1. Ino nguuli musyobo waluyando wiinda kusumpuka, alimwi nkaambo nzi ncocili boobo? (Amubone cifwanikiso icili kumatalikilo aacibalo.)

LUYANDO iluyeeme anjiisyo ziluleme (a·gaʹpe) ncipego kuzwa kuli Jehova. Ngo Kasensa kaluyando oolu. (1Joh. 4:7) Musyobo waluyando oolu ngowiinda kusumpuka. Nokuba kuti lulakonzya kubikkilizya kubayanda bamwi, kanji-kanji lulabonwa kwiinda mumilimo yaluyando lwini-lwini iicitilwa bamwi kutegwa bagwasyigwe. Kweelana ambolyakaamba bbuku limwi, luyando lwa a·gaʹpe “lulakonzya kuzyibwa kwiinda mumilimo iicitwa akaambo kandulo.” Ciindi notutondezya naa kutondezyegwa luyando lwini-lwini, tulaba abuumi buli kabotu, buumi bulaba bwalukkomano alimwi ampindu.

2, 3. Ino mbuti Jehova mbwaatondezya luyando lwini-lwini kubantu?

² Jehova wakatondezya luyando kubantu noliba leelyo katanabalenga ba Adamu a Eva. Wakaibamba nyika kutegwa bantu kabakkala mumo lyoonse, ibusena bantu mobatakonzyi kupona buyo pele akuba abuumi bukkomanisya kapati. Jehova wakacita oobu kutegwa swebo tugwasyigwe, kutali nguwe. Wakazumanana kutondezya luyando lwini-lwini kubana bakwe anyika kwiinda mukubalongezya abulangizi bwakupona kukabe kutamani mu Paradaiso njaakababambila.

 ³ Ba Adamu a Eva nobakazanga, Jehova wakatondezya bube bwakwe bupati bwaluyando lwini-lwini. Wakabikka bubambe bwakunununa bana ibakali kuyoozyalwa kuzwa kubazangi aaba bobilo, kali masimpe kuti akati kabo bamwi bayoolukkomanina luyando lwakwe. (Matl. 3:15; 1Joh. 4:10) Mubwini, Jehova mbwaakasyomezyela buyo kujatikizya Mufwutuli iwakali kuyooboola kumbele, kulinguwe cisyomezyo eeci wakacibona kuti cacitika kale. Mpoonya nokwakainda myaka iibalilwa ku 4,000, Jehova wakasweekelwa kapati naakaaba Mwanaakwe simuzyalwaalikke kubantu boonse. (Joh. 3:16) Eelo kaka tulamulumba kapati Jehova akaambo kaluyando lwakwe lwini-lwini!

4. Ino ncinzi citondezya kuti bantu batalondokede balakonzya kutondezya luyando lwini-lwini?

⁴ Tulacikonzya kutondezya luyando lwini-lwini akaambo kakuti Leza wakatulenga mucinkonzya cakwe. Cibi ncotwakakona cipa kuti kacituyumina kutondezya luyando, pele tacipi kuti katwaalilwa kucita boobo. Abelo wakatondezya luyando kuli Jehova kwiinda mukupa cintu ciinda kubota ncaakajisi kuzwa ansi aamoyo. (Matl. 4:3, 4) Nowa wakatondezya luyando lwini-lwini kubantunyina kwiinda mukukambauka mulumbe wa Leza kwamyaka minji nokuba kuti kunyina muntu ngwaakabona iwakautambula mulumbe. (2Pet. 2:5) Abrahamu wakabikka ambele luyando ndwaakajisi kuli Leza kutali mbwaakali kulimvwa ciindi naakalaililwa kuti atuule mwanaakwe Izaka. (Jak. 2:21) Mbubwenya mbuli baalumi aabo ibasyomeka, tuyanda kutondezya luyando, tacikwe makani amapenzi ngotuswaanganya.

5. Ino muunzila nzi motukonzya kutondezya luyando lwini-lwini?

⁵ Bbaibbele lipandulula kuti luyando lwini-lwini lulatondezyegwa kutali, ‘amajwi buyo naa aamulomo pe, pele mumilimo amukasimpe.’ (1Joh. 3:18) Sena eeci caamba kuti tatukonzyi kutondezya luyando kwiinda mumajwi eesu? Peepe! (1Tes. 4:18) Muciindi caboobo, eeci caamba kuti luyando lwesu talweelede kuba buyo lwamajwi, kwaambisya kuti mubukkale oobo kakuyandika kucita cintu cimwi. Mucikozyanyo, ciindi Munakristoma natajisi ziyandika zyakumubili, takuyandiki kwiile kumwaambila buyo majwi aakuti zintu zilaba kabotu. (Jak. 2:15, 16) Mbubwenya buyo, luyando lwesu kuli Jehova alimwi abasimukoboma talweelede kutupa buyo kulomba Leza ‘kuti atume babelesi mumulimo wakutebula’ pele andiswe tweelede kuubeleka canguzu mulimo wakukambauka.—Mt. 9:38.

6, 7. (a) Ino “luyando lutali lwakuupaupa ameso” ninzi? (b) Ino nzikozyanyo nzi zimwi zyaluyando lwakubeja?

⁶ Mwaapostolo Johane wakalemba kuti tweelede kuyanda bamwi “mumilimo amukasimpe.” Aboobo, luyando lwesu “lutabi lwakuupaupa ameso,” naa “lutali lwakuupaupa ameso.” (Rom. 12:9; 2Kor. 6:6) Eeci caamba kuti tatukonzyi kutondezya luyando lwini-lwini kumwi katusola kusisa bwini mbotubede, mbuli kuti tusamide syaamankwamu. Tulakonzya kulibuzya kuti, ‘Sena kuli luyando lwakuupaupa ameso?’ Peepe. Oolu inga tiilwaba luyando naaceya pe.

⁷ Atulange-lange zikozyanyo zimwi zyaluyando lwakubeja. Mumuunda wa Edeni, Saatani wakalitondezya mbuli kuti wakali kumubikkila maano kapati Eva, pele micito yakwe mubwini yakali yakuliyanda alimwi akuupaupa ameso. (Matl. 3:4, 5) Mumazuba aa Davida, Ahitofeli wakatondezya kuti cilongwe cakwe amwami cakali cakuupaupa ameso. Ahitofeli wakamuzangila mwami ciindi naakabona kuti kuli bubotu bumwi mbwaakali kuyoojana. (2Sam. 15:31) Ncimwi buyo amazuba aano, basiluleyo abantu bamwi ibaleta lwaandaano mumbungano babelesya “majwi aalweeno alimwi aabumpelenge” kutegwa balibonye mbuli kuti mbaasiluyando, pele mubwini makanze aabo nkuliyanda.—Rom. 16:17, 18.

8. Ino mubuzyo nzi ngotweelede kulibuzya?

 ⁸ Luyando lwakuupaupa ameso lulausya nsoni kapati nkaambo lulibonya mbuli kuti mbube bwabunaleza bwaluyando lwakulyaaba kakuli ndwakubeja. Bantu balakonzya kweenwa akuupaupa ameso ooku, pele kutali Jehova pe. Mubwini, Jesu wakaamba kuti aabo bali mbuli basikuupaupa ameso bayoopegwa “cisubulo cipati.” (Mt. 24:51) Masimpe, babelesi ba Jehova inga tiibayanda kutondezya luyando lwakuupaupa ameso. Nokuba boobo, tweelede kulibuzya kuti, ‘Sena luyando lwangu ndwini-lwini lyoonse, talunyonganizyigwi akuliyanda naa lweeno?’ Atulange-lange nzila zili fwuka mbotukonzya kusolekesya kutondezya luyando “lutali lwakuupaupa ameso.”

9. Ino ncinzi luyando lwini-lwini ncoluyootukulwaizya kucita?

⁹ Amukkomane kubeleka nokuba kuti kunyina bantu bamubwene. Tweelede kulisungula kucitila bakwesu milimo yaluyando kakunyina ‘kubonwa abantu,’ ikuti kacikonzyeka kucita boobu. (Amubale Matayo 6:1-4.) Hananiya a Safira bakaalilwa kucita boobo. Muciindi cakukkomana kusanga kakunyina kwaambilizya mweelwe wamali ngobakali kuyanda kusanga, caantangalala bakabeja kuti bakasanga mali woonse eeco cakapa kuti bajaigwe akaambo kakuupaupa ameso kwabo. (Mil. 5:1-10) Mukwiimpana, luyando lwini-lwini lutukulwaizya kukkomana kwiinda mukubelekela bakwesu kakunyina kubonwa abantu banji cakuti boola weebele. Mucikozyanyo, bakwesu ibagwasya Kabunga Keendelezya kubamba cakulya cakumuuya balacita oobo cakutalizyibya, kunyina nobalisumpula naa kwaamba zibalo nzyobakalemba.

10. Mbuti mbotukonzya kuba ambele mukutondezya kuti tulabalemeka bamwi?

¹⁰ Amube ndinywe nomuli kumbele kulemeka bamwi. (Amubale Baroma 12:10.) Jesu wakapa cikozyanyo cibotu mukulemeka bamwi kwiinda mukubacitila milimo yaansi kapati. (Joh. 13:3-5, 12-15) Inga kwayandika kubeleka canguzu kutegwa tube abube bwakulicesya ibuyandika kutegwa katubalemeka bamwi munzila eeyi. Nobaba baapostolo tiibakali kuzimvwisya zintu zimwi nzyaakali kubacitila Jesu mane kusikila nobakatambula muuya uusalala. (Joh. 13:7) Tulakonzya kutondezya kuti tulabalemeka bamwi kwiinda mukutaciindizya kulibona kuti tulayandika kapati akaambo kalwiiyo, zintu nzyotujisi, naa mikuli njotujisi mumulimo wa Jehova. (Rom. 12:3) Alimwi muciindi cakubafwida munyono aabo ibalumbaizyigwa, tulakkomana ambabo nokuba kuti tulimvwa kuti andiswe tweelede kulemekwa mbubonya mbuli mbabo naa andiswe tuleelede kulumbaizyigwa akaambo kamulimo iwakacitwa.

11. Ino nkaambo nzi kulumbaizya kwesu ncokweelede kuzwa ansi aamoyo?

¹¹ Amubalumbaizye Banakristonyoko kuzwa ansi aamoyo. Tweelede kujana ciindi cakulumbaizyanya, nkaambo kucita boobo ‘kulabayaka bamwi.’ (Ef. 4:29) Nokuba boobo, tweelede kucita oobo kuzwa ansi aamoyo. Buyo-buyo, inga katumulumbaizya buyo cakuupaupa ameso muntu ooyo naa kutacibelesya coolwe ncotujisi cakupa lulayo luyandika. (Tus. 29:5) Kulumbaizya umwi mpoonya kumbali kamumwaamba zintu zibi akwalo nkuupaupa ameso. Mwaapostolo Paulo wakakaleya kakole aaka akupa cikozyanyo cibotu cakutondezya luyando lwini-lwini kwiinda munzila njaakali kubalumbaizya bamwi. Mucikozyanyo, wakabalumbaizya Banakristo baku Korinto kujatikizya mbazu zimwi mobakali kulilemeka kabotu. (1Kor. 11:2) Pele ciindi nobatakali kuyandika kulumbaizyigwa akaambo kamilimo yabo, wakabaambila munzila yaluzyalo alimwi iilimvwisya.—1Kor. 11:20-22.

12. Mbuti mbotukonzya kutondezya luyando lwini-lwini ciindi notusamausya bamwi?

¹² Amube bantu basamausya. Jehova utulailila kuba baabi kubakwesu abacizyi. (Amubale 1 Johane 3:17.) Nokuba boobo, tweelede kucita boobo katujisi makanze mabotu, kakunyina muuya  wakuliyanda naaceya. Tulakonzya kulibuzya kuti: ‘Sena ndisamausya buyo balongwe bangu, bantu bajisi mpuwo, naa aabo ibakonzya kundisamausya andime munzila imwi? Naa sena ndilangaula nzila mbondikonzya kubasamausya bakwesu abacizyi aabo mbonditanazyiba kabotu naa ibatajisi cili coonse ncobakonzya kundicitila andime?’ (Lk. 14:12-14) Naa atweezyeezye kuti Munakristoma ulibulide akaambo kakutazyeendelezya kabotu zintu naa tanaatulumba akaambo kakumusamausya nkotwakamusamausya. Mubukkale buli boobo, tulakonzya kutobela lulayo oolu lwakuti: “Amusamausyanye kakunyina kutongooka.” (1Pet. 4:9) Ikuti mwalutobela lulayo oolu, muyoojana lukkomano iluboola akaambo kakuba amakanze mabotu ciindi nomupa.—Mil. 20:35.

13. (a) Ino ndilili nocikonzya kuyuma kapati kugwasya baabo batajisi nguzu? (b) Ino nzintu nzi zigwasya nzyotukonzya kucita kutegwa tubagwasye batajisi nguzu?

¹³ Amubagwasye aabo ibatajisi nguzu. Luyando lwesu lulakonzya kubonwa kuti ndwini-lwini kwiinda mumulawo wamu Bbaibbele wakuti “amubagwasye aabo ibatajisi nguzu, akubakkazikila moyo bantu boonse.” (1Tes. 5:14) Nokuba kuti banji ibatajisi nguzu mukuya kwaciindi balayuma mulusyomo, bamwi bayandika kuzumanana kubakkazikila moyo. Eeci cilakonzya kubikkilizya akubandika ambabo twaambo twamu Magwalo itukulwaizya, kubatamba kubeleka limwi mumulimo wakukambauka, naa kujana ciindi cakubaswiilila nobajisi cakwaamba. Kuyungizya waawo, muciindi cakwiile kuyeeya kuti mukwesu naa mucizyi “muyumu” naa “tali muyumu,” toonse tweelede kuzyiba kuti kuli motucita kabotu alimwi amotulezya. Naba mwaapostolo Paulo wakakuzumina kulezya kwakwe. (2Kor. 12:9, 10) Aboobo, toonse tulakonzya kugwasyigwa kwiinda mulugwasyo lwa Banakristoma.

14. Ino tweelede kulisungula kusikila aali kutegwa tuzumanane kubamba luumuno abakwesu?

¹⁴ Amubambe luumuno. Tulacita zili zyoonse nzyotukonzya kutegwa tubambe luumuno abakwesu, noliba leelyo notulimvwa kuti tiibatumvwisya naa tiibatweendelezya kabotu. (Amubale Baroma 12:17, 18.) Kulilekelela kulakonzya kugwasya kutegwa umwi atalimvwi bubi, pele kweelede kuzwa ansi aamoyo. Mucikozyanyo, muciindi cakwiile kwaamba kuti, “cabija kuti mwalimvwa boobo,” mulakonzya kuzumina kulubizya kwanu kwiinda mukwaamba kuti, “cabija kuti ncondaamba camucisa kumoyo.” Luumuno lulayandika kapati mucikwati. Mulumi amukaintu tabeelede kulicengeezya kuti balayandana mubantu pele nobali balikke tabaambauzyanyi, babelesya majwi mabi, naa kulwana.

15. Mbuti mbotukonzya kutondezya kuti kulekelela kwesu nkwamasimpe?

¹⁵ Amulekelele camoyo woonse. Tulalekelela kwiinda mukumujatila muntu iwatulubizyila alimwi akuleka kumubikkilila. Kwiinda ‘mukweengelelana caluyando, kamusoleka camoyo woonse kuzumanana alukamantano lwamuuya mucaanzyo caluumuno,’ tulakonzya kubalekelela camoyo woonse aabo boonse ambweni ibatazyi kuti bakatulubizyila. (Ef. 4:2, 3) Kutegwa kulekelela kwesu kube kwamasimpe, tweelede kweendelezya  zintu nzyotuyeeya kutegwa ‘tutabikkilili.’ (1Kor. 13:4, 5) Ikuti naa twabikkilila, tulakonzya kuba muntenda yakunyonyoona cilongwe cesu amukwesu naa mucizyi kukabe kutamani pele alimwi a Jehova. (Mt. 6:14, 15) Alimwi tulakonzya kutondezya kuti kulekelela kwesu nkwamasimpe kwiinda mukubapailila aabo ibatulubizyila.—Lk. 6:27, 28.

16. Ino tweelede kwiibona buti mikuli mumulimo wa Jehova?

¹⁶ Amusaangune kucita nzyobayanda bamwi kutali nzyomuyanda. Kuti twapegwa mikuli mumulimo wa Jehova, tweelede kwiibona kuba zyoolwe zyakutondezya kuti luyando lwesu ndwini-lwini kwiinda ‘mukuyandisya kugwasya bamwi ikutali buyo kuligwasya lwesu tobeni.’ (1Kor. 10:24) Mucikozyanyo, kumiswaangano yesu yabbazu ayacooko, basikugwasyilizya inga balasaanguna kunjila mukkalila basimuswaangano bantu boonse kabatananjila. Muciindi cakubona mukuli wabo kuba coolwe cakulisalila aakukkala alikabotu amikwasyi yabo, bunji bwabakwesu aaba basala kukkala mumasena aatalombozyegwi kapati mwalo mobabelekela. Kwiinda mukusaanguna kucita nzyobayanda bamwi, batondezya luyando lwini-lwini kutali kuliyanda. Ino mbuti mbomukonzya kwiiya cikozyanyo cabo cibotu?

17. Ino luyando lwini-lwini luyoomupa kucita nzi muntu ikuti wacita cibi cipati?

¹⁷ Amulyaambilile akuleka kucita zibi cakusisikizya. Banakristo bamwi bakacita zibi zipati akusola kuzisisa kutegwa batafwi nsoni naa kutyompya bamwi. (Tus. 28:13) Pele, kucita boobo taluli luyando, nkaambo cinyonyoona sikubisya alimwi abantu bamwi buyo. Cilakonzya kusinkila muuya wa Leza alimwi akunyonganya luumuno lwambungano yoonse. (Ef. 4:30) Luyando lwini-lwini lupa kuti Banakristo ibakacita zibi zipati babandike abaalu kutegwa bapegwe lugwasyo ndobayandika.—Jak. 5:14, 15.

18. Ino luyando lwini-lwini luyandika kapati buti?

¹⁸ Luyando ndolwiinda abube boonse. (1Kor. 13:13) Ndolutuzyibya kuti tuli basikutobela ba Jesu akuti twiiya Jehova, Kasensa kaluyando. (Ef. 5:1, 2) Paulo wakalemba kuti: “Kuti kanditajisi luyando, ndili wabuyo.” (1Kor. 13:2) Atuzumanane kutondezya luyando lwesu, kutali buyo ‘mumajwi’ pele alimwi alube “lwamumilimo amukasimpe.”