1. Ino tuzyi buti kuti Jehova uyanda kuba mulongwe wesu?

 JEHOVA ututamba kuti tube balongwe bakwe. (Jak. 4:8) Uyanda kuti abe Leza wesu, Taateesu, alimwi a Mulongwe wesu. Ulaingula mipailo yesu alimwi ulatugwasya notuli mumapenzi. Alimwi ubelesya mbunga yakwe kutuyiisya akutukwabilila. Pele ncinzi ncotweelede kucita kutegwa tube acilongwe anguwe?

2. Mbuti mbotukonzya kuba acilongwe a Jehova?

² Tulakonzya kuba mulongwe wa Jehova kwiinda mukupaila, kubala Jwi lyakwe akuzinzibala kuyeeya nzyotubala. Notucita boobo, citupa kumuyanda alimwi akumulumba. Tulakulwaizyigwa kumumvwida alimwi akumutembaula kweelana ambwayanda. (Ciy. 4:11) Ciindi notuyaabuyungizya luzyibo lwesu kujatikizya Jehova, lusyomo lwesu mulinguwe alimwi amumbunga njabelesya kutugwasya luyooyuma.

3. Mbuti Diabolosi mbwasola kutwaandaanya kuli Jehova, pele ncinzi cikonzya kutugwasya kuzumanana kusyomeka kuli Leza ambunga yakwe? (Intembauzyo 31:13, 14)

³ Nokuba boobo, Diabolosi, ulasolekesya kutwaandaanya kuli Jehova, kwaambisya ciindi notujana buyumuyumu. Ino ucita buti oobo? Ulatalika asyoonto-syoonto kutupa kuleka kusyoma Jehova ambunga yakwe. Pele tulakonzya kumukazya. Ciindi lusyomo lwesu noluli luyumu alimwi anotusyomeka kuli Jehova cakumaninina, tuyoozumanana kumusyoma Leza ambunga yakwe.—Amubale Intembauzyo 31:13, 14.

4. Ino tulabandika nzi mucibalo eeci?

⁴ Mucibalo eeci, tulabandika buyumuyumu botatwe buzwa kunze aambungano; bwalo bukonzya kupa kuti lusyomo lwesu muli Jehova amumbunga yakwe lumane. Mbuti buyumuyumu oobu mbobukonzya kutwaandaanya kuli Jehova? Alimwi mbuti mbotukonzya kumulwana Saatani?

5. Mbuti mapenzi mbwaakonzya kupa kuti tuleke kusyoma Jehova ambunga yakwe?

⁵ Zimwi ziindi, tulajana mapenzi, mbuli kukazyigwa abanamukwasyi naa kumaninwa mulimo. Mbuti mapenzi aali boobu mbwaakonzya kucesya lusyomo lwesu mumbunga ya Jehova akutwaandaanya kulinguwe? Kuti twaba amapenzi kwaciindi cilamfwu, tulakonzya kulimvwa kubula bulangizi alimwi akutyompwa. Saatani ubelesya ziindi zili boobu kutupa kutalika kuyeeya kuti Jehova tatuyandi. Diabolosi uyanda kutupa kutalika kuyeeya kuti Jehova naa mbunga yakwe njiitupa kupenga. Eeci cakabacitikila bana Israyeli bamwi mu Egepita. Kumatalikilo bakali kusyoma kuti Jehova nguwakasala Musa alimwi a Aroni kuti abagwisye mu Egepita mubuzike. (Kul. 4:29-31) Pele kumbele ciindi Farao naakabayumizyila buumi, bakatalika kutongooka Musa a Aroni akaambo kamapenzi aabo, bakali kwaamba kuti: “Mwapa kuti Farao ababelesi bakwe batusulaike alimwi mwabikka panga mujanza lyabo kuti batujaye.” (Kul. 5:19-21) Bakabatongooka babelesi ba Leza basyomeka. Eelo kaka cakali kuusisya! Ikuti naa mwali kusunkwa kwaciindi cilamfwu, mbuti mbomukonzya kuyumya lusyomo lwanu muli Jehova ambunga yakwe?

6. Ncinzi ncotwiiya kumusinsimi Habakuku kujatikizya kuliyumya kumapenzi? (Habakuku 3:17-19)

⁶ Amupaile kuli Jehova kuzwa ansi amoyo, akumulomba kuti amugwasye. Musinsimi Habakuku wakajana buyumuyumu bunji kapati. Aciindi cimwi, wakadooneka naa Jehova wakali kumulanganya. Aboobo wakapaila kuli Jehova kuzwa ansi amoyo. Wakaamba kuti: “O Jehova, ino ndilalilila lugwasyo kwaciindi cilamfwu buti yebo kotandimvwi? . . . Alimwi nkaambo nzi ncolekelela mapenzi kuti kaacitika?” (Hab. 1:2, 3) Jehova wakawiingula mupailo wamubelesi wakwe uusyomeka. (Hab. 2:2, 3) Naakamana kuzinzibala kuyeeya Jehova mbwaakabafwutula bantu bakwe, Habakuku wakaba alukkomano alimwi. Wakasinizya kuti Jehova wakali kuyoomulanganya alimwi uyoomugwasya kuliyumya mumapenzi aali woonse. (Amubale Habakuku 3:17-19.) Ino twiiya nzi? Ciindi nomwaba amapenzi, amupaile kuli Jehova akumwaambila mbomulimvwa. Mpoonya amumulombe kuti amugwasye. Kuti mwacita oobo, munoosinizyide kuti Jehova uyoomupa nguzu zyakuliyumya. Alimwi ciindi nomubona mbwamugwasya, lusyomo lwanu luyooyuma kapati.

7. Ino munamukwasyi wakamwaambila majwi nzi mucizyi Shirley, alimwi ncinzi cakamugwasya kuzumanana kusyomeka kuli Jehova?

⁷ Amuzumanane kucita zintu zyakumuuya. Amubone cakagwasya mucizyi Shirley, waku Papua New Guinea ciindi naakajana buyumuyumu. b Mumukwasyi wamucizyi Shirley bakali bacete cakuti zimwi ziindi bakali kwaalilwa kujana zyakulya. Munamukwasyi wakasola kumulesya kusyoma muli Jehova. Wakamwaambila kuti: “Inga waamba kuti muuya uusalala wa Leza ulakugwasya, ino ukugwasya aali? Tee mumukwasyi tucili bacete. Usowa buyo ciindi kukambauka.” Mucizyi Shirley waamba kuti: “Ndakalibuzya kuti: ‘Mwati Leza ulatulanganya?’ Mpoonya-mpoonya ndakapaila kuli Jehova akumwaambila zyoonse nzyondakali kuyeeya. Ndakazumanana kubala Bbaibbele, mabbuku eesu aambi, kukambauka alimwi akujanika kumiswaangano.” Mpoonya asyoonto-syoonto wakatalika kubona kuti Jehova ulabalanganya. Mumukwasyi wakwe kunyina nobakalede anzala alimwi bakalikkomene. Mucizyi Shirley waamba kuti: “Ndakabona  kuti Jehova wakayiingula mipailo yangu.” (1Tim. 6:6-8) Kuti mwazumanana kucita zintu zyakumuuya, andinywe tamukazumizyi mapenzi kumwaandaanya kuli Jehova.

8. Ncinzi cikonzya kubacitikila bakwesu beendelezya mumbunga ya Jehova?

⁸ Kwiinda mukubelesya sikapepele alimwi a Intaneti, basinkondoma balamwaya makani aakubeja kujatikizya bakwesu beendelenzya mbunga ya Jehova. (Int. 31:13) Bakwesu bamwi balaangwa akutamikizyigwa milandu yabujayi. Banakristo bamumwaanda wamyaka wakusaanguna bakalijana mubukkale bukonzyene ciindi mwaapostolo Paulo naakatamikizyigwa kaambo, akwaangwa. Ino bakacita buti?

9. Ncinzi ncobakacita Banakristo bamwi ciindi mwaapostolo Paulo naakaangidwe?

⁹ Banakristo bamwi mumwaanda wamyaka wakusaanguna bakacileka kumugwasyilizya Paulo ciindi naakangidwe ku Roma. (2Tim. 1:8, 15) Nkaambo nzi? Sena bakalisenda akaambo kakuti bantu bakali kwaamba Paulo kuti mujayi? (2Tim. 2:8, 9) Naa sena bakaliyoowede, kuti abalo inga baangwa? Kufwumbwa naa cakali buti, amweezyeezye buyo Paulo mbwaakalimvwide. Wakaliyumya mumapenzi manji akaambo kambabo alimwi buya akubikka buumi bwakwe muntenda. (Mil. 20:18-21; 2Kor. 1:8) Tatweelede kuba mbuli baabo ibakamulekelezya Paulo ciindi naakali kuyandika lugwasyo ncobeni. Ncinzi ncotweelede kuyeeya ciindi bakwesu beendelezya nobaangwa?

10. Ncinzi ncotweelede kuyeeya ciindi bakwesu beendelezya nobapenzyegwa?

¹⁰ Amuyeeye kaambo ncotupengela alimwi autalisya mapenzi. Lugwalo lwa 1 Timoteyo 3:12 lwaamba kuti: “Boonse aabo bayanda kupona buumi bwakubelekela Leza cakulyaaba mukuyanzana a Kristo Jesu abalo bayoopenzyegwa.” Aboobo tacitugambyi pe kuti Saatani ukanzide kubalwana bakwesu beendelezya. Uyanda kuti bakwesu aaba bacileke kusyomeka kuli Jehova alimwi akuti swebo tuyoowe.—1Pet. 5:8.

11. Ncinzi ncotwiiya kucikozyanyo ca Onesiforo? (2 Timoteyo 1:16-18)

 ¹¹ Amuzumanane kubagwasya bakwesu beendelezya alimwi akukakatila kulimbabo. (Amubale 2 Timoteyo 1:16-18.) Munakristo wamumwaanda wamyaka wakusaanguna Onesiforo wakakakatila kuli Paulo ciindi naakaangidwe. ‘Kunyina naakafwa nsoni pe akaambo kanketani zya Paulo.’ Muciindi caboobo, Onesiforo wakamuyandaula Paulo, naakamujana wakamugwasya mumbazu mwaakali kuyandika. Kwiinda mukucita boobu, Onesiforo wakabikka buumi bwakwe muntenda. Ino twiiya nzi kuli ceeci? Tatweelede kulekela kakole kakuyoowa muntu kutukonga naa kutulesya kugwasya bakwesu baangidwe. Muciindi caboobo, tweelede kubagwasya munzila iili yoonse motukonzya. (Tus. 17:17) Bayandika lugwasyo alimwi aluyando lwesu.

12. Ncinzi ncotwiiya kubakwesu abacizyi baku Russia?

¹² Amubone bakwesu abacizyi ku Russia mbobabagwasya basyominyina bayandwa ibaangidwe. Ciindi bamwi nobabetekwa, bakwesu abacizyi banji inga balaboola kuzikubagwasyilizya kunkuta. Ino twiiya nzi kuli ceeci? Ciindi bakwesu beendelezya nobatamikizyigwa twaambo, kwaangwa naa kupenzyegwa, mutanikuyoowi pe. Amubapailile, amwiilanganye mikwasyi yabo, alimwi amujane nzila zimwi momukonzya kubagwasyilizya.—Mil. 12:5; 2Kor. 1:10, 11.

13. Mbuti kufwubaazyigwa mbokukonzya kutulesya kusyomeka kuli Jehova akumbunga yakwe?

¹³ Banamukwasyi batali basyomi, babelesima, naa basicikoloma balakonzya kutufwubaazya akaambo kakukambauka naa kupona kweelana azyeelelo zya Jehova zisumpukide. (1Pet. 4:4) Balakonzya kwaamba kuti: “Nywebo kumugama ndilamuyanda, pele cikombelo canu cilaciindizya alimwi ncakaindi.” Bamwi balakonzya kutufwubaazya akaambo kambotubeendelezya aabo bagusyidwe mumbungano, kwiinda mukwaamba kuti: “Tamujisi luyando naaceya.” Majwi aali boobu alakonzya kutupa kutalika kudooneka naa milawo ya Jehova ililuzi. Inga twatalika kudooneka akwaamba kuti: “Jehova ulaciindizya.” Kuti naa muli mubukkale buli boobu, mbuti mbomukonzya kukakatila kuli Jehova akumbunga yakwe?

14. Ino tweelede kucita buti ciindi bantu nobatufwubaazya akaambo kakutobela zyeelelo zya Jehova? (Intembauzyo 119:50-52)

¹⁴ Amuzumanane kutobela zyeelelo zya Jehova. Jobu wakali kuzitobela zyeelelo zya Jehova nokuba kuti wakali kufwubaazyigwa akaambo kakucita boobo. Umwi iwakali kulitamizya kuba mulongwe wa Jobu mane buya wakasola kupa Jobu kuti asyome kuti tacikwe makani kuli Leza naa Jobu ulasyomeka naa pe. (Job. 4:17, 18; 22:3) Pele Jobu wakabukaka bubeji buli boobu. Wakalizyi kuti zyeelelo zya Jehova kujatikizya ciluzi acitaluzi lyoonse zililuzi, alimwi wakalikanzide kuzitobela. Kunyina naakalekela kuti bantu bamwi bamulesye kusyomeka. (Job. 27:5, 6) Ino twiiya nzi kuli ceeci? Mutazumizyi kufwubaazyigwa kumupa kudooneka zyeelelo zya Jehova. Amuyeeye buyo kujatikizya buumi bwanu. Kweelede kuti mwakalibonena kale ziindi zinji kuti kucita zintu Jehova nzyaamba kuti zililuzi nkokugwasya kapati. Amube amakanze aakugwasyilizya mbunga yalo iisumpula zyeelelo eezyo. Mpoonya tacikwe makani aziindi bantu nzyobayoomufwubaazya, nywebo tamukacileki kubelekela Jehova.—Amubale Intembauzyo 119:50-52.

15. Nkaambo nzi ba Brizit ncobakali kufwubaazyigwa?

¹⁵ Amubone cakamucitikila mucizyi Brizit, waku India. Wakali kufwubaazyigwa  abanamukwasyi akaambo kalusyomo lwakwe. Mbwaakamanina buyo kubbapatizyigwa mu 1997, balumi bakwe ibatakali basyomi bakamaninwa mulimo. Aboobo mulumi wakasala kuti, ba Brizit, alimwi amwanaabo musimbi baunke kubazyali bakwe, balo ibakali kukkala mudolopo ilyakali afwaafwi. Pele ba Brizit bakeelede kulwana amapenzi aambi mapati. Akaambo kakuti balumi babo tiibakali kubeleka, bakeelede kujana mulimo uubelekwa mawoola manji kutegwa kabalanganya mukwasyi. Kuyungizya waawo, kuya kumbungano iyakali afwaafwi kwakali kulampa makkilomita aali 350. Cuusisya ncakuti, banamukwasyi babalumi babo bakali kubakazya akaambo kalusyomo lwabo. Kubakazya kwakaindila cakuti, mukwasyi waba Brizit wakeelede kulonga alimwi. Mpoonya cakutayeeyela, balumi babo bakafwa. Mpoonya nikwakainda ciindi, mwanaabo musimbi watatu wakafwa abulwazi bwakkansa kajisi buyo myaka iili 12. Kuyungizya waawo, banamukwasyi bakatalika kubapa mulandu akaambo kazintu eezyi. Bakali kubaambila kuti, ikuti nobatakali Bakamboni ba Jehova, ntenda zyoonse eezyi nizyatakabacitikila. Nokuba boobo, balo bakazumanana kusyoma muli Jehova akukakatila kumbunga yakwe.

16. Mbuti ba Brizit mbobakalongezyegwa akaambo kakukakatila kuli Jehova akumbunga yakwe?

¹⁶ Mbwaanga ba Brizit bakali kukkala kulamfwu ambungano, mulangizi wabbazu wakabakulwaizya kukambaukila mucilawo mobakali kukkala akweendelezya miswaangano muŋanda yabo. Kumatalikilo, bakalimvwa kuti inga tiibacikonzya. Pele bakaatobela malailile. Bakali kubaambila bamwi makani mabotu, bakali kusololela miswaangano muŋanda yabo, alimwi akujana ciindi cakukomba mumukwasyi abana babo basimbi. Ncinzi cakazwa mpawo? Ba Brizit bakacikonzya kutalisya alimwi akusololela ziiyo zya Bbaibbele zinji, cakuti mane bunji bwabasikwiiya babo bakabbapatizyigwa. Mu 2005, bakaba bapainiya baciindi coonse. Kusyomeka kwabo kuli Jehova alimwi ambunga kwakalumbulwa. Bana babo basimbi lino babelekela Jehova cakusyomeka, alimwi kuli mbungano  zyobilo mucilawo mobakkala. Ba Brizit balisinizyide kuti, Jehova wakabapa nguzu zyakuliyumya mubuyumuyumu alimwi akufwubaazyigwa abanamukwasyi.

17. Ncinzi ncotweelede kukanza kucita?

¹⁷ Saatani uyanda kuti tusyome kuti Jehova ulatulekelezya ciindi nitwapenga alimwi akuti kukakatila kumbunga kwiindizya buyo mapenzi. Uyanda kutukonga kutegwa tuyoowe ciindi bakwesu beendelezya nobatamikizyigwa, nobapenzyegwa naa kwaangwa. Alimwi akaambo kakufwubaazyigwa, uyanda kutupa kuleka kusyoma muli Jehova alimwi ambunga Yakwe. Nokuba boobo, toonse tulibuzyi bucenjezu bwakwe alimwi tatukonzyi kucengwa pe. (2Kor. 2:11) Amube amakanze aakukazya bubeji bwa Saatani alimwi akuzumanana kusyomeka kuli Jehova akumbunga yakwe. Kamuyeeya kuti, Jehova kunyina nayoomulekelezya pe. (Int. 28:7) Aboobo, mutalekeli cintu cili coonse kumwaandaanya kuluyando lwa Jehova.—Rom. 8:35-39.

18. Ncinzi ncotuyoobandika mucibalo citobela?

¹⁸ Mucibalo eeci, twabandika buyumuyumu mbotujana kunze aambungano. Pele buyumuyumu bujanika mumbungano bulakonzya kusunka lusyomo lwesu muli Jehova alimwi ambunga yakwe. Mbuti mbotukonzya kwaazunda mapenzi aali boobu? Tuyakuwiingula mubuzyo ooyu mucibalo citobela.