CIBALO CAKWIIYA 46
Jehova Mbwatugwasya Kuliyumya Kumwi Katukkomene
“Jehova ulalindila kakkazikide moyo kuti amufwide luzyalo, eelyo ulanyamuka kuti amufwide luse.”—IS. 30:18.
LWIIMBO 3 Leza Ninguzu Zyesu, Mbulangizi Bwesu, Ngotusyoma
IZILI MUCIBALO a
1-2. (a) Mibuzyo nzi njotutiilange-lange? (b) Ncinzi citondezya kuti Jehova ulilibambilide kutugwasya?
JEHOVA ulakonzya kutugwasya kuliyumya kubuyumuyumu mbotujana mubuumi alimwi akutugwasya kujana lukkomano mumulimo wesu. Ino utugwasya munzila nzi? Alimwi mbuti mbotukonzya kugwasyigwa cakumaninina kulugwasyo ndwatupa Jehova? Mibuzyo eeyi ilaingulwa mucibalo eeci. Nokuba boobo, katutanabulanga-langa bwiinguzi, atulange-lange mubuzyo ooyu uuyandika kapati wakuti: Mwati Jehova ulilibambilide ncobeni kutugwasya?
2 Bbala ndyaakabelesya mwaapostolo Paulo kulembela bana Hebrayo lilakonzya kutugwasya kujana bwiinguzi. Paulo wakalemba kuti: “Jehova ngomugwasyi wangu; tandikooyoowa pe. Ino muntu inga wandityani?” (Heb. 13:6) Bbuku limwi ilyaamba zyamu Bbaibbele lipandulula kuti bbala lyakuti “mugwasyi,” ilibelesyedwe mukapango aaka, lipandulula muntu uubalikila kuyoogwasya muntu uulomba lugwasyo. Amweezyeezye buyo Jehova kabalikila kuyoogwasya muntu uuli mumapenzi. Tamudooneki buya kuti bupanduluzi oobu butondezya Jehova mbwalibambilide, inzya mbwalyaabide kuba Mugwasyi wesu. Kuti Jehova kali kulubazu lwesu tuyoozumanana kuliyumya mumasunko kumwi katukkomene.
3. Muunzila nzi zyotatwe Jehova mwatugwasya kuliyumya mumasunko eesu kumwi katukkomene?
3 Muunzila nzi Jehova mwatugwasya kuliyumya mumasunko eesu kumwi katukkomene? Kwiingula mubuzyo ooyu, atubale bbuku lya Isaya. Nkaambo nzi? Businsimi bunji mbwaakasololelwa kulemba Isaya bulabeleka kubabelesi ba Leza mazuba aano. Kuyungizya waawo, Isaya kanji-kanji upandulula Jehova kubelesya mabala aatakatazyi kumvwa. Mucikozyanyo, amubone Isaya caandaano 30. Omuya, mabala aabelesyedwe alatugwasya kweezyeezya, kubona Isaya napandulula Jehova mbwatugwasya kwiinda (1) mukuswiilila cakubikkila maano akwiingula mipailo yesu, (2) mukutupa busolozi, alimwi a (3) mukutupa zilongezyo lino akumbele. Lino atuzilange-lange nzila zyotatwe eezyi cakulomya ikubona Jehova mbwatugwasya.
JEHOVA ULATUSWIILILA
4. (a) Ino Jehova wakabapandulula buti ba Juda bamumazuba aa Isaya, alimwi ncinzi ncaakazumizya kuti cibacitikile? (b) Mbulangizi buli buti Jehova mbwaakapa bantu basyomeka? (Isaya 30:18, 19)
4 Majwi aakusaanguna mu Isaya caandaano 30, Jehova waamba ba Juda kuti “mbana bazangi,” balo ‘bayungizya cibi kucibi.’ Ulazumanana kwaamba kuti: ‘Aaba bantu mbazangi, mbana ibatayandi kumvwa mulawo wa Jehova.’ (Is. 30:1, 9) Mbwaanga bakakaka kuswiilila, Isaya wakasinsima kuti Jehova uyoozumizya kuti bapenge. (Is. 30:5, 17; Jer. 25:8-11) Alimwi buya, bakatolwa mubuzike abana Babuloni. Nokuba boobo, kuli bamwi ibakali kusyomeka akati kaba Juda, alimwi Isaya wakabalembela majwi aapa bulangizi. Wakabaambila kuti bumwi buzuba Jehova wakali kuyoobazumizya kupiluka akuyookkala mu Jerusalemu alimwi. (Amubale Isaya 30:18, 19.) Alimwi eeci ncicakacitika. Jehova wakabaangulula kuzwa mubuzike. Nokuba boobo, kwakainda myaka minji kutegwa Jehova abaangulule. Majwi aakuti “Jehova ulalindila kakkazikide moyo kuti amufwide luzyalo” akali kutondezya kuti kwakali kuyooinda ciindi cili mbocibede kutegwa aabo basyomeka bafwutulwe. Mubwini, bana Israyeli bakakkala myaka iili 70 kabali mubuzike mu Babuloni ibakasyeede kabatanazumizyigwa kupiluka ku Jerusalemu. (Is. 10:21; Jer. 29:10) Ciindi bana Israyeli nobakali mubuzike ku Babuloni bakali kulila akaambo kamapenzi, pele nobakapiluka kumunzi wabo, bakalila akaambo kakukkomana.
5. Ncisyomezyo nzi ncotujana ku Isaya 30:19?
5 Mazuba aano tulakonzya kuumbulizyigwa amajwi aaya aakuti: “Masimpe uyookufwida luzyalo mbwayakulimvwida buyo jwi lyako lyakulila kuti ugwasyigwe.” (Is. 30:19) Isaya utusyomezya kuti Jehova uyootuswiilila twaakumulilila, mpoonya uyoofwambaana kwiingula mipailo yesu. Isaya ulayungizya kuti: “Mbwayakulimvwida buyo uyookuvwiila.” Aaya majwi aakulwaizya atuyeezya kuti Taateesu ulilibambilide, inzya uliyandide kapati kubagwasya aabo bamwiita. Kuzyiba makani aaya kulatugwasya kuliyumya kumwi katukkomene.
6. Mbuti majwi ngaakabelesya Isaya mbwaatondezya kuti Jehova ulaiswiilila mipailo yababelesi bakwe aumwi kumugama?
6 Ncisyomezyo nzi cimbi ncotujana kumajwi aaya kujatikizya mipailo yesu? Jehova ulaswiilila cakubikkila maano kumipailo yaumwi aumwi wesu. Nkaambo nzi ncotukonzya kwaamba boobo? Mumajwi aakusaanguna mu Isaya caandaano 30, kubelesyedwe bbala lyaamba bantu banji akaambo kakuti Jehova wakali kwaambila bantu bakwe kabali nkamu. Nokuba boobo, mukapango 19 kubelesyedwe bbala lyaamba muntu omwe; kayi mulumbe wakali kugamikwa kumuntu aumwi kumugama. Isaya wakalemba kuti: “Yebo tokalili pe”; “masimpe uyookufwida luzyalo”; “uyookuvwiila.” Mbwali Taata siluyando, Jehova kunyina naambila mwanaakwe uutyompedwe kuti, “Yebo weelede kuyuma mbuli mwanookwanu.” Muciindi caboobo, toonse ulatulanganya umwi aumwi kumugama alimwi akubikkila maano kumipailo yesu.—Int. 116:1; Is. 57:15.
Ncinzi ncaakali kwaamba Isaya ciindi naakaamba kuti: ‘Mutaleki pe kumusikila Jehova’? (Amubone muncali 7)
7. Mbuti Isaya a Jesu mbobatondezya mbociyandika kuzumanana kupaila?
7 Ciindi nitwapaila kuli Leza kujatikizya cintu cimwi citulibilisya, Jehova cakufwambaana ulatupa nguzu zyakuliyumya mubukkale oobo. Alimwi kuti naa sunko eelyo talimani mpoonya-mpoonya kweelana ambotwali kulangila, tweelede kuzumanana kumulomba Jehova kutegwa atupe nguzu zyakuliyumya. Amana buya mbwatutamba kucita oobo. Tulacibona eeci mumajwi aamaambilambali ngaakaamba musinsimi Isaya naakati: ‘Mutaleki pe kumusikila Jehova.’ (Is. 62:7) Ino majwi aaya aamba nzi? Tweelede kuzumanana kupaila kuli Jehova cakuti mane calibonya mbuli kuti tatumupi coolwe cakulyookezya Jehova. Majwi aa Isaya atuyeezya cikozyanyo ca Jesu cijatikizya mupailo ncotujana ku Luka 11:8-10, 13. Kulugwalo oolu Jesu utukulwaizya ‘kuzumanana kumukombelezya’ alimwi ‘akuzumanana kulomba’ notupaila. Kunze lyaboobo, tulakonzya kumulomba Jehova kuti atupe busolozi ciindi notuyanda kusala cakucita.
JEHOVA ULATUSOLOLELA
8. Ino majwi aali ku Isaya 30:20, 21 akazuzikizyigwa buti kaindi?
8 Amubale Isaya 30:20, 21. Ciindi mpi yabana Babuloni noyakauzinguluka munzi wa Jerusalemu mwaka omwe acisela, bantu bakapenga citaambiki cakuti mapenzi bakaazyibila mbuli cinkwa ameenda. Pele kweelana akapango 20 a 21, Jehova wakasyomezya ba Juda kuti, ikuti naa beempwa akuleka bukkale bwabo, wakali kuyoobavwuna kumapenzi aabo. Isaya wakaamba Jehova kuti “Mwiiyi Mupati,” alimwi wakasyomezya bantu kuti wakali kuyoobayiisya mbobakonzya kumukomba munzila iitambulika. Majwi aaya akazuzikizyigwa ciindi ba Juda nobakapiluka kuzwa mubuzike. Jehova wakaba Mwiiyi wabo Mupati, alimwi kwiinda mubusolozi bwakwe, bantu bakwe bakazwidilila mukubukulusya bukombi busalala. Eelo kaka tulikkomene mazuba aano nkaambo Jehova Mwiiyi wesu Mupati!
9. Ninzila nzi imwi mbotutambula busolozi bwa Jehova mazuba aano?
9 Mutupango ootu, Isaya waamba kuti tuli mbuli basicikolo bayiisyigwa a Jehova munzila zyobilo. Yakusaanguna, Isaya waamba kuti: “Muyoomubona Mwiiyi wanu Mupati ameso aanu.” Mucikozyanyo eeci, Isaya waamba kuti cili mbuli kuti Mwiiyi uliimvwi kumbele lyabasicikolo. Eelo kaka mazuba aano tulagwasyigwa alwiiyo lwakwe! Mbuti Jehova mbwatuyiisya? Ulatuyiisya kwiinda mukubelesya mbunga yakwe. Alimwi tulalumba kaka kulwiiyo lulimvwisya ndotutambula kuzwa kumbunga ya Jehova! Lwiiyo ndotutambula lyamiswaangano yambungano, miswaangano yacooko, kuzwa mumabbuku eesu, mapulogilamu aa JW Broadcast alimwi anzila buyo zimbi zitugwasya kuliyumya ciindi camapenzi kumwi katukkomene.
10. Muunzila nzi ‘motumvwa jwi musyule lyesu’?
10 Isaya ulaamba nzila yabili Jehova mbwatuyiisya, ulati: “Matwi aako ayoomvwa jwi kusyule lyako.” Musinsimi aawa waamba Jehova kuti mwiiyi uubikkila maano iweenda musyule lyabasicikolo akubaambila nzila njobeelede kutola. Mazuba aano tulalimvwa jwi lya Leza musyule lyesu. Mubuti? Majwi aa Leza aakasololelwa amuuya akalembwa mu Bbaibbele kaindi, ciindi camusyule kapati. Aboobo ciindi notubala Bbaibbele, inga cili mbuli kuti tumvwa jwi lya Leza musyule lyesu.—Is. 51:4.
11. Kutegwa tuliyumye kumwi katukkomene, nintaamu nzi nzyotweelede kubweza, alimwi nkaambo nzi?
11 Mbuti mbotukonzya kugwasyigwa abusolozi mbwatupa Jehova kwiinda mukubelesya mbunga yakwe alimwi a Jwi lyakwe? Amubone kuti Isaya waamba nzila zyobilo. Yakusaanguna, “njeeyi nzila.” Yabili, “amweende mulinjiyo.” (Is. 30:21) Kwiizyiba buyo “nzila” eeyi takuzulide pe. Pele tweelede ‘kweendela mulinjiyo.’ Kwiinda mu Jwi lya Jehova, kweelana ambolipandululwa ambunga yakwe, tulaiya Jehova ncayanda kuti katucita. Alimwi tulaiya mbotukonzya kubelesya nzyotwiiya. Kutegwa tuliyumye notubelekela Jehova tweelede kubweza ntaamu zyoonse zyobilo. Kuti twacita oobo, ndendilyo notuyoolongezyegwa a Jehova.
JEHOVA ULATULELEKA
12. Kweelana amajwi aali ku Isaya 30:23-26, mbuti Jehova mbwaakabaleleka bantu bakwe?
12 Amubale Isaya 30:23-26. Ino businsimi oobu bwakazuzikizyigwa buti kuba Juda ibakapiluka ku Israyeli kuzwa mubuzike ku Babuloni? Bakatambula zilongezyo zinji, zyakumubili alimwi azyakumuuya. Jehova wakabalongezya bantu bakwe kwiinda mukubapa cakulya cakumubili cinji. Nokuba boobo, kwiinda zyoonse, wakabalongezya kwiinda mukubapa cakulya cakumuuya cinji ciindi bukombi busalala nobwakali kuyaabubukulusyigwa asyoonto-syoonto. Zilongezyo zyakumuuya nzyobakajana aciindi eeco zyakali zinji kapati kwiinda mbocakabede musyule. Mbubwenya mbokatondezya kapango 26, Jehova wakabamunikila munzila yakumuuya, nkokuti wakabagwasya kulimvwisya Jwi lya lyakwe. (Is. 60:2) Zilongezyo zya Jehova zyakabagwasya kapati babelesi bakwe kuzumanana kumubelekela calukkomano alimwi akuliiba mumizeezo “akaambo kakukkomana kwamyoyo.”—Is. 65:14.
13. Mbuti businsimi bujatikizya kubukulusyigwa kwabukombi bwakasimpe mbobwazuzikizyigwa mazuba aano?
13 Sena businsimi bujatikizya kubukulusyigwa kwabukombi busalala bulabeleka amazuba aano? Inzya! Munzila nzi? Kuzwa mu 1919 C.E., bantu banji balazwa mubuzike bwa Babuloni Mupati, ibulelo bwanyika yoonse bwabukombi bwakubeja. Balasololelwa kubusena bubotu bwiinda Nyika Yakasyomezyedwe yabana Israyeli. Lino bali muparadaiso yakumuuya. (Is. 51:3; 66:8) Ino paradaiso yakumuuya ninzi?
14. Ino paradaiso yakumuuya ninzi, alimwi mbaani bakkala mulinjiyo mazuba aano? (Amubone Bupanduluzi Bwamabala.)
14 Kuzwa mu 1919 C.E., bananike balikkomene muparadaiso yakumuuya. b Mukuya kwaciindi, aabo bajisi bulangizi bwakupona aano anyika, “bambelele zimbi,” abalo bakaba acoolwe cakunjila mububambe bwakumuuya oobu alimwi akukkomana azilongezyo zya Jehova zitalivwulili.—Joh. 10:16; Is. 25:6; 65:13.
15. Ino paradaiso yakumuuya ili kuli?
15 Ino busena bwakumuuya naa paradaiso eeyi ili kuli mazuba aano? Bantu ba Jehova balajanika munyika yoonse mazuba aano. Eeci caamba kuti, paradaiso yakumuuya mobakkala ayalo nkoili munyika yoonse. Aboobo, mazuba aano, tacikwe makani ankotukkala aano anyika, tulakonzya kuba cibeela caparadaiso yakumuuya kufwumbwa buyo kuti katubugwasyilizya bukombi bwakasimpe.
Ncinzi umwi aumwi wesu ncakonzya kucita kutegwa abotye paradaiso yakumuuya? (Amubone muncali 16-17)
16. Mbuti mbotukonzya kuzumanana kubona bubotu bwaparadaiso yakumuuya?
16 Kutegwa tuzumanane kuba muparadaiso yakumuuya, tweelede kuzumanana kulumba kucoolwe cakuba cibeela cambungano ya Bunakristo yanyika yoonse. Inga twacita buti oobo? Kwiinda mukuzumanana kubona bubotu bwabakwesu abacizyi, ikutali kulezya kwabo. (Joh. 17:20, 21) Nkaambo nzi eeci ncociyandika kapati? Amubone cikozyanyo eeci. Ino tulangila kujana misyobo yazisamu iindene-indene mupaaki mbotu. Mbubwenya buyo, mumbungano mazuba aano kuli bantu baindene-indene balo bakozyanisyigwa kuzisamu ziindene-indene zyamupaaki. (Is. 44:4; 61:3) Tweelede kubikkila maano kutegwa tuzumanane kubona bubotu bwamupaaki yacikozyanyo kutali kubona kunyongana “kwazisamu” izili munsi-munsi andiswe. Tatweelede kulekela kulezya kwesu naa kulezya kwabaabo ibali mumbungano kuti kutulesye kubona bubotu bwalukamantano bwabaabo bali mumbungano ya Bunakristo yanyika yoonse.
17. Ncinzi umwi aumwi wesu ncakonzya kucita kutegwa akwabilile lukamantano lwamumbungano?
17 Ncinzi ncotukonzya kucita toonse kutegwa mumbungano kakuli lukamantano? Nkwiinda mukuba basiluumuno. (Mt. 5:9; Rom. 12:18) Ciindi coonse notusolekesya kubamba luumuno abamwi mumbungano, tubotya paradaiso yakumuuya. Tweelede kuyeeya kuti umwi aumwi uuli muparadaiso yakumuuya ngu Jehova wakamukwela kubukombi bwakasimpe. (Joh. 6:44) Amweezyeezye buyo Jehova mbwakkomana ciindi nabona umwi aumwi wesu kabeleka canguzu kukwabilila luumuno alukamantano luli akati kabaabo mbabona kuti mbabelesi bakwe babotu!—Is. 26:3; Hag. 2:7.
18. Zintu nzi nzyotweelede kuzinzibala kuyeeya kanji-kanji, alimwi nkaambo nzi?
18 Mbuti mbotukonzya kugwasyigwa cakumaninina azilongezyo nzyotutambula mbuli babelesi ba Leza? Tulakonzya kugwasyigwa kwiinda mukuzinzibala kuyeeya nzyotwiiya mu Jwi lya Leza alimwi amumabbuku aamba zyamu Bbaibbele. Kubala alimwi akuzinzibala kuyeeya kuyootugwasya kuba abube bwa Bunakristo bwalo ibuyootupa kutondezya “luyando lwabunyina” ‘akuyandana kapati’ mumbungano. (Rom. 12:10) Ciindi notuzinzibala kuyeeya zilongezyo nzyotujisi lino, tuyumya cilongwe cesu a Jehova. Alimwi kuzinzibala kuyeeya zilongezyo nzyatubambilide Jehova kuyootugwasya kubona kuti kumubelekela mane kukabe kutamani ncintu ciyandika kapati. Zyoonse eezyi ziyootupa kuba alukkomano lwakumubelekela lino.
TULIKANZIDE KULIYUMYA
19. (a) Kweelana a Isaya 30:18, ncinzi ncotuli masimpe? (b) Ncinzi ciyootugwasya kuliyumya kumwi katukkomene?
19 Jehova ‘uyoonyamuka’ kulubazu lwesu ciindi aakunyonyoona bweende bwazintu oobu bubyaabi. (Is. 30:18) Tulisinizyide kuti Jehova, “Leza wabululami,” kunyina nayoozumizya nyika ya Saatani kuzumanana kwaciindi cilamfwu. (Is. 25:9) Tulalindila cakukkazyika moyo kuti buzuba bwa Jehova bukasike. Calino, tulikanzide kuzumanana kucikkomanina coolwe cakupaila, kwiiya Jwi lya Leza alimwi akuzinzibala kuyeeya zilongezyo zyesu. Ciindi notucita boobo, Jehova uyootugwasya kuzumanana kuliyumya calukkomano notumukomba.
LWIIMBO 142 Ikujatisya Bulangizi Mbotujisi
a Mucibalo eeci tulabandika zintu zyotatwe Jehova nzyacita kugwasya babelesi bakwe kuliyumya mumapenzi aamubuumi kumwi kabakkomene. Tulalanga-langa Isaya caandaano 30 kutegwa twiiye zinji kujatikizya zintu eezyi. Ciindi notulanga-langa caandaano eeci, tulayeezyegwa mbociyandika kupaila kuli Jehova, kwiiya Jwi lyakwe, alimwi akuzinzibala kuyeeya zilongezyo nzyotujisi lino alimwi azyakumbele.
b BUPANDULUZI BWAMABALA: “Paradaiso yakumuuya” mbusena bukwabilidwe mwalo motukombela Jehova calukamantano. Mubusena oobu, Jehova ulatuyiisya mbotukonzya kumukomba kakunyina kujatikizyigwa abubeji bwazikombelo alimwi tulijisi mulimo uukatalusya wakukambauka makani mabotu aajatikizya Bwami bwa Leza. Tulijisi cilongwe ciyumu a Jehova, alimwi tupona muluumuno abakwesu abacizyi, balo ibatugwasya kuliyumya mumapenzi aamubuumi kumwi katukkomene. Tulanjila muparadaiso yakumuuya ciindi notwatalika kukomba Jehova munzila iiluzi alimwi anotusolekesya kumwiiya.