1, 2. (a) Mulimo nzi Jesu ngwaakabikkila maano kapati mubuumi bwakwe, alimwi nkaambo nzi? (b) Ncinzi ncotweelede kucita kutegwa tuzwidilile katuli “basimilimonyina a Leza”?

JESU KRISTO wakali mubezi alimwi mubelesi wa Leza. (Mk. 6:3; Rom. 15:8) Milimo yoonse yobilo wakaizyiba kabotu-kabotu. Mbwaanga wakali mubezi, wakaiya mbwaakeelede kuzyibelesya zibelesyo zibelesyegwa mumulimo ooyu. Kali mwiiyi wamakani mabotu, wakalubelesya kabotu luzyibo lwamu Magwalo ndwaakajisi kutegwa agwasye bantu ibakali kubonwa kuba baansi kapati kuti bamvwe kasimpe kamu Jwi lya Leza. (Mt. 7:28; Lk. 24:32, 45) Naakajisi myaka yakuzyalwa iili 30, Jesu wakazibikka ambali zibelesyo nzyaakali kubelesya mumulimo wakwe wakubeza nkaambo wakalizyi kuti kuba mubelesi wa Leza wakali mulimo uuyandika kapati. Wakaamba kuti mulimo wakwaambilizya makani mabotu aa Bwami bwa Leza nkamwi kakaambo nkaakatuminwa anyika. (Mt. 20:28; Lk. 3:23; 4:43) Jesu wakabikka mulimo wakukambauka mubusena bwakusaanguna mubuumi bwakwe, alimwi wakali kuyanda kuti abamwi bamusangane mumulimo ooyu.—Mt. 9:35-38.

² Ambweni tatuli babezi, pele tuli babelesi bamakani mabotu. Mulimo ooyu ulayandika kapati cakuti Leza ulijatikizyidwe; twiitwa kuti tuli “basimilimonyina a Leza.” (1Kor. 3:9; 2Kor. 6:4) Tulizyi kuti “ijwi lya [Jehova] lyoonse mbolibede nkasimpe.” (Int. 119:159, 160) Nkakaambo kaako tuyanda kuba masimpe kuti ‘tulayiisya akupandulula jwi lyakasimpe bweelede’ mumulimo wesu. (Amubale 2 Timoteo 2:15.) Kutegwa tucite oobo, tulazumanana kuyungizya luzyibo lwesu  mukubelesya Bbaibbele, cibelesyo ciyandika kapati ncotubelesya kuyiisya kasimpe kajatikizya Jehova, Jesu, alimwi a Bwami. Kutegwa tuzwidilile mumulimo wesu, mbunga ya Jehova yakapanga zibelesyo zimbi nzyotweelede kuzyiba kapati mbozibelesyegwa. Zibelesyo eezyi tuzyaamba kuti Zibelesyo Nzyotubelesya Kapati Mukuyiisya.

3. Ncinzi ncotweelede kubikkila maano kapati muciindi cisyeede cakupa bumboni, alimwi kweelana alugwalo lwa Milimo 13:48, mbaani mbotweelede kuyandaula?

³ Mulakonzya kulibuzya kaambo zibelesyo zyesu ncoziitwa kuti Zibelesyo Nzyotubelesya Kapati Mukuyiisya, ikutali Zibelesyo Nzyotubelesya Kapati Mukukambauka. “Kukambauka” caamba kwaambilizya mulumbe; pele “kuyiisya” caamba kwaamba mulumbe kumuntu munzila iimusika amoyo, kutegwa abweze ntaamu kweelena anzyaiya. Muciindi cisyeede cakupa bumboni, makanze eesu ayelede kuba aakutalisya ziiyo zya Bbaibbele alimwi akuyiisya bantu kasimpe. Eeci caamba kuti tweelede kubeleka canguzu kuyandaula boonse aabo ibali amyoyo mibotu ‘ibalibambilide kutambula buumi butamani’ alimwi akubagwasya kuba basyomi.—Amubale Milimo 13:44-48.

4. Mbuti mbotukonzya kubazyiba aabo “ibalibambilide kutambula buumi butamani,” alimwi ino inga twabajana buti?

⁴ Mbuti mbotukonzya kubazyiba aabo “ibalibambilide kutambula buumi butamani”? Mbubwenya mbocakabede mumwaanda wamyaka wakusaanguna, nzila ilikke mbotukonzya kubajana bantu aabo nkwiinda mukupa bumboni. Aboobo tweelede kucita mbubwenya Jesu mbwaakalailila: “Kufwumbwa mumunzi naa mukanzi momwanjila, amuyandaule muntu weelela.” (Mt. 10:11) Tatulangili kuti bantu batasyomeki, balisumpula, naa aabo bateendelezyegwi azintu zyakumuuya balaatambula makani mabotu. Tuyandaula bantu basyomeka, balicesya, alimwi ibalaanzala yakasimpe. Kuyandaula ooku tulakonzya kukukozyanisya ancaakali kucita Jesu kali mubezi, wakali kuyandaula mapulanga aayelede mukupanga zintu mbuli zijazyo, majoko naa zintu zimwi buyo. Ciindi naakali kwaajana mapulanga aayo, wakali kubweza zibelesyo zyakwe, kubelesya luzyibo lwakwe, alimwi akupanga zintu eezyo. Andiswe tweelede kucita mbubwenya ciindi notuyanda kugwasya bantu babombe myoyo kuba basikwiiya.—Mt. 28:19, 20.

5. Ncinzi ncotweelede kuzyiba kujatikizya zibelesyo izijanika mu Zibelesyo Nzyotubelesya Kapati Mukuyiisya? Amupe cikozyanyo. (Amubone zifwanikiso izili kumatalikilo aacibalo.)

⁵ Mukabbokesi kazibelesyo kali koonse, cibelesyo cimwi acimwi cili amulimo wancico uugaminide. Mucikozyanyo, atubone zibelesyo nzyaakali kubelesya Jesu mumulimo wakwe. * Wakali kuyandika cipimyo alimwi apensulo; kutenda, kudonkola, alimwi akubeza kabotu-kabotu; kweelanya, akuziswaanganya zibeela-beela. Mbubwenya buyo, Cibelesyo cimwi acimwi icijanika mu Zibelesyo Nzyotubelesya Kapati Mukuyiisya cilijisi mulimo uugaminide. Aboobo atuzilange-lange zibelesyo zyesu akubona mbotukonzya kuzibelesya zibelesyo eezyi ziyandika kapati nzyotwakapegwa.

6, 7. (a) Ino mutubelesya buti tukkaadi twaa jw.org? (b) Ino kapepa kakutamba bantu kumiswaangano yambungano kajisi mulimo nzi uuyandika kapati?

⁶ Tukkaadi Twaa Jw.Org. Ootu ntukkaadi tusyoonto pele ncibelesyo cibotu kapati ncotubelesya kulizyibya kubantu alimwi akubatondezya webbusaiti yesu, alo mpobakonzya kwiiya zinji kujatikizya ndiswe alimwi buya akulomba ciiyo ca Bbaibbele. Bantu bainda ku 400,000, bakalomba ziiyo zya Bbaibbele a jw.org, alimwi bantu banji balacita oobo buzuba abuzuba! Mulakonzya kuyobola tukkaadi tusyoonto buyo akutubelesya ciindi nomucita milimo yanu yabuzuba abuzuba.

⁷ Tupepa Twakutamba Bantu. Kanji-kanji kuli kapepa nkotwiita kuti kapepa kakutamba bantu kumiswaangano yambungano, kapepa aaka kalijisi mulimo uuyandika kapati. Kaamba kuti: “Mwatambwa kwiiya Bbaibbele a Bakamboni ba Jehova.”  Mpoonya alimwi kaamba kuti mulakonzya kucita oobo “kumiswaangano yesu yakubuleya” naa “kuba amuntu uumuyiisya.” Aboobo, cibelesyo eeci tacituzyibyi buyo kubantu pele alimwi cilabatamba “aabo bazyi kuti bayandika kusololelwa a Leza” kwiiya Bbibbele andiswe. (Mt. 5:3) Nokuba boobo, bantu balitambidwe kujanika kumiswaangano yesu nokuba kuti bazumina ciiyo ca Bbaibbele naa pe. Ikuti bajanika kumiswaangano, bayoobona nzyobakonzya kwiiya kujatikizya Bbaibbele.

8. Mbuti mbocigwasya kubantu kuti bajanika kumiswaangano yesu nociba ciindi comwe buyo? Amupe cikozyanyo.

⁸ Cilayandika kapati kuzumanana kubatamba bantu kujanika kumiswaangano yesu nociba ciindi comwe buyo. Nkaambo nzi? Bayoobona kuti Bakamboni ba Jehova bayiisya kasimpe kazwa mu Bbaibbele alimwi akugwasya bantu kumuzyiba Leza, pele muzikombelo zyakubeja tabaciti oobo. (Is. 65:13) Ba Ray alimwi aba Linda, banabukwetene baku United States, bakalubona lwiindano oolu myaka minji yainda. Banabukwetene aaba bakayeeya kuti batalike kuunka kucikombelo. Bakali kusyoma muli Leza alimwi bakali kuyanda kumuzyiba, aboobo bakatalika kuunka kuzikombelo zyoonse izyakali mudolopo lyabo. Kwakali zikombelo zinji zisiyene-siyene. Banabukwetene aaba bakapangana kubikkila maano kutwaambo tobilo ntobakeelede kubona kucikombelo cili coonse ncobakali kuyoonjila. Kakusaanguna, bakeelede kwiiya cintu cimwi kucikombelo, mpoonya kabili, bantu bamucikombelo eeco bakeelede kuti kabasama mbuli bantu ibaiminina Leza. Nokwakainda myaka minji, bakazinjila zikombelo zyoonse, pele bakatyompwa kapati. Kunyina ncobakaiya, alimwi bantu ibakali kujanika kuzikombelo eezyo tiibakali kusama cabulemu. Nobakazwa mucikombelo icakali camamanino amulongo wabo, ba Linda bakaunka kumulimo mpoonya ba Ray bakaunka kuŋanda. Kabali munzila, ba Ray bakanyona a Ŋanda ya Bwami akulyaambauzya kabati, ‘Mbuti kuti ndanjila buyo oomu akubona mbobabede bantu aaba?’ Mubwini, nzyobakabona nzyakaliindene kapati anzyobakabona kuzikombelo zimbi zyoonse! Ku Ŋanda ya Bwami, bantu boonse bakalikusangalizya alimwi bakasamide cabulemu. Ba Ray bakakkalila kumbele alimwi bakazikkomanina kapati nzyobakaiya! Eeci cili buyo mbubwenya mbwaakaamba mwaapostolo Paulo kujatikizya muntu iwajanika kumiswaangano ya Banakristo ciindi cakusaanguna akwaamba kuti: “Ncobeni Leza mpali akati kanu.” (1Kor. 14:23-25) Kuzwa ciindi eeco, ba Ray bakali kujanika kumiswaangano lyoonse mu Nsondo; mpoonya bakatalika akujanika ku Muswaangano Wabuumi Amulimo lyoonse. Abalo ba Linda bakatalika kuswaangana, alimwi nokuba kuti bakajisi myaka yakuzyalwa iili kuma 70, bakazumina kwiiya Bbaibbele alimwi bakabbapatizyigwa.

9, 10. (a) Nkaambo nzi matulakiti ncatakatazyi kubelesya? (b) Amupandulule mboibelesyegwa tulakiti yakuti Ino Bwami bwa Leza Ninzi?

⁹ Matulakiti. Tulijisi matulakiti aali lusele aatakatazyi kubelesya alo aabeleka kabotu kutalisya mibandi. Mbwaanga matulakiti aaya akatalika kumwaigwa mu 2013, kuzwa mumwaka ooyu, kwasimbwa matulakiti aali 5 bbiliyoni! Bubotu bwamatulakiti aaya mbwakuti ciindi mwazyiba mboibelesyegwa yomwe, nkokuti inga mwacikonzya kwaabelesya woonse nkaambo alikozyenye mbwaabelesyegwa. Mbuti mbomukonzya kubelesya tulakiti kutegwa mutalisye mubandi amuntu?

¹⁰ Ambweni inga mwasala kubelesya katulakiti kakuti Ino Bwami bwa Leza Ninzi? Amumutondezye muntu mubuzyo uuli kumatalikilo akumubuzya kuti: “Sena kuli nomwakalibuzyide kale kuti ino Bwami bwa Leza ninzi? Sena inga mwaamba kuti . . . ?” Mpoonya amumulombe kuti asale bwiinguzi bomwe akati kabwiinguzi botatwe. Kakunyina kwaamba naa bwiinguzi bwakwe buliluzi naa pe, amujalule mukatulakiti acibeela cakuti “Ncolyaamba Bbaibbele” alimwi akubala magwalo aabikkidwe, Daniele 2:44 alimwi a Isaya 9:6. Kuti kacikonzyeka, inga mwazumanana amubandi. Kumamanino aamubandi wanu, amubuzye mubuzyo uuli kunze aakatulakiti acibeela cakuti  “Ino Muyeeya Buti”: “Ino buumi bunooli buti mubweendelezi bwa Bwami bwa Leza?” Eeci ciyoopa kuti mukabe amatalikilo aamubandi uutobela amuntu ooyo. Mwaakupilukila, mulakonzya kumutola muciiyo 7 mubroshuwa yakuti Makani Mabotu Aazwa Kuli Leza!, yalo iili njimwi yazibelesyo nzyotubelesya kutalisya ziiyo zya Bbaibbele.

11. Ino mamagazini eesu ajisi mulimo nzi, pele ncinzi ncotweelede kuzyiba kujatikizya ngawo?

¹¹ Mamagazini. Ngazi Yamulindizi alimwi a Sinsimuka! nzeziinda kumwaigwa alimwi akusandululwa munyika! Akaambo kakuti mamagazini aaya alabalwa abantu banji kapati mumasi woonse, makani aayeeme amitwe iili acivwumbyo apangidwe munzila iikkomanisya bantu boonse mumasena woonse. Tweelede kwaabelesya kazili zibelesyo zipa muntu kuba aluyandisisyo munzintu ziyandika kapati mubuumi mazuba aano. Nokuba boobo, kutegwa twaabelesye kabotu mamagazini aaya, tweelede kubazyiba ibalembelwa magazini imwi aimwi.

12. (a) Ino Sinsimuka! ibambilidwe bani, alimwi ino ijisi makanze nzi? (b) Nkuzwidilila kuli buti nkomwakabona caino-ino kwiinda mukubelesya cibelesyo eeci?

¹² Sinsimuka! yakabambilwa basikubala ibajisi luzyibo lusyoonto naa aabo ibatajisi luzyibo luli loonse kujatikizya Bbaibbele. Ambweni buya kunyina ncobazyi kujatikizya njiisyo zya Banakristo, ambweni tababusyomi bukombi, alimwi ndiza tabazyi kuti Bbaibbele lilagwasya. Mulimo mupati wa Sinsimuka! ngwakugwasya basikubala kuzyiba kuti Leza nkwali. (Rom. 1:20; Heb. 11:6) Alimwi makanze aamwi ngakugwasya basikubala kusyoma kuti Bbaibbele “ncobeni . . . majwi aa Leza.” (1Tes. 2:13) Mitwe iili acivwumbyo yotatwe yamu 2018 njakuti: “Nzila Yalukkomano,” “Nzila Izili 12 Zikonzya Kupa Kuti Mukwasyi Uzwidilile,” alimwi awakuti, “Luumbulizyo Kulibaabo Balila.”

13. (a) Ino Ngazi Yamulindizi yakubuleya ibambilidwe bani? (b) Nkuzwidilila kuli buti nkomwakabona caino-ino kwiinda mukubelesya cibelesyo eeci?

¹³ Ngazi Yamulindizi, yakubuleya, ibikkila maano kuzintu zyakumuuya kuli baabo bamulemeka Leza alimwi a Jwi lyakwe. Nokuba kuti inga kabajisi luzyibo lumwi lwamu Bbaibbele, tabazimvwisyi njiisyo zyandilyo zyakasimpe. (Rom. 10:2; 1Tim. 2:3, 4) Mitwe iili acivwumbyo yotatwe yamu 2018 ilaingula mibuzyo eeyi yakuti: “Sena Bbaibbele Licigwasya Amazuba Aano?,” “Ino Zintu Ziyooba Buti Kumbele Aamazuba?,” alimwi awakuti “Sena Leza Ulamubikkila Maano Nywebo Kumugama?”

14. (a) Ino Mavidiyo one aali mu Zibelesyo Nzyotubelesya Kapati Mukuyiisya ajisi mulimo nzi? (b) Nkuzwidilila kuli buti nkomwakabona kwiinda mukutondezya mavidiyo aaya?

¹⁴ Mavidiyo. Mumazuba aa Jesu, mubezi wakali kubelesya zibelesyo zibelesyegwa buyo amaanza. Nokuba boobo, mazuba aano, basikubeza balijisi azibelesyo zibelesya magesi, mbuli masaha, zyakudonkozya, zyakubotya, zyakubikisya mpikili, alimwi azimwi buyo. Kuyungizya amabbuku aasimbidwe, lino tujisi mavidiyo mabotu aakutondezya bantu, nkokuti mavidiyo one aali akati kazibelesyo nzyotujisi: Nkaambo Nzi Ncomweelede Kwiiya Bbaibbele?, Ino Ciiyo Ca Bbaibbele Cicitwa Buti?, Ino Ncinzi Cicitika Kuŋanda ya Bwami?, alimwi ayakuti Bakamboni ba Jehova—Ino Ndiswe Bani? Mavidiyo aamaminiti aatasiki kuli obilo alabeleka kabotu mulweendo lwakusaanguna. Malamfwu alakonzya kubelesyegwa munyendo zyakupilukila alimwi akuli baabo ibajisi ciindi cinji. Zibelesyo eezyi zibotu kapati zilakonzya kubakulwaizya bantu kwiiya Bbaibbele alimwi akujanika kumiswaangano yesu.

15. Amupe zikozyanyo zijatikizya mbobakulwaizyigwa kapati bantu ciindi nobeebelela noiba vidiyo yomwe buyo mumwaambo wabo.

¹⁵ Mucikozyanyo, ciindi mucizyi naakaswaangana amukaintu iwakazwa ku Micronesia iwakali kwaambaula mwaambo wachi Yapese, mucizyi wakamutondezya vidiyo yakuti Nkaambo Nzi Ncomweelede Kwiiya Bbaibbele? mumwaambo wakwe. Noyakatalika vidiyo, mukaintu ooyo wakaamba kuti: “Ooyu ngomwaambo wangu. Tandikonzyi  kucisyoma eeci! Kumvwa buyo mbwaambaula ndazyiba kuti ooyu tuzwa limwi. Waambaula mwaambo wangu!” Mpoonya mukaintu ooyu wakaamba kuti uyoozibala zibalo zyoonse alimwi akweebelela mavidiyo woonse aaliko aa jw.org. mumwaambo wakwe. (Amweezyanisye Milimo 2:8, 11.) Atulange-lange cakuluula cimbi. Mucizyi ku United States wakatumina mwana wamupati wakwe liinki yavidiyo njoonya eeyi mumwaambo wakwe. Mwana ooyo wakayeebelela vidiyo akulembela mucizyi ooyu kuti: “Cibeela cakuti Saatani ngoweendelezya nyika cakandikkomanisya kapati. Ndakalomba ciiyo ca Bbaibbele.” Musankwa ooyu ukkala mucisi mulimo wesu moukasyidwe!

16. Amupandulule makanze aabroshuwa imwi aimwi: (a) Amumuswiilile Leza Kutegwa Mukapone Kukabe Kutamani. (b) Makani Mabotu Aazwa Kuli Leza! (c) Ino Mbaani Bacita Kuyanda kwa Jehova Mazuba Aano?

¹⁶ Mabroshuwa. Mbuti mbomukonzya kuyiisya kasimpe kumuntu uutacizyi kubala naa uutajisi mabbuku aamba zyamu Bbaibbele aamumwaambo wakwe? Tulicijisi cibelesyo eeco, nibroshuwa yakuti Amumuswiilile Leza Kutegwa Mukapone Kukabe Kutamani. * Cibelesyo cibotu kapati kutalisya ziiyo zya Bbaibbele nibroshuwa yakuti Makani Mabotu Aazwa Kuli Leza! Mulakonzya kumutondezya muntu ziiyo izili 14 izili kunze aambroshuwa alimwi akumulomba kuti asale ciiyo camukkomanisya kapati. Mpoonya inga mwatalika kwiiya muciiyo eeco. Sena kuli nomwakasolede kale kubelesya nzila eeyi munyendo zyanu zyakupilukila? Ino Mbaani Bacita Kuyanda kwa Jehova Mazuba Aano? nibroshuwa yatatu iiliko mu Zibelesyo Nzyotubelesya Kapati Mukuyiisya. Ibambilidwe kusololela basikwiiya kumbunga. Kutegwa muzyibe mboibelesyegwa nomwamana kwiiya ciiyo cimwi acimwi, Amubone Kabbuku Kamuswaangano Wabuumi Amulimo Wesu wa Bunakristo kamu March 2017.

17. (a) Ino bbuku lyakwiiya limwi alimwi lijisi makanze nzi? (b) Ino ncinzi ciyandika kuli baabo boonse ibayaambele alimwi ibalibambilide kubbapatizyigwa, alimwi ino nkaambo nzi?

¹⁷ Mabbuku. Camana kutalisyigwa ciiyo mubroshuwa, mulakonzya kucinca aciindi cili coonse akutalika bbuku lya Ncinzi Bbaibbele Ncolituyiisya? Cibelesyo eeci ciyoogwasya sikwiiya kuyungizya luzyibo lwanjiisyo zyantalisyo zyamu Bbaibbele. Mwalimana bbuku eeli alimwi ikuti sikwiiya kayaambele kumuuya, amuzumanane kwiiya mubbuku lyakuti Mbomukonzya Kukkala Muluyando lwa Leza. Cibelesyo eeci ciyooyiisya sikwiiya kujatikizya mbwayelede kubelesya njiisyo zyamu Bbaibbele mubuumi bwabuzuba abuzuba. Kamuyeeya kuti, nokuba kuti babbapatizyigwa, aabo bapya beelede kuzumanana kwiiya kusikila mane bakaamane mabbuku oonse obilo. Eeci ciyoobagwasya kusimpa miyanda mukasimpe.—Amubale Bakolose 2:6, 7.

18. (a) Ino lugwalo lwa 1 Timoteo 4:16 lutukulwaizya kucita nzi mbotuli bamayi bakasimpe, alimwi ncinzi cikonzya kucitika? (b) Ciindi notubelesya Zibelesyo Nzyotubelesya Kapati Mukuyiisya, makanze nzi ngotweelede kuba angawo?

¹⁸ Mbotuli Bakamboni ba Jehova, twakapegwa “mulumbe wakasimpe kamakani mabotu” uusololela bantu kubuumi butamani. (Kol. 1:5; amubale 1 Timoteyo 4:16.) Nkakaambo kaako, twakapegwa Zibelesyo Nzyotubelesya Kapati Mukuyiisya izijisi zintu nzyotuyandika. (Amubone kabbokesi kakuti “ Zibelesyo Nzyotubelesya Kapati Mukuyiisya.”) Atuzibelesye zibelesyo eezyi cabupampu alimwi kusikila mpotugolela. Sikumwaya umwi aumwi ulakonzya kusala mabbuku ngayanda aali mucibelesyo cesu kubandika amuntu uujisi luyandisisyo alimwi aciindi nakonzya kucita oobo. Pele makanze eesu taali aakumwaya buyo mabbuku; naa kusiya mabbuku kubantu batatondezyi luyandisisyo kumulumbe wesu. Makanze eesu ngakugwasya bantu basyomeka, balicesya, alimwi ibalaanzala yakumuuya kuba basikwiiya, nkokuti bantu ‘ibalibambilide kutambula buumi butamani akuba basyomi.’—Mil. 13:48; Mt. 28:19, 20.