JOSEFA WAKU AREMATEYA tanaakazyi mbwaakaba abusicamba bwakusikila mweendelezi muna Roma. Ponto Pilato wakazyibidwe kuti wakali muyumu moyo kapati. Pele kutegwa Jesu azikkwe cabulemu, muntu umwi wakeelede kuya kulomba kuli Pilato kutegwa apegwe mubili. Kweelana ambocakacitika, ikubonana cantongolameso tiicakaba ciyumu kuli Josefa kweelana ambwaakali kuciyeeyela. Naakamana kusinizya kuli silutwe wabasikalumamba kuti Jesu wakalifwide, Pilato wakakuzumina kulomba. Aboobo lino Josefa, kacuuside kapati, wakafwambaana kujokela kubusena Jesu nkwaakajailwa.—Mk. 15:42-45.

• Ino Josefa ooyu waku Aremateya wakali ni?

• Ino bakaswaangene buti a Jesu?

• Ino nkaambo nzi makani aamba nguwe ncotweelede kwaabikkila maano?

Makani Mabotu aa Marko aakasololelwa amuuya aamba Josefa kuti wakali “umwi wa Nkuta Mpati Yaba Juda uulemekwa.” Mumakani aaya, Nkuta Mpati Yaba Juda iilemekwa ninkuta iyakali kulanganya twaambo tujatikizya banamaleya, mfwulumende alimwi amakani aabukombi. (Mk. 15:1, 43) Aboobo Josefa wakali umwi wabasololi babantu bakwe, calo icipandulula mbwaakacikonzya kubonana amweendelezi muna Roma. Nkakaambo kaako tacigambyi alimwi kuti Josefa wakalivwubide.—Mt. 27:57.

Kabali nkamu, boonse antoomwe iba Nkuta Mpati Yaba Juda bakalimusulide Jesu. Bamu Nkuta eeyi bakamvwana kuti Jesu ajaigwe. Nokuba boobo, Josefa wiitwa kuti “imwaalumi mubotu alimwi uululeme.” (Lk. 23:50) Kwiindana abeenzinyina banji bamu Nkuta eeyi, Josefa walo wakali kusyomeka, kulilemeka kabotu alimwi wakasoleka kumvwida milawo ya Leza. Alimwi walo “wakali kulindila Bwami bwa Leza,” icitondezya kaambo ncaakabeda umwi wabasikwiiya ba Jesu. (Mk. 15:43; Mt. 27:57) Kulangilwa kuti, wakakwelelezyegwa kumulumbe wa Jesu akaambo kakuyandisisya kasimpe abululami kuzwa ansi aamoyo.

Lugwalo lwa Johane 19:38 lwaamba Josefa kuti “sikwiiya wa Jesu iwakali kulisisa akaambo kakuyoowa ba Juda.” Ino Josefa wakali kuyoowa nzi? Wakalizyi ba Juda mbobakalimusulide Jesu alimwi amakanze aabo aakutanda kufwumbwa muntu mucikombelo uuzumina kuti usyoma Jesu. (Joh. 7:45-49; 9:22) Kutandwa mucikombelo cakali kwaamba kusampaulwa, kutantamukwa alimwi akubonwa kuti uli muzangalisi aba Judanyoko. Aboobo Josefa wakawayawaya kuzumina caantangalala kuti usyoma muli Jesu. Naakacita oobo naakasweekelwa cuuno ncaakajisi alimwi ampuwo yakwe.

Tali Josefa alikke iwakali mubukkale buli boobu. Kweelana alugwalo lwa Johane 12:42, “ibanji kubikkilizya abeendelezi beni bakamusyoma [Jesu], pele akaambo kaba Farisi tiibakali kulitondezya kuti balamusyoma, ikutegwa batatandwi mucikombelo.” Aumwi muntu iwakali mubukkale oobu wakali Nikodemo, awalo wakali wamu Nkuta Mpati Yaba Juda.—Joh. 3:1-10; 7:50-52.

Nokuba kuti Josefa, wakali sikwiiya, kunyina naakalyaambilila oobo caantangalala. Eeli lyakali penzi lipati, ikapati akaambo kamajwi aa Jesu aakuti: “Lino kufwumbwa uundizumina kumbele lyabantu, andime ndiyoomuzumina kumbele lya Taata uuli kujulu. Pele kufwumbwa uundikaka kumbele lyabantu, andime ndiyoomukaka kumbele lya Taata uuli kujulu.” (Mt. 10:32, 33) Mubwini Josefa tanaakamukaka Jesu, pele alimwi tanaakajisi busicamba bwakumuzumina. Sena andinywe mbocibede oobo?

Josefa wakacita cintu cimwi cibotu, Bbaibbele lyaamba kuti kunyina naakauzumina muzeezo wa Nkuta Mpati Yaba Juda wakujaya Jesu. (Lk. 23:51) Kweelana abantu bamwi  mbobaamba, ambweni Josefa tanaakaliko ciindi Jesu naakali kubetekwa. Kufwumbwa naa cakali buti, Josefa weelede kuti wakausa kapati kujatikizya kutalulama ooku—pele kunyina ncaakali kukonzya kucita!

Kuzikusika ciindi Jesu naakafwa, Josefa wakabuzunda buyoofwu mbwaakajisi, alimwi wakasala kutobela basikwiiya ba Jesu. Kusala ooku kulatondezyegwa amajwi aali kulugwalo lwa Marko 15:43 ilwaamba kuti: “Wakalisungula kuunka kuli Pilato akuyoolomba mubili wa Jesu.”

Kulibonya kuti Josefa wakaliko ciindi Jesu naakafwa. Inzya, wakazyiba kujatikizya lufwu lwa Jesu Pilato katanazyiba. Aboobo ciindi Josefa naakalomba mubili wa Jesu, mweendelezi ooyu “tanaakali kuyeeya kuti [Jesu] inga kafwide kale.” (Mk. 15:44) Ikuti naa Josefa wakalibonena Jesu mbwaakapenga aacisamu cakupenzyezya, sena bukkale oobo buusisya bwakamupa kwaalingula manjezyeezya aakwe mpoonya akusala kuti wakeelede kubweza ntaamu kwiiminina kasimpe? Cileelela kuyeeya boobo. Cakutadooneka, Josefa lino wakakulwaizyigwa kubweza ntaamu. Kunyina naakali kuyooba limbi sikwiiya wakusisikizya.

Mulawo waci Juda wakali kwaamba kuti aabo ibajaigwa bakaleelede kuzikkwa kalitanabbila zuba. (Dt. 21:22, 23) Nokuba boobo kweelana abana Roma, mibili yazigwebenga zyajaigwa yakali kucaala acisamu kusikila mane yabola naa kuzikkilwa muzyuumbwe zyabantu boonse. Pele tabusi mbwaakali kuyeeya oobo Josefa kujatikizya Jesu.  Kufwaafwi ankwaakajailwa, Josefa wakalijisi cuumbwe cipya ncaakasyide mumwala. Cuumbwe eeci tiicakaningabeleka calo icitondezya kuti Josefa wakalonga caino-ino kuzwa ku Aremateya * kuya ku Jerusalemu alimwi akuti wakali kuyanda kuti kakuzikkilwa banamukwasyi. (Lk. 23:53; Joh. 19:41) Kuzikka Jesu mucuumbwe ca Josefa calo ncaakeelede kubelesya kumbele bwakali bwaabi kulubazu lwa Josefa alimwi cakazuzikizya businsimi bwakuti Mesiya wakali kuyoozikkwa “antoomwe abavwubi.”—Is. 53:5, 8, 9.

Mabbuku oonse one aa Makani Mabotu aamba kuti mubili wa Jesu nowakagusyigwa aacisamu, Josefa wakauzambaila mumulembo mubotu akuulazika mucuumbwe cakwe cipya. (Mt. 27:59-61; Mk. 15:46, 47; Lk. 23:53, 55; Joh. 19:38-40) Alikke muntu waambidwe cacigaminina kuti nguwakamugwasya Josefa ngu Nikodemo, ooyo iwakaleta tununkilizyo. Mbwaanga baalumi aaba bobilo bakali aampuwo, tacilangilwi kuti bakaunyamuna mubili lwabo kubagama. Cilalangilwa kapati kuti bakabelesya babelesi kunyamuna mubili alimwi akuuzikka. Nokuba kuti bakabelesya babelesi, mulimo ngobakabeleka baalumi bobilo aaba tiiwakali muuba-uba pe. Kufwumbwa muntu iwakali kuguma mutunta wamuntu wakali kusofwaala kwamazuba aali ciloba, calo icakali kupa kuti zyoonse nzyaakali kuguma zisofwaale. (My. 19:11; Hag. 2:13) Bukkale buli boobo bwakali kuyoobapa kwaandaanizyigwa kubantu ciindi cansondo ya Pobwe Lyakwiindilila alimwi akwiindwa zintu zyoonse zyakajatikizyidwe apobwe eeli. (My. 9:6) Kwiinda mukucita bubambe bwakuti Jesu azikkwe, Josefa wakalibikka muntenda yakusulaikwa abalongwe bakwe. Pele aciindi eeci, wakalilisungwide kuzumina kufwumbwa icakali kuyoomucitikila akaambo kakuzikka Jesu munzila yabulemu alimwi akulizyibya caantangalala kuti wakali umwi wabasikwiiya ba Kristo.

Zyamana zibalo zyaamba makani aakuzikkwa kwa Jesu mumabbuku aa Makani Mabotu, Bbaibbele kunyina nolyaamba kujatikizya Josefa waku Aremateya, calo cisololela kumubuzyo ooyu wakuti: Ino ncinzi cakacitika kulinguwe? Bwini mbwakuti, tatuzyi pe. Nokuba boobo, kweelana anzyotwabandika kale, tacidoonekwi kuti wakalitondezya caantangalala kuti Munakristo. Alimwi buya, ciindi naakasunkwa alimwi naakali mubuyumuyumu, wakazumanana kuyumya lusyomo lwakwe abusicamba muciindi cakujoka munsi. Eeci cakali citondezyo cibotu.

Makani aaya aleta mubuzyo swebo toonse ngotweelede kuzinzibala kuyeeya: Sena kuli cintu cili coonse, nkokuti cuuno ncajisi muntu, mulimo, lubono, kuyandisya mukwasyi, naa ambweni buya lwaanguluko ndotujisi, ncotubikkila maano kapati mubusena bwacilongwe cesu a Jehova?