji, sena inga tiimwajokela kucisi cokwanu? Ikuti mwacita oobo, Jehova uyoomulongezya.—Tus. 10:22.